 |
|
|
Yevlax rayon sakini Musayeva Anaxanım Ağakişi qızı tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, qardaşının ölümünə həkimlərin təyin etdiyi səhv diaqnoz səbəb olub:
“Noyabr ayının 10-da, gecə saatlarında qardaşım Ağakişiyev Əli Ağakişi oğlunun halının pisləşməsi ilə əlaqədar Yevlax Rayon Mərkəzi Xəstəxanasına zəng etdim. Oradan təcili yardım gəldi. Lakin qardaşıma heç bir köməklik edilmədi. Bildirdilər ki, Yevlax Rayon Mərkəzi Xəstəxanasına getməlidir. Düşündüm ki, belə məsləhət bilirlərsə, xəstəxanaya aparım.
Yevlax Rayon Mərkəzi Xəstəxanasında qardaşıma səhər saat 08:08-ə qədər baxılmadı, heç bir tibbi yardım göstərilmədi. Təzyiqi 230-130 idi, amma heç bir yardım olunmadı. Ancaq qan analizi götürdülər və ürəyin kardioqrammasını etdilər. Sonra bildirdilər ki, xəstənin mədəsi deşilib.
Saat 6-ya işləmiş həkimlər gəldi. Sonra isə USM həkimi gəldi. USM-dən keçdi. Böyrəyində, ağciyərində, qaraciyərində hepatit olsaydı, yəqin ki, mənə əvvəlcədən deyərdilər. USM olandan sonra da rentgen həkimi gəldi. Rentgen həkimi də heç nə demədi.
Daha sonra xəstəni əməliyyatxanaya apardılar. Dedim ki, çöldə qardaşlarım var, qan lazımdırsa, versinlər. Dedilər ki, qanı normaldır, hər ehtimala qarşı Mingəçevir “qan bankı”ndan qan alsınlar. Gedib qan aldılar.
Qardaşım 3 saat əməliyyatda qaldı. Həkimlərdən soruşdum ki, nəyi var. Həkim-ümumi cərrah Qədimov Elmi Veysəl oğlu qardaşımı yardığını, mədəsində heç nə olmadığını dedi. Onu da bildirdi ki, qaraciyəri zədələdik, qaraciyərində problem yaratdıq.
O biri həkim də gəldi. Elmi həkimin dediklərini təkrar etdi. Bildirim ki, əməliyyatda 3 cərrah iştirak edib. Elmi Qədimov, Xamis Allahverdiyev və Bəxtiyar həkim. Xamis həkim dedi ki, qaraciyəri zədələdik, qaraciyər qan verməyə başladı. Soruşdum ki, bəs necə olacaq? “Güman edirik ki, narkozdan ayılacaq”, - deyə həkim bildirdi.
Sonra qardaşımı reanimasiya otağına yönləndirdilər. Onu görmək istəyirdim. Mənə dedilər ki, tam ayılmasa da, orta-ağır vəziyyətdədir. Qardaşımın yanına getdim. Ona “məni hiss edirsənmi?”, - deyə soruşdum. Başını, gözünü tərpətdi. Həkim bildirdi ki, güman edirik, xəstə tam ayılacaq.
Biz evə gəldik. Gecə saat 01:00 radələrində Xamis həkim zəng etdi ki, xəstədə qanaxma var, təcili xəstəxanaya gəlin, göndəriş verim “qan bankı”ndan 4 litr qan alıb gətirin. Xamis həkim göndəriş Verdi, ordan Mingəçevirə getdik. Mingəçevirdə “qan bankı”ndan qan aldıq. Həkim zəng edib söylədi ki, xəstə Ağakişiyev Əli Ağakişi oğlu rəhmətə getdi.
Bu, necə olur? Mənim qardaşım əməliyyata normal qanla girmişdi.
Qeyd edim ki, gecə ilə bütün sənədləri USM-in cavabını, qan analizlərini dəyişiblər. Sonra da deyirlər ki, böyrək çatışmamazlığı var. Qaraciyəri hepatit idi, ağciyəri isə ümumiyyətlə işləmirdi. Bəs işləmirdisə, niyə əməliyyat etdiniz?
Qardaşım 5 ay əvvəl Rusiyadan gəlmişdi, yanımda yaşayırdı. Heç bir problemi yox idi. Onu səhv diaqnozla əməliyyata saldılar, qaraciyərini zədələdilər”.
Məsələ ilə bağlı həkim Xamis Allahverdiyevlə əlaqə saxladıq. O, əməkdaşımıza bildirdi ki, iş hal-hazırda ekspertizadadır, cavab çıxandan sonra nəticəsi bəlli olacaq. “Qeyd edim ki, xəstə ağır vəziyyətdə xəstəxanaya gəlmişdi. Xroniki xəstə idi. 3 cərrah necə səhv edə bilər? Xəstə əməliyyatdan sonra vəziyyətdən çıxa bilmədi. Burada heç bir həkimin səhvindən söhbət gedə bilməz. Xanım da yaxınını itirdiyi üçün aqressivdir”, - deyə həkim əlavə etdi.
