 |
|
|
2019-cu ilin dekabrından Suraxanı rayonuna icra başçısı təyin edilən Əziz Əzizov son 30 ildə görünməyən ilklərə imza atmaqdadır. Rayon sakinlərinin bəxti bu dəfə də gətirmədi ki, o rayona icra başçısı təyin olunan gündən əsas diqqəti problemlərin həllinə, abadlıq işlərinə yox, rayon ərazisinə daxil olan Yeni Suraxanı, Yeni Günəşli, Qaraçuxur, Zığ və Hövsan qəsəbələrində ticarət və kommersiya üçün nəzərdə tutulan yeni obyektlərin inşa edilməsinə yönəldib.
Tribunainfo.az məlumat üçün qeyd edir ki, bu barədə mediada dəfələrlə yazılsa da, Ə.Əzizov “dədəm mənə “kor” deyib, “gəlib-gedəni vur” deyib” prinsipi ilə nə sakinlərin narazılığını saya salır, nə də onu bu vəzifəyə təyin edən edən dövlət başçısının qəzəbinə tuş gələcəyindən qorxur.
Bu azmış kimi, Prezident Admnistrasiyasında oturan havadarına arxalanan Əzəiz Əzizovun Hövsan qəsəbəsində genişmiqyaslı tikinti işlərinə başladığı məlum olub. Belə ki, hələ Hövsan qəsəbəsi son 30 ildə bu qədər çoxmərtəbəli obyekt tikintisinin şahidi olmayıb.
Bu sahədə tikinti işləri elə sürətlə aparılır ki, qəsəbə sakinləri üçün hər yeni gün yağışdan sonra çıxan göbələklər kimi yeni icarəyə verilən obyekti görməli olurlar. Bu iş elə sürətlə və genişmiqyaslı aparılır ki, son 9 ildə Ağ şəhərdə aparılan tikinti işləri onun yanında sönük qalır.
Bu da bir faktdır ki, Əziz Əzizov bu rayona icra başçısı təyin olunmasından qısa müddət sonra təkcə Oqtay Şabanov küçəsində 20-dən çox yeni böyük obyekt inşa edilərək, icarəyə verilmək üçün təhvil verilib.
Yerli sakinlərin bildirdiyinə görə, həmin obyektlərin bir çoxu artıq icarəyə verilib, bir çoxu da özünün icarədarını gözləyir. Ən acınacaqlısı və qəsəbə sakinlərini narahat edən isə Oqtay Şabanov küçəsində, köhnə Tural kafesinin (indiki Sərinqala) yerləşdiyi binanın həyətinin zəbt edilməsi olub.
Buranı zəbt edilməsinə göz yuman Ə.Əzizov orada hələ sovet dövründən qalan və binanın balaca sakinləri olan uşaqların kiçik futbol meydançasını sataraq orada nəhəng obyekt tikilməsinə şərait yaratması olub. Hazırda uşaqların sevimlisi olan həmin meydançanın yerində böyük bir ticarət obyekti ucalır, obyektin birinci mərtəbəsində “İrşad telekom” və “Araz” supermarketi yerləşir.
Ə.Əzizovun növbəti tikinti əməliyyatı Yeni Günəşli qəsəbəsi AB massivi 50v binanın qarşısında baş verib. Belə ki, 40 ildir burda yaşayan sakinlər binanın qarşısında tikilən obyektlərə görə gün işiğına həsrət qalıblar. Deyilənə görə icra başçısı aparılan tikinti işlərinin şəhid abidəsi ilə bağlı olduğunu deyərək sakinləri aldadıb.
Onu da qeyd edək ki, eyni ərazidə 9 ay öncə eyni binanın qarşısında 3 mərtəbəli obyekt inşa edilib. Bunadan hündürdə tikilən obyekt evləri qaranlığa qərq etmək və havalandırmanın qarşısını almaqla yanaşı kanalizasiya və çirkab sularının da binanın özülünə axıdır. İndi isə baş vermiş qanunsuzluğa etiraz edən sakinlər iş yerlərindən çıxarılmaqla təhdid edilir:
Daha bir maraqlı fakt odur ki, Ə.Əzizov icra başçısı təyin edildikdən bir qədər sonra Abşeron rayonunda torpaq və kommersiya sahəsində maxinator kimi məşhur olan Fuad Cəbrayılovu özünə müavin təyin etməsidir. Bütün bu tikinti işləri də məhz onun müavin təyin edilməsindən sonra geniş vüsət alıb.
Adətən “lal deputat” kimi tanınan Milli Məclisin üzvü Kəmaləddin Qafarovun dili birdən-birə açılıb və bildirib ki, “Azərbaycanda bəzi dərmanların qiymətləri Türkiyədən ucuzdur”. Deputatın qəfil olan bu çıxışı lətifəyə bənzəyirdi, çünki reallıqda Azərbaycanda dərman qiymətlərinin süni şəkildə şişirdildiyi və onun nümunə gətirdiyi Türkiyə ilə müqayisədə qat-qat baha olduğu heç kəsə sirr deyil. Bunu elə parlamentin Səhiyyə Komitəsinin sədri Əhliman Əmiraslanov da Kəmaləddin Qafarovun çıxışına cavabında bildirib. “Mən görməmişəm ki, Türkiyədə baha olan dərman Azərbaycanda ucuz olsun. Düzdür, son vaxtlar Türkiyədə də dərmanların qiymətləri bahalaşıb. Amma deyə bilmərik ki, bəzi dərmanların qiyməti bizdə Türkiyədəkindən ucuzdur”, – komitə sədri deyib.
Kəmaləddin Qafarovun dilə gəlməsi və belə bir iddia irəli sürməsi maraqlı olduğu qədər də gülüş doğurur. Təkcə ona görə yox ki, deputatın iddiası doğru deyil, həm də bu iddianı irəli sürən Kəmaləddin Qafarov ölkədə dərmanların qiymətinin baha olmasının əsas baiskarlarından biridir və belə bir şəxsin “Azərbaycanda dərmanlar ucuzdur” deməsi yumşaq desək gülüncdür, həm də məqsədin qanunverici orqanın tribunasından öz biznesini legitimləşdirmək məqsədi daşıdığı aydın görünür.
