Kəlbəcər rayonunda 4-ü hərbçi olmaqla 8 nəfər minaya düşüb, onlardan biri şəhid olub

Bu barədə Baş Prokurorluq və Müdafiə Nazirliyinin yaydığı birgə məlumatda bildirilib.

Belə ki, dekabrın 14-də, saat 18 radələrində Kəlbəcər rayonunun Çıraq kəndi ərazisində 8 nəfər şəxsin minaya düşməsi barədə Kəlbəcər hərbi prokurorluğuna məlumat daxil olub.

Aparılmış ilkin araşdırmalarla müəyyən olunub ki, təmir-tikinti işləri ilə məşğul olan şirkətin 4 nəfər əməkdaşı Kəlbəcər rayonunun Çıraq kəndi ərazisində piyada əleyhinə minaya düşüb.

Həmçinin, müəyyən olunub ki, təxliyə ilə bağlı hadisə yerinə yollanan 4 nəfər hərbçi də minaya düşüb, onlardan 3-ü müxtəlif dərəcəli bədən xəsarətləri alıb, 1-i isə həlak olub.

Hazırda faktla bağlı Kəlbəcər Hərbi Prokurorluğunda araşdırma aparılır.

Rusiya sülhməramlılarının müvəqqəti nəzarətində olan Şuşa-Xankəndi yolunda QHT nümayəndələri, ekofəallar və könüllülərin iştirakı ilə keçirilən etiraz aksiyası davam edir.

Aksiya iştirakçılarının təhlükəsizliyini Azərbaycan Daxili İşlər Nazirliyi Daxili Qoşunlarının (DQ) hərbçiləri igidliklə qoruyurlar.

Bunu aksiyanın ilk günündə (dünən, dekabrın 12-də) Rusiya sülhməramlıları “Report” İnformasiya Agentliyinin avtomobilinin qarşısını kəsərək əməkdaşları ilə kobud davranarkən DQ hərbçilərinin köməyə gəlməsini özündə əks etdirən videokadrlardan da görmək olar.

Biz - həm media əməkdaşları, həm də sıravi insanlar olaraq DQ hərbçilərinin hərəkətlərindən qürur duyduq və duyuruq.

Bu, həm də bizi arxayın edir ki, Azərbaycan jurnalistləri heç nədən çəkinmədən, istənilən şəraitdə öz fəaliyyətini uğurla davam etdirə bilərlər. Çünki ölkəmizin belə oğulları – hərbçiləri var. (oxu.az)

Bu gün səhər saatlarında Rusiyanın Bryansk vilayətinin Klints şəhəri Ukrayna hərbçiləri tərəfindən raket atəşinə tutulub.

Bu barədə Rusiya Teleqram kanalları məlumat yayıb.

Məlumata görə, hərbi hissəyə endirilən zərbələr nəticəsində Rusiya ordusuna məxsus bir neçə texnika məhv edilib.

Rusların canlı qüvvə itkiləri barədə məlumat verilməyib.

Qeyd edək ki, Ukrayna sərhədindən Bryansk şəhərinin özünə məsafə hava yolu ilə 154 km-dir.

ABŞ Konqresi 2023-ci il üçün hərbi büdcəni razılaşdırıb. Konqresin hərbi büdcəsi Nümayəndələr Palatası ilə Senatın komissiyalarında qızğın müzakirələrdən keçib. ABŞ 2023-cü ildə hərbi məqsədlər üçün 858 milyard dollar xərcləyəcək. Bu astronomik məbləğdir. Misal üçün Amerikanın builki hərbi büdcəsi 778 milyard dolar civarında idi.
Hərbi büdcə imzalanmaq üçün prezident Co Baydenə göndərilib. Ukrayna müharibəsi və Rusiyanı dayandırmaq baxımından Amerikanın gələn il üçün hərbi xərclərinin artırılması nəzərdə tutulub. Hərbi büdcənin 800 milyon dolları Ukraynanın təhlükəsizliyinə xərclənəcək. Əvvəlki büdcədə 500 milyon dollar nəzərdə tutulmuşdu, 300 milyon dollar əlavə edilib. Amerikanın Avropadakı hərbi varlığına 6 milyard dollar ayrılacaq, bu əvvəlki büdcə layihəsindən 2 milyard dollar artıqdır.
Konqress Qərb ölkələrinin Rusiyadan enerji asılılığını azaltmaq, sanksiyaların artırılması və Rusiyanı “böyük iyirmilərdən” çıxarılması yolları üzərində də düşünür. Kreml Konqresin gərginliyi artıran sənədini tənqid edib.
Yeni hərbi büdcəyə görə texnoloji xərclər artırılacaq, yeni təyyarələr və gəmilər üzərində çalışmalar davam edəcək. Yeni nəsil bombardmançı təyyarələr istehsal ediləcək. ABŞ müdafiə naziri Loyd Ostin “B-21 Raider” tipli təyyarə istehsalını tarixi hadisə adlandırıb. Bu təyyarələr dünyanın istənilən nöqtəsinə adi və nüvə başlıqlı raketlər daşımaq imkanına malikdirlər. Digər tərəfdən yeni təyyarələr “Stels” texnologiyası kimi hava hücumundan müdafiə sistemlərinin radarlarına düşmür.
ABŞ hərbi büdcəsinin artımı yalnız Rusiyanın işğalçı siyasəti ilə bağlı deyil. Vaşinqton Çini də durdurmaq istəyir. ABŞ Hind-Sakit okean bölgəsindəki xərclərini 11 milyard 500 milyon dollar civarında planlaşdırıb. Bu həm Çini durdurmaq, həm də Amerikanın bölgədəki müttəfiqlərinə dəstək üçün nəzərdə tutulub. Bu çərçivədə Amerika Tayvanın təhlükəsizliyinin gücləndirilməsi üçün 5 ildə 10 milyard dollar xərcləyəcək.
“Atlas” Araşdırmalar Mərkəzi
Teref.az

