İmişli rayonunda fəaliyyət göstərən dövlət idarələrindən və rayonu bölüşdürən sahibkarlardan bəhs edən son yazımızda, Azərbaycan Respublikası Əmək və Əhalinin Sosial Müdafiəsi Nazirliyi yanında "Dövlət Sosial Müdafiə Fondu" publik hüquqi şəxsinin Mil Muğan regional Filialında yaşananlar barəsində yazacağımızın anonsunu vermişdik.

Odur ki, mövzunu çox uzatmamaq üçün birbaşa keçid edirik əsas məsələyə.

Belə ki, "DogruXeber.az" redaksiyasına etibarlı mənbədən daxil olan məlumata görə 2021-ci ilin noyabr ayından etibarən "Dövlət Sosial Müdafiə Fondu" publik hüquqi şəxsinin Mil Muğan regional Filialında kütləvi işçi ixtisarları başlayıb və bu proses 2022-ci ilin mart ayına qədər davam edib.

İşdən çıxarılan işçilərdən birinin redaksiyamıza bildirdiyinə görə texniki heyyət qarışıq 62 nəfərə yaxın işçi işdən çıxarılıb və yəqin ki, bu barədə sözügedən filial rəhbərliyi "Öz ərizələri ilə çıxıblar" cavabını verəcək ki, bu cavabı da təxmin etmək heç də çətin deyil. Çünki, filialın keçmiş direktoru, hazırda isə Gəncə regional filialına təyinat alan Rafael Məmmədov tərəfindən, hamıya bir nəfər kimi ərizəsini yazmaq "əmri verilib" - "Nazirliyin əmridir, özün ərizəni yaz, çıx". Özü də həmin işdən çıxarılanların bir neçəsinin iddiasına görə "Dövlət Sosial Müdafiə Fondu" publik hüquqi şəxsinin Mil Muğan regional Filialında son illər işçi ilə əmək müqavilələri 3 aylıq bağlanır. 3 ay bitdikdə kiminin müqaviləsi özündən xəbərsiz təzələnir, kimininkinə müəyyən maraqlar xatirinə xəbərdarlıq edilir. Çünki, müqavilənin yenidən bağlanıb-baglanmayacağına "qərar vermək" üçün, bu "xəbərdarlıq" böyük önəm daşıyır. Kiminin də müqaviləsi ümumiyyətlə yenilənmir.

DogruXeber.az: - Halbuki, Əmək qanunvericiliyinə əsasən, İşçi ilə işəgötürən arasında əmək müqaviləsi müəyyən müddətə (müddətli) və ya müddət göstərilmədən (müddətsiz) bağlanılır. Müddətli əmək müqaviləsi tərəflərin razılaşdığı müddətə bağlanılır. Belə ki, müddətli əmək müqaviləsi bağlanan halda, işçi və işəgötürən onun müddətini (2 il, 4 il və s.) özləri sərbəst şəkildə müəyyənləşdirirlər.

Əgər əmək müqaviləsində onun hansı müddətə bağlanması nəzərdə tutulmayıbsa, həmin əmək müqaviləsi müddətsiz bağlanmış hesab olunur. Tərəflər müddətsiz əmək müqaviləsi bağlamışlarsa, onda həmin əmək müqaviləsi hər iki tərəfin razılığı olmadan birtərəfli qaydada müddətli əmək müqaviləsi ilə əvəz edilə bilməz. Əgər əmək funksiyasının yerinə yetirilməsi şərtlərinə görə işin və ya göstərilən xidmətlərin daimi xarakterə malik olduğu qabaqcadan bəllidirsə, onda əmək müqaviləsi müddətsiz bağlanmalıdır.

Müddətli əmək müqaviləsinin bağlanması üçün əmək funksiyasının xüsusiyyətlərinə, onun icrasının şərtlərinə, müddətinə görə işlərin (xidmətlərin) daimi xarakterə malik olmaması tələb olunur.

Əmək Məcəlləsinin 47-ci maddəsində konkret hallar göstərilmişdir ki, həmin hallarda müddətli əmək müqaviləsi bağlanılır. Həmin hallar aşağıdakılardır:

• işçinin əmək qabiliyyətini müvəqqəti itirməsi, ezamiyyətdə, məzuniyyətdə olması, habelə iş yeri və vəzifəsi saxlanılmaqla qanunvericilikdə nəzərdə tutulmuş digər hallarda müəyyən səbəbdən müvəqqəti olaraq işə çıxmaması ilə əlaqədar onun əmək funksiyasının başqa işçi tərəfindən icrasının zəruriyyəti olduqda;

• təbii və iqlim şəraitinə və ya işin xüsusiyyətinə görə il boyu görülə bilməyən mövsümü işlərin yerinə yetirilməsi zamanı;

• işin həcminin və davamiyyətinin qısamüddətli olduğu təmir-tikinti, quraşdırma, yeni texnologiyanın tətbiqi və mənimsənilməsi, təcrübə-sınaq işlərinin aparılması və bu qəbilədən olan digər işlərin görüldüyü hallarda;

• müvafiq vəzifə (peşə) üzrə əmək funksiyasının mürəkkəbliliyi, məsuliyyətliliyi baxımından işçinin əmək və peşə vərdişlərinin mənimsənilməsi, yüksək peşəkarlıq səviyyəsinin əldə edilməsi tələb olunan (stajkeçmə, rezidentura dövrləri) hallarda;

