SSRİ-dəki həmkarları ona “cənab marşal” deyə müraciət ediblər. Əslində o, ordu generalı rütbəsini daşıyıb. Bu cür müraciətin səbəbi isə amerikalı hərbi və ictimai xadimin soyadı ilə bağlı olub – Corc Ketlett Marşall…

ABŞ-ın hərb və siyasət tarixində Corc Marşallın özünəməxsus yeri var. O, bu tarixə adını dünyanın ən qarışıq, ictimai-siyasi mühitin mürəkkəb olduğu bir dövrdə həkk edib.

Marşall 1880-cı ildə Pensilvaniya ştatında anadan olub. Virciniyada hərbi institutda ali təhsil alıb. İnstitutu bitirdikdən sonra piyada qoşunlarında xidmətə başlayıb, I dünya müharibəsində içtirakç edib.
1938-ci ilə qədər ayrı-ayrı hərbi strukturlara orta və yüksək vəzifələr tutan Marşall həmin il ABŞ silahlı qüvvələrinin baş qərargahında hərbi planlaşdırma şöbəsinə təyinat alıb. Məhz həmin ərəfədə Marşall Amerikanın ən tanınımış hərbi xadimlərindən biri sayılan, Franklin Ruzveltlə yaxınlığı ilə fərqlənən ordu generalı Duqlas Makarturun böyük etimadını qazanıb. Elə bu etimadın nəticəsində də II dünya müharibəsi başlananda Marşall ABŞ ordusunun qərargah rəisi vəzifəsinə təyin olunub, eyni zamanda Ruzveltin strategiya və taktika məsələləri üzrə müşaviri vəzifəsini daşıyıb. 1944-cü ildə Ruzvelt ona ordu generalı rütbəsini şəxsən təqdim edib.


Marşall Ruzvelti bütün görüş və səfərlərdə müşayiət edib, o cümlədən Stalin və Çörçillə görüşlərində də.

Müharibə illərində ən tanınmış hərbi simalardan biri sayılan Marşallın fəaliyyəti dünya ictimaiyəti tərəfindən maraqla izlənilib. O, 1943-cü ildə “Time” jurnalı tərəfindən “ilin adamı” elan edilib. Marşall 1947-ci ildə bu titula ikinci dəfə sahib olub.

II dünya müharibəsi sona çatdıqdan sonra, 1945-ci ilin noyabr ayında Marşall qərargah rəisi vəzifəsindən istefa verib. Amma o, hərb işindən birdəfəlik ayrılmayıb.


Marşall 1945-1947-ci illərdə ABŞ prezidentinin Çində rəsmi nümayəndəsi vəzifəsində işləyib.
1947-1949-cu illərdə Marşal ABŞ-ın dövlət katibi vəzifəsini tutub. Bu vəzifədə olarkən o, kommunizm ideyalarının yayılmasına və təbliğatına qarşı ciddi mübarizə aparıb.

Marşall siyasi fəaliyyətində daha çox “Marşall planı” ilə yadda qalıb. Bu planın həyata keçirilməsi 3 avqust 1948-ci ildə başlanıb. “Marşall palnı”na əsasən müharibədən sonrakı Avropaya ABŞ tərəfindən yardım edilməsi nəzərdə tutulub. Plana əsasən bir neçə istiqamət üzrə həyata keçirilib. Birincisi, müharibə nəticəsində dağılmış tikililərin bərpası, ikinci istiqamət Avropada əhalinin maddi-sosial vəziyyətini yaxşılaşdırmaq, ücüncü, ticarət əlaqələrini genişləndirmək və bu sahədəki əngəllikləri aradan qaldırmaq, daha bir istiqamət isə sənaye və bütövlükdə istehsalat müəssisələrini yeniləmək və s. olub.


