 |
|
|
“Ermənistanın silahlı qüvvələrini və qeyri-qanuni silahlı birləşmələrini ölkəmin ərazisindən tam çıxarmaqdan və işğal olunmuş 8 sərhədyanı kəndi Azərbaycana qaytarmaqdan imtina etməsi, eləcə də davam edən mina terroru və digər qanunsuz fəaliyyətləri, Azərbaycanda köhnəlmiş və ya uydurma adlarla yaşayış məntəqələrinə istinadlar, geniş yayılmış qarayaxma kampaniyası və dezinformasiya, eyni zamanda onun ərazisində fəaliyyət göstərən etnomillətçi qruplar tərəfindən irqi nifrətin qızışdırılması və təbliğatının qarşısının alınmaması BMT-nin Nizamnaməsinə, beynəlxalq hüquqa, insan hüquqlarına və sülh gündəliyinə heç bir şəkildə uyğun gəlmir”.
Bu fikirləri Azərbaycanın BMT-dəki Daimi Nümayəndəliyinin rəhbəri Yaşar Əliyev BMT Təhlükəsizlik Şurasının gündəliyindəki “Sülh quruculuğu və sülhün dəstəklənməsi” bəndi ilə bağlı “Mürəkkəb çağırışlara davamlılıq yaratmaq məqsədilə insanlara investisiya” mövzusundakı bəyanatında bildirib.
Azərbaycan nümayəndəsinin sözlərinə görə, Ermənistan minlərlə itkin düşmüş azərbaycanlının hesabatını verməkdən və münaqişə zamanı silahlı qüvvələrinin törətdiyi çoxsaylı vəhşilikləri araşdırmaqdan imtina edib:
“Təkcə 2022-ci ildə Ermənistan Azərbaycana 106 nəfərin qarışıq qalıqları olan 67 torba verib. Özünü sivilizasiyanın mərkəzi və insan hüquqlarının alovlu müdafiəçisi adlandıran bir ölkənin bu qalıqları bütün mənəvi qanunlara zidd olaraq, beynəlxalq humanitar hüquqa zidd olaraq otuz ildir saxlaması dərin hiddət doğurmaya bilməz”.
Yaşar Əliyev qeyd edib ki, Azərbaycanın təcrübəsi münaqişələrin qarşısının alınması və həlli, dövlətlərin suverenliyinə və bütövlüyünə hörmətin təmin edilməsi, nifrət və dezinformasiyaya qarşı, sülhün qurulması və qorunması üçün daha çox iş görməyin lazım olduğunun nümunəsi və xatırlatmasıdır:
“Münaqişədən təsirlənmiş və postmünaqişə sülh quruculuğu, yenidənqurma, reabilitasiya və reinteqrasiya ilə məşğul olan dövlətlərə dəstəyin göstərilməsi Birləşmiş Millətlər Təşkilatının bütün sisteminin mühüm öhdəliyidir və belə də qalmalıdır. Bu cür dəstəyə həm də bugünkü təhdid və çağırışlara davamlılıq yaratmaq üçün insanlara investisiya etmək kontekstində lazımdır.
Azərbaycan Birləşmiş Millətlər Təşkilatının Nizamnaməsinə və beynəlxalq hüquq normalarına tam uyğun olaraq öz təhlükəsizliyini, suverenliyini və ərazi bütövlüyünü müdafiə etmək, xalqını qorumaq, regionda sülh və sabitliyi bütün mümkün vasitələrlə təmin etmək əzmində qətidir”.
“Vaşinqton rəsmiləri Türkiyəyə təzyiq edirlər ki, ABŞ istehsalı olan təyyarələrdən istifadə edən Rusiya aviaşirkətlərinin reyslərinə və həmin nəqliyyat vasitələrinə texniki xidmət göstərilməsinə icazə verməsin”.
Bu barədə “The Wall Street Journal” nəşrində dərc olunmuş məqalədə bildirilib.
