Qusar Kommunal Müəssisələr Kombinatı tərəfindən keçirilən tender müsabiqəsinin (Kotirovka sorğusu) qalibi məlum olub.
TEREF.AZ-ın məlumatına görə, Yeniavaz.com açıqlanan rəsmi məlumatlara istinadən bildirir ki, tenderin qalibi fiziki şəxs Verdixanov Mübariz Eygün oğlu (VÖEN – 4700126292) olub.
Tender müsabiqəsinin şərtlərinə görə Verdixanov Mübariz Eygün oğlu Qusar Kommunal Müəssisələr Kombinatına təsərrüfat inventarları (Fəhlə paltarı, rezin çəkmə, bel sapı, əlcək və s.) satacaq və qarşılığında 14 min 205 manat 67 qəpik alacaq.
Məlumat üçün bildirək ki, Verdixanov Mübariz Eygün oğlu daha əvvəl fərdi sahibkar kimi Qusar rayon Kommunal Müəssisələr Kombinatı tərəfindən keçirilən tender müsabiqələrində dəfələrlə qalib olub. Verdixanov təkcə ötən ay Qusar rayon Kommunal Müəssisələri Kombinatına 24 min manatlıq elektrik malları (Naqil, lampa, kabel və s.), 7,4 min manatlıq əkin materialları (Eldar şamı, Kipares ağacı, Elandra ağacı, qızılgül və s.) satıb. Eyni zamanda Mübariz Verdixanov daha əvvəl də Qusar və Quba rayonunda fəaliyyət göstərən dövlət qurumlarının keçirdiyi çoxsaylı tenderlərin də qalibi olub.
Mübariz Verdixanov fərdi sahibkar olmaqla bərabər həm də sabiq millət vəkili Asya Manafova ilə sabiq Ekologiya və Təbii Sərvətlər naziri Hüseynqulu Bağırovun ailə üzvləri tərəfindən qurulan şirkətlərə də rəhbərlik edir.
22 sentyabr 2008-ci ildə sabiq millət vəkili Asya Manafovanın qardaşı Mikayıl Manafov ilə sabiq ekologiya və təbii sərvətlər naziri Hüseynqulu Bağırovun oğlu Lətif Bağırov “Safari Bak Upak” adlı şirkət təsis ediblər. Mübariz Verdixanov hazırda Mikayıl Manafov və Lətif Bağırov tərəfindən təsis olunan “Safari Bak Upak” MMC-nin (VÖEN- 4700270251) qanuni təmsilçisidir.
Qeyd edək ki, Asya Manafovanın qardaşı Mikayıl Manafov o zaman 5 saylı Quba-Qusar Ərazi Ekologiya və Təbii Sərvətlər şöbəsinin direktor müavini olub. Mikayıl Manafov Cinayət Məcəlləsinin 179.3.2-ci (qulluq mövqeyindən istifadə etməklə mənimsəmə və israfetmə) və 313-cü (vəzifə saxtakarlığı) maddələri ilə ittiham olunaraq 5 iyun 2010-cu il tarixdə iş yerində həbs edilib. Məhkəmə onun barəsində 7 il 6 ay müddətinə şərti olaraq azadlıqdan məhrum edilməsi barədə qərar çıxarıb.
Mübariz Verdixanov eyni zamanda 1999-cu ildə təsis olunan “Safari” MMC-nin (VÖEN- 4700020861) və 2001-ci ildə təsis olunan “Pioneer” tam ortaqlıq şirkətinin (VÖEN- 4700023101) də qanuni təmsilçisidir.
Onu da bildirək ki, tender müsabiqəsini keçirən Qusar Kommunal Müəssisələr Kombinatı rayon İcra Hakimiyyətinə tabedir. 15 ildir Qusar Rayon İcra Hakimiyətinin başçısı vəzifəsini icra edən Şair Alxasovun adı da 2020-ci ildə oğlu İlkin Alxasova məxsus 362,6 kv. metr sahəsi olan obyektin istismarına icazə verməsilə gündəmə gəlib.

