 |
|
|
Oğuz rayon Mərkəzi Xəstəxanasında baş verən və son dövrdə daha da artan qanunazidd əməllər barəsində adlarının məlum səbəblərdən açıqlanmasını istəməyən işçiləri tərəfindən Aktualinfo.org redaksiyasına məlumatlar daxil olmuşdur. Məlumatda bildirilir ki, baş həkim Anar Əzizov, baş mühasib və kadrlar şöbəsinin rəisinin birlikdə törətdikləri maliyyə maxenasiyalarından bəhs edilir. Belə ki, Oğuz Rayon Mərkəzi Xəstəxanasının Reanimasiya Şöbəsinin 16 əməkdaşı tərəfindən PHŞ-nin direktoru Əzizov Anara ünvanladıqları 09 oktyabr 2022-ci il tarixli yazılı ərizədə bildirlir: ” Sizə məlum edirik ki, Reanimasiya şöbəsinə əlavə 4 nəfər işçi gəlib. Onlar işlə təmin olunduqdan sonra bizim əmək haqqımızda əhəmiyyətli dərəcədə azalma olub. Xahiş edirik bu haqda tədbir görəsiniz. ”
Ərizədə qeyd edilənlərin nə dərəcədə həqiqətə uyğun olub olmaması barədə dəqiqləşmələr aparmaq üçün Oğuz rayonundan olan mənbələrimizə müraciət etdik. Onlar faktı təsdiq edərək bildirdilər ki, bəli, Mərkəzi Xəstəxanada bir çox qanunpozuntuları vardır. Ərizədə göstərilən bu 4 nəfər işçiləri kadrlar şöbəsinin rəisi zəruriyyət olmadan öz şəxsi maraqları daxilində qeyri-rəsmi işə götürüblər. Rə ona görə də rəsmən onlara bank kartı vasitəsilə əmək haqqı verə bilmədiklərinə görə öz ciblərindən qarşılayırlar. Və təbii ki, ərizədə göstərildiyi kimi, bu pulların da əldə edilməsi üçün reanimaiya şöbəsinin 16 nəfər işçisinin əmək haqqını qanunsuz olaraq kəsirlər. Topladıqları bu pullardan “yeni işçilərə” “əməkhaqqı” verirlər. Pul məsələsini isə baş mühasib öz “qaydaları” ilə həll edir. Xəstəxanada belə qeyri-rəsmi işə götürülənlər çoxdur. Təbii ki, xəstəxana rəhbərliyi götürdüyü hər qanunsuz işçinin xalasının qara gözünə aşiq olduğuna görə deyil, tam başqa məqsədlə bu əməli törədir. Nəticədə, məsələn reanimasiya şöbəsinin işçisi və şəhid anası olan Lalə Həsənovanın da əməkhaqqı qanunsuz olaraq azaldılmışdır. Halbuki, 44 günlük müharibə dövründə Oğuz RMX-nın reanimasiya şöbəsinə yerləşdirilmiş 50-yə qədər ağır yaralı əsgərimizin həyatda qalmaları üçün həmin şöbənin kollektivi gecə-gündüz əllərindən gələni və hətta gəlməyənləri də etmişlər ki, ( evlərindən son azuqələrini və s. gətirməklə) onlar sağlamlıqlarına qovuşsunlar. Bu da nəticə.
Sığorta Şirkətindən isə Oğuz sakinləri təmənnasız yararlana bilmirlər.
Baş həkim Oğuz rayonunda bir işsiz sürücü “tapa bilmədiyi” üçün Şəki rayonundan imkanlı bir kadrı təcili yardım avtomobili sürücüsü kimi işə qəbul etmişdir. Bu sürücü də Oğuz rayonun bir çox kəndlərini tanımadığına görə həkimi ağır xəstələrin ünvanlarına vaxtında çatdıra bilmir. Şükürlər olsun ki, belə gecikmələr ucbatından xəstə ölümü hələlik qeydə alınmayıb.
Xəstəxananın Cərrahiyə Şöbəsində də əməliyyat olunan heç bir xəstə qanunamüvafiq olaraq reanimasiya şöbəsinə deyil, birbaşa palataya yerləşdirilir. Xəstə uzərində həyata keçirilən belə oyunbazlığın səbəbini isə hələ də reanimasiya şöbəsi kollektivi bilmir. Xəstəxanada son vaxtlar sağlamlıq arayışının qiyməti 40 manat olub. Kim istəyirsə, həkim qapılarına düşmədən və vaxt itirmədən pulunu verib əldə edə bilər. Bu barədə gizli video çəkilişin olduğu da bildilir.
Sonda mənbə onu da qeyd etdi ki, Oğuz rayon Mərkəzi Xəstəxanasının işçi heyətinın yarısına qədəri Bucaq kənd sakinlərindən ibarətdir.
Xəstəxanada baş verən bu kimi qanunsuz işlərdən TƏBİB sədri Vüqar Qurbanovun xəbəri varmı deyə bilmərik. Onu qeyd edəbilərik ki, Oğuz rayon Mərkəzi Xəstəxanasında baş verən qanunsuzluqlar,özbaşınalıqlar bunlarla bitmir. Xəstəxana tərəfindən mal-materialların və müxtəlif xidmətlərin satın alınması məqsədi ilə keçirilmiş kotirovka sorğularında da ciddi qanun pozuntularına yol verilib. Apardığımız araşdırmanın nəticələrini yaxın vaxtlarda ictimaiyyətə açıqlayacağıq.
Aktualinfo.org
Azərbaycan dövlətinin, hüquq-mühafizə orqanlarının prioritet mövzularından biri də narkotiklərə qarşı mübarizədir. Dünyanın bəlasına çevrilən bu "ağ ölüm"ün Azərbaycanda da izlərinə tez-tez rast gəlinir. Demək olar ki, hüquq-mühafizə orqanları hər gün rəsmi açıqlamalarında paytaxtda və bölgələrdə narkotik bəlası ilə mübarizə apardıqlarına dair faktlar yayırlar. Hətta, cənab nazir Vilayət Eyvazovun bu sahədə ardıcıl addımları və barışmaz mövqeyi də xeyli diqqət çəkir. Amma görünür ki, əsasən İrandan qaynaqlanan bu narkoticarət şəbəkəsi hansısa yollarla günü-gündən "çiçəklənməyə" can atır...
Bu mövzuya təsadüfən toxunmadım, çünki bu şəbəkənin uzantılarından biri də doğulduğum Salyan rayonundadır. Bunu isə biz yox, illər öncə hüquq-mühafizə orqanlarının keçirdiyi əməliyyat da təsdiqləyir...
Xatırladım ki, bir neçə il öncə evindən külli miqdarda narkotik vasitələr aşkar olunaraq həbs edilən Salyan rayonunun Qaraçala qəsəbəsinin sakini, 1965-ci il təvəllüdlü Məmmədov Elşən Ağalar oğlu 2017-ci ildə 9 il həbs cəzası almışdı. Onun evindən 10 kiloqrama yaxın narkotik maddə aşkar olunmuşdu. Hətta, bununla bağlı keçirilmiş polis əməliyyatının da videogörüntüsü var.
