NATO müttəfiqləri Rusiyanın Ukraynaya qarşı müharibəsinin nəticələrini, həmçinin müttəfiqlərin imkanları və silah-sursat ehtiyatlarını müzakirə edib.
APA xəbər verir ki, bu barədə Alyansın baş katibi Yens Stoltenberq NATO-nun mənzil-qərargahında Milli Silahlanma üzrə Direktorların Konfransının (CNAD) növbədənkənar iclasında bildirib.

Baş katib müttəfiqləri hərbi ehtiyatları mümkün qədər sürətlə artırmağa davam etməyə çağırıb.

“NATO hərbi ehtiyatlarının artırılması Ukraynaya dəstəyini davam etdirməyi təmin edəcək. Biz NATO müttəfiqləri kimi döyüş sursatı ehtiyatlarımızı artırmalı və Ukraynaya ehtiyacı olduğu müddətcə lazım olan dəstəyi təmin etmək üçün birgə işləməyə davam etməliyik”, - deyə Stoltenberq vurğulayıb.

Görüşdə müttəfiqlərin hərbi ehtiyatlarındakı hər hansı boşluqları daha yaxşı öyrənmək və bu cür halları birlikdə aradan qaldırmaq yolları müzakirə olunub.

İranın Ərdəbil şəhərində hiddətlənmiş əhali hökumət qüvvələrini daş-kəsəklə qovur. Bu barədə “Azad İran” “Telegram” kanalı xəbər yayıb.

Etirazçılar onlara hücum edən xüsusi təyinatlılara “bişərəf” deyə xitab edirlər.

Xatırladaq ki, İranda 22 yaşlı Məhsa Əmininin ölümü ilə başlayan gərginlik hələ də davam etməkdədir. Məhsanın ölümü İran xalqını ayağa qaldırıb. Məhsa Əmini sentyabrın 13-də əxlaq polisi tərəfindən saxlanıldıqdan bir neçə saat sonra komaya düşüb, sentyabrın 16-da isə xəstəxanada ölüb. Şahidlər, ailə və xəstəxana hesabatları gənc qadının təbii səbəblərdən ölümünü inkar edirlər. Bundan sonra ölkə boyu geniş etiraz aksiyaları başlayıb.

Ölkənin bir çox əyalət, rayon və qəsəbələrinə etirazlar davam edir .

“AzPolitika.info” həmin etirazlarla bağlı yayılmış yeni videoları təqdim edir:

Azərbaycan Prezidenti İlham Əliyev Rusiya Prezidenti Vladimir Putinə İjevsk şəhərində məktəbdə baş vermiş atışmada insanların ölümü ilə bağlı başsağlığı verib.

Azərbaycanın dövlət başçısının mətbuat xidməti xəbər verir ki, məktubda deyilir:

Hörmətli Vladimir Vladimiroviç,

İjevsk şəhərində 88 saylı məktəbdə baş verən atışma nəticəsində uşaqların və böyüklərin həlak olması xəbəri məni çox sarsıtdı.

Sizə, həlak olanların ailələrinə və yaxınlarına Azərbaycan xalqı adından və şəxsən öz adımdan dərin hüznlə başsağlığı verir, bütün yaralananların tezliklə sağalmasını arzulayıram.

Rusiyanın tərkibinə daxil olan Buryatiya Respublikasının rəhbəri mağazalarda qiymətləri qaldıran satıcıları səfərbərliklə hədələyib.

Demokrat.az xəbər verir ki, bu barədə rəhbər Aleksey Tsydenov Telegram kanalında yazıb.

Onun sözlərinə görə, səfərbərlik başlayandan sonra mağazalarda kombinezon, uniforma və digər avadanlıqların qiymətləri kəskin artıb.

"Ona görə də belə bir zamanda pul qazanmağa və super qazanc əldə etməyə qərar verən hər kəs Buryatiya rəhbəri tərəfindən cəzalandırılacaq", - deyə o qeyd edib.

Yunanıstan siyasətçilərini təxribata həvəsləndirənlərin əsl niyyəti böyük və qüdrətli Türkiyə qurmaq layihəmizə mane olmaqdır.