Sverdlovsk vilayətindən olan Lyubov Loginova iyulun əvvəlində meşədə azıb. Ailəsi həyəcan təbili çalsa da, yalnız cəmi altı gün davam edən rəsmi axtarış tədbirlərini təmin edə bilib.

Amma qadının oğlu ümidini itirməyib və tanışları ilə birlikdə ərazini qarşı-qarış gəzib. Sentyabrın sonunda qadının cəsədi meşənin ortasındakı taxta evdə bir neçə adyalın altında tapılıb.

Qadın divar təqvimində daxmadakı hər gününü qeyd etmək üçün kömürdən istifadə edib. O, bir neçə qeyd də yazıb.

Mənbə: lenta.ru

Bələdiyyə sədri: Yolu təmir etmək üçün büdcədə pul yoxdur
Gədəbəy rayonunun Düzyurd kəndinin sakinləri yolsuzluqdan əziyyət çəkir.

Belediyye.netə yazan sakinlər kəndin yol infrastrukturunun olmadığından narazıdırlar.

Deyirlər ki, bu qədər əhalisi olan kəndin problemini həll etmək istəyən qurum tapmırıq. Hara müraciət edirik baxan olmur, hansı qapını döyürük üzümüzə bağlanır.

Qeyd edək ki, Düzyurd kəndindin 3000-dən artıq sakini var. Bu qədər çox əhalisi olan kəndin avtomobil yolunun təmirsiz olması sakinlərin həyat şəraitini çətinləşdirir. Xüsusən də yağmurlu günlərdə məktəblilər məktəbə gedərkən ciddi problemlər yaşanır.

Sözügedən avtomobil yolunun uzunluğu 2 km-dən çoxdur. Sakinlər aidiyyatı qurumların nə vaxtsa bu problemi aradan qaldıracağına ümid etsələr də, vəziyyət o qədər də ürəkaçan deyil.

Məsələyə münasibəti öyrənmək üçün üz tutduq Düzyurd bələdiyyəsinə. Bələdiyyə sədri Cəmil Abdullayev müsahibə verməkdən imtina etdi.

Lakin bildirdi ki, hazırda bələdiyyənin büdcəsində yetərli vəsait yoxdur. Bu səbəbdən də yolu təmir edə bilməyəcəklər.

Dövlət Sərhəd Xidmətinin Dövlət Sərhəd Nəzarəti İdarəsində “Heydər Əliyev Beynəlxalq Aeroportu” sərhəd nəzarəti şöbəsinin yük sərhəd nəzarəti bölməsinin nəzarətçisi vəzifəsində gizir rütbəsində xidmət etmiş Alim Cənnətov iki il əvvəl Mirzəyev Şahin Sahib oğlu adlı şəxsin şikayəti əsasında və İdarənin daxili təhlükəsizlik şöbəsinin rəisi Namiq Cəlilovun ona qarşı qərəzli mövqe nümayiş etdirərək təzyiq altında aldığı izahatla formalaşdırdığı mənfi rəy nəticəsində guya “Hərbi vəzifə və hərbi xidmət haqqında” Azərbaycan Respublikası Qanununun 41.0.6-cı maddəsinə (xidməti uyğunsuzluğa görə) müvafiq olaraq vəzifədən azad edilib.

Haqsızlıqla barışmayan Alim Cənnətov Bakı İnzibati Məhkəməsinə müraciət edərək, Dövlət Sərhəd Xidməti rəisinin onun vəzifədən azad olunması və ehtiyata buraxılması barədə 11.03.2021-ci il tarixli 549Ş/H saylı əmrinin ləğv edilməsi, əvvəlki işinə bərpa olunmaqla məcburi iş buraxma dövründə ödənilməli olan əmək haqqının hesablanılaraq ona verilməsinin Dövlət Sərhəd Xidmətinə həvalə olunması barədə qərar çıxarılmasını xahiş etmişdir.

