 |
|
|
Maliyyə Nazirliyinin verdiyi məlumata bu ilin I rübündə Azərbaycanın icmal büdcəsinin gəlirləri 12 milyard 612 milyon manat, xərcləri isə 9 milyard 263,1 milyon manat təşkil edib. Bunlar da, ötən ilin eyni dövrü ilə müqayisədə müvafiq olaraq 18,9 faiz az və 23,7 faiz çoxdur. Son nəticədə icmal büdcədə 3 milyard 348,9 milyon manat qalıq yaranıb.
Belə vəziyyətdə isə ortaya sual çıxır:
Dövlət Büdcəsinə yenidən baxıla bilərmi? Qalıq vəsait sosial istiqamətlərə, xüsusən də əmək haqlarının artırılmasına yönəldilə bilərmi?
Məsələ ilə bağlı danışan Millət vəkili Vüqar Bayramov Bizim.Media-ya bildirib ki, bir sıra əvvəlki illərdə profisit səbəbindən dövlət büdcəsinə yenidən baxılaraq dəyişikliklər edilib:
"“Büdcə Sistemi” haqqında Qanuna əsasən, may ayının 15-dən tez və oktyabr ayının 15-dən gec olmayaraq cari ilin dövlət büdcəsinə yenidən baxılması barədə Milli Məclisi qarşısında məsələ qaldırıla bilər. Bu isə o deməkdir ki, dövlət büdcəsində formalaşan profisit və eləcə növbəti dövr üçün fiskal proqnozlar nəzərə alınmaqla bununla bağlı qərar verilir. Bu kontekstdən, gözlənilir ki, hökumət tərəfindən fiskal dəyərləndirmə aparıldıqdan sonra bu istiqamətdə yekun qərar veriləcək”.
Millət vəkili onu da qeyd edib ki, 2024-cü ilin ilk aylarında da Dövlət Büdcəsi profisitlə icra olunurdu:
“Bunun əsas səbəbi neftin qiymətinin dünya bazarında yüksək olması və qeyri-neft sektorundan daxilolmalarla bağlı idi. Praktik olaraq hər iki mənbədən vəsaitin daha çox daxil olması Büdcədə profisitin yaranmasına gətirib çıxarıb. Nəzərə alaq ki, profisitin yaranmasına görə hökümətdə davamlı müzakirələr aparılır.
Amma növbəti dövrlər üçün də proqnozlar da çox önəmlidir. Xüsusən də neftin ilin ikinci yarısındakı qiymətlərini proqnozlaşdırmaq çox vacibdir.
Bütün hallarda yaranmış profisitlə bağlı hökümətin müvafiq qərar verəcəyi gözlənilir. Yəqin ki, o zaman biz də parlamentdəki müzakirələrdə bir sıra istiqamətlərə, o cümlədən də sosial istiqamətlərə daha çox vəsait ayrılmasının mümkünlüyünə baxılmasını təklif edəcəyik. Çünki profisit fərqli istiqamətlərin də maliyyələşdirilməsinə imkan yarada bilər”.
Milli Məclisin deputatları Baku TV-nin sualını cavablandırıblar.
Belə ki, millət vəkillərinə “seçicilər sizə ən çox nə ilə bağlı müraciət edirlər?” sualı ünvanlanıb. Seçicilərin şikayətlərinin nədən ibarət olduğuna deputatların cavabları müxtəlif olub.
Cavanşir Feyziyev qeyd edib ki, ona müraciət edənlər arasında evini təmir etmək, hasar çəkmək, təhsil almaq, sağalmaq istəyən də var.
Aydın Mirzəzadənin sözlərinə görə, seçiciləri ona bütün mövzularla bağlı müraciət edirlər:
“Seçicilər istədikləri vaxt mobil telefonuma zəng edə bilirlər. Nömrəmi hamı bilir. Ailəvi, sosial məsələlərdən tutmuş hüquqi yardım məsələlərinə qədər müraciətlər alıram”.
Nəsib Məhəməliyev isə deyib ki, ona ən çox uşaq pulu məsələsi ilə bağlı müraciətlər edilir.
İkinci əl məhsullar, adətən, ucuz olduğundan vətəndaşların onlara marağı da yüksək olur. Ancaq bəzən bu məhsullar alındıqdan bir müddət sonra oğurluq olduğu ortaya çıxır.
Bu barədə ARB TV-nin süjetində deyilir.
