Nəsimi rayonunda sakinlərlə tikinti şirkəti arasında narazılıq yaranıb. Bu narazılıq o qədər uzanıb ki, tikinti şirkəti sakinlərin yaşadığı binanı sökməyə başlayıb.

Tərəflər arasında narazılığa səbəb sakinlərin daha çox pul istəməsi, şirkətin isə buna müsbət baxmaması olub.

Söhbət Nəsimi rayonu, Nəsib bəy Yusifbəyli küçəsi 34 ünvanındakı binadan gedir. Sakinlər İTV-yə bildirib ki, onlara heç bir xəbərdarlıq etmədən binaları sökülür.

Şirkətdən isə bu iddia təkzib olunub və bəzi sakinlərin 1 milyon manat təzminat tələb etdiyi bildirilib.

Ətraflı videomaterialda izləyə bilərsiniz:

“Bir övladım şəhid olub, digəri qazidir. Oğlum Naməddin Həsənovun himayəsindəyəm, onu da çalışdığı vəzifəsindən azad ediblər, aylardır işsizdir”.

Bunu Meydan TV-yə Tovuz rayonu, Vahidli kənd sakini Ceyran Həsənova bildirib. Onun oğlu Şahməddin Həsənov Qarabağda gedən döyüşlərdə həlak olub.

Ceyran Həsənovanın sözlərinə görə, oğlu Naməddin alim-aqronomdur, öz sahəsini mükəmməl bilir. Amma işdən çıxarılıb və öz sahəsi üzrə işlə təmin edilmir.

Naməddin Həsənov isə deyib ki, kənd təsərrüfatı sahəsində ixtisaslı kadrlar işdən çıxarılır, əvəzində tapşırıqla işçi götürülür:

“Hamı ilə müvəqqəti, 3 aylıq əmək müqaviləsi bağlanılır. Sonra da müqavilənin müddətini uzatmırlar, beləliklə, işdən çıxarılma üçün əllərində bəhanə olur. Halbuki, Nazirlər Kabinetinin qərarına əsasən şəhid ailəsi işdən çıxarılmamalıdır. Anam, üç azyaşlı övladım mənim himayəmdədir, ailəmi dolandırmaq üçün iş tapa bilmirəm”.

Şikayətçi bildirib ki, ixtisaslı kadrları hüquqşünas, regionşünas, politoloq, neftçi, yaxud müəllimlər əvəz edir.

“Son 13 ildir nazirliyin Aqrar Xidmətlər Agentliyinin Laboratoriya, Ekspertiza və Sertifikatlaşma Mərkəzinin Tovuz rayonunda fəaliyyət göstərən qurumunda çalışmışam. Həmin quruma respublika üzrə rəhbərlik edən Rəşad Vahabzadə ixtisası neft mühəndisidir. Kənd Təsərrüfatı Nazirliyinin əməkdaşlarına dərs keçmişəm. Ermənistanla sərhəd kənddə yaşayıram, müharibədə evimizə ciddi ziyan dəyib, amma dövlətdən yardım istəməmişəm, – alim deyib.

Şikayətçi əlavə edib ki, nazirliyə etdiyi müraciətlərə baxılmır. Onunla əmək müqaviləsinin hansı səbəbdən uzadılmadığını öyrənə bilmir:

“Mətbuata şikayət etdiyimi bilən kimi qurumdan mənə zəng vurub təhqir etdilər. Bununla bağlı səs yazısı da var”.

