"Kollektiv Təhlükəsizlik Müqaviləsi Təşkilatının (KTMT) bəzi siyasətçilər tərəfindən əsassız tənqid olunması konstruktiv iş üçün faydalı deyil".

"Report" TASS-a istinadən xəbər verir ki, bu barədə Rusiya Xarici İşlər Nazirliyinin rəsmi nümayəndəsi Mariya Zaxarova bildirib.

Onun sözlərinə görə, İrəvanın KTMT təlimlərində iştirak etməməsi mövcud vəziyyətlə əlaqədardır.

“İrəvanın bu il KTMT-nin Qazaxıstandakı birgə təlimlərində iştirak etmək üçün hərbi kontingent göndərməmək qərarı hazırkı vəziyyətlə bağlıdır", - Zaxarova deyib.

İranın Çabahar şəhərində qəzəbli sakinlər valilik binasını yandırıblar.

Bu barədə “Azad İran” “Telegram” kanalı xəbər verib.

Bildirilir ki, polis komandirinin etnik bəluc qıza təcavüz etməsinə və 22 yaşlı Məhsa Əmininin “Əxlaq” polisi tərəfindən saxlanıldıqdan sonra öldürülməsinə etiraz olaraq başlayan nümayiş ümummilli etirazların 12-ci günündə axşam saatlarında davam edib.

Narazı vətəndaşlar əvvəlcə yol polisinin köşkünə od vurublar və yerli bankın binasına (“Ticarət Bank”) hücum çəkiblər. Bundan sonra isə qəzəbli sakinlər valilik binasının önünə toplaşıblar. Onlar binanı daşa basdıqdan sonra yandırıblar.
O da vurğulanır ki, polis və xüsusi təyinatlı qüvvələr birbaşa insanlara atəş açıblar. Nəticədə aksiyaçılar arasında ölən və yaralananlar var. Onların dəqiq sayı barədə məlumat yoxdur.

Birləşmiş Millətlər Təşkilatı (BMT) Əfqanıstanda artan təhlükəsizlik narahatlıqlarını ifadə edərək, son aylardakı narahatedici tendensiyaları, xüsusilə də xarici terror qruplarının mövcudluğunun gündəmə gətirib.

Narahatlıqlar BMT-nin baş katibi Antonio Quterreşin Təhlükəsizlik Şurasına təqdim etdiyi son rüblük Əfqanıstan hesabatında ifadə olunub.

Hesabatda bildirilir ki, təhlükəsizlik vəziyyəti son aylarda narahatlıq doğuran tendensiyanı, xüsusilə də İŞİD-X-nın silsilə hücumlarını, “Taliban”ın de-fakto təhlükəsizlik qüvvələri ilə təkrarlanan silahlı toqquşmalarını və Əfqanıstanda əcnəbi terrorçu qrupların mövcudluğunun davam etdiyini göstərir: ““Taliban” hərəkatının heç bir qrup və ya fərdin Əfqanıstan ərazisindən digər ölkələrin təhlükəsizliyini təhdid etmək üçün istifadə etməyəcəyini təmin etmək öhdəliyi konkret addımlarla davam etdirilməlidir”.

Hesabatda “Taliban” rəhbərliyi beynəlxalq hüquq çərçivəsində öhdəliklərə əməl etməklə, bu təhlükələrə qarşı mübarizədə beynəlxalq əməkdaşlığı gücləndirmək üçün terrorizmə qarşı ciddi dialoq aparmağa çağırılır. Rüblük hesabatda Birləşmiş Millətlər Təşkilatının Əfqanıstandakı Yardım Missiyası - UNAMA-nın mülki şəxslərin müdafiəsi, məhkəməsiz qətllər, işgəncə və pis rəftar, əsassız həbslər və həbslər, Əfqanıstanda qadın və qızların hüquqları, fundamental azadlıqlar və həbs yerlərində vəziyyətlə bağlı nəticələri ümumiləşdirilib. Hesabatda həm de-fakto hakimiyyət orqanlarına, həm də beynəlxalq ictimaiyyətə tövsiyələr də yer alıb.

Silahlı zorakılığın ümumi əhəmiyyətli dərəcədə azalmasına baxmayaraq, 2021-ci il avqustun ortalarından 2022-ci il iyunun ortalarına qədər UNAMA 2106 mülki itkini qeyd edib.