Bu barədə Türkiyə Prezidenti Rəcəb Tayyib Ərdoğan deyib.

O əlavə olaraq deyib ki, (ABŞ tərəfindən - red.) Yunanıstanı Türkiyənin səviyyəsinə yüksəltmək üçün nə hərbi baxımından gücləndirməsi, nə də siyasi və iqtisadi dəstək verməsi kifayət deyil, amma Yunanıstanı bataqlığa sürükləmək üçün kifayətdir:

“Biz əlimizdə olan bütün vasitələrdən istifadə edərək, Yunanıstana qarşı ölkəmizin hüquq və mənafelərini müdafiə etməkdən yan keçməyəcəyik. Türkiyə qonşu Yunanıstanın təxribatçı siyasətini yaxından izləyir”.

Ermənistan və ermənilər həmişə sığındıqları, himayəsində olduqları dövlətlərə dar məqamda xəyanət ediblər.

Ermənistan hakimiyyəti Rusiyanın Ukrayna cəbhəsində ardıcıl uğursuzluğu və ölkədaxili qarşıdurmasında istifadə edərək, qərb dövlətləri ilə təmaslarını yenidən intensivləşdirməyə çalışır. Bunun nəticəsidir ki, ermənilərin həm ölkə daxilində, həm də ölkə xaricində Rusiya əleyhinə etirazları artmağa başlayıb.

Mövzu ilə bağlı Baku TV-yə danışan politoloq Əziz Əlibəyli bildirib ki, Ermənistan hazırda güclü mərkəzlərlə anlaşaraq, Rusiya ilə münasibətlərini başqa məcraya çəkməkdədir.

Daha ətraflı süjetdə:

Türkiyənin Milli Kəşfiyyat İdarəsinin (MİT) sərhəddənkənar əməliyyatı ilə ələ keçirdiyi bildirilən kürd terrorçu Atilla Çiçəyin ailəsi onun üzvü olduğu Xalq Müdafiə Qüvvələrinə (XMQ, PKK-nın hərbi qolu – red.) müraciət edərək övladlarının taleyindən narahat olduqlarını bildiriblər.

Hadisə ilə bağlı təşkilat açıqlama yayıb və Atilla Çiçəyin (kod adı Leheng), eləcə də Hüseyn Yıldırımın (kod adı Alişer) MİT-ə Ermənistanın xüsusi xidmət orqanları tərəfindən verildiyini iddia edib.

Ermənistanın datalex.am məhkəmə-informasiya sistemində dərc olunan məlumata görə, adıçəkilən şəxslər 2021-ci ilin avqustunda Ermənistanla sərhəddə dövlət qüvvələri ilə qarşılaşıb və həbs olunublar. Onlara qarşı Ermənistan sərhədini qanunsuz keçmək və respublikaya qaçaqmalçılıq yolu ilə silah-sursat gətirmək kimi rəsmi ittiham irəli sürülüb.

Sünik vilayətinin birinci instansiya məhkəməsi 2022-ci ilin yanvarında hər ikisini 7 il müddətinə azadlıqdan məhrum edib. Daha sonra Apellyasiya Məhkəməsi onların həbs cəzasını 3 il sınaq müddətli şərti cəza ilə əvəz edib.

XMQ-nin bəyanatına görə, Çiçək və Yıldırım azadlığa buraxılmaq əvəzinə təxminən bir ay əvvəl Ermənistandan Türkiyəyə ekstradisiya edilib.

Təşkilat vurğulayıb ki, bununla Ermənistan beynəlxalq hüquq normalarını və ölkə qanunlarını pozub.

Bəyanatda, Xalq Müdafiə Qüvvələri həmçinin bütün səlahiyyətliləri terrorçuların harada olduqları barədə ailələrinə məlumat verməyə çağırıb.

