Polietilen paketlər pulla satılanda ziyansız olur?
Hökumət məmurların cibini qoruyur, yoxsa...
Sellofan paketlərin, plastik qabların insana, təbiətə ziyanından bütün
dünya ekoloqları “SOS”-həyacan təbili çalır. Azərbaycanda da “təbil çalma”
dövlət səviyyəsində nəticəsini verib. Ekologiya və Təbii Sərvətlər
Nazirliyinin, İqtisadiyyat Nazirliyinin (yanındakı Antiinhisar və İstehlak
Bazarına Nəzarət Dövlət Xidmətinin) ... hökumətə təklifi əsasında ətraf
mühiti və əhalini qorumaq ( yəqin redaktor bu sözü dırnaq içərisinə salar-
M.B.) adına Nazirlər Kabineti marketlərdə polietilen torbaların ayrıca
məhsul növü kimi PULLA satılmasına 02.02.2021-ci il tarixli, 25 nömrəli
qərar verib. Qərarın icrasına ortalıq iki ildən sonra başlanılsa da, artıq
bütün ölkə boyu marketlərin kassalarında müştərinin-istehlakçının fikri
soruşulmadan 3-5 qəpiklik qablaşdırma paketi məhsula əlavə olunur.
Halbuki, vurğuladığımız kimi, bu paketləri ayrıca məhsul növü kimi müştəri
özü seçə, pulla ala bilər, market onun yerinə qərar verə bilməz.
İnsanları düşündürən başqa “dərddir”. Bəyəm indiyədək pulsuz verilən
polietilen paketlər pulla satılanda təbiətə, insanlara ziyan dəymir? Bu ziyan
marketlərin torba satışından qazandığı milyonlarla kompensasiya olunur?
Axı bu torbalardan ziyan çəkən elə insanların özü, ətraf mühitdir!
Kompensasiya ziyan çəkən əhaliyə ödənməlidir, yoxsa ziyan vuran
marketlərə? Doğrudan ilginc qərardır, əhalinin , təbiətin qorunması adına
zibili pulla satmaq!(?) Bəyəm zəhər pulla satılanda təhlükəsiz olur?
COP29-BMT-nin İqlim Dəyişikliyi üzrə Çərçivə Konvensiyasının
Tərəflər Konfransının Bakıda keçirilməsinə iki aydan bir az çox
qalır. Bu Konfransın başlıca amalı ətraf mühitin qorunması, iqlim dəyişikliyi
böhranının aradan qaldırılmasına birgə çaba , maliyyə dəstəyi və s.
göstərməkdir. (COP- Conference of the Parties, Tərəflər Konfransı
anlamındadır) . Azərbaycan TƏRƏFdən sənədi Ekologiya və Təbii
Sərvətlər Nazir(liy)i imzalayıb. Polietilen paketlərin marketlərdə pullu
satılmasına məktub verən də bu nazirlikdir. İndi soruşmaq gərəkir,
polietilen paketlərin pulunu ödəyib təbiətə atılması ilə iqlim dəyişikliyi
böhranının qabağı alına bilər?
Fikrimizcə, ziyanlı paketlərin pulla satılmasındansa, daha ziyansız kağız,
parça paketlərlə əvəz olunması düz olardı. Paketlərin pulla satışı insanlara
daha çox ziyan vurur. Nədən bu paketlərə pul verməməkdən yana təkrar
istifadəsi daha böyük təhlükədir. Eyni zamanda məhsulun özü axı xırda
pulsuz paketdə qablaşdırılır. Heç olmasa, bu xırda paketləri kağız qablarla
əvəz etmək olmaz? Yoxsa bunu da 1-2 qəpiyə satmaqla “təhlükədən
yayınmaq” qüvvəyə minəcək? Bu hökumətdən nə desən gözləmək olar.
Necə deyərlər, sən fikirləşməyində ol, gör hökumət nə fikirləşir.
Məğrur Bədəlsoy
TEREF

İllər əvvəl Bakı metrolarındakı ticarət obyektlərinin sökülməsi ümid yaratmışdı ki, ölkə metrolarının görünüşündə xüsusi özünəməxsusluq yaradılacaq. Lakin 2014-cü ildə görülən işlər tamamlanmadığı üçün paytaxtın görünüşündəki yarımçıqlıq da özünü qabarıq şəkildə gösstərməkdədir.

