Kiçik sahibkar Pərviz Fərəcov qeyd edir ki, "Lebro" broyler şirkətindən satmaq məqsədilə 17.500 (on yeddi min beş yüz) manatlıq qablaşdırılmış toyuq aldım. Onun 9.500 (doqquz min beş yüz) manatını Nəriman və Orxan adlı şəxslərə ödədim, qalanını borclu qaldım.
Sonra malı açanda baxdım ki, hamısı iylənmiş toyuqlardır. Geri qaytarmaq üçün dəfələrlə müraciət etsəm də qəbul etmədilər.
Axırda mənə dedilər apar Lerikə, fabrikin özünə. Filan qədər də xərc çəkib yükdaşıma xidmətindən yük maşını sifariş verib, onunla malı apardım Lerikə. Orda da borclu qaldığım qədərini götürdülər, pulunu ödədiyim qədərini isə nə qədər israr etsəm də geri almadılar. Mən də məcbur olub malı şirkətin həyətinə boşaltdım.
Geri qayıdanda mülki geyimli polis əməkdaşları yolda "VAZ-2107" markalı avtomobillə qarşımızı kəsdilər və haqqımızda şikayət olduğunu dedilər.
Güya bizim sürücü şlaqbaumu qırıb. Sonra dedilər mühafizəçini vurub.

Biz yenidən şirkətə geri döndük. Orada polis əməkdaşları tərəfindən baxış keçirildi və haqqımızdakı şikayət öz əksini tapmadı. Bizdən kafedə izahat aldıqdan sonra sürücünü buraxdılar. Mən də gecə yarısı Bakıya qayıtdım.
Başımıza gətirdikləri bu qədər oyunlara rəğmən ödədiyim məbləği mənə qaytarmırlar. Orxanla Nəriman deyir ki, "pulu yemişik, üstündən də su içmişik. Get əlin hara qəlbidir ora qoy".

Həə, atalar yaxşı deyib, "Arxalı köpək qurd basar".

Pərviz Fərəcovun sözlərinə görə, ""Lebro" broyler şirkətinin əsl (qeyri-rəsmi) sahibi millət vəkili İqbal Məmmədovdur. İdarəçilik edən Nəriman və Orxan isə qardaşı oğlanlarıdır."
Yəqin, bu səbəbdəndir ki, Nəriman bəy və "əmisinin ərköyün balası" Orxan bəy vətəndaşa qarşı etdiyi haqsızlıq azmış kimi, kobudluq da göstərir. Təqdim etdiyimiz videoda toyuq məhsullarının kəsildiyi, saxlanıldığı şəraitin görüntülərinə baxın!
Yeri gəlmişkən, yazını yazmadan əvvəl "Lebro" broyler barəsində internet üzərindən kiçik araşdırma apardıq.
Sözügedən məhsulların reklamını izlədikcə, bizdə maraqlı fikirlər oyandı. Əslində, belə çıxır ki, sözügedən şirkət heç də alıcılarını aldatmayıb.

Gördüyünüz kimi reklam fotosunda "qoxusu aləmi gəzər" sözləri yazılıb ki, zatən Pərviz Fərəcov da məhz bu səbəbdən malları geri iadə etmək istəyir.
Bir də "qızıl qırmızı" deyirlər ki, "hər gün marketlərə yeni məhsul çatdırırıq".
Yuxarıda təqdim etdiyimiz videogörüntülərdə reklamda yazılan bu sözün nə dərəcədə həqiqətə uyğun olub-olmadığını da görmüş oldunuz.

İqbal Məmmədovun biznesi böyüyür...

Görünür doğma yurdunun təbiəti deputat İqbal Məmmədovu özünə çox bağlayıb ki, Lerik rayonunda biznesini böyütməyə qərar verib.
Odur ki, əldə etdiyimiz məlumata görə daha bir zavod - ən müasir texnologiyalarla yem zavodunu da artıq işə salıb.