Məqalədə qeyd edilib ki, ABŞ rəsmiləri dekabr ayında bununla bağlı Türkiyə tərəfinə xəbərdarlıq ediblər. Bildirilib ki, Türkiyə Rusiya və Belarusa və əks istiqamətdə uçan ABŞ istehsalı təyyarələrin yanacaq doldurmalarına və hissələrini dəyişdirmələrinə icazə verərsə, 2022-ci ildə tətbiq edilən ixraca nəzarət qaydalarını pozmuş olacaq. Bu səbəbdən də Türkiyəyə qarşı tədbirlərin görülməsi nəzərdən keçirilə bilər.
İsveçin təhlükəsizlik və demokratiya məsələlərində ixtisaslaşan Robert Lasting İnstitutu yanvarın 24-də Rusiya Hərbi Kəşfiyyat İdarəsinin (QRU) İsveçdə dini zəmində sabitliyi pozmağa yönəlmiş fəaliyyəti haqqında araşdırma dərc edib.
https://lansinginstitute.org/2023/01/24/russian-military-intelligence-operation-in-sweden-besides-blocking-the-nations-nato-membership-bid-could-raise-t
Əməliyyat İsveçin NATO-ya daxil olmaq planlarına mane olmağa, müsəlman ölkələri ilə münasibətləri gərginləşdirməyə və qaçqın olaraq İsveçə gələn islam ardıcılları tərəfindən terror aktları üçün zəmin hazırlamağa yönəlib, deyə araşdırmada qeyd edilir.
21 yanvar 2023-cü il tarixində Danimarkanın Hard Line (“Sərt Xətt”) partiyasının lideri Rasmus Paludan Türkiyənin Stokholmdakı səfirliyi qarşısında Quranı yandırıb. İsveçin SVT telekanalının məlumatına görə, Quranı yandırmaq ideyasını yerli jurnalist Çanq Yohannes Frik irəli sürüb. O, həmçinin Paludanın məruz qalacağı istənilən cərimənin ödəniləcəyinə zəmanət verib.
Çoxsaylı əlamətlərə görə, Çanq Yohannes Frik QRU-nin psixoloji əməliyyatlar həyata keçirmək üçün cəlb edilmiş casusudur. Aksiyanın yeri və vaxtı xüsusi olaraq seçilib – Türkiyənin müdafiə nazirinin İsveçə səfəri ərəfəsindəTürkiyə səfirliyinin önündə. Səfir ləğv edilib, Ankara isə İsveçin NATO-ya daxil olmasına razılıq verməyəcəyini bildirib.
Çanq Yohannes Frik (1995-ci ilə qədər Çanq Georg Lindberg) onlayn Nyheter idag qəzetinin sahibidir və SD Riks telekanalında (İsveç Demokratiya Partiyası tərəfindən maliyyələşdirilir) veriliş aparır. Bu şəxsin gizlicə Rusiya hərbi kəşfiyyatı – QRU ilə əməkdaşlıq etdiyinin çox sayda əlaməti var. Daha əvvəl o, Rusiyanın Russia Today telekanalında işləyib.
Ətraflı
RT-nin və Sputnik-in baş redaktoru Marqarita Simonyan da Rusiyanın Müdafiə Nazirliyi və hərbi kəşfiyyatı ilə əməkdaşlıq edir. Simonyanın karyerasının başlanğıcında Çeçenistandakı müharibəni işıqlandıran hərbi müxbir olduğunu nəzərə almaq lazımdır, bu, dolayı olaraq onun QRU ilə əlaqələrini təsdiq edir. 2005-ci ildə Müdafiə Nazirliyi hətta onu medalla təltif edib. Sonradan, 2008-ci ildə o, Rusiyanın Cənubi Osetiya üzərində nəzarətin ələ keçirilməsinə yönəlmiş hərbi kampaniyasını işıqlandırırdı.
RT onu xarici ərazilərdə keçirdiyi psixoloji əməliyyatlara fəal şəkildə cəlb edib. Frik öz məqalələrində Rusiyanın Krımı ələ keçirməsinə və Suriyadakı hərbi cinayətlərə bəraət verir, habelə Putin rejimini tərifləyir, ABŞ və NATO-nu sistemli şəkildə tənqid edirdi. Bu hadisələr QRU-nun xaricdə keçirdiyi psixoloji əməliyyatların əksəriyyətinin məzmuna tam uyğundur.
