 |
|
|
Vaxtilə Əmək Məcəlləsinin 70-c bəndi ilə gömrükdəki vəzifəsindən qovulan Zəfər Məmmədov Bakı Baş Gömrük İdarəsinin “İpək yolu” Gömrük postuna necə rəis təyin edilib???
…Təzəlikcə sosial şəbəkələrdə maraqlı bir video yayılıb. Deməli, Dövlət Gömrük Komitəsinin (DGK) sədri vəzifəsindən qovulan Səfər Mehdiyevin qılıncının dalı da, qabağı da kəsən vaxtları, yəni bu ilin mart ayında öz bahalı maşınında qadağan olunmuş siqnaldan istifadə etdiyinə görə DYP inspektoru onu saxlayır… Bunlar videoda əks olunub. Düzdür, S.Mehdiyevin, ancaq ayaq hissəsi çəkilib, amma onun səsini kim tanımır ki, maşından düşən kimi yol polisini “ə, nə həyasız adamasan, ə, maşının nömrəsi sənə bəlli deyil? Sirena vermirəm sənə? General-polkovniki saxlayırsan?”-deyərək inspektoru təhqir edir. Hələ üstəlik, DYP maşınının bort nömrəsini də soruşur. DYP əməkdaşı maşının bort nömrəsini elan edərək belə deyir: “Cənab general, nömrədə yazılmır axı, bunu kimdir sürən. Əmr ediblər ki, belə siqnal olmaz!”
Aldığımız məlumata görə, həmin DYP əməkdaşına S.Mehdiyev töhmət də verdirib. Bu video Səfər Mehdiyevin qanunlara necə tüpürdüyünün göstəricisidir. Deməli, S.Mehdiyev gömrüyün sədri olanda da qanunları beləcə ayaqlar altına atıb. Eyni zamanda gömrükdə müxtəlif vəzifələrə elə adamları tapıb yerləşdirib ki, onlar da göydə Allahı, yerdə qanunları heç vaxt tanımayıblar. Çünki gömrüyümüzün başında qanunu pozan Səfər Mehdiyev oturmuşdu...
***
Artıq bu gün Səfər Mehdiyev Gömrükdə yox, başqa yerdə oturur, yəni, artıq DGK-nin sədri deyil. Dövlət Gömrük Komitəsinin sədri vəzifəsini bu gün əvəz edən, vaxtilə Səfər Mehdiyev tərəfindən işdən azad edilmiş Şahin Bağırovdur. Ş.Bağırov işə başladığı ilk gündən S.Mehdiyevin bir neçə generalını işdən azad edib. Amma Ş.Bağırov bunların hansı birini azad etsin ki, Gömrükdə çalışan 4000 işçidən 1400-ü Səfər Mehdiyevin Nehrəmdən olan kəndçiləridir (Sonra da deyirlər ki, Naxçıvanda kəndlər niyə boşalır???). Birdən-birə Gömrüyü də tamam boş qoymaq olmaz axı. İnanırıq ki, hörmətli Ş.Bağırov S.Mehdiyevin Gömrükdəki sonuncu izinə qədər təmizləmə aparacaq və nəhayət, Gömrük Komitəsi ayrı-ayrı şəxslərin cibi üçün yox, dövlətin büdcəsi üçün işləyəcək.
Bəs Səfər Mehdiyevin gömrükdə hələ də at oynadanları kimlərdir???
Biz də öz növbəmizdə bu işdə Ş.Bağırova kömək etmək məqsədilə S.Mehdiyevin Gömrükdə indi də at oynadan, korrupsiya əməllərinə yol verən “kadrları” barədə məlumat vermək istəyirik. S.Mehdiyevin bu korrupsioner kadrları rüşvətin miqdarını bir az da qaldırıblar. Bununla da demək istəyirlər ki, baxın, S.Mehdiyevin vaxtında rüşvət bu qədər deyildi, amma Ş.Bağırov gələn kimi rüşvət qalxdı. Yəni, anti-reklam, gözdənsalma, sabotaj… Bütün bunlar Ş.Bağırovu gözdən salmağa yönələn addımlardır. Bəs, kimdir odda yanmaz, suda batmaz bu “kadrlar”?
Redaksiyamızın elektron poçtuna çox maraqlı bir məktub daxil olub. Bu məktubdan görünür ki, yazan vicdanlı bir adamdır. Məktubda isə olduqca maraqlı məlumatlar var. Əvvəlcə, məktubun sahibi ilə əlaqə saxladıq və şikayətçinin real insan olduğunu müəyyən etdik. Anonim olmayan məktubda bizə verilən çox maraqlı məlumata görə, həm Dövlət Gömrük Komitəsində, həm də yerlərdə S.Mehdiyevin kadrları özlərini əvvəlki vaxtlarda olduğu kimi, çox sərbəst aparırlar. İndi gəlin, konkret faktlara keçək…
Vaxtilə Əmək Məcəlləsinin 70-c bəndi ilə gömrükdəki vəzifəsindən qovulan Zəfər Məmmədov Bakı Baş Gömrük İdarəsinin “İpək yolu” Gömrük postuna necə rəis təyin edilib???
Bizə verilən məlumatlar sırasında deyilir ki, Bakı Baş Gömrük İdarəsinin “İpək yolu” Gömrük postu ən gəlirli bir yerdir. Belə gəlirli yeri isə, hər adama tapşırmaq olmaz. Ona görə də, 2017-ci ildə sabiq DGK sədri Aydın Əliyev tərəfindən korrupsiya əməllərinə yol verdiyi üçün Əmək Məcəlləsinin 70-ci maddəsinin “c” bəndi ilə işdən qovulmuş və müfəttiş vəzifəsində işləmiş Zəfər Məmmədov 2021-ci ildə heç bir məhkəmə qərarı olmadan Səfər Mehdiyev tərəfindən “İpək yolu” Gömrük postuna rəhbər təyin edilmişdir. Halbuki işə yenidən bərpa olunmaq üçün Məhkəmə qərarı ilə həmin maddə ləğv edilməli idi və bundan sonra vətəndaş işə bərpa oluna bilərdi. Bu, isə olmayıb. Görünür S.Mehdiyev Zəfər Məmmədov kimi peşəkar korrupsioneri tapa bilməyəcəyinə görə onun əvəlki əmrini ləğv edib və yeni, yəni tər-təmiz əmək kitabçası yazdırıb. Səfər Mehdiyevin Görükdə işlədiyi müddət yaxşı yoxlanılsa, belə cinayət faktları yetərincə tapılar...
