Təmir-tikinti işləri ilə məşğul olan "Promor" Məhdud Məsuliyyətli Cəmiyyəti növbəti dəfə Dövlət Turizm Agentliyinin (DTA) elan etdiyi tenderin qalibi olub.

Pravda.az xəbər verir ki, şirkət bu dəfə agentliyin elan etdiyi tender üzrə Xınalıqdakı tarixi yaşayış evlərinin bərpası ilə bağlı layihə-smeta sənədlərini hazırlayacaq.

Belə ki, bir müddət əvvəl DTA “Xınalıq və Köç yolu” Dövlət Tarix-Mədəniyyət və Etnoqrafiya Qoruğunun Quba rayonu, Xınalıq kəndində yerləşən tarixi yaşayış evlərinin bərpası üçün layihə smeta sənədlərinin hazırlanması ilə bağlı tender elan edib. Agentlik tender elan edən zaman layihə smeta sənədlərinin 400 min manata başa gələcəyini ehtimal edib. Amma tenderin sonunda "Promor" şirkəti ilə 257 830 manatla razılaşıblar.

İndi şirkət layihə smeta sənədlərini hazırlayacaq. Növbəti mərhələdə isə DTA bu dəfə bərpa işlərinin reallaşdırılması ilə bağlı tender elan edəcək. Ehtimal olunur ki, DTA Xınalıqdakı tarixi yaşayış evlərinin bərpası işlərini də elə "Promor" şirkətinə həvalə edəcək. Çünki 2020-ci ildə yaradılan "Promor" şirkəti 2022-ci ildə DTA-nın elan etdiyi tenderin ilk dəfə qalibi olub. Həmin vaxtdan bəri agentliyin "sevimli şirkəti"nə çevrilib. Şirkət ilk dəfə agentliyin Kulinariya Mərkəzinin əsaslı təmiri işlərini həyata keçirməyə başlayıb. Bu zaman 618 859,76 manatlıq müqavilə bağlanıb. Daha sonra mərkəzdəki əsaslı təmir üzrə qalıq işlərinin davam etdirilməsi ilə bağlı agentliyin elan etdiyi tenderin qalibi yenə də "Promor" şirkəti olub. Bu dəfə isə 638 675,59 manatlıq müqavilə bağlanıb.

Eyni zamanda, "Promor" şirkəti DTA-nın Abşeron rayonu ərazisində yerləşən Palçıq Vulkanlarının ətrafında müasir turizm infrastrukturunun xarici su təchizatı işlərinin satın alınması ilə bağlı elan etdiyi tenderin qalibi olub və 429 671,37 manatlıq müqaviləyə imza atılıb.

Qeyd: "Promor" şirkəti 2020-ci ilin iyulun 17-də dövlət qeydiyyatına alınıb. Qanuni təmsilçisi MMC-nin direktoru Həsən Bəkirovdur.

Sentyabrın 1-də keçiriləcək növbədənkənar partlament seçkilərində yeni simaların olacağı şübhəsizdir. Ancaq bir necə gün öncə hakim Yeni Azərbaycan Partiyasının siyahısı açıqlananda çoxları yeni adları görüb təəccübləndi. Çünki hakim partiyanın açıqladığı siyahıda olduqca ilginc, keçmişi qaranlıq olan sabiq məmurlar da yer almışdı.

Belə ki, hakim partiyanın siyahısında yer alan Dövlət Neft Şirkətinin sabiq vitse-prezidenti Bədəl Bədəlovun adı hər zaman müxtəlif qalmaqallarda hallanıb. Belə bir şəxsin namizədliyinin Azərbaycanın həssas bölgələrindən biri olan 96 saylı Goranboy – Naftalan seçki dairəsindən irəli sürülməsi birmənalı qarşılanmadı. Sosial şəbəkələrdə Bədəl Bədəlovun əməlləri barədə yazılar dərc edilməyə başladı. Qeyd edək ki, Bədəl Bədəlov ötən ilin prezidentin 28 iyul 2023-cü il tarxili sərəncamı ilə vəzifəsindən azad edilib.

Bir sözlə 1 ildir ki , gözə görünməyən Bədəl Bədəlovu kimlərsə siyasət meydanına atmağı bacarıb.

Hər zaman Bədəl Bədəlov medianın diqqət mərkəzində olub. Amma heç vaxt sabiq vitse-prezident yaxşı işləri ilə diqqət mərkəzində olmayıb. Ya oğlunun qalmaqallı hərəkətləri, ya da çoxsaylı əmləklarını siyahısı diqqət çəkib.

Dövlət Neft Şirkətində (SOCAR) sosial məsələlər üzrə vitse-prezident olan müddət ərzində Bədəl Bədəlov özünə kifayət qədər var dövlət yığa bilib.

Bədəl Bədəlov 2011-ci ildən bu vəzifəni daşıyıb və 12 illik vitse-prezidentlik dövründə Dövlət Neft Şirkətində (SOCAR) ölkəmiz üçün heç bir lazımlı lahiyə həyata keçirə bilməyib.

Bədəl Bədəlov üzdə olmayan ən varlı oliqarx məmurlardan biri olub.

Bədəl Bədəlovun təkcə Bakıda onlarla bahalı əmlakı var. Paytaxtın “Varovski” deyilən və varlılar məhəllləsi kimi tanınan ərazidə dəyəri milyonlarla manatla ölçülən bir neçə villası var. Yəqin ki, Bədəl Bədəlov bu villaları, həmçinin Bakıdakı bahalı əmlaklarını əmək haqqı ilə almayıb.