Qeyd olunan məsələ ilə bağlı fikrini bildirən hüquqşünas Fərhad Mehdiyevin sözlərinə görə, şəxs almaq istədiyi ikinci əl məhsul haqqında müəyyən qədər məlumata malik olmalıdır. Əgər alıcı həmin məhsul haqqında araşdırma etməkdən yayınırsa, biz ehtimal edə bilərik ki, o bunun oğurluq olduğunu bilir.
“Oğurluq məhsulunu əldə edənlər, satanlar və oğurluq məhsul olduğunu bildiyi halda əldə edən alıcılar Cinayət Məcəlləsinin 194-cü maddəsinə əsasən, min manatdan üç min manatadək cərimə və ya üç ilədək müddətə azadlığın məhdudlaşdırılması, yaxud əmlakı müsadirə edilməklə dörd ilədək müddətə azadlıqdan məhrumetmə ilə cəzalandırılır”.
Ətraflı videosüjetdə:
İş yerini dəyişdirmək istəyən müəllimlər üçün növbəti vakansiya seçimi başladı. Bakı, Sumqayıt və Abşerona yerdəyişmə mümkün olmayacaq. Müəllimlərin iş yerinin dəyişdirilməsi müsabiqəsinin növbəti vakansiya seçimi mərhələsinə bu gün saat 11:00-da start verilib.
Proseslə bağlı “Xəzər Xəbər”ə Məktəbəqədər və Ümumi Təhsil üzrə Dövlət Agentliyindən məlumat verilib.
Qeyd edilib ki, yerdəyişmə prosesində son işlədiyi təhsil müəssisəsində üç ildən artıq çalışan müəllimlər iştirak edirlər.
Vakansiya seçimi üçün elektron sistem 29 aprel saat 11:00-dək aktiv olacaq.
Məlumat üçün bildirək ki, müəllimlərin yerdəyişməsi Naxçıvan Muxtar Respublikasında da ilk dəfə olaraq həyata keçiriləcək.
Naxçıvanın MR Təhsil Nazirliyindən verilən məlumata görə, müəllimlər qarşılıqlı razılıq əsasında iş yerlərini dəyişə biləcəklər.
Müvəqqəti qaydalara əsasən, hərbçi və şəhid ailə üzvlərinin iş yerinin dəyişdirilməsi prosesi ildə bir dəfə nazirlik tərəfindən həyata keçiriləcək.
Ətraflı süjetdə:
Ali məktəblərə qəbulda bəzi ixtisas qruplarında gərgin rəqabətin olacağı gözlənilir.
Xezerxeber.az-ın məlumatına görə, indiyədək qəbul imtahanının 2-ci mərhələsinin 1-ci cəhdində iştirak etmək üçün 50 minə yaxın abituriyent qeydiyyatdan keçib.
Belə ki, I ixtisas qrupu üzrə müraciət edənlərin sayı 16 min 135 nəfərdən çoxdur. II ixtisas qrupu üzrə 14 min 650 nəfər, III qrup üzrə 14 min 330 nəfər, IV qrup üzrə isə 3 min 820 nəfər qeydiyyatdan keçib.
Təhsil eksperti Kamran Əsədov deyir ki, bu il ali təhsil müəssisələrinə qəbul olmaq istəyənlərin sayı kifayət qədər çoxdur.
Onun sözlərinə görə, müəyyən ixtisaslarda seçim zamanı rəqabətin artacağı proqnozlaşdırılır.
Qeyd edək ki, qəbul imtahanlarına qeydiyyat mayın 6-dək davam edəcək.
Ətraflı süjetdə:
Azərbaycanda şadlıq saraylarında gələn ay üçün sifarişlərin sayı kəskin azalıb.
İqtisadiyyat.az paytaxtdakı bəzi şadlıq sarayları arasında sorğu keçirib.
Sorğu nəticəsində məlum olub ki, may ayında toy mərasimlərinin keçirilməsi ilə əlaqədar sifarişlərin sayında azalmalar mövcuddur. Qeyd edilir ki, əvvəlki aylarda demək olar, hər gün üçün sifarişlərin mövcud olmasına baxmayaraq, may ayı üçün bu rəqəm təxminən bir həftəyə enib.
Buna səbəb isə bu ayda toy etməyin uğursuzluqla nəticələnəcəyi ilə bağlı iddia olunan ənənə göstərilir. Restoran rəhbərləri deyir ki, buna baxmayaraq əvvəlki illərlə müqayisədə son illər may ayında toy edənlərin sayında artım müşahidə olunur.
Bəs may ayında niyə toy etmək olmaz?
