"İranda hakimiyyət nümayəndələrinin İslam İnqilabının 46-cı ildönümü ilə bağlı pafoslu çıxışlarına rəğmən, ölkə bu tarixi qeyri-müəyyənlik və ümidsizlik atmosferində qarşılayıb".

TNS-in verdiyi məlumata görə, bu barədə "Azad İran" "YouTube" kanalının yayımladığı videosüjetdə bəhs edilir.

Bildirilir ki, bir neçə gün öncə İranın Ali Rəhbəri Ayətullah Əli Xamenei ABŞ ilə danışıqların məntiqli, müdrik və şərafətli olmadığını bəyan edib, bildirib ki, ölkənin problemlərinin həllinə heç bir təsiri yoxdur.

"Onun Qərblə müzakirələri və nəticə etibarilə sanksiyaların azaldılması ehtimalını rədd etməsi mövcud sosial-iqtisadi gərginliyi daha da artırıb. Ali rəhbərin həmin açıqlamasına ilk reaksiyanı valyuta bazarı verib və bir ABŞ dollarının qiyməti 93 min tüməni keçib. Bu isə ölkədə tüğyan edən bahalaşma dalğasının davam edəcəyini və İran təqvimi ilə yeni ilə qədər dolların azı 100 min tümənə çata biləcəyini göstərir.

Vəziyyətin hədsiz dramatikliyi və fəlakətli sonuca aparıb çıxara biləcəyi nüfuzlu "Əsr-Iran" nəşrinin İran Prezidenti Məsud Pezeşkiana müraciətlə yazdığı bu cümlələrdə aydın ifadəsini tapıb: "Biz etiraz edirik, cənab Pezeşkian! Birbaşa və açıq şəkildə etiraz edirik! Siz prezident olanda, bu ölkənin pulu indikindən 57 faiz qiymətli idi, başqa sözlə desək, o zaman bir ABŞ dollarını 59 min tümənə almaq olurdu, indi isə 92 min 550 tümənə! Məlum da deyil ki, bir gün, hətta bir saat sonra nə olacaq?!"

Ətraflı süjetdə:

ABŞ Prezidenti Donald Tramp biznesdə üstünlüklər əldə etmək məqsədilə xarici dövlət məmurlarına rüşvət verməkdə ittiham olunan Amerika vətəndaşları və şirkətlərinin təqibinin Ədliyyə Nazirliyi tərəfindən müvəqqəti dayandırılması barədə fərman imzalayıb.

"Bu, Amerika üçün daha çox biznes imkanları deməkdir" - Tramp bildirib.

Sənəd faktiki olaraq 1977-ci ildən qüvvədə olan Xaricdə korrupsiya haqqında qanunu (FCPA) zəiflədir. Fərmana əsasən, baş prokuror Pem Bondi FCPA üzrə araşdırmaları dayandırmalı və onun tətbiqi üçün yeni təlimatlar hazırlamalıdır.

Ağ Evdə bildiriblər ki, antikorrupsiya qanunu "beynəlxalq şirkətlər arasında adi hal" olan praktikada iştirakı qadağan etməklə Amerika biznesini xarici rəqiblərlə müqayisədə əlverişsiz vəziyyətə salıb.

Görünən odur ki, Tramp rüşvəti leqallaşdırır. Bundan sonra, xarici dövlət məmurlarına rüşvət verən ABŞ şirkətləri məsuliyyətə cəlb olunmayacaq.

