Ermənistanın ötən gün səhər saatlarında Azərbaycana qarşı növbəti “humanitar şou”ya başladığı günün əvvəlində aydın oldu – Hökumət evinin yanında sıralanan yük maşınlarına yüklənən “zəruri ərzaq mallarına” baxmaq üçün səfirliklərin nümayəndələri dəvət olunduqda.

Bunun ardınca isə mübahisəli, bir-birini təkzib edən xəbərlər sıralandı:

1. Hökumət evinin yaxınlığına xarici ölkə səfirlərinin dəvət edildiyi bildirildi. Məqsəd yüklərə sэfirlərin də baxması, burada yalnız ərzaq olduğunu öz gözləri ilə görməsi idi.

Yalnız Rusiya səfirliyinin hümayəndəsinin yüklərə baxış keçirdiyi haqda məlumat yayıldı. Digər heç bir ölkənin səfiri və yaxud səfirlik nümayəndəsinin yüklərə baxdığını təsdiqləyən xəbər, foto, video yoxdur;

2. İrəvanda Hökumət evinin yaxınlığında 10 yük maşınının video və fotosu yayıldı. Məhz bu maşınların yük yeri açılmışdı və xarici ölkə səfirliklərinin baxması üçün göstərilirdi.

Az sonra Hökumət evinin yanındakı maşınların sayı 19-a çatdı.

9 yük maşını ora necə əlavə olundu? Səfirliklərə göstərmək üçün onların yük yeri açılmışdımı?

3. Erməni mediası ”humanitar yük”ün 400 ton olduğunu bildirdi. Ancaq qısa müddət sonra Ermənistan Baş naziri Nikol Paşinyan yükün 360 ton olduğunu dedi.

Nikol Paşinyan bu gün hökumətin iclasında göndərilən “humanitar yük”ün 361 ton olduğunu bildirib: Un – 100 ton, makaron – 80 ton, qənd – 60 ton, ət məhsulları – 40 ton, quru süd – 40 ton, duz – 20 ton, uşaq yeməyi – 12 ton, dərman – 9 ton.

a) Əvvəla, niyə hər yerdə 400 ton olduğu bildirilir, yalnız Nikol Paşinyan 360 və 361 tondan danışır? Niyə dəqiqləşdirilmir?

b) Sərhədimizə göndərilən yük maşınları ağırtonnajlı və iriqabaritli “Volvo” TIR-larıdır. Bu şirkət 2019-cu ildə Ermənistanda “Spayk” adıyla fəaliyyətə başlayıb.

“Volvo” irihəcmli TIR-larının yükgötürmə qabiliyyəti 60 tondan başlayır və 100 tona qədər artır. Yəni bu maşınlara 100 ton da yük vurmaq mümkündür, ancaq 60 ton minimumdur.

Hətta minimumla götürsək, 360 ton yükü Xankəndiyə gətirmək üçün cəmi 6 TIR kifayətdir. Yalnız dərmanın çəkisi az, həcminin böyük olduğunu düşünərək, 9 ton dərman üçün bir ayrıca TIR ayrıla bilər ki, bu da maksimum 7 TIR etməlidir.

Belədə, maraqlıdır: 19 TIR-la Xankəndiyə nə daşınır?

– ya daha çox ərzaq gətirilir, amma gizlədilir, həcmi az göstərilir – Paşinyanla digər rəsmilərin fərqli çəki deməsi də bu şübhəyə yol açır;

– ya “səfirlərə göstərmədikləri” gizli yük var – bunun hərbi olması ehtimalı yüksəkdir;

– ya da şounu daha dəbdəbəli, daha irihəcmli göstərməyə xidmət edirlər: 6-7 yük maşını ilə 19 yük maşınının “göstərişi” fərqli effekt verir.

4. Ermənistan rəsmiləri bu “humanitar yardım”ın Xankəndi və ətrafında yaşayan insanların yalnız 1-2 günlük qida ehtiyacını ödəyəcəyini bildirir.

“1-2 günlük qida ehtiyatının ödənilməsi” üçün bu şouya dəyərmi? Bəs, 1-2 gündən sonra nə edəcəksiniz? Niyə “problemin” köklü həlli üçün daha ciddi addımlar atılmır? Məsələn, Ağdamdan istənilən ərzağı almaq bu qədərmi çətindir?

