Bakı Ağır Cinayətlər Məhkəməsində “Məhsul” stadionunun keçmiş direktoru Alik Həsənov və Azərbaycan Həmkarlar İttifaqlarının İdman Təşkilatları Assosiasiyasının sabiq sədri Nadir Əliyevin cinayət işi üzrə növbəti məhkəmə prosesi qalmaqallı açıqlamalarla gündəmin əsas mövzularında nirinə çevrilib. Hər iki şəxs Bakıda və respublikanın müxtəlif bölgələrində yerləşən stadionların ərazisini satmaqda təqsirləndirilir. Şikayətçilər isə bu qanunsuz əməllərin Respublika Həmkarlar İttifaqları Konfederasiyasının rəhbəri, deputat Səttar Möhbalıyevin göstərişi əsasında həyata keçirildiyini iddia edirlər. İş o yerə çatıb ki, cavabdeh qismində məhkəmə kürsüsündə oturan Alik Həsənov və Nadir Əliyevlə yanaşı zərərçəkənlər də deputatın məhkəməyə gətirilməsini tələb edirlər.

Koordinat.az xatırladır ki, sözügedən cinayət işi üzrə 5 nəfər - Rauf İsmayılov, Dadaş Umbatov, Həbib Zülfüqarov, Elçin Rüstəmov və Yusif Vəlixanov zərərçəkmiş qismində tanınıb. Onlardan birinin - Elçin Rüstəmovun hüquqlarını vəkil Aslan İsmayılov müdafiə edir. Digər zərəçəkənlər isə həm onlara satılmış statdionların, həm də torpaq sahələrinin sonradan əllərindən alınmasından şikayətçidir.

Sonuncu məhkəmə prosesindən sonra “Kanal-13” internet televizyasına müsahibə verən hüquqşünas Aslan İsmayılov deyib ki, müdafiə etdiyi şəxsə Gəncə şəhərində və Göygöl rayonunda hər birinin qiyməti 400 min manat olan iki stadion satılıb. Sonradan hər iki statdion sahibkarın əlindən alınıb, onun ödədiyi 800 min manat isə mənimsənilib: “Həmin statdionları və torpaq sahələrini Səttar Möhbalıyev satdırıb. Bu cinayət işi üzrə indiyədək 6-7 məhkəmə prosesi keçirilib. Cavabdeh kimi məhkəmə ifadə verən Nadir Əliyev bar-bar bağırır ki, Səttar Möhbalıyevin razılığı olmasa, o, heç bir sənədə imza ata bilməz. O, stadionların satışına görə sahibkardan alınan pulları da Səttar Möhbalıyevə verib”.

Tanınmış hüquqşünas “Təkcə bu iki stadian deyil, respublikadakı stadionların yarısından çoxunu Səttar Mehbalıyev dədəsinin malı kimi satıb. Amma buna görə onu sorğu-sual edən yoxdur” deyə Azərbaycan Həmkarlar İttifaqları Konfederasiyasının rəhbərini ittiham edib.

Aslan İsmayılov bu iş üzrə istintaq orqanının fəaliyyətindən narazı qaldığını, əsas günahkarın adının gizlədildiyini deyib. Onun sözlərinə görə, təqsirləndirilən Nadir İsmayılov ifadəsində müvəkkili Elçin Rüstəmovdan aldığı pulları Azərbaycan Həmkarlar İttifaqının sədri, deputat Səttar Möhbalıyevə verdiyini etiraf edib. Bu məsələ Nadir İsmayılovla Elçin Rüstəmov arasında üzləşdirmə zamanı da təsdiqlənib. Lakin Səttat Möhbaliyev bir dəfə də olsun, istintaqa çağırılmayıb: “Bu stadionları satan Səttar Möhbalıyevdir. Bununla bağlı Respublika Prokurorluğuna dəfələrlə təkzibedilməz sübutlar təqdim edilsə də, prokurorluq Səttar Möhbalıyevi istintaqa cəlb edə bilməyib. Halbuki həm zərərçəkənlər, həm də təqsirləndirilən şəxslər konfederasiya rəhbəri olan deputatın dindirilməsini dəfələrlə məhkəmədən xahiş edib. Ancaq Səttar Möhbalıyev indi də məhkəməyə gəlmir. Nadir Əliyev onun stadionlar və idman qurğuları üzrə müavini olub, o da ifadə verib ki, stadionların və torpaq sahələrinin satışına dair alqı-satqı sənədlərini imzalayan Səttar Möbalıyevdir. Hüquqlarını müdafiə etdiyim şəxsə satılmış hər iki statdionu sonradan onun əlindən alıblar. Söz veriblər ki, ya pulunu qaytaracağıq, ya da stadionların əvəzində başqa ərazilərdə torpaq sahəsi veriləcək. Ancaq bu vədlərin heç birinə əməl olunmayıb. Ona görə məhkəmədən tələb edirik ki, hüquqlarını müdafiə etdiyim şəxsə dəymiş ziyan ödənilsin. Bizim bir xahişimiz də odur ki, bu işlərin başında duran Səttar Möhbalıyev Məhkəmə kürsüsünə gətirilsin”.

Xatırladaq ki, məhkəmə zərərçəkənlərin onlara dəymiş zərərin ödənilməsi ilə bağlı qaldırdıqları vəsatəti qəbul edib. Onlar növbəti iclaslarda Səttar Möhbalıyevin də məhkəməyə gətirilməsi ilə bağlı yenidən vəsatət qaldıracaqlar.