2023-cü ildə Rusiyanın bütün istiqamətlər üzrə ixracının ödənişlərində rublun payı son 5 ildə ən yüksək səviyyəyə çatıb.

Tribunainfo.az xəbər verir ki, bu barədə RBC Rusiya Bankının məlumatlarına istinadən məlumat yayıb.

Məlumatdan aydın olur ki, ötən il Rusiyadan mal və xidmətlərin ixracına görə ödənişlər üzrə rublun payı 39 faiz təşkil edib. İl ərzində bu göstərici 11,2 faiz bəndi, 5 il ərzində isə 24 faiz bəndi artıb. RBC qeyd edir ki, rublun minimum payı 2021-ci ildə (14,3 faiz) qeydə alınıb, bundan sonra 2022-ci ildə kəskin şəkildə 27,8 faizə yüksəlib. İkinci yerdə dollar və avro (31,5 faiz), üçüncü yerdə dost ölkələrin valyutaları (29,4 faiz) gəlir.

Nəşr qeyd edib ki, ötən il Asiya ölkələri ilə idxal üzrə hesablaşmalarda rubl 2019-cu ildəkindən daha az paya sahib olub, bu sahədə dost valyutalar lider olub. Asiyadan tədarük edilən mal və xidmətlərin 50 faizdən bir qədər çoxu yuanla ödənilir.

Tənzimləyici 2023-cü ilin yayında belə məlumatların dərcini bərpa etdikdən sonra ilk dəfə olaraq coğrafi ərazi üzrə valyuta istifadəsinin illik payını dərc edib. 2019-cu ildən bəri təqdim edilən statistika Asiya, Amerika, Afrika, Avropa, Karib dənizi və Okeaniya daxil olmaqla, coğrafi ərazilərə bölünür.

RBC xatırladıb ki, 2022-ci il sanksiyalarından əvvəl Mərkəzi Bank məlumatları coğrafi ərazilər üzrə deyil, əsas ölkələr üzrə bölməklə dərc edib.

İran 20 gün ərzində toyuq yumurtasının ilk partiyasını Rusiyaya çatdırmağı planlaşdırır.

İqtisadiyyat.az xəbər verir ki, bu barədə İran Quşçular İttifaqının sədri Həmid Rza Kaşani məlumat verib.

“Biz ilk dəfədir ki, Rusiyaya yumurta ixrac edirik. İran yumurtasının ilk partiyası 20 gün ərzində Rusiyaya çatdırılacaq” , - deyə o bildirib.

Qeyd edək ki, bu ilin yanvarında Belarus, Azərbaycan və Türkiyədən Rusiyaya 78 milyondan çox yumurta ixrac edilib.

Şirkətlər “Ziraat Bank Azərbaycan”dan 79 milyon manatdan çox əmanəti geri çəkib

2023-cü ilin IV rübündə “Ziraat Bank Azərbaycan” əmanət portfelinin 80 milyon manatını və ya 16% manatını itirib. Belə ki, bankın depozit portfeli III rübdəki 491,4 milyon manatdan IV rübdə 411,4 milyon manata enib.

İqtisadiyyat.az bu barədə bankın maliyyə hesabatına istinadən xəbər verir.

Hesabata əsasən, ötən ilin sonuna Bankda fiziki şəxslərin depozitlərinin həcmi 171,6 milyon manat təşkil edib. Bu isə əvvəlki rüblə müqayisədə 0,6% və ya 1,1 milyon manat azdır. 2023-cü ilin III rübündə əhalinin bankdakı əmanətlərinin həcmi 172,67 milyon manata bərabər olub.

Şirkətlərin “Ziraat Bank Azərbaycan”dan geri çəkdiyi əmanətlərin həcmi isə daha böyükdür. Belə ki, bankda hüquqi şəxslərin depozitləri 3 ayda 24,8% və ya 79 milyon manat azalaraq 239,7 milyon manata enib. 2023-cü ilin III rübündə bu rəqəm 318,7 milyon manat təşkil edib.

Xatırladaq ki, “Ziraat Bank Azərbaycan” 2014-cü ildə yaradılıb, onun nizamnamə kapitalı 65,5 milyon manatdır. Bankın səhmlərinin 99,98%-i “Ziraat Bank”a (Türkiyə), 0,01% - “Ziraat Texnoloji Şirkəti”nə, 0,01%-i isə Ziraat Yatırım Menkul Değerler Şirkətinə (Türkiyə) məxsusdur.

