 |
|
|
Elektrik mühərriki ilə hərəkətə gətirilən minik avtomobilləri üçün sığorta haqqı qaldırılıb.
Xezerxeber.az xəbər verir ki, bu avtomobil sahiblərinin mülki məsuliyyətinin sığortası üzrə sığorta haqlarında edilən dəyişiklikdə öz əksini tapıb.
Yeni qaydalara əsasən Azərbaycanda elektromobillərin icbari sığorta haqqı dəqiqləşdirilib.
Belə ki, elektrik avtomobilləri üçün icbari sığorta haqqı 50 fazi artırılaraq 75 manat müəyyən edilib.
Sığorta məsələləri üzrə ekspert İlkin Ibrahimovun sözlərinə görə, digər dəyişiklik yük avtomobillərinə aiddir. Yük götürmə qabiliyyəti 3,5 tonadək olan avtomobillərdə sığorta haqqı dəyişməyib - baza məbləğinin 3 mislidir, yəni 150 manat. Amma 3,5-7,5 tonluq avtomobillərin sığorta ödənişi məsələsində dəyişiklik var.
Yəni sığorta haqqının 250 manat olması yalnız 7,5 tondan artıq yükgötürmə qabiliyyəti olan maşınlara aid olacaq.
Xezerxeber.az mövzu ilə bağlı daha ətraflı videomaterialı təqdim edir:
Hindistanın bəzi şirkətləri Rusiyada neft hasilatı aktivlərini əldə etmək istəyir.
Bu barədə ölkənin neft və təbii qaz naziri Hardeep Singh Puri bildirib.
Onun sözlərinə görə, hazırda ölkələrlə bağlı bir çox enerji layihələri müzakirə olunur. Xüsusilə Rusiya Hindistanda neft emalı sahəsində iştirakını genişləndirməkdə maraqlıdır. Hindistanın Rusiyadan enerji tədarükünü ödəməkdə heç bir problemi yoxdur və onlar yaranarsa, həll olunacaq.
TASS
Danimarkanın «Carlsberg» pivə şirkəti Rusiya bazarından çəkildiyi üçün 5,9 milyard dollar zərər gördüyünü açıqlayıb. Şirkətin ümumi itkiləri isə 6,8 milyard dollardan çoxdur.
Valyuta.az xəbər verir ki, Danimarkanın “Carlsberg” pivə şirkətinin Rusiya bazarından çıxması ilə bağlı itkiləri 40,8 milyard kron (5,9 milyard dollar) təşkil edib. Bu barədə şirkətin 2023-cü il üzrə maliyyə hesabatında bildirilir.
Bununla bağlı Danimarka şirkəti böyük məbləğdə silinmələr etmək məcburiyyətində qalıb. Ümumi itkilər 47 milyard krondan (6,8 milyard dollar) çox qiymətləndirilir.
Xatırladaq ki, «Carlsberg Group» 2022-ci ilin mart ayında Rusiyadakı bütün aktivlərini satmaq qərarını açıqlayıb, Rusiyaya investisiya etməyi və ixracı dayandırıb.
«Carlsberg Group» avqust ayında bildirmişdi ki, Rusiya bazarını tərk etmək qərarı digər ölkələrdə satışların artmasına baxmayaraq, 2022-ci ilin birinci yarısında şirkətin 630 milyon dollar itkisinə səbəb olub.
3 oktyabr 2023-cü il tarixində isə «Carlsberg Group» Rusiyanın «Baltika» şirkətinə şirkətinə beynəlxalq və regional brendlər də daxil olmaqla, bütün «Carlsberg» məhsullarını istehsal və satmağa imkan verən lisenziya müqavilələrinin ləğvi barədə xəbərdar edib. Şirkətin o zaman izah etdiyi kimi, lisenziya müqavilələrinə xitam verilməsi Rusiya Federasiyası Prezidentinin fərmanına cavab idi.