“Tramp işgüzar mühit yaratmağı yaxşı bacarır”

Mövzu ilə bağlı Bizim.Media-ya açıqlamasında politoloq Tofiq Abbasov bildirir ki, işgüzar mühiti yaxşı qurmağı bacaran Tramp bəzi hallarda hətta korrupsiya adı ilə olmasa da belə, bonus adı altında peşkəş etməyin, ənam verməyin də mümkün olduğunu anlayır:

“Donald Trampın qeyri-adi, ekstraordinal qərarlarının şahidi oluruq. Trampın hakimiyyətə ikinci gəlişi demək olar ki, inqilabi mahiyyət daşıyır. O, gözlənilməz qərarlar verməkdən çəkinmir. Keçmiş adminstrasiyanın bəzi vacib qərarlarını da dayandırıb. Yəni Tramp ənənəvi sistem adamı olmayaraq, demək olar ki, öz yolu ilə gedir. O, işgüzar mühiti yaxşı qurmağı bacaran adamdır. Anlayır ki, bəzi hallarda hətta korrupsiya adı ilə olmasa da belə, bonus adı altında peşkəş etmək, ənam vermək də mümkündür. Dünyada bir çox hallarda rüşvəti elə bonusla verirlər”.

Ekspert qeyd edir ki, bu addımın arxasında hansı niyyətlərin durduğu da bəllidir, bəzi korrupsionerləri, qara işləri görənləri müdafiə edib, öz çətirləri altına almaqla onları böyük bəlalar, təzyiqlərdən qurtarmağa çalışırlar.

“Heç kəs Peyğəmbər övladı deyil. Hər kəs yerlə gedir, özünü ifadə edir”.

“Trampın qərarı ilk baxışdan hətta təqdir də oluna bilər. Bir halda ki, Amerika vətəndaşları öz ölkələri üçün xeyir gətirəcəksə, onların qanundan bir addım yayınmalarını hardasa bağışlamaq da olar. Amma bu digər tərəfdən korrupsiyanın çiçəklənməsinə də şərait yaradacaq.

Korrupsiya öz-özlüyündə iqtisadi problem deyil. Bu mənəvi problemdir. İmkanları geniş olan məmurlar da bir də görürsən korrupsiyaya qurşanır. Rəqabətin sərtləşməsi, sıxlığın yaranması, yaşanan böhranlar da insanlara təsir edir. Bəzi hallarda elə gözlənilməz şərait yaranır ki, insanlar çaşqın vəziyyətə düşür və nəyin bahasına olursa-olsun ondan çıxmağa çalışırlar.

Yəni insan ekstraordinal, gözlənilməz, qanundan kənar addımlara da yol verə bilər ki, təki gözlədiyi iş alınsın. Ona görə Qərbdə guya korrupsiyaya müharibə elan edənlər belə əslində öz maraqlarına cavab verəndə həmin prosesə baş vururlar. Sonra müxtəlif ibarələrdən istifadə etməklə çirkaba batan işgüzar şəxsləri, böyük siyasətçiləri çətin vəziyyətdən çıxarıb onlara bəraət qazandırırlar”.

T.Abbasov deyir ki, Tramp da maraqlara cavab verdiyi təqdirdə qanundankənar məsələlərə rəvac verir:

“Bu düzgün qərar olmasada, belədir. Ola bilsin onun da nəticəsində hər hansı bir səviyyədə qeyri-qanuni işlərə əlləri bulaşan bəzi şəxslərin həyatında yüngüllük olacaq. Yəni indi onlar üçün ola bilsin əlverişli vəziyyət yaransın. Lakin düşünürəm ki, Trampın dövründə imzalanacaq qərarların çoxu posttramp dövründə ömrünü başa vuracaq”.

Bizim.Media

Amerikada nəşr olunan "The Washington Post" qəzeti yenə də öz ampluasındadır. Nəşr yenə də Azərbaycan əleyhinə yazı dərc edib.
Qəzetin dərc etdiyi köşə yazısında müəllif Devid İqnatius belə yazıb: "Dünyada bu qədər sarsıntılar içərisində ayrı-ayrı hadisələr diqqətdən yayına bilər. Ancaq mən Ruben Vardanyan adlı şəxsin vəziyyətini izah etmək istəyirəm".