Bu il qızılın unsiyasının qiyməti 2 500 dollara çatacağı gözlənilib.
Bu barədə Amerikanın qlobal maliyyə institutu “JP Morgan” məlumat yayıb.
"JPMorgan Chase & Co."-nun Qlobal Əmtəə Tədqiqatının rəhbəri Nataşa Kanevanın sözlərinə görə, qızılın qiyməti bu il bir unsiya üçün 2 500 dollara çatmaq potensialına malikdir:
"Biz gözləyirik ki, qızılın qiyməti 2 500 dollara çata bilər. Çünki bazar həddən artıq həyəcanlanmağa meyillidir".
Xatırladaq ki, qızılın qiyməti ötən həftə 2 203 dollara olmaqla tarixdə ən yüksək səviyyəsini görüb. Bakı vaxtı ilə saat 09:25-də qızılın unsiyası 2 170 dollardan ticarət olunub.
"Cebhe.info"-nun məlumatına görə, artıq Azərbaycanda da qızıl satışı ilə məşğul olan mağazalarda qiymətlərdə artım müşahidə olunur. Demək olar ki, hər həftə 1 (583 əyar), 1.50 (750 əyar), 2 (900 əyar) manat civarında artım görülür.
Məlumata görə, mayda qızılın qiymətdə 40 faiz artımın olacağı bildirilir. Artıq satıcıların bir çoxu köhnə qiymətə aldıqları qızılı vitrindən yığışdırıb. Köhnə qiymətlərlə alınan qızılın satışı nadir qızıl satışı ilə məşğul olan mağazalarda görülür. Səbəb isə may ayındakı 40 faizlik artım zamanı satış etmək istəmələridir.
Əslində Amerikanın qlobal maliyyə institutu “JP Morgan”ın verdiyi proqnoz özünü doğruldur. Bu proqnoz dünyada qızılın qiymətinin artmasına hesablanıb.

Hökumət hər şeyi, absurda, bir növ “sürrealizmə” çevirir – indi də qərar veriblər ki, İqtisadiyyat Nazirliyi yanında Dövlət Vergi Xidməti orqanlarının vəzifəli şəxslərinin mükafatlandırılması məqsədi ilə aylıq vəzifə maaşlarının 3 misli qədər əlavə vəsait ödəniləcək.
Yəni, hər dəfə maaşdan əlavə 3 maaş mükafat ödəmək istəyirlər. Dövlət Vergi Xidmətində 2,7 mindən çox vəzifəli şəxs fəaliyyət göstərir, bu yeni qərarla, əvvəllər verilən “paketi”, “konverti” rəsmiləşdirmək istəyirlər.
Mən məmurlara yüksək maaş verilməsinin əlehinə deyilən, amma hər dəfə mükafat yazmaqdansa, birdəfəlik maaşlarını artırın - olsun-bitsin. Amma etmirlər, edə bilmirlər, o zaman sual yaranacaq ki, digər Xidmətlərdə çalışanların maaşı nədən azdır, kimsə (biri elə mən) çıxıb deyəcək ki, necə ola bilər müəllimin maaşı ilə Vergi məmurunun maaşı arasında 8-9 dəfə fərq var?!
Belə “sürreal” qərarla həm rəsmi olaraq maaşları artırmırlar, həm də “konverti” rəsmi olaraq mükafat adı ilə verirlər. Düşünürlər ki, belə olanda nə şiş yanacaq, nə kabab – amma anlamırlar ki, manqal yanır e, manqal...
Natig Jafarli
TEREF

“Mərkəzi Bankın bu gün təşkil etdiyi hərracda 79,4 milyon dollarlıq sifariş qeydə alınıb. Bütövükdə, mart ayının geridə qalan günlərində hərraclarda 227.4 milyon dollar satılıb. Bu ilin ilk 2 ayı, xüsusən də fevral ilə müqayisədə mart ayında dollar tələbinin stabilləşməsi müşahidə olunur”.

AzFakt.com xəbər verir ki, bunu iqtisadçı, deputat Vüqar Bayramov bildirib. İqtisadçı hesab edir ki, bu, Mərkəzi Banka valyuta bazarına intervensiya və növbəti mərhələdə sterilizasiya üçün yeni imkanlar yaradır.

Onun sözlərinə görə, bununla yanaşı, mart ayında qeyri-iş günlərininvə eləcə də xarici səfərlərin sayının çoxluğunu nəzərə alsaq, Mərkəzi Bankın kommunikasiya alətindən mütəmadi istifadə etməsi vacibdir.