Bakının Sabunçu rayonu, Bakıxanov qəsəbəsi, Aşıq Alı küçəsində gecə saatlarında söküntü və tikinti işlərinin aparılması sakinlərin etirazına səbəb olub.
Bu barədə Pravda.az-a məlumat verən sakinlər bildiriblər ki, tikinti şirkəti işi ağır texnikalarla gecə saatlarında həyata keçirir, ətrafa yayılan səs-küy narahatlığa səbəb olur.
Sakinlərin sözlərinə görə, əraziyə polis çağırılır, iş dayandırılır, amma bu, uzun sürmür: "Polis əməkdaşları ərazini tərk edən kimi iş yenidən başlayır".
Ərazidən görüntüləri təqdim edirik:
Ağcabədi sakini doqquz yaşlı övladının həkimin yazdığı dərmandan zəhərləndiyini iddia edib.
Bununla bağlı Oxu.az-a şikayət daxil olub.
Vətəndaşın sözlərinə görə, Ağcabədidə fəaliyyət göstərən "Medical City Emil" klinikasından zəng edərək, ona Bakıdan gələn həkimin övladını müayinə edəcəyi barədə məlumat veriblər.
"Mən də uşağı dekabrın 7-si (2024-cü il - red.) götürüb apardım. Növbə götürüb həkimin qəbuluna düşdük. 30 manat da pul ödəmişik qəbulda. Səbəb uşaqda iştahasızlıq və ağız qoxusunun olması idi. Cəmalə həkim bizə resept yazmadı. Dedi ki, imkanınız çatırsa, dərmanı mən gətirim. Qiyməti 275 manatdır. 10 gün içəcək, 15 gündən sonra gəlib özüm yoxlayacağam. Əgər hər hansı problem olsa, pulunuzu qaytaracağam. Nəticədə uşaq dərmandan zəhərləndi. Bədənində səpgilər yarandı", - deyə uşağın anası qeyd edib.
Valideyn bildirib ki, uşağın vəziyyəti yaxşı olmadığı üçün onu yenidən Bakıda başqa həkimə aparmalı olublar:
"Həmin həkim bildirdi ki, bu dərmanı uşağa vermək olmaz, o hətta uşağı öldürə də bilər.
Neçə dəfə Cəmalə həkimə yazmışıq, zəng etmişik, heç bir cavab vermir. Ya da yazır ki, özüm zəng edəcəyəm. Amma nə zəng edir, nə də zəngə cavab verir. Həkimin Bakıda hansı xəstəxanada işlədiyi haqqında da mənə məlumat verən yoxdur ki, gedim işlədiyi yerə".
Məsələ ilə bağlı sözügedən həkim Cəmalə Teyyubova ilə əlaqə saxladıq. O, sayta a açıqlamasında xəstəni qəbul etməsi faktını təsdiqləsə də, iddiaları rədd etdi.
"Bəli, həmin xəstəni qəbul etmişəm. Əvvəlcə qeyd edim ki, etdikləri ödənişi bir az əvvəl xəstənin kartına geri köçürmüşəm.
Heç yerdə gizlənməmişəm, "20 Yanvar"da, Şərq Təbabəti Klinikasında çalışıram.
Əminliklə deyirəm ki, yazılan dərman heç bir halda uşağa zəhərlənmə verə bilməz. İnanmırlarsa, dərmandan bir nümunəni aparıb versinlər ekspertizaya, əgər 1% belə əks-təsir olsa, başımla cavabdehəm. Hətta bu qədər böyük danışıram", - deyə həkim bildirib.
Dərmanın reseptsiz yazılmasına gəlincə isə həkim bildirib ki, bunun üçün reseptə ehtiyac yoxdur.
"Mən onlara izah etdim, məlumat verdim ki, birinci mərhələdə biz onları müayinə edirik, yoxlayırıq, konsultasiya edirik, müəyyən yoxlamalar aparılır və bütün nəticələr kompüterdə xüsusi proqrama vurulur və o dərmanlar da kompüterdə çıxır. Sonra sifariş edirik, Bakıdan göndərilir. Uşağa kimyəvi dərman yazılmayıb, hansısa psixotrop dərman yazılmayıb, bitki mənşəli dərmandır. Bunun üçün reseptə ehtiyac yoxdur.
İkinci mərhələdə artıq diaqnozun nəticələrini təqdim edirik. Onlar isə ikinci mərhələyə gəlməyiblər. Məsələ budur", - deyə həkim bildirib.
Səhiyyə Nazirliyinin Analitik Ekspertiza Mərkəzindən (AEM) isə Oxu.Az-ın sorğusuna cavab olaraq bildirildi ki, məsələ ilə bağlı işçi qrupu yaradılıb.
"Fakt detallı araşdırılacaq və nəticəsi barədə məlumat veriləcək", - deyə məlumatda qeyd olunur.