Tovuz rayon Aqrar İnişaf Mərkəzindən şikayətlə bağlı danışmaq istəməyiblər. Kənd Təsərrüfatı Nazirliyinin mətbuat xidmətindən Meydan TV-yə bildirilib ki, Naməddin Həsənov hansı səbəbdən işdən çıxarıldığını bilir:

“Vətəndaş ixtisara düşüb. Aqrar Xidmətlər Agentliyi tərəfindən vətəndaşa Ekspertiza və Sertifikatlaşdırma Mərkəzinin Tovuz Regional Mərkəzinin Toxum analizləri şöbəsinin baş aqronomu vəzifəsi təklif olunub. Vətəndaş bu vəzifəni tutmaqdan imtina edib. İşlə təmin olunmaq təklifi yazılı və şifahi şəkildə bir neçə dəfə vətəndaşa göndərilib”. //Meydan TV//

“Azərbaycanda bir kişi var. O da İlham Əliyevdir”, deyən Hacıbala Abutalıbov yadınızdan çıxmayıb ki?
Heydər Əliyev onu 1995-ci ildə Suraxanı Rayon İcra hakimiyyətinin başçısı təyin etdi. 2000-ci ilə qədər o, Suraxanıda işlədi. Özü də necə? Suraxanı camaatı nə vaxt istəyirdi icra başçısının kabinetinə daxil olurdu. Hacıbala müəllim hamı ilə ünsiyyətdə idi. O vaxt üçün (elə indi üçün də) bu, ağlasığmaz hadisə idi. Necə ola bilər ki, icra başçısının qapısı hamının üzünə açıq olsun? Düşünün ki, 1999-cu ilin iyul ayında Azərbaycan Respublikası Prezidenti "Suraxanı Rayon İcra Hakimiyyətinin müsbət iş təcrübəsinin yayılması haqqında" Sərəncam imzalamışdı. Ancaq bu təcrübə yayılıb eləmədi...
Hacıbala müəllimin şöhrəti hər yana yayıldı. 2000-ci ildə Heydər Əliyev Hacıbala müəllimi Bakı Şəhər İcra hakimiyyətinin başçısı təyin etdi. O, düz 2018-ci ilə qədər bu vəzifədə qaldı. Yadıma gəlir, Hacıbala müəllim ilk gündən Bakının küçələrinə düşdü. Mühafizəçi olmadan, tək-tənha xalqın içinə çıxdı. Onlarla söhbət etdi. Hamı, hətta radikal müxalifət də hesab edirdi ki, tezliklə Bakıda ciddi dəyişikliklər olacaq...
Bir də xəbər yayıldı ki, Hacıbala müəllim Bakının müxtəlif kəndlərində xalqla görüş keçirir. Məktəblərə daxil olur. Şagirdlərə fizikadan dərs deyir. Azərbaycan xalqı heç bir məmurdan heç vaxt belə davranış görməmişdi...
Hacıbala müəllim işə Bakını yaman günə qoymuş zibilliklərdən başladı. Qısa zaman ərzində paytaxtda təmizlik baxımından ciddi uğurlar əldə olundu...
Və bir müddət sonra Hacıbala Abutalıbovun rüşvət alması ilə bağlı xəbərlər dolaşmağa başladı. Öncə bu xəbərlərə inanan olmadı. Sonra aydın oldu ki, adam korrupsiyanın xaç atası imiş. Pul almadan Bakıda bir adama 5 metr torpaq sahəsi vermədi...
2018-ci ildə o, Baş nazirinin müavini təyin edildi. İlham Əliyev 2014-cü ildə artıq korrupsiya kralına "Şərəf" ordeni vermişdi. 2019-cu ildə isə o, təqaüdə göndərildi. Hacıbala müəllim də bu xalqın 20-25 milyardının dalına keçdi. İndi də xırda-xırda yeyir və Heydər Əliyev haqqında əfsanələr danışır...
İlham Əliyevin sərəncamı ilə Fuad Nəcəfli qələmi sındırılmış Vasif Talıbovun yerinə Naxçıvan Muxtar Respublikasına rəhbər təyin olunub. “Paşa Holdiq” məktəbindən çıxan bu gənc məmur ilk gündən Naxçıvanda sadə insanlarla görüşür. Onlarla şelfi çəkdirir. Hacıbala müəllimlə bağlı xalqımızın həyata keçməyən romatik ümidləri yada düşür...
İstənilən halda Vasif Talıbovun Fuad Nəcəfli ilə əvəz olunması müsbət hadisədir. Fuad Nəcəflinin necə məmur olması haqqında isə 100 gün sonra müəyyən mülahizələr səsləndirmək olar. Vasif Talıbov Naxçıvanda elə bir əndrabadi sistem yaradıb ki, o sistemi demontaj etmək üçün xeyli vaxt və əzmkarlıq lazımdır.
Fuad Nəcəfliyə uğurlar arzulayıram. Əminəm ki, 4-5 ay sonra onun fəaliyyəti haqqında daha konkret danışmaq olar.
Elbəyi Həsənli
Teref.az

