Məktəbəqədər və Ümumi Təhsil üzrə Dövlət Agentliyi (MÜTDA) övladları I sinfə gedəcək valideynlərə çağırış edib.

Agentlikdən verilən məlumata görə, mayın 1-dən start verilən 2024-2025-ci tədris ili üzrə uşaqların I sinfə elektron qəbulu prosesi hazırda davam edir.

Bildirilib ki, hazırda ölkə üzrə bütün ümumi təhsil müəssisələrində Azərbaycan və digər bölmələr üzrə sərbəst qaydada məktəb və müəllim seçimi aparılır.

Bu günə qədər ümumilikdə 122 min uşaq I sinfə qəbul edilib.

2024-2025-ci tədris ili üçün birinci sinfə qəbulu proqnozlaşdırılan məktəbyaşlı uşaqların sayı ilə qeydiyyatdan keçənlərin sayında fərq müşahidə edilir.

Tədris ili yaxınlaşdıqca ümumi təhsil müəssisələrində uşaqların qeydiyyatının aparılması, sənədləşmə işlərinin dəqiq və vaxtında başa çatdırılması baxımından bu mərhələnin əhəmiyyətini nəzərə alaraq bildiririk ki, övladlarının 2024-2025-ci tədris ili üzrə I sinfə elektron qəbulu prosesini həyata keçirmək istəyən valideynlər mektebeqebul.edu.az saytı vasitəsilə şəxsi kabinet yaradaraq məktəb və müəllim seçimi edə bilərlər.

Ölkədə son illər repetitorluğun geniş vüsət alması aktual olan məsələlərdən biridir.

Bu gün məktəb şagirdlərinin böyük əksəriyyəti məhz bu sektorun fəaliyyətindən faydalanır. Müəllimlərin isə əksər hissəsi repetitorluq fəaliyyəti ilə məşğul olur. Onu da vurğulayaq ki, bir vaxtlar repetitorluğun “bunker” növü yayılmışdı ki, onlar əsasən imtahan proqramlarını hazırlayan müəllimlər hesab edilirdi. Artıq son zamanlar isə “blok” adlanan yeni bir repetitorluq növü fəaliyyətə başlayıb.

Bu sahə üzrə fəaliyyət göstərən repetitorlar şagirdləri buraxılış deyil, ancaq qısa müddətdə, yüksək məbləğ əsasında blok imtahanı üzrə hazırlaşmasına yardım edirlər. Bu da bir faktdır ki, şagirdlər adətən repetitor yanında bir neçə il hazırlaşmalı olurlar. “Blok” hazırlığı isə qısa müddətə, yalnız imtahan sualları əsasında aparıldığı üçün şagird yalnız sualların cavablarını əzbərləyə bilir. Qiymət isə kifayət qədər bahadır və hətta dördrəqəmli olduğu deyilir.

Onsuz da bu gün repetitor ümidinə ali məktəbə qəbul olan şagirdlər “blok” repetitorluğundan hansı təhsili mənimsəyəcək?

Təhsil üzrə ekspert Nabatəli Qulamoğlu “Cümhuriyət”-ə bildirib ki, repetitor müəllimlərin böyük əksəriyyəti öz işinin öhdəsindən gəlir:

“Onların böyük əksəriyyətini tanıyıram və yüksək balla sertifikasiyadan da keçiblər. Həmin repetitorlar şagirdləri paralel şəkildə, həm buraxılış, həm də blok imtahanına hazırlayırlar. Qəbul imtahanı hər iki imtahanın nəticələrinin cəmi əsasında formalaşır. Heç kim deyə bilməz ki, mən blok imthanından bu qədər bal, ancaq buraxılış imtahanından çox az bal toplayım. Mən repetitorluğun başqa bir formasını deyərdim. Belə ki, vaxt vardı, repetitorlar hazırlıq kurslarında fəaliyyət göstərərdilər. Hazırlıq kurslarını “oliqarxlar” ələ keçirdilər və indi orada repetitor yoxdur. Məsələn, “Kaspi” kursları vardı, heç bir nailiyyəti də olmadı, çünki müəllimə 300 manat maaş verirdi, müəllimlər də həmin kursu tərk etdi. Mən şəxsən 5 il öncə nəvəmi gətirmişəm “Xırdalanda kursuna gedib və 600 balla ali məktəbə qəbul olub. Halbuki heç 350 bal da toplaya bilmirdi. Ancaq ötən il nəvəmi getdiyi hazırlıq kursundan çıxardım, çünki dərs keçmirdilər, repetitorlar artıq oradan dağılışıb. İndi repetitorlar özləri toplaşıb kurs yaradırlar. Bir blok üzrə, məsələn, riyaziyyat, coğrafiya, tarix və digər fənnlər üzrə müəllimlər bir ev icarəyə götürürlər, orada şagirdləri qəbul edirlər, həm buraxılış, həm də blok imtahanına hazırlayırlar. Repetitorluğun forması bir az dəyişib. Ancaq mənə elə gəlir ki, repetitorluq Azərbaycan təhsilinin ümidverən sektorudur. Nə qədər dövlət sektoru bu vəziyyətdədir, repetitorluq fəaliyyət göstərəcək”.