• işçinin şəxsi, ailə-məişət vəziyyəti ilə bağlı olan, o cümlədən işləməklə yanaşı təhsil aldığı, müəyyən səbəbdən müvafiq yaşayış məntəqəsində müvəqqəti yaşadığı, pensiya yaşına çatdıqda işləmək istəyi olduğu hallarda;

• müvafiq icra hakimiyyəti orqanının göndərişi ilə haqqı ödənilən ictimai işlər görülərkən;

• Əmək Məcəllənin 6-cı maddəsinin “c” bəndində göstərilən orqanlar (Azərbaycan Respublikasının Milli Məclisinin deputatları və bələdiyyələrə seçilmiş şəxslər ) istisna olmaqla seçkili orqanlarda (təşkilatlarda, birliklərdə) seçkili vəzifələrə seçilərkən;

• tərəflərin hüquq bərabərliyi prinsipinə əməl edilməklə onların qarşılıqlı razılığı ilə;

• Bu Məcəllədə nəzərdə tutulmuş qaydada işçilərlə briqada, işçi qrupu halında kollektiv əmək müqaviləsi bağlandıqda;

• qanunvericilikdə nəzərdə tutulmuş digər hallarda.

Yuxarıda göstərilən hallarda müddətli əmək müqaviləsinin bağlanması məcburi deyil, tərəflərin iradəsindən asılı olur. Onu da qeyd edək ki, işçinin müddətli əmək müqaviləsinin müddəti bitdiyi halda, həmin əmək müqaviləsinə müddətin bitməsi ilə xitam verilir. Həmin əsasla işçi ilə əmək müqaviləsinə xitam verildikdə “İşsizlikdən sığorta haqqında” Qanuna edilmiş yeni dəyişikliyə əsasən həmin şəxsin işsizlikdən sığorta ödənişi almaq hüququ yarana bilər.

DogruXeber.az: - Bundan əlavə bəzi işçilərə yaxınlarının pensiya alması əsas gətirilib və işdən çıxarılıb.
Hansı ki, bu da tamamilə absurd bəhanədən başqa bir şey deyil. Əgər qanunda belə bir maddə varsa, o zaman hazırda sözügedən filialda, həmçinin respublika üzrə demək olar ki, ƏƏSMN-nin bütün sahələrində və şöbələrində yaxınlarının, ailə üzvlərinin, hətta özünün belə hazırda pensiya aldığı şəxslər var.

Bundan əlavə, bəzilərinə yaşını əsas gətirərək (halbuki, hələ 62 yaşı var) ərizəsi yazdırılıb və sair bu kimi kobud desək, dəxlisiz "səbəblər" gətirilərək işdən çıxarılıblar.

Yeri gəlmişkən, işdən çıxarılan şəxslərin bir neçəsi ilə telefon əlaqəsi saxladıq, hamısı bildirdi ki, işlərinə xitam verilməsi barəsindəki əmrin surəti idarə tərəfindən hələ də onlara təqdim edilməyib. Dəfələrlə tələb etsələr də, bütün tələbləri nəticəsiz qalıb.

Məlumata görə ƏƏSMN-nin daxili qaydalarına əsasən işçilər arasında "daxili imtahan"lar keçilir. Şərtlərə görə imtahanda zəif iştirak edən şəxslər işindən azad edilir.

Yeri gəlmişkən, müqavilə müddətinin bitdiyi deyilən və özünə işdən çıxması haqqında könüllü ərizə yazması əmri verilən şəxslərdən biri - 43 yaşlı Ramil Bağırov deyir, "Mən artıq, iki il idi ki, Əmək pensiyası üzrə Asan xidmətə göndərilmişdim, orada çalışırdım. Asan xidmətin rejimi ağır olduğu üçün çox adam tab gətirmirdi. Lakin mən, "işimdir" deyib, sakitcə iki ildir, bütün çətinliklərinə rəğmən, işimi işləyirdim. İşlədiyim müddətdə iki dəfə daxili imtahan keçirilib, özü də mənim iki ildir əmək pensiyası məsələlərinə baxdığım halda, mənə Mühasibat uçotu üzrə imtahan salınıb. Mən iki ildən çoxdur bu sahədən uzaq olduğum və imtahana hazırlıqsız olduğum halda, məndən xəbərsiz mühasibat uçotu imtahanına adım verilib. Mən də arxayın idim ki, çalışdığım sahə üzrə olacaq və yüksək nəticə göstərəcəyimdən əmin idim. Amma, imtahanda "sürpriz"lə rastlaşdım. Özü də imtahan nəticəmi mənə vermədilər ki, öz balımı hesabladım. Mən heç mənə şifahi deyilən az nəticə ilə razı deyiləm. Bəlkə çox toplamışam."

Yeri gəlmişkən, etibarlı mənbənin redaksiyamıza bildirdiyinə görə, imtahan elə də böyük "əhəmiyyət kəsb etmir". Onsuz da rəhbərlik kimi istəməsə nəticə yüksək də olsa, zəif olduğu deyilir özünə, kimi də istəsə topladığı nəticə nə qədər olursa-olsun həmin şəxs işinə davam edir. Beyləqanda keçmiş "pensiya şöbəsi"nin - hazırda müavinət şöbəsinin müdiri Bəhruz Quliyev kimi.

Mənbənin sözlərinə görə "Bəhruz Quliyev keçirilən imtahanlarda ən zəif nəticə göstərən şəxslərdəndir. Lakin, kimsə ona "gözün üstə qaşın var " demir. Daha doğrusu deyə bilmir.