Son günlər ictimaiyyətdə dolların bahalaşması ilə bağlı müxtəlif fikirlər səsləndirilir. ABŞ valyutasının bahalaşacağı, hətta 2 manata qədər yüksələcəyi iddia olunur.
Bəs bu fikirlər nə qədər əsaslıdır? Ölkədə devalvasiya gözlənilirmi?
TEREF xəbər verir ki, mövzunu Globalinfo.az-a şərh edən sabiq maliyyə naziri, iqtisadçı alim Fikrət Yusifov deyib ki, yaxın bir neçə ildə manatın məzənnəsində hər hansı bir dəyişikliyin baş verməsinin iqtisadi və ya maliyyə əsasları yoxdur.
O, bunun şayiə olduğunu bildirib:
“Lakin ölkə daxilində və xaricdə fəaliyyət göstərən bir sıra destruktiv qüvvələr fevral ayının 7-də Azərbaycanda keçiriləcək prezident seçkiləri ərəfəsində vətəndaşlarda rahatsızlıq yaratmağa çalışır və bu məqsədlə də belə lüzumsuz informasiyaları yayaraq, xaricdəki ağalarının tapşırıqlarını yerinə yetirirlər. Vətəndaşlarımıza birmənalı olaraq bəyan edirəm ki, yaxın illər ərzində manatın məzənnəsində hər hansı bir ciddi dəyişikliyin olması gözlənilən deyil. Belə bir dəyişikliyin baş verməsi – yəni ortada manatın devalvasiyaya uğrayaraq ucuzlaşmasına apara biləcək heç bir səbəb yoxdur. Belə bir təhlükə olsaydı, o halda Mərkəzi Bankın valyuta hərraclarında tələb təklifi bir qayda olaraq üstələməli idi. Amma illərdir bunun əksini görürük. Mərkəzi Bankın valyuta hərraclarında bir qayda olaraq təklif tələbi üstələyir”.
Sabiq nazirinin sözlərinə görə, 2023-cü ildə Mərkəzi Bankda keçirilmiş valyuta hərracının 92 faizində təklif tələbi üstələyib:
“Bu dövrdə manatın nominal effektiv məzənnəsi 19.3 faiz bahalaşıb. Yaranmış durum Mərkəzi Banka manatın uçot dərəcəsini bir qədər də aşağı salmağa imkan vermişdi. Xarici təsirlər hesabına manatın məzənnəsi ilə bağlı hər hansı bir təhlükə yaransa belə, unutmaq lazım deyil ki, bu gün Azərbaycanın strateji valyuta ehtiyatlarının həcmi 70 milyard ABŞ dollarına yaxın bir səviyyədədir. İllik Ümumi Daxili Məhsulumuzun həcminə yaxın olan bu qədər valyuta ehtiyatımız eyni zamanda manatın təhlükəsizlik yastığı rolunu oynayır”.
Azərbaycan Yerüstü Nəqliyyat Agentliyi (AYNA) yol nişanları, dirəklər, sürət məhdudlaşdırıcı süni maneələr, məlumat lövhələri və tənzimləyici nəqliyyat güzgülərinin satın alınması ilə bağlı tenderə yekun vurub.
Valyuta.az xəbər verir ki, tenderin qalibi “Yol Xətt” MMC seçilib.
Tərəflər arasında bağlanacaq satınalma müqaviləsinin maliyyə dəyəri 986 031,6 AZN-dir.
İqtisadiyyat Nazirliyi yanında Dövlət Vergi Xidmətinin reyestr məlumatlarına görə “Yol Xətt” MMC 3 iyul 2006-cı il tarxidə dövlət qeydiyyatına alınıb. Nizamnamə kapitalı 200 AZN olan şirkətin hüquqi ünvanı Bakı şəhəri Binəqədi rayonu, 11-ci Dağlıq 3105-ci məhəllədə yerləşir. MMC-nin qanuni təmsilçisi isə Həsənov Zaur Mayıl oğludur.