2012-ci ildən Çanq Yohannes Frik Rusiya vətəndaşı Polina Urvantseva (1989 təvəllüdlü) ilə birlikdə yaşayır.
2017-ci ildə o, Rusiyanın ifrat sağçı “İsveç demokratları” partiyasından olan, rus kökləri olan deputat Pavel Qamovun Rusiyaya səfərini işıqlandırıb. The New York Times-ın məlumatına görə, 2018-ci ildə Rusiya sosial şəbəkələrdə miqrantlar əleyhinə əhval-ruhiyyəni yayaraq, İsveç demokratlarının parlament seçkilərində rekord səviyyədə uğur qazanmasına kömək edib.
2018-ci ildə Frikin Nyheter idag nəşri, Qərbin əksər media platformalarından fərqli olaraq, Rusiyadakı prezident seçkilərini tərifləyib.
Bu gün Frikin nəşri diqqəti Türkiyə əleyhinə nəşrlər üzərində cəmləşdirib (Türkiyənin Suriyada kürdlərin qətlində iştirakı, İslam Dövləti ilə neft sövdələşmələri, terrorçulara sığınacaq verilməsi, Avropanın qaçqınlarla təhdid edilməsi və 2015-ci ildə qaçqın böhranında Erdoğanın rolu). Bütün bunlar Türkiyənin İsveçin NATO-ya daxil olmasına razılıq verməməsinə səbəb olur.
“Bizim qiymətləndirmələrimizə görə, Rusiya bu fənd üçün Paludanı artıq Danimarka, Almaniya və Fransada Quranın, həmçinin islamda ciddi şəkildə qadağan edilən Məhəmməd Peyğəmbərin şəklinin yandırılmasında iştirak etməsi ilə əlaqədar seçib. Paludan Danimarkalı siyasətçi, ölkədə islamın qadağan edilməsini və sığınacaq alan bütün miqrantların deportasiyasını tələb edən ifrat sağçı anti-İslam siyasi partiyanın banisidir.
Paludanın hədsiz sağçı ideologiyası və anti-miqrant siyasəti Kremlin Avropada anti-miqrant hərəkatı adı altında əməliyyat tədbirləri həyata keçirmək metodikasına tamamilə uyğundur. Rusiya xüsusi xidmətləri bu metodları 2015-ci ildən tətbiq edir”, deyə araşdırmada qeyd edilir.(Turan)
"Ruben Vardanyan Rusiya tərəfindən hazırlanmış bir proyektdir"
Bu fikirləri Demokrat.az-a açıqlamasında politoloq Züriyə Qarayeva deyib. Politoloq qeyd edib ki, o, Qarabağdakı prosesləri sabotaj etmək və Paşinyana qarşı alternativ rəqib kimi ortaya atılıb:
"Moskvada biznes sahəsində kirli keçmişi olan bu şəxsin Qərbdə asanlıqla qəbul olunacağını hesab etmirəm. Onun BBC "Hard Talk" proqramındakı çıxışının mətninə də baxsaq, açıq şəkildə aparıcının sualları sanki Vardanyanı rəzil duruma salmağa yönəlib. Çıxışını aldığı təlimatlar əsasında "humanitar böhran"a fokuslandırmağa çalışan bu qondarma lider fərqli suallardan yayınmağa çalışır, hətta ara-sıra özünü kobud desək, qanmaz yerinə qoyurdu. Onun aparıcı Stiven Sakurun Paşinyanla Vardanyanın münasibətlərinin zərərli olması, rəsmi İrəvanın onunla heç bir işgüzar əlaqə qurmaq istəməməsi ilə bağlı sualından yayınması, 1980-ci illərdə Azərbaycan məktəblərində keçirilən tarix kitabında “bu ərazilərin ermənilərə aid olduğu”nun yazıldığını iddia etməsinə qədər olan fikirləri Vardanyanın həm Bakı, həm də İrəvan üçün ortaq təhdid olduğunu göstərir. Bu baxımdan, düşünmürəm ki, BBC kimi köklü media qurumu Vardanyan kimi cılız, həm də Moskva fiquru üzərində hansısa məqsədləri olsun".