Bəli, Zəfər Məmmədov “İpək yolu” gömrük postuna rəis təyin olunandan sonra buranı əsl korrupsionerlər yuvasına çevirə bilir. Bu sahənin peşəkarıdır axı... Yəni, rəis Z.Məmmədov harada özü kimi korrupsiya əməlinə yol verdiyinə görə vəzifədən qovulan vardısa, onları öz yanına yığdı. Bəs, kimdir onlar?
Zəfər Məmmədov FHN-də işləyərkən külli miqdarda yeyintiyə yol verdiyinə görə işdən qovulmuş sabiq deputatlardan birinin oğlu Mətin Quliyevi nə məqsədlə yüksək vəzifəyə təyin etdi?
Birinci başlayaq, Zəfər Məmmədovun özünə gətirdiyi müavindən... Əvvəla, bizə verilən məlumata görə, həmin posta heç bir müavin ştatı lazım deyilmiş. Amma korrupsiyanın dozasını bir az artıq eləmək üçün Z.Məmmədov özünə üç müavin ştatı açdırmağa nail olur. İndi Z.Məmmədovun özünə müavin gətirdiyi “kadrlarla” sizləri tanış edək. Deməli, 2017-ci ildə korrupsiya əməlinə yol verdiyinə görə, vətəndaşlardan daxil olan çoxlu sayda şikayətlərin əsasında DGK-nin Əməliyyat və İstintaq Baş İdarəsi tərəfindən məsuliyyətə cəlb olunan Baş İnspektor, amma möcüzə nəticəsində sonradan heç bir məsuliyyətə cəlb olunmayan və 2021-ci ildə Səfər Mehdiyev tərəfindən “İpək yolu” Gömrük postuna yaxın qohumu, Nehrəmdən olan İlkin Mehdiyev təyin olunur.
İkinci müavin postu DGK-nin sədri Səfər Mehdiyevə və Əməliyyat və İstintaq Baş İdarəsinin rəisi, gömrük xidmət general-mayoru, hazırda həbsdə olan Məsum Rəsulova çox yaxın olan sabiq deputatlardan birinin oğlu Mətin Quliyev təyin edilir.
Məlumat üçün qeyd edək ki, Mətin Quliyev bundan əvvəl FHN-də işləyib və oradan külli miqdarda yeyintiyə yol verdiyinə görə işdən qovulub. Belə bir korrupsioneri Zəfər Məmmədov özünə müavin gətirib.
Daha bir «müxalifət» yönümlü partiyanın sədri, korrupsiyaya yol verdiklərinə görə Azərbaycandakı bütün məmurları asıb-kəsən, yıxıb-sürüyən, bütün çıxışlarında onları bu xalqa düşmən adlandıran Müasir Musavat Partiyasının sədri Hafiz Hacıyevin oğlu Raul Hacıyevi isə Zəfər Məmmədov Baş İnspektor təyin edir. Korrupsioner kadrlar kimi tanınan bu dəstə bu gün də vətəndaşların başına oyun açmaqda davam edirlər.
***
Əvvələr Zəfər Məmmədovla çiyin-çiyinə çalışmış və “qara pulların” yığılmasında əsas fiqur sayılan, Səfər Mehdiyevin qohumu Mübariz Mehdiyev də Baş Gömrük İdarəsindən çıxarıllaraq “İpək yolu” Gömrük postuna gətirilir. Artıq korrupsioner komanda tam formalaşıb və vətəndaşların başında rahatca turp əkmək olar. Belə də edirlər, özü də ikiqat artıqlaması ilə. Axı, bu gün DGK-nin sədri Səfər Mehdiyev yox, əvəzedici də olsa, Şahin Bağırovdur. Bu səbəbdən, rüşvətin miqdarı da artmalıdır ki, Ş.Bağırovun işinə əngəl törətsinlər.
Bu korrupsioner dəstə görün, rüşvət mexanizmini necə qurublar?
Ayrı-ayrı vətəndaşların ciblərini soymaqla başlarına açdıqları oyunları bir kənara qoyaq. Deməli, “İpək yolu” Gömrük postuna 15-20 tonluq maşınlarla karqo yüklər gətirilir. Bu “bacarıqlı” dəstə həmin yüklərin 3 tonunu mal sahibi ilə danışaraq Gömrükdən yayındırırlar. Bəs, bu 3 ton mal necə xeyir verir? Nəzərə alsaq ki, həmin karqo yükün 1 kq. üçün dövlət rüsumu 5 manatdır. İndi bu 5 manatı vurun 3 tona. Bu da edir 15 min manat. Burada mal yiyəsinin də öz faizi var. İndi təsəvvür edin, hər gün onlarla belə Tır maşınları Gömrükdən keçir. Hər Tır maşınından gizlədilən 3 ton maldan qalan pulları aya vuranda, onu hesablamağa kalkuliyatorun da gücü çatmaz. Burada söhbət milyon manatlarla puldan gedir. Bu pulların hamısı Zəfər Məmmədovun özünün və komandasının cibinə gedir. Görün bu dəstə nə qədər ağını çıxartmışdılarsa, onları himayə edən general-mayor Məsum Rəsulovun həbsini Səfər Mehdiyev də vəzifədə ola-ola əngəlləyə bilməmişdir. Təbii ki, DGK-nin sədri vəzifəsini icra edən hörmətli Şahin Bağırov təmizləməni hələ ki, yuxarıdan başlayıb. Necə deyərlər, balıq başdan iyləndiyindən. Onu da nəzərə alaq ki, balığı təmizləməyə quyruqdan başlayırlar. İndi bu «quyruqda» oturanlar hələ ki, çapıb talamaqda sərbəstdirlər və Səfər Mehdiyevin dönəmindən də artıq rüşvət yığımı ilə məşğuldurlar.