Ağdamdan Xankəndiyə yol 36 km, İrəvandan xankəndiyə isə 323 km-dir. Əgər doğrudan da ərzaq qıtlığı varsa, 36 km-likdən niyə almırlar? Niyə 323 km-likdən ərzaq daşınmalıdır?

5. “Humanitar fəlakət” yaşanırsa, aylardır blokada varsa, heç nə tapılmırsa, Xankəndidə indiyə qədər bircə adam acından ölübmü?

6. Azərbaycan Xankəndidə humanitar böhran olduğuna inanmır. Əgər ciddi narahatlıq varsa, bizim mütəxəssislər vəziyyətlə yerində tanış olmaq üçün Xankəndiyə gedə bilərlər.

Bunun xahiş edə bilərsiniz və Bakı mütəxəssislər göndərə bilər./axar.az/

Ermənistan tərəfindən nəqliyyat vasitələrinin Laçın dövlət sərhədinin keçid məntəqəsində cəmləşdirilməsi siyasi şou, manipulyasiyadır və növbəti təxribata cəhdidir.

Teref.az “Report”a istinadən xəbər verir ki, Ermənistan tərəfi Azərbaycanla razılaşdırmadan yük maşınlarını sərhəd məntəqəsinə yığır.

Ermənistan bu addımla siyasi şou yaradır və siyasi möhtəkirlik nümunəsi ortaya qoyur. Xarici səfirliklərin, o cümlədən də Avropa İttifaqının nümayəndələrini yığıb sərhədə gətirmək sözün əsl mənasında məsələdən tamaşa düzəltmək anlamına gəlir. Digər tərəfdən, Qərb ölkələrinin səfirlik nümayəndələrinin bu tamaşada iştirakı riyakarlıqdan başqa bir şey deyil. Ermənistanın və onun havadarlarının növbəti şousu heç bir nəticə verməyəcək və iflasa məhkumdur.

Azərbaycan dəfələrlə bəyan edib ki, Rusiya sülhməramlıların müvəqqəti yerləşdiyi ərazilərə malların daşınması üçün Ağdam-Xankəndi yolu istifadə oluna bilər.

Qarabağ iqtisadi rayonuna daxil olan işğaldan azad edilmiş ərazilərdə Azərbaycan Respublikası Prezidentinin xüsusi nümayəndəsi Emin Hüseynovun sözlərinə görə, yolun texniki və təbii göstəriciləri, xüsusilə işğaldan sonra yenidən qurulmaqda olan Bərdə-Ağdam yolu malların daha sürətli və səmərəli şəkildə çatdırılmasına imkan yaratdığı halda, özünü qondarma rejimin təmsilçiləri adlandıran şəxslərin bu yoldan istifadədən imtina etmələri tamamilə başadüşülən deyil.

“Burada məqsəd siyasi şou və siyasi möhtəkirlikdən başqa bir şey deyil”, – xüsusi nümayəndə əlavə edib.

Azərbaycan Prezidentinin köməkçisi – Prezident Administrasiyasının Xarici siyasət məsələləri şöbəsinin müdiri Hikmət Hacıyev Aİ ölkələrinin, həmçinin Türkiyə, ABŞ və İsveçrə səfirlərinin iştirakı ilə keçirilən görüşdən sonra qeyd edib ki, teatral səhnələr və yük maşınlarını nümayiş xətrinə Laçın yoxlanış məntəqəsinə gətirməkdənsə, Ermənistan Azərbaycana qarşı ərazi iddialarına son verməli, öz qüvvələrinin elementlərini Azərbaycanın Qarabağ regionundan çəkməli və qanunsuz marionet rejimin maliyyələşdirməsini dayandırmalıdır.

Prezidentin köməkçisi onu da qeyd edib ki, beynəlxalq ictimaiyyət Ağdam-Xankəndi yolunun istifadəsi və Qarabağın erməni sakinlərinin Azərbaycana reinteqrasiyası ilə bağlı aydın siqnal göndərməlidir.

Hikmət Hacıyevin fikrincə, Ermənistanın Ağdam yolundan imtina edərək yalnız Laçın yolundan istifadədə israr etməsi və məsələni siyasiləşdirməsi qəbuledilməzdir.