Paradoks bundan ibarətdir ki, ABŞ-da nəşr olunan bu qəzet Ruben Vardanyanı "siyasi məhbus" adlandırıb. ABŞ-ın hazırda faktik olaraq, Rusiya ilə müharibədə olduğu hər kəsə məlumdur. Ruben Vardanyan isə bir neçə il əvvəl Azərbaycanın o zaman nəzarətində olmayan ərazisinə məhz Rusiya tərəfindən "siyasi-kəşfiyyat desantı" olaraq atılmışdı. Moskvanın məqsədi Vardanyan vasitəsilə bölgədə öz siyasətini yürütmək olmuşdu, amma Azərbaycan bu planı pozdu. Amerika nəşri buna görə Azərbaycana minnətdar olmaq əvəzinə, əksinə Azərbaycanı ittiham etmək yolunu tutub. Qəzet adını çəkdiyi şəxsin vəziyyətinə diqqət verməyin vacib olduğunu yazıb.

Doğrudur, qəzet Qarabağı "Azərbaycanın qanuni olaraq bir hissəsi" adlandırıb. Lakin bu bölgədə 2023-cü il sentyabrın 20-nə qədər mövcud olmuş vəziyyəti "bir vaxtlar əhalisi əsasən ermənilərdən ibarət olan və özünü idarə edən" kimi təqdim edib. Vardanyanı "Dağlıq Qarabağda erməni müqavimətini" müdafiə edən şəxs kimi qələmə verib. Ancaq qəzetin yanlış və qərəzli mövqeyi, faktları saxtalaşdırması bununla da bitməyib. Azərbaycanın öz suverenliyini təmin etməsini "2023-cü ilin sentyabrında Azərbaycan qoşunlarının işğalı" adlandırıb. Üstəlik, bölgədən guya 120.000 (!) erməninin qaçdığını yazıb.

Yazıda bircə cümlə doğrudur: "Vardanyan Ermənistan sərhədini keçmək istəyərkən həbs edilib".

Qalan bütün "faktlar" feykdir; heç bir həqiqət payı yoxdur. Qarabağdan gedən şəxslərin 120 min nəfər olmadığını hər kəs bilir, ancaq antiAzərbaycan dairələr bu saxta rəqəmi dönə-dönə fırladırlar. "The Washington Post" qəzeti də bu baxımdan istisna deyil. Bu yazısı ilə də qəzet Azərbaycana qarşı ənənəvi qərəzli münasibətini bir daha büruzə verib. Əslində başqa cür ola bilməzdi: bu nəşrin sahibi və redaksiyası son seçkilərdə öz mövqeyini 360 dərəcə dəyişib. Belə bir qəzetin obyektiv mövqe tutmasını gözləmək sadəlöhvlük olardı.

Bizimyol.info

Böyük Britaniya Rusiyanın altı vətəndaşına və iki şirkətinə qarşı sanksiyalar tətbiq edib.

“Report” xəbər verir ki, bu barədə TASS məlumat yayıb.

Onlar kiberməkanda qanunsuz fəaliyyətdə şübhəli bilinir.

Birləşmiş Krallığın Xarici İşlər Nazirliyinin yaydığı siyahıdan məlum olur ki, London Rusiyanın “Zservers” şirkətini zərərli proqramlar vasitəsilə kiberhücumlarda şübhəli bilir.

Qara siyahıya həmçinin “Zservers” şirkətinə məxsus olduğu və onun tərəfindən istifadə edildiyi iddia edilən “Xhost Internet Solutions” provayderi də daxil edilib.

"Rusiya Azərbaycana yönəlik təhdidlərini artırır. Bunun arxasında şimal ölkəsinin hakim elitası daxilində yaranan parçalanma dayanır. Rusiyada qərar qəbul edən səviyyə bir deyil, ya da öz qərarlarını ört-basdır etmək üçün təbliğat baxımından digər kanallardan istifadə edirlər".

Bunu Qaynarinfo-ya açıqlamasında sabiq xarici işlər naziri Tofiq Zülfüqarov son zamanlar Rusiya-Azərbaycan münasibətlərində yaşanan gərginliyi şərh edərkən deyib.