AzToday.az xəbər verir ki, açıq mənbələrdə yayılan məlumatlara görə, deputat olan Kəmaləddin Qafarovun müxtəlif sahələrdə biznesi var, lakin onun əsas gəlir mənbəyi məhz dərman satışındandır. “AzəriMed” MMC şirkəti Kəmaləddin Qafarovun ən böyük dərman firmasıdır. Şirkət həm də “Tibbi Market”də tibbi ləvazimatların və avadanlıqların satışını həyata keçirir. O cümlədən, “Zəfəran” apteklər şəbəkəsi və “Zəfəran Hospital” da şirkətə daxildir. Şirkət kağız üzərində Kəmaləddin Qafarovun yaxın qohumu Canliya Qafarova Rəhim qızının adınadır. “Kanon” MMC Qafarovun digər firmasıdır. Şirkətə “Kanon” apteklər şəbəkəsi daxildir.
Qanuni təmsilçisi Kəmaləddin Qafarovun əmisi oğlu Hüsaməddin Qafarovun olduğu “Shafran” MMC də dolayısı ilə deputata məxsusdur. Deputatın dərman biznesinə “Avestafarm” MMC, “Naturalist” firması da daxildir. “Naturalist” firmasının təsisçisi kağız üzərində Qafarovun qardaşı Cəlaləddin Qafarovdur.
Mediada yayılan məlumatlara görə, Kəmaləddin Qafarovun əczaçılıq biznesi ölkə sərhədlərinin hüdudlarını aşır. Misal üçün, Gürcüstanda fəaliyyət göstərən, Tbilisi, İsani-Samqor rayonu, Qorqasali küçəsi 41 ünvanında hüquqi qeydiyyatda olan “Helios Pharma” LTD-nin də K.Qafarova məxsus olduğu deyilir. Şirkət Tamara Qamzaşvili adlı gürcü qadın tərəfindən idarə olunur. Eləcə də yunan Kiprində fəaliyyət göstərən “SALİDONT LTD”-nin də deputatın biznes imperiyasına bağlı olduğuna dair məlumatlar yayılıb.
Dərman biznesində böyük paya sahib olan K.Qafarov həm də Milli Onkologiya Mərkəzinin direktor müavinidir və dövlətin bura ayırdığı pulların böyük əksəriyyətinin deputata məxsus “AzəriMed” şirkətinə transfer edildiyi, dərmanların oradan alındığı haqda məlumatlar var. Milli Onkologiya Mərkəzinin “AzəriMed”lə imzaladığı rəsmi müqavilələr də bunu deməyə əsas verir. Onkologiya Mərkəzində dəhşətli bahalığın arxasında da məhz Kəmaləddin Qafarov dayanır.
Kəmaləddin Qafarovun biznesi dərman sahəsi ilə də yekunlaşmır. Paytaxtın ən dəbdəbəli və bahalı şadlıq evlərindən olan “Versal Palace” Qafarovlar aləsinə məxsusdur. “Versal Palace” MMC tərəfindən idarə olunan şadlıq evinin qanuni təmsilçisi deputatın qardaşı Cəlaləddin Qafarovdur.
Qanun deputatların biznes fəaliyyətini qadağan edir, lakin göründüyü kimi, bunun Kəmaləddin Qafarova aidiyyəti yoxdur. O, qanunverici orqanda əyləşsə də, müxtəlif şəxslər üzərindən biznesini idarə etməyə davam edir və ölkədə dərmanların “əl yandıran” qiymətlərinin əsas səbəbkarıdır. Amma Milli Məclisin kürsüsündən “dərmanlar ucuzdur” çıxışını edəcək qədər də yalan danışır.
Görünür, Milli Məclisdəki deputat mandatı Kəmaləddin Qafarova xalqı təmsil etmək üçün yox, biznesini qorumaq və yeri gələndə qanunsuz fəaliyyətlərini legitimləşdirmək üçün lazımdır.
Əslində depuatatların bu kimi reallıqdan uzaq bəyanatları adi hal alıb. Amma indiki halda K.Qafarovun fikrinə komitə sədri Ə.Əmiraslanovun sərt reaksiyası xüsusi diqqət çəkir. Hakim komandaya yaxın mənbələrdən daxil olan məlumata görə, bu əslində Qafarovun “qələminin qırılmasının” ilkin işartılarıdır: “Kamaləddin Qafarov “Naxçıvan klanı”nın nümayəndəsi kimi tanınır və onun biznesinin çiçəklənməsində Vasif Talıbov faktoru da rol oynayıb. İnki iqtidar daxilində gedən kadr islahatı və “köhnə qvardiya” ilə vidalaşma dalğası Qafarova da öz təsirini göstərəcək” //AzToday.az//
Sumqayıtda qəribə vəziyyət yaranıb. Qəribəliyə səbəb ölkənin üçüncü böyük şəhərinin kim tərəfindən idarə olunması ilə bağlıdır. Məsələ belədir ki, hal hazırda Sumqayıt Şəhər İcra Hakimiyyətinin başçısı rəsmi olaraq Zakir Fərəcovdur. Lakin onun səhhətində son zamanlar yaranmış problem səbəbindən davamlı olaraq, işə gedib-gələ bilmədiyi deyilir. İddalara görə, Fərəcov xeyli müddətdir xəstəlikdən əziyyət çəkir və mütəmadi olaraq, Almaniya və ya İsraildə müalicə alır. Hətta o da bildirilir ki, icra başçısı ötən ilin sonlarına yaxın əməliyyat belə olunub. Elə bu səbəbdən də Zakir Fərəcovun əksər rəsmi tədbirlərə qatılmadığı, işdə isə yalnız günün birinci yarısı gəldiyi deyilir. Qeyd edək ki, Sumqayıt şəhər İcra Hakimiyyəti başçısının faktiki olaraq bir neçə müavini var. Müxtəlif sahələr üzrə təyinat almış müavinlər icra başçısı olmadığı təqdirdə, şəhərin idarəçiliyini həyata keçirməlidirlər.