Yeri gəlmişkən rayon sakinlərinin "oliqarx həyatı" yaşadığını, hektarlarla torpaq sahəsinin, mal-qara fərmasının, Bakıda evlərinin olduğunu, tez-tez bahalı avtomobillər dəyişdiriyini dedikləri Bəhruz Quliyevin Himalay Məmişovun və keçmiş direktor Rafael Məmmədovun "ən qiymətli" adamlarından biri olduğu deyilir.

Hazırda da Beyləqanda müavinət şöbəsinin müdiri olsa da, Mil-Muğan filialında Rafael Məmmədovun yerinə "ağsaqqallıq edir". Baxmayaraq ki, Rafael Məmmədovdan sonra direktoru müvəqqəti olaraq, tamamilə başqa bir şəxs əvəz edir.

Bundan əlavə, 2019-cu ildə Azərbaycan Respublikasının Baş Prokurorluğu yanında Korrupsiya baş İdarəsi İmişli DSMF-da yoxlama aparıb və orada mühüm vəzifələrdən birində çalışan Nofəl Atakişiyevin işində çox ciddi faktlar aşkar edilib. Nofəl Atakişiyev Əmək Məcəlləsinin 70-ci maddəsinin "Ç" bəndi ilə işdən çıxarılıb. Lakin, çox keçmədən, İmişli Rayon Məşğulluq İdarəsində mühüm vəzifəyə təyin olunur.

Maraqlıdır, o yoxlamalar, o maddə ilə işdən çıxarılma nə üçün idi, əgər yenidən bu cür mühüm vəzifə veriləcəkdirsə?!...

Adətən 70-ci maddənin "Ç" bəndi ilə işdən çıxarılan şəxslər, iş tapmaqda çətinlik çəkirlər. Lakin, görünür Sahil Babayevin könlü "sevimli işçisi"nin o çətinlikləri yaşamasına razı gəlməyib. Odur ki, elə öz idarəçiliyi altında başqa bir mühüm vəzifə ilə təmin edib.

Yeri gəlmişkən, Nofəl Atakişiyevi "sevimli" göstərən yaxınlarının kimliyi və harada, hansı vəzifələrdə çalışdıqları barəsində hələlik heç nə yazmırıq.

"DOST" İş Mərkəzinə gəldikdə isə, həmişə əlillərin, sosial durumunun çox zəif olduğu şəxslərin boğazından kəsib, güya "dövlət büdcəsini artıran" ƏƏSM naziri Sahil Babayevi İmişli rayonunun bu idarəsində ciddi yoxlamalar aparmağa dəvət edirik.

Çünki, etibarlı mənbənin bizə bildirdiyinə görə, işə çoxlu sayda xadimələr götürən "DOST İŞ mərkəzi"ndə, heç də o qədər təmizlikçi xanımlar çalışmır. Amma, adları o işlərdə qeydiyyatda olub, dövlət büdcəsindən maaş ayrılan adlar var ki, ad sahiblərinin çoxu o maaşlardan bixəbərdirlər.

Yeri gəlmişkən onu da qeyd edək ki, redaksiyamıza daxil olan daha bir məlumata görə Beyləqan DSMF-nun keçmiş müdiri Ülfət Vəliyev işdən haqsız və qeyri-qanuni şəkildə çıxarıldığına görə DSMF-na qarşı məhkəmə iddiası qaldırıb və qanunvericilikdə 3 aylıq əmək müqaviləsinin olmadığını, daha doğrusu hansı hallarda mümkün olduğunu sübuta yetirib. Odur ki, Ülfət Vəliyev məhkəmənin qərarı ilə işinə bərpa olunub və məhkəmə qərarında, hətta buvaxta qədər - yəni işdən azad edildiyi gündən, buvaxta qədər olan müddət üçün də əmək haqqının ödənilməsi nəzərdə tutulur. Amma, çox təəssüflər olsun ki, məhkəmə iddiası qaldırmaq üçün maddi imkanlarının olmadığını deyən digər işdən çıxarılan işçilər hələ də işsizdirlər və hətta, işdən çıxarılma əmrinin surətinin belə, dəfələrlə tələb etmələrinə baxmayaraq, özlərinə verilmədiyini bildirirlər.
Qeyd edək ki, həmin 3 aylıq müqavilənin bitdiyi səbəbilə işdən çıxarılanlar arasında Dövlət Qulluğuna keçirilən imtahanlarda yüksək nəticə göstərən şəxslər də var ki, hazırda onlar da işsizdirlər.

P.S: "DogruXeber.az"a daxil olan məlumatlarla bağlı bütün qeyd edilənlərin başlıca səbəbkarı olduğu deyilən Rafael Məmmədov ilə telefon əlaqəsi saxladıq və barəsində redaksiyamıza bəzi məlumatlar daxil olduğunu bildirdik. Rafael Məmmədov isə DSMF-nun mətbuat xidməti ilə əlaqə saxlamağımızı, yaranmış suallarımızı onlara ünvanlamağımızı istədi.

Bildirdik ki, "o uzun vaxt aparacaq".
Rafael Məmmədov isə, "Gec olmaz. Niyə gec olur?! Bir günə cavab verəcəyik." dedi.
Razılaşdıq və ardından Əmək və Əhalinin Sosial Müdafiəsi Nazirliyinin (ƏƏSMN) tabeliyində Dövlət Sosial Müdafiə Fondunun (DSMF) İctimaiyyətlə əlaqələr departamentinin müdiri Rəşad Mehdiliyə zəng etdik. Özümüzü təqdim edib, daxil olan məlumatları diqqətinə çatdırdıq.