Amma bir neçə aydan sonra Elşən Məmmədovun azadlığa çıxması ilə bağlı məsələ hətta Azərbaycan Dövlət Televiziyasında yayımlanan "Çıxışa doğru" proqramında da müzakirə olundu.
Həmin verilişə baxanlar yaxşı xatırlayır ki, qonaqlardan Ədliyyə Nazirliyi yanında İctimai Şuranın üzvü, Azərbaycan Milli Qeyri-Hökumət Təşkilatları Forumunun prezidenti Rauf Zeyni bu kimi halların cəmiyyətimizin inamına ciddi zərər vurduğunu deyirdi, hətta bəzi məhkəmə instansiyalarını da kəskin tənqid edirdi.
Bəs təzad nədir?
Lənkəran Ağır Cinayətlər Məhkəməsinin qərarı ilə 9 il azadlıqdan məhrum edilən Elşən Məmmədov bir neçə aydan sonra Şirvan Apellyasiya Məhkəməsinin qərarı ilə naməlum səbəbdən azadlığa çıxmışdı. Şirvan Apellyasiya Məhkəməsinin bu qərarı isə həm rayon, həm də ölkə ictimaiyyəti tərəfindən ikrahla qarşılanmışdı.
Hörmətli Rauf Zeynini narahat edən məsələ də məhz bu idi...
"Bir hüquq-mühafizə orqanının həbs etdiyi məhkumu başqa bir hüquq-mühafizə orqanı kimdənsə rüşvət alaraq, azadlığa buraxır. Axı bu necə ola bilər? Əgər bir adam narkotacirlik edib, bizim minlərlə balamızı zəhərləyirsə, onu necə azadlığa buraxmaq olar? Bu, heç cür mümkün olan məsələ deyil. Belə hallar baş verəndə isə cəmiyyətimizdə inamsızlıq yaranır. Cəmiyyət də elə düşünür ki, narkotacirlərə ölüm yoxdur, heç kəs bunlara toxuna bilmir və s. Bu kimi hallar isə Azərbaycan cəmiyyətinə çox ciddi zərbə vurur, cəmiyyətdə inamsızlıq yaradır. Mən üzümü müvafiq orqanlara və şəxslərə tutaraq demək istəyirəm ki, görün nə qədər təhlükəli vəziyyət yaranıb, Daxili İşlər naziri cəmiyyəti, insanları narkomaniyaya qarşı mübarizəyə çağırır...", - deyə o, vurğulamışdı.
Verilişin digər qonaqları da Azərbaycanda son illər narkomaniyaya yoluxanların sayında artım olduğunu deyir, Şirvan Apellyasiya Məhkəməsinin bu qərarını qınayırdılar.
Təbii ki, bir salyanlı olaraq bu məsələ məni də narahat etməyə bilməzdi. Çünki narkotika gənclərimizi və gələcək nəsillərimizi zəhərləyən ciddi bir bəladır.
Biz bu faktı və görüntüləri "Demokrat.az" saytında işıqlandırandan az sonra Elşən Məmmədov və ona yaxın şəxslər bizə qarşı müxtəlif təzyiq vasitələrindən istifadə etməyə başladılar. Amma bu, gerçəyi dəyişə bilmədi və bilməzdi də...
Məni narahat edən digər məsələ isə Şirvan Apellyasiya Məhkəməsinin bu müəmmalı qərarı idi. Bu, müəmmalı qərar cənab Prezident İlham Əliyevin apardığı uğurlu daxili siyasətə, məhkəmə-hüquq sistemində aparılan islahatlara kölgə salan bir qərar idi. Təəssüf ki, hansısa müəmmalı səbəblərdən məhkəmə belə bir qərar vermiş, gələcəyimizi, Azərbaycanın əsgəri olacaq gənc salyanlıların zəhərlənməsinə vəsilə olan Elşən Məmmədov kimi şəxsə və bir şəbəkənin uzantısına "yaşıl işıq" yandırmışdı...
İndi hüquq-mühafizə orqanlarından soruşuram: əgər Elşən Məmmədov narkotacir deyildisə, hələ də sosial şəbəkələrdə və AzTV-nin arxivində qalan görüntülər nəyin sübutudur?
Yox, əgər, doğrudan da, belə bir əməliyyat keçirildisə və Lənkəran Ağır Cinayətlər Məhkəməsi belə bir qərar verdisə, bəs həmin qərarın dəyişməsinə kimlər və necə müdaxilə etdilər? İndi kim zəmanət verir ki, həbsdən qurtulan Elşən Məmmədov kimi şəxslər bundan sonra cəmiyyətə daha ağır və arzuolunmaz fəsadlar verməyəcək? Ümumiyyətlə, kimdir bu şəxs və şəxslərə "toxunulmazlıq statusu" verənlər?
Burada Ulu Öndər Heydər Əliyevin məşhur bir fikrini vurğulamağı vacib sayıram: "Dövlət iki şeydən sarsıla bilər: günahkar cəzasız qalanda və günahsıza cəza veriləndə...."
Böyük bir elmi işin mövzusu olan bu dahiyanə deyilmiş cümlə üzərində düşünməyə gərək var. Düşünün, cənablar, çünki gələcəyimiz və övladlarımızın taleyi verəcəyiniz qərarlardan asılıdır...
Hörmətlə,
"Demokrat.az" xəbər portalının baş redaktoru Vasif Həsənli
Bu il iyulun 23-də gecə saatlarında Göyçay sakini, 29 yaşlı Vüsalə Quliyeva Göyçay Rayon Mərkəzi Xəstəxanasında həkim səhlənkarlığı nəticəsində həyatını itirib. Vüsalə Quliyevanın ailə üzvləri deyir, hadisənin üstündən 4 aya yaxın vaxt keçsə də, xəstəxana həkimləri barədə yalnız töhmət xarakterli tədbir görülüb, heç biri cinayət məsuliyyətinə cəlb olunmayıb.
Mərhumun ailə üzvü Səbuhi Quliyev Meydan TV-yə danışır ki, iyulun 20-də Vüsalə Quliyevada qəfil halsızlıq, yüksək hərarət yaranıb. Elə həmin gün ailə üzvləri onu Təcili Tibbi Yardım Stansiyasına aparıblar, həkim Əli Əsgərov iynə vurub, resept yazıb, arxayın edib ki, ciddi bir şey yoxdur və yola salıb:
“Dedi ki, indi hamıda bu qızdırmadan var, gedin, yazdığım reseptdəki dərmanları verin, yaxşı olacaq. Gəldik evə, qızdırma düşmədi, bu dəfə götürüb Göyçay Mərkəzi Xəstəxanasına apardıq. Xəstəxananın həkimi İlhamə xanım rentgenə göndərdi, sonradan bilmişik ki, rentgen aparatı işləmirmiş, bizdən gizlədiblər. Vüsaləni aidiyyəti olmayan flüoqrafoya aparatıyla müayinədən keçiriblər, hansı ki, həmin aparat ağciyərin vəziyyətini aşkar edə bilmir. Nəticəni gətirdik verdik İlhamə xanıma, dedi, bunda heç nə yoxdur, ciyərləri də, tənəffüs yolları da təmizdir”.
