Qəbələ rayonunun Vəndam qəsəbəsində ictimai asayişi pozmuş şəxs həbs edilib.

“Qafqazinfo” xəbər verir ki, qəsəbə sakini, 1990-cı il təvəllüdlü Pərvin Məmmədov xuliqanlıq əməli ilə bağlı inzibati məsuliyyətə cəlb edilib.

Belə ki, 34 yaşlı şəxs 3 gün əvvəl sərxoş halda Vəndamdakı çayxanalardan birinə daxil olaraq orada çay içən şəhid atası Ə.Z. ilə zarafat edib. Daha sonra o, şəhid atası ilə mübahisə etməyə, söyüş söyməyə başlayıb.
Qardaşı tərəfindən çayxanadan çıxarılan şəxs daha sonra hərəkətlərini idarə edə bilməyərək qəsəbənin mərkəzindəki məktəbə gedib. Sanitar qovşağa girmək üçün məktəb binasına daxil olan şəxs orada xuliqanlıq hərəkətlərinə davam edib. Məktəb direktoru və gözətçi tərəfindən qarşısı alınan şəxs uca səslə təhqiramiz ifadələr işlədib. Hadisə yerinə gələn polis əməkdaşları onu saxlayaraq Qəbələ Rayon Polis Şöbəsinə aparıblar.

Barəsində inzibati protokol tərtib edilən Pərvin Məmmədova Qəbələ Rayon Məhkəməsinin qərarı ilə 20 sutka inzibati həbs cəzası verilib.

Filippində keçirilən toy mərasimi maraqlı anlara şahidlik edib.

Musavat.com xarici KİV-ə istinadən xəbər verir ki, kilsədə keçirilən mərasimdə bəylə gəlini evləndirməyə gələn nikah məmuru gəlinin keçmiş sevgilisi çıxıb.

Gəlini görəndə çox təəccüblənən məmur mərasimin ortasında gənc qadının onun keçmiş sevgilisi olduğunu etiraf edib:

"Bu ancaq filmlərdə olur. Böyük narahatlıqla deyirəm ki, gəlinlə aramızda illər əvvəl romantik münasibət olub".

Qonaqlar və bəy bu vəziyyətə gülərək reaksiya veriblər.

"Karaca Azərbaycan"dan şikayət var.

AFN.az xəbər verir ki, tanınmış jurnalist Səadət Məmmədova bildirib ki, firmanın Bakı şəhəri, Nəsimi rayonu, Azadlıq prospektində yerləşən mağazasından aldığı məhsul zay çıxıb, lakin mağaza məhsulu nə qaytarır, nə də dəyişdirir: "Karaca"nın "Elmlər Akademiyası" yaxınlığında, Hüseyn Cavid prospektində yerləşən dükanında mənə sifət edən satıcı heyətindən gileylənəndən sonra getdim Azadlıq prospektindəki mağazaya. Buradakı satıcılar daha babat idi. 35 dəqiqəyədək şirəçəkən maşının qutusunu anbarda axtarandan sonra tapdı və mən nəhayət mağazadan cihazı alıb çıxa bildim.

Məhsul keyfiyyətsiz çıxdı, çəkilən şirə plastik dadı verir. Apardım dəyişdirməyə. Baş ofisləri ilə danışıb dedilər ki, hədiyyə kartı ilə alınan məhsul dəyişdirilə və qaytarıla bilməz. Soruşdum ki, o hansı qanunun hansı bəndində yazılıb, mənə göstərin mən də bilim. Dedilər, bizim mağazada belədir. Dedim, amma Azərbaycan qanunvericiliyində belə deyil və mən sizdən şikayət edəcəm".

S.Məmmədova qeyd edib ki, durumla bağlı Antiinhisar və İstehlak Bazarına Nazarət Dövlət Xidmətinə şikayət proseduru ilə maraqlananda firmadan quruma çox şikayət daxil olduğunu öyrənib: "Məlum oldu ki, ən çox şikayət olunan firmalardan biri məhz "Karaca"dır. İndi mənə maraqlıdır ki, bu "Karaca"nın sahibi və rəhbərliyi niyə Azərbaycan qanunlarını saymır? Niyə ölkənin qanunu ilə yox, öz uydurduqları qanunla işləyirlər?"