Milli Məclisin dekabrın 30-da keçiriləcək iclasının gündəliyinə təklif olunan məsələlər müəyyən olunub. DİA.AZ siyahını təqdim edir:

1. Azərbaycan Respublikası Hesablama Palatasının auditorunun təyin edilməsi haqqında.

2. “Azərbaycan Respublikasının İnsan hüquqları üzrə müvəkkili (ombudsman) haqqında” Azərbaycan Respublikasının Konstitusiya Qanununda dəyişiklik edilməsi barədə Azərbaycan Respublikası Konstitusiya qanununun layihəsi (II səsvermə).

3. “Normativ hüquqi aktlar haqqında” Azərbaycan Respublikasının Konstitusiya Qanununda dəyişiklik edilməsi barədə Azərbaycan Respublikası Konstitusiya qanununun layihəsi (üçüncü oxunuş).

4. “Sosial sığorta haqqında”, “Diplomatik xidmət haqqında” Azərbaycan Respublikasının qanunlarında və Azərbaycan Respublikasının Vergi Məcəlləsində dəyişiklik edilməsi barədə Azərbaycan Respublikası qanununun layihəsi (üçüncü oxunuş).

5. “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” Azərbaycan Respublikası qanununun layihəsi (üçüncü oxunuş).

6. “Hədəfli maliyyə sanksiyaları haqqında” Azərbaycan Respublikası qanununun layihəsi (üçüncü oxunuş).

7. Azərbaycan Respublikasının Cinayət Məcəlləsində və Azərbaycan Respublikasının İnzibati Xətalar Məcəlləsində dəyişiklik edilməsi haqqında Azərbaycan Respublikası qanununun layihəsi (üçüncü oxunuş).

8. Azərbaycan Respublikasının Mülki Prosessual Məcəlləsində və Azərbaycan Respublikasının Cinayət-Prosessual Məcəlləsində dəyişiklik edilməsi haqqında Azərbaycan Respublikası qanununun layihəsi (üçüncü oxunuş).

9. Azərbaycan Respublikasının Mənzil Məcəlləsində, “Valyuta tənzimi haqqında”, “Hüquqi şəxslərin dövlət qeydiyyatı və dövlət reyestri haqqında”, “Banklar haqqında”, “Azərbaycan Respublikasının Korrupsiyaya qarşı mübarizə üzrə Komissiyası haqqında Əsasnamənin təsdiq edilməsi barədə”, “Sığorta fəaliyyəti haqqında”, “İnvestisiya fondları haqqında”, “Qiymətli kağızlar bazarı haqqında” və “Nağdsız hesablaşmalar haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (üçüncü oxunuş).

10. “Daxili işlər orqanlarında xidmətdə fərqlənməyə görə” Azərbaycan Respublikası medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

11. Azərbaycan Respublikasının 2002-ci il 29 mart tarixli 283-IIQ nömrəli Qanunu ilə təsdiq edilmiş “Azərbaycan Respublikasının Dövlət Qulluğunu İdarəetmə Şurası haqqında Əsasnamə”də dəyişiklik edilməsi barədə Azərbaycan Respublikası qanununun layihəsi (üçüncü oxunuş).