Bədəl Bədəlovun ailsəinə məxsus olan “Naftalan Mərkəzi Sanatoriyası” MMC-ni oğlu Elvin Bədəlov idarə edir. Nizamnamə kapitalı 50 manat olan MMC-nin qanuni təmsilçisi Elvin Bədəlovdur. Xatırladaq ki, bu məlumat ictimailəşən sonra sanatoriyanın qanuni təmsilçisi tez-tələsik dəyişdirildi.

Onun digər oğlu Elçin Bədəlovun dəbdəbəli həyat ytərzi hər zaman diqqət mərkəzində olub. Onun bahalı avtomobillərlə fotoları sosial şəbəkələrin “bəzəyinə” çevrilib.
Aktualinfo

Qarabağda milyonluq tenderlərin qalibi olan şirkət Layihə İnstitutunun direktoruna aid imiş…

DogruXeber.az: - Azərbaycanda şəhər və kəndlərin qurulması, eləcə də mövcud şəhər və kəndlərdə layihələndirmə işlərinin aparılması məqsədilə 2022-ci ildən indiyədək 33 tender elan edilib.

Dövlət satınalmaları portalı vasitəsilə həyata keçirilən bu tenderlərin ümumi dəyəri 43 milyondan çox olub. Tenderlər daha çox işğaldan azad edilmiş ərazilərin yenidən qurulması məqsədilə həmin ərazilərdə baş tutub.

Tenderləri udan şirkətlərdən biri “Arxin-M LTD” MMC şirkətidir. Sözügedən şirkət 4 tender udaraq dövlət qurumlarından 5 milyon manat dəyərində sifariş alıb.

Milyonluq tenderlərin qalibi olan bu şirkət 1998-ci ildə yaradılıb, nizamnamə kapitalı isə cəmi 20 manatdır. Şirkətin hazırki qanuni təmsilçisi Niftalı Tağı oğlu Abbasovdur. Şirkət Bakı şəhəri Nizami rayonu, Elşən Süleymanov, ev 137, m. 23 ünvanında yerləşir.

“Arxin-M LTD” MMC şirkətinin əsl sahibi kimdir?

Dövrü mətbuatda “Arxin-M LTD” MMC şirkəti ilə “Projekt LTD” MMC adlı şirkətin adı daim yanaşı çəkilir, hər iki şirkətin də müxtəlif dövlət qurumlarının layihələrində iştirak etdiyi, tenderlər qazandığı açıqlanır. Beynəlxalq Şəffaflıq təşkilatının dərc etdiyi hesabatda da, bu hər iki şirkətin bir-biri ilə bağlı olması vurğulanıb.

“Azərdövlətlayihə” DBL-nin direktoru öz şirkətini “tender çempionu” etdirir? -İLGİNC FAKTLAR
İqtisadiyyat Nazirliyi yanında Dövlət Vergi Xidmətinin Kommersiya qurumlarının dövlət reyestrinin məlumatlarına görə, “Projekt LTD” MMC 5 fevral 2003-cü ildə qeydiyyata alınıb. MMC-nin qanuni təmsilçisi isə Samirə Tahir qızı Bayramovadır.

Diqqətçəkən məsələ odur ki, hər iki şirkət də yarandığı zaman eyni ünvanda qeydiyyatdan keçib. Seçici siyahısına görə, bu ünvan elə 2012-ci ildə şirkətin qanuni təmsilçisi olan Müsəddin Əhməd oğlu Namazovun rəsmi qeydiyyatda olduğu mənzildir: Nizami rayonu, E. Süleymanov küçəsi, ev 137, mənzil 23.

“Azərdövlətlayihə” DBL-nin direktoru öz şirkətini “tender çempionu” etdirir? -İLGİNC FAKTLAR
Toplanan faktlardan belə nəticəyə gəlmək olur ki, hər iki şirkət də bu şəxsindir, hazırki qanuni təmsilçilər isə proksi şəxslər, yəni əsas adamı gizləmək üçün rəsmiləşdirilən şəxslərdir.

Bəs Musəddin Namazov kimdir?

4 avqust 1963-cü il təvəllüdlü Musəddin Əhməd oğlu Namazov Gürcüstan Respublikasının Saqareco (Qaraçöp) bələdiyyəsinin Düzəyrəm kəndində anadan olub. O, 2012-2014-cü illərdə Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyindəki “Azərdövləttikintilayihə” DLİ-nin direktoru olub.

İlham Əliyevin 2012-ci il tarixli sərəncamı ilə Azərbaycan Respublikasında inşaat sahəsində səmərəli fəaliyyətinə görə “Tərəqqi” medalı ilə təltif edilib, həmçinin memarlığın inkişafında xidmətlərinə görə “Əməkdar Memar” fəxri adı alıb. 2014-ci ildən indiyə kimi “Azərdövlətlayihə” DBL İnstitutunun direktorudur. 80 ildən artıq inşaat idarəsi kimi təsis edilmiş institut, hazırda dövlət obyektlərinin layihələndirilməsi üçün əsas qurumlardan biridir.

Musəddin Namazovun şirkətləri hansı tenderlərlə nə qədər vəsaitlər udub?

Azərbaycan Respublikası Dövlət Şəhərsalma və Arxitektura Komitəsinin reyestr məlumatlarına əsasən, böyük şəhərlərin baş planının hazırlanması üzrə müqavilələrin bağlandığı “Arxin-M LTD” MMC şirkəti indiyə qədər milyonlarla dəyərində olan 52 layihənin, “Projekt LTD” MMC isə 9 layihənin qalibi olub və tikinti həyata keçirib.