Növbəti aylarda manatın məzənnəsinə gəldikdə V.Bayramov deyir ki, Mərkəzi Bankın 2024-cü il üçün pul siyasətinin əsas istiqamətləri barədə Bəyanatında qeyd olunduğu kimi, bu, tədiyyə balansının vəziyyətindən, daha dəqiqi neftin qiymətindən asılı olacaq.

“Bir daha qeyd etmək lazımdır ki, fiskal sektorun valyuta təklifi və tələbi, eləcə də iqtisadi subyektlərin məzənnə gözləntiləri valyuta bazarındakı tarazlığa təsir göstərən əsas amillər kimi qruplaşdırılsa da aydındır ki, bu indikatorlar da birbaşa enerji bazarındakı volatillikdən asılı olacaq”, - o əlavə edib.

Deputat vurğulayıb ki, bu ildə də neft gəlirlərimiz və daha dəqiqi enerji bazarlarındakı tarazlıq manatın məzənnəsinə təsir edən əsas faktor olacaq: “Mərkəzi Bankın məzənnə siyasəti üzrə əməliyyat hədəflərinə nail olmaq üçün valyuta bazarına zəruri hallarda müdaxilə edəcəyini bildirməsi isə ondan xəbər verir ki, enerji bazarında ciddi volatillik baş verəcəyi halda valyuta ehtiyatlarından istifadə edilə bilər. Deməli, 2024-cü ildə də manatın məzənnəsi birbaşa Mərkəzi Bankın mövqeyindən asılı olacaq”.

“Fındığın, qozun, yağın qiyməti artdığı üçün Novruz şirniyyatlarının da qiymətində dəyişiklik hiss olunur”.

Bu sözləri “Xəzər TV”yə açıqlaması zamanı sahibkarlardan biri deyib.

Sahibkarlar ötən illərə nisbətdə bu il qiymətlərinin artmasının səbəbindən danışıb.
“Milli paxlavanın bəzi mağazalarda kiloqramı 30 manata qədər artır, şəkərburalar 1,30 manatdan başlayır”, - deyə sahibkar bildirib.

Daha ətraflı süjetdə:

Qarabağ İqtisadi Rayonunda Bərpa,Tikinti və İdarəetmə Xidməti "Madina Group MM” MMC (VÖEN – 1502073491) ilə satınalma müaviləsi imzalayıb.

Yeniavaz.com xəbər verir ki, müqavilə bir mənbədən satınalma metodu əsasında bağlanıb.

Tender müsabiqəsinin şərtlərinə görə, "Madina Group MM” MMC Bərpa,Tikinti və İdarəetmə Xidmətinin sifarişi əsasında 500 ədəd xüsusi hədiyyəlik taxta qutular hazırlayacaq və qarşılığında 32 min 450 manat alacaq. Bir ədəd hədiyyəlik taxta qutunun hazırlanmasına 64 manat 90 qəpik ayrılacaq.

Məlumat üçün bildirəik ki, tenderin qalibi olan "Madina Group MM” MMC 25 may 2012-ci il tarixində dövlət qeydiyyatına alınıb. Nizamnamə kapitalı 10 min 10 manat olan MMC-nin hüquqi ünvanı Binəqədi rayonu, M.Rəsulzadə ŞTQ, Biləcəri Şossesi, ev 8D-də yerləşir. Şirkətin qanuni təmsilçisi Mürşüdov Asəf Rüstəm oğludur.

Qeyd edək ki, bu müqavilə üzrə satınalma proseduru dövlət satınalmalarının vahid internet portalında keçirilməyib. "Dövlət satınalmaları haqqında” Qanunun 15.1 maddəsində göstərilir ki, məxfi məlumatlar istisana olmaqla bütün dövlət satınalmaları yalnız portal vasitəsilə həyata keçirilir. Qanunun tələblərindən də göründüyü kimi hədiyyəlik taxta qutular məxfi məlumat hesab oluna bilməz. Bu səbəbdən də, Qarabağ İqtisadi Rayonunda Bərpa,Tikinti və İdarəetmə Xidmətinin tender müsabiqəsini bu şəkildə keçirməsi başa düşülən deyil.

Üstəlik müqavilənin hansı səbəbdən bir mənbədən satınalma metodu ilə imzalandığı da aydın deyil. Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur:

– Satınalma predmeti yalnız hər hansı konkret təchizatçıda olduqda;
– Satınalma predmetinin əvəzedicisi və alternativi olmadıqda;
– Satınalma predmetinə təcili tələbat yarandıqda;
– Təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə;

– Satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.