***
İnanırıq ki, DGK-nin sədr əvəzi Şahin Bağırov tezliklə, balığın quyruğunda, yəni “İpək yolu” gömrük postunda da təmizləmə əməliyyatı başlayacaq və nəhayət, vətəndaşlar gömrükdən rüşvət vermədən keçərək, rahat nəfəs ala biləcəklər. Düzdür, ola bilsin quyruqdan başlayan bu təmizləmə əməliyyatını DTX-nin qara maskalıları keçirsin. Amma vətəndaşlar üçün bunun fərqi yoxdur. Təki korrupsiya ilə məşğul olub vətəndaşın və dövlətin cibinə girənlər layiqli cəzalarını alsınlar.
Mövzunu diqqətdə saxlayacağıq.
Hazırladı: Elçin MƏMMƏDLİ
Tərtər rayonunda əhaliyə qənim kəsilən yeni DYP rəisi peyda olub.
Yerli sakinlərdən KAİM.az-a verilən məlumata görə, Tərtər rayon Polis Şöbəsinin Dövlət Yol Polis Bölməsinə yeni təyin edilən rəis İldırım Alıyev vəzifəyə gələn gündən Azərbaycan Respublikasının müvafiq yol hərəkəti qanunlarının “alqı-satqı”sına başlayıb.
Belə ki, müəyyən bəhanələrlə saxlanılan avtomobil sürücülərinə ilk öncə hədə-qorxu yolu ilə yüklü cərimələrin yazılacağı deyilir, sürücüləri qanundankənar vəsait ödəməsinə razı saldıqdan sonra isə həmin qanunlardan və cərimə təzyiqlərindən əsər-əlamət qalmır.
Sanki, əvvəlcədən planlaşdırılmış kimi, əlinə keçirdiyi qanuni gücdən qanunsuz istifadə halına dərhal başlayan DYP rəisi polis mayoru Samir Məmmədov ilə də iş birliyi içərisindədir.
Bildirilir ki, saxlanılan sürücülər Samir Məmmədova yönləndirilir. Sözügedən polis mayoru isə rüşvət almaq məqsədilə həm özündən qayda pozuntusu “icad edir”, həm də real qayda pozuntularını “qanuniləşdirir”.
Belə faktlardan biri ilə “Niva” markalı avtomobilin sürücüsü də rastlaşıb.
Məlumata görə, avtomobilinin “peredok”unun kəsik olması səbəbindən saxlanılan sürücü uzun dirənişlərdən sonra İldırım Alıyevin göstərişi ilə Samir Məmmədova 100 manat məbləğində rüşvət verməli olub.
Görünür, İldırım bəy həm ölkə başçısı cənab İlham Əliyəvin, həm də Daxili İşlər naziri cənab Vilayət Eyvazovun dəfələrlə, kəskin mövqedə dayanaraq etdiyi xəbərdarlıqları ciddiyə almaq istəməyib.
Belə halların qarşını almaq üçün dövlət tərəfindən keçirilən islahatlar əminik ki, Tərtər rayonunda da öz bəhrəsini verəcək.
Prezident İlham Əliyevin şəhər və rayon icra hakimiyyəti başçılarını vəzifəyə təyin edəndə, əhalnin sosial problemlərinin həlli və rəhbəri olduqların şəhərin abadlaşması üçün verdiyi tapşırıqları hər kəsə məlumdur.
Amma bu tapşırıqlar Gəncə Şəhər İcra Hakimiyyətinin başçısı Niyazi Bayramovun əməllərində görünmür. 28 avqust 2018-ci ildə Gəncə şəhərinə təyin olunmuş icra başçısı Niyazi Bayramov daşı-daşın üstünə qoymayıb. Əksinə, iki böyük binanın arasında, məsafə baxımından hər iki binanın sakinlərinin gediş-gəlişinə maneə törədən tikintiyə icazə verərək, vətəndaşların narazılığına səbəb olub.
Bundan başqa, “Mərkəzi Universam” deyilən binanın qarşısında qanunsuz olaraq iki böyük dəmir və şüşədən hazırlanmış ətir, dux, əl çantası satılan parfumeriya mağazası fəaliyyət göstərir. Bu da vətəndaşların rahat hərəkət etməsinə ciddi maneələr törədir. Adı qeyd olunmuş "Mərkəzi Univermaq" və “Universam” deyilən yerlərin ərazisində piyada keçid məntəqəsi vardır, bu piyada keçid məntəqəsində alt paltarlarından tutmuş, meyvə, tərəvəzlərə kimi açıq şəkildə satılır.
Hətta şəhərin mərkəzində piyada keçidinin çıxışlarında peraşki, xəmir yeməyi olan kətə, toyuq qrili satışının aparıldığını, pis qoxuların şəhər əhalisinin böyük narazılığına səbəb olduğunu qeyd edirik.
Bundan başqa, şəhərin mərkəzində yolun hər iki tərəfində olan piyada keçid məntəqəsinin çıxışlarının qarşısında yerə düzülmüş göy-göyərti, meyvə, tərəvəz satışına icazə verilərək, piyadaların gediş-gəlişinə maneələr törədirlər.
Bunları hamı görür, təkcə Gəncə Şəhər İcra Hakimiyyətinin başçısı Niyazi Bayramovdan başqa. Çünki adı çəkilən mer İcra Hakimiyyətindən çıxıb şəhərdə gəzinti etmir.
Digər problemlərlə birgə xüsusi qeyd edək ki, Gəncə şəhərinin yolları yararsız gündədir, mərkəz deyilən yollardan başqa şəhərin heç də kənarı sayılmayan yolları var ki, yağış yağanda qayıq ilə keçməli olursan. Bir neçə gündür ki, qərb bölgəsində güclü yağışlar yağır. Bununla da yağan yağışlar yollarda sel kimi axın edərək avtomobilərin, piyadaların gedişinə çətinlik yaradırlar.
Yazıda qeyd etdiyimiz problemləri video-lentdən aydın görmək olar. Gəncə şəhərinin müxtəlif küçələrində çəkilən video-görüntüləri sizlərə sübut üçün təqdim edirik.
Qarşı tərəfin mövqeyini dinləməyə hazırıq…
Bir qrup vətəndaş Prezidentə müraciət ediblər. Müraciətin bir nüsxəsi TİA.Az saytının poçtuna daxil olub.
