 |
|
|
Bu il fevralın 1-nə Azərbaycan manatının xarici valyutalara nisbətən nominal effektiv məzənnəsi 102,3 bənd təşkil edib.
Bu barədə Azərbaycan Mərkəzi Bankı məlumat yayıb.
Bildirilib ki, bu, aylıq müqayisədə 0,3 bənd, ötən il fevralın 1-i ilə müqayisədə isə 7,4 bənd çoxdur.
Yanvarın sonuna manatın real effektiv məzənnəsi isə 121,5 bənd təşkil edib. Bu isə aylıq müqayisədə 0,1 bənd, illik müqayisədə isə 0,1 bənd çoxdur.
Azərbaycan Türkiyəyə hər il sıfır faiz gömrük dərəcəsi ilə 1,5 milyon litr şərab və fermentləşdirilmiş spirtli içki ixrac edəcək. Türkiyə mətbuatında qeyd olunub ki, bu, Türkiyə Böyük Millət Məclisinin (TBMM) iki ölkə arasında imzalanmış Preferensial Ticarət Sazişinə əsasən qəbul etdiyi qərarda öz əksini tapıb. Qərara əsasən, Azərbaycandan Türkiyəyə spirtli içkilərin idxalı 10 il müddətinə gömrük rüsumundan azad edilib.
Maraqlıdır, qərar spirtli içki ixracatında Azərbaycan üçün hansı imkanları açacaq? Ümumiyyətlə, Türkiyədə spirtli içkilərimizə tələbat necədir və əsasən, hansı spirtli içkilərin ixrac potensialı yüksəkdir?
“Kaspi” qəzeti növbəti məqaləsində bu və digər suallara cavab tapmağa çalışıb.
15 milyard dollarlıq hədəf...
İqtisadi İslahatların Təhlili və Kommunikasiya Mərkəzindən “Kaspi” qəzetinə verilən məlumata görə, Azərbaycan ilə qardaş Türkiyə arasında xarici ticarət dövriyyəsinin 15 milyard ABŞ dollarına çatdırılması hədəfinə nail olmaq üçün göstərilən səylər müsbət nəticə verir: “İki ölkə arasında bağlanan preferensial ticarət müqaviləsi bu sahədə önəmli rol oynayır. Müqavilə əsasında hər iki ölkə tərəfindən idxal ediləcək məhsullar fiskal rüsumlardan azad ediləcək və nəticədə hər iki ölkəyə məxsus məhsullar daxili bazarlarda daha rəqabətqabiliyyətli olacaq”.
Məhsullarımızın rəqabət qabiliyyəti artacaq
Qurumdan bildirilir ki, bu müqavilə ilə Azərbaycan Türkiyənin spirtli içkilər bazarında öz yerini tuta bilər: “Qeyd edək ki, 2023-cü ildə Azərbaycanın qeyri-neft/qaz sektorunda yer alan spirtli və spirtsiz içkilərin ixracında əhəmiyyətli canlanma müşahidə edilib. Belə ki, 2023-cü ilin yekunlarına görə, spirtli və spirtsiz içkilərin ixracı 29,2 milyon ABŞ dolları və ya 94,1% artaraq 60,2 milyon ABŞ dolları təşkil edib. Sözügedən məhsulların əsas ixrac coğrafiyası avrozona ölkələri arasında İspaniya və Avstriya, MDB ölkələri arasında isə Rusiya və Qazaxıstan olub. Türkiyə Cümhuriyyətinə gəldikdə isə, bu ölkəyə ixrac edilən spirtli və spirtsiz içkilərin həcmində ötən illərlə müqayisədə artım müşahidə olunub. Qarşıdakı müddətdə Azərbaycanın spirtli içki məhsulları sıfır gömrük rüsumu ilə Türkiyəyə ixrac edilərsə, bu, onun qardaş ölkənin bazarında rəqabət gücünü artıracaq. Nəticədə Azərbaycanın spirtli içki məhsulları Avropa və MDB ölkələri ilə yanaşı, Türkiyə bazarında da rəğbət qazana bilər”.
