 |
|
|
44 günlük Vətən müharibəsinin iştirakçısı Tural Nəsmiyev ona qarşı törədilən dələduzluq əməlindən şikayətçidir.
TEREF.AZ KONKRET.az-a istinadla xəbər verir ki, bu barədə Oxu.az-a Tural Nəsmiyev özü məlumat verib.
Şirkət rəhbəri talassemiyalı uşaqlar üçün yığılan yardımları mənimsəyib
İki övladı talassemiya xəstəsi olan hərbçi onların əməliyyatı üçün ianələr əsasında toplanan 35 000 ABŞ dolları məbləğində pulun özünü “Urmedhelp” və “My Doc Tour” adlı şirkətlərin rəhbəri kimi qələmə verən Nuridə Seyidova tərəfindən aldadılaraq ələ keçirildiyini qeyd edib. Tural Nəsmiyevin müraciətini olduğu kimi təqdim edirik:
“Mənim üç övladımın ikisi talassemiya xəstəsidir. Onlar Respublika Talassemiya Mərkəzində qeydiyyatdadırlar, mütəmadi müayinə olunurlar, lazımi dava-dərman – hamısı dövlət tərəfindən qarşılanır. Amma bu xəstəliyin tam sağalması üçün sümük iliyinin köçürülməsinə ehtiyac var. Biz araşdırmalarımızdan sonra özünü Türkiyədə yerləşən “Medical Park” xəstəxanasının Azərbaycan üzrə nümayəndəsi kimi təqdim edən və donor axtarışını həyata keçirdiyini bildirən Aynur adlı xanımla əlaqə saxladıq. O, ödəniş edildikdən sonra bizim üçün donor axtarışının həyata keçiriləcəyini bildirdi. Sonra uşaqlardan qan nümunələri götürüldü və Türkiyəyə göndərildi. Ayyarım sonra bizə məlumat verildi ki, Türkiyədə donor bankında uşaqlarımıza uyğun gələn donorlar tapılıb. Türkiyənin özəl xəstəxanalarında isə bir xəstə üçün 85-90 min dollar pul lazımdır.
Tələb olunan məbləğin təmin olunmasına maddi imkanımız çatmadığı üçün kütləvi informasiya vasitələrində və sosial şəbəkələrdə yardım toplama kampaniyaları başladaraq, könüllü dəstək istədik. İanələrlə, tanımadığımız insanlar, dostlar, tanışlar sayəsində lazım olan məbləğin bir hissəsini, yəni 35 000 ABŞ dolları toplaya bildik. Lakin bu məbləğ hər iki uşağın əməliyyatına gərəkli pulun yarı hissəsi belə deyildi. Bundan sonra Aynur xanım bizi Seyidova Nuridə Məmməd qızı ilə tanış etdi. O bildirdi ki, Nuridə xanım xeyriyyəçiliklə məşğuldur, uşaqların sağalması üçün maddi kömək göstərəcək.
Nuridə Seyidova özünü “Urmedhelp” və “My Doc Tour” adlı iki MMC-nin rəhbəri kimi təqdim edərək, mənə vəd verdi ki, lazım olan pulun 30 faizi xəstə uşaqların valideynləri, yerdə qalan 70 faizi isə onun özü tərəfindən təmin ediləcək. Bu 70 faizin hansısa adının açıqlanmasını istəməyən zəngin iş adamı tərəfindən təmin edildiyini dedi. Həmin şəxs barədə məlumat almaq istədikdə isə bu məlumatın bildirilməsinin mümkün olmadığını, əks halda həmin yardımsevər şəxsin pulu təmin etməyəcəyini söylədi. Mən onunla razılaşaraq, bu barədə əlavə suallar vermədim. Tələb olunan miqdarda pul Nuridə tərəfindən Türkiyədəki özəl xəstəxanaya köçürülməli və uşaqlarımız əməliyyat olunmalı idi. Nuridə məndə olan 35 000 dolları ona verdikdən və qalan məbləğ təmin edildikdən sonra əməliyyat üçün müvafiq işlərin görüləcəyini bildirdi.
Bundan sonra, 2022-ci ilin avqust ayında özünü Nuridə xanımın işçisi kimi təqdim edən Aysel Məmmədova mənə zəng edib bildirdi ki, əməliyyat üçün məndə olan pulu ona təhvil verməliyəm. Onun sözlərinə görə, toplanılmış puldan çox az hissəsi qalıb ki, onu da bir aya qədər həmin adının açıqlanmasını istəmədiyi şəxslərdən təmin edib, uşaqları müalicə üçün Türkiyəyə göndərəcəklər.
01.09.2022-ci il tarixdə Nuridə Seyidova və Aysel Məmmədovaya 35 min dolları təhvil verdim. Həmin vaxt pulu verib-verməmək barədə tərəddüd keçirirdim, çünki onların danışıqları şəffaf və ardıcıl deyildi. Lakin övladlarımın çarəsiz halı məni onlara inanmağa məcbur etdi. Nuridə ona güvənmədiyimi bilirdi və mən 35 000 ABŞ dollarını ona videogörüntüyə alaraq verəcəyimi bildirdim. O da razılaşdı.
Oktyabr ayında Nuridə, Aysel və bizi onlarla tanış edən Aynur adlı xanım bizə həmin ayın sonu Türkiyəyə getmək üçün biletləri almağımızı söylədilər. Uşaqların hər ikisini Türkiyənin Samsun şəhərinə, “Medical Park” xəstəxanasına apardım. Orada uşaqlardan qan nümunələri götürüldü, aradan bir neçə gün keçəndən sonra öyrəndim ki, Nuridə tərəfindən uşaqlarımızın adına bir manat belə ödənilməyib. Türkiyədə olanda ona zəng edib, hər şeyi soruşdum. Nuridə müxtəlif bəhanələr və yalan vədlər ilə problemin tez bir zamanda həll olunacağını dedi. Lakin heç bir real hərəkət etmirdi. Artıq xəstəxana da onların fırıldaqçı olduğunu anlamışdı və bizdən ya ödənişlərin edilməsini, ya da xəstəxanadan kənarlaşmağımızı istədilər. Nuridəyə bunu dedikdə isə xəstəxanaya guya müəyyən qədər ödəniş etdiyini, əməliyyat üçün pulun ən qısa zamanda (adətən, 1-2 günə deyirdi) ödəniləcəyini söylədi. Halbuki dekabrın sonlarında oğlumu xəstəxanaya yerləşdirərkən bizdən yatış üçün bütün məsrəflərin ödənişini tələb etdilər və mənim tərəfimdən ödənişlər edildikdən sonra usağı qəbul etdilər.