ABŞ “Marşall planı”nın həyata keçirilməsinə 13 milyard dollar sərf edib. Amma sözsüz ki, Amerika hökuməti bu vəsaiti Avropaya heç də sırf yardım məqsədi ilə xərcləməyib. “Marşall planı”nın görünməyən tərəfində müharibədən sonrakı dövrdə Amerikanın Avropaya nəzarəti gücləndirmək məqsədi dayanıb. İkinci görünməyən tərəf isə Avropada sosialist düşərgəsinin genişlənməsinin, güclənməsinin qarşısını almaq olub.

ABŞ prezidenti Trumen zaman-zaman Marşallın fəaliyyətini yüksək qiymətləndirsə də, prezidentlə dövlət katibi arasında bəzi məqamlarda fikir ayrılığı da yaranıb.

Trumen prezident kimi öz siyasətində İsraili dəstəklədiyi halda Marşall buna sərt etirazını bildirib. Marşall neftlə varlı olan ərəb ölkələri ilə əlaqələrin daha sıx qurulmasının tərəfdarı olub. Nəhayət, ABŞ İsraili rəsmi şəkildə dövlət kimi tanıyanda və diplomatik əlaqələri rəsmiləşdirəndə Marşall buna etiraz əlaməti olaraq dövlət katibi vəzifəsindən istefa verib.


1949-1950-ci illərdə Marşall Amerika Qırmızı Xaç cəmiyyyətinə rəhbərlik edib.

1950-ci ildə Koreya müharibəsi dövründə Marşall ABŞ-ın müdafiə naziri vəzifəsinə təyinat alıb. Ancaq o, bu vəzifədə cəmi bir il xidmət edib. 1951-ci ildə o, səhhəti ilə əlaqədar nazir vəzifəsindən istefa verib.
1951-ci ildə hərbi və siyasi fəaliyyətdən uzaqlaşan Marşall Virciniyadakı evində yaşayıb, şəxsi həyətində bağbanlıq və tərəvəz yetişdirməklə məşğul olub. Ordu generalı arabir kütləvi informasiya vasitələrinin nümayəndələri ilə görüşməyə, onlara müsahibə verməyə də razılıq verib.

1953-cü ildə Marşall ABŞ nümayəndə heyətinin rəhbəri kimi Böyük britaniyada II Yelizavetanın tacqoyma mərasimində iştirak edib. Elə həmin il Marşall Nobel Sülh Mükafatının laureatı adını da qazanıb.

Corc Marşall 1959-cu ildə, 78 yaşında Vaşinqtonda vəfat edib. O, Vaşinqton ətrafında yerləşən, prezidentlərin, ali rütbəli hərbçilərin, astronavtların və yüksəkçinlilərin dəfn olunduğu Arlinqton milli qəbirstanlığında dəfn edilib.

İlham Cəmiloğlu

Oktyabrın 14-dən Azərbaycan jurnalistlərinin reyestrində qeydiyyat başlayıb. Medianın İnkişafı Agentliyinin (MEDİA) media reyestri xidmətinin rəhbəri Cahangir Həsənli mətbuata bildirib ki, qeydiyyat reyestr.media.gov.az portalında ASAN Login vasitəsilə onlayn həyata keçirilir.

“Media reyestri KİV sahəsində qayda-qanun yaratmaq üçün lazımdır. Bizim verdiyimiz sənəddə onun sahibinin jurnalist peşəsi göstərilmir, sadəcə, onun media- reyestrdə qeydiyyatdan keçdiyi təsdiqlənir”, – Həsənli izah edib.

MEDİA kommunikasiya şöbəsinin direktoru Səidə Şəfiyevanın sözlərinə görə, reyestrdə qeydiyyatdan keçməyən jurnalistlər əvvəlki qaydada işləyə və istənilən dövlət qurumuna sorğu göndərərək cavab ala biləcəklər.

“Reyestr onları heç bir şeydə məhdudlaşdırmır, sadəcə, məlumat bazasıdır”, – Şəfiyeva deyib.

Qeydiyyat oktyabrın 1-dən başlayaraq altı ay ərzində aparılacaq.