Lakin faktiki olaraq, Sumqayıtın idarəçiliyini İcra Hakimiyyətinin şöbə müdiri Gündüz Əliyev reallaşdırır. Gündüz Əliyev Sumqayıt Şəhər İcra Hakimiyyətinin Ərazi idarəetmə və yerli özünüidarəetmə orqanları ilə iş şöbəsinin müdiridir. Son zamanlar isə o, bir il bundan öncə vəfat etmiş və postu hələ də boş qalmış müavinlərdən birinin səlahiyyətlərini icra edirdi. Əliyev bir ildir ki, müavin olmaq üçün çalışsa və bu məqsədlə bir sıra idarəetmə işlərini həyata keçirirsə də sonda məqsədinə nail ola bilmədi və bu posta kənardan təyinat verildi. Onu da bildirək ki, bu müddət ərzində onun təqdimatının iki dəfə Prezident Admnistrasiyasından geri qaytarıldığına dair xəbərlər də var. Məlumata görə, admnistrasiya Gündüz Əliyevin Sumqayıt şəhər İcra Hakimiyyəti başçısının müavini vəzifəsinə məqbul hesab etməyib.
AzToday.az xəbər verir ki, bunun da əsas səbəbi Gündüz Əliyevin Sumqayıt şəhərindən olan Qazilərlə yola getməməsi və adının bir sıra qalmaqallara qarışmasıdır. Məlumatlı mənbələrin dediyinə görə, hələ ötən il bir qrup Qazini qəbul edən Gündüz Əliyev ilk dəfə onlara müxtəlif vədlər verərək, yola salıb. Lakin bir müddət sonra həmin Qazilər vədlərin yerinə yetirilmədiyi səbəbindən təkrar şöbə müdiri ilə görüşməyə cəhd edirlər. Bu zaman Gündüz Əliyev onlarla kobud davranaraq, qəbul otağından çıxarılmaları barədə göstəriş verib. Həmin vaxt məsələnin sədası Prezident Admnistrasiyasına qədər gedib çatıb. Elə həmin zamandan onun müavin olmaq arzusu xəyala çevrilib. Məsələ bununla da bitmir, bildirək ki, Gündüz Əliyevin adın əvvəllər də qalmaqallara qarışıb. Məsələn, onun tender oyunlarının əsas aparıcı simalarından biri olduğu deyilirdi. Elə buna görə də, Sumqayıtda bütün təmir-tikinti işlərinin nəzarətini də ələ keçirməyə nail olmuşdu. Həmin tender oyunları sayəsində imkanlarını genişləndirən sözügedən şöbə müdirinin Sumqayıt Bulvarında qolf stadionu və xeyli sayda restoran və mülkləri olduğu deyilir. Bundan başqa, onun adı “MTN işi”ndə də hallanırdı. İddia edilirdi ki, şöbə müdiri ləğv edilmiş MTN-in rəhbərliyinə aylıq “xərac” verirmiş…
Bakı şəhəri R.Əliyev adına 3 nömrəli tam orta məktəbdə direktorla işçilər arasında mübahisə yaşanıb.
DİA.AZ APA-ya istinadla xəbər verir ki, bununla bağlı sosial şəbəkələrdə video paylaşılıb.
Qeyd olunur ki, məktəbin direktoru qapıları bağlatdıraraq, bir qrup müəllim və işçinin içəri daxil olmasına maneə yaradıb.
Hadisənin hansı səbəbdən baş verdiyi məlum deyil.
TEREF.AZ yazır ki, Bakı şəhər sakini Elmira Hümbətova Azinforum.az-a müraciət edərək bildirib ki, içməli su istehsalı ilə məşğul olan şirkət onu problemə salıb. Şikayətçinin sözlərinə görə, o, daima bir adda sudan istifadə edib. Bir neçə gün əvvəl, yenə su sifariş edib.
Suyun təchizatı ilə onu daim təmin edən Tapdıqov Famil Atəş oğlu adlı işçi bu dəfə xanıma “Çiçəkli” adda bir su gətirib. Brendin fərqli olduğunu görən vətəndaş buna etirazını bildirib. Şirkət təmsilçisi məsuliyyətdən yayınmaq üçün müştəri ilə mübahisəyə girib, hətta xanımı təhqir də edib.
Şikayətçinin sözlərinə görə, o, yaranmış vəziyyətlə bağlı Abşeron Rayon Polis İdarəsinə şikayət edib: “Məlum olub ki, Tapdıqov Famil öz iş yerini dəyişərək, “Çiçəkli”yə gələndə bütün müştəri bazasını da özü ilə gətirib. Bu minvalla köhnə müştərilərə “Çiçəkli” adlı suyu sırımağa başlayıb. Bu da istehlakçıların aldadılması anlamına gəlir.
Araşdırma zamanı məlum oldu ki, “Çiçəkli”nın buraxdığı sular heç lazımi standatlara da cavab vermir. Mən polisin də yanaşmasından razı deyiləm. Bu məsələyə mülki problem kimi baxırlar. Ancaq mənə qarşı edilən əməldə cinayət tərkibi var”.
Teref.az.az olaraq adları çəkilən hər bir şəxsin fikirlərinə yer verməyə hazırıq.
Şəmkir rayon sakini Gülnar Rüstəmova saxta əmr əsasında işini itirdiyini deyir. O, rayonun Sabirkənd orta məktəbinin direktoru olub, 2022-ci il sentyabrın 5-də vəzifəsindən azad edilib. Onun sözlərinə görə, saxtakarlıq nəticəsində təkcə direktorluqdan yox, ümumiyyətlə, pedaqoji faəliyyətdən uzaqlaşdırılıb.
“Yeganə gəlir yerim işlədiyim məktəbdən aldığım maaş idi. Onu da Elm və Təhsil Nazirliyinin sayəsində itirdim. Direktorluqdan uzaqlaşdırıldım, bəs mənim müəllimliyim necə olsun? Məni müəllim kimi də işləməyə qoymurlar. Mən uşaqlarımı saxlaya bilmirəm…”, – Gülnar Rüstəmovanın sözləridir.