“Azərdövlətlayihə” DBL-nin direktoru öz şirkətini “tender çempionu” etdirir? -İLGİNC FAKTLAR
İlham Əliyevin də açılışını etdiyi jurnalistlər üçün nəzərdə tutulmuş, ancaq şəhid ailələrinə verilmiş üçüncü binanın layihə-smeta sənədlərini də məhz “Arxin-M LTD” MMC şirkəti icra edib .

Bakıda Cənubi Qafqazın ən hündür göydələni olacaq “Baku Tower”in layihəsi də “Arxin-M Ltd” tərəfindən hazırlanıb.

Dövlət satınalmalar reyestrinə görə isə 2017-2018-ci illərdə “Arxin-M LTD” 1,66 milyon manatlıq tenderlərdə qalib gəlib. Reyestrə görə, şirkət 2020-2022-ci illərdə 850 min manat dəyəri olan tenderlərdə qalib elan olunub.

“Arxin-M LTD” MMC şirkətinin adı “cinayət işi”ndə və korrupsiya iddiası:

Baş prokuror yanında Korrupsiyaya qarşı Mübarizə Baş İdarəsinin 2021-ci ilin hesabatında qeyd olunub ki, mətbuat işçiləri üçün inşa edilmiş yaşayış binalarının tikintisi zamanı törətdilən qanunazidd əməllər nəticəsində dövlətə məxsus pul vəsaitinin mənimsəmə yolu ilə talanmasında ittiham olunan şəxslərdən biri də “Arxin-M LTD” MMC-nin Memarlıq şöbəsinin müdiri Telman Nurməhəmməd oğlu Tahirov da təqsirləndirilib.

Prezident İlham Əliyev nə deyir?

Ötən ay jurnalist Fatimə Kərimovanın – “Qarabağdakı layihələrlə bağlı bir çox detallar şəffaf deyil, həm ictimaiyyət, həm jurnalistlərin bu məlumatlara əlçatanlığı kifayət qədər deyil. Tenderlərdə iştirak edən şirkətlər və digər şirkətlərin seçilməsi və sair kimi detallar niyə qapalıdır və niyə bu detallar bizə açıq deyil?” sualına İlham Əliyevin cavabı belə olub:

“Qarabağda və Şərqi Zəngəzurda bütün bərpa, yenidənqurma işləri maksimum şəffaf şəkildə aparılır. Ayrılan vəsaitlə bağlı, müntəzəm olaraq ictimaiyyətə, o cümlədən media nümayəndələrinə məlumat verilir və sirr deyil. Tender prosedurlarına tam əməl edilir. Mən sözün düzü bilmirəm, sizdə bu məlumat haradandır. Yəqin ki, siz bunu hansısa dəqiqləşdirilməmiş mənbədən götürürsünüz”.

Həmçinin ötən illərdə İlham Əliyev yerli televiziya kanallarına müsahibəsi zamanı bunları bildirib :

“Hər şey əsaslı olmalıdır, bütün inşaat işləri şəffaf, tender əsasında aparılmalıdır. Xüsusi göstəriş verilib, maksimum şəffaflıq təmin edilməlidir. Əgər hər hansı bir xoşagəlməz halla üzləşsək, cəzamız çox sərt olacaq, bunu hər kəs bilməlidir və bilir”.

Bəs qanunlar nə deyir?

Azərbaycan qanunvericiliyinə əsasən icraedici orqan rəhbərlərinin, dövlət məmurlarının, deputat və onun ailəsinin şəxsi bizneslə məşğul olması qadağandır.

2012-ci ildən etibarən Azərbaycan hökuməti “Kommersiya sirri haqqında” qanun layihəsinə dəyişiklik edərək şirkət təsisçisinin adını kommersiya sirri hesab edir. Ona görə də, jurnalistlər şirkətlərin səhmdarlarının kim olduğunu tapa bilməyib.

Amma toplanılan faktlar bu şirkətlərin Musəddin Namazovla əlaqəsi olduğunu göstərir.

Korrupsiyaya qarşı mübarizə haqqında Azərbaycan Respublikasının qanununa görə isə “statusundan, təmsil etdiyi orqanın (qurumun) statusundan, vəzifə səlahiyyətlərindən və ya həmin status və səlahiyyətlərdən irəli gələn imkanlardan istifadə etməklə maddi və sair nemətlərin, imtiyazların və ya güzəştlərin əldə edilməsi məqsədilə fiziki və hüquqi şəxslərə sahibkarlıq fəaliyyətini həyata keçirməkdə, eləcə də subsidiyalar, subvensiyalar, dotasiyalar, kreditlər və digər güzəştlər alınmasında qanunsuz kömək etmək Korrupsiya ilə əlaqədar hüquqpozma hesab olunur”.

Musəddin Namazovun cavabı

“Azərdövlətlayihə” Azərbaycan Dövlət Baş Layihə İnstitutunun direktoru, dövlət məmuru statusunda olan şəxsin, proksi şirkətlər açıb, dövlətin ən vacib qurumlarının, dövlət əhəmiyyətli layihələrin tenderlərini qazanması nə qədər qanunauyğundur?

