 |
|
|
Bataqlıqda çabalayan Azərbaycan təhsilinin "örtülü bazarında dostluğu pozanlar" bir-bir işsiz qalırlar.
Təhsil sahəsində çalışanlardan kimsə haqsızlığa, pul yığılmasına qarşı çıxırsa, dərhal qanunlar məhz həmin şəxsləri cəzalandırır. Maraqlıdır ki, ədaləti bərpa etməli olan sözdə ayrıca hakimiyyət - məhkəmə və hüquq-mühafizə orqanları da çox zaman sözügedən sahədə rəhbər vəzifələrdə çalışan şəxslərin mövqeyini aşkar müdafiə edirlər. Hər halda uzun zamandır görə-görə gəldiyimiz reallıqlar və bunun acısını yaşayan keçmiş təhsil işçilərinin iddiaları belə deməyə əsas verir.
Məktəblərdə qanunsuz pul yığan direktorların "cəzası" ya camaatgözünə verilən töhmət olur, ya da sadəcə yerinin dəyişdirilməsi. Görünür təhsil "şef"i Emin Əmrullayev məktəblərdəki "bacarıqlı xəzinədarlar"ına "güldən ağır" söz deməyə qıymır.
"Şakaya pul lazımdır"!
Zarafat deyile Avropa ölkələrində bahalı məktəblərdə xanımını oxutmaq. "Bəxtəvər ər" obrazında olan nazir, sanki qisas alırmışcasına rəhbərlik etdiyi Azərbaycan təhsilini bədbəxt etmək üçün əlindən gələni əsirgəmir. Görün işin harasıdır ki, bir zamanlar tənqid hədəfi olan sabiq təhsil naziri Misir Mərdanov belə onun fəaliyyəti barəsində narazılıqlarını dilə gətirir, "uşaqları şikəst eləmə" deyir.
Bəli, Elm və Təhsil naziri Emin Əmrullayev və onun əmri altında çalışan komandası bugünümüzü və gələcəyimizi "iflic edir".
Günü-gündən təhsilin çökməsinə (bəlkə də məqsədli çökdürülməsinə) etiraz edənlərin sayı daha da artır, onların sayı artdıqca da Əmrullayevin "qara siyahısı böyüyür" və işsizlərin sayı artır.
Yazdığı cəmi bir neçə cümləlik statusda 2-3 hərf və durğu işarəsi səhvinə yol verən nazir minlərlə çoxillik stajı olan müəllimləri savadsız adlandırdı. Halbuki, o müəllimlərin bir qismi imtahan zamanı haqsızlıqla üzləşdiklərini sübuta yetirmək üçün aylarla çırpınıb durdular. Nə təkrar imtahan keçirildi, nə də onların tələb etdiyi kimi imtahan zallarının kamera görüntüləri açıldı. Üstəlik Sertifikasiya imtahanından keçirilmək vədi ilə onlardan edilən rüşvət tələbləri də araşdırılmamış qaldı.
Axı kim araşdırsın, kim qanuni tədbir görsün?
Laborant işinə götürmək üçün 4 min rüşvət alan Həcər Mahmudovanı, yüksək səslə müəllimlərin üstünə çəmkirib, valideynlərdən pul yığmalarını tələb edən Fəranə Məhərrəmovanı və sair bu kimi 10-larla, bəlkə də 100-lərlə "xəzinədarlar"ını bir başqa vəzifə ilə "ödülləndirən" nazir mi?
Bu tragikomedik haldır ki, rüşvəti yığanların arxasında "dağ kimi dayanan" Emin Əmrullayev məhz bu qanunsuzluqları ifşa edən şəxslərin özlərini qanunla cəzalandırır.
Məsələn, bir neçə ay əvvəl çalışdığı təhsil müəssisəsində cərəyan edən qanun pozuntularını sosial mediada ifşa etdiyinə görə işdən çıxarılan Səriyyə Qənbərovanı xatırlayaq.
"DogruXeber.az" qeyd edir ki, Naxçıvan şəhər İslam Səfərli adına 1 nömrəli tam orta məktəbinin fiziki tərbiyə müəllimi Səriyyə Qənbərova güya müxtəlif sosial şəbəkələrdə və saytlarda paylaşdığı məlumatlarla, eyni zamanda müəssisədə insident yaratmaqla “Təhsilverənlərin etik davranış Qaydaları”nı kobud surətdə pozduğuna görə işindən azad edildi.