Şikayətçinin deməsinə görə, yenə xəstəni elə hərarət içində götürüb, evə dönüblər. Ancaq gecə saatlarında vəziyyəti ağırlaşıb və yenidən Göyçay Rayon Mərkəzi Xəstəxanasının qapısını döyməli olublar:
“Xəstəxananın acil şöbəsində növbətçi həkim Fatimə Abdullazadə idi. Vüsalənin hərarəti artıq 40-ı ötmüşdü. O da bir iynə vurdu, dedi, indi həkimlər yoxdur, heç nə edə bilmərəm, aparın evə, səhər gətirərsiz, həkimlər baxar. Gecəylə baş həkim Ləman Hacıyevaya dəfələrlə zəng vursam da, telefonu açmadı. Yenə də əlacsız şəkildə Vüsaləni xəstəxanadan çıxarıb anasıgilə apardıq”.
Səbuhi Quliyev deyir, eyni vaxtda Vüsalənin 8 aylıq övladı da ağır xəstə olub və eyni xəstəxanaya 1 ay imiş ki, aparıb-gətirirlərmiş, ancaq həkimlər diaqnoz qoya bilməyiblər. Vüsaləni evə gətirəndən sonra körpənin vəziyyətinin ağırlaşdığını öyrənib: “Körpəni də təxminən bir ay idi ki, həmin xəstəxanaya aparıb gətirirdik. Hər dəfə başqa-başqa diaqnozlar qoyub, fərqli müalicələr edib vəziyyətini ağırlaşdırmışdılar. Elə həmin gecə biz Vüsaləni evə gətirəndə zəng vurub dedilər ki, gəlin uşağı təcili Mingəçevirə aparın, yoxsa öləcək. Biz də Vüsaləni buraxıb, qaçdıq xəstəxanaya, uşağı götürüb gecəylə Mingəçevirə çıxdıq. Mingəçevir Mərkəzi Xəstəxanası qəbul etmədi, dedi, uşağın vəziyyəti ağırdır, bizlik deyil, Bakıya – OMD-yə çatdırın. Evdən zəng gəldiyi üçün uşağı götürüb, əvvəl Göyçaya gəldik, mən Vüsaləni Göyçay Mərkəzi Xəstəxanasına, qardaşımsa uşağı Bakıya – OMD-yə götürdü. Yenə müayinə rentgenə göndərdilər, bu dəfə dedilər ki, ciyərlərində buz var, infeksion şöbəyə yatırtdılar. Dedik, axı xəstənin durumu çox ağırdır, niyə reanimasiyaya götürmürsünüz? Heç yarım saat keçmədi, Vüsalə komaya düşdü, ondan sonra reanimasiyaya köçürtdülər”.
Günorta saatlarında reanimasiya şöbəsinə köçürülən gənc Vüsalənin hekayəti elə həmin gecə saat 4-də orada uğursuz başa çatır. Ekspert onun pnevmaniyadan öldüyünə dair rəy verir. Səbuhi Quliyev sözünə davam edir:
“Pnevmaniya vaxtında qarşısı alınanda sağalan xəstəlikdir. Kor-kor, gör-gör, həkimlər Vüsaləni 3 gün apar-gətir etməklə müalicəni gecikdirdilər. Göyçay Mərkəzi Xəstəxanasının həkimləri belədir – xəstəyə sağlığında qoymalı olduğu diaqnozu keçinındən sonra qoyur. Halbuki, pnevmaniyanı aşkarlamaq üçün dağı-dağ üstə qoymağa ehtiyac yoxdur. Məsələ ağciyər idisə, mütləq KT lazım idi, etməyiblər”.
Səbuhi Quliyevin deməsinə görə, əvvəlcə xəstəxana məsuliyyəti yaxasından uzaqlaşdırmaq üçün rəydə saxtalaşdırmaya yol verilib. O da Göyçay Rayon Prokurorluğuna, Baş Prokurorluğa, Prezident Administrasiyasına müraciət edib. O, ailə üzvlərinin də iştirakıyla təkrar komisyon ekspertiza keçirilməsini istəyib. Rayon prokuroru ötən ay müraciəti təmin edib:
“Komisyon ekspertiza sənədlərin ekspertizasıdır, həkimlər nə etməliydilər, nəyi ediblər, nəyi yox, müalicə düzgün aparılıb, ya yox, dozalar düzgün olub, olmayıb… Birinci komisyon ekspertizada infeksionist iştirak etməmişdi, mənim vəsatətimlə ikincidə infeksionist də dəvət olundu. Komisyon ekspertiza bir neçə dəfə keçirilsə də, bizi yalnız bir dəfə dəvət etdilər. Sonra da özlərinə sərfəli olan qərarı çıxartdılar”.
Vüsalə Quliyevanın ailə üzvləri Göyçay Rayon Mərkəzi Xəstəxanasının bir neçə həkiminin cinayət məsuliyyətinə cəlb olunmasını tələb edir:
“Məsələn, Təcili Yardım Stansiyasının həkimi Əli Əsgərov yüksək hərarətlə gətirilən xəstəyə iynə vurub, nəzarətdə saxlamadan, hərarəti qaydasına düşmədən evə göndərib. Xəstədən yaxma götürmək, onu ixtisaslaşmış həkimə yönləndirmək əvəzinə, özbaşına resept yazıb ki, yazdığı dərmanlar da əks təsirini göstərərək xəstənin vəziyyətini ağırlaşdırıb. Növbəti gün Göyçay Rayon Xəstəxanasına aparanda KT olunmalıydı, etməyiblər, aidiyyəti üzrə olmayan flüoqrafiya aparatıyla müayinə aparıb nəticəni səhv yazıblar. Yenə də xəstənin hərarətini nəzarətdə saxlamaq, tibbi yardımlar göstərmək əvəzinə İlhamə həkim geri qaytarıb. Növbəti gecə yenə ağırlaşmayla aparanda növbətçi həkim Fatimə Abdullazadə geri qaytarıb ki, gedin, sabah gəlin. Analizlər, müayinələr, düzgün diaqnoz, müalicələr vaxtında olsaydı, ölüm-itim də baş verməzdi. Vüsalənin vəziyəti bu həkimlərin sayəsində ağırlaşıb və bir insan gənc yaşında həyatını itirib. İki körpə anasız qalıb – biri 1, o biri 3 yaşında… O həkimlər buna görə qanun qarşısında cavab verməlidilər. Mənim onlara həkim deməyə də dilim gəlmir”.
Səbuhi Quliyev deyir, Göyçay Rayon Prokurorluğu bir aydan çoxdur ki, TƏBİB-ə bu ölüm işiylə bağlı xidməti yoxlama aparmasını tapşırıb, ancaq hələ də aparılmayıb:
“Burada söhbət bir xəstəxanadakı idarəçilikdən gedir. Bir xəstəxananın altı həkimi xəstəyə üç gündə diaqnoz qoya bilməyib. Rentgen aparatının işləməməsi birbaşa xəstəxana direktorunun məsuliyyətidir. Xəstələri flüoqrafiya aparatından keçirib, rentgen müayinəsi qəbzi verirlər. 7 aydır ki, göyçaylılar rentgendən keçmək üçün Qəbələyə 70 kilometr yol gedib-gəlirlər”.