12. “Dövlət qulluqçularının etik davranış qaydaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

13. Azərbaycan Respublikasının Gömrük Məcəlləsində, “İstehlakçıların hüquqlarının müdafiəsi haqqında”, “Dövlət rüsumu haqqında”, “Mülki dövriyyədə olmasına yol verilməyən (mülki dövriyyədən çıxarılmış) əşyaların siyahısı haqqında”, “Mülki dövriyyənin müəyyən iştirakçılarına mənsub ola bilən və dövriyyədə olmasına xüsusi icazə əsasında yol verilən (mülki dövriyyəsi məhdudlaşdırılmış) əşyaların siyahısı haqqında”, “Baytarlıq haqqında”, “Mədəni bitkilərin genetik ehtiyatlarının mühafizəsi və səmərəli istifadəsi haqqında” və “Lisenziyalar və icazələr haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikası qanununun layihəsi (üçüncü oxunuş).

14. “Təhsil haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

15. “Əmək pensiyaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

16. “Ümumi təhsil haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

17. “Əmək pensiyaları haqqında” Azərbaycan Respublikasının Qanununda dəyişiklik edilməsi barədə Azərbaycan Respublikası qanununun layihəsi (üçüncü oxunuş).

18. Dünya azərbaycanlılarının həmrəyliyi günü münasibəti ilə Azərbaycan Respublikası Milli Məclisinin Müraciətinin təsdiq edilməsi haqqında Azərbaycan Respublikası Milli Məclisinin qərarının layihəsi.

Bugünlərdə Bakı-Quba-Rusiya dövlət sərhədi avtomobil yolunun 64 kilometrlik hissəsi istifadəyə verilib. Rəsmi açıqlamada bildirilib ki, Qubadan Bakı istiqamətində yenidən qurulan 67 kilometrlik yolun son 3 kilometrində işlər 2023-cü ilin yanvarında tam başa çatdırılacaq. Yolun pullu olacağı gözlənilir. Bununla bağlı bir müddət öncə bəzi rəsmilərin açıqlaması da olub.

Bakı-Quba-Rusiya Federasiyası istiqamətində yeni yol 2017-ci ildən çəkilir. Bu, həmin istiqamətdə çəkilən artıq ikinci yoldur. Birinci yolun tikintisi isə 2008-ci ildə başlamışdı. O vaxt rəsmilər yolun istismar müddətinin 30 il olacağını demişdi. Amma 2012-ci ildə avtomobil yolunun 132 km-lik Bakı-Gəndov hissəsində çatlar və dağılmış hissələr yaranmışdı. Bu, onda yolun inşası zamanı yol verilən konstruktiv səhvlər, normadan artıq yüklənmiş yük maşınlarının hərəkəti ilə izah edildi.

Rəsmi məlumata görə, 2008-ci ilin mayında başlanan birinci layihəyə ümumilikdə 545 milyon 287 min 800 manat xərclənib. Həmin vəsaitin 281 milyon 861 min 800 manatı Bakı-Quba Rusiya dövlət sərhədi avtomobil yolunun 120 kilometrlik hissəsinin təmirinə sərf olunub. Yerdə qalan 263 milyon 426 min manata isə 180 kilometr uzunluğunda beton örtüklü avtomobil yolu tikildiyi bildirilib.

Azərbaycan Avtomobil Yolları Dövlət Agentliyindən (AAYDA) “Turan”a bildirilib ki, Bakı-Quba-Rusiya dövlət sərhədi avtomobil yolunun Quba-Bakı istiqamətində deformasiyaya uğramış hissənin yenidən qurulması işlərinin böyük hissəsi yekunlaşıb: “Artıq sözügedən yolun yenidən qurulan hissəsi sürücülərin istifadəsinə verilib”.

AAYDA-dan qeyd olunub ki, yolun ödəniş qiyməti ilə bağlı, hələlik, müzakirələr aparılır: “Qiymətlər yük avtomobillər üçün ayrı, sərnişin avtobuslar üçün ayrı, minik avtomobillər üçün ayrı hesablanacaq. Biz beynəlxalq standarta uyğun tarifləri artıq təqdim etmişik. Yəqin ki, tezliklə qərar qəbul ediləcək”.

Əlavə olunub ki, yük avtomobillərinə nəzarət etmək üçün yolun müxtəlif hissələrində elektron tərəzilər quraşdırılacaq: “Pullu yolun dörd məntəqəsində tərəzilər artıq quraşdırılıb”.