“Məhkəmə də saxtakarlığa göz yumdu”
Sabirkənd orta məktəbi Qarabağ döyüşlərində həlak olmuş şəhid Sahib Rüstəmovun adını daşıyır. O, Gülnar Rüstəmovanın əmisi oğludur:
“İllərlə o məktəbdə müəllim işləmişəm. Ən çox bal toplayan müəllimlərdən biri olmuşam. 2019-cu ilin sentyabrından məktəb direktoru kimi fəaliyyət göstərmişəm. Bu imtahanda da 60 mümkün baldan 54-nü toplamışam. Dövlət İmtaham Mərkəzinin “marker” müəllimiyəm”.
Gülnar Rüstəmova deyir k, onun işdən azad edilməsilə bağlı Həmkarlar Təşkilatının rəyi Şəmkir rayon Təhsil İdarəsinin rəhbərliyi tərəfindən təzyiq əsasında alınıb. Onun sözlərinə görə, təşkilatın iclası keçirilməyib. Rəyin alındığı tarix 16 iyun 2022-ci il göstərilsə də, əslində, həmin vaxt verilməyib.
“Təhsil İdarəsinin rəhbərliyinin qərəzinin, qanunsuzluğunun qurbanı olmuşam. Mənimlə bağlı baş verən qanunsuzluqlar, saxtakarlıqlar göz deşir, heç bir çərçivəyə sığmır. Çox təəssüf ki, məhkəmə də bunlara göz yumdu…”.
“Regional idarənin rəisinin təzyiqi ilə direktor haqqında rəy yazdım”
Gülnar Rüstəmova onun haqqındakı əmrin ləğvi və işə bərpa tələbilə Bakının Nərimanov Rayon Məhkəməsinə (Elm və Təhsil Nazirliyi bu rayonun ərazisində yerləşdiyinə görə) müraciət etsə də, iddiası təmin olunmayıb.
Məhkəməyə Şəmkir rayonu üzrə Təhsil sektorunun Həmkarlar Təşkilatının sədri Zülfiyyə Əhmədovanın ərizəsi də təqdim olunub. O, ərizəsində göstərib ki, Gülnar Rüstəmova haqqında rəyi Qazax-Tovuz Regional Təhsil İdarəsinin müdirinin təzyiqi altında yazıb.
“14 iyun 2022-ci ildə Qazax-Tovuz Regional Təhsil İdarəsi tərəfindən məktəbdə monitorinq aparıldı. Monitorinqin nəticəsilə bağlı rəy bildirmək üçün mənə müraciət olundu. Dedilər ki, Gülnar Rüstəmovanın işdən çıxarılması haqda rəy bildirim. Birinci dəfə verdiyim rəylə razı olmadıqlarını dedilər. Regional Təhsil İdarəsi tərəfindən verilən təqdimata uyğun rəy yazmağı tələb edirdilər. Bildirirdim ki, artıq iclas keçirilib, iclasın protokolu var, xeyri olmadı. Təzyiq altında, affekt vəziyyətdə regional idarənin rəisinin tələb etdiyi formada rəy verdim…”, – Zülfiyyə Əhmədova bildirib.
Zülfiyyə Əhmədova məhkəmədə də dindirilib. Ancaq hakim Səbinə Nuriyeva onun dediklərini əhəmiyyətli hesab etməyib.
“Yaxşı ki, elektron məhkəmə sistemi tətbiq edilir. Məhkəm prosesi audio yazı ilə aparılır, ona görə protokolu saxtalaşdıra bilməyiblər. Məhkəmədə hakim niyəsə qanunlara, hüquqa münasibətdə saymazyanalıq nümayiş etdirdi. Heç bir sübuta hüquqi qiymət vermədi. Yalnız Elm və Təhsil Nazirliyinin verdiyi əsassız mülahizələri əsas götürüb, iddiamı təmin etmədi. Halbuki, eyni məhkəmə tam oxşar başqa bir iddianı təmin edib. Bu da açıq-aşkar ayrı-seçkilik…”, – Gülnar Rüstəmova əlavə edib.
O, qərardan Bakı Apellyasiya Məhkəməsinə şikayət verib.
“Bir tərəfdən şagirdləri tədbirə çağırtdırır, o biri tərəfdən məktəbə yoxlama göndərir”
Məhkəmənin qərarında göstərilib ki, Sabirkənd orta məktəbinin təlim-tərbiyə işləri üzrə direktor müavini rayon Təhsil İdarəsinin müdiri Arslan Hacıyevə ərizə göndərib. Ərizə əsasında məktəbin direktorunun fəaliyyəti yoxlanılıb, nöqsanlar aşkarlanıb. Həmin nöqsanlar barədə Həmkarlar İttifaqına təqdimat göndərilib.
Həmkarlar İttifaqı da Gülnar Rüstəmovanın vəzifəsindən azad olunmasına etiraz etməməsi haqda qərar qəbul edib. Bundan sonra Təhsil İdarəsinin Gülnar Rüstəmova ilə əmək müqaviləsinin ləğv olunması barədə əsaslandırması əsasında elm və təhsil naziri əmr verib. Əmək Məcəlləsinin 70-ci maddəsinin “ç” bəndinə əsasən (işçi özünün əmək funksiyasını və ya əmək müqaviləsi üzrə öhdəliklərini yerinə yetirmədikdə) onunla əmək müqaviləsinə xitam verilib.
Məhkəmədə Elm və Təhsil Nazirliyinin nümayəndəsi deyib ki, məktəbdə yoxlama zamanı dərsə davamiyyət, məktəbdə tədris prosesinin təşkililə bağlı akt tərtib olunub. Həmin aktları da Gülnar Rüstəmova direktor işlədiyi zaman imzalayıb.
“Mənim işdən çıxarılmağımla bağlı səbəblərdən biri guya şagirdlərin, xüsusilə yuxarı siniflərin davamiyyətilə bağlı olub. Bizi 1 iyun – Beynəlxalq Uşaq Günü münasibətilə tədbirə çağırırlar. Həmin vaxt yuxarı siniflərin şagirdləri də orada iştirak edir. Təhsil idarəsinin müdiri bir tərəfdən şagirdləri tədbirə çağırır, həmin vaxt da məktəbə yoxlama göndərib, davamiyyət yoxlatdırır. Bu, məqsədli şəkildə edilmiş bir hərəkətdir”, – keçmiş direktor bildirib.