Müraciəti təqdim edirik:
Azərbaycan Respublikasının Prezidenti cənab İlham Əliyevə
Ucar şəhəri Şah İsmayıl Xətai küçəsi ev 7-də yşayan Məmmədov Sadiq Paşa oğlu,
Ağcabədi rayon Boyat kənd sakinləri Həsənov Hüsən Böyükkişi oğlu, Həsənov Ülfət
Hüsən oğlu, Saatlı rayonu Hacıqasımlı kənd sakini İbrahimov Kamal Mətləb oğlu və
Gürcüstan Respublikasının vətəndaşı Omar Mextiyev tərəfindən
MÜRACİƏT
Möhtərəm cənab Prezident !
«AZEA Grup» MMC-nin bizə 12950 manat borcu var. Bu borcun 7650 manatı əmək müqaviləsi olmayan işdən, 5300 manatı isə Məmmədov Sadiq Paşa oğlu ilə bağlanmış əmək müqaviləsinə əsasən olan borcdur. Göründüyü kimi bu pulu şirkət bizə vermir. «Deyirlər ki, gedin kimə istəyirsiz deyin bu pulu Sizə verməyəcəyik»
İşə başlayan zaman müqavilə bağalamaq istəsəkdə «AZEA Grup» MMC-dən bizə şərt kəsdilər ki, müqaviləsiz işlədirik. Xoşunuzdur işləyin, xoşunuz deyil qapı açıqdır gedə bilərsiniz. Hər birimizin ailəsi var. Ailələrimizi rayonda qoyub gəlmişdik ki, bir tikə çörək qazanaq. Məcbur olub şirkətin bu şərti ilə razılaşdıq. Ehtiyacımız olmasaydı rayondan gəlib burda işləməzdik? Bizim pulumuzu niyə kəsirlər. Kimə deyək dərdimizi? prokurorluğa deyirik, cavab verirlər ki, « bizlik deyil. Əmək müfəttişliyinə müraciət edirik, onlarda bizi yola verirlər. Belə ki, gah yazırlar ki, «inzibati tənbeh vermə haqqında qərar qəbul ediblər», gahda yazırlar ki,» müəssə rəhbərliyi tərəfindən tələb olunan sənədlər təqdim edilmədiyinə görə müraciətin ətraflı araşdırılmasını başa çatdırmaq mümkün olmayıb».
Əmək müqaviləsi bağalamasaqda cəlb olunmuş işlərdə üzərimizə düşən öhdəlikləri layiqincə yerinə yetirmişik. Amma «AZEA Grup» MMC şirkəti həmin görülən işlərə görə danışdığımız pulu ödəmək istəmir. Məmmədov Sadiq Paşa oğluna isə aylıq maaş yazıldığına baxmayaraq həmin maaşı şirkət tərəfindən mənimsənilib. Eyni zamanda qeyd edək ki, Sadiq Məmmədovla «AZEA Grup» MMC arasında bağlanmış 01.05.2021-ci il tarixli əmək müqaviləsinə 10.01.2022-ci il tarixində xitam verilsədə 11.02.2022-ci il tarixində onun hesabına əmək haqqı ödənilib.
Möhtərəm cənab prezident!
Sizdən xahiş edirik «AZEA Grup» MMC və onun vəzifəli şəxsləri haqqında ciddi tədbir görülməsinə və dəymiş 12950 manat zərərin bizə ödənilməsinə köməklik edəsiniz.
Məmmədov Sadiq Paşa oğlu
Həsənov Hüsən Böyükkişi oğlu
Həsənov Ülfət Hüsən oğlu
İbrahimov Kamal Mətləb oğlu
Omar Mextiyev
Bir müddət əvvəl xəbər vermişdik ki, "Ağstafa rayon Mərkəzi Xəstəxanası Publik Hüquqi Şəxs"in təcili yardım şöbəsi lazımı şəkildə fəaliyyət göstərmir.
Xatırladaq ki, çağırışlara vaxtında gedə bilməyən, tibbi avadanlıqları çatışmayan, xəstələrə yaxşı halda analgin-dimedrol vurmaqla kifayətlənən təcili tibbi yardım şöbəsində yaşı 70-i ötmüş Adil Əmrahov kimi "pensionerlər" də işləyir. Bununla da, hər hansı bir tibbi irəliləyişə nail olmağın mümkünsüz olduğunu diqqətə çatdırmışdıq.
Yaydığımız xəbərin üstündən aylar keçdi, nə dəyişdi?
Belə görünür, Ağstafa rayon Mərkəzi Xəstəxanası Publik Hüquqi Şəxs"ə Ramin Bayramlının təyin etdiyi, hazırkı TƏBİB rəhbərliyinin də işlətdiyi İlham Sofiyev nəinki baş həkim kimi, bir həkim kimi də xəstəxananın təchizatı ilə maraqlanmayıb, təcili yardım şöbəsinin müasir çağırışlara cavab verən bir şəkildə qurulmasını təmin etməyib.
Xəstəxana və onun təcili yardım şöbəsi ilə bağlı ötən ay baş verən bir hadisə də orada vəziyyətin acınacaqlı şəkil aldığını təsdiqləyir. Xatırlayanlar bilər ki, el arasında "eşşək arısı" kimi tanınan həşəratın Şəmkir rayon sakinini sancması səbəbindən dünyasını dəyişməsi ölkəyə "mövzu" oldu. Dünyasını dəyişən şəxsə görə, Ağstafa rayon Mərkəzi Xəstəxanası Publik Hüquqi Şəxs"in hansı səviyyədə olduğu bir daha "imtahan" edildi. Məlum oldu ki, xəstəxanada həkimlər və onun təcili yardım şöbəsi tərəfindən arı sancması zamanı zəhərin toksiki effektinin həddən artıq ola biləcəyini nəzərə almayıblar. Bu zaman yarana biləcək anafilaktik vəziyyəti, bunun da təzyiqin düşməsinə, ürək döyüntülərinin zəifləyə biləcəyinə gətirib çıxaracağını, xəstənin ölmüş kimi bir vəziyyətə düşəcəyini ağıllarından keçirməyiblər. Yəni həkim savadı və peşəkarlığı kritik reaksiyalara adekvat cavab verə bilməyib, ölümün dəqiq baş verdiyi müəyyənləşmədən xəstəni sahibinə veriblər. Əgər xəstənin anafilaktik reaksiyalar səbəbindən kliniki ölüm keçirdiyi dəqiq müəyyənləşsə, ona hər cür təxirəsalınmaz tibbi yardım göstərilsə idi, həyata qaytarmaq mümkün olardı. Yox xəstə, bioloji ölüm keçirmişdirsə, 15 saat sonra (bəlkədə çox) qəbiristanlıqda niyə ayılır, Gəncəyə xəstəxanaya aparılırdı ki?!