İqtisadçı Natiq Cəfərli isə AzadlıqRadiosuna bildirib ki, bu yolun ilkin çəkilişi kifayət qədər ciddi qanun pozuntuları ilə müşayiət olunub: “Betonla çəkilmiş yola 30 il zəmanət verilmişdi. Ovaxtkı məzənnə ilə götürsək, az qala 1 milyard dollara yaxın xərclənmişdi, amma açılandan bir neçə il sonra yol təmirə bağlanırdı. Təmir adı ilə də ora 10 milyonlarla manat xərclənib, hətta beton yolunun böyük bir hissəsi ləğv edilib və yenidən asfalt yolu ilə əvəz edilib. Müxtəlif adamların adları çəkilsə də, buna görə bugünə qədər heç kim cavabdehlik daşımayıb”.

Pullu yola gəlincə isə, iqtisadçının sözlərinə görə, bu tipli yollar bir çox ölkələrdə var: “Amma orada bu yollar özəl sektor, ya da bələdiyyənin iştirakı ilə çəkilir. Yəni, dövlət-özəl sektor arasında bir müqavilə imzalanır, özəl sektor vəsait yatırır. Vəsait yatırılandan sonra onun geri çıxarılması və yola xidmət etmək üçün həmin yol pullu olur. Bizdə problem ondan ibarətdir ki, biz Azərbaycan vətəndaşı olaraq bu pulu artıq ödəmişik”.

İqtisadçı qeyd edib ki, vətəndaşlar vergi ödəyir və bu vergi nəticəsində infrastruktur layihələri həyata keçirilir: “Dövlət hesabına yolun pullu olması məntiqsizlikdir, çünki həmin yolun çəkilməsində vətəndaş artıq iştirak edib, pul ödəyib. Əgər burada özəl sektorun heç bir iştirakı yoxdursa, sual yaranacaq ki, orada yığılan vəsait nəyə və necə xərclənəcək, kimlər bu vəsaitin yığılmasına nəzarət edəcək? Tariflər necə müəyyən ediləcək və güzəştlər olacaqmı? Həmin yol boyu vətəndaşlar yaşayır, onlar öz evinə niyə pullu gedib-gəlməlidir?”.

N.Cəfərlinin sözlərinə görə, ayrı-ayrı Avropa ölkələrində pullu yollardan istifadə tarifləri fərqlənir: “Bəzi yollarda 1, bəzi yollarda 2, bəzi yollarda isə 3 avro ödənilir. Bu qiymət məsafədən və sürət həddindən asılıdır. Pullu yollarda sürət həddi adətən çox yüksək olur və vətəndaşlara bir nöqtədən digər nöqtəyə daha tez çatmağa şərait yaradır. Amma Azərbaycanda pullu yolların qiymətlərinin beynəlxalq standartlara uyğun olması üçün maaş və təqaüdlər həmin beynəlxalq standartlara uyğun olmalıdır. Avropada maaşların səviyyəsi bizdən bir neçə dəfə çoxdur”.

Süleyman Əsgər oğlu Neymətov Naxçıvan Muxtar Respublikasının daxili işlər naziri təyin edilib.

Naxçıvan Muxtar Respublikası Ali Məclisi Sədrinin birinci müavini Azər Zeynalov dekabrın 28-də bununla bağlı sərəncam imzalayıb.

Qeyd edək ki, polis polkovniki Süleyman Neymətov bu təyinatadək Bakının Suraxanı Rayon Polis İdarəsinin rəisi vəzifəsində xidmət edirdi.

Zorla əllərindən alınaraq Şərurlu İsfəndiyara hədiyyə edilən restoranı Pənahov qardaşları geri ala biləcəkmi?

Naxçıvan hadisələri ölkənin gündəmini zəbt etməkdə davam edir. Muxtar Respublikadan gələn xəbərlər, Talıbovların fəaliyyəti ilə bağlı yeni məlumatlar müzakirə mövzusu olaraq qalır.