Meydan TV əməkdaşı bu suallara cavab tapmaq üçün əməkdar memarın özü ilə əlaqə saxlayıb. O isə “Mənə niyə zəng etmisiniz? Mənə zəng vurmayın xahiş edirəm”, – deyərək telefonu qapadıb.

Meydan TV əməkdaşı daha sonra direktorun köməkçisi Orxan İsmayılovla əlaqə saxlayıb. O, jurnalistə şirkətlərin Musəddin Namazovla heç bir əlaqəsinin olmadığını bildirib:

“Bununla bağlı nə işıqlandırmaq və yazmaq fikriniz varsa, nə istəyirsinizsə edə bilərsiniz. Diqqətinizə onu da çatdırım ki, Musəddin müəllim dövlət məmuru deyil”.//MeydanTV

"Dövlət Gömrük Komitəsinin Aksizli mallar üzrə Baş Gömrük İdarəsinin rəisi, general-mayor Vəzir Həsənovun 04.12.2023 tarixli 3-33-3300/2-B-000036/1-10/2023 nömrəli və Gömrük Komitəsinin "Azərterminalkompleks" Birliyinin direktor müavini, direktor vəzifəsini müvəqqəti icra edən Kənan Aşurlunun 06.12.2023 tarixli 3-33-5600/2-000976/2023 nömrəli cavablarından görünür ki, məndən əlavə 100 manat alan qurum özünü gömrük orqanına məxsus olduğunu göstərsə də, əslində adi dayanacaq xidməti göstərir və gömrük orqanlarına heç bir aidiyyəti yoxdur"

"Təzadlar"a Bakı şəhər sakini Bağırzadə Anar Sahib öğlunun Azad İstehlakçılar Birliyinin (AİB) sədri Eyyub Hüseynova ünvanladığı şikayət ərizəsinin surəti daxil olub.

A.Bağırzadə yazır:

"Şəxsi istifadəm üçün xaricdən daşıyıcı şirkət tərəfindən Azərbaycana gətirdiyim nəqliyyat vasitəsi gömrük rəsmiləşdirilməsi üçün 18.10.2023-cü il tarixində müvafiq orqana təqdim edilib. Bu tarixdən öncə yolunu gözlədiyim nəqliyyat vasitəsinin gəlib-gəlmədiyini öyrənmək məqsədilə gömrük ərazisindəki dayanacaqlara tez-tez baş çəkirdim. Dayanacaqlarda olduğum zaman orada göstərilən xidmətlərə dair informasiya lövhəsi olmadığı üçün işçilərdən əraziyə aid rüsumları soruşdum. Bir günü 10 manat olduğunu dedilər. Ona görə də avtomobilimi götürəcəyim gün xərclərimi əvvəlcədən hesablayıb gömrük və DYP-dəki işlərimi bitirib dayanacağa yaxınlaşdım.

24.10.2023 tarixində saat təxminən 15:30 radələrində dayanacaqda 6 gün üçün 60 manat ödəniş edərkən xəzinədar əlavə 100 manat da ödəyəcəyimi bildirdi. Xəzinədardan əlavə 100 manatı hansı xidmətin müqabilində ödəməli olduğumu soruşdum. O, cavabında bildirdi ki, əlavə məlumatı dayanacağın ərazisindəki 4-cu otaqdan öyrənə bilərəm. 4-cu otaqda özünü dayanacağın rəsmisi kimi təqdim edən şəxs də nəyə görə 100 manatı ödəməli olduğumu izah edə bilmədiyinə görə xahiş etdim ki, bununla bağlı yazacağım ərizəni qəbul etsin. Dayanacağın həmin səlahiyyətlisi mənə ərizəni Avtomobil Gömrük Terminalının rəhbərliyinin adına yazdırdı. Ərizə yazsam da, o, əlavə 100 manatı ödəməsəm avtomobilimin orada girov qalacağını bildirdi. Buna baxmayaraq, ərizəmdə mənə məxsus məlumatları qeyd edib, xahiş etdim ki, avtomobilimi girov saxlamasınlar və 100 manatı nəyə görə ödəməli olduğumu yazılı izah etsinlər, hüquqşünaslarla məsləhətləşim, əgər qanunudirsə, ödəyərəm. Ancaq heç nəyə baxmayaraq avtomobilimi girov saxlamağa qərar verdilər. Bu barədə DİN-in 102 xidmətinə iki dəfə müraciət etdim. Bir müddət sonra yaxınlarımın vasitəsilə məcburi 100 manatı ödəyib avtomobilimi girovluqdan azad etdik.

Heç bir xidmət göstərmədən pul tələb etmək, tələb edilən ödəniş üçün rəsmi açıqlama verməmək, ərazi üzrə göstərilən xidmətlərə dair qiymət lövhəsi vurmamaq, ödənişin açıqlaması tələb edənin əmlakını girov götürmək hüququmun pozulmasıdır. Dayanacağın fəaliyyəti və qeyri-qanuni əməllərinə görə Daxili İşlər Nazirliyinə vəİqtisadiyyat Nazirliyi yanında Antiinhisar və istehlak Bazarına Nazarət Dövlət Xidmətinə müraciət etdim.