“Yol Xətt” MMC 2015-ci ilə “3A” MMC adı altında fəaliyyət göstərib. Həmin ildən isə adı dəyişdirilib.
Mediada gedən məlumatlara görə, şirkət Zaur Həsənova məxsusdur. O, Azərbaycan Avtomobil Yolları Dövlət Agentliyi (AAYDA) yanında "1 №-li Xüsusi Təyinatlı Yol İstismarı" MMC-nin rəhbəri olub.
Dövlət satınalmalarının vahid elektron portalında yerləşdirilən məlumatlardan aydın olur ki, “Yol Xətt” MMC əsasən ləğv edilmiş Bakı Nəqliyyat Agentliyinin (BNA) tenderlərinin qalibi olub. Məlumat üçün deyək ki, AYNA BNA-nın bazasında yaradılıb.
Rusiya Ukrayna ilə müharibə üçün silah müqabilində Şimali Koreyanın doldurulmuş 9 milyon dollarını xilas edib.
Kim Çen In bu pulu xam neft almaq üçün istifadə edəcək.
Şimali Koreyanın aktivləri əvvəllər BMT sanksiyaları səbəbindən dondurulmuşdu.
Qeyd edək ki, KXDR cəbhə şirkəti bu yaxınlarda tanınmamış Cənubi Osetiyada yerləşən Rusiya banklarından birində daha bir hesab açıb. Bu onu göstərir ki, Rusiya Şimali Koreyaya bankların ölkə ilə iş aparmasını qadağan edən BMT sanksiyalarından yan keçməyə kömək edir.
Valyuta hərraclarında dollara tələbin yenidən yüksəlməsi müşahidə olunub. Fevralın 1-də keçirilən hərracda 78.7 milyon dollarlıq sifariş qeydə alınıb. 2 gün öncə isə daha 64.2 milyon dollar satılmışdı. Bu son 2 hərracda 142.9 milyon dolların satılması deməkdir.
Qeyd edək ki, yanvar ayının 25 və 23 tarixlərində keçirilən hərraclarda sifariş ayrı-ayrılıqda 50 milyon dollara çatmırdı. Bu isə ondan xəbər verir ki, son günlər dollara tələb artıb. Bunun psixoloji tərəfləri olsa da valyuta bazarında volatillik ehtimalı ilə bağlı yayılan xəbərlər də tələbi gücləndirir.
Doğrudur, Azərbaycanda idxalın artması da dollara tələbi yüksəldir. Belə ki, 2023-cü ilin ilk 11 ayında Azərbaycan idxalı əvvəlki ilin uyğun dövrü ilə müqayisədə 5.1 faiz artaraq 15.8 milyard dollara çatıb. İllik rekord idxalın qeydə alınacağı istisna deyil.
Belə olan təqdirdə isə cəmiyyətdə dolların bahalaşacağı və manatın məzənnəsinin isə dəyişəcəyi ehtimal olunur. Bəs gözləntilər özünü doğrulda bilər?
Məsələ ilə bağlı iqtisadçı Natiq Cəfərli Referans.az-a açıqlamasında bildirib ki, hazırda dolların kəskin bahalaşacağı ilə bağlı səsləndirilən fikirlər əsassızdır:
“Azərbaycanda valyuta məzənnəsinin dünya bazarları ilə heç bir əlaqəsi yoxdur. Bizdə valyutanın məzənnəsi hökumət və Mərkəzi Bank tərəfindən inzibati qaydada müəyyənləşir. Valyuta hərraclarında dollara tələbin artması təbiidir. Hər dəfə ilin sonunda və əvvəlində bu artımı görürük, yay aylarında bir daha bunun şahidi olacağıq. Əvvəlki illərdə tələb bundan da artıq olub, dolların satış həcmi daha yüksək olub. Bu hökumətin qərarından asılıdır. Sabah da qaldıra bilərlər, heç qaldırmaya da bilərlər. Bunun dünyada gedən heç bir proseslə əlaqəsi yoxdur”.