Mətbuatda jurnalistlərin reyestrdə qeydiyyata alınmasının cəlbediciliyilə bağlı Həsənlinin sözləri yayılıb: “Qeydiyyatdan keçən KİV işçiləri güzəştli ipoteka kreditləri və digər üstünlüklərdən yararlana biləcəklər. Gələcəkdə media subyektlərində dövlət sosial reklamının yerləşdirilməsi, sosial müdafiənin gücləndirilməsi, həmin KİV-lərin maddi təminatının yaxşılaşdırılması və digər güzəştlər nəzərdə tutulur”.

Səidə Şəfiyeva Turan ilə söhbətində deyib ki, söhbət mənzil almaq üçün 4 faiz güzəştli ipotekadan gedir. Reyestrdə qeydiyyatdan keçməyənlərin belə imkanı olmayacaq.

Həsənli bu peşədə fəaliyyətini davam etdirən və reyestrdə qeydiyyatı olmayan jurnalistlər üçün güzəştlərdən danışmayıb, eyni zamanda deyib ki, reyestrdə qeydiyyatın olmaması belə jurnalistləri heç bir şeydə məhdudlaşdırmır.

Lakin KİV-ə qarşı qarşı tələblər sərtdir. Həsənli media haqqında qanunun 62.2 və 62.3-cü bəndlərini xatırladıb ki, bu maddələrə görə, çap və onlayn media “qanunvericiliyə əsasən müvafiq cavabı” almaq üçün işə başlamadan 7 gün öncə Media Agentliyinə müraciət etməlidir.Bu qanun qüvvəyə minənədək fəaliyyət göstərən KİV-lər isə 78.3-cü bəndə əsasən reyestr işə başladığı gündən altı ay ərzində Agentliyə müraciət etməlidirlər. “Beləliklə, fəaliyyət göstərən KİV-lərin altı ay vaxtı var”, – Həsənli qeyd edib.

Əgər MEDİA-da qeydiyyatı olmayan jurnalistlər aşağı faizli ipoteka və digər güzəştlərə ümidlərini itirməklə “heç nə olmamış kimi” işlərini davam etdirə bilirsə, ancaq KİV-in iş şəraiti sərtləşib: redaksiyalar mütləq qeydiyyatdan keçməlidirlər.

Media məsələləri üzrə ekspert, hüquqşünas Ələsgər Məmmədli reyestrdə qeydiyyatdan keçməyən KİV-də çalışan jurnalistlərə qoyulan məhdudiyyətləri göstərir. Belə jurnalistlər reyestrdə qeydiyyata alınmayacaqlar.

Bəs KİV qeydiyyatdan keçmirsə (çatdırmır, ideoloji mülahizələrə görə qeydiyyatdan imtina edir) və ya MEDİA-dan imtina alırsa, o zaman necə olacaq? Şəfiyeva Turan-ın bu sualına cavabında bildirib ki, media haqqında qanuna əsasən, 6 ay ərzində reyestrdə qeydiyyatdan keçmək üçün müraciət etməyən media subyektlərinin işinin qanuniliyinə məhkəmədə baxılacaq.

Hüquqşünas Məmmədlinin fikrincə, bunlar kifayət qədər sərt tələblərdir və jurnalistlərin həyatını xeyli çətinləşdirəcək.

Medianın İnkişafı Agentliyi Azərbaycan prezidentinin 12 yanvar tarixli fərmanı ilə KİV-in inkişafı sahəsində siyasəti həyata keçirmək məqsədilə yaradılıb. “Media haqqında” qanun 2021-ci il dekabrın 30-da parlamentdə qəbul edilib və prezidentin 8 fevral 2022-ci il tarixli fərmanı ilə təsdiq edilib.

2007-ci ildən Ukraynada “İnformasiya fəaliyyətinin subyektləri kimi çap kütləvi informasiya vasitələrinin və xəbər agentliklərinin dövlət reyestri haqqında” əsasnamə mövcuddur.

2021-ci ilin avqustunda Rusiyada yaradılan KİV-in dövlət reyestrində 152 minə yaxın KİV qeydiyyatdan keçib. Ötən ildən Rusiya KİV-nin bir hissəsi “xarici agent” damğası alıb və bundan irəli gələrək repressiv sanksiyalara məruz qalıb.