Trestin Tikintiyə Texniki Nəzarət şöbəsinin rəis müavini Baxşəli Əliyev hüquqlarının ciddi şəkildə pozulmasından yazır…
Redaksiyanın poçtuna göndərilmiş və aşağıda ixtisarla təqdim ediləcək şikayəti yazan Əliyev Baxşəli Əli oğlu ilə telefon əlaqəsi saxladıq. O, şikayətində yazdıqlarını təsdiqlədi. Sonra redaksiyamızda oldu və şikayətində deyə bilmədiyi digər xüsusatlar barədə əməkdaşımıza geniş müsahibə verdi. Bu barədə az sonra.
Qeyd edək ki, münasibətini öyrənmək üçün şikayət məktubunda adı çəkilən trest rəhbərliyi ilə əlaqə saxlamaq istəsək də, ola bilsin hansısa səbəbdən telefon zəngimizə cavab verilmədi. Lakin şikayət məktubunu SOCAR-ın media mərkəzinin elektron poçtuna göndərdik. Bu dəqiqələrədək şikayətə dair hansısa mövqe və ya cavab bildirilməyib.
***
Beləliklə, şikayətçi ərizəsində yazır:
-Hörmətli «Təzadlar» qəzetinin rəhbərliyi. Bildirirəm ki, mən Qubadlı rayonundan məcburi köçkünəm. Qarabağ Müharibəsi Veteranıyam. 2011-ci ildə Azərbaycan Respublikasının Prezidenti, Hörmətli cənab İlham Əliyevin şəxsi göndərişi ilə “Neftqaztikinti” trestində işə götürülmüşəm. İşlədiyim müddətdə üzərimə düşən vəzifələri layiqincə yerinə yetirmiş, Şirkət və Trest rəhbərliyinin Fəxri Fərmanları ilə təltif olunmuşam (təqdim edirəm). Pensiya yaşım 01.01.2023-cü ildə tamam olmuşdur. Beş nəfər ailə üzvümün, həyat yoldaşı müharibədə Şəhid olmuş bacım və onun bir uşağının himayəmdə olmasını və maddi durumumun ağırlığı ilə əlaqədar Şirkət rəhbərliyinə Müasir Azərbaycan dövlətinin qurucusu və memarı, Ulu Öndərimiz, mərhum Heydər Əliyev tərəfindən 1994-cü il tarixdə imzalanmış 841 saylı “Veteranlar haqqında” Azərbaycan Respublikasının Qanununa («Veteranlara əmək hüququnun heç bir məhdudiyyət qoyulmadan, sağlamlıq vəziyyətinin imkan verdiyi səviyyədə həyata keçirilməsi, ictimai faydalı fəaliyyətdə iştirak etmək üçün lazımi şərait yaratmaq;- I maddə VII bənd;
-veteranlar pensiyasını almaqla əvvəllər işlədikləri müəssisədə əmək fəaliyyətini davam etdirmək hüququna malikdirlər;
-veteranların əmək fəaliyyətinin məhdudlaşdlrılmasına yol verilmir -9-cu maddə, I, II bəndlər.)» əsasən müraciət edib 2023 və 2024-cü illər üçün əmək müqaviləmin uzadılmasına nail olmuşam. Bununla yanaşı, səhhətim və sağlamlığım əmək fəaliyyətimi davam etdirməyə tam imkan verməsinə baxmayaraq adı çəkilən qanunun şərtlərini kobud şəkildə pozaraq növbəti 2025-ci il üçün uzatmaqdan imtina olunur.
Əmək müqaviləmin uzadılması haqqında Ulu Öndərimiz tərəfindən yaradılmış çoxsaylı Qarabağ müharibəsi veteranları, əlilləri və şəhid ailələrini sıralarında birləşdirən “Azərbaycan Qarabağ Veteranları, Əlilləri, və Şəhid Ailələri” (QVƏŞA) İctimai Birliyinin rəhbərliyi və Milli Məclisin üzvləri də Neft Şirkətinin rəhbərliyinə müraciət ünvanlayıb. Lakin Şirkətin kadrlar departamentinin əməkdaşları buna məhəl qoymayıb əmək müqaviləmin uzadılmasına mane olurlar. Şirkətin bilavasitə bu müraciətləri araşdıran məsul şəxsləri qanunların icrasına nəzarətin “olmamasını” hiss edib atdıqları bu addımla ilk növbədə: -«Veteranlar Haqqında» Qanunu imzalayan, bu qrup insanların torpaqlarımızın işğalına qarşı canlarından keçənlərə qayğı ilə yanaşan mərhum Ulu Öndərimizin imzasına çox böyük etinasızlıq göstərib qanunlara əməl etmirlər.
Onu da qeyd edim ki, bu məmurlar Azərbaycan Respublikasının Prezidenti cənab İlham Əliyev “Qarabağ Müharibəsi iştirakçılarına diqqət və qayğı ilə yanaşılmalı” çağırışına belə diqqət vermirlər. AQVƏŞA İctimai Birliyinin müraciətini saymamaq Qarabağ Müharibəsində Şəhid olanların ruhuna təhqir kimi dəyərləndirilir. Milli Məclis üzvlərinin müvafiq qanunvericiliyin tələbələrinin yerinə yetirilməsi barədə müraciətinin nəzərə alınmaması parlamentin nüfuzuna hörmətsizlik nümayiş etdirməkdir. Onlar mənim hüququmu açıq-aşkar pozmaqla Azərbaycan Respublikasının qanunvericiliyinin tələblərinə riayət etməmişlər.