AMEA-nın Folklor İnstitutunun aparıcı elmi işçisi, filologiya üzrə fəlsəfə doktoru Elyar İslamoğlu İqtisadiyyat.az-a açıqlamasında deyib ki, may ayında toy edilməməsi ilə bağlı bu günə qədər heç bir dini, psixoloji, astroloji əsasa rast gəlinməyib.
Onun sözlərinə görə, əksinə, bu ay gül-çiçəyin daha çox olduğu, ağacların çiçəkləndiyi, havaların isindiyi ən gözəl aylardan biridir. E.İslamoğlu deyir ki, sadəcə bir qayda olaraq Azərbaycan toylarının payızda keçirildiyinə rast gəlinir:
"Çünki payız aylarında meyvələr yetişir, dənli bitkilər biçilir, bir sözlə bolluq olur. Bununla yanaşı, həm də toy vaxtı kəsiləcək heyvanlar daha ətli-canlı olurlar. Amma yaz aylarında isə xüsusilə də mayda mal-heyvan qışdan yeni çıxdığına görə onlar arıq və kəsimə bir o qədər də yararlı sayılmırlar. Bu da təbii ki, toy vaxtı ət tədarükünü qarşılamağa bir az çətinlik yaradır. Mayda toy etməməklə bağlı bundan başqa elə bir ciddi problem yoxdur. Amma hal-hazırda restoranlarda, şadlıq evlərində toylar keçirilir və ilin istənilən fəslində bütün meyvələri, eləcə də digər azuqələri tapmaq mümkündür. Ona görə də insanlar rahat şəkildə may ayında toylarını edə bilərlər".
Müsahibimiz söyləyib ki, Azərbaycanda may ayında toy etməməklə bağlı inancların formalaşması, əsasən, rus və ermənilərdən keçib: "Belə ki, ermənilər qondarma soyqırımlarına aprel ayının sonlarından başlayaraq yas saxlamağa çalışırlar və 40 gün davam edən dövr may ayını da əhatə etmiş olur. Bununla yanaşı, ruslarda da mayda toy edilməməsi ilə bağlı formalaşmış inanclar var. Onlar inanclarını mayın çətin, ağır ay olması ilə əsaslandırmağa çalışırlar. Ona görə də onlar may ayında toy etmirlər. Yəni may ayında toy etməməyin Azərbaycanla heç bir bağlılığı yoxdur. Əksinə, insanlar istədiyi formada may ayında rahat şəkildə toy edə bilərlər. Bu ayda toy edənlərin bədbəxt olması, xoşbəxt olmaması, güzəranların çətin olması ilə bağlı heç bir əsas yoxdur".
Azərbaycan Respublikası Əmək Məcəlləsinin daha bir maddəsində uyğunsuzluq var, əgər müvafiq düzəliş və ya əlavələr edilməzsə, bu normanın da praktikada tədbiqi ilə əlaqədar əmək mübahisəsi yaranacaq və ya yaranır:
1.AR Əmək Məcəlləsinin 69.3-cü maddəsinə əsasən, işçilər başqa işəgötürənlə əmək müqaviləsi bağladıqda, ərizəsində göstərdiyi gün əmək müqaviləsi ləğv edilə bilər.
2. Əmək Məcəlləsində olan bu norma qəbul olunanda əmək müqavilələrinin elektron qaydada qeydiyyata alınması barədə norma yox idi.
3 . Hal hazırda Əmək Məcəlləsinin 49.1-ci maddəsinə edilın dəyişikliyə əsasən: Əmək müqaviləsinin bağlanılması, bu müqavilənin- elektron informasiya sistemində qeydiyyata alınmasından və bu barədə işəgötürənə elektron qaydada məlumat göndərilməsindən sonra hüquqi qüvvəyə minir.
4.Yeni qəbul olunmuş normaya uyğun olaraq yeni işəgötürən də təbii olaraq işçi ilə yeni əmək müqaviləsi bağlamayacaq, bağlasa da, başqa işəgötürənlə əmək müqaviləsi olduğu üçün hüquqi qüvvəyə minməyəcək.Nəticədə isə Əmək Məcəlləsinin 69.3-cü maddəsinin tədbiqində problemlər, işçi ilə işəgötürən arasında isə əmək mübahisəsi yaranacaq.
5. AR Əmək Məcəlləsinin 49.1-ci maddəsinə edilən dəyişiklikləri əsas tutaraq hesab edirəm ki, AR-sı Əmək Məcəlləsinin 69.3-cü maddəsinin bu hissəsində də müvafiq dəyişiklik və ya əlavələr edilməli, bu halda bu hakın tədbiq edilməsi barədə konkret qayda müəyyən edilməlidir.