Avtosfer.az xəbər verir ki, uzun müddətdir, Bakının binaları, park və yaşıllıq əraziləri ilə bağlı müsbətə doğru işlər görülür. Hələ COP29 beynəlxalq tədbirinin Azərbaycanda keçirilib-keçirilməyəcəyi belə bəlli deyilkən, açılışında Prezident İlham Əliyevin də iştirak etdiyi və əhalinin istifadəsinə verilən parklar ölkə rəhbərliyinin bu məsələyə nə qədər diqqətli yanaşmasının göstəricisidir.

Dövlət paytaxtda və regionlarda abadlığa hər il milyonlarla manat vəsait ayırdığı halda, uzun illərdir, həllini tapmayan məsələlərlə rastlaşdıqda, görülən işlərə hansı ölçüdə kölgə salındığının təsəvvürünü yaratmaq olur.

Yerin üstündəki abadlıq işləri, qanunsuzluqlarla mübarizə, nəqliyyat, yol infrastrukturu və ümumlikdə şəhərsalmaya ayrılan diqqət yerin altına heç də ayrılmır. Uzun illərdir, müzakirə mövzusuna çevrilən ərazilərdən biri də Bakının şimal girişi hesab edilən Yasamal rayonu ərazisində yerləşən “20 Yanvar” metrosunun dəhlizləridir. Bu dəhlizlərdə fəaliyyət göstərən obyektlər paytaxt üçün həm ekoloji, həm də sabitlik baxımdan ciddi təhlükə mənbəyidir. Bu obyektlərə satış üçün yeni məhsullar gəldikdə, malın üzərindəki paket və qutuları zibil olaraq metronun dəhlizinə atırlar, divarda “siqareüt çəkmək qadağandır” işarəsi və yazısı olmasına baxmayaraq, obyekt sahibləri sanki “kurilka”da imişlər kimi, siqaretin hər qullamından xüsusi zövq alırlar. Dəhlizlərdə foto və video çəkilişi qadağan edildiyi halda, bu şəxslər gün boyu “TikTok”da canlı yayımdadırlar. Hələ bu azmış kimi, obyektlərinin metronun dəhlizində olduğunu unudan həmin satıcılar, insanların hərəkət etdiyi hissələrdə bəzən ayaqüstü, bəzən də oturaq vəziyyətdə rahat söhbətlər edir, zarafatlaşır, günəbaxan tumunun qabığını dəhlizin divarları boyu su axması üçün nəzərdə tutulan hissəyə atır və s. Sanki Azərbaycanın Lahorudur “20 Yanvar” metrosunun dəhlizləri.

Bəli, indiyə qədər hər kəs bu mövzuya metroda təmizlik, səliqə, satıcıların özünü aparması, dəhlizlərin genişliyi və əhalinin rahat hərəkəti baxımdan yanaşıb. Lakin hamının gözündən yayınan dövlət əhəmiyyətli ən vacib məsələ - bu ticarət obyektlərinin əhalinin həyat təhlükəsinə ciddi mane olmasıdır. Əldə etdiyimiz məlumatlara əsasən, 20 Yanvar metrosunun dəhlizlərindəki ticarət obyektlər özəlləşdirilib, hətta onların fəaliyyətini rəsmiləşdirən “rəsmi çıxarış”ları belə var. Yəni metronun divarları həmin obyektlərin sahiblərinə satılıb. Bu satışdan kim xeyir götürürsə, götürsün, əhalinin, eləcə də , dövlətin zərər çəkəcəyi dəqiqdir. Bilməyənlər üçün qeyd edək ki, metrolar və onların bu cür dəhlizləri mühribə və fövqəladə hal zamanı əhali üçün bunker, yəni sığınacaq funksiyası daşıyır.

