Biznesi ilə hər zaman tanınan Xanlar Fətiyevin deputatlığa namizədliyi bir çağırış seçki sonrası yenidən dəstəklənib. Maraqlıdır ki, o, 98 saylı Bərdə-Tərtər seçki dairəsindən namizəd olaraq irəli sürülüb.

Xatırladaq ki, Xanlar Fətiyev daha əvvəl 4 və 5-ci çağırış seçkilərdə deputat olub, 39 saylı Kəpəz birinci (Gəncə) seçki dairəsindən deputat adı qazanıb. Amma 6-cı çağırış seçkidə deputat olmayıb. Bu dəfə ona yenidən şans verilib. Xanlar Fətiyev hazırda Gəncə Avtomobil Zavodu İstehsalat Birliyi Müşahidə Şurasının sədridir.

Bir müddət əvvəl jurnalist Cavanşir Həsənli Xanlar Fətiyevin Avropanın bir sıra ölkələrində qurduğu şirkətlər barəsində sənədləri açıqlamışdı.

Berlində, Ştutqartda şirkətlər açıb, nə az-nə çox 3 milyon avrodan artıq yatırım edib.

Gəncə Avtomobil Zavodunun rəhbərinə məxsus avtomobillərin icarəsi ilə məşğul olan AZNUR GMBH şirkətinə məxsusdur.
Şirkət 2010-cu il iyunun 15-də Charlottenburg (Berlin) ədliyyəsində nizamnamə kapitalı 25 min avro olmaqla HRB 127288 B saylı şəhadətnamə ilə qeydiyyatdan keçib. Müxtəlif vaxtlarda Sona Osmanova, Murad Süleymanov, Fəxri Həsənov tərəfindən idarə olunub. Berlinin AUGSBURGER STR. 31 ünvanında fəaliyyət göstərən şirkətin hazırki direktoru Elvira Şahbazovadır. Elvira Şahbazova bir müddət həm də Berlində Fətiyevə məxsus, 2006-cı ilin fevralından fəaliyyət göstərən, dövriyyəsi 1 milyon avrodan yuxarı olan BRASIL GASTRO GMBH adlı şirkəti və eyni adlı restoranı idarə edib.

Xanlar Fətiyev bir müddət adıçəkilən restoranı tanıdığını və orada olduğunu etiraf etsə də, “Brasil Brasileiro”nun ona məxsus olduğunu təkzib etmişdi.

Deputatın Almaniyadakı daha bir şirkəti 2010-cu ilin oktyabr ayında Ştuttqart şəhərində AZNUR STUTTGART GMBH adı ilə 25 min avro nizamnamə kapitalı ilə qeydiyyatdan keçib. 2016-cı ilin aprelin 20-də şirkət yenidən Charlottenburg (Berlin) ədliyyəsində HRB 176094 B saylı lisenziya ilə qeydiyyatdan keçirilib və AZNUR TRAVEL GMBH adı ilə Berlində Fətiyevin avtomobillərinin kirayəsi ilə məşğul olan AZNUR GMBH-nin ofisində, AUGSBURGER STR. 31 ünvanında fəaliyyət göstərməyə başlayıb, yeni nizamnaməyə uyğun olaraq turizm xidmətləri göstərir.

AZNUR adı altında Fətiyevin Gəncə Avtomobil Zavodundan şaxələnən biznesi Maltaya, İspaniyaya qədər uzanıb. İspaniyanln Ciudad aeroportunda da AZNUR-un kirayə avtomobilləri xidmət göstərir.

Deputatın Belarusiya paytaxtındakı taksi xidməti ilə məşğul olan digər şirkəti AZNUR TAKSİ (Прыватнае ўнітарнае прадпрыемства па аказаннi паслуг “АЗНУР Таксі”) 2015-ci ilin sentyabrın 14-dən fəaliyyətə başlayıb.

Moskva və Kiyevdə də şirkətin avtomobillərin icarəsi xidməti göstərən filialları var.
“Belaruski” supermarketi də ona məxsusdur.

Buna qədər Xanlar Fətiyev Tiflisdə eyni ad altında 4 supermarketdən ibarət marketlər şəbəkəsi qurub.