Müəyyən qeydlərini apardıqdan sonra Rəşad Mehdili mövzu barəsində araşdırılıb, bizə cavab veriləcəyini bildirmişdi ki, ona zəng gəldi.

Rəşad bəy, "Müəllim, mən indi sizə zəng edəcəm" deyib, telefonu söndürdü. Lakin, təəssüflər olsun, artıq üç gün keçməsinə baxmayaraq, hələ də sözügedən tərəf redaksiyamızla əlaqə saxlamayıb.

Mövzuya qayıdacağıq.

Redaksiyamız hər kəsin söz haqqını tanıyır.

DogruXeber.az

Son vaxtlar Azərbaycanda mənzil tikintisi adı ilə vətəndaşların külli miqdarda vəsaitini mənimsəyən tikinti şirkətlərinin sayı xeyli artıb. Mövcud problemlə bağlı hüquq-mühafizə orqanları lazımi tədbirlər görsə də, şəxsi evlərinə qovuşmaq arzusunda olan vətəndaşların aldadılması adi bir hala çevrilib.

Bu cür tikinti şirkətlərinin yalançı vədlərinə aldanaraq, onların qurbanına çevrilən vətəndaşlardan biri də İsayeva Fəridə Qəhrəman qızıdır. F. İsayeva "Yeni Ailə” MMC tikinti şirkətinin ona məxsus mülkiyyəti sökdüyünü və 4 ilə yaxındır ki, onu mülkiyyətsiz, evsiz-eşiksiz qoyduğunu bildirərək, dövlət orqanlarından kömək istəyir.

Şikayətçi bildirir ki, "Yeni Ailə” MMC –nin qanunsuz əməlləri artıq onu intihar həddinə çatdırıb: "Mənim Bakı şəhəri, Nəsimi rayonu, Süleyman Rəhimov küçəsində ümumi sahəsi 300 kv.m olan qeyri-yaşayış sahəm var idi. Əsas gəlirimi buradakı obyektlərdən istifadə edərək qazanır, ailəmin təminatını qarşılayırdım. 2017-18-ci illərdə "Yeni Ailə” MMC əraziyə gələrək binaların pilot layihəyə düşdüyünü və sökülməli olduğunu bildirdi. Təqdim olunan şərtlərlə razı olmayan sakinlərin işıq, su və qaz təminatları dayandırıldı, əraziyə giriş-çıxışlarına maneçiliklər törədildi. Mən bu tip qanunsuz hərəkətlərə görə, məcburi şəkildə şirkətin təqdim etdiyi şərtlərlə razılaşmalı oldum. Daha sonra "Yeni Ailə” MMC şirkəti ilə aramızda 25.01.2018-ci il tarixli notarial qaydada müqavilə bağlanıldı.Həmin müqaviləyə əsasən şirkət iki ədəd qeyri-yaşayış sahəsini məndən təhvil aldı. Əvəzində isə həmin müqaviləyə uyğun olaraq tərtib olunmuş akt əsasında Mirəli Qaşqay və Süleyman Rəhimov küçələrinin kəsişməsində yerləşən A-B-C-D və 17, 18, 19-da yerləşən250 kv.m-dən ibarət qeyri-yaşayış sahəsini 24 ay müddətində mənə tam təmirli formada təhvil verilmə öhdəliyi "Yeni Ailə” MMC-nin üzərinə qoyuldu. Həmçinin müqaviləyə əsasən aylıq 2200 manat icarə haqqının mənə ödənilməsi öhdəliyi müəyyən edildi”.

Fəridə İsayeva qeyd edir ki, bu müqavilədən 4 ilə yaxın müddət keçsə də həmin qeyri-yaşayış sahələri ona təhvil verilməyib, aylıq icarə haqqı da ödənilməyib: "Yaxın tarixdə bu faktla bağlı tikinti şirkətinə narazılığımı bildirdikdə mənə artıq həmin sahənin başqa şəxslərə satıldığı və sökülən əmlakımın qarşılığında isə heç bir əmlak verilməyəcəyi deyildi. Ona görə də üzləşdiyim bütün bu qanun pozuntuları ilə əlaqədar dövlət orqanlarına müraciət edirəm. Mən, 66 yaşlı bir Azərbaycan qadını olaraq, bu şirkətin əlində oyuncağa çevrilmişəm. İllər əvvəl məni məcbur edib imzalatdırdıqları müqaviləyə indi özləri əməl etmirlər. Hazırda mən öz mülkiyyətimdən məhrum edilmiş vəziyyətdəyəm.Bu şirkət davamlı olaraq özlərinin Nazirlər Kabinetinin qərarlarınının və İcra Hakimiyyətinin sərəncamlarının icraçısı olduqlarını bildirirlər. Lakin qəbul edilmiş qərar və sərancamlarda sakinlərin mülkiyyət hüquqlarına dair mənafeləri üstün tutmaqla yaşadıqları istismara yararsız binaların sökülərək inşa ediləcək müasir tələblərə cavab verən yeni yaşayış binalarında onlara tam təmirli və sahəsinə uyğun olaraq əvvəlkindən daha geniş yeni mənzillərin verilməsi və mənzillərin təhvil veriləcəyi müddətədək müvəqqəti yaşayış sahəsiilə təmin edilmələri nəzərdə tutulmuşdu. Hətta bu tikinti şirkəti öz məsuliyyətsizliyini də dövlət və dövlət orqanlarının üzərinə yıxmağa çalışır. Tikinti şirkətindən əmlakımı tələb etdikdə mənə açıq-aşkar tikinti işlərinin yubanmasının səbəbkarının dövlət olduğunu, dövlətin təlimatı ilə sakinlərin əmlaklarını vermədiklərini bildirirlər”.