Yaranmış vəziyyətlə əlaqədar, ilkin olaraq Bakı Şəhər İcra Hakimiyyətinə müraciət etdik. Qurumun mətbuat katibi Mətin Hüseynov Avtosfer.az-a açıqlamasında bildirib ki, problem birbaşa Yasamal Rayon İcra Hakimiyyətinə aiddir və həmin obeyktlərin fəaliyyətinə yalnız yerli icra orqanı nəzarət edir.

Mövzu ilə əlaqədar Yasamal Rayon İcra Hakimiyyətinin münasibətini öyrənməyə çalışsaq da, nümayəndə sorğumuza cavabında bildirdi ki, metro ərazisində hər hansı fəaliyyətə icazənin verilib-verilməməsi məsələsi yalnız “Bakı Metropoliteni”nə bağlıdır. Yasamal Rayon İcra Hakimiyyəti yalnız ərazidəki təmizlik və digər nəzarətləri yerinə yetirir.
Məsələ ilə bağlı “Bakı Metropoliteni” Qapalı Səhmdar Cəmiyyətinin mətbuat katibi Bəxtiyar Məmmədov saytımıza açıqlamasında bildirib ki, qeyd edilən məsələ ilə bağlı metropolitenin heç bir əlaqəsi yoxdur və qurum stansiyaların giriş və çıxışlarında, eləcə də, dəhlizlərdə hər hansısa fəaliyyətə icazə və çıxarış vermək səlahiyyəti yoxdur.
Əmlak Məsələləri üzrə Dövlət Xidmətindən isə obyektlərin çıxarışları ilə bağlı gün ərzində hansısa cavab ala bilmədik (əgər sorğumuza bu məsələ ilə əlaqədar cavab verilərsə, yazıya əlavə edəcəyik).

Bu problemin həlli istiqamətində iş görülməsinə gəlincə, sanki qurumlar ümumiyyətlə məsələyə yaxın da durmaq istəmir. Metronun dəhlizlərində fəaliyyətinə icazə verilən obyektlərin əsas sahibnin Kəmaləddin Heydərov olması da uzun illərdir, iddia edilən nüansdır. Bəlkə də, “çörəkverən kişi”nin obyektlərinin fəaliyyətinə müdaxilə etməyə çəkindikləri üçün hər qurum məsələni digərinin üstünə atmağa çalışır.

Təbii ki, məsələdə cibi pulla doldurub, əhalinin həyatına qarşı etinasız yanaşama əsas düşündürücü məqamdır. Dövlət qurumlarının mövzudan ya həqiqətən bixəbər olması, ya da özlərini bixəbər aparması onların əhalinin sığınacaqlarının satılması mövzusunda yaxalarını kənara çəkmələrinə mane olacaq.
Bu məsələni yenidən aktuallaşdırmaqdakı məqsədimiz, hansısa obyekt sahiblərini gəlirsiz, “qul bazarı”nda fəhlə növbəsi gözləməyə sürükləmək deyil. Ərazidə sahibkarlıq fəaliyyəti göstərmək üçün “Park 20Yanvar” adlı ticarət mərkəzi də açıldı. Bununla yanaşı Müzəffər Həsənov küçəsində “Azərsu” Açıq Səhmdar Cəmiyyətinin binası ilə üzbəüz hissədə də xaotik tikilən iaşə obyektlərinin yerində hündürmərtəbəli və həmçinin yeraltı parkinqi olan iri ticarət mərkəzi də inşa etmək olar.
Bununla da həm Bakının şimal girişində yaranan xaosun qarşısınıə almaq mümkün olacaq, həm də COP29 ərəfəsində paytaxtı böyük yükdən qurtarmaq və şəhərin Baş planını həyata keçirmək asanlaşacaq.