Araşdırmalar zamanı məlum oldu ki, məndən qəbz üzrə ödənişləri alan şirkət VÖEN:1406396001 qanuni təmsilçisi İbrahimxəlilov Sərvan Babaxəlil oğlu, hüquqi ünvanı AZ1014, Bakı ş., Nəsimi r-nu, Bülbül pr., ev 30, m.11 olan "İ.S.B Terminal" MMC-dir. Müraciətlərə verilən Dövlət Gömrük Komitəsinin Aksizli mallar üzrə Baş Gömrük İdarəsinin rəisi, general-mayor Vəzir Həsənovun 04.12.2023 tarixli 3-33-3300/2-B-000036/1-10/2023 nömrəli və Gömrük Komitəsinin "Azərterminalkompleks" Birliyinin direktor müavini, direktor vəzifəsini müvəqqəti icra edən Kənan Aşurlunun 06.12.2023 tarixli 3-33-5600/2-000976/2023 nömrəli cavablarından görünür ki, məndən əlavə 100 manat alan qurum özünü gömrük orqanına məxsus olduğunu göstərsə də, əslində adi dayanacaq xidməti göstərir və gömrük orqanlarına heç bir aidiyyəti yoxdur. Bunu gömrük orqanının rəsmi cavabı sübut edir. Əmlakımı girov saxlamaqla məndən məcbur 100 manat alınması "rəsmiləşdirmə" kimi qələmə verilir.

İqtisadiyyat Nazirliyi yanında Antiinhisar və istehlak Bazarına Nazarət Dövlət Xidmətinə dəfələrlə müraciət etsəm də, sözügedən dayanacağın mənim istehlak hüququmu pozub-pozmadığı sualıma cavab verilmədi. Bu barədə Baş Prokurorluğa müraciətim cavablandırılması üçün İqtisadiyyat Nazirliyi yanında Antiinhisar və istehlak Bazarına Nazarət Dövlət Xidmətinə göndərilib, ancaq yenə də cavab ala bilməmişəm.

Göründüyü kimi, dayanacaq üzərinə düşən öhdəlik üçün aldığı 60 manatdan əlavə məni 100 manat ödəməyə məcbur edərək aldığı vəsaitə görə aylardır nə mənə, nə də rəsmi orqanlara açıqlama verməməklə mənə 100 manat məbləğində ziyan vurub.

Odur ki, xahiş edirəm, qeyd etdiklərimi nəzərə alıb Azad İstehlakçılar Birliyi olaraq vətəndaşlardan məcburi, zorla yığılan ödənişlər qanunsuzdursa, əlavə ödənişimin geri alınmasına və məsələnin içtimailəşdirilməsinə, eyni zamanda aidiyyəti dövlət qurumlarının rəhbərliklərinin diqqətinə çatdırılmasına kömək edəsiniz. Əvvəlcədən təşəkkür edirəm".

Məsələ ilə bağlı şikayət ərizəsində adı çəkilən tərəflərin də mövqeyini dərc etməyə hazırıq.

Ötən ilin 12 noyabr tarixində “İstanbul NS” klinikasında vəfat edən iş adamı, uzun illər “Natavan” trikotaj fabrikinin rəhbəri olmuş Böyükağa Şükürovun yaxınları onun ölümündə şübhəli məqamların olduğunu iddia edir.

Mərhumun qardaşı Qabil Şükürov “Qafqazinfo”ya müraciət edərək B.Şükürovun ölüm səbəbinin tam araşdırılmasını istədiklərini deyib.

O düşünür ki, qardaşının vəfatı ilə bağlı onlara verilmiş məlumat və görüntülər uzlaşmır:

“Qardaşım çox sağlam insan idi. 2014-cü ildə Mərkəzi Gömrük Hospitalında ürək əməliyyatı keçirmişdi, damarı dəyişdirilmişdi və səhhətində ondan sonra hər hansı şikayəti olmamışdı. Ötən il noyabrın 12-də mən Türkiyədə olarkən yeznəm günorta vaxtı qəfil zəng elədi ki, Böyükağa vəfat edib. Həmin gecə bilet alaraq təcili Bakıya gəldim.

Lakin gələndə məlum oldu ki, qardaşımı heç Bakıdakı bacılarımın belə xəbəri olmadan dəfn ediblər. Ayın 13-də qardaşımgilin həyətində yas mərasimi ilə bağlı toplaşanda mən sorğu-sual etməyə başladım ki, qardaşım harada, hansı səbəbdən vəfat edib. Mənə ilk olaraq dedilər ki, Böyükağa Mərkəzi Klinikada əməliyyat zamanı vəfat edib. Sonra həmin klinikaya getdim, orada dedilər ki, bu tibb müəssisəsində belə bir əməliyyat və ölüm hadisəsi baş verməyib”.

Q.Şükürovun sözlərinə görə, ona daha sonra qardaşının Mərkəzi Gömrük Hospitalında vəfat etməsini deyiblər:

“Lakin həmin xəstəxanada da deyilən məlumatı təkzib etdilər. Son 3 ayın tarixçələrini çıxardılar və məlum oldu ki, Böyükağa Şükürov adlı xəstə qəbul edilməyib. Bundan sonra başqa bir dövlət xəstəxanasının adı çəkildi, orada da qardaşımın olmaması üzə çıxdı. Qardaşımın ölüm kağızını əldə etdikdə onun Nərimanov rayonu ərazisində yerləşən “İstanbul NS” klinikasında vəfat etməsi məlum oldu.

Qardaşımın bəzi ailə üzvləri tərəfindən onun harada vəfat etməsinin gizlədilməsinin səbəbini heç cürə başa düşə bilmirdim. Ölüm kağızında qeyd edilmişdi ki, vəfat etmə səbəbi bağırsaq keçməzliyi olub və bundan çox şübhələndim. Xəstəxanada belə bir diaqnozdan insan itkisi çox nadir hallarda ola bilər”.