Türk Ordusu Misirdən Türkiyəyə, oradan da Yunanıstana keçmək istəyən 3 terrorçunu qandallayıb.

Bu barədə Türkiyə Silahlı Qüvvələri məlumat yayıb.

Bildirilir ki, terrorçulardan 2-si PKK terror qruplaşmasının, digəri isə FETÖ-nün üzvüdür.

Naxçıvanda hərbi xidmət keçən bir qrup zabit və MAXE “Gündəlik Naxçıvan” vasitəsi ilə ictimaiyyətə və DTX əməkdaşlarına müraciət ünvanlayıb.

Bu müraciət vasitəsi ilə hərbçilər, ictimaiyyəti Naxçıvan Əlahiddə Ümumqoşun Ordusundakı korrupsiya, rüşvət və özbaşınalıq halları ilə məlumatlandırmaq istəyirlər. Onlar həmçinin DTX-dan bu orduda yoxlamalara başlayıb, baş verən qanunsuzluqlara son qoymalarını xahiş edirlər:

“Biz, Naxçıvanda hərbi xidmət edən zabitlər və digər rütbəli hərbi qulluqçular Azərbaycanı canımız qədər sevirik və vətən uğrunda canımızdan keçməyə hazırıq. Bunu, bizim 2-ci Qarabağ Müharibəsindəki iştirakımız da göstərdi. Lakin, Əlahiddə Ümumqoşun Ordusunun komandanı general-polkovnik Kərəm Mustafayev bizimlə bir hərbçi kimi yox, öz şəxsi mülkiyyəti kimi davranır, bütün hüquqlarımız tapdayır, maaşımızı kəsir, bizim qul kimi işlədilməmizə şərait yaradır. Naxçıvanda aparılan bütün söküntü və park tikintisi işlərini biz hərbçilərə gördürüb, büdcədən ayrılan milyonları mənimsəyirlər. Bunun üçün zabit, MAXE və əsgərlərdən qanunsuz olaraq, xüsusi briqadaları yaradılıb. Hər gün yüzlərlə hərbçi mülki formada tikintilərdı qul kimi işlədilir. Onların gördüyü iş mülki şəxslərin adına sənədləşdirilir və bu maaşlar mənimsənilir. Bu işlərə generalın qardaşı Nemət Mustafayev rəhbərlik edir.

Kərəm Mustafayev bütün ordu heyətini heç bir hərbi rütbəsi və savadı olmayan, tərbiyəsiz hərəkətləri ilə tanınan qardaşı Nemətin tabeliyinə verib. Nemət Mustafayev orduda qeyri-rəsmi olaraq, ikinci sözükeçən adamdır. Rütbə və vəzifəsindən asılı olmayaraq, bütün hərbçilər onun qarşısında farağat dayanmağa, ona itaət etməyə məcbur edilir. Nemət Mustafayev istədiyi vaxt hərbi hissələrə girir, ona tabe olmaq istəməyən yüksək rütbəli zabitləri tərbiyəsiz sözlərlə söyür, təhqir edir, üzünə tüpürür, döyür, həbs etdirir, bizim hərbçi qürurumuz tapdalayır. Bu cür ağlasığmaz özbaşınalığa şərait yaradan komandan Kərəm Mustafayevdir. Axı, biz qalib ordunun əsgərləriyik. Bizimlə bu cür davranmaq ordumuzun adına ləkədir.