Yerli üzüm sortları ön planda
Üzümçülük və Şərabçılıq Elmi-Tədqiqat İnstitutunun direktoru Vüqar Səlimov deyir ki, dünyada artıq şərabçılıq sahəsində yeni ağız dadına, yeni brendlərə ehtiyac duyulur. Azərbaycanda yerli sortdan hazırlanan şərablar bu tələbatı qarşılamaq iqtidarındadır: “SSRİ dağıldıqdan sonra ölkəmiz yerli sortlarla bağlı tam potensialını ortaya qoymamışdı. Ölkədə istehsal olunan şərabların əksəriyyəti xarici sortlardan alınırdı. İndi müəyyən şərab zavodları var ki, yerli sortların istehsalına başlayıblar. Həmçinin, dünya bazarında da artıq xarici sortlarda rəqabət qabiliyyəti aşağı düşüb, yerli sortlara tələbat yüksəlib. Məsələn, Fransanın, İtaliyanın müxtəlif növ şərablarına tələbat əvvəlki kimi deyil”.
Yeni dad, yeni keyfiyyət
Mütəxəssis vurğulayır ki, hazırda Azərbaycanın yerli texniki üzüm sortlarından alınan şərablara maraq çoxdur: “Azərbaycanın iqlim tipi aqromüxtəliflik yaradır. Bu aqromüxtəliflik şərabçılıq sahəsinə də müsbət təsir göstərir, üzümlərimizin biokimyəvi tərkibini zənginləşdirir. Bu səbəbdən də Azərbaycan şərabları kimyəvi göstəricilərinə görə çox zəngindir. Bu gün Azərbaycan şərabları bazara yeni dad, yeni keyfiyyət gətirir və xaricdə qırmızı şərablarımıza tələbat çoxdur. Ölkədə yetişdirilən Şirvanşahı, Mədrəsə, Həməşərə, Bayanşirə, Xındoqnı kimi texniki üzüm sortlarından yüksək keyfiyyətli, harmonik dada malik şərablar istehsal olunur. Gələcəkdə də yerli sortlarla xaricdə rəqabətqabiliyyətli məhsullarla təmsil oluna bilərik”.
O inkişafın qarşısı alınmasa idi...
İqtisadçı Fuad İbrahimov isə bildirir ki, Azərbaycanın spirtli içki istehsalı sahəsində kifayət qədər təcrübəsi var: “Azərbaycanda sovet dönəmində içki istehsal edən qabaqcıl müəssisələr var idi. Şərabçılıq, üzümçülük o dövrdə də kifayət qədər inkişaf etmişdi. Lakin o dövrdə SSRİ-nin yarıtmaz idarəetmə üslubu ölkədə üzümçülük və şərabçılığı məhv etdi. Halbuki o inkişafın qarşısı alınmasa idi, bu gün qeyri-neft sektorunda, əsasən də kənd təsərrüfatı sahəsində şərabçılıq mühüm yerə sahib olardı. Bu gün ölkəmizdə üzümçülük və şərabçılıq sahəsində kifayət qədər irəliləyiş var”.