Hörmətli redaksiya, Sizdən “Azərbaycan Respublikasının Media haqqında» Qanunun müvafiq maddələrini rəhbər tutub AR DNŞ-nin (SOCAR) “Neftqaztikinti” trestində «Veteranlar haqqında» AR-nın qanununun kobud şəkildə pazularaq müharibə veteranlarına, əlillərinə, Şəhid ailələrinə qarşı olan hörmətsizliyin qarşısının alınması istiqamatində müvafiq addımlar atasınız və mənim əmək fəaliyyətimi davam etdirmək üçün müqavilə müddətimin uzadılmasının qanuni həllinə kömək edəsiniz.
Düşünürəm ki, canını bu dövlət yolunda qurban vermiş bir döyüşçünün müqavilə müddətini bir il də uzatmaqla Dövlət Neft Şirkətinə heç bir iqtisadi-maliyyə ziyanı dəyməz.
Hörmətlə: Əliyev Baxşəli Əli oğlu».
***
«Təzadlar»dan: şikayətçi Əliyev Baxşəli Əli oğlu redaksiyada olarkən əməkdaşlarımıza geniş müsahibə verərək bir sıra suallara aydınlıq gətirib… Düşünürük ki, "Neftqaztikinti" trestinin rəhbərliyi onun daha bir il müddətində öz vəzifəsini icra etməsinə etiraz etmir. Digər suallar isə qalır SOCAR rəhbərliyinin müvafiq strukturlara göstərişlərinin icrası. Hesab edirik ki, torpaqlarımızın müdafiəsində canından belə keçməyə hazır olmuş, bəxti gətirərək sağ qalmış müharibə veteranı Əliyev Baxşəli Əli oğluna daha bir il də işləmək şansı verməklə onun ailəsinin sosial probleminin həllinə dəstək verməyə dəyər!
Mövzuya qayıdılacaq.
«Təzadlar»
Azərbaycan Respublikası Elm və Təhsil Nazirliyinin tabeliyində fəaliyyət göstərən Təhsildə Keyfiyyət Təminatı Agentliyi (TKTA) “Azərbaycan Dəmir Yolları” (ADY) Qapalı Səhmdar Cəmiyyətinin (QSC) İnsan resursları departamentinin müdir müavini Samir Yusif oğlu Əmirovun diplomunu təsdiqləməyib.
TEREF Pravda.az-a istinadla xəbər veririk ki, Samir Əmirov Türkiyənin Ege Universitetində radio, televiziya və sinema fakültəsində təhsil alıb.
Onun departament rəhbəri Ceyhun Nağıyevlə dost olduğu bildirilir, əvvəllər özəl şirkətlərdən birində çalışıblar. Həmin vaxt Samir Əmirov dostu Ceyhun Nağıyevin müdiri olub. ADY-də isə vəzifələri yerini dəyişib. S.Əmirov departament rəhbərinin müavini olmaqla yanaşı, ADY-də Təlim və İnkişaf Mərkəzinin də müdiridir.
Məsələ ilə əlaqədar Pravda.az-ın əməkdaşı Samir Əmirovla əlaqə saxlasa da, o, münasibət bildirməkdən imtina edib: “Bu məsələ ilə bağlı heç bir məlumat verən deyiləm. Ümumiyyətlə, nə məsələdir, məni niyə belə narahat edirsiniz? Sizə nömrəmi kim verib? Nömrəm axı mətbuatda yoxdur. Sualınızla əlaqədar elə nömrəmi aldığınız şəxsə müraciət edin”.
"DİA-AZ" bildirir ki, əslində bu faktın özü yetərlidir ki, “Azərbaycan Dəmir Yolları” sistemində cərəyan edən olayların mahiyyətindən xəbərdar olasan. Yəni təkcə kadr təyinatında saxtakarlıq müşahidə olunmur, eyni zamanda büdcə vəsaitinin xərclənməsi, keçirilən tenderlər və daha böyük yeyinti imkanları... bu gün cənab Rüstəmovun əsas şakərlərindən birinə çevrilib, desək, yanılmarıq...
Əgər bu fakt həqiqəti ehtiva edirsə, “Azərbaycan Dəmir Yolları”nda təkcə diplomu saxta olanlar yox... saxta diplomluları görəvə gətirənlər də işlərindən kənarlaşdırılmalıdırlar. Çünki belə bir TƏHLÜKƏLİ TƏYİNAT heç də qarşılıqsız ola bilməz...
Məsələ diqqətimizdədir...
"Azərbaycan Dövlət Aqrar Universitetində Zəfər Qurbanovun rektor təyin olunmasından sonra universitet özünün ən çətin dövrünü yaşayır. Təhsil müəssisəsində özbaşınalıq geniş vüsət almaqdadır. Bu vəziyyətin ən bariz nümunəsi Baytarlıq Təbabəti fakültəsinə qanunsuz təyin edilmiş dekan Şəlalə Zeynalovanın fəaliyyəti ilə bağlıdır". "DİA-AZ" xəbər verir ki, bu ifadələr sözügedən ali təhsil ocağının tələbələri adından edilən müraciətdə yer alıb.