İqtisadçı qeyd edib ki, manat üzən məzənnə rejimində fəaliyyət göstərən valyuta deyil, Azərbaycanda inzibati məzənnə rejimidir və bunlar inzibati qaydada tənzimlənir. Onun sözlərinə görə, bu il Azərbaycanda hər hansı məzənnə dəyişikliyinin olacağı gözlənilən deyil: “Çünki bu il ard-arda seçkilər ilidir. Qarşıdan parlament və bələdiyyə seçkiləri gəlir. Buna görə də bu il manatın məzənnəsinin dəyişəcəyi gözlənilən deyil. Amma bu o demək deyil ki, Azərbaycan manatı həmişə belə sabit qalacaq. Gələn ili sonu və ya 2026-cı ildə bununla bağlı hansısa qərarlar verilə bilər”.
Ötən il ölkəmizə 73 min 62 ton qarğıdalı gətirilib.
Bu miqdarda məhsula 20 milyon 825 min ABŞ dolları ödənilib. Bu rəqəm əvvəlki illə müqayisədə miqdar ifadəsi ilə 2 min 800 ton (3.7%), dəyər ifadəsi ilə 3 milyon 330 min ABŞ dolları (13.7%) azdır.
2022-ci ildə bu, 75 min 864 ton miqdarında, 24 milyon 155 min ABŞ dolları dəyərində olub.
Ötən il ölkəyə gətirilən qarğıdalının bir tonu üçün 285 ABŞ dolları ödənilib ki, bu da əvvəlki illə müqayisədə 33 ABŞ dollar (10.3%) azdır. 2022-ci ildə bu, 318 dollar olub.
Qeyd edək ki, ötən il ölkəyə qarğıdalı idxalı ümumi idxalın 0.12 faizini təşkil edib. (Valyuta.az)
Azərbaycanın İrandakı səfirliyinə hücum etmiş şəxs barəsində edam hökmü çıxarılıb.
APA xəbər verir ki, bu barədə İran Ədliyyə Nazirliyinin saytında məlumat verilib.
Qeyd edək ki, yanvarın 27-də Azərbaycan Respublikasının İrandakı səfirliyinə hücum edən şəxsin cinayət işi üzrə məhkəmə iclası keçirilib. Məhkəmə iclası təqsirləndirilən şəxs və onun vəkillərinin iştirakı ilə keçirilib. Məhkəmə iclasında Azərbaycan Respublikası səfirliyinin bir sıra məsul şəxsləri də iştirak edib.
İclasın əvvəlində təqsirləndirilən şəxsə hakim izahat verib və prokurorun nümayəndəsi ittiham aktını oxuyub. Yayımlanan ittiham aktına əsasən, Azərbaycan Respublikasının səfirliyinə hücum edən şəxs səfirlik daxilində odlu silahdan istifadə etməklə Azərbaycan Respublikası vətəndaşını qəsdən öldürməkdə, qanunsuz silah saxlamaqda, gəzdirməkdə və ictimai asayişi pozmaqda ittiham olunur.
Prokurorun nümayəndəsi ittiham aktını oxuduqdan sonra təqsirləndirilən şəxs və vəkili müdafiə çıxışı edib.
Xatırladaq ki, 27 yanvar 2023-cü il tarixində Bakı vaxtı ilə səhər saat 08:30 radələrində Azərbaycan Respublikasının İran İslam Respublikasındakı Səfirliyinə silahlı hücum olub.
Hücum edən şəxs “Kalaşnikov” markalı avtomat silahla mühafizə postunu yararaq, mühafizə xidmətinin rəisi Orxan Əsgərovu qətlə yetirib.
Səfirliyin mühafizə xidmətinin iki əməkdaşı - Vasif Tağıyev və Mahir İmanov hücumun qarşısını alarkən yaralanıblar.