Naxçıvanda icbari tibbi sığorta ilə çalışan tibb işçiləri üçün nəzərdə tutulan əlavə bonus maaşlar kəsilib. Həkimlərə tapşırılıb ki, onlardan kəsilən pulu sığortalı xəstələrin özlərindən alsınlar. Həkimlərin “Gündəlik Naxçıvan”a verdikləri məlumata görə, bu göstəriş yerli Səhyiyə Narizlyindən gəlib.
Həkimlər bildirirlər ki, növündən asılı olaraq, bir cərrahiyyə əməliyyatı üçün onların bonus payı 300-1500 manat arası dəyişir. Yeni qaydaya görə, həmin məbləği sığortalı xəstə öz cibindən ödəməli olacaq.
Naxçıvan Mərkəzi Xəstəxanasının adının çəkilməsini istəməyən həkimi deyir ki, bu qərardan sonra başqa bölgəyə köçüb, orada işləmək qərarına gəlib:
“İki həftə öncə nazir Samiq Sadıxov yığıncaq keçirib dedi ki, bundan sonra sığorta pulları kəsilir, bacarırsınız, xəstələrin özündən alın. Onsuz da nazirlik bizə çox haqsızlıqlar edirdi, birtəhər dözürdük. İndi biz xəstələrə necə deyək ki, gətirin bizə əlavə pul verin? Deməsək də, 500-600 manat maaşla necə dolanaq. Şəxsən mənim üzüm gəlməz xəstəyə bu sözü deyim. Bizdən kəsilən bonuslar təbii ki, nazir və onun ətrafının cibinə gedəcək. Bu, 100 minlərlə manat deməkdir. Yuxarıların icazəsi olmadan, nazir də özbaşına bu qərarı verməz. Hamısının haqqı çatdırılır deyə, göz yumurlar”.
Yeni qərardan yerli sakinlər də narazıdır. Naxçıvan şəhər sakini N. Quliyev bildirir ki, tibbi sığortası olmasına baxmayaraq, əməliyyat üçün onun atasından 500 manat əlavə pul alınıb:
“Atam təcili əməliyyat olunmalı idi. Mərkəzi xəstəxanaya apardıq, sığortanı alıb, əlavə də 500 manat istədilər. Etiraz etsəm də, xeyiri olmadı. Həkim dedi ki, artıq sığortadan onlara pul verilmir və tapşırılıb ki, bu pulu xəstələrin özündən alsınlar. Əməliyyat təcili olunmalıydı deyə, borc tapıb, həkimlər deyən pulu ödədim. Daha sonra nazirliyə şikayət etdim, dedilər ki, gedin, məsələni həkimlə öz aranızda həll edin. Bunun harası sığorta oldu?”
Bundan öncə isə Naxçıvandakı dövlət xəstəxanalarında çalışan tibb işçiləri bildirirdilər ki, onların maaşlarından 80-200 manat kəsilib. Onlar iddia edirdilər ki, maaşlarının kəsməkdə məqsəd nazirlikdə aşkarlanan yeyintinin yerini doldurmaq olub.

1 sentyabrda keçiriləcək Milli Məclisə növbədənkənar seçkilərlə bağlı təşviqat kampaniyası başa çatmaq üzrədir.

Seçkiyə bir neçə gün qalmış bir çox namizədlər dairələrində təşviqat kampaniyasını sürətləndiriblər.

AzFakt.com xəbər verir ki, belə dairələrdən biri də 10 saylı Binəqədi üçüncü dairəsidir. Bu dairədə deputatlığa 11 namizəd var.

Hazırda 10 saylı Binəqədi üçüncü dairəsində əsas fovarit YAP-ın namizədi Hümbət Hüseynovla, Böyük Azərbaycan Partiyasının sədri Elşad Musayev sayılır. Hər iki namizədin Qərbi Azərbaycan kökənli olması mübarizəni daha da dərinləşdirir.