Nuridə tərəfindən aldadıldığımı bildikdən sonra isə ondan ona verdiyim 35 000 dolları geri tələb etdim. Nərimanov Rayon Polis İdarəsinə şikayət etdikdən sonra 24.01.2023-cü il tarixdə şikayətimiz operativ şəkildə araşdırılaraq, Nuridə və Aysel polis idarəsinə dəvət edildilər. Onlara, sadəcə, iki gün vaxt verməyimizi xahiş edərək, iki gün sonra məndən aldığı 35 000 dolları qaytaracaqlarını bildirdilər. Lakin həmin tarixdən bu yana dəfələrlə bizi aldadaraq, pulu bir günə, iki günə qaytaracaqlarını deyirlər. Bununla həm istintaqı, həm də bizi aldatmağa davam edirlər.
Əlavə olaraq qeyd edim ki, Samsunda bizimlə birlikdə daha üç ailə qalırdı. Onlar da eyni şəxsin dələduzluğundan əziyyət çəkirlər. Aprel qazisinin də övladını əməliyyat adı ilə aldadıb, oraya göndərmişdilər. Ümumilikdə beş xəstə uşaq əməliyyat üçün gözləyirdi.
Hazırda uşaqlarım Samsundadırlar. Öz topladığımız pulla uşağımın birini əməliyyat etdirməyə çalışıram. Hələ də gözləyirəm. Pulumu qaytarmayıblar.
Mən, onsuz da, çarəsizəm, ikinci dəfə belə vəziyyətə düşmək istəmirəm. Biz əziyyət çəkirik, uşaqlarım xəstədir. Digər valideynlər də övladlarının sağalması ümidi ilə bilmədikləri qapıya düşməsinlər deyə bu dələduzları hər kəsin tanımasını, bizdən alınan pulların qaytarılmasını xahiş edirəm. 15-ə yaxın ailə var ki, həmin şəxsin dələduzluğundan əziyyət çəkir. Onların külli miqdarda pulu ələ keçirilib. Bu, hüquq-mühafizə orqanlarının araşdırmalarında da təsdiq edilib. Kömək edin, övladlarımızı bu dələduzların əlindən qurtaraq”.
Qeyd edək ki, Tural Nəsmiyevin redaksiyamıza müraciətində qeyd etdiyi mobil nömrələr əsasında Nuridə Seyidova ilə əlaqə yaratmağa çalışdıq. Nuridə xanımla danışdıqda o, məsələnin tamam başqa cür olduğunu, redaksiyamıza gələrək, üz-üzə hər şeyi danışmaq istədiyini bildirdi. Qarşı tərəfin bu təklifi ilə razılaşdıq və onu redaksiyamıza dəvət etdik. Lakin sonrakı cəhdlərimizdə Nuridə Seyidova ilə əlaqə saxlaya bilmədik, zənglərimizə cavab vermədiyindən mövqeyini də təqdim edə bilmirik.
İstənilən halda, qarşı tərəfin haqqında qeyd edilən ittihamlara cavabını dərc etməyə hazırıq.
Bakı Şəhəri üzrə Təhsil İdarəsinin keçirdiyi tender müsabiqəsinin (Açıq tender) qalibi “Azərmətbuatyayımı” ASC (VÖEN-1500515761) olub.
TEREF.AZ yeniavaz.com-a istinadla xəbər verir ki, “Azərmətbuatyayımı” ASC Təhsil İdarəsinə adları aşağıdakı cədvəldə yer alan jurnal və qəzetləri satacaq və qarşılığında 475 min 720 manat alacaq.
Məlumat üçün bildirək ki, nizamnamə kapitalı 345 min 304 manat olan “Azərmətbuatyayımı” ASC 07.08.2007-ci ildə dövlət qeydiyyaytına alınıb. Qanuni təmsilçisi Salmanov Süleyman Əli oğlu olan ASC-nin hüquqi ünvanı “Nərimanov rayon, Ceyhun Hacıbəyli, ev 30 K”də yerləşir.
Qeyd edək ki, “Azərmətbuatyayımı” ASC-nin səhmdarının “Kaspi Mətbuat Yayım” MMC (VÖEN – 1700165031) olduğu bildirilir. 01.03.2004-cü ildə dövlət qeydiyyatına alınan “Kaspi Mətbuat Yayım” MMC-nin qanuni təmsilçisi də Salmanov Süleyman Əli oğludur.
“Kaspi Mətbuat Yayım” MMC-nin dövlət qeydiyyatına alındığı hüquqi ünvan olan "Fi̇krət Əmi̇rov küçəsi, ev 1"də Prezident Administrasiyasının ləğv olunan İctimai-siyasi məsələlər şöbəsinin sabiq müdiri Əli Həsənоvun ailə üzvlərinə bağlı olan şirkətlər yerləşib.
Fi̇krət Əmi̇rov küçəsi, ev 1 ünvanında qeydiyyatda olan və ötən il ləğv olunan "ATOM QİDA" MMC-yə (VÖEN -1701554201) Əli Həsənovun ABŞ-da yaşayan oğlu Şamxal Həsənli rəhbərlik edib.
2021-ci ildə Əli Həsənovun ailə üzvlərinə məxsus olan və Fikrət Əmirov küçəsi, ev 1 ünvanında yerləşən “Bakı 24” MMC, “Kaspi AZ” MMC, “Mətbuat Evi” MMC, “Golden Prince” MMC, “Global Advertisment” MMC və “Kaspi Co” MTK adlı şirkətlər də ləğv olunduğunu elan ediblər. Adları çəkilən bu şirkətlərə Şamxal Həsənli və Əli Həsənovun həyat yoldaşı Sona Vəliyevanın yaxın qohumu Azər Vəliyev rəhbərlik edib.
Bunlardan başqa hazırda Fi̇krət Əmi̇rov küçəsi, ev 1 ünvanında qeydiyyatda olan “Kaspi Education” MMC-nin (VÖEN – 1701352711) qanuni təmsilçisi də Əli Həsənovun həyat yoldaşı Sona Vəliyevadır.