Göyçay Rayon Mərkəzi Xəstəxanasından Meydan TV-yə bildirilib ki, məsələ rayon prokurorluğunda araşdırılır və ora müraciət edək. Göyçay Rayon Prokurorluğundansa bildirilib ki, Vüsalə Quliyevanın müalicə aldığı Göyçay Mərkəzi Xəstəxanasında ölməsi faktı üzrə araşdırmalar davam edir. Oktyabrın 3-də mərhumun ailəsinin müraciəti əsasında komisyon-tibb ekspertizası təyin edilib və və icra edilməsi üçün Səhiyyə Nazirliyinin Məhkəmə Tibbi Ekspertizasının Patoloji Anotomiya Bölməsinə göndərilib, icra olunub.
TƏBİB-in Quliyevlər ailəsinə göndərdiyi məktubunda qeyd olunub ki, xəstəxanada Vüsalə Quliyevanın ölümüylə bağlı araşdırma aparılıb. Xəstəxananın Təcili və Təxirəsalınmaz Tibbi Yardım Stansiyasının təcili yardım bölməsinin təcili tibbi yardım üzrə həkimi Fatimə Abdullazadə, bölmənin tibb bacısı Aytac Qasımovaya, tibb bacısı Samirə Zeynalovaya töhmət verilib. Xəstəxananın laboratoriya şöbəsinin laborantı Ulduzə Xəlilovaya yazılı xəbərdarlıq edilib.
Qurumdan Meydan TV-yə bildirilib ki, Vüsalə Quliyevanın tibbi sənədləri təhlil edilməsi üçün “TƏBİB-in tabeliyindəki tibb müəssisələrində şəxslərə göstərilən tibbi xidmətlərin təkmilləşdirilməsi və ölüm hallarının təhlili üzrə Komissiya”ya təqdim edilib.
Komissiyanın araşdırmasından sonra nəticə barədə əlavə məlumat veriləcək.
“Eyni zamanda, xəstəxananın aidiyyəti şöbəsinin adıçəkilən əməkdaşları ƏMək Məcəlləsinin müvafiq maddələri üzrə cəzalandırılmışdır. Rentgen cihazında yaranan nasazlıq qısa müddət ərzində aradan qaldırılacaqdır”.
Quliyevlər ailəsinin deməsinə görə, rayon prokurorluğu sonuncu ekspertiza rəyinə əsasən xəstəxananın baş həkimi də daxil olmaqla, həkim məsuliyyətsizliyinə görə altı nəfəri işə cəlb edib. Ancaq Quliyevlər qərarla razılaşmayıblar və daha iki həkimin də cəlb olunması üçün müraciət ediblər.
Meydan TV
Teref.az-ın poçtuna daxil olmuş şikayıt məktubunu oxuculara təqdim edirik:
Azərbaycan Respublikasının Prezidenti cənab İlham Əliyevə.
Göyçay Şəhər sakini İbrahim Göyçaylı küçəsi 4/7 ünvanında yaşayan Həşimov Əliyar Məmməd oğlu tərəfindən
ŞİKAYƏT ƏRİZƏSİ
Bu şikayət ərizəmlə yazıb sizdən xahiş edirəm, göstərdiyim cinayət faktları obyektiv araşdırlıb, qanuna müvafiq tədbirlər görülməsinə tapşırıq verəsiniz. Mən Həşimov Əliyar Məmməd oğlu dəfələrlə Göyçay Suvarma Sistemləri İdarəsinin rəisi Şakir Əhmədova, yaşadığım həyətyanı sahədən keçən arxla bağlı müraciət edib bildirmişəm ki, su arxının təxminən 100 (yüz metr) məsafəsinə beton vurulsa, arxın su hövzəsi daşmaz və mənim yaşadığım evin altına su dolub, evimi qəzalı vəziyyətə düşməsinə gətirib çıxartmaz. Lakin, dəfələrlə Göyçay Suvarma Sistemləri İdarəsinin rəisi Şakir Əhmədovun işçiləri və Lətif adlı mühəndisi evimə gəlib baxaraq, heç bir iş görməyiblər. Su bərəsi betonlanmadığı üçün daşıb evimin altına su dolduğu üçün evim qəzalı vəziyyətə düşüb ki, hər an uça bilər.Buna görə həyat və sağlamlığımız ciddi təhlükə altındadır.Mən üzləşdiyim bu problemin h\ll edilməsi üçün aidiyyatı orqanlara çoxlu sayda ərizələrlə müraciətlər etmişəm ancaq heç bir tədbir görülməyib.
Göyçay Suvarma Sistemləri İdarəsinin rəisi Şakir Əhmədovun korrupsiya əməlləri barədə mətbuatda tez-tez yazılar dərc olunur, faktlar göstərilir ancaq adam barədə heç bir tədbir görülmür.
Xahiş edirəm, mənim evimin yanından keçən arxın 100 (yüz) metr hissəsinin betonlanmasını Azərbaycan Meliorasiya və Su Təsərrüfatı açıq səhmdar cəmiyyətinin sədri, cənab Zaur Mikayılova tapşırıq verəsiniz. Çünki, bu Şakir Əhmədov mənim xahişimi nəzərə almır.
Mənim oğlum Orxan Vətən müharibəsində qazi olub. O, Suqovuşan, Ağdərə, Qubadlı uğrunda gdən döyüşlərdə iştirak edib.Kəşfiyyatçı olub, Ağdərə istiqamətində gedən döyüşlərdə ayağından yaralanıb, kontuziya komaya düşüb 3 gündən sonra ayılıb.
Mənim kimi vətəndaşların problemləri birincilər sırasında həll olunmalıdır. Lakin Göyçay Suvarma Sistemləri İdarəsinin rəisi Şakir Əhmədov, özü bilərəkdən məni sizdən narazı salır, əks halda, mənim problemimi dərhal həll edərdi. Artıq mənim xahişimdən uzun müddət vaxt keçib, lakin yenə bir nəticə yoxdur. Cənab Prezident, sizdən xahiş edirəm, göstərdiyim cinayət faktları obyektiv araşdırılıb, qanuna müvafiq tədbirlər görülməsinə və Şakir Əhmədovun məsüliyyətə cəlb edilməsinə tapşırıq verəsiniz.
O boyda Naxçıvanın bir polis general-mayoru var – Daxili Qoşunların Naxçıvan Əlahiddə Əməliyyat Briqadasının komandiri Səlim Niftəliyev. Vəzifəcə Naxçıvan MR Daxili İşlər naziri, polis polkovniki Rəşad İsmayılovun müavini sayılır. Məntiqlə üz-üzə gələndə Səlim Niftəliyev dərhal Rəşad İsmayılovun qarşısında fərağat dayanıb ona polis salamı verir. Təsəvvür edirsinizmi, general müavin polkovnik nazirin qarşısında fərağat dayanır.
Təqdim etdiyim bu şəkil, sözügedən anormal durumun təsadüfi olmadığını təsdiqləyir. Səlim Niftəliyev hətta qoluna vurduğu şevronu da kəllə-mayallaq yapşdırıb. Bayrağımızın göy rəngi aşağıda, yaşıl rəngi isə yuxarıda. General-mayor Səlim Niftəliyev deyəsən ya bayrağımızdakı rənglərin düzülüşünü bilmir, ya da elə özü tərs-mərs adamdır. Tərs-mərs adama kəllə-mayallaq da vəzifə nəsib olar.