1. Tbilisi, 10 I. Abashidze St.

2. Tbilisi, 34 Ts. Dadiani St, B. 5

3. Tbilisi, 4/2 Gulia Sq.

4. Tbilisi, Gldani, II M/D, 1 Pore Mosulishvili St.

Marketlər Fətiyevin Gürcüstandakı AZNURGEORGIA şirkəti tərəfindən idarə olunur.(tribunainfo)

Əmək və Əhalinin Sosial Müdafiəsi Nazirliyinin tabeliyində fəaliyyət göstərən “DOST İş Mərkəzi” MMC-nin (VÖEN – 1305835261) elan etdiyi tender müsabiqəsinin qalibi məlum olub.
Yeniavaz.com xəbər verir ki, DOST üçün ofis sahəsinin icarəyə götürülməsi ilə bağlı tenderin qalibi Əşrəf Səxavət oğlu Səfərov (VÖEN – 2004596032) olub.
DOST Əşrəf Səfərova məxsus 2 750 kv. metr qeyri-yaşayış sahəsini 24 ay müddətinə icarəyə götürür və icrə haqqı olaraq 853 min 710 manat (ayda 35 min 571 manat) ödəyəcək.

Onu da qeyd edək ki, DOST qeyd olunan ofis sahəsini Əşrəf Səfərovdan daha əvvəl də icarəyə götürüb. 2020-ci ildə 8 ay üçün 249 min 600 manat, 2022-ci ildə isə 6 ay üçün 213 min 432 manat, 2023-cü ildə 12 ay üçün 426 min 855 manat ödəyib.
Mətbuatda yer alan məlumatlardan belə görünür ki, Əşrəf Səfərov eyni zamanda ölkənin aparıcı şirkətlərindən olan “KİA Motors Az” MMC-nin də qanuni təmsilçisidir.

Paytaxtın müxtəlif yerlərində söküntü işləri aparılır. Proses heç də sakit keçmir. Xüsusilə, fərdi yaşayış evlərinin və kiçik ticarət obyektlərinin kompensasiya ödənilməklə sökülməsi qalmaqalla müşayiət olunur. Çünki sakinlərə xeyli aşağı məbləğ təklif olunur. Bunların arasında ev və obyekt sahibinin icazəsi olmadan mülkiyyətin dağıdılması halları da kifayət qədər çoxdur.
Bizimyol.info xəbər verir ki, Yasamalda da obyektlər xəbərdarlıq edilmədən sökülür. Abbas Mirzə Şərifzadə, 1 ünvanında (“Azad Azərbaycan” telekanalının yerləşdiyi binanın yaxınlığı) heç bir məhkəmə qərarı olmadan söküntü işləri aparılır. Sahibkarlar bunun qarşısını ala bilmirlər. Burada 10-dan çox obyekt bir günün içində tamamilə dağıdılıb.

Sahibkarlar deyir ki, belə situasiya ilə qəfildən üzləşiblər. Onlara şifahi xəbərdarlıq da olunmayıb. Sahibkarlardan Sadiq Ağayev heç mallarını ortadan yığmağa imkan tapmadığını bildirir. Onun sözlərinə görə, azı 30 min manatlıq məhsulu sıradan çıxarılıb:

“Əvvəldən desəydilər, heç olmasa, malları çıxarardım. Bizimlə gəlib söhbət eləyən də olmayıb. Ziyanı kim ödəyəcək? Bir ucdan sökə-sökə gəlirdilər. O tərəfdə bərbərxananı, çəkməçi dükanını, mağazaları, dönərxananı sökmüşdülər. Bizim meyvə dükanını da onların gözünə qatıblar”.

Yasamal Rayon Mənzil-Kommunal Təsərrüfatı Birliyinin rəisi Vüsal Hüseynov mediaya açıqlamasında obyekt sahiblərinin mülkiyyət hüququnu təsdiqləyən sənədinin olmadığını əsas gətirir. O, sökülən yerlərin Texniki Universitet, Memarlıq və İnşaat Universitetinin ərazisi olduğunu iddia edir. Deyir ki, burada abadlıq işləri aparılacaq, yataqxanalar təmir ediləcək.