Türkiyə mətbuatının məlumatına görə, 2012-ci il sentyabrın 25-də terrorçu Hüseyn Yıldırım Tunceli vilayətinin Çiçəkli kəndində “Türk Telekom”a məxsus avtomobili ələ keçirərək içərisinə uzaqdan idarə olunan partlayıcı qurğu yerləşdirib. Daha sonra terrorçu bu avtomobili Atatürk bölgəsində Türkiyə ordusunun hərbi maşınının yanında partladıb. Nəticədə 6 əsgər, eləcə də ətrafdakı bir nəfər həlak olub.

29 avqust 2020-ci il tarixində terrorçu Yıldırım İran ərazisindən Türkiyənin Aqra vilayətinə keçərək Doğubəyazıt bölgəsində təhlükəsizlik qüvvələrinə silahlı basqın həyata keçirib. Nəticədə iki əsgər şəhid olub. Digər terrorçu Atilla Çiçək isə uzun illərdir Türkiyə ilə həmsərhəd Suriya və İranda terror fəaliyyəti ilə məşğul olub.

Qeyd edək ki, Türkiyə ilə Ermənistan bu günə kimi diplomatik əlaqələr qurmayıb, ona görə də iki ölkə arasında terrorçuların və digər cinayətkarların qarşılıqlı ekstradisiyasına dair razılaşma yoxdur. Lakin diplomatik əlaqələrin olmaması Ermənistan və Türkiyə xüsusi xidmət orqanlarının iki PKK terrorçusunun Türkiyəyə təhvili üzrə birgə əməliyyat keçirməsinə mane olmayıb. Ermənistan xüsusi xidmət orqanlarının Türkiyəyə qarşı PKK ilə uzun illər əməkdaşlıq etdiyini, bu terror təşkilatına silah və sursat ötürdüyünü, öz ərazisində, eləcə də işğal olunmuş Azərbaycan ərazilərində PKK üzvləri üçün təlim düşərgəsi yaratdığını nəzərə alsaq, bu, kifayət qədər maraqlı və sensasion faktdır. Həmçinin, terror təşkilatının yüksək rütbəli üzvlərindən biri bəyan edib ki, 2020-ci ilin payızında 44 günlük müharibə zamanı PKK üzvləri ermənilərin tərəfində döyüşə göndərilib.
musavat.com

ABŞ Rusiyaya Ukraynada nüvə silahının tətbiqinin nəticələri barədə xəbərdarlıq edib.

APA-nın xəbərinə görə, ABŞ Prezidentinin Milli təhlükəsizlik üzrə köməkçisi Ceyk Sallivan bunu CBS telekanalına müsahibəsində bildirib.

Ceyk Sallivan deyib ki, ABŞ hakimiyyəti çox yüksək səviyyədə Moskvaya bəyan edib ki, Rusiyanın nüvə silahı tətbiq etməsinin fəlakətli nəticələri olacaq və Vaşinqton buna qətiyyətlə cavab verəcək: “Biz yüksək səviyyədə birbaşa Kremlə bildirmişik ki, bu halda ABŞ və müttəfiqləri qətiyyətlə cavab verəcəklər. Eyni zamanda ABŞ Ukraynanı dəstəkləməyə davam edəcək”.

ABŞ Konqresinin Nümayəndələr Palatasının spikeri Nensi Pelosi Nyu-Yorkda keçirilən Qlobal Vətəndaş Musiqi Festivalında çıxışı zamanı fitə basılıb.

Pelosi iqlim dəyişikliyi və karbon tullantılarının azaldılması ilə bağlı çıxışına başlayanda tamaşaçılar hay-küy salmağa və siyasətçidən nitqi tez bitirərək konsertə başlamağı tələb ediblər.

Pelosi nəvələrinin də tədbirdə olduğunu deyərək çıxışını bitirib və səhnəni tərk edib.

Görüntülər sosial şəbəkələrdə yayılıb.