Onu da qeyd edək ki, təbii olaraq, əlbəttə bütün bu əmlakların deputatın özünün adına olması mümkün deyil. Yəqin, o səbəbdən də Nəriman və qardaşı oğlu Orxan butun işlərə rəhbərlik edirlər.
Pərviz Fərəcov isə uzun müddətdir ki, zəhmətlə qazandığı halal pulunu bu iki şəxsdən geri ala bilmədiyini deyir və hüquq-mühafizə orqanlarından ona hüquqlarını bərpa etməkdə köməklik göstərmələrini xahiş edir.
Məsələ ilə bağlı adıçəkilən tərəflərin də mövqeyini dinləməyə hazırıq.

GundemXeber.Az

Naxçıvan MR Mərkəzi Xəstəxanasına tez-tez, Bakıdan müxtəlif sahələr üzrə həkimlər dəvət olunur. Ancaq, pullu xidmət göstərən bu həkimlərin pasiyentlərdən aldığı vəsaitlər dövlət büdcəsindən gizlədilir. TEREF.AZ bildirir ki, bu haqda "Gündəlik Naxçıvan"a xəstəxanada çalışan bir qrup həkim məlumat verib. Onların sözlərinə görə, büdcədən gizlədilən bu pullar, xəstəxananın baş həkimi Zəbur Bağırov və Bakıdan gələn həkimlər arasında bölünüb, mənimsənilir. Yəni, baş həkim Bakıdan gələnlərdən rüşvət alaraq, onların xəstəxanada fəaliyyətinə icazə verir.
Təhlükəsizliyi üçün adının çəkilməsini istəməyən həkimlərdən biri “Gündəlik Naxçıvan”a bildirir ki, hər dəfə Bakıdan həkimlər gələndə, xəstəxananın birinci mərtəbəsi onların ixtiyarına verilir:
"Zəbur Bağırov işçilərə və həkimlərə tapşırıb ki, yoxlama gəldiyi halda aksiya keçirildiyi, xəstələrin pulsuz müayinədən keçirildiyi bildirilsin. Hər dəfə iki həkim gəlir. Diyetoloq, kosmetoloqdan tutmuş, hər sahə üzrə həkimlər gəlir. Sonuncu dəfə yanıvarın 13-də gəlmişdilər. Əvvəlcədən xəstəxananın və həmin həkimlərin sosial səhifələrində elanlar verilir, telefon nömrələri yazılır. 100-lərlə xəstə zəng edərək, növbəyə yazılırlar. Sonra həkimlər gəlir. Vətəndaşların hər biri müayinədən keçmək üçün 100 manat ödəniş edirlər. Xəstəliyin müalicə və müayinəsinə uyğun olaraq əlavə ödənişlər də edilir. Bu pullar rəsmi qaydada qeydiyyata alınmır, pullar baş həkim və Bakıdan gələn həkimlər arasında bölünür. Xəstəxananın tibbi ləvazimatlarından istifadə olunur, heç bir vergi də ödənilmir.”
Bu həkimlərə müraciət edən xəstələrin bəziləri gözləntilərinin doğrulmadığını bildirirlər. Şərur rayon sakini Məlahət Əliyeva deyir ki, həkimlər artıq pul almaq üçün, müalicəni bilərəkdən uzadırlar:
"Birinci dəfə 170 manatlıq, ikinci dəfə 150 manatlıq resept yazdılar. Dərmanları Naxçıvanda tapa bilmədim. Zəng etdim qardaşım Bakıdan alıb göndərdi. İki ay müddətində heç bir irəliləyiş olmadı, əksinə, səhhətim pisləşdi. Onların müayinəsinə getməkdən imtina etdib, üalicə üçün Türkiyəyə getdim. Həkim reseptə baxdı və dedi ki, bu dərmanlar belə xəstə üçün çox ağırdır. Məcbur olub, yenidən müalicə alıram".
Məsələyə münasibət öyrənmək üçün, Naxçıvan MR Mərkəzi Xəstəxanası ilə əlaqə saxlamaq mümkün olmadı.