Lənkəran sakini Məmmədov Nihat Xaləddin oğlu çıxılmaz durumdadır.
TEREF.AZ jmaz.info-ya istinadla xəbər verir ki, hər iki valideyn himayəsindən məhrum olan, uşaq evində böyüyən Nihat, həm də 2 üçəm olmaqla 6 uşaq atasıdır. Yəni, hər dəfə üçəm olmaqla 6 qız atası olub. Lakin indiyə qədər nə özünə iş tapa bilir, nə də dövlət tərəfindən ona hər hansısa yardım edilir. Nihat bildirir ki, fəhlə işləməklə ailəsini birtəhər dolandıra bilir. Lakin qazancı üçəmlərin normal qidalanmasına belə yetmir. Ona görə də, bir çox dövlət qurumlarına üz tutmaq məcburiyyətində qalıb. Qeyd edək ki, iş və ailə vəziyyəti ilə əlaqədar Lənkəran şəhər İcra Hakimiyyətində bir neçə dəfə qəbulda olub. Lakin İcra Hakimiyyətindən bildiriblər ki, onlarda Nihat üçün hər hansı iş yoxdur. Bundan sonra üçəmlərin atası Əmək və Əhalinin Sosial Müdafiəsi Nazirliyinin yerli strukturlarına həm işlə təmin olunmaq, həm də ünvanlı sosial yardım almaq üçün müraciət edib. Dövlət Məşğulluq Agentliyinin Lənkəran şöbəsindən də onu əliboş qaytarıblar. Uyğun iş olmadığını deyiblər. Ünvanlı sosial yardım üçün isə müraciətinə cavab olaraq deyiblər ki, bunun üçün Nihatın rəsmi iş yeri olmalıdır. Beləliklə, 6 uşaq atası çarəsiz qalıb. Nə edəcəyini də bilmir.
Bəs, qanun nə deyir? Nihat Məmmədov ünvanlı sosial yardım ala bilərmi?
6 uşaq atası üçün qanunda hansı hallar və güzəştlər nəzərdə tutulub?
Azərbaycan Respublikası Prezidentinin son sərəncamına əsasən ailədə 5 və daha artıq uşaq olarsa, dövlət heç bir şərt olmadan hər bir uşağa 105 manat müavinət verməlidir. Bunun üçün yaşadığı ərazi üzrə Dövlət Sosial Müdafiə Fonduna müraciət etməli, müvafiq sənədlər təqdim olunmalıdır. Bundan başqa, ailədə 8 yaşdan aşağı uşaq (uşaqlar) olduğuna görə, anadan hardasa işləmək tələb olunmur. Özü isə işsizlik sığortası aldığı üçün işləyən (maaş alan) hesab edilir. Ailədə adambaşına düşən minimum əmək haqqı məbləği (təxminən 240-265 azn arası hər adama) ailənin sayına vurulur. Alınan məbləğdən ailənin gəlirləri (atanın sığorta maaşı) çıxılır və alınan məbləğ həcmində sosial müavinat verilir.
Maraqlıdır, qanunda bunca məqamlar xüsusi olaraq göstərildiyi halda Azərbaycan Respublikası Əmək və Əhalinin Sosial Müdafiəsi Nazirliyi niyə Nihat Məmmədovun probleminə biganə yanaşır?…
Qeyd edək ki, sözügedən nazirlik, son illər ən çox şikayət edilən, narazılıq yaradılan quruma çevrilib.
Azərbaycanda əksər banklar yalançı reklam elanları ilə uzun illərdir ölkə vətəndaşları aldatmaqdadır. Yalançı faiz endirimləri, tək şəxsiyyət vəsiqəsi ilə kredit elanlarının toruna hər gün yüzlərlə vətəndaş düşür. Bankların onsuzda problemlər burulğanında boğulan insanlara qarşı apadıqları total dələduzluğa isə rəsmi qurumlar heç bir müdaxilə etmir.
TEREF.AZ Qlobal.az-a istinadla xəbər verir ki, sosial şəbəkələrdə reklam olunan banklardan biri də “Expressbank”-dır.
Bir neçə gün əvvəl sosial şəbəkələrdə 12 faiz şərtlə kredit elanını reklama çıxaran “Expressbank”-ın bu elanının yalan olduğu deyilir. Vətəndaşlar kütləvi olaraq yazdıqları şərhlərdə “Expressbank”-ı aldadıcı reklama görə qınayırlar.
“Expressbank”-ı yalançılıqda ittiham edən sosial şəbəkə istifadəçiləri 12 faiz kredit elanı ilə bankın insanları aldatdığını yazırlar.
“Expressbank”-ın sözügedən reklam çarxında Nadir Ələsgərov adlı sosial şəbəkə istifadəçisi “Reklamdan başqa bir şey deyil, feyk məlumatdır, elə şey yoxdur, ən aşağı kreditin faiz dərəcəsi 17 faizdən başlayır, sənəd işlərində də yorucudurlar, çox get-gələ salırlar. 12 faizdən heç bir bank heç bir şərtlə kredit vermir, sadəcə müştəri cəlb etmək üçün bir reklamdır”-deyə, yazır.
Valeh Abbasov isə bankın reklam çarxında “Bacardığınız qədər milləti yükləyin” yazır.
“Expressbank”-ın reklam çarxının yalan olduğunu bildirən sosial şəbəkə istifadəçilərindən biri də Onur Məmmədlidir: “Boş şeydi. Bu yaxınlarda getmişdim. Reklamda 12 faiz deyir amma 25 faizdən yuxarı verir. Deyir 12 faiz ancaq əmək haqqı 4000 manatdan yuxarı olanlara verilir. Maraqlıdı 4000 manat əmək haqqı alanlar varmı və 4000 manat əmək haqqı olan alan neynir krediti?”.
Seyfəl Mahmudov isə 20 min manat krediti nə üçün 17 faizlə verdiklərini sual edir: “Deyirsiz 30 minə qədər verilir.mən 1127 manat maş alıram iş yerimdə rəsmidi amma mənə 20 min verirlər 17 faizlə niyə və nəyə görə 30 min vermirlər?”.