Meydan TV
Son zamanlar baş verən hadisələr ölkə gündəmini kökündən dəyişsə də, daxildəki bəzi məmurların qanunsuz və rüşvətxor əməlləri ilə bağlı iddiaları, ortada olan faktları və müraciətləri unutmamalıyıq. Məsələn, Şamaxının icra başçısı və onun ətrafına topladığı harın məmurların yarıtmaz fəaliyyəti haqda redaksiyamıza hələ də saysız-hesabsız məlumatlar daxil olur. İcra başçısı Tahir Məmmədovun və onun “qara kassa”sı rolunu oynadığı iddia edilən şöbə müdiri Mərdan Nəhmətovun əməlləri haqda yazdığımız silsilə materiallar saytımızda dərc olunub. Bundan sonra təhqir və təhdid dolu mesaj və zənglər aldığımız haqda isə ictimaiyyətə, eləcə də aidiyyatı orqanlara məlumat vermişik. Lakin bütün hədələrə baxmayaraq insanları dövlətdən incik salan, büdcə pullarını mənimsəyən, xirtdəyə qədər rüşvət və korrupsiyanın içində boğulan məmurlar haqda redaksiyamıza daxil olan məlumatları işıqlandırmaqda israrlıyıq. Bu dəfə bir neçə Şamaxı sakini icra başçısının və onun ətrafına yığdığı harın məmurların vətəndaşları necə incitməsi haqda məlumatları redaksiyamıza göndəriblər. Biz də öz peşə borcumuzu yerinə yetirməkdən dolayı onların bir neçəsi ilə əlaqə saxlamışıq. Öz problemi ilə bağlı Konkret.az-a danışan Şamaxı rayon sakini İbrahimov Kamran Fətəli oğlu uzun illərdir mal-qara saxlamaqla dolandıqlarını bildirib: “Atam Çuxur kolxozunda çoban və briqadir işləyib. Sovet imperiyası dağılan vaxtı fermalar satışa çıxarılanda biz yaylaq aldıq. Yəni hökumət yaylağı 25 illik müqavilə ilə bizə icarəyə verdi. Həmin müddət başa çatdıqdan sonra biz Şamaxı Rayon İcra Hakimiyyətinə müraciət edərək icarə müddətini uzatmaq istədik. Bizə pandemiya olduğunu bildirdilər və torpaq məsələsi ilə bağlı işlərin təxirə salındığını dedilər. Amma hələlik torpaqdan istifadə edə biləcəyimizi vurğuladılar. Hər il torpaqdan istifadəyə görə vergi ödəyirik. Bu il bizi Şamaxı Rayon Polis Şöbəsinə çağırdılar və bildirdilər ki, Abu adlı şəxs bizim mal-qara saxladığımız yaylağı alıb və torpaq artıq ona məxsusdur. Abu adlı bu şəxsin fermaları və yaylaqları var. Bizə bu il yaylağa getməməyi tapşırdılar. Çarəsiz şəkildə İcra Hakimiyyətinə gəldik və qəbula düşmək üçün növbəyə yazıldıq. Lakin 80 yaşlı atamı səhər saat 9:00-dan, axşam saat 16:00-a kimi İcra Hakimiyyətinin qabağında gözlətdilər və sonda heç kim bizi qəbul etmədi”.
Kamran İbrahimov ailədə 6 övlad olduğunu və hamısının təsərrüfatla dolandığını vurğulayıb: “Başqa işləyənimiz yoxdur. Bizə deyirlər ki, Abu adlı şəxs həmin yaylağı alıb, hətta sənəd də göstərirlər. Əgər bu torpağı hökumət icarəyə verirdisə, o zaman niyə bizim özümüzə satmadılar? Uzun müddət bu torpaqdan istifadə etmişik, vergi və sosial ödənişləri vaxtlı-vaxtında vermişik. İcra Hakimiyyətində bir nəfər şəxs bizi başqa şöbə əməkdaşının qəbuluna göndərdi. Lakin nə qədər gözləsək də, heç kim qəbul etmədi. Atam bu gün də İcra Hakimiyyətinə qəbula gedəcək və nəticə haqda sizə məlumat verəcəm”.
Şamaxının 63 yaşlı sakini Təvəkkül Abdullayev də saytımıza açıqlamasında fermer təsərrüfatı ilə məşğul olduğunu deyib: “Mənim 144 baş iribuynuzlu, 300 baş isə xırdabuynuzlu heyvanım var idi. Yay otlaq sahələrini icarəyə götürərək təsərrüfatımı idarə edirdim. Şamaxı Rayon İcra Hakimiyyətindən məni dəvət edərək yay otlaq sahəsi verəcəklərini bildirdilər. Şəxsən başçının özü bu sözü mənə deyib. Lakin Pirsaat çayında 3-5 gün heyvanımı saxladıqdan sonra mənə yer vermədilər. Beləcə təsərrüfatım məhv oldu, qalan heyvanlarımı isə kolbasa sexlərinə dəyər-dəyməzə verməyə məcbur qaldım. Oğlum Abdullayev Adəm müharibə iştirakçısıdır və bir çox rayonların işğaldan azad olunmasında iştirak edib. Cəbhədən qayıdan gündən indiyədək işsizdir. Demək olar ki, hər gün icra başçısının qəbuluna düşməyə çalışıram. Amma heç kim qəbul etmir, icra başçısını yalnız qapıda görüb yaxınlaşıram. Mənə, “get, iş olanda çağırarıq” deyib yola salırlar. Müavinlər isə vətəndaşları “yola vermək”lə məşğuldurlar.”