Heydər Oğuz
Teref.az
Reanimasiya şöbəsində qalmaq üçün 550 manat pul ödəməlisən...
Direktorun aylıq maaşı 12 min manatdır, bura bonus, rüşvət və korrupsiya daxil deyildir...
Kübra Fərəcova adına Elmi-Tədqiqat Pediatriya İnstitutu ( “OMD” ) ilə bağlı öncə onu qeyd edək ki, bu tibb müəssisəsi Azərbaycanda UŞAQLAR üçün ilk xəstəxanadır. Yəni bu xəstəxana məhz uşaqlar üçün nəzərdə tutulub. 1926-ci ildə əhalidən yığılan iyanə hesabına tikilməyə başlayan, 1986-cı ildə Səhiyyə Nazirliyinin göstərişilə Elmi-Tədqiqat Pediatriya İnstitutu adı verilən, 1992-ci ildən etibarən isə Kübra Fərəcovanın adını daşıyan «OMD» xəstəxanası son illər sanki uşaqların qəniminə çevrilib.
Bircə faktı qeyd etsək, vəziyyət aydın olar. Belə ki, K.Fərəcova adına Elmi-Tədqiqat Pediatriya İnstitutunda Sabirabaddan olan ölmüş qız körpəsinin valideynlərinə, səhvən ölmüş oğlan körpəsinin meyitini veriblər. «OMD» xəstəxanasında qız körpəsinin öldüyünü bildirdikdən sonra uşağın meyitini valideynlərinə təhvil veriblər.
Lakin uşağın dəfn mərasimində körpənin qız yox, oğlan olduğu məlum olub. Valideynlər polisə müraciət ediblər və .... K.Fərəcova adına Elmi-Tədqiqat Pediatriya İnstitutundan bildiriblər ki, texniki səhv üzündən qız körpəsinin meyiti Salyandan olan oğlan körpəsinin meyiti ilə səhv düşüb. Başqa bir uşağın nənəsi deyir ki, həkim uşağımızı öldürüb bizə verdi: “Bizdən icazəsiz uşağı kəsib-doğrayıblar. Ən bahalı dərmanları bizə aldırırdılar. Deyirdilər, özümüz bahalıları yazırıq ki, uşağa yaxşı təsir etsin. Sonra da uşağı bu hala salıb bizə verdilər”.
Başqa bir valideyin yazır ki, uşaq anadan olanda həkimlər uşağın sağlamlığında heç bir problemi olmadığını dedilər, OMD-də də rentgen zamanı da problem olmadığını söylədilər və həkim Gündüz Ağayev hər şeyin yaxşı olacağını deyirdi, amma 3 gündən sonra uşaq öldü və bəlli oldu ki, körpənin anadangəlmə anus dəliyi olmayıb.
Dünyada bundan böyük rüsvayçılıq ola bilməz. Bəs onlarla həkim, cərrah görməyib ki, körpənin anus dəliyi yoxdur..? Bunlar ancaq bahalı dərmanlar, pul haqqında düşünürlər.
Bəli, OMD xəstəxanası əslində göz önündədir. OMD xəstəxanasında olan xəstələr yazır ki, uşaqlar üçün nəzərdə tutulan K.Fərəcova adına Elmi-Tədqiqat Pediatriya İnstitutunun reanimasiya şöbəsində natəmizlik baş alıb gedir.
Bu azmış kimi reanimasiya şöbəsində qalmaq üçün 550 manat pul ödəməlisən. OMD-nin direktoru Allahverdi Musayev müqavilə əsasında xəstəxanaya xeyli sayda həkimləri yarımştat üzrə işə qəbul edib, Ramilə, Anar və s kimi həkimlər OMD-də qeyri-rəsmi MƏSLƏHƏTÇİ kimi işə qəbul olunublar, hansı ki, həmin şöbələrdə kifayət qədər təcrübəsi, savadı olan elmlər namizədi alimlər, professorlar çalışır. Direktor Allahverdi Musayev kənardan OMD-yə guya uzman həkimlər işə qəbul edərək onlara 5000 manat maaş verir, hansı ki, OMD-də də çalışan peşəkar həkimlər, professorlar 500-1000 manat arasında maaş alırlar.
Digər ciddi problem odur ki, OMD-də də ölüm hallarının sayı son vaxtlar xeyli artıb. Amma bu real rəqəmləri gizlədirlər. Və ölümü real olan uşaqları ölümqabağı valideynlərə verib xəstəxanadan çıxarırlar ki, ölümün statistikası aşağı olsun. Bir ayda 40-50 nəfər ölüm halı olur ki, bunlar da gizlədilir. Hətta xəstələrin müayinə göstəriciləri, xəstəlik tarixçələri də it-bata düşür, ya da gizlədilir. OMD-də də hətta 40-50 yaşlı kişilərə də sistem köçürülür. Bir soruşan yoxdur ki, bura uşaq xəstəxanasıdır, yoxsa..?
Direktor həkimlərdən tələb edir ki, lazım gələrsə küçədən xəstə-pasiyent tutub gətirin əməliyyat üçün...
Onu da qeyd edək ki, OMD-nin Oftalmologiya institutu ilə uzun illərin müqaviləsi var. Ki, göz xəstəliklərinin müalicəsi üçün. Amma hazırda OMD həmin müqavilədən imtina edib və o işləri direktor Allahverdi Musayevin qardaşı Samir həkim həyata keçirir. Hansı ki, Samir həkim oftalmoloq olsa da, xüsusi göz əməliyyatlarını bacarmır. Bütün bunlar azmış kimi, direktorun göstərişi ilə vaxtından qabaq doğulmuş körpələr üçün 100-300 manat arasında pul tələb edilir. Ki, onların görmə qabiliyyəti yaxşılaşdırılsın. Direktorun başqa bir qardaşı Seymur həkim isə kardioloq olsa da normal əməliyyat edə bilmir.
Sözün qısası, 3 qardaş bir araya gələrək OMD-ni məhv edirlər, reanimasiya şöbəsini sanki "bazara” döndəriblər.
Yazıya son olaraq onu qeyd edək ki, bu yaxınlarda 20 yaşlı gənc oğlan OMD-də burnundan əməliyyat zamanı dünyasını dəyişib. Soruşan yoxdur ki, uşaq xəstəxanasında 20 yaşlı gənci necə əməliyyata qəbul ediblər..?
Onu da qeyd edək ki, OMD-də bütün müayinə və müalicələr pulla, ödənişlidir. Direktor Allahverdi Musayev üçün icbari sığorta-zad boş şeydir. OMD-yə dövlət kifayət qədər vəsait ayırsa da orada xəstələrdən analiz götürülmür, direktorun göstərişi ilə xəstələr analiz üçün İNCİ-yə göndərilir. Vəziyyət o dərəcədə kritik həddə çatıb ki, hər ay, hər şöbədən pul yığılır. Görəsən, bu pul hara yönləndirilir?