Müraciətdə daha sonra bildirilir: "Bildirmək istəyirik ki, Baytarlıq Təbabəti fakültəsində çoxlu sayda tələbələr ikinci təhsil alırlar .Həmin tələbələrin əksəriyyəti dərsə gəlmədikləri halda Şəlalə Zeynalova onların imtahan sessiyalarında iştirakına şərait yaradıb. Məsələn:
• Baytarlıq təbabəti Əczaçılıq ixtisası üzrə ikinci kurs tələbəsi Mehman dərsə gəlmədiyi halda imtahanlara buraxılmışdır.Belə tələbələri saymaqla bitirmək olmur.
• Magistratura pilləsində təhsil alan tələbələrdən, Şəlalə Zeynalovanın işlədiyi Hacıqabul və Şəmkir quşçuluq fabrikində çalışan şəxslər, dərsə gəlmədikləri halda imtahanlara buraxılmış və yüksək qiymətləndirilmələrində ona havadarlıq edilmişdir.
• İkinci kurs baytarlıq ixtisası üzrə tələbə Adışirin, bütün fənlərdən davamiyyət limiti ni aşdığı halda, imtahanlara buraxılmış və qiymətləri Şəlalə Zeynalova tərəfindən yazılmışdır.
• Əczaçılıq ixtisasında oxuyan türk tələbə Mehmet Şeyhanlı dərslərdə bir gün də iştirak etmədiyi halda, yaxın rəfiqəsi tyutor Xatirəyə tapşıraraq imtahanlara buraxdırmışdır.
• 5-ci kurs tələbəsi Ramil Şərifov Bakıda yaşadığı üçün dərsə qatılmamış, uzun müddətli saxta xəstəlik arayışı təqdim etmiş və bu arayış Şəlalə Zeynalova tərəfindən qəbul edilmişdir. Söz yox ki nəyinsə müqabilində edilmişdir.
Hörmətli cənablar, fakültədə tələbələr arasında ciddi ayrı-seçkilik mövcuddur. Əksər tələbələr yalnız bir neçə günlük dərsə gəlməməyə görə belə ciddi cəzalandırıldığı halda, Dekana yaxın olan tələbələrin uzun müddət dərsə gəlməməsi göz ardı edilir,çünki onlardan pul alır..."
DAVAMI VAR...
Bizi izləməyə davam edin...
Dövlət Təhlükəsizlik Xidməti və Baş Prokurorluğun rayon, şəhər icra hakimiyyətlərində keçirdiyi antikorrupsiya əməliyyatlarında üzə çıxardığı faktlardan biri də, Mənzil-Kommunal Təsərrüfatı Birliklərində işləyən işçilərin maaş kartlarının vəzifəli şəxslərdə qalması, ştat siyahısında olan şəxslərin yarısından çoxunun işə çıxmamasıdır.
Maraqlıdır ki, bu barədə xeyli cinayətlər ifşa olunsa, cinayətləri törədən şəxslər ağır şəkildə cəzalansa da, eyni hallar başqa-başqa şəxslər tərəfindən təkrar törədilir.
Bu günlərdə sosial şəbəkələrdə yayılan faktlar da bunu deməyə əsas verir.
Həm də, məsələn, elə o məlum olur ki, Nərimanov Rayon İcra Hakimiyyəti də həbslərdən, ifşalardan dərs çıxarmayıb.
Görəsən, Elgin Şirin oğlu Həbibullayev, yəni, çox hörmətli başçı nəyə və kimə arxalanır?!
Konkret olaraq Nəriman rayonunda bu halların baş verməsindən onun xəbəri yoxdurmu?
Varsa, qarşısını almağa gücü çatmırmı?
Adamın inanmağı gəlmir ki, o boyda rayonda, o boyda çox hörmətli, izzətli başçı belə halların baş verməsinə yol versin…
Hələlik bir az da ritorik olan suallarımızın cavabını bilmirik, amma 41 yaşlı Ruhiyyə Rüstəmovanın belə cinayətlərin qurbanı olduğunu dəqiq bilirik.
Ruhiyyə Rüstəmova Nərimanov Rayon Mənzil-Kommunal Təsərrüfat Birliyində dalandar vəzifəsində işləyir.
Gununsesi.info-nun xəbərinə görə, o deyir ki, rəsmi iş vaxtının səhər saat 7 –də başlamasına baxmayaraq, onlardan artıq 8-ə qədər bütün işləri bitirməkləri tələb olunur. Buna görə də hər saat səhər 4-də, hələ dan yeri sökülməmiş işə başlamalı olurlar.
Qısa haşiyə çıxaraq oxucuların diqqətinə bir şeyi də çatdırmaq istəyirik:
Statistikaya baxılsa, adı səhərə yaxın olsa da, gecənin o qaranlığında nə qədər qəzalar olub və o qəzalarda dünyasını dəyişən insanlar da məhz həmin saatda işləməyə məcbur edilən şəxslərdir.