Ukraynaya hər hansı silah tədarükü hərbi münaqişədə birbaşa iştirak deməkdir ki, biz buna yol verə bilmərik.
APA-nın Tbilisi müxbiri xəbər verir ki, bunu Gürcüstanın hakim “Gürcü arzusu” partiyasının sədri İrakli Kobaxidze Ukrayna xarici işlər nazirinin müavini Yevgeni Perebinisə cavabında deyib.
O, Ukraynanın hökumət nümayəndələrinin Gürcüstanla bağlı çağırışlarının təəssüf doğurduğunu qeyd edib:
“İkinci cəbhə ilə bağlı çağırışlar dayanmır. Bunu bəzən birbaşa, bəzən isə dolayı yollarla edirlər. Təbii ki, Ukraynanı istənilən silahla təmin etmək hərbi münaqişədə birbaşa iştirak deməkdir, biz buna yol verə bilmərik. Ukrayna hökumətinin nümayəndələrinin praktiki olaraq açıq formada belə çağırışlar etməsi çox təəssüf doğurur. Təbii ki, bu ciddi problemdir”.
Qeyd edək ki, Ukrayna xarici işlər nazirinin müavini Yevgeni Perebinis Gürcüstanın Ukraynaya silah və hərbi texnika tədarük edən tərəfdaşlar siyahsına qoşulacağına ümid etdiyini bildirib.
Ermənilər Şuşa-Xankəndi yolundakı aksiyaçıların üzərinə yürüş etmək fikrinə düşüblər
Ermənistanda fəaliyyət göstərən siyasi təşkilatlar Laçın dəhlizi və Qarabağın Ermənistanla əlaqəsinin bəpası məsələsi ətrafında yenidən həşir qoparıblar. TEREF.AZ JAMAZ.İNFO-ya istinadla xəbər verir ki, bu məqsədlə dünən İrəvanda daha bir aksiya keçirilib.
Aksiyanın təşəbbüsçüləri bir sıra məsələlərlə yanaşı, həm də vəziyyətdən çıxmaq üçün təkliflər də irəli sürüblər. Onlardan biri Narek Ayvazyan bildirib ki, bunun üçün dörd yolları var. “Birinci yol, Laçın dəhlizində keçirilən aksiyaçıları oradan çıxarmaq üçün piyada və ya maşınlarla həmin yerə getməkdir. Bununla dəhlizi aça biləcəyik. İkincisi isə beynəlxalq ictimaiyyətin Azərbaycana təzyiqlərini pik həddə çatdırmaqdır. Onlar Bakıya elə təzyiqlər edir ki, azərbaycanlılar oradan getməyə məcbur olurlar. Üçüncüsü isə elə bir vəziyyət yaratmaqdır ki, yolu bağlayanlar üçün çıxılmaz vəziyyət yaratmaq və onların getməsini təmin etməkdir. Məsələn, tutaq ki, yük və sərnişin daşımalarını hava yolu ilə həyata keçirilməsi. Belə olan halda dəhlizi bağlı saxlamaq mənasız olur. Biz bu variantları müzakirə etməli və istədiyimizi mümkün qədər səmərəli həyata keçirməyə imkan verəcək növü seçməliyik”.
Ayvazyan 4-cü versiyanın da olduğunu deyir. “Əslində 4-cü versiya da var. Bu, əvvəlki üç variantın qarışdırlaraq, hamısının bir yerdə edilməsindən ibarətdir”.
Almaniyanın Berlin-Brandenburq Hava Limanında (BER) bütün uçuşlar ləğv edilib.
Gununsesi.info xarici KİV-ə istinadən xəbər verir ki, buna səbəb hava limanındakı işçilərin tətilə çıxmasıdır.
Kollektiv danışıqların nəticəsiz qalması səbəbiylə təşkil edilən tətilə qatılan çox sayda personal səhər saatlarından etibarən hava limanında toplaşıb.