Bakıda piyada səkiləri ilə bağlı problem bitmir.

Vətəndaşlar rahat və təhlükəsiz hərəkəti üçün nəzərdə tutulan səkiləri ya tikinti şirlətləri ya da bəzi obyekt sahibləri zəbt edirlər.

Hələ bu azmış kimi avtomobillər də səkilərdə park edilir.

Yaranmış vəziyyətdən isə ən çox piyadalar narazıdır.
İnsanların həyatı üçün təhlükə yaradan bu məsələyə niyə nəzarət olunmur?

Daha ətraflı “ATV Xəbər”in süjetində:

Azərbaycanda fəaliyyət göstərən bir çox taksi şirkətlərində həm nağd, həm də nağdsız ödəniş forması mövcuddur. Ölkədə nağdsız ödənişdən istifadə edən şəxslərin sayı günü-gündən artmaqdadır. Belə ki, Azərbaycanda bu il noyabr ayının sonunda dövriyyədə olan ödəniş kartlarının sayı ötən aya nəzərən 355 min ədəd artaraq 16 milyon 565 min ədəd təşkil edib. Keçən ilin müvafiq dövrü ilə müqayisədə bu göstərici 22.9% artıb.

Nağdsız ödənişlərin sayı artsa da, bu sahədə olan problemlər hələ də davam etməkdədir. Taksi şirkətlərinin bir çoxunda nağdsız ödənişli sifarişlər zamanı sürücülər bunu qəbul etmək istəmir. Nəticədə, vətəndaşlar belə hallarda bir çox problemlə üzləşir.

Bu məsələnin həlli üçün addımlar nəyə görə atılmır?

Nəqliyyat məsələləri üzrə ekspert Rövşən Həsənov problemin həlli yolları ilə bağlı Referans.az-a verdiyi açıqlamada danışıb.

“Hazırda Azərbaycanda fəaliyyət göstərən taksi şirkətlərinin tətbiq etdikləri sistemdə sifarişlər zamanı ödənişin hansı formada olacağı barədə məlumat olmur. Yalnız sifarişi qəbul etdikdən sonra bəlli olur ki, sifarişin ödənişi nağd olacaq yoxsa nağdsız. Çox güman ki, buna qarşı şirkət özü də mübarizə aparır. Amma elə sürücülər var ki, nizam-intizamdan kənara çıxaraq belə hallara yol verir. Aydın məsələdir ki, həmin sürücülər şirkətə borcları olduqda və ya pulu kartdan çıxarmaq istəmədikləri üçün belə edirlər. Aydın məsələdir ki, bu vətəndaşlar tərəfdən ləngimə və ya başqa problemlərlə müşahidə olunur. Lakin dövlət qurumları tərəfindən belə bir mexanizm mövcud deyil ki, bu məsələnin tənzimlənməsi təmin olunsun”.

Ekspert bildirib ki, bu məsələnin tənzimlənməsi ilə bağlı mexanizmin mövcud olmaması vətəndaşların problemlərini sadəcə sosial şəbəkələrdə dilə gətirməsinə gətirib çıxarır ki, bu da nəticə vermir.

“Belə halda nağdsız ödənişin ləğv olunması da effektiv üsul deyil. Çünki bu da vətəndaşların narazılığı ilə nəticələnə bilər. Taksi şirkətləri vətəndaşları məmnun etmək üçün hər formada ödəniş forması təşkil edib, lakin bəzi nüanslarda problemlər yaşanır. Ümumiyyətlə, kart vasitəsilə edilən ödənişlərə dövlət də nəzarət edə bilir. Buna görə də nağdsız ödnişlərin ləğvi düzgün olmazdı. Sadəcə buna nəzarət edə biləcək bir mexanizmə ehtiyac var. Hazırda fəaliyyət göstərən Azərbaycan Yerüstü Nəqliyyat Agentliyi hansısa bir mexanizm tətbiq etməlidir”.