Əhəd Nuriyev ad soyadlı sosial şəbəkə istifadəçisi isə “Expressbank”-ın ən yalan danışan bank olduğunu qeyd edir: “Yalan yazıb milliəti aldadmayın ən yalan danışan bank dır Expressbank”.
“Expressbank”-ın kredit faizlərinin daha çox olduğunu bildirən sosial şəbəkə istifadəçilərindən biri isə Anar Fətullayevdir. A.Fətullayev yazır: “Boş söhbətdi bu gün zəng vurdum 36 aya 21 faiz dedilər”.
Vaqif Qayıbov “Expressbank” barəsində fikrini daha lakonik vurğulayır: “Yalançı bankdılar”.
“Expressbank”-ın “sərfəli kredit” elanına şübhə edən vətəndaşlardan biri də Tural MahmudSoydur. T. Mahmudsoy “Vallah deməyinə gözəl deyirsiz, vacehinə çatanda min dənə hoqqa verirsiz”-deyə yazır.
Altay Yolcuyev ad soyadlı sosial şəbəkə istifadəçi isə 12 faiz kredit ümumiyyətlə çox olduğunu bildirir: “12 faizlə kim iş qurub işci saxlaya bilər? Elə qəşəng danışırsız. Deyin ki, ölməmək ücün gəlin kredit götürün yediyinizi faizlə ödəyin varlanaq bu daha inandırıcı olar. 12 faizlə iş qurmaq isə axmaqlıqdır. Özünüzə gəlin. Dünya statistikasında belə faiz dərəcəsi ilə sahibkara belə təklif edilməz. Başına atom bombası düşən yaponiya inkşaf etmək ücün 2 faizlə başlayıb. Bura isə Azərbaycandır. Yəni məqsədiniz qazandırmaq yox qazanmaqdır. 12 faizdə inanmıram. Adi vətəndaşa 29 faizlə kredit soxan məmləkətdir bura”.
“Expressbank”-ın reklam çarxına şübhə edən sosial şəbəkə istifadəçilərindən biri də Anar Aliyevdir. O, 12 faizlə şirnikləndirib 24-25 faizlə kredit verdiklərini yazır.
“Expressbank” reklam çarxına yazılan kütləvi narazılıqla dolu olan şərhlərə münasibət bildirməyib.
Qeyd edək ki, “Expressbank” ASC 1992-ci ildən yaradılıb. Bankın hazırda nizamnamə kapitalı 112.544.834 manat təşkil edir.
Xatırladaq ki, “Expressbank” ASC-nin Müşahidə Şurasının sədri Əfqan Cavadovdur.
Bankın İdarə Heyətinin sədri isə Mehman Məmmədovdur.
Azərbaycan Avtomobil Yolları Dövlət Agentliyinin (AAYDA) İdarə Heyətinin sədri Saleh Məmmədovun sabiq müşaviri Şahin İbadova məxsus “Bakı Tikinti Kosntruksiya” Qapalı Səhmdar Cəmiyyətinin ərazisində qeyri-qanuni tikililərin olması ilə bağlı Qaynarinfo-nun yazdıqları təsdiqini tapıb.
Teref.az yazır ki, belə ki, Qaynarinfo-nun bir müddət əvvəl Nərimanov Rayon İcra Hakimiyyətinə ünvanladığı rəsmi sorğu cavablandırılıb.
İcra Hakimiyyəti başçısının 1 nömrəli Sahə inzibati ərazi dairəsi üzrə nümayəndəliyinin rəhbəri Mirzə Mirzəyevin adından redaksiyamıza daxil olan rəsmi cavabda deyilir: “Nərimanov Rayon İcra Hakimiyyətindən daxil olmuş 26.01.2023-cü il tarixli, 5-14/1-1-4-071/2023 nömrəli məktuba tərəfimizdən baxılıb. Bildiririk ki, məktubda qeyd olunmuş ərazi 1 nömrəli Sahə inzibati ərazi dairəsində yerləşir.
Dərnəgül-2096-cı məhəllə ünvanında yerləşən “Bakı Tikinti Kosntruksiya” QSC-yə tərəfimizdən baxış keçirilib. 2022-ci ilin mart ayında “Bakı Tikinti Kosntruksiya” QSC-nin ərazisində dəmir konstruksiyadan ibarət anbarın inşa edilməsi prosesi tərəfimizdən aşkar edilib və bu barədə aidiyyatı qurumlara məlumat verilib”.
Xatırladaq ki, Qaynarinfo-nun dərc etdiyi məqalədə də “Bakı Tikinti Konstruksiya” QSC-də qeyri-qanuni tikililərin mövcudluğundan bəhs edilmişdi. Bildirilirdi ki, BTK ərazisində heç bir rəsmi dövlət orqanı ilə razılaşdırılmadan qeyri-qanuni soyuducu anbarlar tikilib.
Nərimanov Rayon İcra Hakimiyyətindən verilən rəsmi cavab da yazdıqlarımızı təsdiqləyir. Amma maraqlıdır ki, ərazidə qeyri-qanuni tikililərin salınması prosesi bir ilə yaxındır başlasa da, hələ də aidiyyəti qurumlar bununla bağlı heç bir tədbir görməyib.
Məsələ ilə bağlı, 27 dekabr 2022-ci ildə FHN yanında Azərbaycan Tikintidə Təhlükəsizliyə Nəzarət Dövlət Agentliyinin rəsmi ttnda@fhn.gov.az elektron ünvanına sorğu ünvanlasaq da, rəsmi cavab verilməyib.
Bundan əlavə, 7 yanvar tarixində Dövlət Şəhərsalma və Arxitektura Komitəsindən məsələ ilə bağlı açıqlama istəsək də, rəsmi elektron ünvanlarına məktub ünvanlamaq tövsiyyə edildi. Elə həmin tarixdə komitənin office@arxkom.gov.az elektron ünvanına sorğu ünvanlasaq da, hələ də cavab verilməyib.
Rəsmi qurumların bu susqunluğu ciddi suallar doğurur və bizi araşdırmalarımızı daha da dərinləşdirməyə sövq edir.