İşin halları Bakı İnzibati Məhkəməsində, daha əvvəl isə istintasq orqanında Rövşən Bayramov adlı müstəntiq tərəfindən araşdırılmış, Alim Cənnətovun xidməti uyğunsuzluq kimi dəyərləndirilə biləcək heç bir nöqsanının olmadığı qənaətinə gəlinmiş və hakim Mehriban Qarayevanın sədrliyi ilə Alim Cənnətovun iddiasının təmin olunması barədə qərar çıxarılmışdır.

Qarşı tərəf qərardan narazı qaldığı üçün Bakı İnzibati Məhkəməsi vasitəsilə Bakı Apellyasiya Məhkəməsinin İnzibati Kollegiyasına apellyasiya şikayəti vermişdi. Lakin Bakı Apellyasiya Məhkəməsinin hakimi Azər Hüseynovun sədrliyi ilə keçən apellyasiya məhkəməsinin qərarı tutarlı əsaslara deyil, yalnız ümumi, mücərrəd mülahizələrə söykənmiş və birinci instansiya məhkəməsinin ədalətli qərarı ləğv edilmişdir.

Xatırladaq ki, “Dəryaz” qəzeti (“Deryaz.az” veb-saytı Alim Cənnətovun valideynlərinin redaksiyamıza müraciətləri əsasında artıq iki dəfə bu mövzuda məqalələr hazırlayaraq oxucularına təqdim etmişdir. Həmin məqalələrdə bu məsələ ilə əlaqədar təfərrüatlar, məhkəmə ədalətsizliyi ilə bağlı məqamlar öz əksini tapmışdır.

Bu dəfə isə Alim Cənnətovun nənəsi – şəhid anası, ahıl yaşlı Rəfiqə Cənnətova redaksiyamıza müraciət edərək fəryadının ictimailəşdirilməsini xahiş etmişdir.

Şəhid anası bildirir:“Məhkəmədən öncə yağışlı-qarlı havalarda sürünə — sürünə xəstə canımla, kor gözümlə mən Dövlət Sərhəd Xidmətində olmuşam. Pandemiyaya görə məni general Elçin Quliyev şəxsən özü qəbul etməsə də, başqa məmurlar mənə ürək-dirək verdilər ki, arxayın olun, tezliklə sizə şad xəbər veriləcək. Ancaq şad xəbər əvəzinə, sadəcə poçtla Dövlət Sərhəd Xidmətinin kadrlar şöbəsindən cavab məktubu göndərilərək Alimin xidmətə bərpasının mümkün olmadığı bildirildi. Dəfələrlə bir şəhid anası kimi Prezidentə, Vitse-Prezidentə ərizə ilə müraciət etmişəm. Əfsüslar olsun ki, həmin müraciətlərim baxılması üçün aidiyyəti üzrə Dövlət Sərhəd Xidmətinə göndərilsə də, yenə də kadrlar şöbəsindən eyni məzmunlu imtina cavabı gəldi. Məndə belə qənaət yarandı ki, təbiətcə humanist adam kimi tanınan general Elçin Quliyevin özünün bu olaylardan xəbəri yoxdur. Əks təqdirdə heç olmasa, sərhədçilərin peşə bayramında yazdığım təbriknamələrə cavab verilərdi. Əmin oldum ki, Namiq Cəlilov kimi öz günahlarını ört-basdır etmək istəyənlər, onu dəstəkləyənlər bizim müraciətlərimizi Dövlət Sərhəd Xidməti rəisinə çatdırmırlar. Bəs elə isə bizim ölkə başçısına ünvanladığımız, aidiyyəti üzrə göndərilən müraciətlərimizə niyə əhəmiyyət verilmir? Bunlar yəni o qədərmi dövlətə, dövlətşiliyə hörmətsiz yanaşırlar?

