 |
|
|
İlin əvvəlində Baş Prokuror yanında Korrupsiyaya Qarşı Mübarizə Baş İdarəsi Bakı Şəhər İcra Hakimiyyətində əməliyyat keçirəndən və BŞİH-nin tabeli qurumu olan Yaşıllaşdırma Təsərrüfatı Birliyinin əməkdaşları həbs ediləndən sonra Birliyin sabiq sədri Həsrət Əmrahovun və onun işbaz ortaqlarının qanunsuz əməlləri barəsində o vaxta qədər dərc edilmiş kifayət qədər geniş məlumatlar bir daha xatırladıldı. Mətbuatda Bakı şəhərində yaşıllıqların, bitkilərin mühafizəsinə cavabdeh olan Bakı şəhəri Yaşıllaşdırma Təsərrüfatı Birliyi Bitki mühafizəsi şöbəsinin bəzi əməkdaşlarının qeyri-qanuni hərəkətlərinə, cinayət törətmiş, yaşıllıqlara qənim kəsilmiş tərəflərlə müəyyən maraqlar müqabilində sövdələşmələrə getdiklərinə dair misallar sadalandı.
Lakin etibarlı mənbələrdən aldığımız məlumata görə, Yaşıllaşdırma Təsərrüfatı Birliyinin Bitki Mühafizəsi Şöbəsinin müdiri Şaiq Vəliyev müəyyən dairələrdə yaxasını zorla qurtardığı KQMBİ-nin qarasına deyinir və iddia edir ki, Birliyin əməkdaşları rüşvət deyil, məhz borc pul aldıqları zaman şərlənib tutulublarmış.
Bir başqa prizmadan yanaşanda isə Həsrət Əmrahov Şaiq Vəliyevlə bacarmadı və müəyyən mənada elə onun güdazına getdi. Əmrahovdan fərqli olaraq, onun tərk etdiyi vəzifəyə irəli çəkilən Mirdamət Seyidov (sabiq direktorun 70 yaşlı müavini) Şaiq Vəliyevlə yaxşı anlaşır.
Əvvəllər də xəbər vermişdik ki, Birliyin əməkdaşlarının tələm-tələsik üzərində budama əməliyyatı apardıqları ağaclar çox keçmədən kəsilir və kəsilən ağacların hesabına boşalan ərazidə ayrı-ayrı şəxslər tərəfindən yeni obyektlər tikilir. Məlum olur ki, “budama” əməliyyatı elə ağacların kəsilməsi və yerinin qabaqcadan sövdələşmə aparılan adamlara, əsasən tikinti şirkətlərinə (MTK-lar) satılması üçün zəmin hazırlamaq məqsədi daşıyırmış. Onu da qeyd edək ki, yersiz budanan, sonra da “bədnəzərdən” qorumaq üçün hasara alınaraq kökündən qoparılan ağaclar heç də başqa yerə aparılıb yenidən əkilmir, əksinə, doğranıb satılır. “Yaşıllıqsızlaşdırma” işlərinin miqyası o qədər böyükdür ki, işlərin həyata keçirilməsinə mövcud resurslar, əmək ehtiyatı çatmır, qeyri-leqal işçi qüvvələri cəlb olunur.
Bu kimi qanunsuzluqlardan yazan, ona suallar verən jurnalistlərə isə Şaiq Vəliyev tikinti maqnatları ilə “dost olmağı” təklif edib. Bu barədə bəzi saytlar artıq yazıblar. İnternet resurslarında Şaiq Vəliyevin 7-ci mikrorayonda 80 saylı Mənzil-Kommunal İstismar Sahəsinin rəisi işlədiyi vaxt sahibləndiyi avtomobil yuma məntəqəsi və başqa obyektləri barədə də məlumatlar vardır.
Əvvəllər də qeyd etdiyimiz kimi, əlimizdə foto və video çəkilişlərlə qeydə aldığımız yetərincə faktlar vardır ki, paytaxtda külək nəticəsində əyilən, aşacağı gözlənən xeyli sayda təhlükə törədən ağaclar mövcuddur. Sakinlər şikayət etsələr də, nədənsə nə Yaşıllaşdırma Təsərrüfatı Birliyi, nə Birliyin yeni sədri (sabiq direktorun 70 yaşlı müavini) Mirdamət Seyidov, nə də Birliyin Bitki Mühafizəsi Şöbəsinin müdiri Şaiq Vəliyev həmin ağacları zərərsizləşdirməkdə maraqlı görünmürlər. Aşağıda təqdim etdiyimiz video-görüntülər Bakı şəhəri, Nizami rayonu, R.Rüstəmov küçəsində qeydə alınıb. Yeri gəlmişkən, Rüstəm Rüstəmov küçəsində baş verən “yaşıl genosid” barədə əvvəllər də Ekologiya və Təbii Sərvətlər Nazirliyinin 11 saylı Regional Ekologiya və Təbii Sərvətlər İdarəsinin rəisi Vaqif Cavadova (sonradan Sumqayıta vəzifə təyinatı alıb) və başqa aidiyyəti qurumlara xəbər vermişdik ki, Yaşıllaşdırma Birliyinin Nizami rayonu üzrə baş mütəxəssisi Vüqarın əli ilə ağacların qırılması hesabına yeri açılan obyektlərin tikintisinin qarşısı alınsın. Amma xəbərdarlıqlarımız qulaqardına vuruldu. İnanmaq istərdik ki, indi müraciət edəcəyimiz aidiyyəti qurumların bu faktlara reaksiyası özünü çox gözlətməyəcək.
Mövzuya qayıdacağıq.
“Əsli ilə doğrudur!”
Baş redaktor: İbrahim Hümbətov