İştirakçıların əsas tələbləri sırasında onların iş imkanlarının yaxşılaşdırılması yer alır.
Aksiyada işəgötürənlərin güzəştə getməməsi halında daha çox tətillərin təşkil ediləcəyi barədə xəbərdarlıq edib.
Bu səbəbdən bütün uçuşlar ləğv edilib.
Tətildən xəbərsiz olaraq hava limanına gələn bəzi sərnişinlər rəsmilərin xəbərdarlığından sonra geri dönməli olublar.
Qeyd edək ki, son günlər Berlində bir çox iş yerlərində tətil dalğası hökm sürür.
Avropa İttifaqının (Aİ) Ermənistandakı missiyası mülki deyil, hərbi kontingentə bənzəyir.
“Report”un əldə etdiyi məlumata görə, missiyanın rəhbəri 2020-ci ildən Ştutqart Şəhər Polis İdarəsinin rəisi vəzifəsində çalışan almaniyalı Markus Ritter olacaq.
Bildirilib ki, xidmət etdiyi qurumlar onun polis deyil, daha çox hərbçi olduğunu göstərir. Belə ki, M.Ritter Aİ-nin İraqdakı konsultasiya missiyasına rəhbərlik edib, Cənubi Sudan, Gürcüstan və Kosovoda Aİ və BMT missiyalarında xidmət edib, həmçinin Almaniyanın Əfqanıstandakı səfirliyində polis müşaviri olub.
Qeyd edilib ki, almaniyalı təmsilçinin missiyanın rəhbəri təyin edilməsi Berlin və Paris arasında razılaşdırılmış oyunun nəticəsidir, çünki bu mərhələdə Fransa kölgədə qalmaq istəyir.
Rusiya Xarici İşlər Nazirliyinin sözçüsü Mariya Zaxarova İsveçdə Quranın yandırılması və NATO baş katibi Yens Stoltenberqin məsələ ilə əlaqədar açıqlamasına reaksiya verib.
Teleqraf.com xəbər verir ki, Rusiya rəsmisi insanların dini inanclarına hörmətin istəyə bağlı olmadığını, bunun bir öhdəlik olduğunu bildirib.
Beynəlxalq ictimaiyyətin dəfələrlə dözümsüzlük və ayrı-seçkiliyə qarşı öhdəliklər götürdüyünü xatırladan Zaxarova BMT, Avropa Şurası və ATƏT-in qəbul etdiyi qərarları sadalayıb:
“Bu sənədlərdə müsəlmanlar üçün müqəddəs olan kitabı yandırmaq bir yana qalsın, ifadə azadlığının hər hansı din və ya dini məsələ haqqında tənqidi və təhqiredici fikirlər söyləmək hüququnu ehtiva etmədiyi xüsusi olaraq vurğulanır. Stoltenberq niyə bundan xəbərsizdir? Çünki Qərb aşağı təhsilli insanları Avropada əsas vəzifələrə təyin edir. Çünki onları idarə etmək daha asandır, bu da əksər avropalıları manipulyasiya etməyə kömək edir”.
“Azərbaycan dünyada yəhudilərin repressiyaya uğramadığı yeganə ölkədir. Yəhudilər uzun əsrlərdir əhalisinin əksəriyyəti müsəlman olan bu ölkədə mehriban ailə kimi yaşayırlar. Bu yaxınlarda Azərbaycanın İsraildə səfirliyi açıldı. Bu, bir çox ölkələrə ən yaxşı nümunə olacaq”.
Bu fikirləri Avropa Şurası Parlament Assambleyasının qarşısında Holokost qurbanlarının xatirəsinə həsr edilmiş tədbirdə Frankfurtun yəhudi icmasının ravvini və Almaniyanın Ortodoks Ravvinlər Konfransının prezidenti Aviçay Apel deyib.
Qeyd edək ki, 2022-ci ilin oktyabrından hər il yanvarın 27-nin Avropa Şurasında Holokost xatirəsi günü kimi anılması barədə qərar qəbul olunub.