Latviyada kütləvi informasiya vasitələri Latviya Respublikası Müəssisələrinin Reyestrində qeydiyyata alınır.

Qırğızıstanda kütləvi informasiya vasitələrinin dövlət qeydiyyatı Qırğızıstan Ədliyyə Nazirliyində aparılır.

KİV-in dövlət qeydiyyatı Özbəkistanda da mövcuddur, 2020-ci ildə bu prosedur bildiriş elektron formatına keçib. (Turan)

Rusiyanın Krasnodar vilayətinin Yoysk şəhərində hərbi təyyarə yaşayış binasına çırpılıb.

“Qafqazinfo” xəbər verir ki, “Su-34” təyyarəsi Yoysk şəhərinin Kommunist küçəsində yaşayış binasına dəydikdən sonra yanğın baş verib. Yanğın 9 mərtəbəli binaya keçib. İlkin məlumata görə, yanğın binanın 15 mənzilini bürüyüb. Pilotun katapult edərək xilas olduğu bildirilir.

Həlak olan və yaralananlar barədə hələlik məlumat yoxdur.

Bakıda terror cəhdi, azərbaycanlı ekstrasensin inanılmaz xilas əməliyyatı-Moskvadan gələn xüsusi təyinatlı qrup bakılı ekstrasensin köməyinə niyə möhtac qalmışdı?

1980-ci illərin ortalarından SSRİ-də yenidənqurma və aşkarlıq siyasəti yürüdüldü. Əvvəllər qadağan olunan bir çox şeylərə indi icazə verilirdi. Hələ qüvvədə olan bəzi qadağalar və məhdudiyyətlərdən biri də xarici səfərlərə qoyulan məhdudiyyət idi.

SSRİ-də sovet hökumətinin ilk illərindən “çıxış vizası” tətbiq olunurdu – ölkədən çıxmaq üçün icazə almaq lazım idi. Buna nail olmaq isə asan məsələ deyildi. Müxtəlif orqanlar razılıq verməli idilər, onlar da verdikləri razılığa görə məsuliyyət daşıyırdılar. Əgər xaricə getməsinə razılıq verdikləri adam “lənətə gəlmiş kapitalizmdə” qalardısa, bunun cəzası ağır ola bilərdi. Aydındır ki, kimsə risk edib başını ağrıtmaq istəmirdi, ən etibarlısı razılıq verməmək idi.

1967-ci ildə Stalinin qızı Svetlana Alliluyeva vətəndaş nikahında yaşadığı Braceş Sinqhi dəfn etmək üçün Hindistana getdi və buradakı ABŞ səfirliyindən sığınacaq istədi. Hadisə SSRİ üçün böyük qalmaqal idi. 30 il ölkəyə rəhbərlik etmiş adamın qızı burada yaşamaq istəmirdi, üstəlik də hər hansı başqa ölkəyə deyil, əsas düşmənə sığınmışdı. Sovet rəhbəri Leonid Brejnev KQB sədri Vladimir Semiçastnını vəzifədən azad edib, yerinə daha çox etibar etdiyi Yuri Andropovu təyin etmək üçün bu hadisədən yararlandı.

Yenidənqurma illərində xaricə çıxış azadlığı başqa azadlıqlarla müqayisədə daha ləng inkişaf edirdi. Amma burada da müəyyən irəliləyişlər vardı. Məsələn, 1988-ci ildən etibarən idmançılara xarici klublarda oynamaq hüququ verildi. Sənət adamlarının, bəzi başqa ixtisas sahiblərinin xaricdə işləməsi halları artdı. SSRİ dağılmasaydı belə, bir gün çıxış vizası məhdudiyyətinin tam aradan qalxacağını anlamaq çətin deyildi (1991-ci ilin mayında ləğv olundu).