Azer Quliyev
TEREF
İlk nikahların yarıdan az hissəsi – 45%-i boşanma ilə nəticələnir, lakin təkrar nikahların yalnız 31%-i uğursuz olur.
Tribunainfo.az xəbər verir ki, bunu “The Marriage Foundation”ın məlumatları sübut edir.
Psixoloq Ceymi Simkins Rocers “Your Tango”ya niyə ikinci evliliklərin birincilərdən daha çox xoşbəxtlik tapdığından danışıb.
“İkinci nikahda olan insanlar nəyin işə yaradığını, nəyin işə yaramadığını, o cümlədən davaları nə vaxt edəcəklərini seçmək (və ya etməmək) bilirlər. Onlar ən azı effektiv ünsiyyət və münaqişələrin həlli haqqında əsas anlayışa malikdirlər. Bütün bu amillər birlikdə ikinci evliliyi müvəffəqiyyət üçün əsl reseptə çevirir”, deyə Rocers izah edib.
Mütəxəssis qeyd edib ki, ikinci dəfə ailə quran insanların çoxu birinci evliliyi haqqında düşünməyə daha çox vaxt ayırır. Onun pasiyentlərindən biri qeyd edib:
“İkinci evliliyim öz axarında davam edir, çünki birinci evliliyimin bitməsindəki rolum haqqında özümə qarşı həqiqətən dürüst idim!”
O əlavə edib ki, ikinci evliliklər adətən daha xoşbəxt olur, çünki insanlar keçmişdə etdikləri səhvləri təkrarlamamağı öyrəniblər.
Həmçinin, ikinci evlilik zamanı tərəfdaşlar münasibətlərini uğurlu etmək üçün eyni dərəcədə səy göstərirlər. Mütəxəssisin sözlərinə görə, bu, ilk nikahların bu cür təcrübələrdən azad olması demək deyil, amma ikinci dəfə ailə quran insanlar bu hissləri fərqli səviyyədə yaşayırlar.
“İkinci nikahda olan insanlarda artıq evliliyin sonunu yaşadıqları üçün heç nəyi adi hal kimi qəbul etməmək əzmi artır. İkinci dəfə ailə quran insanlar da evlilik nəticə verməsə nə olacağını çox yaxşı bilirlər”, deyə psixoloq bildirib.
Rocers vurğulayıb ki, ikinci evlilikdə olan insanlar keçici olduğunu bilə-bilə ikinci bir şansa, həyata, sevgiyə görə dərin minnətdarlıq hissi keçirirlər:
“Minnətdarlıq həyatın dolğunluğunu açır. Bizdə olanları kifayət qədər və daha çox şeyə çevirir. O, inkarı qəbula, xaosu nizama, çaşqınlığı isə aydınlığa çevirir. Yeməyi bayrama, evi evə, yad adamı dosta çevirə bilər. Minnətdarlıq keçmişimizə məna verir, bu günə sülh gətirir və sabaha baxış yaradır”.
Böyük Britaniyanın baş naziri Rişi Sunak İordaniya kralı II Abdullah ilə Qəzza zolağına çatdırılan humanitar yardımın həcminin artırılması imkanlarını müzakirə edib.
Bu barədə Britaniyanın hökumət başçısının dəftərxanasının yaydığı bəyanatda deyilir.
Sənəddə deyilir: "Qəzza zolağına humanitar yardımı əhəmiyyətli dərəcədə artırmaq üçün birgə səylər müzakirə edilib, bura İordaniyanın rəhbərlik etdiyi əməliyyatda Böyük Britaniyanın hava daşıması, Qəzzaya quru humanitar dəhlizi və Qəzza ilə Kipr arasında dəniz dəhlizi daxildir".
Sunak həmçinin vurğulayıb ki, London anklava yardımın çatdırılması və HƏMAS hərəkatı tərəfindən saxlanılan girovların azad edilməsi üçün dərhal humanitar fasilə elan etməkdə israrlıdır.
"Baş nazir qeyd edib ki, Böyük Britaniyanın son məqsədi israillilər və fələstinlilər üçün iki dövlətli həllə nail olmaqdır. Liderlər Fələstin ərazilərində sabitlik və firavanlığı təmin etmək üçün Fələstin Milli Administrasiyasını dəstəkləməyin və islahatların aparılmasının vacibliyi barədə razılığa gəliblər", - Sunakın ofisi əlavə edib.