Təvəkkül Abdullayev 11 nəfər ailə üzvünün və işçi qüvvəsinin hazırda dolanışıqsız qaldığını vurğulayıb: “Məni aldatdılar, yoxsa özüm icarəyə torpaq götürüb mal-qaramı saxlayardım. Heç nədən bütün heyvanlarım tələf oldu. İcra Hakimiyyətinə gələrək mal-qaramı dövlətə təhvil vermək istədiyimi bildirəndə məni az qala həbs etdirəcəkdilər. Problemimlə bağlı başçıya dəfələrlə qapıda yaxınlaşaraq sözümü deməyə çalışmışam. Mal-qaramın tələf olduğunu demək istəyəndə məni təbliğat aparmaqda günahlandırıb. İcra Hakimiyyətinin şöbə müdiri olan Mərdan Nəhmətov isə yaxın qohumum olsa da, uzun illərdir onunla danışmıram. Hələ hərbi komissar işlədiyi vaxtlarda rüşvətxor kimi tanınıb. Mən İsmayıllıda Baş prokurorun da qəbulunda olmuşam, təsərrüfatımı məhv etdikləri haqda məlumat vermişəm. Hələ nəticəsi yoxdur. Heç olmasa 11 nəfər ailə üzvümü dolandırmaq üçün iş istəyirəm”.
Digər şikayətçi, Şamaxı rayon Həmiyəli kənd sakini Rahid Xəlilov isə rayondakı özbaşınalıqlar və hərc-mərclik haqda fikirlərini bölüşüb: “Rayonda hər bir sahədə rüşvətxorluq tüğyan edir. İcra başçısının Mərdan Nəhmətovla birgə qanunsuzluqları pik həddədir. Əvvəllər Şamaxıda səhiyyə şöbəsinin müdiri olan, lakin işində yol verdiyi nöqsanlara görə vəzifəsini itirən Ehtiram Rüstəmzadə adlı şəxs hazırda icra başçısı ilə qohumluq və yaxınlıq əlaqələri sayəsində humanitar şöbədə aparıcı məsləhətçi təyin edilib. Amma özü Bakıda oturub və bir gün də olsa işə gəlməyib. Bu şəxs Bakıda əyləşərək icra başçısı üçün pul toplamaqla məşğuldur. Hələ Şamaxıya Tahir Məmmədov kimi analoqu olmayan icra başçısı gəlməyib. Bu şəxs vəzifəyə təyin olunanda özü ilə bərabər 3 nəfər kassir gətirmişdi. Onlardan Yaqub adlı şəxs ərazi idarəetmə və bələdiyyələrlə iş şöbəsinin müdiri idi və bu sektorda ayrı-ayrı fərdləri işə düzəltmək üçün pul alırdı. Bibisinin həyat yoldaşı olan Akif adlı şəxs isə şəhərin abadlaşdırılmasına nəzarət edirdi və bu sahədə pulları mənimsəyirdi. Araz adlı digər şəxs isə ev tikmək istəyənlərdən pul toplayırdı. İndi isə Tahir Məmmədov özünə Mərdan Nəhmətovu yeni “kassir” təyin edib. Mərdan isə öz qohumlarını müxtəlif vəzifələrə yerləşdirməklə məşğuldur. Üstəlik saxta diplom alıb.
P.S. Əldə etdiyimiz son məlumatlara görə, rayon rəhbərliyi müxtəlif vədlər və şirnikləndirici təkliflər verməklə ortada olan fakt və iddiaları təkzib etmək üçün çirkin oyunlar qurmağı planlaşdırır, ictimaiyyətin diqqətini başqa səmtə yönəltmək istəyir. Cənablar, bu, keçməyəcək. Dövləti aldatmaq sizə müyəssər olmayacaq. Yeri gəlmişkən, İcra Hakimiyyətilə dəfələrlə əlaqə saxlasaq da, telefon zənglərinmizə cavab verən olmadı. Bütün bunlara baxmayaraq, qarşı tərəfin də mövqeyini dərc etməyə hazırıq.pravda.az
XalqXeber.Az
Son illər İran İslam Respublikasının Azərbaycana qarşı həyata keçirdiyi pozuculuq fəaliyyətinin qarşısının alınması, ayrı-ayrı sahələrdə yerləşdirilmiş casus şəbəkəsinin ifşa olunması və s. istiqamətində ciddi addımlar atılmaqdadır. Söz yox ki, ölkəmizin hüquq-mühafizə orqanı əməkdaşlarının bu yöndə həyata keçirdiyi tədbirlər, bu gün də hər kəs tərəfindən lazımınca dəyərləndirilir. Yayılan rəsmi məlumatlardan da aydın olur ki, İranı ölkəmizin daha çox əhəmiyyət kəsb edən sahələri maraqlandırır və bu dövlətin xüsusi-xidmət orqanı əməkdaşları, məhz həmin sahələrdən lazımi məlumatları əldə etməyə çalışırlar. Bu da onu göstərir ki, İranın ölkəmizə qarşı düşmən mövqeyi hal-hazırda da davam etməkdədir. Uzun müddətdir ki, ölkəmizin bir çox sahələrində olduğu kimi, dini sahədə də atılan addımlar və bu sahələrdə məsul vəzifə sahibi olan şəxslərin fəaliyyətləri heç də diqqətdən kənarda qalmır. Belə bir səbəbdəndir ki, adının çəkilməsini istəmədiyimiz şəxs tərəfindən Deryaz.az saytının elektron poçtuna göndərilən vətəndaş müraciəti də daha çox diqqətimizi cəlb etdi. Müraciətin mahiyyəti ilə tanış olduqdan sonra, onu olduğu kimi, yəni məzmununa, heçbir nöqtəsinə, hansısa vergülünə toxunmadan çoxsaylı oxucularımızın diqqətinə çatdırmağı özümüz üçün borc bildik. Vətəndaş müraciətində bildirilir:
“Neftçala şəhər Sahib Əzzaman məscidinə Dini Qurumlarla iş üzrə Dövlət komitəsi tərəfindən yeni axund təyin olunsa da, heçnə dəyişməyib. Beləki təzə axund köhnə axund kimi öz qanunları ilə işləyir. Dünyasın dəyişənlərin yaxınları məsciddə onlardan alınan pula görə narazıdırlar. Paytaxt məscidlərində ölünün yuyulması və kəfənlənməsi birlikdə 50 manata olsa da, Neftçala Sahibəzzaman məscidinin imamı Cəfər Cəfərov 70 manat ölünün yuyulmasına, 50 manat kəfənə, 50 manat molla üçün dəfn etmək pulu, 40 manat cənazənin daşınması üçün maşın pulu, 40 manat qəbrin qazılması üçün pul tələb edirlər. Bəzən bir gündə 3-4 dəfn olur. Pulların kimlə necə bölünməsi çox marağlıdır.