Təsəvvür edirsiniz, direktorun aylıq maaşı 12 min manatdır. Bura bonuslar, alınan rüşvət və s daxil deyil. Bir sözlə, OMD-nin direktoru Allahverdi Musayev dövlətin ayırdığı vəsaiti dağıdır, dələduzluq edir, rüşvət və korrupsiya ilə məşğul olyur. Direktor əməkdaşları məcbur edir ki, tibbi, texniki avadanlıqların sıradan çıxmasına və nəticədə dövlətin pullarının silinməsinə çalışsınlar. Bütün bunların sonunda bir sual açıq qalır: Görəsən, Səhiyyə Nazirliyi, TƏBİB bu rəzaləti görmür..?
P.S. Biz yazırıq, araşdırmaq isə Hüquq Mühafizə Orqanlarının işidir. Özlərini təmizə çıxarmaq üçün məhkəməyə müraciət etmək isə, boğaza qədər korrupsiyanın və rüşvətin içərisində olan dövlətimizi kərpic-kərpic sökən bəzi məmurların hobbisidir. gundelik baki.com/
Məlumdur ki, əsası 1999-cu ildə Çin Xalq Respublikasında qoyulan “FOHOW” Beynəlxalq Korporasiyasının nümayəndəliyi 8(səkkiz) ildir ki, Azərbaycanda fəaliyyət göstərir və bu Korporasiya əsas etibarilə insan orqanizminin immun sistemini gücləndirdiyi iddia olunan qida əlavələrinin satışı ilə məşğul olur. Son vaxtlar müəyyən çevrələrdə “FOHOW” Beynəlxalq Korporasiyasının iflasa uğrayıb bağlanacağı barədə müəyyən söz-söhbətlər dolaşır. Bu həm Korporasiyanın Azərbaycandakı şəbəkəsində çalışan vətəndaşları, həm də bütövlükdə istehlakçıları narahat etməkdədir. Bundan əlavə, bəzi media qurumlarında bu şirkətin fəaliyyətində Azərbaycan qanunvericiliyinə zidd addımların atılması barədə də müəyyən məlumatlar tirajlanmaqdadır. Məsələn, yayılan məlumatlarda qeyd olunur ki, “FOHOW” Beynəlxalq Korporasiyasının rəhbərliyi Azərbaycanda fəaliyyət göstərən 14 nümayəndəlikdə çalışan şəxsləri işə götürərkən tərəflər arasında heç bir əmək müqaviləsi sənədi bağlanmır, nümayəndəliklərə satış məqsədilə məhsullar verilir, amma bunun qarşılığında həyata keçirilən nəğd ödənişlərlə bağlı çek verilmir. Hətta, bu şirkətin nəzdindəki ofislər fəaliyyət göstərdikləri ünvanların sahibləri ilə də icarə müqaviləsi bağlamırlar. Məsələn, Korporasiyanın baş ofisi Bakı şəhəri, Yasamal rayonu, Balababa Məcidov küçəsi, ev-57/59 ünvanında yerləşir və həmin ünvanın Azərbaycan Respublikasının İqtisadiyyat Nazirliyi yanında Dövlət Vergi Xidmətinin əməkdaşı olan Tamerlan müəllimə məxsus olduğu bildirilir. Söylənilənlərə görə, bu iki tərəf arasında heç bir icarə müqaviləsi sənədi imzalanmayıb. Faktdır ki, tərəflər arasında icarə müqaviləsi sənədinin imzalanmaması həm qanundankənar addımdır, həm də bu zaman vergi cinayətlərinə qol qoyulur, əmək intizamının tələbləri pozulur və digər qanunsuzluqlara yol verilir. Media üzərindən apardığımız araşdırmalardan sonra, bu yöndə daxil olan məlumatları əsas tutub 04 oktyabr 2022-ci il tarixdə “FOHOW” Beynəlxalq Korporasiyasının baş ofisində olduq. Məqsədimiz nümayəndəliyin direktoru Nurlan müəllimlə görüşmək və adı çəkilən bu şəxsdən yayılan məlumatlarla bağlı bəzi mətləblərə aydınlıq gətirməsini xahiş etmək idi. Təəssüflər olsun ki, bu şəxsi iş yerində tapa bilmədiyimizdən, biz bu yöndə məqsədimizə nail ola bilmədik. Amma, Korporasiyanın digər əməkdaşı Yaşar müəllimlə görüşümüz baş tutsa da, o, ona ünvanlayacağımız suallara cavab vermək səlahiyyətinə malik olmadığını dilə gətirdi. Yəni, bu şəxs “Mən şirkətdə yalnız ingilis-dili dərsi tədris edirəm” deyib, məhz mətləbdən yayınmağı bacardı. Amma, bir neçə gün bundan öncə Yaşar müəllimin də çalışdığı ofisdən (foto-şəkillər də daxil olmaqla) yayımlanan paylaşımdan, verilən açıqlamadan görünür ki, bu şəxs çalışdığı ofisdə sadəcə olaraq ingilis-dili müəllimi deyil, əsas söz sahibi olan şəxslərdən biridir. Demək, Yaşar müəllimin düşüncəsi və şəxsi yanaşması çalışdığı şirkətdə qol qoyulan qanunsuzluqlara uyğun formalaşıb ki, o, yaşının belə bir çağında yalan danışmağı özünə rəva bilir.
Bütün bunlardan əlavə, bu Korporasiyanın Azərbaycandakı şəbəkəsinin fəaliyyəti ilə bağlı, bu gün də bəzi çevrələrdə başqa-başqa məlumatlar yayılmaqda davam edir. Yəni, yayılan məlumatlarda bildirilir ki, xeyli müddət bundan öncə bu şirkətdə çalışan iki nəfər xanım İran İslam Respublikasının (İİR-nin) Qum şəhərinə dini təhsil almağa göndərilir. Hətta, göndərilən xanımlardan birinin həyat yoldaşı da, məhz bu şəhərdə dini təhsil almağa cəlb olunur. Yayılan başqa bir məlumatda isə qeyd olunur ki, bu Korporasiyada çalışan rəhbər şəxslərdən bir neçəsi müəyyən məqsədlərini həyata keçirmək istəyi ilə, İİR-da vəzifə sahibi olan bəzi şəxslərlə razılaşma əldə etsələr də, az sonra onların belə bir planı baş tutmur. O halda İİR tərəfindən bu şirkətə qarşı külli miqdarda kompensasiya ödənilməsi tələbi irəli sürülür. Belə bir addımların atılması “FOHOW” Beynəlxalq Korporasiyası ilə İİR arasında hansısa formada əməkdaşlığın olmasını ehtimal etməyə əsas verir. Qeyd edək ki, bu gün Korporasiyanın Azərbaycandakı şəbəkəsini Quan adlı şəxs idarə edir. Söylənilənlərə görə, bu şəxsin Lyu adlı həyat yoldaşına verilmiş oturumun müddəti ötən il başa çatıb. Buna baxmayaraq, adı çəkilən bu xanımın hələ də Bakı şəhərində olduğu və onun təsadüfi hallarda yaşadığı mənzildən bayıra çıxdığı bildirilir.