Bundan əlavə orduda aşağıdakı rüşvət və korrupsiya halları mövcuddur:

– Hərbi hissələrdəki bütün texnikalar hərbçilərin öz hesabına təmir edilir. Bunun üçün büdcədən ayrılan milyonlarla manat isə mənimsənilir. Hərbi hissələrə Bakıdan verilən ehtiyat hissələr Nemət Mustafayev vasitəsi ilə bazarlara çıxarılır. Tabeliyində olan texnikası xarab olan hərbçilərdən tələb olunur ki, həmin hissələri öz pullarıyla alıb, texnikanı təmir etdirsinlər. Buna maddi imkanı çatmayan hərbçilər kredit götürməyə məcbur olurlar.

– Hərbi şəhərciklərdəki evlər rüşvətlə satılır, kirayə pulları isə mənimsənilir.

– Məzuniyyət pulları mənimsənilir.

Siyahını uzatmaq da olar. Ordumuzun hərbi sirrini yaymamaq üçün, bir çox ciddi korrupsiya və rüşvət hallarını qeyd etmək istəmirik. Əgər araşdırılma başlayarsa, hər şeyi danışmağa hazırıq.

Az qala hər bir hərbçi yuxarıda sadaladığımız və sadalamadığımız özbaşınalıqlara dözməyərək, intihar edir. Onların ailələri təhdid altında susmağa məcbur edildiyindən, bu intiharlar ört-basdır edilir. Biz ümid edirik ki, hazırda Naxçıvanda yoxlama aparan DTX, Əlahiddə Ümumqoşun Ordusundakı bu özbaşınalıqlar da araşdıracaq, cavabdeh şəxslər layiqli cəzasını alacaq, bu ləkə Azərbaycan ordusunun üzərindən götürüləcək”.

“Ermənistan bizim KTMT üzrə müttəfiqimiz və Transqafqazda əsas strateji tərəfdaşımızdır. Biz regionda sabitliyin qorunub saxlanmasında son dərəcə maraqlıyıq və bunun üçün əlimizdən gələni edirik. Biz ikitərəfli əməkdaşlığın inkişafına və Ermənistan Silahlı Qüvvələrinin potensialının artırılmasına yardıma xüsusi əhəmiyyət veririk”.

Bu sözləri Rusiya müdafiə naziri Sergey Şoyqu Ermənistanın müdafiə naziri Suren Papikyanla görüşdə deyib.

Bəyanatda yeni bir məsələ yoxdur, Rusiya və Ermənistan hərbi-siyasi müttəfiq olaraq qalmaqda davam edirlər. Rusiya 44 günlük müharibədə hərbi potensialının üçdə ikisini itirmiş Ermənistan ordusuna nə qədər dəstək olmaq iqtidarındadır, bu, başqa müzakirənin mövzusudur. Çünki Ukraynaya qarşı işğalçı müharibədə böyük itkilər vermis rus ordusunun özü ciddi şəkildə silah-sursat çatışmazlığından əziyyət çəkir. Media dəfələrlə yazıb ki, Ukraynada məhv edilən arsenalın yerini doldurmaq üçün postsovet ölkələrindəki hərbi bazalardan texnika, raketlər və hərbçilər daşınır. Məsələn, Tacikistandakı hərbi bazanın böyük bir hissəsi Ukraynaya göndərilib.

Amma Ermənistana Şoyqunun ifadə etdiyi dəstək Moskvanın regiondakı 44 günlük müharibədən əvvəlki hərbi-siyasi balansı qoruyub saxlamaq niyyətində olduğunu göstərir. Ermənistan ordusunun modernizasiyası üçün Gümrüdəki hərbi bazanın imkanlarından istifadə edilə bilər. Habelə Rusiyadan cəlb olunmuş ucuz kreditlər hesabına digər “müttəfiq ölkələrin” hərbi sənaye kompleksinin müştəriləri sırasında durması da gözləniləndir. Bugünlərdə Ermənistan Təhlükəsizlik Şurasının katibi Qriqoryan bəyan etmişdi ki, ordunun hərbi gücünü bərpa etmək üçün silah bazarları axtarılır.

Bu kontekstdə İran Ermənistanı dirçəldib Azərbaycanla güc balansını bərpa etməsində ən maraqlı ölkədir. Artıq media da bu barədə yazıb: İran artilleriya, pilotsuz uçuş aparatları, habelə orta mənzilli raketləri Ermənistana ötürə bilər. Bu barədə iki ölkə arasında məxfi danışıqların aparılması da məlumdur.

İran habelə Ermənistana silah tranzitində də mühüm rol oynaya bilər. Məsələn, Hindistandan alınmış haubitsaların, 120 millimetrlik topların və başqa avadanlıqların Ermənistana məhz İran vasitəsi ilə çatdırılması barədə xəbərlər var.