Ekspertin sözlərinə görə, hazırda adambaşına maliyyələşmə müzakirə olunur:

“Halbuki bu, mənim layihəmdir. 2005-ci ildə bu layihənin Azərbaycan üçün bütün mexanizmlərini açıqlamışam. Eləcə də bir neçə KİV-də izah etmişəm ki, adambaşına maliyyələşməyə necə keçmək lazımdır. Bu, özəl sektor deyil, dövlətin mövcud olan təhsilə ayırdığı büdcənin hesabına formalaşır. Təhsilalanlarla təhsilverənlər birbaşa əlaqədə olur, bu əlaqə təhsilə nəsə verir. Söhbət dövlət sektorunun məhv olmasından gedir. Ona görə də adambaşına ayrılacaq vəsait direktorların bank hesabına köçürüləcək. Direktorlar da həmin vəsaiti “yeyəcəklər”. Sonra da deyəcəklər ki, adambaşına maliyyələşdirdik yenə alınmadı. Məqsəd bu layihəni sabotaj eləməkdir. Hesab edirəm ki, nə qədər təhsil islahatı aparılmayıb, bunlar hamısı mənasızdır. Repetitorluğa qarşı çıxış etməsinlər, azad təhsildir. Nə qədər ki, repetitorluq mövcuddur, az-çox təhsil verəcəklər. Əgər təhsil islahatı aparılsa, adambaşına maliyyələşmə mexanizmi yaradılsa, bu mexanizm fəaliyyət göstərsə, repetitorların hamısı təsis olunmuş məktəblərə qayıdacaqlar. Onlara orada yüksək maaş verəcəklər və fərdi məşğul olmağa ehtiyac da qalmayacaq. “Blok” repetitorluğu sağlam məntiqə ziddir. Necə ola bilər ki, abituriyent blok imtahanına hazırlaşsın, buraxılışa hazırlaşmasın, axı ikisi toplanır. Əgər belə adamlar varsa, onlara “maşennik” adından başqa ad vermək olmaz”.

Paytaxt bazarlarında qıtlıq və yüksək qiymətlər hökm sürür. Yayın ortalarında pomidor və xiyarın orta qiyməti yanvar ayı ilə müqayisə oluna bilər, ona görə də bəzi satıcılar piştaxtalarını yığışdırıblar. Belə ki, bu mövsüm üçün xarakterik olmayan baha qiymətlər alıcıları qaçırdır.

Hər yay şəhər bazarları yerli kənd təsərrüfatı sənayesinin vəziyyətinin və nəzarətsiz ixracatın göstəricisinə çevrilir. Alıcıların sözlərinə görə, mövsüm ərzində qiymətlər artmaqda davam edir, təklif isə azalır. Bu tendensiya xüsusilə yerli meyvə-tərəvəz seqmentində güclüdür. Kənd təsərrüfatı məhsulları bazarda dalğa-dalğa görünür və birdən-birə piştaxtalardan yoxa çıxır.

Bundan əlavə, bazar eyni tipli yerli və ya xaricdən gətirilən kənd təsərrüfatı çeşidinin axınına məruz qalır - eyni topdansatış qiymətləri ilə təklif olunur. Demək olar ki, bütün topdansatışçılar oxşar qiymətə ərzaq alırlar və bazarlardakı alverçilər öz qiymətlərini də tətbiq edirlər və bu da praktiki olaraq ümumi bazardan fərqlənmir. Nəticədə malların qiymətləri və çeşidləri də eyni olur.