Dolaşan başqa bir söz-söhbətlərə görə, bu günlərdə şirkətin əsas rəhbəri Yu Pey Bakı şəhərində olduğundan, Korporasiyasının ölkəmizdəki nümayəndəliklərində çalışan rəhbər şəxslər arasında intensiv görüşlər təşkil olunur. Keçirilən belə bir görüşlərin nəticəsi olaraq 09 noyabr 2022-ci il tarixdə, saat təqribən 13-14 radələrində Bakı şəhəri, Nərimanov rayonu ərazisindəki hotellərdən (hotel təbliğ olunmasın deyə adını çəkmirik) birinin iclas zalında, bu Korporasiyanın Azərbaycandakı şəbəkəsində çalışanların tədbiri keçirilir. Bu haqda redaksiyamıza məlumat daxil olduqdan sonra, bir neçə media qurumunun əməkdaşı ilə həmin hoteldə olduq. Məqsədimiz bu şəbəkənin ölkəmizə gətirilməsində xüsusi rolunun olduğu söylənilən Yaşar müəllimə əmək müqavilələri və vergi ödənişləri, həmçinin bu Korporasiyanın İİR-da qurmaq istədiyi işlərlə bağlı bir neçə sual verib cavab əldə etmək istəsək də, məhz bu dəfə də istəyimiz elə istək olaraq qaldı. Çünki, Yaşar müəllim “Mən tədbirdəyəm, hələ ki, vaxtım yoxdur” deyib, yenə də mətləbdən yayınmağı bacardı. Onu da bildirək ki, əvvəlcə “Mən bu şirkətdə ingilis-dili tədris edirəm, başqa heç bir səlahiyyətim yoxdur” deyən bu şəxs, məhz sonrakı cavabı ilə özünün səlahiyət sahibi olduğunu sübuta yetirdi. Demək, bu Korporasiyanın Azərbaycandakı şəbəkəsinin qanunsuzluğa söykənən fəaliyyəti ilə bağlı yayılan məlumatlar getdikcə özünü doğrultmaqdadır.
Diqqəti bir məqama da yönəldək ki, bu Korporasiyada çalışan xanımların tam əksəriyyəti başıörtüklü qadınlardır və müəyyən çevrələrdə “FOHOW” Beynəlxalq Korporasiyasının Azərbaycandakı şəbəkəsinin fəaliyyəti ilə bağlı məlumatlar daha geniş çevrələrdə yayıldıqca, hər kəsin bu şirkətə qarşı olan şübhələri getdikcə artır. Düşünürük ki, yazıda qeyd olunanlar aidiyyatı dövlət orqanlarının diqqətini cəlb edəcək və bu şirkətin fəaliyyəti birbaşa nəzarətə götürüləcək. Yəqin ki, o halda şirkətdaxili ab-hava, həyata keçirilən idarəçilik, göstərilən münasibət və s. kimi bir çox məsələlər öz həllini tapacaq.
Yaxın vaxtlarda bu şirkətlə bağlı bir çox sensasion məlumatları, ələlxüsus vergidən yayınma hallarının necə həyata keçirilməsi yöndə atılan addımları hər kəsin diqqətinə çatdırmağa çalışacağıq.
P.S. Yuxarıda qeyd etdiyimiz və növbəti məqalələrimizdə yayımlayacağımız faktlarla bağlı şirkətin rəhbərliyinə, Korporasiyanın Azərbaycandakı səlahiyyətli şəxslərdən olan, eyni zamanda bu şirkət tərəfindən «yeddi karat» titulu ilə ödüllənən Yaşar İsmayılovun ,,Nizami» metrostansiyasının yaxınlığındakı ofisində olub, qeyd olunan sualları bu şəxsə ünvanlasaq da, təssüflər olsun ki, Yaşar müəllim ünvanladığımız suallardan yayındı və suallarımıza cavab vermək iqtidarında olmadığını bildirdi. Bütün bunlara baxmayaraq, etibarlı mənbədən məlumat əldə etdik ki, “FOHOW” ailəsi 09.10.2022- ci il tarixdə, saat təqribən 14:00 radələrində Bakı şəhəri, Nərimanov rayonu ərazisində yerləşən «Arion» hotelində gizli toplantı keçirəcək. Həmin vaxt bir neçə həmkarlarımızla qeyd olunan ünvanda olub şirkətin rəhbərliyinə bir neçə sualla müraciət etmək istədik.
Təssüflər olsun ki, bu dəfə də şirkətin ,,ailə başçısı» heç bir jurnalisti qəbul edib açıqlama vermək istəmədi. Amma, Yaşar İsmayılov və özünü şirkətin əməkdaşı deyə təqdim edən bir nəfər şəxs bizimlə hotelin foyesində görüşüb iclasın yarım saata qurtaracağını və suallarımıza aydınlıq gətirəcəklərinə söz versələr də, az sonra eşitdik ki, «FOHOW» ailəsi gizli iclaslarını başa vuraraq arxa qapıdan qaçıblar.
Bunlara baxmayaraq, yazıda adı çəkilən hər kəsin mövqeyini dinləməyə hazırıq.
Mövzu diqqətimizdədir. Odur ki, bizi izləməyi unutmayın.
Deryaz.az
Bugünlərdə yaradılmasının 30 illiyini qeyd edən Yeni Azərbaycan Partiyasının rəhbər orqanlarında müxtəlif yollarla varlanmış, hətta oliqarxlaşmış şəxslərin olduğu sirr deyil. “Gununsesi.info” saytı belələrindən birinin – uzun illərdir YAP Suraxanı Təşkilatının sədri vəzifəsini daşıyan Vüqar Seyidovun topdağıtmaz var-dövləti ilə bağlı araşdırma aparıb.
Sayt qeyd edir ki, YAP Siyasi Şurasının üzvü olan V.Seyidov uzun illər Bakı Şəhər İcra Hakimiyyətinin başçısı olmuş Hacıbala Abutalıbovun qardaşı Osman Abutalıbovun kürəkənidir. Bu qohumluq YAP-ın rayon təşkilatı sədrinin oliqarxa çevrilməsində mühüm rol oynayıb.
Belə ki, Vüqar Seyidov 14 il Suraxanı Rayon İcra Hakimiyyətinin başçısı olmuş, hazırda Şirvan rayonuna başçılıq edən İlqar Abbasovla birlikdə rayonun gəlirli sahələrinə əl qoyub, nəticədə, dəyəri on milyonlarla dollarla ölçülən daşınmaz əmlaka, ayda yüz minlərlə gəlir gətirən biznesə sahib olub.
Sayta məlumat verən mənbə V.Seyidovun milyonluq əmlaklarının bəziləri haqda məlumat verib.
Bildirib ki, məsələn, Nizami rayonu, 8-ci km. yaşayış sahəsi, M.Abbasov küçəsi 2 ünvanında yerləşən, ümumi sahəsi 809.82 kv.m olan 4 mərtəbəli ofis binası ona məxsusdur. Cənab Seyidov bu qiymətli əmlakı həyat yoldaşı Reyhan Seyidovanın adına sənədləşdirib.
Bundan başqa Binəqədi rayonu, Biləcəri qəsəbəsi Yəhya Hüseynov küçəsi 70 f ünvanında yerləşən, ümumi sahəsi 506 kv.m olan kafe-çayxana, “Yaşıl Ada Uşaq Bağçası MMC” də V.Seyidovun həyat yoldaşı Reyhan Seyidovanın adına olan əmlaklardır.