İş orasındadır ki, sahibkarların əksərinin, o cümlədən, Sadiq Ağayevin əlində Bakı Şəhər İcra Hakimiyyətindən alınmış icazə sənədi var. Hüquq müdafiəçiləri istənilən halda məhkəmə qərarı olmadan söküntü işlərinin aparılmasının qanunsuz olduğunu deyirlər. Hətta sahibkarın icazə sənədi olmasa, həmin ərazini qanunsuz zəbt etsə belə, obyekt məhkəmə qərarı olmadan sökülə bilməzdi.

Son vaxtlar belə halların sayı çox artıb. Mülkiyyət toxunulmazlığı nəzərə alınmır. Konkret Yasamalda 25 ildən çox bu işlə məşğul olanlara qarşı haqsızlığa yol verilib. Vətəndaşa ödənilməli olan kompensasiyadan heç danışan da yoxdur.

Dövlətdən hər hansı yardım gözləmədən yaşamını sürdürən adamlara qarşı belə davranmaq yolverilməzdir.

Bizimyol.info

Bakı şəhər sakini, Milli qəhrəman qardaşı Məmmədov Aydın İsrail oğlu tərəfindən “Hürriyyət” qəzetinin redaksiyasına şikayət məktubu daxil olub. Şikayətçi deyir ki, qardaşı Məmmədov Aytəkin İsrail oğlunun adına qoyulan büst baxımsız vəziyyətdədir, İcra Hakimiyyətinə müraciət edilsə də, əhəmiyyət verilmir:

“Mən, Məmmədov Aydın İsrail oğlu, yazaraq sizdən xahiş edirəm ki, müraciətimi dərc edəsiniz.

Bildirim ki, şəhid qardaşıyam, Bakı şəhərində yaşayıram. Özüm hal-hazırda xəstəyəm, maddi imkanım zəifdir. Qardaşım Məmmədov Aytəkin İsrail oğlu 1991-ci ildə şəhid olub. Prezident Heydər Əliyevin əmri ilə Milli qəhrəman adı verilib.

Qardaşımın büstü Gədəbəy rayonu, Göyəlli kəndində yerləşir. Adına olan məktəbin qarşısındakı büst baxımsız vəziyyətdədir. İcra Hakimiyyəti və Bələdiyyə Azərbaycanın Milli qəhrəmanına qarşı hörmətsizlik edir, onun üstünü təmir etdirmirlər. Dəfələrlə müraciət etsək də, cavabsız qalıb.

Əvvəl heç bir quruma müraciət etmədən, özüm nə lazım olsa edirdim. İndi nə səhhətim, nə də maddi dürümüm buna imkan vermir”.

Məsələ ilə bağlı Gədəbəy İcra Hakimiyyəti ilə əlaqə saxlamağa çalışsaq da, zənglərimiz cavabsız qaldı.

Jalə FAMİLQIZI

Redaksiyadan: Mövzunu diqqətdə saxlayacağıq. Qarşı tərəfin mövqeyini də dərc etməyə hazırıq.

4 aylıq körpənin sünnətdən sonra öldüyü “Real Hospital”da ilk dəfə deyil ki, belə hadisə baş verir.
TEREF tribunainfo.az-a istinadla bildirir ki, klinikada əvvəllər də ölüm faktları qeydə alınıb. Misal üçün 2022-ci ildə sözügedən klinikada 46 yaşlı Bəxtiyar İsmayılov əməliyyatdan sonra ölüb. 2019-cu ildə isə” Real hospital”da müalicə alan Gürcüstan vətəndaşı 43 yaşlı İrakli Gurtsişuizi xəstəxanada vəfat edib. Elə həmin il adı çəkilən xəstəxanada müalicə alan, 1972-ci il təvəllüdlü Mehman Həsən oğlu Həsənov qəfildən ölüb. Eyni ildə 1960-cı il təvəllüdlü Əliyeva Gülnar Cavad qızı mədəkiçiltmə əməliyyatı etdirmək üçün “Real Hospital”a müraciət edib. O, ikinci əməliyyatdan sonra ölüb.
Qeyd edək ki,” Real Hospital” 2014-cü ildən fəaliyyət göstərir. Müəssisənin bundan əvvəl “Real” Tibb Mərkəzi adlandırılıb. 2015-ci ildə müəssiənin lisenziyası ləğv edilib. Bundan sonra “Real” Tibb Mərkəzi “Real Hospital”a çevrilib.
Mediada gedən məlumatlara görə, xəstəxana Xətai rayonun keçmiş icra başçısı Razim Məmmədova məxsusdur.