Bakıda "Enerji İnşaat" Məhdud Məsuliyyətli Cəmiyyətinin (MMC) təsisçisi şirkətin direktoru barəsində cinayət işi açdırıb və iş məhkəməyə göndərilib.

Qaynarinfo-nun məlumatına görə, şirkətin direktoru, 1979-cu ildə Qusar rayonunda doğulmuş Musayev Abubəkir Əlimurad oğluna Cinayət Məcəlləsinin 320.1, 320.2 və 322.1-ci maddələri ilə təqsirləndirilməsinə dair cinayət işinə məhkədə baxılıb.

Şirkətin əsl rəhbəri Nicat adlı şəxs olsa da, "Enerji İnşaat" MMC-nin qanuni təmsilçisi və direktoru Abubəkir Musayev olub. Onlar arasında alqı-satqı müqaviləsi bağlanaraq, 2018-ci ildən 2022-cin oktyabr tarixinə kimi şirkətdə birlikdə iş aparıblar. Abubəkir Musayev direktor, Nicat isə həmin tarixə kimi şirkətin təsisçisi kimi fəaliyyət göstərib.

Lakin şirkəti şərikli idarə edən dostlar arasında 90 AS 211 nömrəli xidməti avtomobilə görə mübahisə yaranıb. Onlar sözügedən dövlət nömrəsini 2018-ci ildən 2021-ci ilə kimi "Mercedes" və həmin ildən sonra "Lexsus RX 300" markalı avtomobildə istifadə ediblər. Hər iki avtombil şirkətin balansında olub.

Abubəkir Musayev Nicatdan həmin avtomobili onun adına keçirməsini tələb edib. Lakin Nicat avtomobilin şirkətin balansında olduğunu deyib və onu direktorluqdan kənarlaşdırıb.

Abubəkir Musayev avtomobili mülkiyyətinə keçirmək məqsədi ilə direktor vəzifəsindən faktiki olaraq kənarlaşdırıldığına dair məlumatlı olduğu halda qeyd olunan şirkətə məxsus möhürün mövcud olduğunu, şirkətdə faktiki saxlanıldığını bilə-bilə Bakı şəhər Baş Polis İdarəsinin Tapıntılar Bürosuna onun itməsi barədə yalan məlumat verməklə arayış almağa müvəffəq olub. Yeni möhürü aldıqdan sonra "Enerji İnşaat" MMC-ni öz adına təsis edib və sözügedən avtomobili şirkətin balansına keçirib.

Nicat hadisədən xəbər tutandan sonra hüquq-mühafizə orqanlarına şikayət edib və sonda məhkəmə məsələ ilə bağlı qərar verib. Qərara əsasən, Abubəkir Musayev MMC-nin təsisçiliyindən uzaqlaşdırılıb. Şirkət və avtomobil yenidən zərərçəkmişə qaytarılıb.

Məhkəmənin hökmü ilə Abubəkir Musayev barəsində açılmış cinayət işinin 320.2-ci maddəsi ilə olan hissəsinə xitam verilib. O, CM-nin 320.1-ci maddəsi ilə 3500 manat, CM-nin 322.1-ci maddəsi ilə 1200 manat cərimə edilib. CM-nin 66.2-ci maddəsinə əsasən təyin olunmuş cəzalar qismən toplanılmaqla 4200 manat saxlanılıb. Onun barəsində seçilmiş başqa yerə getməmək barədə iltizam qətimkan tədbiri hökm qanuni qüvvəyə minənədək dəyişdirilmədən saxlanılıb.

Qeyd edək ki, nizamnamə kapitalı 100 manat olan şirkətin hazırda qanuni təmsilçisi Rəşad Əmirbəy oğlu Aslanovdur.

Bakının Baş planının icrasına ilk olaraq Nərimanov rayonu ərazisində Montin qəsəbəsi kimi tanınan ərazidən başlana bilər. Başqa sözlə, burada bütün infrastrukturun yenilənməsi nəzərdə tutulur.