Bu arada Valyuta.az-ın redaksiyasına Naxçıvanda baş verməyən, amma Naxçıvanla, daha doğrusu Vasif Talıbovun oğlu Rza Talıbovun biznesi ilə bağlı daha bir xəbər daxil olub.

Bu dəfə mövzu uzun müddət adı müxtəlif qalmaqallarla hallanan “Flamingo” restoranıdır. Söhbət restoranın əsl sahiblərindən – “Laba” ləqəbi ilə tanınan Sədərək Gömrük Komitəsinin keçmiş rəhbəri Mübariz Pənahov və onun qardaşı Səfər Pənahovun əlindən zorla necə alınmasından gedir.

Mənbəmiz bildirir ki, Mübariz Pənahov və Vasif Talıbov arasında münasibətlərin gərginləşməsinin əsl səbəbkarı “Şərurlu İsfəndiyar” kimi tanınan İsfəndiyar Axundov olub. “Laba” Sədərək Gömrük Məntəqəsində “Şərurlu İsfəndiyar”ı sıxışdırdığı və maşınlarının gömrükdən keçməsini qadağan etdiyi vaxt, sonuncu bunun qisasını almaq üçün fürsət axtarır. Nəticədə “Laba”nın yanındakı etibarlı adamlardan birini pulla ələ alır. Və həmin adam İsfəndiyara məlumat sızdırır.

Bir müddət sonra “Flamingo” restoranında iki qardaş arasında elə bir söhbət olur ki, bu söhbət hər iki qardaşın gələcək taleyinə təsir edir. Səfər Pənahovun Vasif Talıbov və qardaşı Məhərrəm Talıbov haqqında Mübariz Pənahovla etdiyi söhbətin səsyazısı “Şərurlu İsfəndiyar”a təqdim edilir. Həmin söhbət zamanı Səfər Pənahov Məhərrəm və Vasif Talıbovları ağır söyüşlərlə təhqir edir.

“Şərurlu İsfəndiyar” səs yazısını Vasif Talıbovun stolunun üstünə qoyur. Nəticədə “Laba” və Vasif Talıbov arasındakı düşmənçiliyin də əsası qoyulur. Bundan sonra Səfər Pənahov heç bir günahı olmadan həbs olunur. Mübariz Pənahov isə vəzifəsindən çıxarılır.

“Flamingo” restoran bir qəpik ödənilmədən qardaşların əlindən alınır və xidmətləri müqabilində “Şərurlu İsfəndiyara” hədiyyə edilir. “Şərurlu İsfəndiyar” isə Sədərək Gömrüyündəki maşınlarının daha bol qazanc gətirməsi naminə böyük addım atır. O, “Flamingo” restoranını Rza Talıbova hədiyyə edir.

“AzPolitika.info”-ya verilən məlumata görə, Naxçıvan polisinə Bakıdan yeni rəis göndərilib. Bu vəzifəyə Bakı şəhəri Suraxanı rayon Polis İdarəsinin rəisi Süleyman Nemətov təyin olunub.

Dəqiqləşdirə bilmədiyimiz məlumata görə, Naxçıvan Muxtar Respublikasının (MR) Daxili İşlər Nazirliyi ləğv edilib. Əvəzində Azərbaycan Respublikası Daxili İşlər Nazirliyinin Naxçıvan MR üzrə Baş İdarəsi yaradılıb.

Sabirabadda ər arvadını bıçaqlayıb.

Gununsesi.info xəbər verir ki, hadisə rayonun Qalağayın kəndində qeydə alınıb.

Belə ki, kənd sakini, 1994-cü il təvəllüdlü Rüstəmova Fərqanə Yaşar qızı bədənin kəsilmiş-deşilmiş yarası ilə Sabirabad Mərkəzi Rayon Xəstəxanasına yerləşdirilib.

İlkin məlumata görə, aralarında yaranmış mübahisə zamanı F.Rüstəmova əri tərəfindən bıçaqlanaraq xəsarət alıb.

Faktla bağlı araşdırma aparılır.