Bu hadisə bir daha subut etdi ki, "Ağstafa rayon Mərkəzi Xəstəxanası Publik Hüquqi Şəxs" Allahın ümüdünə buraxılıb, İlham Sofiyev və başına yığdığı həkimlərə orada vaxt keçirməyə zaman tanınıb. Hərçənd ki, arı sancması nəticəsində ölüm hadisəsinə verilən rəydən sonra xəstənin qəbiristanlıqda ayılması bunu deməyə əsas verir. Bu günün özündə də belə hadisələrdən nəticə çıxarılmayıb. Ağstafa rayon Mərkəzi Xəstəxanası Publik Hüquqi Şəxs"in fəaliyyəti ekstremal vəziyyətlərdə heç bir xəstə üçün qismən də olsa, təminat verici hala gətirilməyib.
Təsdiqləyici vəziyyət
Faktinfo.az saytının əldə etdiyi məlumata görə, Ağstafa rayon Mərkəzi Xəstəxanası təcili yardım şöbəsində normal işləyən 5 ədəd təcili yardım maşını tapmaq mümkünsüzdür. O cümlədən, təcili tibbi yardım maşınlarının EKQ aparatı və oksigen balonu yoxdur, dərman təminatı, digər tibbi ləvazimatlardan danışmaq isə yersizdir. Xəstəxananın 6 təcili tibbi yardım maşınından 1-i normal işləmir. Maşınlar xəstə çağırışlarına saatlarla gecikir. Xəstələrin, şəhid analarının, qazilərin çağırışlarına gedən həkim çıxılmaz vəziyyətdə qalır. Xəstəxananın təcili yardım şöbəsində həkim çatışmır, orada heç kim işləmək istəmir. Çünkü işi ağır olan təcili yardım şöbəsinə rüşvətsiz həkim götürülmədiyindən, orada işləməyə maraq demək olar ki, yoxdur. Təsəvvür edin ki, bəzən xəstə çağırışına həkim yox, tibb bacısı getməli olur. Səbəb də növbədə olan həkimi çağırış zamanı əvəz edənin olmamasıdır.
Təbii bir gün sual verilə bilər ki, EKQ aparatı yoxdursa, çağırışa gedən həkim infrakt keçirən xəstəyə necə diaqnoz qoyur? Yoxsa xəstənin üzünə baxıb rəy verilir? Gülünc deyilmi? Bir sözlə, İcbari Sığorta üzrə Dövlət Agentliyi və TƏBİB rəhbərliyi "Ağstafa rayon Mərkəzi Xəstəxanası Publik Hüquqi Şəxs" və onun təcili yardım şöbəsi barədə dərindən düşünməli, orada ciddi islahatlara gedilməlidir. Niyə?
Təsəvvür edək ki, ətraf rayonlarda hansısa bir fors-major halı baş verib. (ALLAH ELƏMƏSİN). Ölkə rəhbərliyi səviyyəsində ilkin olaraq, "Ağstafa rayon Mərkəzi Xəstəxanası Publik Hüquqi Şəxs" də çalışan həkimlərin və təcili yardım şöbəsinin köməyinə ümid edilir. İcbari Sığorta üzrə Dövlət Agentliyi və TƏBİB rəhbərliyi hansı vəziyyətə qalar?
FUAD İSGƏNDƏROV
FAKTİNFO.AZ
“Via Travel” turizm şirkətinin müştəriləri aldadaraq onların pulunu mənimsədiyi iddia edilir.
TEREF yeniavaz.com-a istinadla xəbər verir ki, bu barədə turizm şirkətinə müraciət etmiş şəxslər şirkətin sosial şəbəkə hesabındakı paylaşımların şərh bölməsində qeyd ediblər. Müştərilər sözügedən şirkətin rəhbəri Ülvi Abbaslının onlara satdığı turpaketlərin saxta olduğunu iddia ediblər və ödədikləri pulların geri qaytarılmasını tələb ediblər.
Qeeyd edək ki, bəzi digər turizm şirkətlərinin rəhbərləri də “Via Travel” turizm şirkəti tərəfindən dələduzluğa məruz qaldıqlarını iddia edirlər.
Belə şəxslərdən biri də ““Welcome Travel Azerbaijan” turizm şirkətinin rəhbəri Quliyev Emin Firdosi oğludur. O, bir müddət öncə Ülvi Abbaslıdan müəyyən turpaketlər aldığını, lakin həmin turpaketlərin saxta olduğunu biləndən sonra Daxili İşlər Nazirliyinə və Baş Prokurorluğa şikayət etdiyini deyib. Ülvi Abbaslı tərəfindən fırıldaqçılığa məruz qalan bir çox müştərinin indi də özü ilə əlaqə saxladığını deyən Emin Quliyev sözügedən şəxsin bu cür əməllərdən əl çəkmədiyini bildirib.
İddialarla bağlı “Via Travel” turizm şirkəti ilə dəfələrlə əlaqə saxlamağa çalışsaq da, zənglərimiz cavabsız qaldı.
Məsələ barədə Daxili İşlər Nazirliyindən Yeniavaz.com-a açıqlama verilib və bildirilib ki, mövzu ilə bağlı araşdırmalar aparılır və hüquqi qiymət veriləcək.
“Şirnikləndirici vədlər verərək əvəzində aşağı səviyyədə xidmət göstərən turizm şirkətlərilə bağlı daxili işlər orqanlarına müraciətlər daxil olur. Daxil olan müraciətlər əsasında araşdırmalar aparılır və araşdırmanın nəticəsindən asılı olaraq məsələlərə hüquqi qiymət verilir.
Tövsiyə edirik ki, vətəndaşlarımız etibar etmədiyi şirkətlərə müraciət etməsinlər”.