Azərbaycana qarşı təxribatlar törədən Ermənistan bütövlükdə mövcud olduğu region üçün təhlükə mənbəyi olaraq qalmağa davam edir. Erməni millətçiləri öz məkrli niyyətlərini həyata keçirməkdən ötrü müxtəlif ölkələrdə davamlı olaraq Azərbaycana qarşı təxribat xarakterli aksiyalar həyata keçirirlər. Bu baxımdan Ermənistanın news.am adlı informasiya agentliyinin yayımladığı xəbərə əsasən, 2022-ci ilin sentyabrın 18-də Gürcüstanda yaşayan erməni icmasının Tbilisidə azərbaycanlılara qarşı təxribat xarakterli aksiya keçirmək cəhdini sübut olaraq göstərmək olar. Həmin vaxt gürcü polisləri erməni icmasının Tbilisidəki təxribat xarakterli aksiyasının qarşısını müvəffəqiyyətlə almağa nail olub. Təxribat xarakterli aksiyanı həyata keçirmək üçün erməni icması aksiya yürüyüşünü Avlabar metrosunun yaxınlığından başlayaraq Azərbaycan səfirliyində bitirməyi planlaşdırıblar. “Gürcüstanın erməni icması” adlı qeyri-hökumət təşkilatının rəhbəri Artur Mirzoyan həmin vaxt erməni millətçilərini Gürcüstanın Xarici İşlər Nazirliyinin binasına yönəltməyə çalışıb. A.Mirzoyan belə bir addımına bəraət qazandıraraq guya bu cür “erməni icmasının təxribatının qarşısını almağa çalışdığını” qeyd edib. Lakin A.Mirzoyan özündən uydurduğu yalanla gürcü polislərini aldada bilməyib. A.Mirzoyan və ona dəstək verən digər erməni təxribatçıları gürcü polisləri tərəfindən saxlanılıb [1].
Görünən odur ki, Gürcüstanın erməni icması günü bu gün də Azərbaycana, eləcə də də Gürcüstana qarşı təxribatlar törətməyə davam edirlər. Erməni millətçiləri yaşadıqları hər bir yerin onlara aid olduğunu zənn edirlər. Erməni icmaları müxtəlif ölkələrdə təşkilat şəklində fəaliyyət göstərərək Ermənistanın təcavüzkar siyasətinə xidmət edirlər. Erməni millətçilərinin çətinə düşən zaman özlərini bütün dünyaya “günahsız mələk” kimi, “yeri, mülkü və torpağı zəbt olunmuş məzlum” kimi təqdim etmələrinə baxmayaraq onların necə qəddar, hiyləgər və təcavüzkar olduqları əslində məlum bir məsələdir. Erməni separatçılarının məqsədi yaşadıqları hər qarış torpağı və ətraf əraziləri erməniləşdirməkdir. Erməni millətçiləri həm də onlara aid olmayan milli mədəni sərvətin oğrusudurlar. Erməni millətçilərinin sağlam olmayan düşüncəsinə görə, azərbaycanlıların və gürcülərin milli mədəni sərvəti və hər bir yeniliyi “onlara aiddir”. Qeyd etmək lazımdır ki, erməni millətçiləri Qarabağdakı tarixi alban abidələrinə dair əsassız iddialar irəli sürərək onları mənimsəməyə cəhd ediblər. Həmçinin, Gürcüstanın Samtsxe-Cavaxeti, Acarıstan, Kvemo-Kartli (Borçalı) və s. yerlərində məskunlaşan erməni icması da sözügedən yerlərin tarixi abidələrini öz adlarına çıxarmağa cəhd edib. Lakin erməni vandallarının real tarixi saxtalaşdırmaq cəhdlərinə baxmayaraq fakt yenə öz faktlığında qalır.