Mülki itkilərin əksəriyyəti özünü “İraq və Şam İslam Dövləti - Xorasan Vilayəti” – (İŞİD-X) adlı silahlı qruplaşmanın məktəbə getdikləri, ibadət etdikləri və gündəlik həyatlarını davam etdirdikləri yerlərdə etnik və dini azlıqlara qarşı məqsədyönlü hücumları ilə əlaqələndirib.

Böyük Britaniyanın Baş naziri Liz Trassla Ukrayna prezidenti Vladimir Zelenski arasında telefon danışığı baş verib.

APA-nın Britaniya bürosunun xəbərinə görə, Baş nazir Liz Trass Rusiyanın Ukraynada keçirdiyi saxta referendumlar fonunda Böyük Britaniyanın davamlı dəstəyini vurğulayıb.

Baş nazir açıq şəkildə bildirib ki, Böyük Britaniya Rusiyanın Ukraynanın suveren ərazilərini ilhaq etmək cəhdlərini heç vaxt tanımayacaq.

O, Putin məğlub olana qədər Ukraynanın Böyük Britaniyanın dəstəyinə arxalana biləcəyini bir daha vurğulayıb.

Prezident Zelenski Baş naziri hazırkı hərbi vəziyyətlə bağlı məlumatlandırıb.

Liz Trass Ukraynanın Şərqində Rusiya tərəfindən saxlanılan beş Böyük Britaniya vətəndaşının azad edilməsində gördüyü işlərə görə prezident Zelenksiyə təşəkkür edib.

Liderlər həmçinin qaz tədarükünü təmin etmək üçün birgə işlər barədə müzakirə aparıblar.

Rusiya Dövlət Dumasının deputatları səfərbərliyə cəlb olunanlarla bağlı qərarın üç oxunuşda qəbul edilməsini planlaşdırsalar da, bu, baş tutmayıb.

Əsas mövzu ölən hərbçilərin borcunun kimin tərəfindən silinməsi məsələsi olub.

Ölkənin Maliyə Nazirliyi banklara borcu öz hesablarına silməyi təklif edir, bankirlər isə bununla razılaşmırlar.

Sentyabrın 27-də birinci oxunuşda qəbul edilən qanun layihəsinə əsasən, səfərbərliyə cəlb olunanlara və müqavilə əsasında hərbi xidmət çəkənlərə kreditləri olduqda ödənişləri dayandırmaq və ya xidmət müddətinə onu azaltmaq hüququ verilir.

“İkinci oxunuşda biz açıq şəkildə bildirəcəyik ki, əgər şəxs vəfat edibsə və ya birinci qrup əlil olubsa, deməli, o, borc ödəmir və bu borclar heç kimə keçmir”, – deyə Dumanın maliyyə komitəsinin rəhbəri Anatoli Aksakov izah edib.

Rusiya Maliyyə nazirinin müavini Aleksey Moiseyev əlavə edib ki, bu silinmə büdcənin deyil, bankların hesabına həyata keçiriləcək.

Nəticədə, çərşənbə axşamı qanun layihəsi hətta ikinci oxunuşda da müzakirə olunmayıb, lakin işçi qrup aktiv şəkildə dəyişiklikləri hazırlayıb. (Mənbə: Kommersant)

Təbrizdə İran polisi yenidən etirazçılara atəş açıb. Bu barədə “Azad İran” “Telegram” kanalı məlumat yayıb.

Həmin görüntüləri təqdim edirik:

Rusiya Federasiyasının Prezidenti üçün sentyabrın 30-u Adolf Hitlerin 30 apreli ola bilər. O, ultrafaşistlərlə oyundan və əsirlərin dəyişdirilməsindən sonra təcrid vəziyyətinə düşüb.

Bu barədə rusiyalı publisist Andrey Piontkovski Freedom telekanalının efirindən danışıb («UNİAN»).

«Ukrayna silahlı qüvvələri Xersonu götürəcək və hər şey dağılacaq. Biz, fikir ayrılığının yalnız bir tərəfini görürük, amma həm də Putin-generallar xətti ilə fikir ayrılığı var. RF Prezidenti də Hitlerin son illər Berlində bunkerdə qaldığı kimi vəziyyətə düşüb.