"Xahiş edirəm ki, məni bu tikinti şirkətinin qanunsuz əməllərindən xilas edin. "Yeni Ailə” MMC vətəndaşların ev və obyektlərini sökür, onlarla məcburi müqavilə bağlatdırır və yekunda da tikdikləri əmlakları kənar şəxslərə satırlar. Tikinti şirkətlərinin bu tip qanunsuz əməlləri mütləq formada araşdırılmalı və müvafiq cəza tədbirləri görülməlidir”,-deyə müraciətdə bildirilir.

"AzPolitika.info”

"Çox tərbiyəsiz bir sistem qurub. Yaynıda bir-iki nəfər saxlayır... Tərbiyəsiz adamlardır, düz-əməlli əxılaqları da yoxdur. Barəsində kimsə artıq-əskik danışırsa, ümumiyyətlə, kimsə onun adını tutursa, həminadamları salır "hədəfin" üstünə..." Bu barədə DİA.AZ-a Daşkəsən rayon icra hakimiyyətinin başçısı Əhəd Abıyevlə bağlı yazan mənbə bildirir.

Qaynaq iddia edir ki, çevrəsinə beş-on ağzıpozuğu toplayan Əhəd Abıyev rayonda bu gün hər kəsi susdurmaqla məşğuldur: "Bir növ "həyasız arvad" məsəli... Onun yanında elələri var ki, istənilən bir söyüşü eşitməyə hazırdırlar... Vətəndaşla elə ağız-ağıza girirlər ki... Vətəndaş nədən şikayətə gəldiyini də unudur. Əhəd Abıyev bu yolla narazıları susdurur. Hətta eyni üsulla Qazilərimizə qarşı da davranır... Yəni şərləmək, böhtan atmaq..."

Bu şok iddiaları səsləndirən mənbə dia.az-a sonda bunları bildirir: "Əhəd Abıyevin bu üsulu "yuxarıların" da qulağına çatıb... Yəqin onun qulağını burarlar..."

İddia olunanlarla bağlı dia.az olaraq qarşı tərəfi də dinləməyə hazırıq...

“Vətən müqəddəsdir, vətən əzizdir” deyib onun hər qarış torpağını göz bəbəyi kimi qorumağa çalışan, eyni zamanda xalqımızın tarixində bənzəri olmayan qəhrəmanlıqlar göstərməklə canından keçən vətən övladlarının adları heç zaman unudulmur, heç zaman yaddaşlardan çıxmır.

Bəli, taleyinə çoxları kimi xalqına bağlılıq duyğusu ilə yanaşmaq, doğma Vətənini sevmək istəyi yazılmış Tovuz rayon sakini, Vətən müharibəsi şəhidi Əliyev Aqil Faiq oğlunun ömür yolları barədə söhbət düşərkən, o zaman bəlli olur ki, adı çəkilən bu Qəhrəmanımız da, məhz canını, qanını torpaqlarımızın bütövlüyü uğrunda qurban verən vətən oğullarındandır. Qeyd edək ki, Qəhrəmanımızın doğma qardaşı Anar Əliyev ailəlikcə üz-üzə qaldıqları ağrılı-acılı həyata qarşı fəryad etsə də, onu bu gün nə Tovuz RİH-nin başçısı Məmməd Məmmədov, nə də ki, digər vəzifə sahibləri saya salmırlar.