Qeyd etmək lazımdır ki, erməni icmasının sentyabrın 18-də Tbilisidə təxribat xarakterli aksiya keçirməyə cəhd edərək oradakı Azərbaycan səfirliyinə daxil olmaq cəhdi heç də təsadüfi bir hadisə hesab oluna bilməz. Belə ki, erməni vandalları Azərbaycanın digər ölkələrdə olan səfirliklərinə də məqsədyönlü şəkildə hücumlar edirlər. Sentyabrın 18-də erməni vandalları Azərbaycanın Fransadakı səfirliyinə hücuma keçərək təxribat törədiblər. Erməni quldurları Fransadakı Azərbaycan səfirliyinin qarşısında olan dəmir baryerləri aşaraq binanın giriş qapısını sındıraraq içəri daxil olmağa cəhd ediblər [2]. Bundan bir neçə gün əvvəl sentyabrın 15-də erməni icmasının üzvləri Azərbaycanın ABŞ-da olan səfirliyinin qarşısında “etiraz aksiyası”nı həyata keçirməyə çalışıblar. Hadisə zamanı erməni millətçilərinin təxribatına cavab olaraq, Azərbaycanın ABŞ-dakı səfirliyi tərəfindən Ermənistanın işğalçı, təcavüzkar dövlət olmasını sübuta yetirən plakatlar sərgilənib. Erməni vandallarının həmin vaxt səsləndirdiyi əsassız şüarların qarşısı isə səfirlik tərəfindən quraşdırılan həyəcan siqnalı vasitəsi ilə alınıb. Nəticədə heç bir istəyinə nail ola bilmədiyini görən erməni millətçiləri hadisə yerini tərk ediblər [3]. Qeyd edək ki, erməni vandalları bundan xeyli əvvəl 2012-ci ilin fevralında da Polşadakı Azərbaycan səfirliyinin qarşısında piket keçirməyə cəhd etmişdilər. Lakin o dəfə də erməni vandallarının təxribatı uğursuzluğa düçar olmuşdu. Həmin vaxt Heydər Əliyev Fondunun təşəbbüsü sayəsində Xocalı soyqırımına dair həqiqətlər polyak dilində əyani şəkildə Polşadakı Azərbaycan səfirliyinin qarşısında sərgilənmişdi [4].
Erməni təxribatçılarının dünyanın müxtəlif yerlərdə Azərbaycana qarşı yönəlmiş “etiraz aksiyaları”na baxmayaraq sözügedən aksiyalar İkinci Qarabağ müharibəsinin nəticəsini dəyişməyə qadir deyil. Bu gün Ermənistanın necə işğalçı bir dövlət olması, erməni vandalizmi hərtərəfli şəkildə göz qabağındadır. Fəxrlə demək olar ki, Azərbaycanın zəngin tarixi mədəniyyəti bütün dünyada nümayiş olunur və bu istiqamətdə dövlət səviyyəsində müvafiq tədbirlər görülür. Bu baxımdan Heydər Əliyev Fondunun uğurlu fəaliyyətini qeyd etmək olar.
Qeyd edək ki, Müzəffər Ali Baş Komandan, Prezident İlham Əliyevin də vurğuladığı kimi, İkinci Qarabağ müharibəsi kimin kim olduğunu göstərdi. Azərbaycan vətən uğrunda canından keçən qəhrəman oğullarının - şəhidlərin hesabına Ermənistan üzərində böyük qələbəyə nail oldu. Bu ədalətin uğrunda gedən mübarizə idi və ədalət nəhayət ki öz yerini tapdı. Beləliklə də şanlı Azərbaycan Ordusu erməni faşizmini darmadağın etdi.

İstifadə olunmuş mənbələr:
1. Полиция не позволила армянам провести акцию протеста у посольства Азербайджана в Тбилиси /19.09.2022/ https://news.am/rus/news/720957.html
2. Армяне напали на посольство Азербайджана во Франции /18.09.2022/ https://report.az/ru/drugie-strany/armyane-napali-na-posolstvo-azerbajdzhana-vo-francii/
3. ABŞ-dakı ermənilərin Azərbaycan səfirliyinin qarşısında aksiya keçirmək cəhdi uğursuzluqla nəticələnib /16.09.2022/ https://azertag.az/xeber/Ermeni_dasnaklari_Azerbaycanin_ABS_daki_sefirliyi_qarsisinda_produktiv_vaxt_kechiribler-2293859
4. Azərbaycanın Polşadakı səfirliyi erməni piketinin qarşısını alıb /28.02.2012/ https://az.trend.az/azerbaijan/politics/1997891.html
Kamal Salayev
AMEA Qafqazşünaslıq İnstitutunun
Gürcüstanşünaslıq şöbəsinin kiçik elmi işçisi