Düşmən gülləsinin ağ ciyərinin üçdən ikisini apardığı, xaricdə müalicəyə ehtiyacı olan, lakin ƏƏSMN -in bu ehtiyacı illərdir “heç bir ölkə ilə müqavilə bağlanılmamasl” səbəbi (?) ilə qarşılamaqdan imtina etdiyi Qarabağ qazisi Xaliq Abbaszadənin pensiyasını də Xüsusi Şərtlərlə Təyinat üzrə Mərkəzi Filialı dələduzlarla bölmək qərarına gəlib. Suraxanı yol polisi Tahir İsgəndərov Qarabağ əlilinə aidliyi olmayan 90-HX-384 dövlət nömrə nişanlı “əlil avtomobili”nin məmur oğlu “avtoşbala” məmurun içkili idarə etdiyi 10-CK-200 nömrəli avtomobillə arxadan durduğu yerdə vurulmasını elə aktlaşdırıb ki, əlil məhkəmə təminatı qaydasında 400 manat ödəmək zorunda qalıb. Hələ də başabəla yol polisinin 2013-cü ildə tərtib etdiyi protokol vətəndaşa verilmir. Amma dələduzluq əməlinə yaşıl işıq yandıran yol polisinin ardınca “Rəvan” sığorta şirkəti, Ədliyyə Nazirliyi Suraxanı icra məmuru Vüsal Əliyev və məhkəmələr yardıma ehtiyacı olan Qarabağ qazisinin olan -qalan toxunulmaz əmlakına, hətta PENSİYASINA dələduzluq hücumlarına keçiblər. Və hücum bəhrəsini verib : Qarabağ qazisi reabilitasiya mərkəzində müalicədə olduğu zaman ƏƏSMN tabeliyində DSMF-in Xüsusi Şərtlərlə Təyinat üzrə Mərkəzi Filialı dələduz icra məmurunun məktubu (?) ilə əlilin qanı ilə qazandığı pensiyasını yarıqat edib. Odu-budu, Qarabağ qazisi 4 ildir pensiyasının 350 manatından məhrum edilib.
Bakı İnzibati Məhkəməsinin cavabdeh ƏƏSMN tabeliyində DSMF-in Xüsusi Şərtlərlə Təyinat üzrə Mərkəzi Filialına qarşı iddianı mümkün saymayan və apellyasiya instansiyasının da qüvvəyə mindirdiyi iki aktını Ali Məhkəmə ləğv edib və iş 3-cü dəfə (də!) qərardadı ləğv edilən Nəriman Abıyevə verilib. Halbuki işin baxılmasında iştirak edən hakimin işə təkrar baxmasını qanunverici yolverilməz sayır. Amma kimdir qanuna baxan, Nəriman Abıyev bu yol “daxili rüşvət inamı” ilə qərara alıb ki, “İcra haqqında” qanunun 68.1.2 maddəsi -tələbin borclunun xidməti vəzifələrini icra edərkən aldığı xəsarətlərə yönəldilə bilməzliyi- Vətəni müdafiə edərkən ağ ciyərinin üçdən ikisini itirən Qarabağ qazisinə şamil edilə bilməz! Bu hakimin daxili inamı 3-5 manata elə köklənib ki, heç əlilin pensiyasının yarıqat edilməsinə “əsas” olan məhkəmənin qanuni icra sənədinin olmadığına da qiymət verə bilməyib.
Qərardan Bakı Apellyasiya Məhkəməsinə şikayət verən Qarabağ qazisinin şikayətini də hakim Səadət Bəktaşinin sədri olduğu heyət 03.08.2021 tarixli qərarla təmin etlməyib və artıq bir il bir həftədir, bu qərar iddiaçı Qarabağ qazisinə verilmir! (?) Yeri gəlmişkən, həmin bu Nəriman Abıyevin cavabdeh ƏƏSMN tabeliyində Sosial Xidmətlər Agentliyinin və DİN-in xidmətdən imtinasından iddianın 6 aylıq süründürməçilikdən sonra mümkün sayılmaması barədə qərardadından şikayətə də Həmid Həmidovun sədrlik etdiyi üçlüyün 20.06.2022 tarixli qərardadı 50 gün keçməsinə baxmayaraq hələ də bu sətirlərin yazarı iddiaçı Qarabağ qazisinə verilmir. Təsəvvür edin, 17.06.2022-ci ildə 3 gün qabağa sms-bildiriş verilib, bu kobud prosessual pozuntuya nəinki hüquqi qiymət verilib, heç qeyri-prosessual göstərişlə qəbul edilmiş qərardad da yoxa çıxıb. (?) Belə bəlli olur ki, Nəriman Abıyevin Bakı Apellyasiya Məhkəməsində “dayısı” var , şikayətlər apellyasiya instansiyasında itib – batır !
Nə isə, qonudan uzaqlaşmayaq, qonumuz- mövzumuz düşmən gülləsinin ağ ciyərinin üçdən ikisini, yerli məmurların pensiyasının yarısını, əmlakının hamısını apardığı, xaricdə müalicəyə ehtiyacı olan Qarabağ qazisi Xaliq Əvəz oğlu Abbaszadənin Konstitusiya ilə təminat verilən sosial təminat, pensiya, məhkəmə təminatı, özbaşınalıqdan müdafiə, sağlamlığın qorunması hüquqlarının kobud pozuntusu haqqındadır. Gerçəkdə ƏƏSMN -in və tabeliyindəki qurumların Qarabağ qazisinin hüquqlarını müdafiə etməyə görəv borcu olması bir yana, heç əlilin özünün məhkəmə müdafiəsinə qeyri-prosessual qadağa qoyan sosial müdafiə qurumunu anlamaq çox çətindir. Axı icra məmurlarının, məhkəmə dəllallarının, sığorta reketlərinin dələduzluğunu birtəhər anladıq, bəs sosial dələduzluğu necə başa düşək? Əlilin istənilən dələduz hücumundan toxunulmaz pensiyası necə dələduzların yemi ola bilər?
Qarabağ qazisinin pensiyasını dələduzlarla bölən ƏƏSMN, indi reyestrdə əlil haqqında məlumat tapa bilmir ! (?) Əlilin pensiyasını yarıqat edəndə e-sistemdə məlumat olur, əlilə qanının pulunu verməyə gələndə olmur?