Qeyd edək ki, redaksiyamıza Tovuz rayonu, Çatax kənd inzibati ərazi dairəsinin Pələkli kənd sakini Əliyev Anar Faiq oğlu tərəfindən video-müraciət daxil olub. Adı çəkilən bu şəxs təqdim etdiyi video-müraciətində bildirir: “Qardaşım Vətən müəharibəsi şəhidi Əliyev Aqil Faiq oğlu müddətdən artıq hərbi xidmət qulluqçu (MAXE) idi. O, Azərbaycan Silahlı Qüvvələrinin MAXE-si olaraq həm Tovuz döyüşlərində, həm də 44 gün davam edən Vətən müharibəsində iştirak etdi. Bildirim ki, qardaşım Aqil Əliyev Beyləqan rayonu ərazisindəki “N” saylı hərbi hissədə xidmət edirdi və o, pulemyotçu idi. Bundan əlavə, qardaşım rabitə komandiri vəzifəsini də daşıyırdı və o, 44 gün davam edən Vətən müharibəsinin şiddətli vaxtlarında, daha dəqiq desəm 15 oktyabr 2020-ci il tarixdə Suqovuşan ərazisində həyata keçirilən döyüş əməliyyatlarının birində qəhrəmancasına şəhid oldu və Pələkli kənd qəbristanlığında da dəfn olundu. Qeyd edim ki, biz ailəlikcə dağlıq ərazidə yaşayırıq və belə bir səbəbdən də, kəndarası yollarımız bu gün də bərbad haldadır. Bildirim ki, rayonun Bozalqanlı kəndində fərdi yaşayış evim var və həmin evdə əlil bacım, xəstə qardaşım mənimlə birlikdə qalırdılar. Elə ki, qardaşım Aqil Əliyev şəhid oldu, o halda Bozalqanlıdakı evimin qapılarını bağladım və əlil bacımı, xəstə qardaşımı götürüb Pələkli kəndində yaşayan, eyni zamanda sinir xəstəsi olan anamın yanına köçdüm. Bir müddət keçdikdən sonra Tovuz RİH-nin başçısı Məmməd Məmmədova, Vətən müharibəsi iştirakçıları və şəhid ailələri ilə işin təşkili şöbəsinin müdiri Oruc Məmmədova müraciət etdim ki, Bozalqanlı kəndindəki küçəyə, hansı ki, mənim də evimin olduğu küçəyə qardaşım Aqil Əliyevin adının verilməsini, həmin küçəyə asfalt örtüyünün vurulmasının təşkil olunmasını onlardan xahiş etdim.WhatsApp Image 2022 09 05 at 10.13.19Hər iki vəzifə sahibi “Bu kimi işlərin görülməsi üçün qardaşının adına orden olmalı, bayraq meydanı olmalıdır” deyə cavab verdilər. Qeyd edim ki, qardaşımın adına “Suqovuşanın azad olunmasına görə”, “Cəsur döyüşçü” və “Vətən uğrunda” medalları verilib. Mən Tovuz RİH-nin başçısı Məmməd Məmmədova, eyni zamanda Oruc Məmmədova təkrar bildirdim ki, əgər Bozalqanlı kəndindəki küçəyə, kənddəki məktəbə qardaşımın adının verilməsi, yaxud da həmin küçəyə asfalt örtüyünün vurulması çətin məsələdirsə, o halda heç olmazsa həmin küçəyə iki maşın çınqıl-daş tökdürün. Artıq iki ilə yaxınlaşır ki, RİH-də vəzifə sahibi olan bu şəxslər iki maşın çınqıl-daş tökülməsi ilə bağlı vəd veriblər, amma onlar bu gün də verdikləri vədlərinə əməl etməyiblər. Yəni, kənd yolları ilə bərabər, kənd qəbristanlığının yolları da bərbad haldadır. Bu gün ailəlikcə yaşadığımız evdə nə mavi qaz, nə də ki, internet var. Xeyli müddət bundan öncə təkrar RİH-nin başçısının qəbulunda oldum və kəndarası yolların bərbad halda olmasını bir daha Məmməd müəllimin diqqətinə çatdırdım. Dərhal o, Oruc Məmmədovun köməkçisi Azər müəllimə tapşırığını verdi və biz birlikdə küçəyə baxış keçirdik. Həmin vaxt Azər müəllim “Bu yola iki maşın çınqıl-daş bəhs edər” desə də, artıq 4-5 aydır ki, bu yöndə verilən vədə də əməl olunmayıb. Dəfələrlə zəng etmişəm, bir neçə dəfə qəbula getmişəm, hər dəfə mənə “yağlı vəd” veriblər, son anda heç bir iş görməyiblər.


Qeyd edim ki, qardaşım olduqca vətənpərvər bir gənc idi. O, mərhum general Polad Həşimovla birlikdə Tovuz döyüşlərində vuruşdu və o, həmin döyüşlərdən sağ çıxsa da, 15 oktyabr 2020-ci il tarixdə Suqovuşanda qəhrəmancasına şəhid oldu. Atamız rəhmətə gedəndə şəhid qardaşım yaşyarımında olur. Elə ki, o, vətən torpaqlarının bütövlüyü uğrunda şəhid oldu, həmin vaxtlarda onun adına olan bulaq kompleksini, yol kənarına vurulan lövhəni biz öz vəsaitimiz hesabına ərsəyə gətirdik. Bu gün xəstə anamla, əlil bacımla, xəstə qardaşımla yaşadığım evin döşəmələri çürüyüb, imkansızlıq ucbatından evdə təmir işlərini həyata keçirə bilmirəm. RİH Aparatına etdiyim müraciətlərim, sanki “daşa dəyir”. Artıq anamın ayaqları tutulub və yaşayış vəziyyətimizin ağırlığını hər kəs gəlib öz gözləri ilə görə bilər. Şəhid qardaşımın da dəfn olunduğu kənd qəbristanlığına gedən yol bərbad halda olduğundan, qəbristanlığa hər növ nəqliyyat vasitələri gedə bilmir. Qardaşımın qəbir daşının hazırlanmasına iki min manat pul xərcləmişik.
Bir müddət bundan öncə rayonun məşğulluq idarəsinin əməkdaşları şəhid ailəsinin üzvü olduğumuzdan, bizə iki iribuynuzlu heyvan verdilər. Amma, yaxınlığımızda yaşayan və kifayət qədər də dolanışıq imkanına sahib olan digər şəhid ailəsinə isə, üç iribuynuzlu heyvan verdilər. Elə ki, anam məşğulluq idarəsinin Nəsimi adlı əməkdaşına “Mənim övladıma niyə fərq qoyursunuz” deyə sual verir, o halda o, bizə “Nazirlik belə təsdiqləyib” cavabını verir”.Tovuzda RİH-nin başçısı şəhid ailəsinə rəzalət yaşadır
Bütün bunlar onu göstərir ki, Tovuz RİH-nin başçısı Məmməd Məmmədov və rayondakı digər vəzifə sahibləri Vətən müharibəsi şəhidi Aqil Əliyevin ruhuna hörmətsizlik etməkdən savayı, şəhidin sinir xəstəsi olan yaşlı anasına, əlil bacısına, xəstə və imkansız qardaşına qardaşına qarşı da “xor münasibət”lərini sərgiləməkdə davam edirlər. Deməli, çox yaxın vaxtlarda Tovuzda Məmmədov “erası”na son qoyulmalıdır ki, digər imkansız ailələrlə bərabər, şəhid ailəsinin üzvləri də rahat nəfəs ala bilsinlər. Yoxsa, ...
Mövzuya qayıdacağıq. //nyus.az//