Ermənistanın hərbi imkanlarını gücləndirmək iqtidarında olan və buna çalışan daha bir ölkə Fransadır. Bu sahədə Makron hakimiyyətini ancaq İran rəhbərliyi ilə müqayisə etmək olar. Rəsmi Paris açıq şəkildə Ermənistana siyasi dəstək verir və fransız siyasətçilər İrəvanın 44 günlük müharibədə dağılmış hərbi potensialının bərpasına çalışdıqlarını gizlətmirlər. Ötən ay xarici media Fransa silah sənayesi məhsullarının Şərqi Avropa ölkələri limanları vasitəsi ilə Ermənistana daşınmaq planları barədə yazmışdı. Belə ki, müasir silah sistemləri, artilleriya vasitələri, gecə döyüşləri üçün xüsusi cihazların Rumıniya limanından Gürcüstanın Batum limanına, oradan Ermənistana çatdırılması planları qeyd olunmuşdu. Azərbaycan rəhbərliyinin bu tədarükün əngəllənməsi üçün əlindəki təzyiq mexanizmlərini işə salması da yazılan informasiyalar sırasında yer almışdı.

Fransa təkcə öz hərbi təyinatlı məhsullarını deyil, həmçinin böyük maliyyə vəsaitləri ayırmaqla üçüncü ölkələrdə istehsal olunmuş döyüş vasitələrinın alınmasını da təşkil edə bilər.

Bundan başqa Ermənistan ordusunun yenidən komplektləşdirilməsi işində də fransız hərbi təlimatçılarının xüsusi rol oynadığı haqda məlumatlar var. Ola bilsin, rusiyalı nazir S.Şoyqunu narahat edən məqamlardan biri də bununla bağlıdır. Hər halda Rusiya Ermənistan hərbiyyəsinin fransızların nəzarətinə keçməsində maraqlı deyil.

44 günlük müharibədən sonra uzun müddət davam etmiş daxili siyasi böhranı sabitləşdirməyə nail olan Paşinyan hökumətinin əsas qayğısı hərbi itkilərin yerini doldurmaqdır. Hökumət bəyan edib ki, peşəkar ordu sisteminə keçməyə hazırlaşır.

Qeyd olunduğu kimi, bu işdə azı Ermənistan hökuməti qədər maraqlı ölkələr var. Ona görə də Azərbaycan Silahlı Qüvvələrində aparılan islahatlar, Türkiyə ordu modelinə keçid sürətləndirilməlidir. Ermənistan nə qədər zəif olsa da, onun Azərbaycana qarşı düşmən mövqedə dayanan tərəfdaşları var və bu amil güc faktorunu daim hazır vəziyyətdə saxlamağı diqtə edir.

Rasim Əliyev

“AzPolitika.info”

ABŞ iddia edir ki, İranın Ukraynada müharibə aparmaq üçün Rusiyaya silah satışı müqabilində Moskva Tehrana görünməmiş səviyyədə hərbi-texniki dəstək verir.

Məlumata görə, bu barədə ABŞ prezidenti Co Baydenin administrasiyasındakı mənbə bildirib.

İddia olunur ki, Rusiya İrana qabaqcıl hərbi texnika və komponentlər, xüsusilə helikopterlər və hava hücumundan müdafiə sistemləri verə bilər.

2022-ci ilin yazında iranlı pilotlar Rusiyada Su-35 qırıcı təyyarəsini idarə etmək üçün təlim keçiblər ki, bu da ABŞ rəsmilərinin fikrincə,
Bayden administrasiyası həmçinin hesab edir ki, Rusiya İranla silahların hazırlanmasında, xüsusən də Rusiya ərazisində dronların birgə istehsal xəttinin yaradılması kontekstində əməkdaşlığa can atır.

“Bu tərəfdaşlıq təkcə Ukrayna üçün deyil, həm də İranın regiondakı qonşuları üçün təhlükə yaradır. Biz bu məlumatı Yaxın Şərqdəki və dünyadakı tərəfdaşlarımızla paylaşmışıq”, - adının çəkilməsini istəməyən ABŞ rəsmisi deyib.

Tehran və Moskva arasındakı tərəfdaşlığa qarşı çıxmaq üçün ABŞ “İran-Rusiya hərbi əməkdaşlığını müzakirə etmək üçün həmfikir ölkələrin müəyyən qrupunu bir araya gətirmək variantlarını nəzərdən keçirir” və Rusiya ilə İranın arasında texnikanın, həmçinin maddi vəsaitlərin transferinə mane olmaq məqsədilə digər ölkələrlə işləyir.

“Biz İrana məxsus pilotsuz təyyarələrin Ukraynada istifadə üçün Rusiyaya təhvil verilməsində iştirak edən qurumlara qarşı sanksiyalar tətbiq edirik. İranın həssas texnologiyaya çıxışını məhdudlaşdırmaq üçün ixrac nəzarəti ilə bağlı atacağımız əlavə addımları qiymətləndiririk”, - mənbə əlavə edib. (Mənbə: eurointegration.com.ua)