Şikayətçi qeyd edib ki, məsələ ilə bağlı vəkil tutub və ölüm hadisəsini araşdırmağa başlayıb:

“Vəkilim “İstanbul NS” klinikasında olanda oranın hüquqşünası bildirib ki, guya Böyükağa ilə qonşu olub və qardaşım daim orada müalicə alıb. Sonra sorğu verib cavab aldıq və məlum oldu ki, ölümdən əvvəlki 3 ayda qardaşım həmin klinikaya bir dəfə də olsun, müraciət etməyib. Şübhəli məqamları görüb məsələnin tam araşdırılması və ölüm səbəbinin müəyyən edilməsi üçün Nərimanov Rayon Prokurorluğuna müraciət etdik.

Həmçinin xəstəxanadan kamera görüntülərinin çıxarılmasını tələb etdik. Lakin günlər keçməsinə baxmayaraq, prokurorluq xəstəxanadan kamera görüntülərini əldə edə bilmədi. Əvəzində dedilər ki, ölüm hadisəsi zamanı mobil telefon vasitəsilə lentə alınmış videolar mövcuddur. Həmin kadrlarda isə ayrı-ayrı geyimlərdə olan şəxslər, harada olması bilinmədiyi formada nəsə edirlər və heç nə anlaşılmır”.


Qabil Şükürov qardaşının ölüm səbəbinin dəqiqləşdirilməsi və işə hüquqi qiymətin verilməsi üçün dövlət qurumlarına müraciət edib, qəbullarda olub:

“Lakin geridə qalan 9 ay müddətində heç bir konkret addım atılmayıb və zaman həqiqətlərin ortaya çıxmasının əleyhinə işləyir. Təyin olunan ilk ekspertizada xəstəlik tarixçəsində olan məlumatlar rəyə köçürülüb, əməli addım atılmayıb. Biz də rəydən şikayət etdik. Bundan sonra təkrar hərbi ekspertizaya göndərildi və iş çox uzadıldı. Məlum oldu ki, “İstanbul NS” klinikası ölüm rəyini 4 ay sonra yazıb, halbuki ölümdən dərhal yazılmalı idi.

Hərbi ekspertiza ölümün həkim səhlənkarlığından baş verməsinə rəy verib. Birinci klinikaya cinayət işi açılsın, iş araşdırılsın, həqiqətlər ondan sonra üzə çıxar, günahkarlar qanun qarşısında cavab verər. Konkret olaraq həkim səhlənkarlığı təsdiqləndiyi üçün o istiqamətdə cinayət işi açılaraq iş araşdırılmalıdır. Bundan sonra qardaşım Böyükağa Şükürovun hansı səbəbdən, hansı şəraitdə ölməsi və ya bəlkə də öldürülməsi üzə çıxacaq”.

Azərbaycan Dövlət Neft və Sənaye Universiteti “UFAZ-da 2024-cü il ərzində tədbirlər zamanı tələb olunan, nəzərdə tutulan iaşə (catering) xidmətlərinin satınalınması” tenderinin nəticələrini elan edib. Satınalma portalının məlumatına görə, tenderin qalibi “Lunchef Catering” MMC şirkəti (VÖEN: 2005077961) olub. Qalib şirkətlə 116 218 manat məbləğində müqavilə imzalanıb.

Lakin Azərbaycan Dövlət Neft və Sənaye Universiteti bu barədə tenderi dövlət satınalmaları portalından kənar elan edib. Portalda qeyd olunub ki, bu müqavilə üzrə satınalma proseduru dövlət satınalmalarının vahid internet portalında keçirilməmişdir (elektron satınalma deyil). Bu məqam müəyyən şübhələr yaratdığı üçün Meydan TV araşdırma aparıb.

Kommersiya qurumunun hüquqi şəxslərin dövlət reyestrinə daxil edilmiş məlumatlarına əsasən, “Lunchef Catering” Məhdud Məsuliyyətli Cəmiyyəti 10 AZN nizamnamə kapitalı ilə 2018-ci ilin iyul ayında dövlət qeydiyyatına alınıb. Hazırda qanuni təmsilçisi Nilufər İskəndər qızı Qara olaraq göstərilir.

6 ildən çoxdur ki, fəaliyyət göstərən “Lunchef” keyterinq şirkəti Azərbaycanın bölgələrində – şirkətlərdə, müxtəlif tədbirlərdə, korporativ yığıncaqlarda yemək xidmətləri təşkil edir. Zavodlar, fabriklər, məktəblər, tibb müəssisələri və s. kimi yerlərə qida təmin edən şirkət, daşınma yemək, bufet, furşet, kofe-breyk, biznes-lanç kimi xidmətləri təqdim edir.

Şirkətin müştəriləri arasına BECOC (Bakı şəhər halqası), SOCAR-ın Qaradağda yerləşən qurudakı buruqları və Sənaye Təhlükəsizlik İdarəsi, Milli Onkologiya Mərkəzi, Müdafiə Nazirliyinin tərkibində olan Dəniz Hərbi Qüvvələri, “AZOREL”, “Cinemaplus”, “Shafak Group”, “Caspian Entertainment” şirkətləri və s. müəssisələr daxildir.

Nilufər Qara yerli mətbuata müsahibəsində hazırda şirkətin 3 mətbəxi və 30 işçisinin olduğunu qeyd edib. Mətbəxlərdən birinin şəhərin mərkəzində, birinin Pirallahıda, digərinin isə Qaradağda yerləşdiyini bildirir. Hazırda 86 çeşiddə təamların hazırlandığı vurğulanır.