Buna baxmayaraq, SSRİ-nin son illərində təyyarə qaçırmaq cəhdləri yenə də davam edir. Məsələn, 1988-ci ildə Oveçkinlər ailəsinin üzvlərindən ibarət “Yeddi Simeon” caz qrupu təyyarəyə odlu silahlar keçirərək, qaçırmağa cəhd göstərdilər. Cəhd ailənin 11 üzvündən beşinin (və başqa 4 nəfərin) həlak olması ilə nəticələndi. Halbuki bir neçə ildən sonra onlar tamamilə sərbəst şəkildə ölkəni tərk edə bilərdilər.

Bu məqaləmizin mövzusu isə 1989-cu ildə Bakı hava limanında baş verən, amma xoşbəxtlikdən ölümsüz, qansız yekunlaşan cəhd haqqındadır. Müəyyən cəhətlərinə görə bu hadisənin bənzəri yoxdur.

***

1989-cu il martın 30-da axşam saatlarında Binə hava limanına Voronej-Həştərxan-Bakı reysi ilə uçan Tu-134 təyyarəsi eniş etdi. Bu zaman sərnişinlərdən biri (sonralar onun Stanislav Skok adlı birisi olduğu müəyyən edildi. Skok işlədiyi idarənin vəsaitini mənimsəməkdə şübhəli bilinirdi) təyyarəni ələ keçirməyə cəhd etdi.

O bildirirdi ki, təyyarənin baqaj hissəsində olan çantasında partlayıcı maddə var və əgər o, saatına yerləşdirilmiş düymədən əlini 5-6 saniyə çəkərsə, partlayış baş verəcək. Bundan əlavə, sərnişinlər arasında iki yoldaşının olduğunu deyirdi. O, səhər saat 8-ə qədər 500 min dollar, 500 min alman markası və Pakistana uçuş tələb edirdi.

Hadisə barədə Azərbaycan KQB-nin sədri İvan Qorelovskiyə məlumat verildi. Bir neçə saatdan sonra Moskvadan ittifaq KQB-nin nəzdindəki xüsusi təyinatlı “Alfa” qrupu gəldi. Qrupa Sovet İttifaqı Qəhrəmanı Viktor Karpuxin rəhbərlik edirdi.

SSRİ-nin son illərində terror hadisələrini əvvəllər olduğu kimi gizlətmək mümkün deyildi. Müəyyən həddə aşkarlıq və mətbuat azadlığı vardı. Buna görə də əməliyyatın qüsursuz keçməsinə böyük önəm verilirdi. Bir il öncə Oveçkin ailəsi ilə bağlı hadisə zamanı məhz fərasətsiz antiterror əməliyyatı üzündən 9 nəfər həlak olmuş, təyyarə isə tamamilə yanmışdı (əməliyyatı “Alfa” deyil, adi milis qüvvələri həyata keçirmişdi).

Uğurlu antiterror əməliyyatının əsas şərtlərindən biri üzləşdiyin problem haqqında maksimum informasiyaya malik olmaqdır, xüsusən də terrorçuların sayı, malik olduqları silah barədə. İndi Binə hava limanına yığışan qüvvələr təyyarədə Skokun həqiqətən bombasının və ortaqlarının olub-olmamasını müəyyənləşdirmək istəyirdilər.

Terrorçunun xəbəri olmadan təyyarənin bütün baqajı boşaldıldı və minaaxtaranlar tərəfindən yoxlanıldı. Heç bir çantada partlayıcı tapılmadı. Təyyarənin salonuna xüsusi dinləmə qurğuları da yerləşdirildi. Əldə olunan məlumata görə, terrorçu tez-tez ağzını pencəyinə tərəf tutur, ratsiya ilə danışırmış kimi sözlər deyir, kiməsə göstərişlər verirdi. Amma həmin iki nəfəri müəyyənləşdirmək cəhdləri fayda vermədi.

Baqajda bombanın tapılmaması yaxşı xəbər olsa da, onun başqa yerdə, eləcə də, Skokun çiynindən asılan çantada olmasını istisna etmirdi. Terrorçu özü isə saatındakı düymə barədə dediyini təsdiq edirmiş kimi əlini saatından çəkmirdi. Hər hansı xoşagəlməz təsadüfi istisna etmək lazım idi.