"Xezerxeber.az"-ın məlumatına görə, pilot layihə ərazisi Bakının mərkəzi hissəsinin şərqində, Heydər Əliyev prospekti ilə Babək prospektinin arasını əhatə edir. Ərazi şərqdən və cənubdan dəmiryolları ilə sərhədlənir.

Əmlak məsələləri üzrə ekspert Nofəl Quliyev bildirib ki, məqsəd Baş planın ümumi parametrlərinin sözügedən inkişaf ərazisinə tətbiq etməkdir.

Burada ən üstün şəhərdaxili inkişaf planı icra ediləcək. Yaşayış, iş və sosial mühiti bir məkanda cəmləşdirən ərazidə yaşayış məhəllələri və bloklaşdırılmış evlər inşa edilə bilər.
Tikintilərin indiki kimi plansız deyil, ara məsafələri saxlanılmaqla inşası həyata keçiriləcək. Burada dəmiryolu stansiyasının bərpası və əlaqələndirilmiş ictimai nəqliyyat şəbəkəsi yaradıla bilər.

Qəsəbə ərazisində piyada gəzintisi üçün geniş imkanlar yaradılması, 40%-lik ərazinin ümumistifadə üçün nəzərdə tutulması planlaşdırılır.

Ətraflı süjetdə:

Yanvarın 9-da “Respublika Perinatal Mərkəzi” PHŞ-nin inzibati binasında baş vermiş yanğınla bağlı tibb müəssisəsinin 3 vəzifəli şəxsi barəsində ev dustaqlığı qərarı verilib.

Barəsində ev dustaqlığı verilən Mərkəzin direktoru Mehriban Abasquliyeva tərəfindən müəssisədə yanğın təhlükəsizliyi qaydalarına riayət edilməsi işinin düzgün təşkil olunmaması, hadisənin baş verdiyi Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında tibbi avadanlıqların düzgün istismar olunmaması, palatada normadan artıq tibbi avadanlıqların istifadə edilməsi, habelə elektrik qidalandırıcılarda əvvəlki günlərdən yaranmış nasazlığın vaxtında aradan qaldırılmasını təmin etməməsinə əsaslı şübhələr müəyyən edilib.

Həmçinin, istintaqla Mərkəzin Anesteziologiya, reanimasiya və intensiv terapiya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin yanğın təhlükəsizliyinin təmin edilməsinə dair qaydaları pozmaları nəticəsində müəssisədə standartlara uyğun olmayan elektrik cihazlarından istifadə edilməsi, habelə istismara yararsız olan və qəza törədə bilən elektrik cihazlarındakı nöqsanların vaxtında aradan qaldırılmaması, bundan başqa çoxsaylı tibbi avadanlıqların elektrik xəttlərinin gücü və dözümlülüyü nəzərə alınmadan davamlı və nizamsız şəkildə xəstələrin müalicə alındığı palatalarda yerləşdirilməsi və istismarına əsaslı şübhələr müəyyən edilib. İş üzrə Hamlet Mustafayev və Elnur Əhmədli Cinayət Məcəlləsinin 225.3-cü, Mehriban Abasquliyevaya isə həmin Məcəllənin 314.3-cü maddəsi ilə təqsirləndirilən şəxs qismində cəlb edilərək onlara həmin maddələrdə nəzərdə tutulan ittiham elan edilmiş, məhkəmənin qərarı əsasında hər üç təqsirləndirilən şəxs barəsində ev dustaqlığı və vəzifədən kənarlaşdırma növündə qətimkan tədbirləri seçilib.

Qeyd edək ki, Respublika Perinatal Mərkəzi 2009-cu ilin dekabr ayında istifadəyə verilib. Mərkəz ana olmağa hazırlaşan qadınlara, o cümlədən dünyaya yenicə göz açan körpələrə yüksək ixtisaslı diaqnostik, konsultativ və müalicə yardımı göstərən yeni tipli səhiyyə müəssisəsidir.