Bu gün bəzi media orqanlarında “Union Logistics” MMC-yə məxsus yük nəqliyyat vasitələrinin Bakı Baş Gömrük İdarəsinin "İpək Yolu" gömrük postunda xeyli müddət saxlanılması ilə bağlı məlumatlar yayımlanıb.

Dövlət Gömrük Komitəsindən bildirilib ki, "Union Logistics" MMC tərəfindən Çin Xalq Respublikasından Qırğız Respublikasına məxsus 4 nəqliyyat vasitəsilə Çin mənşəli müxtəlif təyinatlı qarışıq yüklər iyun ayının sonundan etibarən ölkə ərazinə daxil olub.

Qeyd edilir ki, "İpək yolu" gömrük postuna daxil olan nəqliyyat vasitələrində olan yüklərin gömrük rəsmiləşdirilməsinin aparılması üçün 2-9 gün aralığında bəzi sahibkarlar tərəfindən gömrük bəyannamələri təqdim edilib.

Eyni zamanda, bu günə qədər həmin nəqliyyat vasitələrində gömrük bəyannaməsi təqdim edilməmiş yüklər də mövcuddur.

Bildirilir ki, malların eyniləşdirilməsi üçün gömrük baxışı gömrük bəyannaməsi əsasında həyata keçirilir. Rəsmiləşdirilməsi sona çatdırılmış gömrük bəyannamələri üzrə gömrük nəzarətinin təyin olunduğu barədə elektron bildirişlərin sahibkarlara göndərilməsinə baxmayaraq, sahibkarlar tərəfindən malların təhvil alınmasına dair elektron növbə üçün müraciət olunmayıb. Əlavə olaraq 2024-cü il 12 iyul tarixdə həmin sahibkarlara gömrük orqanları tərəfindən malların təhvil alınması üçün yazılı formada məktub ünvanlanıb.

Ünvanlanmış məktublardan irəli gələn görüşlər zamanı məlum olub ki, “Union Logistics” MMC tərəfindən sahibkarlara malların təhvil alınması üçün yaxınlaşmamaları, 15 iyul 2024-cü il tarixdə kütləvi şəkildə Bakı Baş Gömrük İdarəsinin qarşısında toplanmaları tövsiyə olunub.

Bildirilir ki, yük nəqliyyat vasitəsinə “İpək Yolu” gömrük postunda fəaliyyət göstərən gömrük əməkdaşları tərəfindən zərər vurulması ilə bağlı Qırğız Respublikasının gömrük xidməti tərəfindən şəkil və videogörüntülər göndərilib. Aparılan araşdırma nəticəsində həmin nəqliyyat vasitəsinin ölkə ərazisinə zədəli şəkildə daxil olduğu müəyyən edilib.

Qeyd olunan zədə ilə bağlı Qırğız Respublikasının Azərbaycan Respublikasındakı səfirliyinin şifahi müraciəti əsasında aidiyyəti üzrə məlumat verilib. Həmçinin bir müddət əvvəl Bakı Baş Gömrük İdarəsi tərəfindən “Union Locistics” şirkətinə bəyannamələrin gömrük orqanlarına təqdim edilməsinin sürətləndirilməsi barədə məlumat verilib. Məsələnin tam şəkildə araşdırıldıqdan sonra bu halı yaradan səbəblər haqqında əlavə
məlumat veriləcək.

Xəbər verdiyimiz kimi, Azərbaycanın məşhur dondurma istehsalçısı olan şirkətlərlə keçmiş işçiləri arasında məhkəmə çəkişməsi var.

Musavat.com xəbər verir ki, “AER Company Qrup” və “Master Milk” MMC-lərin 10-dan çox işçisi Xətai Rayon Məhkəməsinə iddia təqdim ediblər.