Qeyd edək ki, haqqında bəhs etdiyimiz ərazi İqtisadiyyat Nazirliyi yanında Əmlak Məsələləri Dövlət Xidməti tərəfindən 12.02.2021-ci il tarixində bağlanan 182 saylı müqavilə ilə QSC-yə icarəyə verilib. Araşdırmalarımız bu icarə müqaviləsi ilə bağlı da maraqlı məqamları ortaya çıxarıb. İstər icarə müqaviləsinin tələblərinə əməl olunması, istər əlavə ərazilərin zəbt olunması ilə bağlı suallar var. Hazırda bu istiqamətdə də araşdırmalarımız davam edir.
Qeyd edək ki, Qaynarinfo-da “Bakı Tikinti Kosntruksiya” QSC qeyri-qanuni fəaliyyətilə bağlı məlumat dərc edildikdən sonra Şahin İbadov Azərbaycan Avtomobil Yolları Dövlət Agentliyinin (AAYDA) İdarə Heyətinin sədri Saleh Məmmədovun müşaviri vəzifəsindən azad olunub.
Şikayətci yazır: "Mən 2007-ci ildə ailə qurmuşam. Həmin ildən həyat yoldaşımla birlikdə həyat yoldaşımın nənəsinin evinə gəlin köçmüşəm. O vaxtdan İsmayıllı rayonu M.Orucov küçəsi 41 nömrəli evə, yəni yoldaşımın nənəsigildə həyat yoldaşımla pasport qeydiyyatına düşmüşük. 2010-cu ildə həyat yoldaşım dünyasını dəyişib. Mən və 3 övladım həmin ünvanda qeydiyyatda olmaqla hazırda orada yaşayırıq.
Sözü gedən bu mənzildə bizdən başqa həyat yoldaşımın nənəsi və biz yaşamışıq. 2020-ci ilin sentyabr ayında yoldaşımın nənəsi də dünyasını dəyişib. Onu da bildirmək istəyirəm ki, gəlin gəldiyim gündən həmin nənəyə mən baxmışam. Evin komunal xərclərini mən ödəmişəm. İndi isə həyat yoldaşımın bibisi Əliyeva Aybəniz Paşa qızı mənim 3 uşaqımla evdən çıxmaqımı tələb edərək İsmayıllı rayon məhkəməsinə müraciət edib.Bu işə baxmaq üçün məhkəmənin hakimi İlqar Hüseynov 5 dəfə ayrı-ayrı vaxtlarda hazırlıq iclası keçirib, aylarla, yəni 4 aya yaxın qarşı tərəfdən danışmalar və razılaşmalar vasitəsi ilə məhkəməni uzadaraq qarşı tərəfin xeyrinə qərar qəbul etdi. Aldığım məlumata görə məhkəmədə hazırlıq İCLASI 1 dəfə olur. Bəs, görəsən hakim İ.Hüseynov nə məqsədlə məhkəməni 5 dəfə hazırlıq keçirməklə uzatdı.Mənə elə gəlir ki, hakim qarşı tərəfdən gözlədiyini aldıqdan sonra qeyri-qanuni olaraq evi Aybəniz Əliyevaya verməyi qərara aldı.
Məhkəmənin sonunda hakimə iradımı bildirdim. O, isə saymazyana, kobudcasına məni rədd etdi. Xahiş edirəm hakim İ.Hüseynovun qanuna zidd hərəkəti, davranışı, kobudluğu ilə bağlı tədbir görəsiniz. Mənə qanun çərçivəsində həmin mənzildə yaşayış hüququnun verilməsində köməklik edəsiniz."
Qarşı tərəfin mövqeyini də dərc etməyə hazırıq.
Naxçıvan şəhər sakini, 1960-cı il təvəllüdlü Hümbətov Famil Fəzi oğlu tərəfindən “Hürriyyət” qazetinin redaksiyasına şikayət məktubu daxil olub. Şikayətçi İddia edir ki, Naxçıvan Muxtar Respublikasının Ədliyyə naziri Daşqın Rəhimov onun oğlunu şərləyərək, boynuna 60 min manat pul qoyub:
“Mən, Hümbətov Famil Fəzi oğlu, yazaraq sizdən xahiş edirəm ki, mənim problemimi işıqlandırasınız.
Deməli, 2013-cü il, fevral ayının 11-dən oğlum Naxçıvan Muxtar Respublikasının Ədliyyə naziri Daşqın Rəhimovun telefon mağazasında işləyirdi. Həmin vaxtlar Daşqın Rəhimov Naxçıvan şəhər Prokrorluğunda çalışırdı. Günlərin bir günü D.Rəhimov dükanı təhvil-təslim etmədən, oğlumun üzərinə 60 min manat borc yazaraq, “bunu ödəməlisən” demişdir. O, oğlumun şəxsi maşınının acarlarını əlindən alaraq, polis cərimə meydançasına aparmışdır.
Oğlumu isə 2 sutka şəhər prokrorluğunda girov saxladılar. Həmin vaxt oğluma işgəncələr verərək, pulu boynuna qoymaq istəyiblər ki, özü öz yazısı ilə təsdiq etsin. Oğluma “boynuna almasan, cibinə nəşə qoyub səni o adla tutduracağıq”, - deyiblər. Oğlum izahat verərkən də, işgəncələrə məruz qalarkən də qeyd edib ki, Daşqın Rəhimov mağazanı yoxlamadan borc qoyur mənim üstümə. Amma buna məhəl qoyan olmayıb. Məcbur olub 20 min manat dəyərində olan maşınımı 10 min manata satdım. Həyətyanı torpağımı da ucuz qiymətə satdım. Gəlinimin, yoldaşımın qızıllarını dəyər-dəyməzinə satıb 30 min manat pul ödədim.
Naxçıvanda hakimiyyət dəyişdikdən sonra DTX-ya müraciət edərək başıma gələnləri danışdım. 1 ay sonra mənə zəng vurub dedilər ki, şikayət etdiyiniz insan barəsində sizə köməklik göstərə bilmirik, Respublika Prokurorluğuna müraciət edin.
Mən dəfələrlə Respublika Prokurorluğuna müraciət etsəm də, eyni cavabı almışam. Belə başa düşürəm ki, Naxçıvanda Ədliyyə Nazirliyinə sözü keçən bir qrum yoxdur?
Sizdən xahiş edirəm ki, bu məsələni işıqlandırın, bəlkə bir köməyi ola.