Mehriban Abasquliyevaya Respublika Perinatal Mərkəzinə 2022-ci ilin dekabrında direktor təyin olunub. Mehriban Abasquliyeva 1980-1986-cı illərdə Azərbaycan Tibb Universitetində (ATU) təhsil alıb. 1986-1987-ci illərdə ATU-da internatura təhsili alıb. 1988-1994-cü illərdə 1 saylı Qadın məsləhətxanasında həkim-mama-ginekoloq, 1994-1998-ci illər arasında isə baş həkim vəzifəsində çalışıb. 1998-2000-ci illər ərzində 3 saylı Şəhər Klinik Xəstəxanasında baş həkimin müavini vəzifəsində fəaliyyət göstərib. 2000-ci ildən etibarən Sabunçu rayonu 2 saylı Doğum Evinin baş həkimi vəzifəsində çalışıb.

Türkiyə, Rusiya, Portuqaliya, Danimarka, Yunanıstan, Pakistan, İndoneziya kimi ölkələrdə müxtəlif beynəlxalq sertifikasiyalı konfrans və təlimlərdə uğurla iştirak edib.

2007-2021-ci illər ərzində Yeni Azərbaycan Partiyası Sabunçu rayon təşkilatının sədri olub.

Mehriban Abasquliyevaya 2 saylı Doğum Evində işləyəndə onun barəsində mediada xeyli yazılar dərc edilib. Bu Doğum evi Heydər Əliyevin təşəbbüsü ilə 1987-ci ildə istifadəyə verilib və daima dövlətin qayğısı ilə əhatə olunub. Amma bu müəssisəsə haqda heç də yaxşı məlumatlar olmayıb. Mehriban Abasquliyevanın bu vəzifədə özünü doğrultmamasının bir səbəbi də onun keçmiş fəaliyyətində axtarmaq lazım gəlir ki, təəəsüf ki, bu dəfə nəticə daha ağırdır.

Anesteziologiya, reanimasiya və intensiv terapiya şöbəsinin müdiri Hamlet Mustafayev 10 fevral 1966-cı ildə Qərbi Azərbaycanda Kalinino rayonu Evli kəndində anadan olub. 1983-cu ildə Bakı şəhəri 5 saylı kimya-biologiya təmayüllü internat məktəbini bitirib. Həmin il N.Nərimanov adına Tibb İnstitutuna daxil olub, 1989-cu ildə institutu fərqlənmə diplomu ilə bitirib.

H.Mustafayev 1989-1990-cı illərdə Akademik Mir-Qasımov adına Respublika Klinik Xəstəxanasında interna-həkim olaraq çalışıb.1990-cı ildə Sumqayıt şəhər 1 saylı Doğum evində həkim anestezioloq-reanimatoloq işləyib, 1995-2000-ci illərdə Anesteziologiya-reanimasiya şöbəsinin müdiri kimi fəaliyyət göstərib. O, 2001-2010-cu illərdə Respublika Doğum Evində Anesteziologiya-reanimasya şöbəsinin müdiri, 2010-cu ildən isə Respublika Perinatal Mərkəzində Anesteziologiya-reanimasiya və intensiv terapiya şöbəsinin müdiri vəzifəsində çalışırdı.

Musavat.com

"Ən yaxşı təhsil sistemi Sinqapurdadır. Orada bir sinifdə standart olaraq 40 şagird təhsil alır".
Elm və təhsil naziri Emin Əmrullayevin İTV-yə müsahibəsində işlətdiyi bu fikir birməmalı qarşılanmayıb. Nazir sinifdə daha çox şagirdin oxumasının təhsil prosesinə mənfi təsirinin olmasını mif adlandırıb.
"Keyfiyyəti, hazırlığı yerində olan müəllim hazırlığı yerində olmayan müəllimin 6 uşaqla göstərdiyindən daha yaxşı nəticəni 40 uşaqla göstərir. Bizim cəmiyyətimiz elə qurulub ki, hər şeydən şikayət etmə formatı var. Biz təhsil sistemində insanlara geniş seçim imkanları yaratmışıq. Dünyanın heç yerində valideyn hansı müəllimin övladına dərs deməsini seçmir. Lakin bizdə valideynlər belə bir seçim edir. Çünki bir neçə il əvvəl bu belə korrupsiya mənbəyi idi. Məhz filan sinifə düşmək problem idi. Bunu aradan qaldırmaq üçün elektron sistemlər qurmuşuq. Həqiqətən də, bu gün müəllimi Elm və Təhsil Nazirliyi, direktor yox, elə valideyn seçir. Bizim 40-dan çox şagirdin təhsil aldığı məktəblərimizin sayı bir neçə yüzdür. 70 neçə min sinifimizdən təkcə bir neçə yüzündə 40-dan çox şagird var. Bizim təhsil sistemimizin sıxlıq problemi yoxdur. Sıxlıq yalnız bir neçə məktəbdə var" - nazir bildirib.