İxracın coğrafiyası şaxələnməlidir
İqtisadçı vurğulayır ki, spirtli içki ixracımızda ənənəvi istiqamətlərimiz həmişə Rusiya, Ukrayna, Belarus olub: “Bu ixracın coğrafiyası şaxələnməlidir. Bu gün ölkəmizdə bu sahədə Şərq və Qərb istiqamətində də kifayət qədər işlər görülür. Qardaş Türkiyəyə ixracın isə bizə əhəmiyyətli dərəcədə geridönüşləri olacaq. Çünki Türkiyə turizm sənayesində kifayət qədər dayanıqlı mövqedədir. Bu baxımdan, bizim məhsullarımız bu ərazilərə güzəştli şəkildə daxil olarsa və dövriyyəyə cəlb edilərsə, ilk növbədə turizm dünyasında bunun tanınması prosesi sürətli gedəcək. Bu da öz növbəsində Azərbaycan brendlərinin digər ölkələrdə reklamını gücləndirəcək. Nəzərə almaq lazımdır ki, dünyada spirtli içkilər və tütün məmulatları ilə bağlı kifayət qədər yüksək rüsumlar, aksizlər tələb olunur. Belə bir vəziyyətdə qardaş Türkiyəyə spirtli içkilərin gömrük rüsumu olmadan ixracı, bu məhsulun iqtisadi dövriyyəyə cəlb olunmasında, şaxələnməsində və təbliğ olunmasında kifayət qədər müsbət rol oynayacaq”.
TikTok rəsmiləri yenidən Azərbaycandadır.
Son zamanlar bu sosial media platforması ölkəmizdə bir neçə layihəyə dəstək göstəriblər. Ötən ilin sonu ölkəmizdəki fəaliyyətləri ilə bağlı, İnternet ictimaiyyətinə sayğı göstərərək hesabat da veriblər.
Vaxtaşırı digər qlobal resurslardan fərqli olaraq dövlət, özəl və vətəndaş cəmiyyəti ilə görüşlər keçirirlər.
TikTok Azərbaycanda rəsmi nümayəndəliyi olmadığından ötən ilin sonu Nazirlər Kabinetinin qəbul etdiyi qərara görə digər qlobal şirkətlər kimi vergi ödəyicisi hesab olunur .
Yəni TikTok bu dəfə, digər qurumlarla bərabər Dövlət Vergi Xidmətinə də baş vurmalıdır
Azərbaycanın ən böyül mobil operatoru olan “Azərcell” mobil internetin qiymətlərini artırıb. Onsuz da bahalı olan xidmətin bahalaşmasının səbəbləri hələlik açıqlanmayıb.
“Cable.co.uk” resursunun məlumatına görə, ölkəmizdə 1 GB-ın qiyməti 1,76 dollardır və bu nəticə ilə dünyanın 223 ölkəsinin daxil olduğu reytinqin ortasında qərarlaşırıq. Müqayisə üçün qeyd edək ki, Rusiya 1 GB-ın orta qiyməti təxminən 0,48 dollar olmaqla 30-cu yerdədir.
“Cable.co.uk” analitikləri deyirlər ki, uzun müddətdir hər yerdə mövcud olan 4G infrastrukturu və ya yeni 5G infrastrukturu olan ölkələr cədvəlin daha ucuz sonundadır. Bunun səbəbi onların planlarının orta göstəricidən əhəmiyyətli dərəcədə daha çox məlumat təklif etmələri və məhdudiyyətlərin adətən yüzlərlə gigabayt olması və ya mövcud olmamasıdır. Ona görə də bu ölkələrdə bir gigabaytın qiyməti çox aşağı olacaq.
Mobil internetin bahalaşmasının səbəbi nədir və “Azercell” niyə xidmətinin qiymətini artırmaq qərarına gəlib?
Azərbaycan İnternet Forumunun (AİF) prezidenti Osman Gündüz AYNA-ya şərhində deyib ki, bu suala birmənalı cavab vermək mümkün deyil: “Mənə qiymətlərin artırılmasının və tarif planlarının dəyişdirilməsinin səbəbləri ilə bağlı çoxlu suallar gəlir, lakin onlara cavab vermək mümkün deyil. Belə çıxır ki, mobil rabitə bazarında dominant mövqe tutan şirkət heç bir əsas olmadan zənglərin və məlumatların ötürülməsinin, SMS-in qiymətini qaldırıb, tarif şərtlərini dəyişib. Bütün bunlar əsassızdır və olduqca qəribə görünür”.