“Hürriyyət”in ötən saylarının birində “Ceyhun Həsənovun yeni sort pomidoru ölkədə böyük marağa səbəb olub” sərlövhəli yazı dərc etmişdik. Həmin yazıda Azərbaycan Respublikası Ədliyyə nazirinin müavini, Penitensiar Xidmət rəisi, ədliyyə general-leytenantı Ceyhun Həsənovun yeni növ pomidor yetişdirməsindən söhbət açılırdı. Qeyd olunurdu ki, sosial şəbəkələrdə “Penitensiar pomidoru”, “General pomidoru” adı verilən bu tərəvəz növü çox sayda insanın diqqətini cəlb edib. Belə ki, vətəndaşlar general-leytenantın yetişdirdiyi pomidorun dadına baxmaq arzusunda olduğunu bildiriblər...

Etiraf edək ki, yazı müəllifi olaraq həmin pomidorun dadına baxmaq istəyi bizim də içimizdən keçməmiş deyildi. Amma eşidəndə ki, bu pomidorların böyük hissəsi ölkədən kənarda satılır, boşalmış, yarızay məhsullar isə Penitensiar Xidmətin tabeçiliyində olan həbsxanalara göndərilir, nəfsimizi boğmaqdan başqa çarəmiz qalmadı. Çünki karantin rejiminin davam etdiyi, quru sərhədlərin bağlı olduğu indiki dönəmdə ölkədən kənara çıxmağın çətinlikləri hər kəsə bəllidir. “Penitensiar pomidoru” yemək üçün cinayət törədib həbxsanaya düşmək isə heç də ağıllı fikir deyildi. Hətta bu yola əl atsaq belə, digər məhkumlar kimi, bizim də ancaq boşalmış, xarab pomidorların dadına baxmaqdan başqa şansımızın olmadığı bəlli idi.

Elə bu düşüncələr içərisində “General pomidoru” əldə etməyin yollarını axtararkən, təsadüfən saytların birində qarşıma maraqlı bir xəbər çıxdı. Məlum oldu ki, general-leytenantın yenicə biznesə qədəm qoyan oğlu Salyan rayonunda atasının şərəfinə “Yolüstü” adlı restoran açaraq, müştərilərə “Penitensiar pomidoru”, eləcə də Ceyhun Həsənovun yetişdirdiyi digər tərəvəz məhsullarını təklif etməkdədir. Sayt yazırdı ki, təmtəraqlı açılış mərasimi keçirilən restoran Bakı-Astara magistralının hər iki kənarında yerləşir və general-leytenantın doğulduğu kəndin adını daşıyır.

İşə bax ki, C.Həsənovun oğlunun restoran açması xəbərini eşidər-eşitməz könlümüzdən “quşdan qanad alıb” Salyana uçmaq həvəsi keçdi. Lakin qarşıdakı günlərdə peşə fəaliyyətimizlə əlaqədar cənub rayonlarından birinə səfərimiz nəzərdə tutulduğundan, “quşları narahat etməyib”, məhz həmin vaxt yolüstü general-leytenantın oğlunun restoranına da baş çəkməyi qərara aldıq.

Beləliklə, həftə sonu “Yolüstü” restoranında “Penitensiar pomidoru” yemək, Ceyhun Həsənovun bostanından olan məhsulların dadına baxmaq arzumuz çin oldu. Oxucularımız arasında da bu istəkdə olanların varlığına şübhə etmədiyimizdən, öncə restoranın yerləşdiyi ərazinin mənzərəsini canlandırmağa çalışaq. Yuxarıda da qeyd etdiyimiz kimi, restoran Salyan rayonu ərazisində yerləşir və Bakı-Astara yolunun hər iki hissəsini əhatə edir. Yanında “SOCAR” yanacaq doldurma məntəqəsi, mağaza, ibadət evi və s. iaşə müəssisələri fəaliyyət göstərir. Obyektin bir hissəsində, daha böyük ərazidə isə adı mətbuatda bir çox qalmaqalda hallanan “Salyan Aqro” yerləşir. Obyektin tikintisi hələ tam başa çatmasa da, ərazidə böyük sürətlə abadlaşma işləri aparılırdı...

Ətrafı bir qədər seyr etdikdən sonra “Yolüstü” restoranına daxil olduq. Gözlədiyimizin əksinə olaraq içəridə müştəri az idi. Görünür, həmin yolun üstündə uzun zamandır fəaliyyət göstərən və özünə müştəri toplayan “Hacıoğlu” kimi restoranlar olduğundan, yenicə fəaliyyətə başlayan “Yolüstü” təbii olaraq müştəri qıtlığı yaşayır...