AzFakt.com-un əldə etdiyi məlumata görə hazırda YAP-ın namizədi, M.Rəsulzadə qəsəbəsinin Bələdiyyə sədri Hümbət Hüseynov maliyyə gücünün hesabına rəqibini sıxışdırmağa başlayıb. Bildirilir ki, Hümbət Hüseynov onun təşviqat kampaniyasına dəstək verən şəxslərə ciddi şəkildə maliyyə yardımı edir. Hətta dairədən deputatlığa namizəd olan bəzi şəxslər belə açıq-aşkar Hümbət Hüseynovun deputat seçiləcəyi təbliğatını aparırlar.

Qeyd edək ki, 10 saylı Binəqədi üçüncü dairəsindən digər namizədlər Razim Əmiraslanlı (Müsavat partiyası), Məhəmməd Əsədullazadə (Milli Cəbhə Partiyası), Əhmədağa Eyyubov (ETSN-nin işçsi), Zaur Hüseynov - Binəqədi Qəsəbə Bələdiyyəsi sahə nəzarətçisi, Kubra Huseynova (İşsiz), İsayev Elnur (İşsiz), Leyla Mədətovadır (Biləcəri bələdiyyəsinin üzvü).

Qaçaqmalçılıq cinayətinin törədilməsində iştirak etmiş vəzifəli şəxslərin qanunsuz əməlləri barədə Dövlət Gömrük Komitəsindən daxil olmuş cinayət işi üzrə Baş prokuror yanında Korrupsiyaya qarşı Mübarizə Baş İdarəsində ibtidai istintaq davam etdirilir.

Bu barədə Baş Prokurorluğun Mətbuat xidmətindən məlumat verilib.

İstintaqla Dövlət Gömrük Komitəsinin “Azərterminalkompleks” Birliyinin Hava Nəqliyyatında Baş Gömrük İdarəsinə təhkim olunmuş əməkdaşı Pərvin Dursunəliyev, həmin Baş İdarənin Skanlaşdırma şöbəsinin inspektoru Mənsur Mehdiyev tanışları Əli İbrahimovla qabaqcadan əlbir olaraq sonuncu tərəfindən 8 iyul 2024-cü il tarixdə Birləşmiş Ərəb Əmirliklərindən alınan 190 min 400 manat dəyərində 5 ədəd qızıl külçənin hava limanının sərhəd buraxılış məntəqəsindən cinayətkar qrupun digər üzvlərinin köməkliyi ilə gizli şəkildə Azərbaycan Respublikasının gömrük sərhədindən gömrük nəzarətindən kənar keçirilməsinə nail olmalarına əsaslı şübhələr müəyyən edilib.

Keçirilmiş əməliyyat-axtarış tədbirləri nəticəsində müvafiq maddi sübutlar aşkar edilərək götürülüb.

Toplanmış ilkin sübutlar əsasında Əli İbrahimov, Pərvin Dursunəliyev və Mənsur Mehdiyev Cinayət Məcəlləsinin 206.3.2 və 206.3.3-cü maddələri ilə (qaçaqmalçılıq- qabaqcadan əlbir olan bir qrup şəxs və vəzifəli şəxs tərəfindən öz qulluq mövqeyindən istifadə edilməklə törədildikdə) təqsirləndirilən şəxs qismində cəlb edilib, barələrində müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Binəqədi rayon məhkəməsinin qərarı ilə həbs qətimkan tədbiri seçilib.

Hazırda iş üzrə sözügedən qanunsuz hərəkətlərin törədilməsində iştirak etmiş digər şəxslərin müəyyən olunması istiqamətində istintaq-əməliyyat tədbirləri davam etdirilir.