“İnanıram ki, bu sahəyə məsul olan dövlət qurumu mövcud vəziyyətə baxıb, bunun nə dərəcədə qanunauyğun olması ilə bağlı bir nəticə çıxaracaq. Hesab edirəm ki, mobil rabitə bazarında rəqabət mühitini də öyrənmək lazımdır. Görəsən, hansı səbəblər şirkəti tarifləri artırmağa vadar edib, onun xərcləri artıbmı? Ümumiyyətlə, “Azercell”in milliləşdirilməsindən sonra investisiya və şəbəkə xərclərinin dinamikasını, həmçinin qiymət artımlarını təhlil etmək faydalı olardı”, - deyə ekspert bildirib.
Həmsöhbətimizin fikrincə, bütün bu suallara cavab verilənə və müvafiq nəticə çıxarılana qədər tarif siyasəti planlarında yeni artımlar və dəyişikliklər dayandırılmalıdır: “Eyni zamanda, xidmətlərin keyfiyyəti və yeni texnologiyalardan istifadə haqqında düşünmək daha məntiqli olardı. Bununla bağlı qeyd etmək istərdim ki, qonşu ölkələrdə tariflər nisbətən aşağıdır, tətbiq olunan texnologiyaların səviyyəsini müqayisəli qiymətləndirmək olmaz”.
“Qonşu ölkələrin mobil operatorları bizdən daha çox sərmayə qoyurlar – son illərdə onlar 5G şəbəkəsi üçün lisenziya alıblar və yeni şəbəkələr təqdim edirlər. Bütün bu yeniliklər əhəmiyyətli investisiyalardan asılıdır. Amma ölkəmizlə müqayisədə belə yüksək xərclər olsa da, qonşu ölkələrdə qiymət artımı müşahidə olunmur. Ona görə də ümid edirəm ki, aidiyyəti strukturlar baş verənlərlə bağlı əsaslı izahat verəcək”, - deyə Gündüz vurğulayıb.
Bu baxımdan “Cable.co.uk”un gəldiyi nəticə maraqlıdır. Britaniya agentliyinin ekspertləri belə qənaətə gəliblər ki, uzun müddətdir hər yerdə mövcud olan 4G infrastrukturu və ya yeni 5G infrastrukturu olan ölkələr reytinqin daha ucuz hissəsində yer alır.
“Bu ona görədir ki, onların planları orta göstəricidən əhəmiyyətli dərəcədə daha çox məlumat təklif edir və məhdudiyyətlər adətən yüzlərlə gigabaytdır və ya mövcud deyil. Ona görə də bu ölkələrdə bir giqabaytın qiyməti çox aşağı olacaq”, - deyə agentlik yazır.
Bakı metrosunda gedişhaqqının artırılması barədə müzakirələr aparılmır.
Referans.az xəbər verir ki, bunu jurnalistlərə açıqlamasında "Bakı Metropoliteni" QSC-nin rəis müavini Hidayət Məmmədov bildirib.
O, eyni zamanda bu il Bakıya yeni metro vaqonlarının gətiriləcəyini deyib: "Yeni vaqonların alınması üçün müqavilələr imzalanıb. Onların gətirilməsi üçün işlər görülür. Hədəfimiz 65 yeni vaqonun Bakıya gətirilməsidir".
Anar Məmmədov Londondakı KFC şəbəkəsini alandan sonra restoranlar zərərlə işləməyə başlayıb
Sabiq nəqliyyat naziri Ziya Məmmədovun oğlu Anar Məmmədova məxsus Böyük Britaniyanın paytaxtı Londonda fəaliyyət göstərən KFC restoranlar şəbəkəsi böyük zərər edib.
Yeniavaz.com xəbər verir ki, səhmlərinin 75%-i Anar Məmmədova məxsus olan “B.J.R. Foods Limited” şirkəti 2022-ci ili 1 milyon 182 min 13 funt-sterlinq (2,6 milyon manat) zərərlə başa vurub.
Müqayisə üçün bildirək ki, “B.J.R. Foods Limited” şirkəti 2021-ci ili 3 milyon 244 min 762 funt-sterlinq mənfəətlə başa vurub.
