Suraxanı rayonu Hövsan qəsəbəsinin sakinləri yaşadıqları ərazidə hökm sürən problemlə bağlı "Ednews"a şikayət məktubu ünvanlayıblar.

Oqtay Şabanov küçəsində yaşayan sakinlər piyada yolundan, kanalizasiya sisteminin yoxluğundan, gölməçəyə çevrilmiş yollardan, evlərini basmış çirkli sulardan şikayətlənirlər.

Getdikcə sayı artan fərdi evlər isə bu durumu daha acınacaqlı hala salır.

Sakinlərin bildirdiyinə görə, bir ayda şambonun boşaldılması üçün ən azı 80-90 manat xərc çəkirlər.

Məvacibi aşağı olan ailələr bu pulu ödəməkdə çətinlik çəkdiklərini deyirlər. Üstəlik, istər yay, istərsə də qış aylarında üfunətdən ərazidə nəfəs almaq olmur.

Onların dediyinə görə, yaranmış vəziyyət yağışdan sonrakı Hövsanın həmişəki halıdır.

Onlar bununla bağlı dəfələrlə Suraxanı rayonundakı aidiyyəti qurumlara müraciət ediblər, lakin mənzərə olduğu kimi qalır.

Qəsəbənin sakinləri deyir ki, bu ərazidə heç vaxt kanalizasiya sistemi olmayıb. Ancaq bununla sakinlərin problemi bitmir. Ərazidə yaşayanların ikinci əsas problemi yoldur.

Asfalt yolun bərbad vəziyyətə düşməsi sakinlər üçün yağışdan sonra ciddi problemlər yaradır.

Uşaqlar məktəbə, sakinlər isə işə getməkdə narahatlıq yaşayırlar.

Oqtay Şabanov küçəsinin qarşısındakı yolu isə asfaltlayıb, abadlaşdırıblar. İki küçə arasındakı fərq aydın şəkildə özünü göstərir.

Məsələ ilə bağlı "Ednews"a "Azərsu" ASC-nin mətbuat xidmətinin rəhbəri Anar Cəbrayıllı bildirdi ki, bu il üçün həmin ərazidə layihə mövcud deyil:

"Gələn il üçün də dövlət layihə təqdim etsə iş başlayacaq. Yox əgər hökumət təsdiqləməsə gələn il üçün də vəziyyət eyni qalacaq. Azərsunun daxili imkanları ilə həll olunası məsələ deyil. Dövlət layihə təsdiq etməlidir. İnvestisiya ayrılmalı, ondan sonra icra olunmalıdır. Oqtay Şabanov küçəsinin sakinləri demək olar ki, hər il bu məsələ ilə bağlı müraciət edirlər. Müraciətlə həll olunası məsələ deyil. Bakı ətrafı ərazilərinin 80-90 faizi o gündədir, yəni sakinlər şambolardan istifadə edirlər”.

Suraxanı İcra Hakimiyyəti ilə dəfələrlə əlaqə yaratmağa çalışsaq da, zənglərimizə cavab verilmədi.

Bələdiyyədən bir nəfər bizi başqa şəxsə yönəltdi. Lakin o şəxslə də əlaqə yarada bilmədik.

Teref.az yazır ki, Yasamal Rayonunun ərazisi sayılan 2-ci alatava qəsəbəsində sənədsiz evlərin bəzi sahibləri qanunsuz olaraq evlərin damını sökərək ikinci mərtəbə tikirlər.

Maraqlısı budur ki, əraziyə nəzarət edən polis və icra hakimiyyəti orqanları məsələ ilə bağlı vətəndaşlara xəbərdarlıq etmirlər. Qanunsuz ev tikənlər görünür ki, icra hakimiyyə orqanlarını hər hansı bir vasitə ilə susdura biliblər. Hal-hazırda şaiyələr gəzir ki, alatava qəsəbəsində yerləşən sənədsiz evlərin hər an plana düşəcəyi və söküləcəyi şaiyələri yayılmışdır. Bununla bağlı sakinlər ciddi narahatçılıq keçirir, həcmi dəfələrlə kiçik olan və uzun illər öncə tikilmiş köhnə tək qat və heç bir köməkçi sütunu olmayan evlərin damlarını sökərək kərpicdən üzərində qanunsuz tikililər tikirlər.

Qeyd edək ki, bu tikililərin tikilməsində Azərbaycan Respublikasının Şəhərsalma və tikinti fəaliyyətinin həyata keçirilməsi zamanı şəhərsalma və tikintiyə dair normativ sənədlərin tələblərinə əməl edilməyib. Ölkə rəhbəri çıxışlarında her zaman bildirib ki, "Tikinti işləri Dövlət Şəhərsalma və Arxitektura Komitəsinin icazəsi olmadan heç bir tikili həyata keçirilə bilməz.