Belə ki, Ruhiyyə Rüstəmova işə qaranlıqda başladığı kimi, elə qaranlıqda da bitirdiyini deyir. Buna səbəb isə, müdirinin ondan öhdəliyində olmayan küçələri də süpürməyi tələb etməsidir.
O, həmçinin deyir:
“Əlavə işə görə heç bir əlavə ödəniş ödənilmir.”
“Nərimanovda 50-60 yerdə zibil qabları var, onları cəmi 4 nəfər təmizləyir. Bütün kartlar, pullar cibə gedir. İndi də həyət işçlərini çıxardıblar. Bizdən bir neçə yol işçisini də şərləyib işdən atıblar. İndi əlavə yolları bizim üstümüzə yükləyərək maaş kartları alırlar.”,-deyə Ruhiyyə Rüstəmova bildirib.
O, bütün bunların necə həyata keçməsini də izah edib:
“Öz tanışlarının adlarını yazdırırlar, yoxlama gələndən gələnə həmin adamları tökürlər ora ki, guya bunlar buranın işçisidir. Yoxlama gedəndən sonra da yenə həmin 4 nəfər qalır.”
Ruhiyyə xanım sonda haqlı bir sual da ünvanlayır:
“Niyə mən yer süpürməliyəm, amma bunun pulunu başqası yeməsidir?!”
O, əlavə olaraq bayramlarda da işlədiyini, lakin buna görə də əlavə pul almadığını bildirir, üstəlik, işinin ağırlığı onun səhhətinə də mənfi təsir göstərdiyi bildirir.
Onu da qeyd edək ki, Elgin Həbibullayev, ümumi olaraq Nərimanov Rayon İcra Hakimiyyəti haqqında, fəaliyyətləri barəsində çoxsaylı narazılıqlar var ki, bunları bilmək üçün mediada və sosial şəbəkədə yazılan hallara baxmaq kifayət edir.
Əslində, bu və bənzəri qanun pozuntuları kifayət edir ki, bu rayon icra hakimiyyəti barəsində tədbir görülsün…
Gununsesi.info
Abşeron rayon Gigiyena və Epidemiologiya Mərkəzinin işçisi rəhbərlikdən şikayətçidir.
Mərkəzin Dezinfeksiya bölməsinin müdiri Yaqut Abdullayeva Bizim.Media-ya 20 ilə yaxındır çalışdığı müəssisədə onun adından saxta sənədlərə imza atıldığını deyib.
Şikayətçi rəhbərliyi qanunsuzluqda ittiham edir:
“Adımdan Baş İdarəyə saxta hesabatlar verilir, idarə də o hesabatları Səhiyyə Nazirliyinə göndərir. Nazirliyin özünə bununla bağlı şikayət eləmişəm, lakin nəticə olmur. Məcbur edirlər ki, mən saxta sənədlərə imza atım. Onu etmədiyim üçün nizam-intizamı pozmaqla bağlı töhmət verirlər. Dövlət əleyhinə olan heç bir sənədə imza atmıram. Əmək funksiyalarım pozulur”.
O, əlində saxta sənədlərin olduğunu iddia edir:
“Bu sənədlər infeksion xəstəliklərin gedişatı haqqındadır. Mənim iştirakım olmadan bunlar icra olunub, amma sənədlər mənim adımdan göndərilib. Biz məktəblərə, bağçalara, fərdi evlərə də dezinfeksiya işləri ilə bağlı gedirik. Olmayan işlərin hesabatını mən dövlətə necə verim? Bizim işimiz dezinfeksiyadır, həmin işdə iştirak etmədiyimiz halda necə yalandan iştirak etdiyimizi yaza bilərik?! Getmirik, bəs dərmanlar hara gedir? Bunlar qanuni şəkildə oğrudurlar”.
Məsələyə aydınlıq gətirmək üçün Abşeron rayon Gigiyena və Epidemiologiya Mərkəzinin rəhbəri Xalidə Hüseynova ilə əlaqə saxladıq.
O, Bizim.Media-ya açıqlamasında bütün bunların iftira olduğunu bildirib:
“Mən bir ildir təyin olunmuşam, bura təyin olunanda mənə məhz bu xanımla dil tapa biləcəyimi soruşmuşdular. 25 ildir əvvəl həkim, bir ildir də rəhbər vəzifəsindəyəm. Bu xanımı hamı iftira atmasına görə tanıyır. Heç bir sənədə mən onun adından qol çəkməmişəm. O, bütün qurumlara müraciət edib və mən özüm yoxlama təşkil etmişəm ki, burda heç bir yeyinti etməmişəm, saxta sənədə imza atmamışam. Yoxlama gəldi və nə qədər problem vardısa, xanımın öz bölməsindən çıxdı”.
O bildirib ki, şikayətçi Yaqut Abdullayeva 11 dəfə anbara müraciət edib, dərmanlar alıb:
“Ola bilər ki, ocaqlara gedib, dezinfeksiya işləri aparıb, amma bununla bağlı heç bir akt və jurnallarda qeydiyyat aparılmayıb. Yoxlamanı Baş İdarə apardı, aşkarlanan nöqsanlarla bağlı ona töhmət verildi. İl ərzində bütün sənədləşmə səhvdir, 11 yerə getmək üçün dərmanlar götürülüb və həmin dərmanların hara işlənməsi barəsində heç bir məlumat yox idi. O, sadəcə qarşı tərəfi gözdən salmağa çalışır.