Yerli iqtisadçılar vahid qiymətlərin təbiqini və məhsulların çeşidini bu sahənin inhisarlaşmasının güzgü əksini göstərdiyini iddia edirlər. Ancaq burada, bütün pərakəndə satış zəncirində olduğu kimi, qiymətlər bir-birindən az fərqlənir. Alıcıların fikrincə, bir satıcının qiymət etiketini və təklifini görəndə başqalarının nə və nə üçün satdığını soruşmaq lazım deyil.

Paytaxt bazarlarında qiymət konyukturası çox şeyi arzuolunmaz edir. Müəyyən ucuzlaşmadan sonra pomidorun qiyməti kəskin bahalaşaraq 2-2,5 manata çatıb. Bu yay şəhər rəflərindən xiyar demək olar ki, yoxa çıxıb. “Şumal” çeşidini 2-4 manata satan az sayda satıcı var. Yüksək qiymətə görə məhsul tez-tez rəflərdə xarab olur və buna görə də alıcılar və alverçilər arasında tələbat yoxdur. Əgər qış-yaz aylarında şəhər piştaxtalarında bu tərəvəzin kiloqramının qiyməti 5-14 manata çatırdısa, mövsüm ərzində topdansatış qiyməti yüksək olduğundan, o, paytaxt bazarlarını tamamilə tərk edib.

Gilasın qiyməti davamlı olaraq yüksək qalır - bu il həmin məhsul orta hesabla 2,5-4 manata təklif olunub. Ərik, şaftalı və çiyələyin qiyməti hələ də yüksəkdir - qiyməti 2-3 manatdan başlayır. İsti mövsümün ortalarında kartof bir qədər ucuzlaşıb - 0,70-0,80 manat, soğanın qiyməti bu il manatdan yuxarı qalxmayıb. Badımcan bazarlarda ucuzlaşıb - 0,40-0,60 qəpikdən baha deyil. Amma sarımsağın (4 - 6 manat), bolqar bibərinin (2 – 2,5 manat) qiyməti isə qalxıb.

AYNA-ya danışan paytaxt sakini, evdar xanım İlahə Əliyeva bazarlarda qiymətlərin yüksək olduğunu düşünür: “İndi iyulun ortalarıdır, pomidor yanvardakı kimidir - kiloqramı 2-3 manat. Bu il demək olar ki, xiyar görmədik. Bəzi yerlərdə “şumal” sortunu iki, hətta dörd manata satırlar. Amma bazarlarda çox azdır, çünki bahadır və baha qiymətə bir kiloqram xiyar almaq istəyənlər çox azdır. Əsasən şəhər bazarlarında yerpələnk çeşidini satırlar, amma dadlı deyil və ona görə də xiyar bu yay süfrəmizdə nadir yeməkdir”.

Alıcıların fikrincə, mövsümi məhsullar üçün bazara səfərlər ailə büdcəsinin əhəmiyyətli hissəsini təşkil edir. Rəsmi olaraq işsiz, lakin şəxsi sürücü kimi çalışan Elçin Qurbanov AYNA-ya deyib ki, iş gününün sonunda dörd nəfərlik ailə üçün zəruri olan ərzaqları ala bilsə, inanılmaz dərəcədə xoşbəxt olur: “Qazancım artmır, ona görə də indiki qiymətlərlə bütün qazancım yeməyə və yalnız zəruri olanlara gedir. Bu yay adətən mövsümdə ucuzlaşan meyvə-tərəvəzlər çox baha olub”.

Maraqlıdır ki, Məhərrəm ayı öncəsi təklif azalıb, pomidor və xiyarın qiyməti kəskin surətdə qalxıb. Məhərrəm ayının əvvəlindən Səfər ayının ortalarına qədər olan 40 gün ərzində Azərbaycanda ənənəvi olaraq toy şənlikləri keçirilmir və buna görə də bir çox ticarətçilər qiymətlərdə ucuzlaşma gözləyirdilər. Həqiqətən də paytaxtda bu tərəvəzlərə tələbatı əsasən restoranlar və şadlıq evləri diktə edir. Ancaq gözləntilər doğrulanmadı - tədarük nəzərəçarpacaq dərəcədə azaldı və qiymətlər artdı.

AYNA.az

Qəzza zolağında yarım milyona yaxın insan dəhşətli dərəcədə kəskin qida çatışmazlığı ilə üzləşib.
“Report” xəbər verir ki, bu barədə BMT-nin baş katibi Antoniu Quterrişin qurumun Yaxın Şərq üzrə Təhlükəsizlik Şurasının iclası üçün hazırladığı və onun ofisinin rəhbəri Erl Korteney Rattrey tərəfindən yayılan bəyanatında deyilir.