Mənbə bildirib ki, Qaraçuxur qəsəbəsində yerləşən “Qədim Qarabağ” restoranı da YAP təşkilat sədrinin biznes imperiyasına daxildir.
Məlumata görə, Vüqar Seyidov tikinti sektoruna da baş vurub, mənbə bildirib ki, hazırda 21 yaşayış binasının tikintisi üçün hazırlıqlar gedir. YAP-ın yerli sədri eyni zamanda Nərimanov və Nəsimi rayonları ərazisində hündürmərtəbəli binalar tikdirib.
Cənab Seyidovun bahalı maşın həvəskarı olduğu da verilən məlumatlar sırasındadır. Mənbə bildirib ki, onun avtomobil kolleksiyasına “Range Rover”, 77-ZZ-776 nömrəli son model “Toyota Land Cruiser”, “Mercedes Benz Maybach” və s. lüks modellər daxildir.
Vüqar Seyidovun qayınatası Osman Abutalıbov da böyük biznes sahibidir. Belə ki, o 2009-cu ildə Türkiyədə “Baytaş Su və Meşrubay Pazarlama Sanayi Ticarət Limited” şirkətində 16,7 faiz pay alıb. 2010-cu ilin mayında əvvəlcə şirkətin adı (Nida Su və Meşrubat Pazarlama Sanayi Ticaret Limited), oktyabrda isə payçıları dəyişib. Abutalıbov onu tamamilə Azərbaycan kapitallı şirkətə çevirərək sahiblənib. Dekabrda şirkət İstanbuldan Sakarya bölgəsinə – Sapancaya köçürülüb.
Mənbə bildirir ki, burada Osman Abutalıbovun və ortaqlarının 14 min kv.metrdən çox daşınmaz əmlakı olub. Amma 5 il sonra – 2015-ci ilin sonunda ortaqlar qəflətən şirkətin ləğv edilməsi haqda qərar qəbul ediblər.
“AzPolitika”
“Qlobus” uşaq bağçasında yaşanan biabırçılıqlar haqda vətəndaş Samir Məmmədov yazıb.
Tribuna.Az məlumat verir ki, bu ilin sentyabrının 6-sı Yasamal rayonundakı “Qlobus” uşaq bağçasına müraciət edib. Onun əsasında 5 yaşlı övladı bağçaya qəbul olunub: “Bir ayın qiyməti 450 azn idi. Məbləğ yüksəkdi, səbəbini bağça rəhbərliyi keyfiyyətli xidmətlə izah etdi. Razılaşdım. Bağçaya gedişin 24-cü günü ( Sentyabr ayının 30-u) uşaq bağçada xəstələndi. Xəstəlik vərəqəsi açıldı. Oktyabr ayının 1-i bağçadan oktyabr ayının ödənişini tələb etdilər. “Uşaq xəstədir, hələ billmirik nə zaman sağalar.
Sağalandan sonra qalan günlərdən etibarən ödəniş edərəm”- bildirdim. İsrarla “gəlməyən günləri növbəti aydan nəzərə alacağıq” deyərək ödənişi istədilər. Razılaşdım və 450 azn ödədim. Uşağa baxan Aytən həkim, uşağın vəziyyətinin çox ciddi, sətəlcəm olduğunu bildirdi. Qızdırma 40c-yədək qalxırdı. Həkim bağçada infeksiyanın yayılma ehtimalını nəzərə alaraq uşağa ev şəraitində baxmağı qəti şəkildə məsləhət gördü. 2 həftə keçməsinə və müalicə olunmasına baxmayaraq övladımın xəstəliyi keçmirdi. Vəziyyəti “Qlobus” bağçasının icraçı direktoru Sona xanıma ərz edərək uşağı bağçadan çıxarmalı olduğumu bildirdim və oktyabr ayı üçün ödədiyim 450 azn məbləği geri qaytarmasını istədim. Sona xanımın cavabı şok effekti yaratdı. “Uşaq gəlməsə də, məbləğ batır” -dedi.
“Necə yəni batır? Uşaq üçün heç bir xərc çəkməmisiz, yedizdirməmisiz, yatızdırmamısız, təlimçi cəlb etməmisiz, nəyə görə o məbləği geri qaytarmırsız? Xidmət verməmisiniz, uşağa baxmamısınız – nəyin haqqıdır bu? Bəlkə, o pulu, buradakı havalandırma və ya temperatur nizamsızlığına görə uşağı xəstələndirdiyiniz üçün alırsız? Mən özüm şikayətçiyəm ki, sağlam uşaq verdim, xəstə edib evə göndərdiniz . Buna görə ödədiyim 450 azn məbləği belə hallar üçün düşünülmüş “tələ” müqaviləyə imza atdığıma görə mənimsəmək istəyirsiniz?” -deyə etirazımı bildirdim.
Buna cavab olaraq Sona xanım : “hara şikayət edirsiniz edin. Müqavilə var, şərtlərdə qeyd olunur ki, pul qaytarılmır” dedi. Sona xanım müqavilədə qeyd olunan “tərəflər arasındakı fikir ayrılığı danışıqlar yolu ilə nizamlanır” prinsipinə ümumiyyətlə yaxın durmadı. Onun cavabı bütün dəyər və normalara qarşı gələn cavab idi.
“Qlobus” bağçası özəl olduğuna görə kimə aid olduğunu araşdırdım.
Məlum oldu ki, bağça Abel Məhərrəmovun qızı Nərminə Sadıqovaya məxsusdur.
Nərminə Sadıqova
Məsələyə köməklik göstərməsi üçün ona müraciət etdim. O da “müqavilə var, heç nə edə bilmərik” dedi.
Nərminə Sadıqova başda olmaqla mülkiyyətçisi olduğu “Qlobus” bağçasının bütün rəhbər heyəti yalnız “məbləği müqavilə şərtlərinə görə qaytarmamalıyq” deməklə insani etik dəyərləri heçə saydılar. Biznes etikasını tapdaladılar. 450 azn məbləğində haqsız qazanc əldə etmək uğrunda hər formaya girdilər. Axı necə bir insanı öz pul iştahı bu hala sala bilər? bilər? Axı siz ali təhsil müəssisəsində gənclərə yüksək dəyərləri öyrədən müəllimsiniz. Axı siz gələcək nəsillərə ədalət və həqiqət anlayışlarını ötürən pedaqoqsunuz. Axı siz “Qlobus” uşaq bağçanızdan şəxsi büdcənizə haqsız daxil olan 450 manata ehtiyacı olmayan ziyalısınız. Axı siz intellekt xəzinəsinin arxasınca gedən elm adamısınız. Yoxsa, yanılıram? Bəlkə siz gənclərə maddiyyatdan başqa heç nə izah etməyən, haqsız qazanc əldə etməyin yollarını göstərən, elmi maddiyyatdan üstün görən, yalnız pulun arxasınca gedən bir insansınız? Siz, Nərminə xanım…siz kimsiniz?
Siz cavab verməsəniz də, inanıram ki, xalq kim olduğunuzun qərarını verəcək”
Tribuna.Az