Redaksiyadan: Bu, bir iddiadır, nə qədər doğru və yanlış olduğunu biz deyə bilmərik. Odur ki, Yazıda adları çəkilən şəxslərin mövqeyini dərc etməyə hazırıq. //“Hürriyyət”//
Bugünlərdə "Hürriyyət"in redaksiyasına müraciət edən Bakı şəhəri, Səbail rayonu, Neftçi Qurban Abbasov küçəsi, ev 9, mənzil 4-də qeydiyyatda olan və yaşayan Sədaqət İmamqulu qızı Bayramova mənzilinin altındakı zirzəminin Daşkəsən Rayon İcra Hakimiyyətinin başçısı Əhəd Abıyev tərəfindən qanunsuz yolla alınıb Məmmədov Təmraz Əhəd oğlunun adına sənədləşdirildiyini iddia edib.
"Su və kanalizasiya xətləri keçən, bizim istifadə etdiyimiz ikinci zirzəmi də qanunsuz sənədlə razılığımız olmadan alındı"
Yaşadığı mənzilin atasına I qrup Böyük Vətən Müharibəsi əlili olduğu üçün prezident tərəfindən verildiyini deyən şikayətçi bildirib ki, atası hələ sağlığında qeyd olunan mənzili ona bağışlayıb: "Atam uzun müddət müharibənin fəsadlarından əziyyət çəkdiyi üçün doğulduğu Naxçıvan şəhərinə müalicə məqsədiylə gedib və orada dünyasını dəyişib. O, sağlığında Səbail rayonu, Neftçi Qurban Abbasov küçəsi, ev 9, mənzil 4 ünvanındakı mənzili mənə bağışlayıb. Nəzərinizə çatdırım ki, mənə və qonşuya məxsus olan 5 saylı mənzilin altında zirzəmi var. Həmin zirzəmidə su və kommunikasiya xətləri yerləşir, ora giriş isə mənzilin texniki pasportunda göstərildiyi kimi mənə məxsus anbarın arxasındadır. İndi isə həmin zirzəmi keçmiş millət vəkili, hazırda Daşkəsən Rayon İcra Hakimiyyətinin başçısı olan Əhəd Abıyev tərəfindən qanunsuz yolla alınıb və Məmmədov Təmraz Əhəd oğlunun adına mənzil kimi sənədləşdirilib. Daha sonra artıq tamah güc gəlib. Belə ki, su və kanalizasiya xətləri keçən, bizim istifadə etdiyimiz ikinci zirzəmi də qanunsuz sənədlə razılığımız olmadan alındı. Onu da bildirim ki, qonşuluqda ofisi olan Məmmədov Təmraz Əhəd oğlu ofisə su axıntısı olduğunu deyərək, bacımdan qapını açmağı xahiş edib. Sonra isə su xətlərinin təmiri adı ilə zirzəmidə qeyri-qanuni qazıntı işləri apararaq evin bünövrəsini boşaltmış, bu da azmış kimi 3 qonşunun bünövrəsinə xeyli ziyan vurub. Nəticədə mənzillərdə çatlar yaranıb. Bu da azmış kimi evə bitişik 15 saylı Uşaq Poliklinikasının bünövrəsini qazaraq oradan xeyli torpaq çıxarıb, evin poliklinikaya tərəf divarını kəsib, arxa qapı yaradıb, sonra qonşunun yataq otağına xeyli ziyan vuraraq ofisdən zirzəmiyə qapı açıb".
"Mən Məmmədov Təmraz Əhəd oğlunun nümayəndəsi Əliyev Faiq Aydın oğluna dövlət orqanlarına müraciətlərimi və verdiyi sözü xatırlatsam da, o mənə "Ala dövlət var", "Nə istəyirsən elə" kimi cavablar verdi"
Sədaqət Bayramovanın sözlərinə görə, bütün bunların nəticəsində mənzilində çatlar əmələ gəlib, girişin bağlanması səbəbindən su xətləri nəzarətsiz qalıb, evin alçipanı divardan aralanıb: "Həmçinin, qonşuların mənzillərində də ciddi fəsadlar yaranıb. Odur ki, mən qeyd olunanlarla bağlı 46 saylı Mənzil İstismar Sahəsinin rəisi Məmməd Əliyevi məlumatlandırdım və o, evə baxış keçirdi, o cümlədən qeyri-qanuni qazıntının video görüntülərini çəkdi. Bununla yanaşı, Səbail Rayon Polis İdarəsinin 8-ci Polis Bölməsinə, Səbail Rayon Prokurorluğuna, Baş Prokurorluğa, Səbail Rayon İcra Hakimiyyətinə, Birinci vitse-prezident Mehriban xanım Əliyevaya, Səbail Rayon Mənzil Təsərrüfat Birliyinə hadisə ilə bağlı məlumat verdim, Fövqəladə Hallar Nazirliyinin "112" çağrı mərkəzinə zəng vurdum. Lakin Məmmədov Təmraz Əhəd oğlunun nümayəndəsi Əliyev Faiq Aydın oğlu bərkitmə işlərinə başlayaraq zirzəmini əvvəlki vəziyyətinə gətirəcəyinə, mənzillərdə təmir-bərpa işlərini edəcəyinə dair söz verdiyi üçün şikayətlərimdən imtina etdim. Ancaq Məmmədov Təmraz Əhəd oğlu sözünün üstündə durmadı. Mən onun nümayəndəsi Əliyev Faiq Aydın oğluna dövlət orqanlarına müraciətlərimi və verdiyi sözü xatırlatsam da, o mənə "Ala dövlət var", "Nə istəyirsən elə" kimi cavablar verdi. Bundan sonra yenidən Səbail Rayon İcra Hakimiyyətinin başçısının qəbulunda oldum, vəziyyətin nə qədər təhlükəli olduğunu bildirdim. O, Tikintidə Təhlükəsizliyə Nəzarət Dövlət Agentliyinə təcili məktub ünvanlanmasına göstəriş verdi. Lakin bilərəkdən məktubda ödənişə zəmanət verilmədi. Bu səbəbdən də Tikintidə Təhlükəsizliyə Nəzarət Dövlət Agentliyi məktubu Səbail Rayon İcra Hakimiyyətinə geri ünvanladı. İcra hakimiyyətinin bilərəkdən vaxt itkisinə yol verdiyini gördüyüm üçün agentliyə ərizə verdim. Tikintidə Təhlükəsizliyə Nəzarət Dövlət Agentliyi tərəfindən mənzilə baxış keçirilsə də, zirzəmiyə baxış keçirilməsi mümkün olmadı. Çünki Məmmədov Təmraz Əhəd oğlu qanunsuz olaraq zirzəmiyə girişi daşla hördürmüşdü. Halbuki, biz uzun illər həmin zirzəmidən istifadə edirdik. Əlavə olaraq deyim ki, mənzilimdə yaranmış çatların bərpası üçün 4500 manat tələb olunur".