Baş Prokurorluğa şikayət edib ki, guya mən tibbi maskalarla bağlı yeyinti edirəm, amma yoxlama gəldi ki, hər şey yerindədir. Olmayıb ki, mən onun hansısa iştirak etmədiyi prosesdə onun iştirak etdiyini yazım. İftira atır ki, mən işçilərə deyirəm ki, onunla danışmayın. Əksinə mən işçilərə tapşırıram ki, siz onunla mehriban olun, danışın”.
Bu gün paytaxtda, həmçinin regionlarda fəaliyyət göstərən elə təhsil müəssisələri var ki, onlar müasir standartlara cavab verəməməklə yanaşı, bir sıra qanunsuzluqlara, özbaşınalıq və neqativ hallara yol verirlər.
Bölgələrdə yerləşən orta ixtisas təhsili müəssisələrinin bir çoxunda müxtəlif səpkili problemlər nəzərə çarpmaqdadır. Belə təhsil müəssəsindən biri də regionda fəaliyyət gösdərən Quba Dövlət Sosial-İqtisad Kollecidir.Bu barədə redaksiyamıza daxil olmuş məlumatda deyilir. Daxil olmuş məlumatda vurğulanır: Tədrisin təşkilində, tələbələrin biliklərinin qiymətləndirilməsində ciddi nöqsanlara yol verilir. Kollecimizdə qış semestr imtahanları başladığından rüşvət yığımına start verilib.
Kollec rəhərliyi tələbələrdən imtahanlar üçün rüşvət yığmağı şöbə müdirləri vasitəsi ilə həyata keçirir. Tələbələrə paylanılan imtahan blanklarına isə şöbə müdirləri birbaşa nəzarət edirlər və hər hansı bir məsələdə yanlışlığın olmamasına çalışırlar. Rüşvət verən tələbənin imtahan blankı müəllimin iştiraki ilə cavablandırılır və şöbə müdirinə geri qaytarılır. Kollecin direktoru Xanım Bayramovanın əmri ilə “imtahan qərargahı” fəaliyyət göstərir. Yaradılan “imtahan qərargahı” formal xarakter daşıyır,o yalnız sənədləşmə üçündür.İmtahan qərargahının harda yerləşməsi və kimin rəhbərlik etməsi haqda heç bir tələbədə məlumat yoxdur.
Bundan əlavə daxil olmuş məlumatda vurğulanır ki, ötən 2024-ci ildə Kollec tərəfindən keçirilmiş satınalma prosedurlarında ciddi qanun pozuntularına yol verilmişdir. Kollecə guya avadanlıqlar alınması və təmir işləri ilə bağlı müxtəlif tender müsabiqəsi (Kotirovka sorğusu) keçirərək külli miqdarda dövlət vəsaitinin mənimsənilməsinə səbəb olub. Əslindər alınan avadanlıq (əgər alınıbsa) və təmir işlərinin görülməsi üçün dəyərindən qat-qat yüksək qiymət göstərilərək dövlət vəsaiti mənimsənilib.
Daxil olmuş informasiyalarla bağlı kollec rəsmlərinə sual ünvanlasaq,deyilənlərin şər-böhtan olduğunu və kolecin ideal vəziyyətdə fəaliyyət gösdətrdiyini bildirirlər.Biz kimin döğru,kiminin yalan olduğunu deyə bilmərik.Bütün bu informasiyalarla bağlı təhsil nazirliyinin baş bilənləri və aidiyyatı qurumlarla aydınlıq gətirməyə çalışacağıq.
xalq.az
Bakı şəhər İcra Hakimiyyətinə tabeli qurumlar tərəfindən keçirilən şübhəli satınalmalar barədə elektron kütləvi informasiya vasitələrində kifayət qədər məlumatlara rast gəlmək olar. Şəhər İcra Hakimiyyətinə tabeli Mənzil Kommunal Təsərrüfat Birliklərinin adı bu baxımdan daha çox hallanır. Amma bu günlərdə belə bir şübhəli satınalma Bakı şəhər İcra Hakimiyyətinin özündə keçirilib.
Bakı şəhər İcra Hakimiyyəti tərəfindən “Sair torpaq, tikili və avad-nın cari təmir xərcləri”,“Əsas fondlara xid. haqqı xərcləri”,“İstehlakyönlü müxt. xid-r”,“Sair xərclər”və“Maşın və avad-nın əsaslı təmiri”mad-rinə aid olan xid-nin satn-sı üzrə 26.11.2024 -cü ildə başlanılmış kotirovka sorğusuna yekun vurulub. Müsabiqədə “SAFMEREN LN 2024” Məhdud Məsuliyyəti Cəmiyyəti qalib secilib və 89.138 manat məbləğində satınalma müqaviləsinin bağlanılması planlaşdırılır. Məlumat satınalmalarının vahid internet portalında 27.12.2024-cü il tarixdə dərc edilib.