Qalır başlıca sual: «Kimdir günahkar?» Putinə qalır generalları ittiham etmək və həbsə tullamaq. Səmərqənddən sammitdən qayıdandan sonra, Putin konsepsiyanı dəyişdi. O, ultrafaşistlərin mövqeyinə keçdi, amma əsirlərin dəyişdirilməsindən sonra təcrid vəziyyətinə düşüb» - Piontkovski qeyd edib.

44 günlük müharibədə İranın Ermənistana verdiyi bir neçə təklif müharibənin mahiyyətini və nəticəsini dəyişə bilərdi.

APA xəbər verir ki, bu barədə erməni politoloq Stepan Danielyan çıxış edib.

S.Danielyan bu gün keçirilən mətbuat konfransında bildirib ki, Ermənistan cəmiyyəti baş nazir Nikol Paşinyanın 44 günlük müharibədə İranın hansı təkliflərindən imtina etdiyini bilsə, şoka düşəcək: “Sual yaranır: niyə imtina edildi?”

Erməni ekspertin fikrincə, İrana qarşı yönəlmiş müharibədə Türkiyə, İsrail, İngiltərə də çıxış edir.

O, 2018-ci ildə ABŞ Prezidentinin milli təhlükəsizlik üzrə köməkçisi Con Boltonun Ermənistana səfəri zamanı İranla sərhədin bağlanması təklifini xatırladıb:

“2018-ci ildə Ermənistana səfəri zamanı Bolton erməniləri stereotiplərdən qurtulmağa çağırıb, ABŞ-ın Ermənistan və ermənilərin Türkiyəyə münasibətində maraqlı olduğunu bildirib. Bolton indiki hakim rejimin Ermənistanda hakimiyyətə gəlməsini dəstəkləmək üçün ödəməli olduğu qiyməti deyib. Bu, 2018-ci ildə hakimiyyət dəyişikliyi üçün şərt idi”.

İsveç seysmoloqları "Şimal axını" və "Şimal Axını -2" boru kəmərləri yaxınlığında partlayışlar qeydə alıb.

İsveçin SVT telekanalı xəbər verir ki, seysmoloqlar partlayışları son 36 saat ərzində qeydə alıblar.

Telekanalın verdiyi məlumata görə, həm İsveç, həm də Danimarkadakı ölçmə stansiyaları bazar ertəsi qaz sızması ilə eyni ərazidə güclü sualtı partlayışlar qeydə alıb. İsveç Milli Seysmik Şəbəkəsinin seysmologiya üzrə eksperti Byorn Lund: "Dalğaların aşağıdan səthə necə sıçradığını aydın görə bilərsiniz. Bunun bir partlayış olduğuna şübhə yoxdur. Hətta Gnosjedə bunu qeydə almış bir stansiyamız var", deyə açıqlamasında bildirib.

İlk partlayış bazar ertəsi gecə saat 02:03-də, ikinci partlayış isə bazar ertəsi axşam saat 19:04-də qeydə alınıb.

Ərazidəki gəmilər suyun səthində qabarcıqlar aşkar etdikdən sonra, müvafiq olaraq, bazar ertəsi saat 13:52-də və 20:41-də qaz sızması ilə bağlı məlumat yayılıb.

SVT telekanalı qeydə alınmış partlayışların koordinatlarını əldə edib və onlar qaz sızmasının qeydə alındığı ərazidədir.

Ukraynanın Donetsk, Luqansk, eləcə də Xerson və Zaporojye vilayətlərində Rusiyaya birləşmək üçün keçirilən “referendumlar”da səsvermə başa çatır.

İlkin nəticələr qaçqınların və diplomatik korpusun səs verə biləcəyi Rusiya Federasiyası ərazisindəki seçki məntəqələrindən gəlir.

Donetskdə bülletenlərin 22,48%-dən çoxunun işlənməsindən sonra 98,35%, Luqanskada səslərin 51,76%-nin sayılmasından sonra 97,93%, Zaporojyedə protokolların 60%-nin işlənməsindən sonra 97,75%, Xersonda isə səslərin 61%-nin sayılmasından sonra seçicilərin 96,44% faizi bu ərazilərin Rusiyaya birləşdirilməsinə tərəfdar olduqları bildiriliblər.