Bu zaman kiminsə ağlına Bakıda yaşayan məşhur ekstrasens Tofiq Dadaşovu əməliyyata cəlb etmək gəldi. Bu zaman onun qarşısına iki məqsəd qoyuldu: belə vəziyyətlərdə ənənəvi taktika olan vaxtı uzatmaq və terrorçunun bombasının, həm də cinayət ortaqlarının olub-olmamasını müəyyənləşdirmək.

Təxminən 07:30-da hava limanına gətirilən Dadaşova müəyyən təlimatlar verildi. O, terrorçuya bildirməli idi ki, Azərbaycanda bu qədər xarici valyuta yoxdur, Moskvadan gətirirlər. Bunun üçün isə saat 11-ə kimi gözləmək lazımdır. Söhbət zamanı ekstrasens həm də özünün xüsusi bacarıqlarından istifadə edərək, bomba və ortaq məsələsini aydınlaşdırmalı idi.

Ələ keçirilən Tu-134 təhlükəsizlik məqsədilə hava limanının uzaq küncündə saxlanılırdı. Tofiq Dadaşovu təyyarənin yanın KQB podpolkovniki Aleksandr Kuryanov xidməti maşınında apardı. Trapa yaxınlaşan Dadaşov elə aşağıdan Skokla danışmağa başlayır (terrorçu onun yuxarı qalxmasının əleyhinə idi).

Özünü Azərbaycan XİN əməkdaşı kimi qələmə verən ekstrasens pullarla bağlı ona deyilən sözləri təkrar edir. Terrorçu gözləməyə razılıq verir. Təxminən iki dəqiqə çəkən ünsiyyətdən sonra Dadaşov Kuryanovun yanına qayıdır və deyir: “Onun nə bombası var, nə də yoldaşı. Get, həbs elə. Buna görə orden alarsan”. Təklif cəlbedici olsa da, antiterror əməliyyatı zamanı belə özfəaliyyət yolverilməzdir. Kuryanov Dadaşovla birlikdə əməliyyata rəhbərlik edən qərargaha qayıdırlar.

Burada ekstrasens gəldiyi nəticəni bölüşür. Alfa komandiri Karpuxin yenə də partlayış ehtimalını minimallaşdırmaq istəyir. Bu zaman Dadaşov təklif edir ki, təyyarədə adi sərnişin kimi oturan iki KQB əməkdaşı Skokla söhbətə başlasınlar və Ermənistanda baş verən zəlzələ üzündən SSRİ-nin maliyyəyə ehtiyacı olduğunu desinlər. Onun fikrincə, bu sözlər terrorçunu xəcalət çəkməyə sövq edəcək və o, siqaret yandıracaq. Bu zaman qollarından tutaraq təyyarədən çölə itələmək lazımdır. Əgər bomba çiynindəki çantadadırsa, partlayış çöldə baş verəcək.

Təklif qəbul olunur və radioəlaqə vasitəsilə heyətə ötürülür, heyət üzvləri də KQB əməkdaşlarına çatdırırlar. Hər şey Tofiq Dadaşovun dediyi kimi olur. SSRİ-də çox az adamda alışqan vardı, əksəriyyət kibritdən istifadə edirdi. Onu yandırmaq üçün isə hər iki əldən istifadə etmək lazım gəlirdi. Skok da siqaretini yandırmaq istəyəndə KQB əməkdaşları tərəfində qolları burulur və təyyarədən çölə itələnir. Heç bir partlayış baş vermir.

Hazır vəziyyətdə duran Alfa döyüşçüləri isə terrorçunun mümkün yoldaşlarını zərərsizləşdirmək üçün arxadan salona daxil olurlar. Amma məlum olur ki, heç bir yoldaş yoxdur və kimsə qanuna zidd əməl törətməyə hazırlaşmır. Bununla da əməliyyat bir güllə belə atılmadan başa çatır.