84 saylı seçki dairəsindən namizəd olan Milli Məclisinin VI çağırış deputatı olmuş Vüqar Bayramovun Füzuli rayonunda Qayıdış qəsəbəsində keçirdiyi görüşdə narazılıq yaranıb.

Bu barədə Reportyor.info-ya Füzuli rayonunun Aşağı Veysəlli kənd sakini, Qarabağ veteranı Etibar Teymurov bildirib.
Onun sözlərinə görə, Vüqar Bayramovun seçicilərlə görüşünə əsasən büdcə təşkilatlarının nümayəndələri qatılıb. "Lakin görüşə könüllü gələnlər də var idi. Onlardan biri də mən idim. Mən orada Vüqar Bayramovun fəaliyyəti ilə bağlı müəyyən narazılıqlarımı dilə gətirdim. Bundan sonra görüş yarımçıq saxlanıldı", – deyə Etibar Teymurov vurğulayıb.

O, daha sonra iddia edib ki, Vüqar Bayramov görüşü yarımçıq saxlayaraq 11 saylı Məntəqə seçki komissiyasının sədri, məktəb direktoru Gülnaz Kərimovanın evinə gedib. Vüqar Bayramova orada qonaqlıq verilib. Bu, fakt ən azı 11 saylı məntəqədə nəticələri şübhə altına almaq üçün yetərli sayıla bilər. Axı namizəd niyə komissiya sədrinin evinə qonaq geməlidir?"

Əmək və Əhalinin Sosial Müdafiəsi Nazirliyinin tabeliyində olan Dayanıqlı və Operativ Sosial Təminat (DOST) Agentliyinin elan etdiyi tender müsabiqəsinin qalibi məlum olub.
Yeniavaz.com xəbər verir ki, Agentliyin “1 saylı Bakı DOST Mərkəzi” üçün inzibati bina sahəsinin icarəyə götürülməsi ilə bağlı tenderinin qalibi Fərid Rüfət oğlu Fərhadzadə olub.
DOST Agentliyi Fərid Fərhadzadədən Bakı şəhəri, Yasamal rayonu, İsmayıl Qutqaşınlı küçəsi 86 ünvanında yerləşən ümumi sahəsi 3 693 kv. metr olan qeyri-yaşayış sahəsini icarəyə götürəcək və qarşılığında 4 milyon 874 min 760 manat ödəniləcək.
Məlumat üçün bildirək ki, hazırda “1 saylı Bakı DOST Mərkəzi” qeyd olunan ünvanda fəaliyyət göstərir. DOST Agentliyi ilk dəfə 5 il əvvəl Fərid Fərhadzadə ilə icarə müqaviləsi bağlayıb.
Qeyd edək ki, 5 il əvvəl mətbuatda yayılan məlumatlarda Fərid Fərhadzadə “Azərenerji” ASC-nin prezidenti Baba (Balababa) Rzayevə yaxın şəxs kimi təqdim olunub.
Məlumat üçün bildirək ki, Baba Rzayevin kürəkəni Fərid Fərhadzadə tanınmış iş adamlarından biridir. “FF Şirkətlər Qrupu”nun Fərid Fərhadzadəyə məxsus olduğu bildirilir. Bildirilir ki, “FF” ifadəsi də Fərid Fərhadzadənin ad və soyadının baş hərflərindən götürülüb. Bu qrupa daxil olan “FF Construston” MMC-nin hüquqi ünvanı da Fərid Fərhadzadənin Bakıda qeydiyyatda olduğu mənzildir.
Fərid Fərhadzadə eyni zamanda Baba Rzayevin qardaşı Rahib Rzayevin rəhbərlik etdiyi “Göknur Bakı Ltd” MMC-də baş icraçı direktor olub.
Fərid Fərhadzadənin atası isə Fövqəladə Hallar Nazirliyi yanında Kiçikhəcmli Gəmilərə Nəzarət və Sularda Xilasetmə Dövlət Xidmətinin rəisi general-mayor Rüfət Lətif oğlu Fərhadovdur.