Bu yığılan pulların məscidə aid olmaması bəllidir. Çünki, məscidin qaz borcu, işıq borcu üçün imkanlı şəxslərdən kömək istəyirlər. Sanki dünya malına bağlılıq bu məscidin təməlində qoyulub. Məscidin əvvəlki axundu Mirseymur Əliyev, Hüsnü Həsənov və Sənan Xəlilov bir neçə il əvvəl əlbir olub Neftçalanın kənd və qəsəbə axundlarından 2000-2500 mamat pul alaraq söz vermişdilər ki, onları maaşla təmin edəcəklər. Amma, buna gücləri çatmadığları üçün iki il keçdikdən sonra, özlərinə yaxın olan din xadimlərinin verdikləri pulu geri qaytarmağa başladılar. Hər iki axundun müavini olan Vüsal Hüseynovun da başı təsərrüfat işlərinə qarışıb. Hüsynovun yaşadığı qəsəbədə böyük təsərrüfatının olduğu bildirilir. Neftçalada dini sahənin demək olar ki, sahibi yoxdur. Birinin başı ölülərdən pul yığmağa qarışıb, birinin də başı quzulara”. Qarşı tərəfin də mövqeyini dinləyə bilərik.
Mövzuya qayıdacağıq.
Deryaz.az
Baş həkim Şəlalə Səfərova və ətrafı həkimdirlər, yoxsa qəssab?
10 ildir on xəstəlikdən əziyyət çəkən şəxsə əlillik dərəcəsi verilmir
Bakı şəhəri, Xətai rayonu, Telnov küçəsi, ev 21, m. 37 ünvanında qeydiyyatda olan Bədəlov Zahid Xanmalı oğlu 2001- ci ildən şəkər xəstəsidir, qeydiyyatda olduğu ünvan üzrə 7 saylı poliklinikanın uçotundadır. Son 10 ildə çeşidli xəstəliklərdən əziyyət çəkir, vərəm , qan- damar , ürək xəstəsi kimi tibbi uçotda olmaqla, gözlərinin görməsi də pisləşib. Bu pisləşmə görmə qabiliyyətini itirmə həddinə çatdırğından altı ay qabaq gözləri əməliyyat olunub. Bunları sadalamaqda amacımız oxuyanları yormaq yox, adını “həkim” qoyan ağ xalatlıların qara əməllərini diqqətə çatdırmaqdır.
On ildir 7 saylı poliklinikanın baş həkimi Şəlalə Səfərova xəstədən rüşvət istəyib, ala bilmədiyindən TSEK-ə forma -88 göndərilməsinə qadağa qoyub. Qadağa üsulları da rəngarəngdir. Gah əlilliyin düşmədiyi, gah xəstəxanadan, gah müayinədən keçmədiyi bəhanə edilib. Ali dövlət hakimiyyəti , hüquq mühafizə orqanlarına, Səhiyyə Nazirliyinə , Ombudsmana şikayətlərə cavabın bəhanəsi isə QEYDİYYATDA OLDUĞU ünvanın DAYISININ EVİ OLDUĞU (??) olub ! (?) Elə bilirsiniz, şişirtmədir? Təsəvvür edin, Ombudsman insan hüquqları pozuntusun yoxlamasının sonucu olaraq şikayətçiyə rəsmi məktublarla bildirib ki, “ 7 saylı poliklinakının cavabı ilə müəyyən edilmişdir ki, 1987-ci ildən sözügedən ünvanda və poliklinikada qeydiyyatda olan şəxs DAYISININ EVİNDƏ “QONAQ STATUSUNDADIR” və bu səbəbdən doğulduğu rayona müraciət etməlidir” ! (?) Rüşvətin gücünə baxın görün insan hüquqlarının qorunmasını necə gerçəkləşdirir!
Nə isə, təzəsi olan yerdə, “köhnə palan içi sökməyək”. Çox şikayətlərdən sonra xəstə haqqında “UİX. Gərginlik stenokardiyası II f /s. AORTA KORONAR ŞUNTLAMA ×3 əməliyyatından sonrakı vəziyyət. QDÇ ( qan dövranı çatmazlığı) II dərəcə. Hipertoniya xəstəliyi II mərhələ. Şəkərli diabet tip 2. Keçirilmiş plevritdən sonrakı vəziyyət” diaqnozu ilə forma -88 TSEK-ə göndərilib. TSEK anında ona aid olmayan NK -nın 16.01.2020 tarixli 11 saylı qərarının 1.5 .1 bəndinə əsasən imtina edib ki, əlavə müalicəyə ehtiyacı var. Bir daha diqqətə çatdırırıq ki, TSEK ona aid olmayan NK qərarını tətbiq edib, halbuki TSEK-ə aid olan qərar eyni tarixli 12 saylı qərardır və TSEK ona göndərilən forma 88 əsasında əlilliyin qiymətləndirilməsini həyata keçirməlidir. TSEK-in, ümumiyyətlə, “ƏLAVƏ MÜALİCƏYƏ EHTİYACI VAR” “TƏYİNATI” QANUNVERİCİLİKDƏ NƏZƏRDƏ TUTULMAYIB.
NK-nın 16.01.2020 tarixli tibb müəssisələrinə aid 11 saylı və TSEK-ə aid 12 saylı qərarını diqqətə çatdırmaq da yardıma çatmayıb. İcbari Tibbi Sığorta üzrə Dövlət Agentliyi xəstədən qanunsuz olaraq yenidən xəstəxanada (6 ay) yatmağı tələb edib. Halbuki NK-nın 16.01.2020 tarixli 11 saylı qərarına əsasən, tibb müəssisələrinin TSEK-ə forma 88 göndərməsi qaydası müəyyən edilib və vərəm xəstələrinə, anatomik çatmazlıqları olanlara 6 aylıq müalicə müddəti şərtinin tətbiq edilməməsi təsbit edilib. Yerində əyani müayinəsini tələb edən xəstənin şikayətlərinə iki il ərzində baxılmayıb.