Orxan Əsgərov İkinci Şəhidlər xiyabanında dəfn edilib. 3 fevral 2023-cü ildə Azərbaycan Respublikası Prezidentinin Sərəncamı ilə Əsgərov Orxan Rizvan oğlu (ölümündən sonra) "Vətən uğrunda" medalı ilə təltif edilib.
Tağıyev Vasif Natiq oğlu 1-ci dərəcəli “Rəşadət” ordeni ilə, İmanov Mahir Kamil oğlu “Vətən uğrunda” medalı ilə təltif edilib.
Terror aktını törədən Yasin Hüseynzadə saxlanılıb.
Hadisədən sonra Azərbaycanın Tehrandakı səfirliyinin fəaliyyəti dayandırılıb. Azərbaycanın İrandakı səfirliyinin əməkdaşları 29 yanvar 2023-cü il tarixində Tehrandan Bakıya təxliyə olunub. Səfirlik əməkdaşları və onların ailə üzvlərindən ibarət ümumilikdə 53 nəfər Vətənə qayıdıb.
Xüsusi Rabitə və İnformasiya Təhlükəsizliyi Dövlət Xidməti 2 tenderə yekun vurub.
Dia-az.info xəbər verir ki, “Metal rabitə dirəklərinin satın alınması” tenderinin qalibi “Hi World” MMC olub.
Şirkətlə 236 000 manat məbləğində müqavilə imzalanıb .
““Xüsusi geyimlərin və aksesuarların” satın alınması” tenderinin qalibi “Baku Textile Company” MMC olub.
Şirkətlə 133 929 manat məbləğində müqavilə imzalanıb.
“Sərhədlərin bağlı qalması Azərbaycan kimi ölkələrdə əhalinin həyat tərzinə, məişətinə ciddi problem yaradır. Turizm cəhətdən yanaşsaq, bu, həm Azərbaycana gələnlər, həm də ölkədən gedənlər üçün ciddi problemdir”.
Bunu iqtisadçı-ekspert Rəşad Həsənov deyib.
Onun fikrincə, bu gün yalnız hava nəqliyyatının qalması, xüsusilə Azərbaycan kimi ölkədə əhalinin həyat tərzinə, məişətinə kifayət qədər ciddi problem yaradır:
“Çünki hava nəqliyyatı Azərbaycanda demək olar ki, vətəndaşların seçimləri sırasında olmayan bir nəqliyyat növüdür. Qiymətləri çox bahadır. Ona görə də quru sərhədlərin açılması vacibdir.
Seçkidən sonra quru sərhədlərin açılması ilə bağlı qərar verilə bilər. Çünki sərhədlərin bağlı qalması iqtisadiyyatın bütün sahələrinə mənfi təsir göstərir.
Sərhədlərin açılması turizm sektorunun inkişafına ciddi təkan verə bilər. Eyni zamanda, sərhədyanı kiçik ticarətin son 3 ildə yaşadığı durğunluqdan müəyyən qədər çıxmasına səbəb olacaq”.
Hazırda quru sərhədlərinin bağlı olması bir sıra sahələrin fəaliyyətinə mənfi təsir edir ki, onlardan biri də turizm sektorudur. Pandemiya ilə bağlı quru sərhədlərini bağlayan bütün ölkələr artıq bir neçə ildir ki, quru sərhədlərini açıblar.
Bunun nəticəsində isə turizmin inkişafı müşahidə edilməkdədir. Məsələn, qonşu Türkiyədə turizm gəlirləri 2023-cü ildə bir əvvəlki ilə görə 56,7 milyon ziyarətçi ilə 16,9 faiz artaraq 54 milyard 315 milyon dollara çatıb. Bu il isə ziyarətçi sayının 60 milyona, turizm gəlirinin isə 59,6 milyard dollara yüksəlməsini gözləyirlər.
2028-ci ildə hədəf 82,3 milyon ziyarətçi ilə 100 milyard dollar gəlir əldə etməkdir. Ölkəmizdə isə onsuzda kifayət qədər inkişaf etməyən turizmin sekorunun daha da geriləməsinə quru sərhədlərinin bağlı olması da öz təsirini göstərir.