Həqiqətdə isə onun pozduğu qayda heç də nazirliyin yaydığı rəsmi xəbərdə deyildiyi kimi “Təhsilverənlərin etik davranış Qaydaları”deyil, nəinki Naxçıvan, ümümiyyətlə Azərbaycan təhsilinin yazılmamış "daxili qaydalar"ı idi. O, sadəcə kimlərinsə qanunsuz əməllərinə alət olmaqdan imtina etdiyi üçün, qanun onu cəzalandırdı.
Səriyyə Qənbərovanın danışdıqlarını dinlədikcə adama elə gəlir ki, qanunlar hər kəs üçün deyil. Sanki siravi insanları qanunlar, qanunları isə səlahiyyətlilər idarə edir.
Baxın!
Səriyyə Qənbərova bildirir ki, onun hesabına güya əlavə məşğələ üçün hər ay 90 manat, yay aylarında isə məzuniyyət pulu 131 manat köçürülüb və o, da bunu bir neçə ay nəğd şəkildə çalışdığı məktəbin direktoruna verib. Sonralar isə direktor həmin məbləğin hər ay onun kəşbek kartına köçürülməsini tələb edib. Özü də deyib ki, "yuxarının xəbəri var".
Hərgah, Səriyyə Qənbərovanın müraciət etdiyi Elm və Təhsil Nazirliyi, Naxçıvan Ali Məclisi, Prezidentin Naxçıvan üzrə səlahiyyətli nümayəndəsi, Baş Prokurorluq və digər dövlət qurumları səssiz qaldılarsa, demək ki, direktor Asudə Məmmədova, "yuxarının xəbəri var" deyərkən yerdən-göyə qədər haqlı imiş.
Yeri gəldiyi üçün xatırladaq ki, Xırdalan şəhər 17 saylı körpələr evi-uşaq bağçasının keçmiş müdiri Fəranə Məhərrəmova da "yuxarının xəbəri var" demişdi. Və həmin "yuxarı" - Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov, eləcə də nazir Emin Əmrullayev onu "müdafiə - mühafizə" edib, müdür kürsüsündəki yerinə "su tökmədilər".
Qeyd edək ki, Səriyyə Qənbərovanın sözlərinə görə eyni hal (əlavə məşğələ adı altında müxtəlif hesablar vasitəsilə pul çıxarmaq) Naxçıvan Muxtar Respublikasındakı bütün məktəblərdə həyata keçirilirmiş.
Belə çıxır ki, təhsil sahəsindəki bütün yeyintilərdən - valideynlərdən yığılan qeyri-qanuni pullardan əlavə, yuxarıda qeyd etdiyimiz kimi metodlarla dövlətin büdcəsindən "çırpışdırılan" maddi vəsaitlərdən Elm və Təhsil Nazirliyi və "yuxarı" adlandırılan digər dövlət qurumları xəbərdardırlar.
Bəs nəticə niyə yoxdur?
Görünür, ədalət tərəzisi sadəcə şəkillərdə bərabərdir.
Bu gün nazir öz xanımını Avropa ölkələrində külli miqdarda xərc bahasına oxudursa və min bir zəhmətlə xaricdə təhsil alanların diplomunu tanımırsa, yaxud illərlə zəhmət çəkib, təhsil alanlar bu gün sadəcə ədaləti bərpa etmək istədiyi üçün işini itirirsə və qanunlar ədalətin deyil, güclünün sözünü deyirsə, bu ölkənin qanunları, bu dövlət sarsılıb deməkdir.
Allah rəhmət eləsin, Ümumilli lider Heydər Əliyev demişdir: “Dövlət iki şeydən sarsıla bilər: günahkar cəzasız qalanda və günahsıza cəza veriləndə”.
Qeyd edək ki, Səriyyə Qənbərovanın müraciətilə bağlı ölkə prezidenti cənab İlham Əliyevə göndərilməsi üçün tərəfimizdən rəsmi müraciət hazırlanıb.
Mövzunu davam etdirəcəyik.
Redaksiyamız hər kəsin söz haqqını tanıyır.
DogruXeber.az