Tofiq Zülfüqarov bildirib ki, indi qeyri-adi bir vəziyyətdir:

Rusiyada qərar qəbul olunma texnologiyası həmişə mürəkkəb olub. Artıq hamı başa düşür ki, AZAL-ın qəzaya uğrayan təyyarəsilə bağlı vəziyyətdən bəzi qüvvələr bəhanə kimi istifadə etməyə çalışırlar. Rusiya ilə Azərbaycan arasında münasibətlərdə nələrin baş verdiyi barədə fikirləşəndə iki əsas səbəb görürəm. Rusiya mürəkkəb proseslər qarşısındadır. ABŞ prezidenti Donald Tramp Rusiya ilə danışıqlar aparır və bu zaman açıq bəyan edir ki, təzyiq etməyə də hazırdır. Bunun nəticəsi olaraq Rusiya elitasında artıq parçalanma yaranıb".

Tofiq Zülfüqarovun fikrincə, bir çoxları fikirləşir ki, artıq Putin erası bitməkdədir:

"Çünki Rusiya mövcud problemlərdən çıxmaq üçün ciddi dəyişikliklər etməlidir. Bu əsasda da rus elitası daxilində qarşıdurma hiss olunur. İstisna etmirəm ki, bu qaşıdurmada Azərbaycanla Türkiyə faktorundan da istifadə olunur. Yəni Azərbaycana edilən təzyiqlər bir növ Türkiyəyə də təzyiqdir. Suriyada da mürəkkəb vəziyyət yaranıb. Burada Türkiyənin Qərbə və Rusiyaya qarşı mövqeyi bir çox hallarda qəbul olunmur. ABŞ, Fransa öz qoşunlarını Suriyada saxlamaqdadır. Əminəm ki, Rusiyada ölkəmizə yönəlik bu sayaq bəyanatlar sadəcə olaraq, Azərbaycana qarşı təzyiq üslubudur. Yaxın gələcəkdə Rusiyada ciddi dəyişikliklər baş verəcək".

Sabiq XİN rəhbəri qeyd edib ki, güclənmiş Azərbaycanla artıq təhdid dililə danışmaq onu edənlərə xeyir gətirməyəcək:

"Rusiya əvvəlki dövrlərdə də Azərbaycana qarşı müxtəlif təzyiq vasitələrindən istifadə edib. Bu özünü xüsusən də çeçen müharibəsi dövründə göstərmişdi. Azərbaycan həmin dövrdə zəif idi. İndi isə ölkəmiz xeyli güclənib. Belə olan halda, Rusiyanın Azərbaycana qarşı təhdid addımlarına keçməsinin şimal ölkəsi üçün heç bir faydası olmayacaq. Bu fikirləri də səsləndirən Putin yox, Təhlükəsizlik Şurası katibinin müavini Dmitri Medvedyevdir. Yəni o, qurumun başçısı deyil. Özü də açıq deyil, hansısa "Telegram" kanalları vasitəsilə bu kimi fikirlər səsləndirir".

Ekspert bildirib ki, Azərbaycan neftinin Novorosiyski limanından ixracının dayandırılması mümkün deyil:

"Çünki Azərbaycanın ixrac üçün yetərincə digər kanalları da var. Bu fikirlər sadəcə olaraq təbliğatı müharibə üçün ortaya atlan arqumentlərdir. Onları ciddi qəbul etmək olmaz".

Türkiyənin İstanbul şəhərinin Sabiha Gökçen hava limanından xeyli sayda uçuş ləğv olunub.

"Yeni Şafak" xəbər verir ki, buna səbəb kimi gözlənilən əlverişsiz hava şəraiti göstərilib.

Bildirilib ki, fevralın 11-i üçün nəzərdə tutulan uçuşların beş faizi, növbəti gün üçün nəzərdə tutulan uçuşların isə on faizi ləğv edilib.

Səfərlərlə bağlı son durumu öyrənmək üçün sərnişinlərə hava yolu şirkətlərinin internet səhifələrini izləmələri tövsiyə olunub.