Terrorçunu zərərsizləşdirən KQB əməkdaşları “Qırmızı Ulduz” ordeni ilə, Tofiq Dadaşov da daxil olmaqla digərləri Fəxri fərmanla mükafatlandırılırlar. Stanislav Skok 8 il müddətinə azadlıqdan məhrum edilir. Amma cəmi bir il sonra həbs düşərgəsinin içində metal tullantıları yüklənmiş qatara minərək qaça bilir. Beş il saxta sənədlərlə yaşayır, 1994-cü ildə isə yenidən tutularaq, 9 il həbs cəzası alır.
Yadigar Sadıqlı

“Qarabağ”ın UEFA Avropa Liqasının qrup mərhələsindəki rəqiblərindən olan “Frayburq” Almaniya Bundesliqasında növbəti oyununu keçirib.

“Report”un məlumatına görə, Kristian Ştrayxın baş məşqçi olduğu komanda X turda səfərdə “Bavariya” ilə qarşılaşıb.

Görüş münhenlilərin darmadağını ilə yekunlaşıb – 5:0.

Bu oyundan sonra 18 xalda qalan “Frayburq” turnir cədvəlinin 3-cü pilləsində qərarlaşıb.

Qeyd edək ki, “Qarabağ” G qrupundakı ilk oyununu Almaniyada “Frayburq”a qarşı keçirib. Görüş rəqibin 2:1 hesablı qələbəsi ilə başa çatıb. Tərəflər arasında VI tur matçı noyabrın 3-də Bakıda olacaq.

Xaricdə yaşayan iranlılar molla rejiminə qarşı aksiya keçirib. Bu barədə “Azad İran” “Telegram” kanalında məlumat verilib.

Tehranın Evin zindanında yanğın baş verməsinə görə Almaniya, İsveç, Belçika və Kanadada yaşayan iranlılar həmin ölkələrin Xarici İşlər Nazirlikləri və İran səfirlikləri qarşısında etiraz mitinqi təşkil edərək İslam Respublikası əleyhinə şüarlar səsləndiriblər.

Bakı Şəhər İcra Hakimiyyəti və “Regional İnkişaf” İctimai Birliyi (RİİB) arasında imzalanan əməkdaşlıq memorandumuna əsasən Xəzər rayonu ərazisində - əsas magistral yolun kənarında ağacəkmə aksiyası keçirilib.
Ölkə başçısı cənab İlham Əliyevin tapşırıq və tövsiyələrinə uyğun olaraq Bakı şəhəri və Abşeron yarımadasında yaşıllıq zolaqlarının salınması, ekoloji tarazlığın bərpası və ətraf mühitin mühafizəsi istiqamətində görülən tədbirlər çərçivəsində həyata keçirilən aksiyada icra qurumlarının əməkdaşları və İctimai Birliyin könüllüləri iştirak edib.
İlk növbədə ağacların əkilməsi üçün nəzərdə tutulan ərazi daş və digər tullantılardan təmizlənərək əkin üçün hazır vəziyyətə gətirilib. Həmin əraziyə aksiya iştirakçıları tərəfindən paytaxtın iqlim şəraitinə uyğun olaraq seçilmiş 600 ədəd sərv ağacı əkilib.
Ağacların suvarılması və onlara qulluq göstərilməsi məsələləri nəzarətə götürülüb vəbunun üçün cavabdeh şəxslərtəyin edilib.
Paytaxtın yaşıllaşdırılması və daha da gözəlləşməsinə töhfə olan bu cür aksiyaların payız mövsümü ərzində Bakı şəhərinin digər ərazilərində də keçirilməsi nəzərdə tutulur.

Türkiyənin Bartin vilayətinin Amasra rayonunda daş kömür mədənindəki partlayışın dağıntıları altından 11 nəfər xilas edilib.

Teref.az "Habertürk"ə istinadən xəbər verir ki, bu barədə Amasra rayonunun Bələdiyyə başçısı Recai Çakır jurnalistlərə açıqlamasında bildirib.

Onun sözlərinə görə, dağıntılar altında ümumilikdə 87 nəfər olub, onlardan 2-i yaralı halda çıxarılıb.