Əgər pandemiyadan əvvəl, 2019-cu ildə Azərbaycana 3 milyondan artıq turist gəlmişdisə, 2023-cü ildə bu rəqəm 1 milyon 800 min olub. Bu isə onu göstərir ki, turistlərin sayı kimi ölkə gəlirdən də məhrum olur.
Quru sərhədləri nə vaxta qədər bağlı qalacaq?
“SKAL” Turizm Peşəkarlar Assosiasiyasının sədri Ceyhun Aşurov “Cebhe.info”-ya bildirdi ki, bu günə kimi sərhədlərin bağlı olması ilə əlaqədar fərqli fikirlər səsləndirilib:
“Ötən il ölkəyə gələn turistlərin sayında təxminən əvvəlki illə müqayisədə 30 faiz artım olsa da, pandemiyadan əvvəlki vəziyyətə tam qayıda bilməmişik. Dünyada bu göstərici 95 faizə qədər olub, bəzi ölkələr pandemiyadan öncəki göstəricilərini təkrarlayıb, hətta keçən də olub.
Azərbaycanda quru sərhədləri bağlıdır. Buna baxmayaraq, hava məkanımız açıqdır. Uçuş intensivliyində artım müşahdə edilib ki, bu da bərpaya müsbət təsir edib. Əlbəttə, quru sərhədləri açıq olsaydı bərpa daha çox olardı və ölkəyə gələn və gedənlərin sayı da artmış olardı.
Hazırda Azərbaycan müharibədən çıxmış vəziyyətdədir və təhülkəsizlik məsələlərinə əhəmiyyət verir. Təəssüflər olsun ki, bəzi Avropa ölkələrindən Azərbaycana müəyyən təsirlər, təzyiqlər var. Eyni zamanda qonşu ölkələrlə arzuolunmaz müəyyən gərginliklər yaşanıb.
Bütün bunların fonunda biz cəmiyyət olaraq anlayırıq ki, təhlükəsizlik olmazsa, hansısa turizmdən, səfərdən söhbət gedə bilməz. Bizim üçün ilk növbədə vətəndaşların təhlükəsizliyidir və təhlükəsiz şəraitdə bazarın bərpa olunmasına yönəlməliyik.
İnanıram ki, Azərbaycanda turistlərin sayı artacaq. Çünki ölkəmizdə qəbul olunan turist sayı potensialdan çox aşağıdır. Pandemiyadan öncəki rəqəm belə, böyük deyil. Yəni 3 milyondan artıq xarici turistin ölkəyə səfəri elə də böyük rəqəm sayılmır. Ümid edirəm ki, gələcəkdə bu məsələlər müsbət həllini tapacaq.
Ölkənin təhlükəsizliyi, hər hansı gərginliyin yaşana biləcəyi ilə bağlı bütün məsələlər diqqətə alınır və qərar da təhlükəsizliklə bağlı olduğuna görə müəyyən gecikmələr olur. Buna baxmayaraq, Azərbaycan böyük tədbirlərə ev sahibliyi edir.
Beləliklə, Azərbaycan COP29 kimi böyük bir tədbirə ev sahibliyini öz üzərinə götürüb və buna ciddi şəkildə hazırlaşır. Bu kimi tədbirlər davam etdirilir, hava məkanımız açıqdır. Arzu edərdim ki, bizim paytaxtda olan beynəlxalq hava limanından başqa digər hava limanlarımız da daha aktiv şəkildə çalışsınlar və daha ucuz hava daşıyıcıları şirkətləri Azərbaycana dəvət olunsunlar ki, turistlərimizin sayı da artsın.
Böyük ehtimal ki, bəzi məsələlər öz həllini tapandan sonra quru sərhədlərimiz açılacaq və Azərbaycan da daha çox turisti qəbul edəcək”.