Bundan əlavə Bakı şəhər İcra Hakimiyyəti tərəfindən “Yanacaq və sürtkü mat-nın al-sı”, “Nəql. vasit-nin cari təmir xərcləri” və “İst. enerjisi (yanacaq) haq-n öd-si”mad-nə aid olan mal-mat-ın al-sı və alınmış mal-mat-ın quraş-sı üçün xid-lərin göst-si üzrə 25.11.2024 -cü ildə başlanılmış kotirovka sorğusuna yekun vurulub. Müsabiqədə “SAFMEREN LN 2024” Məhdud Məsuliyyəti Cəmiyyəti qalib secilib və 67.400 manat məbləğində satınalma müqaviləsinin bağlanılması planlaşdırılır. Məlumat satınalmalarının vahid internet portalında 25.12.2024-cü il tarixdə dərc edilib.
Göründüyü kimi Bakı şəhər İcra Hakimiyyəti iki gün fərlə bu şirkəti iki kotirovka sorğusunun qalibi seçib və ümumi olaraq 156 534 manat məbləğində iki satınalma müqaviləsi bağlamağı planlaşdırır. Bəlkə də artıq bağlayıb. Qeyd edək ki, bu MMC son aylar bir sıra dövlət qurumları tərəfindən yayılan məlumatlrda hallanan bir nəfər tərəfindən yaradılan onlarla şirkətlərdən biridir. Əvvəlcə rəsmi məlumatlara baxaq.
Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “SAFMEREN LN 2024” (VÖEN: 1506750211) Məhdud Məsuliyyətli Cəmiyyətinin 05.04.2024-cü il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 10 manat olan MMC-nin hüquqi ünvanının ,BAKI ŞƏHƏRİ NƏRİMANOV RAYONU, İLHAM MƏMMƏDOV, ev 10, m. 149, qanuni təmsilçisi kimi isə Çarçarov Elnur Rafiq oğlu qeyd olunub.
Rəsmi məlumatdan göründüyü kimi MMC cəmi 6 ay olar dövlət qeydiyyatına alnıb. Dövlət satınalmalarının vahid internet portalı üzərindən apardığımız araşdırmada məlum oldu ki, MMC yeni yaradılmasına baxmayaraq 24.12.2024-cü ildə Azərbaycan Respublikası Audiovizual Şurası tərəfindən keçirilmiş ehtiyyat hissələri mallarının satınalınması üzrə kotirorovkanın qalibi olub və 24.448,3 manat məbləğində müqavilə bağlayıb. Bu da MMC-nin uyğunluq göstəriciləri barədə şübhələri artırır.
Bəs Bu MMC haqqında daha nə kimi məlumatlar.
“SAFMEREN LN 2024” MMC-nin adı elektron mediada şübhəli satınalmalarda hallanır. Belə ki, barəsində açıq mənbələrdə heç bir məlumat olmayan bu şirkətin qanuni təmsilçisi Elnur Çarçarov tərəfindən həm öz adına həm bacısının adına eyni tarixlərdə, fərqli ünvanlarda çoxsaylı şirkətlər təsis olunub. Bu şirkətlərin hamısının şübhəli satınalmalarda iştirak etdiyi iddia olunur.
Çarçarovların qanuni təmsilçi olduğu şirkətlərdən bəziləri bunlardır:
“Asrol LL 2024” MMC (VÖEN: 1806650761) – Çarçarov Elnur Rafiq oğlu;
“Safmeren LN 2024” MMC (VÖEN: 1506750211) – Çarçarov Elnur Rafiq oğlu;
“Zanbar RR” MMC (VÖEN: 1605439601) – Çarçarov Elnur Rafiq oğlu;
“Samares LM” MMC (VÖEN: 1506721271) – Çarçarov Elnur Rafiq oğlu;
“Avsom 2024” MMC (VÖEN: 1506753401) – Çarçarova Aynur Rafiq qızı;
“Ayazen 2024” MMC (VÖEN: 1506750191) – Çarçarova Aynur Rafiq qızı;
“Azeforn RN” MMC (VÖEN: 1506750061) – Çarçarova Aynur Rafiq qızı;
“Simoder LM” MMC (VÖEN: 1506749951) – Çarçarova Aynur Rafiq qızı;
“Kanera AS” MMC (VÖEN: 1506721421) – Çarçarova Aynur Rafiq qızı.
Göründüyü kimi Bakı şəhər İcra Hakimiyyəti də ona tabeli qurumlar kimi adına onlarla MMC olan bir şəxslə şübhəli işbirliyinə başlayıb. Maraqlıdır ki, İcra Hakimiyyətinin Satınalma Komissiyası “SAFMEREN LN 2024” MMC-ni qalib seçərkən Azərbaycan Respublikası Nazirlər Kabinetinin 30 dekabr 2023-cü il tarixli 494 nömrəli Qərarı ilə müəyyən edilmiş uyğunluğun qiymətləndirilməsinin meyarlarına heç əməl etməyib.
Aktualinfo.org