Rəsmi saytlarında özünü şirkətin direktoru kimi təqdim edən Nilufər Qara (Qarayeva) SOCAR-ın Sənaye Təhlükəsizlik İdarəsinin rəisi İskəndər Yaqub oğlu Şirəlinin qızıdır. O, 25 ildən artıq Dövlət Neft Şirkətinin Komleks Qazma İşləri Trestinin müdiri vəzifəsində çalışıb.

Yerli mətbuatın yaydığı sənədlərə görə İskəndər Şirəli Dövlət Neft Şirkətinin Komleks Qazma İşləri Trestinin müdiri vəzifəsində olduğu müddətdə öz qızının şirkəti ilə müqavilə bağlayıb və direktoru olduğu qurumun 400 işçisinin yemək təminatını qızının şirkəti vasitəsilə həyata keçirib. Bu şirkətə aid “Zabitlər bağı”nda yerləşən “Lunch Chef” restoranı vasitəsilə yeməklər hazırlanıb və dövlət qurumuna çatdırılıb.

Nilufər Qara müsahibəsində də qeyd etdiyi kimi, şirkətin mətbəxlərindən biri hazırda Qaradağda, yəni SOCAR-ın Qaradağda yerləşən qurudakı buruqları və Sənaye Təhlükəsizlik İdarəsini yeməklərlə təmin edir. Həmin idarə də atası İskəndər Şirəlinin rəisi olduğu idarədir.

Bundan başqa, İskəndər Şirəli idarə rəisi təyin ediləndən sonra yaxın qohumlarını SOCAR-da işə düzəltdiyi bildirilirdi. Meydan TV 6 il öncə eyni yerdə çalışan qohumların siyahısını əldə edib və ictimailəşdirmişdi. Bundan başqa ​yerli mətbuatda İskəndər Şirəlinin daşınmaz əmlak və biznes siyahısı da yayılmışdı.

Oğlu Xəzər Şirəli əvvəllər SOCAR-da Mexanika Mühəndisi olaraq çalışsa da, hazırda “Paşa Holdinq”ə aid, PAŞA Development (daşınmaz əmlak) şirkətində mexanika mühəndisi olaraq işləyir. Digər qızı Leyla Şirəli isə “Ağ şəhər” Rəsm Qalereyasının direktorudur.

Azərbaycan Respublikasının Prezidenti yanında Ali Attestasiya Komissiyanın iki ay öncəki qərarı ilə İskəndər Şirəli, elmi-pedaqoji fəaliyyətə görə texnika elmləri sahəsinin “Maşınlar, avadanlıqlar və proseslər ixtisası üzrə Professor” elmi adına layiq görülüb. Bundan əlavə, professor, ölkə başçısı İlham Əliyev tərəfindən 2011-ci ildə “Tərəqqi” medalı, 2012-ci ildə “Əməkdar mühəndis” fəxri adı və 2017-ci ildə isə 3 – cü dərəcəli “Əmək” ordeni ilə təltif edilib.

“Dövlət Satınalmaları haqqında” Qanunun 6.2.5-ci maddəsinin tələblərinə görə vergi borcu olan şirkətlərin, şəxslərin tenderdə iştirakı qadağandır. Dövlət Vergi Xidmətinin saytına istinadən isə “Lunchef Catering” MMC şirkətinin dövlətə 347.8 AZN borcu var.

Baş prokuror yanında Korrupsiyaya qarşı Mübarizə Baş İdarəsi bildirir ki, dövlət qulluqçusunun maddi faydaları öz qohumuna yönəltməsi ilə bağlı göstərişlərin (əmrlərin) verilməsi və təsdiqlənməsi maraqların toqquşmasına səbəb olur. Həmçinin vəzifəli şəxsin öz ailə üzvünü, qohumunu və ya yaxın dostunu işə götürməsi, vəzifədə irəli çəkməsi də maraqlar toqquşmasının bir növüdür.

“Dövlət qulluqçularının etik davranış qaydaları haqqında” Azərbaycan Respublikasının Qanununun 15-ci maddəsində göstərilir ki, dövlət qulluqçusu qulluq etdiyi dövrdə maraqların toqquşmasına yol verməməlidir və qanunsuz olaraq öz vəzifə səlahiyyətlərindən şəxsi maraqları üçün istifadə etməməlidir.

Bundan əlavə, “Dövlət satınalmaları haqqında” Qanunun 44-cü maddəsində qeyd olunur ki, ehtimal olunan qiymət 100 000 manat və ondan çox olduqda, satınalmalar açıq tender və ya ikimərhələli tender metodları tətbiq edilməklə keçirilir. Ehtimal olunan qiymət 100 000 manatdan az olduqda, satınalmalar kotirovka sorğusu metodu tətbiq edilməklə keçirilə bilər. Bizim araşdırmada bəhsi keçən qalib şirkətlə isə 116 218 manat məbləğində müqavilə imzalanıb. Bu da qanun pozuntusu deməkdir.

Meydan TV İskəndər Şirəli ilə əlaqə saxlaya bilməyib. Dəfələrlə edilən zənglər cavabsız qalıb. Suallar onun “Whatsapp” nömrəsinə də göndərilib, lakin cavablandırılmayıb.