Bundan başqa şirkətin illik dövriyyəsi isə 7,1% azalaraq 41 milyon funt-sterlinqdən 38 milyon funt-sterlinqə düşüb.
Qeyd edək ki, Londonda məşhur restoranlar şəbəkəsi olan KFC françayzinqinə sahib olan “B.J.R. Foods Limited” şirkətinin 75%-lik payını Anar Məmmədov 23 iyul 2021-ci il tarixində satın alıb.
Onu da bildirək ki, Anar Məmmədov eyni tarixdə daha 3 şirkətin 75%-lik payını satın alıb. Bu şirkətlər “Colonel Foods Limited”, “1st RATE Investment (UK) Limited” və “Amber Restaurants Limited” şirkətləridir.
“Colonel Foods Limited” və “Amber Restaurants Limited” 152 gündən artıqdır ki, hesabatlarını müvafiq qurumlara təqdim etməyiblər.
Səhmlərinin 75%-i Anar Məmmədova aid olan bu şirkətlərə hazırda Böyük Britaniya vətəndaşları 1970-ci il təvəllüdlü Zafar Abbasi və 1967-ci il təvəllüdlü İqbal Sulemani rəhbərlik edirlər. Bu şəxslər daha əvvəl – 2004-2010-cu illərdə Londonda fəaliyyət göstərən “Zqan UK Ltd” şirkətinə rəhbərlik ediblər. Məlum olduğu kimi, Azərbaycanda fəaliyyət göstərən ZQAN holdinq Anar Məmmədova məxsus olub. ZQAN adı da sabiq nazirin özünün və ailə üzvlərinin adının baş hərflərindən yaranıb.
Xatırladaq ki, Bakıda fəaliyyət göstərən KFC restoranları da vaxtilə Anar Məmmədova məxsus ZQAN holdinqə bağlı olub. ZQAN holdinq 2013-cü ildə adını dəyişərək “Garant” holdinq olub. 2017-ci ildə Ziya Məmmədov nazir vəzifəsindən çıxarıldıqdan sonra KFC restoranları vaxtı ilə fövqəladə hallar naziri Kəmaləddin Heydərovun oğlanlarının rəhbərlik etdiyi “Gilan” holdinqin tərkibinə daxil edilib.
Rusiya hökuməti martın 1-dən etibarən benzin ixracına qadağa qoyur. Qadağa, hələlik, altı aylıq bir dövrü əhatə etməlidir.
Rusiya rəsmiləri bu qadağanı irəlidən gələn tarla işlərinə görə yanacağa tələbatın artması ilə əlaqələndirirlər.
Azərbaycan benzinin əhəmiyyətli hissəsini Rusiyadan idxal edir. Bəs bu qadağa Azərbaycanda benzinin bahalaşmasına səbəb ola bilərmi?
Azərbaycan Aİ-92 markalı benzindən fərqli olaraq, Aİ-95 və Aİ-98 istehsal etmir. Əvvəllər Bakı Neft Emalı Zavodunda Aİ-95 istehsal olunduğu açıqlansa da, zavod təmirə bağlanıb və hələ də modernləşdirmə işləri bitməyib. Rəsmi məlumata görə, yeniləmə hələ 2027-ci ildə tamamlanacaq.
Dövlət Statistika Komitəsinin məlumatına görə, Azərbaycan 2023-cü ildə 86 min 36.95 ton "Premium Euro-95" markalı avtomobil benzini idxal edib. Bu da 2022-ci illə müqayisədə 13.5 faiz azdır. Əsas idxal (40 min 261.56 ton) Rusiya Federasiyasından gerçəkləşdirilib.
Həmçinin hesabat dövründə Azərbaycan Belarusdan, Rumıniyadan, Yunanıstandan, Gürcüstandan, Birləşmiş Ərəb Əmirliklərindən və Bolqarıstandan Aİ-95 idxal edib.