Mətndə, həmçinin vurğulanır ki, anklavın yanacaq təchizatında yaranan fasilələr su, gigiyena məhsulları və səhiyyə xidmətlərinə çıxışı kəskin şəkildə azaldır.

“Münaqişə tərəfləri bu problemləri həll etmək üçün davranışlarını dərhal və köklü şəkildə dəyişməlidirlər”, - o deyib.

A.Quterriş, həmçinin girovların azad edilməsi və atəşkəsin əldə olunması üçün danışıqların müəyyən müvəffəqiyyətlə davam etdiyini bildirib.

“Tərəflər indi razılığa gəlməlidirlər. Qəzzada humanitar vəziyyət hamımız üçün mənəvi qara ləkədir”, - BMT rəhbəri qeyd edib.

TEREFİN redaksiyasına Beş uşaq anası Qasımova Əfsanə Yasəf qızından şikayət məktubu daxil olub.
Nöqtəsinə vergülünə əl dəymədən məktubu oxuculara təqdim dirik:
Azərbaycan Respublikasının Əmək və Əhalinin
Sosial Müdafiəsi Naziri cənab Sahil Babayevə
Abşeron rayonu Xırdalan şəhəri, S. Bəhlulzadə
küçəsi, döngə 1, ev 11-A-da yaşayan Qasımova
Əfsanə Yasəf qızı tərəfindən

MÜRACİƏT

Cənab nazir, əvvəla mən onu qeyd edim ki, beş uşaq anasıyam. Böyük övladım Fatimə Sadıqova 09.oktyabr.2008-ci il tarixində, ikinci övladım Xalid Sadıqov 07 yanvar 2010-cu il tarixində, digər üçəm övladlarım Tüncay, Tünc və Damla isə 12 yanvar 2021-ci il tarixində anadan olublar. Üçəm övladlarıma görə yoldaşım və mən işləyə bilmirik. Çünki üçəmlərdən ikisi xəstədir. Tünc hər iki qulağının eşitmə qabiliyyəti yoxdur. Yəni 4-cü dərəcəli eşitmənin neyrosensor tipli ikitərəfli itirilməsi, hər iki qulaqda sensonevral tipli eşitmə azlığı var. Ona 16.04.2024-cü il tarixdən müddətsiz əlillik və sağlamlıq imkanlarının məhdudluğu təyin olunub/ Qızım Damla isə nitq qüsurludur. Hər ikisi daima həkim nəzarətində olurlar. Həmçinin oğlum Tunc fevral ayında əməliyyat olunub. O bir il ABA terapiya və loqoped konsultasiyasına getməlidir. Bunun bir ayı dövlət tərəfindən ödənilir. Qalan on br ayını öz hesabımıza etdirməliyik.

Aztəminatlı ailə kimi artıq bir neçə ildir ünvanlı dövlət sosial yardım alırıq.Bu ilin mart ayında aldığımız ÜDSY-nin vaxtı bitdiyi üçün yenidən müraciət etmişik. Müraciətimiz 6 may 2024-cü il tarixində qeydiyyatdan keçib. Bu müraciətimizə qanunvericiliyə əsasən 15 iş günüdə cavab verilməlidir. Lakin artıq 25 iş günü keçsədə bizim bu müraciətimizə cavab verilməyib. Mən dəfələrlə teleqram vuraraq şəxsən təcili məni qəbul etməyinizi Sizdən xahiş etmişəm. Həmçinin Azərbaycan Respublikasının Prezidenti cənab İlham Əliyevə teleqramla müraciət edərək Sizin qəbulunuza düşməkdə mənə köməklik etməyini ondan xahiş etmişəm Həmin teleqramlar Əmək və Əhalinin Sosial Müdafiəsi Nazirliyinə göndərilib. Hər dəfədə Əmək və Əhalinin Sosial Müdafiəsi Nazirliyindən mənə zəng edib ya DOST Mərkəzinin adi bir işçisi ilə yada Dövlət Sosial Müdafiə Fondunun sektor müdiri Rasim Səfərovun qəbuluna yazılmağı mən təklif ediblər. Qəbula gedəndədə Dost Mərkəzinin işçiləri şablon cavablar verirlər. Rasim Səfərovda yalan vədini verməkdən başqa əlindən iş gəlmir.