"Əliyev Faiq Aydın oğlu, Əhəd Abıyevin digər qohumları ekspert İsa Eyvazzadənin üstünə qışqıraraq, ekspertizanı onların tələbləri əsasında keçirməyi əmr etdilər"
Bununla bağlı Səbail Rayon Məhkəməsində iddia qaldırdığını vurğulayan şikayətçi bildirib ki, 2019-cu ildən bu günə kimi hər dəqiqə real təhlükə ilə üz-üzə qalıb: "10 fevral 2023-cü il tarixdə mənzilə və zirzəmiyə ekspert baxışı keçirildi. Lakin Məmmədov Təmraz Əhəd oğlunun nümayəndəsi Əliyev Faiq Aydın oğlu, Əhəd Abıyevin digər qohumları ekspert İsa Eyvazzadənin üstünə qışqıraraq, ekspertizanı onların tələbləri əsasında keçirməyi əmr etdilər. Ekspert İsa Eyvazzadə isə buna dözməyərək bərk əsəbiləşdi, işini gözəl bildiyini söylədi. Bu da azmış kimi, qarşı tərəf mənə və vəkilim Bağırov Abdul Nadar oğluna qışqıraraq, oradan çıxmağımızı tələb etdi. Mən 17 noyabr 2022-ci il tarixli, 2(009)-1937/2022 saylı qərardadı əsas götürərək ekspertiza baxışının keçirilməsini tələb etdim. Zirzəmiyə girmək istəyəndə isə Əhəd Abıyevin qohumları qarşımı kəsdilər. Yalnız ekspert işə qarışıb mənim də iştirakımın vacibliyini qeyd etdikdən sonra biz zirzəmiyə buraxıldıq. Bununla da Məmmədov Təmraz Əhəd oğlunun nümayəndəsi Əliyev Faiq Aydın oğlu zirzəmidə etdiyi özbaşınalıqlar, qeyri-qanuni qazıntı işləri, su xətlərinin, kanalizasiya xətlərinin yerini dəyişdirməsi, zirzəminin tavanının taxtalarını kəsərək evin döşəməsində silkələnmə və əyilmələr yaratdığını, zirzəmiyə giriş qapılarını kubiklə tikməsi, ofisə qeyri-qanuni qapı açmağı boynuna alaraq təsdiqlədi. Həmçinin, o, ekspertin verdiyi suallara etik normaları pozaraq, "Əcəb etmişəm, öz yerimdi, özüm bilərəm" kimi cavab verib".
Beləliklə, Sədaqət Bayramova "Hürriyyət" vasitəsiylə aidiyyəti qurumlara müraciət edərək, onlardan bu məsələyə öz münasibətlərini bildirmələrini, araşdırma aparmalarını, mülkiyyətində olan Bakı şəhəri, Səbail rayonu, Neftçi Qurban Abbasov küçəsi, ev 9, mənzil 4-ün təmiri üçün 4500 manat, binanın bünövrəsinə və bərkidilməsinə çəkilmiş 800 manat xərcin, "MBA LTD"dən mənzilə dəymiş zərərin bazar dəyərinin müəyyən edilməsi ilə əlaqədar alınmış rəyə görə ödənilmiş 450 manat, hüquqi yardımla bağlı çəkilən xərcin əvəzi olaraq 600 manat və ödənilmiş dövlət rüsumunun əvəzi olaraq 84 manat dövlət rüsumunun, cəmi 6334 manat məbləğində pulun geri qaytarılmasını, həmçinin qeyd olunan mənzilin zirzəmisinin girişinin məhdudlaşdırılması məqsədiylə hörülmüş daş maneənin sökülməsini, zirzəminin əvvəlki vəziyyətə gətirilməsini cavabdeh şəxslərə həvalə edilməsini xahiş edib.
"Hürriyyət"
Sözün düzü, bu tip yazıları yazmağa adamın əli gəlmir. Bu xanım kiminsə qızıdır, kiminsə bacısıdır, kiminsə anasıdır, kiminsə həyat yoldaşıdır və s. Amma nə edək ki, xanımlar da öz layiq olduqları yerdə oturmurlar. Atalarımız deyib ki, insan layiq olduğu yerdə ağır gələr, yaxud ağır otur, batman gəl...
Yeri gəlmişkən, BATMAN vaxtilə dilimizdə çəki, ağırlıq vahidi olub, yəni ağır ol, vüqarlı ol...
Sözün qısası, haqqında bəhs edəcəyimiz deputat Könül xanım Nurullayevanın özəl həyatı bizim üçün maraqlı deyil.
Qısa məlumat üçün qeyd edək ki, 5-10 nəfərin tanımadığı Könül Nurullayeva 9 fevral 2020-ci ildə Milli Məclisə keçirilmiş növbədənkənar parlament seçkilərində Nizami rayonu 24 saylı birinci seçki dairəsindən deputat olub. Axı, deputat seçilmək üçün ən azı 10-15 min nəfər sənə səs verməlidir ? Heç bir təcrübəsi olmayan, cəmiyyətdə tanınmayan Könül Nurullayeva o səsləri necə qazana bilərdi ? Onun necə deputat seçilməsi, daha doğrusu, deputat olması, hamıya bəlli məsələdir. Bu məsələni qoyaq bir kənara. Xanım deputat seçicilərin mənzillərinə ayaqqabı ilə girir. Görünür vaxtı ilə başa salan olmayıb.
Bunu da qoyaq bir kənara. Xanım deputat Keşlədəki seçiciləri ilə görüşə çarşabda, çadrada gedir, islami qaydalara ciddi riayət edir. Vallah, bu dekorasiyalar daha işə yaramır, ay Könül xanım.