Nazir bir sinifdə 40 şagirdin təhsil almasının tədrisə mənfi təsirinin olmadığını desə də, ekspertlər bunun əksini düşünür.
Təhsil üzrə ekspert Kamran Əsədov Sputnik Azərbaycan-a bildirib ki, "Təhsil haqqında" Qanuna görə, hər sinifdə 20 şagird olmalıdır. Praktki olaraq isə 25 nəfərdən artıq şagird bir sinfə yığılmamalıdır. Ekspert deyir ki, bir sinifdə 25 şagird təhsil alırsa, həmin sinifdə tədris prosesini səmərəli qurmaq mümkündür.
"Təhsildə belə bir qayda var ki, əgər sinifdə 25 nəfərdən çox uşaq yığılarsa, şagird sayı 30-u keçərsə, onda ikinci sinif açılmalıdır. İkinci sinif açılmalıdırsa, yeni bir müəllim də təyin olmalıdır. İbtidai sinifdirsə, əlavə ibtidai sinif müəlliməsi üçün vakansiya açılmalı, yuxarı siniflərdirsə, fənn üzrə müəllimlər cəlb olunmalıdır. Təbii ki, bir sinifdə 30-40 şagirdin olması tədrisin keyfiyyətinə mənfi təsir edir" - Kamran Əsədov söyləyib.
O, bildirib ki, xarici ölkələrdə şagird sayı çox olan siniflərin nəticələrini Azərbaycanda məktəblərlə müqayisə etmək doğru deyil:
"Nazir şagird sayı 40 nəfər olan sinifdə şagird nailiyyətlərinin, şagird sayı 20 nəfər olan siniflərin keyfiyyət göstəriciləri ilə fərqlənmədiyi fikrini beynəlxalq tədqiqatlara əsaslandıraraq, xarici ölkələr üzərində konkret misallarla göstərib. Bizim isə öz təcrübəmiz var. Öz təcrübəmizə, elə qanunumuza görə də bir sinifdə 25 nəfər şagird olmalıdır. Şagirdlərin sayı artırsa, ikinci, üçüncü sinif yaratmaq lazımdır. Əlavə məktəb binaları tikilməlidir. Düşünürəm ki, bu sıxlıq məsələsi Azərbaycan təhsilində şagirdlərin keyfiyyətli biliyə yiyələnmələrində müəyyən maneçilik yaradır və bu aradan qaldırılsa, yaxşı olar".
Ekspertin fikrincə, təhsili idarə edənlər məktəblərdə uşaq sıxlığı probleminə ciddi diqqət yetirməlidirlər:
"Təhsilin məqsədi gənclərə müəyyən biliklər, vərdişlər öyrətməkdir. Sinifdə şagird sayı çox olduqda bu vərdişlər ötürülmür. Sinifdə sıxlıq nəticəsində səs-küyün səviyyəsi qalxır. Məktəblərdə dərs elə təşkil olunmalıdır ki, biliyin ötürülməsi öz maksimum həddinə çatsın. Sinifdə 10-15 nəfər uşaq olanda da uşaqları yaxşı öyrtəmək olur. Tədqiqatlar göstərir ki, sinifdə şagird sayı 25-dən yuxarı olduqda sinif idarəolunmaz hala gəlib çıxır. Ona görə dövlət tərəfindən tədris üçün çəkilən xərc, müəllimlərin əziyyəti boşuna gedir".