Aİ-98 markalı benzinə gəlincə, ötən il onun idxalı 21.6 faiz artıb və 2 min 31 ton təşkil edib. Rumıniyadan 976.21, Rusiyadan 357.1, Belarusdan 593.8, Gürcüstandan 104.24, ABŞ-dən isə 0.04 ton Aİ-98 benzini gətirilib.
Azərbaycana Aİ-92 markalı benzinin isə idxalı azalıb. Ötən ilin yanvar-sentyabr aylarında Azərbaycan 64 min 302 ton Aİ-92 idxal edib. Bu, 2022-ci ilin eyni dövrü ilə müqayisədə 67.7 faiz azdır. Ən böyük idxal (25 min 971 min ton) Türkmənistandan həyata keçirilib. Litvadan 20 min 943 ton benzin alınıb. Rusiyadan isə 17 min 388 min ton idxal edilib.
Məsələyə, hələlik, Azərbaycanın hökumət rəsmilərindən münasibət almaq mümkün olmayıb. Amma Milli Məclisin Təbii ehtiyatlar, energetika və ekologiya komitəsinin sədr müavini Asim Mollazadə "Turan"a açıqlamasında ümid etdiyini bildirib ki, Azərbaycan tezliklə Rusiyadan idxal olunan yanacağı digər mənbələr ilə əvəzləyə biləcək.
Lakin deputat hesab edir ki, Rusiyanın benzin ixracına qoyduğu qadağa Azərbaycanda benzinin qiymətlərinə təsir etməyəcək: "İstisna deyil ki, Rusiya da öz qərarını ləğv edə bilər. Rusiyanın hazırda bir neçə istiqamət üzrə sanksiyalara görə problemi var, onlar da bu qadağanı müvəqqəti olaraq tətbiq ediblər. İstisna deyil ki, ehtiyacları olduğuna görə onlar öz qərarlarını ləğv edəcəklər".
Dövlət Gömrük Komitəsinin son hesabatına əsasən, cari ilin yanvar ayında Azərbaycandan 1 709 ton nar ixrac olunub ki, bunun da statistik dəyəri 1 milyon 489 min dollar təşkil edib. 2023-cü ilin eyni dövründə isə ixracın həcmi 2 691 ton, dəyəri isə 3 milyon 365 min dollar olub.
Bu da onu göstərir ki, ixracın həcmi 982 ton və ya 36.5%, dəyər ifadəsilə 2,3 dəfə, yəni 1 milyon 876 min dollar və ya 55,75 faiz azalıb.
Azalmaya səbəb nədir?
Mövzu ilə bağlı fikirlərini Bizim.Media-ya açıqlayan iqtisadçı-ekspert Fuad İbrahimov, cari mövsümdə nar yığımının və nar məhsullarının emalının həcminin artdığını bildirib:
“Həm əkində, həm də yığımda ciddi artım var. Qiyməti də öz səviyyəsini qoruyub saxlayır. Üstəlik daxili bazarda da nara tələbat ciddi artıb. Hətta narşərab, şirə və digər nar məhsullarının istehsal həcmində də artım müşahidə olunur”.
Bunu yaxşı hal kimi dəyərləndirən ekspert, ixracın azalmanın əsas səbəblərinə də diqqət çəkib:
“Bu gün əksər kənd təsərrüfatı məhsullarımızın əsas ixrac istiqaməti MDB ölkələridir. Daha çox isə Rusiya, Ukrayna və Belarusdur. Bu gün isə Rusiya və Ukrayna arasında müharibə gedir. Bizim əsas çıxışımız Rusiyanın qərb bölgələrinədir. Ölkənin şərqinə, eləcə də orta vilayətlərinə isə heç bir çıxışımız yoxdur. Bu da ixracın bizə maddi cəhətdən baha başa gəlməsi ilə bağlıdır”.