2022-ci ilin sentyabrında 7 saylı poliklinika yenidən sənədləri toplayıb 38 saylı poliklinika vasitəsilə TSEK-ə göndərəcəyini bildirsə də 38 saylı poliklinikadan onlara heç bir sənəd daxil olmadığı bildirilib. 7 saylı poliklinika nə ürək, qan-damar, tənəffüs çatmazlığı, şəkər xəstəliyinin əlilliyə əsas vermədiyini, yalnız gözlə bağlı əlillik düşdüyünü iddia edir. Halbuki TSEK-ə forma 88 göndəriləndə bütün əsas və əlavə diaqnozlar, epikrizlər qeyd olunmalıdır. Şəkərli diabetə əlillik düşmürsə, niyə 22 ilin şəkər xəstəsinə dərman verilməsindən imtina edilib və xəstə əsəbdən az qalıb komaya düşsün? ! Bəli, bəli, 7 saylı poliklinika 22 ilin şəkər xəstəsinə dərman verməkdən imtina edib ki, əlillik dərəcəsi yoxdur! Xəstənin bu “qəssab” münasibətindən şəkəri kəlləçarxa qalxıb və pulu ilə ilə insulin vurdurmasa öləcəkmiş. Belə həkimlik olar? Yoxsa qəssablıq qaydaları hökm sürür? 7 saylı poliklinikanın baş həkimi Şəlalə Səfərovanın Səhiyyə Nazirliyində, Bakı Baş Səhiyyə Mərkəzində, İcbari Tibbi Sığorta üzrə Dövlət Agentliyində, TƏBİB -də qoruyucusu kimdir ki, xəstəyə dərman verməkdən imtina etməsinə belə qiymət verilmir? Bu, konkret cinayət əməlidir və hüquq mühafizə orqanları qiymət verməyə borcludur.
M. Pirhəsənli
P. S. Bir neçə gün qabaq xəstə ağır ürək əməliyyatı keçirib. 7 saylı poliklinikanın kardioloqu Jalə xanım əməliyyatdan sonra epikrizi forma 88-ə əlavə edəcəyini deyib, amma baş həkimə imzalatmağa gedəndən sonra xəstəyə bildirib ki, əməliyyata əlillik düşmür. İndi özünüz deyin, bunlara həkim demək olar, yoxsa qəssab?
Məğrur Bədəlli
Teref.az
"Xudat Balıq” ASC-də qaranlıq əməlləri, Əhəd Purun yaxın dostu, qardaşının İranla sıx əlaqəsi...
Bir neçə gün öncə Sumqayıt Apellyasiya Məhkəməsinin hakimi Şəmsəddin Abbasovun iranlı iş adamı Əhəd Purla yaxın dost olması barədə mətbuatda ilginc məlumat yayıldı. Həmin xəbərdə bildirilirdi ki, Şəmsəddin Ababsovun "Xudat Balıq" ASC-nin özəlləşdirilməsi zamanı etdiyi "qəhrəmanlıq" onun Əhəd Purla yaxın dost olmasına şərait yaradıb.
Sumqayıt Apellyasiya Məhkəməsinin hakimi Şəmsəddin Abbasovla bağlı apardığımız kiçik araşdırmada isə maraqlı məlumatlara rast gəldik.
AzFakt.com-un əldə etdiyi məlumata görə Şəmsəddin Abbasov bacısı oğlunun vasitəsi ilə avtomobil mühərriklərinin ehtiyyat hissələrinin təmiri sexi yaradıb. Avtomobil mühərriklərinin təmiri işi kiçik bir biznes sahəsi təsərrüatı yaratsa da, əslində çox ciddi gəlirli bir sahədir. Hər il dövlət və özəl şirkətlər avtomobillərinin təmiri üçün milyonlarla manat vəsait xərcləyirlər. Məhz bu sistemdə milyonlarla manat vəsaitin dövr etdiyini yaxşı bilən Şəmsəddin Abbasov vəzifə səlahiyyətindən sui-istifadə edərək dövlət qurumlarının və böyük şirkətlərin rəhbərləri ilə müxtəlif vasitələrlə əlaqəyə keçərək, təmir işlərini yaratdığı sexə verilməsini təşkil etdirir.
Qeyd edək ki, Şəmsədin Abbasova məxsus olan avtomobillərin təmiri sexinin hazırda Masazır qəsəbəsində, DYP rəisi Ramiz Zeynalova məxsus olduğu deyilən Moped.az şirkətinin ərazisində fəaliyyət göstərdiyi bildirilir.
Aldığımız digər məlumata görə Şəmsəddin Abbasovun təmir sexi işlədən bacısı oğlu həm də Masazır qəsəbəsi ərazisində torpaq sahələrini zəbt edərək, satışı ilə də məşğuldur. Belə ki, bacıoğlu dayısının himayədarlığı ilə Masazır qəsəbəsində torpaq sahələrini zəbt edir, heç bir sənədi olmadan evlər tikərək satır.
Qeyd edək ki, Sumqayıt şəhər Apellyasiya Məhkəməsinin hakimi Şəmsəddin Abbasovun adı ölkə mətbuatına yad isim deyil. Onun adı bir neçə il öncə “Xudat Balıq” ASC-nin iş adamı Güləhməd Güləhmədovun əlindən alınması məsələsində hallanıb.
Həmin vaxt iş adamı Güləhməd Güləhmədov hakim Şəmsəddin Abbasovun cinayətləri barədə ədliyyə naziri Fikrət Məmmədova müraciət etmişdi.
Bundan başqa Şəmsəddin Abbasovun bizneslə məşğul olan qardaşının tez-tez İrana gedib-gəldiyi və bu ölkə ilə sıx əlaqədə olduğu deyilir.