Məğrur Bədəlsoy
Son günlər sosial şəbəkələrdə müzakirə olunan bir mövzu əksər vətəndaşlarımız kimi, bizim də diqqətimizi cəlb etdi. Söhbət Azərbaycanda Zirə, Şəmkir, Xaçmaz “pomidor brendləri”nə alternativ olaraq yetişdirilən yeni sort pomidordan gedir. Əlbəttə, sual verə bilərsiniz ki, burda nə var, əgər son illər yediyimiz tərəvəz növlərinin böyük əksəriyyəti torpaqdan kənarda, süni yollarla becərilirsə, müasir üsullarla Zirə, Şəmkir və Xaçmaz pomidorlarından daha dadlı, ləziz pomidor niyə də yetişdirilməsin?!
Təbii ki, bu düşüncədə olan oxuclarımızın fikirlərinə haqq qazandırmamaq mümkün deyil. Amma söhbət ondan gedir ki, yeni sort pomidorun yetişdirilməsi heç də hansısa kənd təsərrüfatı mütəxəssisimizin beyninin məhsulu deyil. Sosial şəbəkələrdə “Penitensiar pomidoru” adı verilən bu tərəvəz növünün “ixtiraçısı”nın Azərbaycan Respublikası Ədliyyə nazirinin müavini, Penitensiar Xidmət rəisi, ədliyyə general-leytenantı Ceyhun Həsənov olduğu bildirilir. Görünür, elə bu səbəbdən də yeni pomidor növü - “Penitensiar pomidoru” hər kəsin marağına səbəb olub.
Əlbəttə, ilk baxışdan general C.Həsənovun yeni pomidor sortu yetişdirməsi heç də qeyri-adi hadisə sayılmamalıdır. Deyə bilərik ki, general olanda nə olar, görünür, adam kənd təsərrüfatı sahəsinə böyük maraq göstərir! Amma nəzərə alsaq ki, bu gün Penitensiar Xidmətin tabeçiliyində olan həbsxanalarda olduqca acınacaqlı durum yaşanır, içəridə Azərbaycan qanunları deyil, kriminal qrupların “qanunları” hökm sürür, üstəlik, narkotik alveri günbəgün çiçəklənir, dövlətimizin təhlükəsizliyinə qarşı ciddi proseslər baş verir, belə bir vəziyyətdə xidmət rəisinin gedib pomidor yetişdirməklə məşğul olması heç də normal hadisə sayıla bilməz. Yəqin, elə general-leytenantın başı əkin-səpin işinə qarışdığından türmələrdə “nadzorlar” da özləri üçün biznes sahələri yaradıblar. Hansı ki, burada hər şey satın almaq olar, necə deyərlər, puluna minnət...
Dəyərli oxucuların diqqətinə çatdıraq ki, sosial şəbəkələrdə vətəndaşlarımız Ceyhun Həsənovun Salyanın Xələc kəndində və Qızılağacda özünə məxsus min hektardan çox torpaq sahələrində yeni növ pomidor sortu yetişdirməsi və digər tərəvəz növləri əkib-becərməklə məşğul olması ilə bağlı iradlarını məhz bu şəkildə bildirirlər: “A kişi, pomidor yetişdirmək arzusundasansa, get, Kənd Təsərrüfatı Nazirliyində özünə bir iş tap, Penitensiar Xidmətdə nə işin var?”. Əslində, tamamilə haqlı təklifdir. Bir halda ki, general-leytenant işini-gücünü atıb, pomidor alverinə girişib, o halda gedib aqronomluğa başlasa, həm öz biznesi, həm də kənd təsərrüfatımızın inkişafı üçün daha böyük fayda verməzmi?!
İndi bəzi ağzıgöyçəklər deyəcəklər ki, bu adamdan nə istəyirsiniz, ölkədə sərbəst bazar iqtisadiyyatı mövcuddur, istəsə pomidor əkər, istəsə də lap Sabirabad qarpızı! Əlbəttə, bizim general-leytenantın pomidor yetişdirməsinə iradımız yoxdur. Heç onun min hektardan çox yararlı torpaq sahələrini necə ələ keçirməsi haqda da sorğu-sual etmək fikrində deyilik. Amma bu gün Penitensiar Xidmətin nəzarətində olan cəzaçəkmə müəssisələrində vəziyyətin acınacaqlı halda olması, türmələrin ölkəmizin təhlükəsizliyi üçün aşkar təhdid mənbəyinə çevrilməsi hər bir vətəndaş kimi bizi də narahat etməyə bilməz. Bəlkə Ceyhun Həsənov onu xidmət rəisi vəzifəsinə təyin etdirən məmurdan ehtiyat edərək istefa vermək istəmir, amma biz yetkili şəxslərin və qurumların diqqətinə çatdırmaq istəyirik: bir halda ki, bu adam uşaqlıq arzusu olan aqronomluğa belə böyük həvəs göstərir, niyə onun öz sevdiyi peşəsi ilə məşğul olmasına imkan vermirsiniz, zorla Penitensiar Xidmətin başında saxlayırsınız?! Günah deyilmi?
Yeri gəlmişkən, bu günlərdə mətbuatda general-leytenantın oğlunun da biznesə başladığı haqda informasiya yayıldı. Belə ki, demokrat.az saytının məlumatına görə, şənbə günü Salyan rayonu ərazisində C.Həsənovun oğlunun da iştirakı ilə “Yolüstü” adlı restoranın təmtəraqlı açılış mərasimi keçirilib. Qeyd olunur ki, Bakı-Astara magistralının hər iki kənarında yerləşən bu restoran Ceyhun Həsənovun doğulduğu kəndin adını daşıyır. Salyan sakinləri deyir ki, general-leytenantın oğlu yeni açdığı restorana “Yolüstü” adı verməklə, atasına böyük “jest” etmiş olub.
Beləliklə, Ceyhun Həsənov kimi, oğlunun da uğurlu biznesin başlanğıcını qoyduğunu düşünmək olar. Hər halda, “Penitensiar pomidoru” son günlər vətəndaşlarımızın böyük marağına səbəb olduğundan, yəqin ki, bu ləziz təamın dadına baxmaq istəyənlər tezliklə general oğlunun restoranına axın edəcəklər. Üstəlik, burada müştərilər C.Həsənovun yetişdirdiyi digər tərəvəz məhsullarının da dadına baxa biləcəklər.