Onun sözlərinə görə, Rusiya ilə ticarət dövriyyəmiz yaxşı olsa da, gəlirlərimiz dönərli valyuta ilə deyil, rublladır:
“Halbuki, gəlirlərimizi dönərli valyutaların biri ilə əldə etmək daha sərfəlidir. Bundan başqa, son dövrlər adları çəkilən ölkələrin istehlak bazarlarındakı ciddi tələbat azalması baş verməkdədir. Məhz bu iki məsələ ixrac potensialımızın azalmasına gətirib çıxarır”.
Bu gün, 07:14
Bu ilin fevral ayının əvvəlinə olan məlumata görə, Azərbaycanda fəaliyyət göstərən 23 bankda 23 min 633 nəfər işçi çalışır.
Yeniavaz.com-un açıqlanan rəsmi məlumatlara istinadən apardığı hesablama göstərir ki, son bir ay ərzində bank işçilərinin sayı 64 nəfər artıb.
Qeyd edək ki, bu ayın əvvəlində ölkədə 2 dövlət bankı, 21 özəl bank olub. Xarici kapitallı bankların sayı 9 olub.
Bu ilin yanvar ayı ərzində bank filiallarının sayı dəyişməz qalıb – 475. Bank şöbələrinin sayı isə bir ay ərzində 96-dan 104-ə yüksəlib.
Banklara məxsus ATM-lərin sayı isə son bir ayda 4 ədəd artaraq 3 min 40-dan 3 min 44-ə çatıb.
Onu da bildirək ki, ölkədə fəaliyyət göstərən 23 bankın yanvar ayı ərzindəki xalis mənfəəti 99,6 milyon manat olub. Müqayisə üçün bildirək ki, ötən ilin eyni dövründə bu göstərici 90,3 milyon manat olub.
“Bayramlardan öncə tələbat çoxaldığına görə qiymətlərin kəskin artımının şahidi oluruq”.
Bu fikirləri Novruz bayramı ərəfəsində ərzaq və digər məhsulların qiymətlərinin artmasına münasibət bildirən iqtisadçı Əkrəm Həsənov Yenicag.az-a açıqlamasında deyib.
Onun sözlərinə görə, mövcud təcrübə Azərbaycanda bu il də bayramqabağı məhsulların qiymətində artım olacağını göstərir:
“Təcrübə Azərbaycanda bayramqabağı qiymətlərin daha da qalxacağını göstərir. Ona görə ki, ən az gəliri olan, aztəminatlı təbəqə də bayram bazarlığı edir. Satıcılar da bundan maksimum dərəcədə istifadə etməyə çalışır. Düşünürəm ki, bu bahalaşma, əsasən, ərzaq məhsullarında özünü göstərəcək.
Bəzi ənənəvi endirimli reklam kampaniyaları da bazarda hələ ki müşahidə olunmur. Hər il olduğu kimi, bu bayram dönəmində də qiymətlərdə artım baş verir. Əgər həmin məhsulları satan şəxslər inhisarçı deyilsə, fikrimcə, burada qeyri-qanuni heç nə yoxdur. Qiymət artımı ümumi qaydada baş verirsə, bu özünü bütün məhsullarda göstərir. Yəni burada inhisarçılıqdan yox, tələb və təklifdən söhbət gedə bilər”.
Bu barədə Yenicag.az-a danışan iqtisadçı Natiq Cəfərlinin sözlərinə görə, artım trendi aprel ayına qədər davam edəcək:
“Azərbaycan reallığını götürsək, ölkəmizdə hər dəfə bayramlar ərəfəsində qiymət artımı müşahidə olunub. Düşünürəm ki, biz yenə də eyni mənzərə ilə qarşılaşacağıq. Bayramlardan öncə tələbat çoxaldığına görə qiymətlərin kəskin artımının şahidi oluruq. Məncə, artım trendi ən azı aprel ayına qədər davam edəcək. Aprel-May aylarında müəyyən səngimə gözlənilsə də, yay aylarında bəzi məhsullarda ucuzlaşma ola bilər”.