Atasından fərqli olaraq, Nilufər Qara Meydan TV əməkdaşının ona ünvanlanmış suallarını dinləyib və əsəbləşib. Meydan TV həmin sual-cavabı olduğu kimi təqdim edir:

– Nilufər xanım, atanız Dövlət Neft Şirkətinin Kompleks Qazma İşləri Trestinin müdiri vəzifəsində olduğu zaman sizin şirkət ilə müqavilə bağladığına dair sənədlər mövcuddur. Bunun qanun pozuntusu olduğunu bilirsinizmi?

– Siz kimsiz? Bu nə sualdır? Mən bu suala cavab vermək məcburiyyətindəyəm? Mən başa düşmürəm sizin sualınızı.

– İkinci sualımız isə odur ki, sizin şirkət Azərbaycan Dövlət Neft və Sənaye Universitetinin keçirdiyi tenderin qalibi olub. Şirkətinizin hər hansı tenderdə qalib olmasında atanızın əməyi və təsiri varmı?

– Xəstəsiniz siz? Sizdə problem var? Ümumiyyətlə, nə danışırsınız siz? Bu, nə sualdır? Nə etmək istəyirsiniz? Biz şikəstik də, biz işləyə bilmirik, düzdür?! Atam hardasa işləyirsə, mən işləyə bilmərəm də? Bu, nə suallardır? Sual verirsiz, bilirsiz nə sual verirsiz, ümumiyyətlə? Mən sahibkaram, 8 ildir sahibkaram. Sıfırdan iş qurmuşam özümə, əziyyətimlə. Birinci “UFAZ”-ı mən tenderlə udmuşam, dövlət satınalmasından. Sizin tenderə şübhəniz varsa, deməli, dövlətə şübhəniz var. Nə danışırsız siz? Şəffaf şəkildə mən tender qalibi olmuşam. Siz hansı sifarişlə bunu edirsiz? Sizə nə qədər pul veriblər ki, siz belə danışırsız? Mən sizi məhkəməyə də verə bilərəm bu şeyə görə. Yəni mən axıra kimi də gedərəm, məhkəmədə uduzduraram sizi. Xahiş edirəm, bir də bizi narahat etməyin.

Abşeron rayonunun Masazır qəsəbəsində, “Qurtuluş 93” Mənzil-İstismar Kooperativinin ərazisində ağacların kəsilməsi və yerində qanunsuz inşaat işinin aparılması barədə xəbər vermişdik. Aparılan inşaat işinin qanundankənar olduğu həm Abşeron Rayon İcra Hakimiyyətindən, həm də Fövqəladə Hallar Nazirliyindən (FHN) Yeniavaz.com-a verilən rəsmi məlumatlarda öz təsdiqini tapıb.
Daha əvvəl FHN-dən verilən məlumatda qanunsuz tikintinin qurum tərəfindən nəzarətə götürüldüyü və sökülməsinə başlanıldığı bildirilmişdi. Sakinlər inşaat prosesinin davam etdiyini bildirdikdə, FHN təkrar açıqlama vermiş və bir daha tikintinin nəzarətə götürüldüyünü bəyan etmişdi.
Masazır sakinləri növbəti dəfə Yeniavaz.com-a müraciət edərək, ərazidə tikinti prosesinin davam etdirildiyini bildiriblər.
Onlar qanunsuz tikintinin davam etdirildiyinə dair fotoları da redaksiyamıza təqdim ediblər:


Məsələ ilə bağlı təkrar FHN-ə müraciət etdik. Qurumdan bildirilib ki, obyekt sahibinə icazə sənədinin alınması barədə xəbərdarlıq edilib:
“Bildiririk ki, Tikintidə Təhlükəsizliyə Nəzarət Dövlət Agentliyi tərəfindən Abşeron rayonu, Masazır kəndi, “Qurtuluş-93” Yaşayış Kompleksi ərazisində aparılmış qeyri-yaşayış obyektinin tikintisi ilə bağlı icazəverici sənəd olmadığından, tikinti işlərinin dayandırılıması barədə 24.06.2024-cü il tarixli 0554 nömrəli Qərar verilmişdir. Qərar tikinti ərazisinə nəzarətdə saxlamaq məqsədi ilə aidiyyəti üzrə Abşeron Rayon İcra Hakimiyyəti və Rayon Polis İdarəsinə göndərilmişdir.
Lakin, verilmiş qərara məhəl qoymayaraq ərazidə bir neçə dəfə tikintinin aparılmasına cəhdlər edilmiş, bu cəhdlərin qarşısı alınmış, obyektdə qismən söküntü işləri aparılmışdır.
Hal-hazırda tikinti işləri dayandırılmış və obyekt sahibinə icazə sənədinin alınması barədə xəbərdarlıq edilmişdir. Müəyyən edilmiş müddətdə tikintiyə dair icazə sənədi alınmadığı təqdirdə Agentlik tərəfindən qaydalarla müəyyən edilmiş növbəti tədbirlər həyata keçiriləcəkdir”.
Xatırladaq ki, daha əvvəl Ekologiya və Təbii Sərvətlər Nazirliyindən də Yeniavaz.com-a açıqlama verilmiş və sözügedən ərazidə bu ilin aprel ayında ağac kəsilməsi ilə bağlı araşdırma aparıldığı bildirilmişdi:
“Təbiətə dəymiş ziyan cinayət tərkibi yaratdığından məsələyə hüquqi qiymət verilməsi məqsədilə toplanmış sənədlər Baş Prokurorluğa göndərilib”, - Nazirliyin məlumatında qeyd olunur.