O ki qaldı satışdan geri qayıdan və restorandan artıq qalan, boşalmış və yarıxarab pomidorlara, heç şübhəsiz, Ceyhun Həsənov həmin məhsulları da işə keçirməyin yolunu tapıb. Yox, fikrinizə başqa şey gəlməsin, general-leytenantın tomat zavodu açdığı haqda bilgimiz yoxdur. Amma sosial şəbəkələrdə deyilənlərdən də belə anlaşılır ki, həmin pomidorlar türmələrdə “vitrinə düzülür”. Özü də bayırda satıldığından bir neçə dəfə baha qiymətə.
P.S. Doğrusu, Ceyhun Həsənovun niyə Penitensiar Xidmətin rəisi vəzifəsindən ikiəlli yapışdığı indi bizə agah oldu. Axı, türmələrə nəzarəti itirərsə, xarab pomidorlarını harada işə keçirə biləcək?! //hurriyyet.az//
XalqXeber.Az
Xeyli müddətdir ki, Şəki şəhəri, Muxtar Hacıyev-14 ünvanında fəaliyyət göstərən Şəki Rayonlararası Psixiatriya Xəstəxanasında qol qoyulan çoxsaylı qanunsuzluqlar, bənzəri olmayan biabırçılıqlar, olmazın həngamələr və s., həm geniş ictimaiyyətin müzakirə etdiyi, həm də əksər media qurumlarının gündəmini zəbt edən əsas mövzulardan birinə çevrilib.
DİA.AZ Atvaktual.az-a istinadən bildirir ki, hər dəfə baş verən iyrəncliklərə bu səhiyyə müəssisəsinin rəhbəri “əlahəzrət” Natiq İsmayılov hansısa “don geydirməyə” çalışsa da, deyəsən artıq bu şəxsin söylədiyi yalanlar “ayaq tutub yerimir”. Onu da unutmaq olmaz ki, Şəki Rayonlararası Psixiatriya Xəstəxanasında baş həkim vəzifəsini daşıyan Natiq İsmayılov, çox zaman fırıldaq əməlləri ilə geniş ictimaiyyəti çaşdırmağı bacarıb. Baxmayaraq ki, bəzi nüfuzlu media qurumlarında yayımlanan məqalələrdə qeyd olunub ki, bu Xəstəxanada müalicə olunan bəzi xəstələrin əməyindən fiziki işlərin görülməsində istifadə olunur, heç bir əsas olmadan xəstələrin yaxınlarından pul alınır, hətta elə hallar da olur ki, xəstələr həkimlərin fiziki zərbələrinə “tuş gəlirlər”.
Natiq İsmayılovun bugünkü fırıldaq əməllərindən biri də, əslən Şəki şəhərindən olan və hal-hazırda “ARB” televiziya kanalının mühasibatlıq şöbəsində yarım ştat vahidi üzrə çalışdığı söylənilən Şamxal adlı şəxslə qurduğu işbirliyinin varlığıdır. O halda sual oluna bilər ki, görəsən hər iki şəxs nə yöndə iş-güc düzüb qoşublar ki, bu gün onların əməlləri daha çox müzakirə obyektinə çevrilib?. Bu yöndə apardığımız araşdırmalar zamanı bəlli oldu ki, daim yerlibazlıq amilini özünün qəlbində və unutmadığı düşüncəsində, eyni zamanda ürək nahiyəsinin sağ və sol cinahında gəzdirməyə qərar verən Natiq İsmayılov, əslən Şəki şəhərindən olan Şamxal adlı şəxsə əməlli-başlıca “yaşıl işıq” yandırıb. Belə ki, o, bu şəxsi həm Şəki Rayonlararası Psixiatriya Xəstəxanasına baş mühasib təyin edib, həm də ona mətbuatın və ictimaiyyətin suallarını cavablandırmaq səlahiyyəti verib. O halda sual oluna bilər ki, görəsən media hara, mühasibatlıq hara? Deməli, Natiq İsmayılovun mediadan və ictimaiyyət nümayəndələrindən “qaçaq düşməsi”nin, həmçinin başqa bir “kölgə”nin altında sığınıb gizlənməsinin müəyyən özəllikləri var. Məsələnin daha maraqlı və düşündürücü tərəfi isə ondan ibarətdir ki, xüsusi səlahiyyətlərə sahib olan Şamxal adlı şəxs, Şəki Rayonlararası Psixiatriya Xəstəxanasına üz tutan media nümayəndələrinə qarşı, sanki “Qoçu Əsgər” rolunda çıxış edir. Bu da o demək olur ki, nə Natiq İsmayılov, nə də ki, Şamxal heç bir qanun-qaydanı, lazımi tələbləri “priznavat” etmirlər. Hələ bunlar harasıdır? Artıq hər kəs tərəfindən Natiq İsmayılovun “görən gözü, vuran qolu” hesab olunan Şamxal adlı şəxs, məhz orda-burda “Mən Şəki Rayonlararası Psixiatriya Xəstəxanasının müfahizə xidmətinə də rəhbərlik edirəm” deməyi də unutmur. Yəni, bu şəxsin söylədiklərinə cavab olaraq o sualı da vermək olar ki, görəsən söhbət hansı mühafizə xidmətindən gedir? Deməli, Natiq İsmayılov Şamxala elə bir ixtiyar verib ki, o, həm özünü “Qoçu Əsgər” hesab edir, həm mühafizə xidmətinin (olmayan mühafizə xidmətinin) rəisi adlandırır, həm də ki, külli-ixtiyar sahibi də hesab edir. Hətta, onun “Bilirsinizmi, mən bir neçə müəssisədə mühasib işləyirəm” deməsi də onu sübut edir ki, bu şəxs daha çox Natiq İsmayılovla işbirliyində olur və hər cür maxinasiyaları yola verməyi də bacarır.
Düşünürük ki, Nazirlər Kabinetinin 01 yanvar 2020-ci il tarixli qərarı əsasında TƏBİB-in tabeliyinə keçən Şəki Rayonlararası Psixiatriya Xəstəxanasında baş verən hər cür hoqqalar, bu qurumun İdarə Heyətinin sədri vəzifəsini daşıyan cənab Vüqar Qurbanovun diqqətini cəlb edəcək. Yəqin ki, o halda Natiq İsmayılova “dur” da deyiləcək. Yoxsa, ...
Yazıda adı keçən hər kəsin mövqeyini dinləyə bilərik. Mövzuya yenidən qayıdacağıq.