Məsələ ilə bağlı Yasamal Rayon İcra hakimiyyətinin qaynar xətti ilə əlaqə saxlanılsa da məsələdən xəbərsiz olduqlarını bildirdilər.

Qəsəbədə tikilən evlərlə bağlı fotofaktı sizə təqdim edirik:
Teref.az

Qafar Sadıxov: "Oğurluğun və təhlükənin qarşısını almaq məqsədiylə oradakı mənzərini çəkib "Hürriyyət TV"yə göndərdiyimə görə Sərnişin Daşımaları Departamentinin İstismar Xidmətinin rəisi İlham Hüseynov oğurluqda əli olan bəzi rəhbər işçilərin tapşırığı ilə məni işə buraxmır"

"QSC sədri Rövşən Rüstəmova, o cümlədən Dövlət Əmək Müfəttişliyi Xidmətinin rəisi Vəli Quliyevə müraciət edir, onlardan səbəbsiz yerə işdən çıxarıldığım üçün yenidən tutduğum vəzifəyə qaytarılmağımda köməklik göstərmələrini xahiş edirəm"

Bu gün Hurriyyet.az-a müraciət edən Bakı şəhəri, Binəqədi rayonu, Biləcəri qəsəbəsi, 1 May yeni yaşayış massivi ünvanında yaşayan Qafar Əsgər oğlu Sadıxov "Azərbaycan Dəmir Yolları" QSC Yeni Ələt stansiyasında yaşanan özbaşınalığı, yeyinti, dövlət əmlakını talama hallarını videolentə alıb "Hürriyyət TV" kanalına göndərdiyi üçün rəhbərlik tərəfindən təzyiqlərə məruz qaldığını bildirib.

Şikayətçi iddia edir ki, "Azərbaycan Dəmir Yolları" QSC Yeni Ələt stansiyasında hökm sürən oğurluğun, o cümlədən gələcəkdə yaşana biləcək təhlükənin qarşısını almaq məqsədiylə atdığı addım sonda ona baha başa gəlib, heç bir səbəb olmadan işdən azad edilib: "Təxminən, 2 ili yaxındır ki, "Azərbaycan Dəmir Yolları" QSC Yeni Ələt stansiyasında 100 ədəddən çox refrigerator vaqonların soyuducu hissələrini, 200 ədəd ağır dəmir qapılarını, 200 ədəd vaqonların bir-birinə qoşulması üçün avtoqoşquları, buksları, resorları və altından təkər cütlərini çıxardaraq vaqonları təhlükəli vəziyyətdə saxlayıblar. Bu səbəbdən də mən həm oğurluğun, həm də təhlükənin qarşısını almaq məqsədiylə oradakı mənzərini mobil telefonla çəkərək, "Hürriyyət TV" kanalının "WhatsApp" nömrəsinə göndərdim ki, həqiqəti üzə çıxarmaq üçün efir vasitəsiylə ictimaiyyətə çatdırılsın. Məhz bundan sonra "Azərbaycan Dəmir Yolları" QSC-nin Sərnişin Daşımaları Departamentinin İstismar Xidmətinin rəisi İlham Hüseynov oğurluqda əli olan bəzi rəhbər işçilərin tapşırığı ilə məni işə buraxmır".

Elektrik qatarında 20 il 2-ci dərəcəli maşinist vəzifəsində çalışdığını qeyd edən Qafar Sadıxovun sözlərinə görə, 28.01.2021-ci tarixdə "Azərbaycan Dəmir Yolları" QSC-nin Sərnişin Daşımaları Departamentinin İstismar Xidmətinin rəisi İlham Hüseynovun şər-böhtanıyla maşinist vəzifəsindən çıxarılaraq, maşinist köməkçisi vəzifəsinə təyin olunub: "Lakin həmin gündən indiyə kimi oğurluqda əli olan "Azərbaycan Dəmir Yolları" QSC-nin bəzi rəhbər işçilərinin tapşırığı ilə İlham Hüseynov məni işə buraxmır. Bu haqda 06.06.2023-cü il tarixdə "Azərbaycan Dəmir Yolları" QSC-nin sədri Rövşən Rüstəmov cənablarına ərizə ilə rəsmi qaydada müraciət etmişəm və ondan işimə qaytarılmağıma köməklik göstərməsini xahiş etmişəm. Lakin bunun da heç bir faydası olmayıb. Odur ki, sizin vasitənizlə yenidən "Azərbaycan Dəmir Yolları" QSC-nin sədri Rövşən Rüstəmova, o cümlədən Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəisi Vəli Quliyevə müraciət edir, onlardan üzləşdiyim problemin həllində yardımçı olmalarını, səbəbsiz yerə işdən çıxarıldığım üçün yenidən tutduğum vəzifəyə qaytarılmağımda köməklik göstərmələrini xahiş edirəm".

Hurriyyet.az