Yaxşı çadra nədir, Fransız geyimləri nədir..? Könül Nurullayeva əsasən Fransanın "Balmain" (Pierre Balmain), Amerikanın "Tory Burch","Elisabetta Franchi" ilə yanaşı "Gucci" "Chanel" kimi brendlərin məhsullarına üstünlük verir. Onun təkcə bir qolunda 26 min dollar dəyərində qızıl var (16 min dollar qızıl qolbaq və 10 min dollar qızıl saat). Biz bunların heç birini yazmazdıq ee....
Amma Könül Nurullayeva siyasi mədəniyyətdən danışanda Vayy, danışmaq dedim, yadıma Könül Nurullayevanın bir neçə gün əvvəl “Avropa Şurası Parlament Assambleyasının iclasında Rusiya əleyhinə hesabata səs verərkən danışması və düyməni səhv BASMASI düşdü.
Təsəvvür edirsiniz Könül Nurullayevanın düyməni səhv basması bizim Rusiya boyda nəhəng ölkə ilə münasibətlərimizə təsir edə bilər... Siz başa düşürsünüzmü, cənablar..? Xanım deyib ki, mexaniki səhv olub. Bunlar başa düşmür ki, AŞPA-nın kompüter sistemi sizin üçün ...Nə isə... Bu xanım deputata deyən yoxdur ki, bir il əvvəl qardaş Türkiyədə rüsvayçı siyasi səhvə yol verdin, erməniləri müdafiə elədin, sonra üzrxahlıq elədin.
Məlumat üçün qeyd edək ki, deputat Könül Nurullayeva ağlının ucbatından qardaş Türkiyədə dedi ki, Ermənistan kasıb dövlətdir, ona görə də bizə təzminat verməməlidir, Adam nə qədər savadsız, diletant olar ki, belə cəfəngiyyat danışsın. 30 il ermənilər barbar, vandal kimi torpaqlarımızı işğal edib, kəndlərimizi, maddi və mədəniyyət abidələrimizi dağıdıb, Könül Nurulalyeva isə deyir ki, təzminat lazım deyil.
Onun sözlərinə görə, Ermənistan iqtisadiyyatı çöküb, əhalinin sosial şəraiti acınacaqlı vəziyyətdədir, bu səbəbdən Azərbaycanın düşmən ölkədən təzminat tələb etməsi o qədər də önəmli deyil. Könül xanım əməlli-başlı ermənilər üçün göz yaşı tökür. Ölkə başçısı hər çıxışında bu məsələni dönə-dönə vurğulayır ki, ermənilər təzminat ödəməlidir.
Özünüz gördünüzmü, deputat Könül Nurullayeva səhv buraxa-buraxa gedir. Cənablar, ciddi sözümüzdür, belələrini xarici ölkələrdəki tədbirlərə göndərməyin, dövlətimizi pis vəziyyətə qoyarlar. Özünüz şahid oldunuz ki, biz Könül Nurullayevanın şəxsi həyatına, özəl aləminə qarışmadıq.
gundelik baki.com
Teref.az olaraq məqalədə toxunulan iddialarla bağlı qarşı tərəfin mövqeyini dərc etməyə hazırıq!
Teref.az
Bakıda bəzi mağazalarda qida təhlükəsizlik çıxarışı ləğv edilən "Multifood” əmtəə nişanı adı altında yarasız holland pendirləri satılır.
Qaynarinfo-nun əməkdaşı Abşeron rayonu, Xırdalan şəhəri, Quşçuluq yaşayış massivində fəaliyyət göstərən "Gülman” MMC-nin "Multifood” əmtəə nişanı adı altında istehsal edilib, satışa çıxarılan yararsız holland pendiri aşkarlayıb.
Məsələ ilə bağlı ötən ilin dekabr ayının 29-da AQTA-ya rəsmi sorğu ünvanladıq. Sorğumuza AQTA-nın Xızı-Abşeron Regional Bölməsinin rəisi İrfan İsgəndərov bu gün cavab verib.
AQTA rəsmisi bildirib ki, "Gülman” MMC-nin direktoru Cəfərov Əli Telman oğlunun məsələ ilə bağlı izahatı alınıb: "Multifood” əmtəə nişanın istehsalçısı Abşeron rayonu, Xırdalan şəhəri, Quşuluq Yaşayış Massivində fəaliyyət göstərən "Gülman” MMC-nin direktoru Cəfərov Əli Telman oğlunun məsələ ilə bağlı yazılı izahatı alınıb. Sahibkar izahatında "Gülman” MMC-nin qeyd edilən ünvanda fəaliyyətini dayandırdığını və müəssisənin qida təhlükəsizlik çıxarışının ləğv edildiyini, lakin etiketləri şəriki Quliyev Orxan Ələkbər oğlunda qaldığını bildirib.
AQTA əməkdaşları tərəfindən daha sonra mobil telefon vasitəsilə Quliyev Orxan Ələkbər oğlu ilə əlaqə saxlanılıb. Orxan Quliyev isə "Multifood” əmtəə nişanlı etiketlərin Xırdalan şəhəri, N.Gəncəvi 156 ünvanında fəaliyyət göstərən, ona məxsus anbarda saxlanıldığını bildirib. Tərəfimizdən qeyd olunan anbara baxış keçirilib və "Multifood” əmtəə nişanlı etiketlər məhv edilib”.
İrfan İsgəndərovun cavabında bəzi qaranlıq məqamlar ortaya çıxır. Qurum müəssisənin bağlanması faktını öz adı ilə deyil, MMC direktorunun diliylə bizə çatdırır.
Sual olunur ki, lisenziyası ləğv edilən müəssisənin məhsulları mağazalarda necə satılır? Bunu siz və yaxud əməkdaşlarınız görməyibmi?
Digər bir qaranlıq məqam "Multifood” əmtəə nişanlı etiketləri MMC direktorunun dostunun anbarında niyə saxlanılır? Və yaxud satılan pendirlərin üzərində niyə vurulub?
Digər bir sual: Şirkət bağlanıbsa, hansı səbəbdən ilk cümlədə "fəaliyyət göstərən MMC" qeyd edilir?
AQTA-nın Xızı-Abşeron Regional Bölməsinin rəisi İrfan İsgəndərovun yuxarıda qaranlıq qalan suallarımıza cavabını da işıqlandıra bilərik.
Mövzuya qayıdacağıq.
Qlobal.az