K.Əsədov deyir ki, Azərbaycanda, xüsusilə paytaxt Bakıda şagird sayı 30 nəfərdən artıq olan siniflər çoxluq təşkil edir. Buna baxmayaraq paralel siniflər təşkil olunmur. Onun sözlərinə görə, xüsusən də ibtidai siniflərdə (I-IV) şagird sıxlığı daha çox müşahidə olunur:
"Hazırda Azərbaycanın 4472 orta məktəbində 1.6 milyona yaxın şagirdə 151 min müəllim dərs keçir. Amma 2014-cü ilə qədər müəllimlərin sayı 160 mindən çox idi. Lakin burada heç bir ixtisar olmayıb. Bu, optimallaşdırılma nəticəsində mümkün olub. Hesab edirəm ki, dünyanın inkişaf etmiş ölkələrində olduğu kimi, respublikamızda da bu məsələni rasionallaşdırmağa ehtiyac duyulur. Təhsilin keyfiyyətinin artırılması və yüksək nəticələr əldə olunması üçün rayon mərkəzlərində nümunəvi liseylərin yaradılması da vacibdir. Optimallaşdırılma nəticəsində gənc kadrlara şərait yaradılmalı, yaşlı müəllimlərin fəaliyyətinin isə bacarıq və qabiliyyətlərinə görə tənzimlənməsini təşkil etmək lazımdır".
Təhsil eksperti bildirir ki, "Azərbaycan Respublikasında təhsilin inkişafı üzrə Dövlət Strategiyası"nda əsas istiqamətlərdən biri də dünya standartlarına uyğun tədris sisteminin qurulmasıdır.

"Hesab edirəm ki, müəllim-şagird nisbətinin dünya standartlarına uyğun qurulması maliyyələşdirməyə və təhsilin inkişafına təsir göstərəcək. Ümumiyyətlə, Azərbaycanda müəllim-şagird nisbəti arzu olunandan yuxarıdır. Buna görə də, gənc kadrların orta ümumtəhsil məktəblərində yerləşdirilməsi üçün təqaüd yaşına çatmış müəllimlərin pedaqoji sahədən uzaqlaşdırılmasını tənzimləyən normativ hüquqi bazanın olmasına ehtiyac var. Artıq 2 ildir şagirdlərin birinci siniflərə qəbulu zamanı ərazi üzrə yaşayış meyarı əsas götürülür ki, bu da sosial ədalət prinsipini qoruyur. Bir çox hallarda valideynlər övladlarını digər ərazilərdə yerləşən məktəblərə yollayırdı. Bu zaman həmin məktəbin mikroərazisində sıxlıq yaradırdı".
Qeyd edək ki, sinifdə şagird sayının təhsilin keyfiyyətinə təsiri mübahisələr yaratsa da, DİM-in nəşr etdiyi "Abituriyent" jurnalının 12-ci sayında olan statistikaya əsasən, şagird sayı çox olan siniflərin qəbul və buraxılış imtahanlarının nəticəsində ciddi bir fərq yoxdur. Bu isə mütəxəssislər tərəfindən şagirdlərin bu nəticələrinin məktəbdə yox, abituriyent hazırlığı sayəsində əldə etdikləri ilə əlaqələndirilir.
Məlumat üçün bildirək ki, Azərbaycan məktəblərində ümumilikdə 85 min 626 sinif var. 49 min sinifdə şagird sayı 20 nəfərdən azdır. Bunu Elm və təhsil naziri Emin Əmrullayev 2021-2022-ci tədris ilinin təşkili ilə bağlı brifinqdə deyib. O bildirib ki, ümumi sinif sayının 23 faizində şagird sayı 21-25 arasındadır. Yalnız 311 sinifdə şagird sayı 40 nəfərdən çoxdur. Bu isə bütün siniflərin 0,4 faizini təşkil edir.