Cənab nazir, Sizin əməkdaşlar mənimlə dəfələrlə telefon əlaqəsi saxlayıblar. Onlara demişəm ki, ola bilər cənab nazirin məni təcili qəbul etməsi üçün vaxtı olmaz, mən razıyam ki, ya Dövlət Sosial Müdafiə Fondunun sədri Himalay Məmişov yada onun müavini Mətin Əsgər məni qəbul etsin. Hər dəfə deyiblər ki, Himalay Məmişovda, Mətin Əsgərdə məzuniyyətdədilər. Bu necə ola bilər bir qurum rəhbərliyi hamısı eyni vaxtda məzuniyyətə çıxsınlar. Axı onlar bizə xidmət etmək üçün üçün təyin olunublar. Nəyə görə bu şəxslər eyni vaxtda məzuniyyətə çıxırlar. Mənim ailəm ağır vəziyyətdədir. Amma DSMF-nin rəhbərliyi məzuniyyətdə keyf edirlər. Belə yerdə atalar yaxşı deyib «Toxun acdan nə xəbəri?» Çox yaxşı hər kəsin istirahət etmək hüquqi var. Amma olmazı ki, biri məzuniyyətini başa vursun sonra digərinə məzuniyyət verilsin? Əlbətdəki olar. Bunun üçün iş prinsipi qurulmalıdır Həmin iş prinsipinin başlıca məqsədi vətəndaşa yüksək xidmət olmalıdır

Həmçinin Sizin və nazirliyin digər yüksək vəzifəli şəxsləri daima televiziyada, mətbuatda, sosial şəbəkələrdə ünvanlı dövlət sosial yardımın verilməsindən bəh-bəhlə danışırsız. Aztəminatlı ailələrə verilən sosial yardım verilməsi prosesində sənədləşmə işlərinin sadələşdirilməsi, əlçatanlığın artırılması, yardımın təyin olunma meyarlarının yumşaldılması və sairələrdən danışırsınız. Guya 3-dən çox uşaqlı ailələrə maddi məişət şəraitinin yoxlanılması keçirilmədən yerində təyinat verilir. Əgər dediklərinizə əməl edilməyəcəksə danışmaq nəyə lazımdır. 3 ildir sosial yardım alıram. Yetkinlik yaşına çatmayan beş uşağım var. Yaşadığımız ünvanda dəyişməyib. Övladlarımın üçüdə 8 yaşına çatmayıb. Bəs nəyə görə mənim ailəmə yerində təyinat verilmir? Bu dedikləriniz hansı ailələrə şamil olunur?

Cənab nazir, suallarım çoxdur. Bu sualları cavablandırılması üçün özünüzün vaxtınız yoxdursa tapşırıq verin Himalay Məmişov şəxsən özü təcili məni qəbul etsin və həmin qəbulda mənim bu suallarımı özü şəxsən cavablandırsın

Qasımova Əfsanə Yasəf qızı

Cari il üçün ölkədə ümumi maaş və pensiya artımı baş vermədi. Sadəcə olaraq, bəzi sahələr üzrə spesifik maaş artımı və sırf əmək pensiyalarında 11,2 faiz artım oldu. Yəni, pensiyaçılar büdcələri artmış şəxslər hesab olunur.

Bəs, görəsən, pensiya alanları aldıqları məbləğ qane edirmi? Onlar pensiyalarını daha çox nəyə xərcləyirlər? Nə qədər pensiya alsalar, hazırkı vəziyyətdə onları qane edər?

AYNA əməkdaşı bu sualları Bakının “Elmlər Akademiyası” metrostansiyası ətrafında həmsöhbət olduğu pensiyaçılara ünvanlayıb.

Fəxrəddin Hüseynov: “75 yaşım var. 529 manat pensiya alıram. 35 il Azərbaycan film kinostudiyasında işləmişəm. Mən tək yaşayıram. Aldığım pensiyanın mənə çatmadığını deyə bilmərəm. Ancaq yaslar, toylar, nəvələrin ad günlərinə xərcləyəndə bəs etmir. Məsələn, 10-a yaxın nəvəm var. Hər ay birinin ad günü olur. Onların doğum günlərində nəsə almalıyam. Bu cür xərclər olmasa, aldığım bu məbləğ mənə bəs edir. İndiki halda, bugünkü qiymətlərin paralelində pensiyam 700-800 manat olsa, bəs edər”.