İddiaçılar MMC rəhbərliklərinin hərəkətlərinin qanunsuz hesab olunması, əmək stajının müvafiq qaydada hesablanaraq bərpa edilməsi, məzuniyyət pulunun ödənilməsi və tutulmuş məbləğin geri qaytarılması tələbi ilə çıxış ediblər. İşçilər iddialarında yazırlar ki, 2006-cı ildən başlayaraq 2023-cü ilədək cavabdeh “AER Company Qrup” MMC-də və sonradan “Master Milk” MMC-də çalışıblar.

İddiaçılar qeyd ediblər ki, MMC-lərin rəhbərliyi qanunlardan kənar fəaliyyət göstərib, barələrində ayrı-ayrılıqda əsassız sənədlər tərtib edərək onlarla əmək münasibətlərinə xitam verib. Lakin münasibətlər bununla bitməyib, onları işdən azad etdikdən sonra cavabdehin rəhbərliyi və təsisçisi saxta sənədlər tərtib etməklə barələrində məhkəmələrə əsassız iddialar veriblər. Bu məqsədlə 100-ə yaxın işçi qanunsuz işdən azad edilib, xeyli işçi əsassız məhkəmə çəkişmələrinə cəlb olunub, saxta aktlar və qaimələr tərtib olunaraq əsassız varlanma yolu ilə mənfəət əldə edilib.

Məhkəmə araşdırmaları nəticəsində MMC rəhbərliyinin saxta sənədlər tərtib edib istifadə etdiklərinə görə barələrində xüsusi qərardad qəbul edilib.

Xüsusi qərardad Xətai Rayon Prokurorluğuna göndərilib. Şikayətçilər vurğulayır ki, xüsusi qərardad üzrə bu günə qədər qanuni qərar verilməyib.

Musavat.com xəbər verir ki, buna görə də iddiaçılar Bakı şəhər prokuroru Elşən Abbasova şikayət ediblər.

Surəti Xətai prokuroru Sərdar İmanova göndərilən şikayətdə qeyd olunur ki, 17 aprel 2024-cü ildə Şirvan Kommersiya Məhkəməsi “AER” firmasının rəhbərliyi barədə qərardad çıxararaq araşdırılması üçün Xətai Rayon Prokurorluğuna göndərib.

Şikayət məktubundan sitat:

“Lakin saxta sənədlərin tərtib və istifadə edilməsi ilə bağlı araşdırma qanuna zidd davam etdirilib, cinayət faktları ört-basdır edilib. Ona görə ki, hazırda həmin işə heç bir prokuror nəzarəti yoxdur. Odur ki, araşdırmaya etiraz edərək, aşağıda qeyd etdiyim halların və faktların araşdırılaraq cinayət işinin başlanmasını xahiş edirəm.

1) 15.05.2020-ci il tarixli saxta üzləşmə aktının 2022-ci ilin sonlarında “Master Milk” MMC-nin işçisi Azər Mikayılovun yazdığı (icra etməsi) məlum olub. Bu barədə Mikayılov Azər öz ifadəsində həmin saxta üzləşmə aktının Şərifov Elşən tərəfindən ona yazdırıldığını etiraf edib. Saxta üzləşmə aktına kimin imza etməsini aydınlaşdırmaq üçün aşağıda adları göstərilən şəxslərdən izahat və imza nümunələrinin götürülməsi zəruridir -Şərifov Adil, Şərifov Rövşən, Şərifov Aqşin, Şərifov İlham, Şərifova Rəmziyə.

2) 15.05.2020-ci il tarixli saxta üzləşmə aktı ilə bağlı Adil Şərifov və Elşən Şərifov həmin saxta üzləşmə aktının kim tərəfindən icra edilməsini bilmədiklərini, bu işə Azər Şükürovun rəhbərlik etdiyini və onun biləcəyi ilə bağlı ifadə veriblər. Lakin araşdırma nəticəsində bunun da yalan - əsassız olduğu üzə çıxdı. Belə ki, 15.05.2020-ci il tarixli saxta üzləşmə aktının Elşən Şərifovun tələbi ilə Mikayılov Azər tərəfindən icra edildiyi məlum oldu. Bununla belə, ifadə verərkən Elşən və Adil Şərifovlar yalan ifadə verməməklə bağlı iltizama qol çəkiblər.

Məqsəd istintaqı yayındırmaq, Azər Şükürova şər atmaq, yalan danışmaq. Ümumiyyətlə, bu saxta üzləşmə aktının yazılmasında məqsəd nə olub? Bu fakt dərhal araşdırılmalıdır.

3) Şikayət etdiyim MMC-nin rəhbərliyi ifşa olunacağı və həbs ediləcəyini dərk etdiyinə görə saxta akt tərtib edərək ciddi mühasibatlıq sənədlərinin yandırıldığını bildirir. Həmin sənədlərin - sübutların məhv edilməsi haqda 10.08.2020-ci il tarixli aktı inkar edən (sənədlərin yandırılması) şahidlər var. Həmin dövrdə MMC-də işləmiş Azər Şükürov və Bəhruz Məmmədli sənədlərin yandırılmadığını təsdiq edə bilərlər. Bu sənədin - aktın 2023-cü ilin sentyabrında yazıldığı təxmin edilir. Ona görə də adları göstərilən şəxslərin - Şərifov Elşən, Nəcəfova Ceyran, Orucov Sahil, İbrahimova Fasilənin məqsədlərinin nə olmasını araşdırmaq üçün ifadələri alınmalı və üzləşdirmə təşkil olunmalıdır.

4) 15.05.2020-ci il tarixli saxta üzləşmə aktı ilə bağlı ifadə vermiş Nəcəfova Ceyran bu aktla bağlı heç nə bilmədiyini qeyd edir. Bildirirəm ki, həmin saxta üzləşmə aktını yazan Mikayılov Azər və Nəcəfova Ceyran bir ofisdə işləyirlər. Yəni öz əməkdaşının xəttini tanımaması qeyri-səmimidir. Ona görə də bu faktlar yenidən araşdırılmalı və yenidən ifadələri alınmalıdır.

Nəcəfova Ceyran illərdir işçilərin DSMF ödənişlərinin mənimsənilməsində şəxsən iştirak edib.

5) Xətai Rayon Prokurorluğunda və Şirvan Kommersiya Məhkəməsində ziddiyyətli ifadələr vermiş şahid Əliyeva Gültəkindən nəyə görə bu günə kimi yenidən ifadə alınmayıb?! Halbuki Əliyeva Gültəkin yalan ifadə verməyə görə iltizama imza edib. Gültəkin Əliyeva Adil Şərifovun təsiri altındadır. Əliyeva Gültəkindən yenidən ifadə alınması vacibdir, həmçinin mənimlə üzləşdirilməsini tələb edirəm.

6) 04.05.2024-cü il tarixdə Sizin iştirakınızla keçirilən qəbulda Xətai prokuroru faktlara görə cinayət işinin başlayacağnı və məni hüquqşünas Tahir Teymurovla birgə qəbul edəcəyini bildirdi. Lakin sonradan cinayət işinin başlamasının rədd olunması haqqında qərar qəbul edir. Xətai prokuroru faktlara əsasən cinayət işini başlamaq əvəzinə rəhbərlik etdiyi müstəntiqin vasitəsi ilə cinayət işi materiallarını ayrı-ayrı epizodlara “parçalayır” və xitam qərarı qəbul edir. Qanuna görə, rayon prokurorluğu bunun əksini etməlidir, yəni epizodlar birləşdirilməli, MMC-in rəhbərliyi barəsində cinayət işi başlamalı, rəhbərlik barəsində həbs qərarı qəbul edərək cinayət işinin istintaqı davam etdirilməlidir. Baş verənlər işin süründürülməsinə və cinayət faktlarının ört-basdır edilməsinə yönəlib.

Qanuna görə, rayon prokuroru istintaqa nəzarət etməlidir. Bir neçə dəfə MMC rəhbərliyinin 6 milyondan çox (bank krediti) dövlət vəsaitinin mənimsədiklərini konkret faktlarla göstərmişəm. Lakin prokurorluq heç bir qanuni tədbir görmür, araşdırma aparmır. Halbuki mənimsəmə cinayəti ilə bağlı araşdırma aparma prokurorluq orqanlarının səlahiyyətinə aiddir. Odur ki, qanunla müyyən edilmiş tədbirlər görülməsini, cinayət faktları üzrə cinayət işinin başlanmasını və “AER” firmasının cinayət məsuliyyətinə cəlb edilməsi barədə göstəriş verilməsini xahiş edirəm”.