Bir şəhid anası kimi məınim göz yaşıma həssas yanaşan, haqqı nahaqqa qurban verməyən birinci instansiya məhkəməsinin hakimi Mehriban Qarayevanın ədalətli qərarını ləğv edən Bakı Apellyasiya Məhkəməsinin hakimi Azər Hüseynovun çıxardığı qərar isə qərar deyil, qəbahətdir. Aşkar göründü ki, hakim Azər Hüseynov və sifarişini yerinə yetirdiyi şəxslər oğulları Vətən uğrunda qurban getmiş, xalqımızın 30 illik həsrətinə son qoymuş dəyanətli, mətanətli şəhid analarına da hörmət etmirlər. Yəqin, Mehriban Qarayeva özü də ana olduğu üçün məni başa düşüb, amma Azər Hüseynova həm ədalət, həm də mərhəmət hissi yad olduğu üçün bizim fəryadımıza biganə yanaşdı, sifarişlə qərar çıxardı.

İnanmaq, özümü inandırmaq istəyirəm ki, Ali Məhkəmədə icraatda olan bu məsələ ilə bağlı tezliklə ədalət işartıları özünü göstərəcəkdir. Çünki, tezliklə (bu günlərdə səhhətimdə hiss etdiyim narahatçılıq sovuşan kimi) Prezident Administrasiyanın qarşısına gedib daha uca səslə fəryad qoparacağam. Əminəm ki, o halda Ali Baş Komandan İlham Əliyev səsimi eşidəcək, öz gizirinə sahib çıxacaqdır”.

“Deryaz.az”

Fövqəladə Hallar Nazirliyinin (FHN) Maddi Texniki-Təchizat İdarəsi tərəfindən keçirilən tender müsabiqəsinin qalibi "Həyat 22 Corp” MMC (VÖEN-1506015001) olub.
TEREF.AZ yeniavaz.com-a istinadla xəbər verir ki, "Həyat 22 Corp” MMC FHN-nin sifarişi əsasında Nazirliyə müxtəlif atributlar satacaq və qarşılığında 193 min 999 manat 50 qəpik alacaq.
Məlumat üçün bildirək ki, "Həyat 22 Corp” MMC tender elanından cəmi 18 gün əvvəl – 01.08.2022-ci il tarixində dövlət qeydiyyatına alınıb. FHN-nin tender elanı 18.08.2022-ci il tarixində elan olunub.
Onu da bildirək ki, "Həyat 22 Corp” MMC barədə açıq internet resurslarda heç bir məlumata rast gəlmək mümkün deyil. Cəmi 18 ay əvvəl yaranan və 194 min manatlıq tenderin qalibi olan MMC Bakı şəhəri, Nərimanov rayonu, Ağa Nemətulla, ev 56, m. 105/135 ünvanında qeydiyyatdadır. MMC-nin qanuni təmsilçisi İsmayılov Səddam Azər oğludur.
Maraqlı məqamlardan biri də odur ki, ötən ilin dekabr və bu ilin yanvar-fevral aylarında "Həyat 22 Corp” MMC-nin dövlət qeydiyyatına alındığı ünvanda yüzlərlə şirkət qeydiyyata alınıb. Bu şirkətlərin bir neçəsinin qanuni təmsilçisi də eyni şəxslər olub.
Onu da qeyd edək ki, bu şirkətləri birləşdirən təkcə onların eyni ünvanda qeydiyyatda olması deyil, eyni zamanda şirkət adlarındakı bənzərlik də bu şirkətlərin bir-birilə hansısa əlaqələrinin olduğunu göstərir.
Cəmi 3 ay ərzində - ötən ilin dekabr və bu ilin yanvar-fevral aylarında “Nərimanov rayonu, Ağa Nemətulla, ev 56, m. 105/135” ünvanda qeydə alınan şirkətlər bunlar olub:


Qeyd edək ki, “Nərimanov rayonu, Ağa Nemətulla, ev 56, m. 105/135” ünvanda qeydə alınan şirkətlər daha əvvəl də FHN-nin və digər qurumların keçirdiyi tenderlərdə qalib olublar.