Restorana daxil olanda diqqətimizi ilk olaraq cəlb edən içəridə quraşdırılan və qiyməti 4 min manatdan ucuz olmayan çoxsaylı “AUX” kondisionerləri oldu. Hiss olunurdu ki, general-leytenant oğlunun biznesi üçün yaxşı pul buraxıb. Amma kondisoner məsələsinin marağımıza səbəb olmasının başqa bir səbəbi vardı. Kimsəyə sirr deyil ki, Penitensiar Xidmətin nəzarətində olan cəzaçəkmə müəssisələrində kondisionerli otaqlar üçün məhkumlardan böyük məbləğdə pullar alınır. Əksər kameralarda isə yay aylarında temperatur 35-40 dərəcədən aşağı düşmür. Bu səbəbdən, bir anlıq fikrimizdən keçdi ki, kaş, Ceyhun müəllim oğlunun obyektinə qoydurduğu 4 min manatlıq “AUX” kondisionerlərindən ikisinin qiymətinə 10-12 ədəd sıradan kondisioner alıb, türmələrdə istidən əzab çəkən kasıb məhbusların kameralarına yerləşdirəydi. Lakin bunun heç vaxt olmayacağını bildiyimizdən, boş xəyala dalmaqdan vaz keçib, masalardan birinə əyləşdik.

Bir neçə dəqiqə sonra sonra ofisiant yaxınlşadı və bizi menyü ilə tanış etdi. İnsaf naminə, qiymətlər cənub zonasında mövcud olan digər restoranlarla müqayisədə münasib idi. Ətrafdakı milçəklərin çoxluğunu nəzərə almasaq, xidmət və yeməklərin keyfiyyəti də pis deyildi. İlk olaraq pomidor sifariş verməyimiz ofisiantı təəccübləndirsə də, istəyimizə uyğun olaraq masaya öncə ayrıca qabda pomidor, əlavə olaraq xiyar və qarpız gətirildi. Tərəvəzlərin yerli məhsul olub-olmadığı ilə maraqlandıqda isə, hamısının “Salyan Aqro”nun bostanından olduğunu söylədi.


Beləliklə, Avropasayağı həzin musiqilərin sədası altında yeməyimizi yeyib, üstündən də çay içdikdən sonra hesabı istədik. Ofisiant məbləği birbaşa söylədikdə, “sizin restoranda müştərilərə çek verilmirmi” deyə sual etdik. O, “verilir” deyib, kassaya yaxınlaşdı. Az sonra üzərində sadəcə məbləğin qeyd olunduğu ağ kağız parçası ilə geri döndü. Bu zaman bizə agah oldu ki, əksər məmurların obyektlərində olduğu kimi, Ceyhun müəllim də vergi ilə “dərin anlaşma” içərisindədir. Amma uzunçuluq etməyib hesabı ödədik və ofisianta “çayvoy” verməyi də unutmadıq. Restoranı tərk edərkən hər şeydən xəbərsiz kimi, ofisiantdan obyektin sahibinin kim olduğunu soruşduq. Təbii ki, aldığımız cavab bizi heç də təəccübləndirmədi: “Bilmirsiniz, bura türmələrin rəisi Ceyhun müəllimin obyektidir”.

Çıxışda mağazaya da baş çəkib, yol üçün yüngül alış-veriş etdik. Maşına minərkən “Salyan Aqro”nun böyük anbarı diqqətimizi cəlb etdi. Yerli sakinlərin birindən bu anbarda nə saxlanıldığını soruşduq. Məlum oldu ki, Ceyhun Həsənov təkcə tərəvəz yetişdirməklə məşğul deyil, rayonda özünə məxsus hektarlarla ərazidə taxıl da becərir və toplanılan məhsulu “Salyan Aqro”nun anbarına yığır. Dedilər ki, general-mayor buğdanı daha baha qiymətə satmaq üçün qış fəslini gözləyir...

P.S. Əlbəttə, “Penitensiar pomidoru” yemək üçün Bakıdan Salyana gedib, sonra onun dadı ilə bağlı düşüncələrimizi oxucularla paylaşmasaq, doğru olmaz. Amma dəyərli oxucuların əfvinə sığınıb, bu haqda susmaq qərarına gəldik... //hurriyyet.az//

İnci Mamedova adlı xanım Faktinfo.az saytına Tovuz Dövlət Sosial-İqtisad Kollecinin direktorundan şikayət göndərib.
Şikayətçi qeyd edir ki,kollecin direktoru Rizvan Qəmbərovu iş yerində tapmaq qeyri mümkündür.Digər tərəfdən kollecin maddi texniki bazası yox dərəcəsindədir, maliyyə pozuntusu, özbaşınalıq pikk həddə çatıb.O da bildirilir ki, işə gəlmiyən müəllimlərin, texniki işçilərin, tələbələrin təqaüd kartları direktor müavini Nuranə Ələkbərovadadır.

Məlumatda bildirilir ki,son bir neçə gündə valideynlər də direktor Rizvan Qəmbərovu iş otağında tapa bilmirlər. Valideynlərin kollecin direktoruna sözləri olduğundan dəfələrlə günün müxtəlif vaxtlarında kollecə getsələr də rəhbəri iş otağıda tapa bilməyiblər.Direktorun katibəsi isə bildirib ki,bütün iş müavin Nuranə Ələkbərovaya həvalə edilib,- məlumatda qeyd edilir.

Mövzuya münasibət öyrənmək üçün kollec rəhbərliyi ilə əlaqə saxlamaq istəsək də,cəhdlərimiz nəticəsiz qaldı.

Faktinfo.az