Arif Yusifov: “70 yaşım var, 460 manat pensiya alıram. 51 il işləmişəm. Aldığım pensiyanı daha çox ərzağa xərcləyirəm. Aldığım pensiya elə yeməyə, kommunala güclə çatır. Əlbəttə ki, 100-200 manat artıq olsa, yaxşı olardı”.

Səkinə İbadova: “65 yaşım var. Mən 20 il işləmişəm. Hazırda 220 manat pensiya alıram. Bu sualı verməklə mənim yaralı yerimə toxundunuz. İndiki vaxtda bu pulla dolanmaq olar? Bunun elə çox hissəsi kommunala, dərmanıma xərclənir. Bir sistemi 10 manata qoşurlar. Heç ərzaq almağa əlimdə düz-əməlli pul qalmır”.

Gülşən Əliyeva: “66 yaşım var. 360 manat pensiya alıram. Mənim yoldaşım erkən vəfat edib. Mən də elə o vaxtdan minimum əmək günüm olduğu üçün pensiya almışam. Aldığım məbləğ mənə bəs edir, razıyam”.

Kövsər Mirzəyeva: “60 yaşım var, 311 manat pensiya alıram. Övladım xəstə olduğu üçün erkən pensiyaya çıxmışam. Aldığım pensiya kommunal xərclərə və ərzağa ancaq yetir. Düzdür, buna da şükür, amma ən azından 500 manat olsaydı, indiki halda bəs edərdi”.

Mehriban Əsgərova: “69 yaşım var. 20 il işləmişəm. 360 manat pensiya alıram. Aldığım pensiyanın əksər hissəsini kardioloji dərmanlara xərcləyirəm. Təxminən, hər ay 150 manatlıq dərman alıram. İndi elə zəmanədir ki, 500-600 manat alsam, normal dolanmağa bəs etdiyini deyə bilərəm”.

Şövkət Piriyeva: “65 yaşım var. 320 manat pensiya alıram. Pensiyamı kommunala, ərzağa, dərmanlarıma xərcləyirəm. Bu məbləğ təbii ki, azdır. Minimum 500 manat alsam, ayı sıxılmadan, əziyyət çəkmədən başa vura bilərəm”.

Vətən Müharibəsinin başlamasından dörd il ötür. Ötən illər dövlət tərəfindən şəhid ailələrinə, müharibə əlillərinə dəstək məqsədilə əsaslı addımlar atılıb. Onların həyat şəraitinin yaxşılaşması üçün müvafiq ödənişlər edilib, ailələr mənzillərlə, avtomobillərlə təmin edilib. Ancaq Vətən müharibəsində iştirak edən şəxslərin bəzilərinə hələ də veteran statusu verilməyib.

Hərbi ekspert Ədalət Verdiyev bildirib ki, müharibə veteranların sayının dəqiqləşdirilməsi, bununla bağlı bütövlükdə bazanın təkmilləşdirilməsi və sistemləşdirilməsi ilə bağlı işlər intensivləşməlidir.

Hərbi ekspert onu da qeyd edib ki, bəzi qurumlar tərəfindən döyüşlərdə iştirak etməyən, ehtiyatda olanların da adı şəxsi heyətə daxil edildiyindən Veteran statusunun verilməsi ləngiyir.

Əmək və Əhalinin Sosial Müdafiəsi Nazirliyindən (ƏƏSMN) bildirilib ki, "Müharibə veteranı" statusu Nazirlər Kabineti (NK) nəzdində fəaliyyət göstərən Komissiyanın, əlilliklə bağlı statusun verilməsi Əmək və Əhalinin Sosial Müdafiəsi Nazirliyinin səlahiyyətindədir.

Müharibə veteranı adı və müvafiq vəsiqə Müdafiə Nazirliyi, Daxili İşlər Nazirliyi (DİN) və Dövlət Təhlükəsizliyi Xidməti (DTX) tərəfindən müvafiq komissiyaların rəyinə əsasən verilir. Veteran statusu verildikdən sonra nazirlik tərəfindən müvafiq təqaüd təyin olunur.

Müdafiə Nazirliyindən isə bildirilib ki, veteran təyinatı onun xidmət etdiyi qoşun növü tərəfindən təyin olunur. "Müharibə veteranı" adı və vəsiqəsinin verilməsi prosesi mərhələli şəkildə icra olunur. Proses davam edir, hüquqi baza yaradılır, qüvvədə olan qanunvericiliyə dəyişikliklər edilir, təkmilləşdirilir.

Ətraflı "Xəzər Xəbər"in süjetində: