 |
|
|
Xəbər verdiyimiz kimi, Azərbaycan Auditorlar Palatasının üç sabiq əməkdaşı cinayət məsuliyyətinə cəlb edilib.
Belə ki, maliyyə və texniki təminat İdarəsinin sabiq rəisi, baş mühasib Vəli Rəhimov, maliyyə təminatı və xarici əlaqələr idarəsinin maliyyəçi-mühasibi Gövhər Əhmədova və Palatanın digər auditoru Fəridə Novruzova xüsusilə külli miqdarda mənimsəmədə ittiham olunurlar.
İlkin məlumata əsasən, mənimsənilən məbləğ 1 milyon manatdan çoxdur.
Təqsirləndirilərən şəxslərə qarşı Cinayət Məcəlləsinin 179.4-cü (xüsusilə külli miqdarda mənimsəmə) maddəsi ilə ittiham irəli sürülüb.
Bildirilir ki, 58 yaşlı Vəli Rəhimov ötən ay vəzifəsindən azad edilmişdi.
AzToday.az-a daxil olan məlumata görə, Auditorlar Palatasının üç sabiq əməkdaşının həbs olunmasında kifayət qədər ziddiyyətli məqamlar var. Məlumatda bildirilir ki, Vəli Rəhimov palatada baş verən korrupsiya faktları ilə bağlı hüquq-mühafizə orqanlarına etdiyi şikayətdən sonra həbs olunub. Belə ki, Auditorlar Palatasının sədri Vahid Novruzov Vəli Rəhimovun verdiyi korrupsiya hesabatından xəbər tutan kimi onu həbs etdirib. Vahid Novruzov onunla bərabər qohumları Gövhər Əhmədova və Fəridə Novruzovanı da cinayət məsuliyyətinə cəlb edib. İlkin ehtimallara görə, Vahid Novruzov bu addımı Vəli Rəhimovun zərərsizləşdirilməsi üçün həyata keçirib.
Məlumatda bildirilir ki, Vəli Rəhimov palatada dürüst işləyən şəxslərdən biri olub. Hətta oğlunun son 44 günlük Vətən Müharibəsində şəhid olduğu deyilir.
Auditorlar Palatasında baş verən korrusiya faktları ilə bağlı redaksiyamıza daxil olan məlumatları araşdırmaqda davam edirik. Qarşı tərəfin də fikirlərini dərc etməyə hazırıq.
Qazaxın icra başçısı Rəcəb Babaşov 7 ildir ki, rayonu bərbad günə salıb. Tribunainfo.az yazır ki, onun vəzifəsindən azad edilməsinə hazırlıq gedir. Çünki Qazaxda idarəetmə ölkə rəhbərliyini qane etmir. Rəcəb Babaşovun yerinə kimin təyin olunacağı barədə seçim edilir, yalnız o dəqiqdir ki, hazırkı başçı postunda çox işləməyəcək. Babaşov isə ciddi şəkildə narahatdır. Məlumatlar var ki, birinci müavini Məmməd Aliyevlə arasında qarşıdurma yaranıb. Belə ki, müavinin gah oğluna 120 min dollarlıq “Land Cruiser” alması, gah bələdiyyə sədri olan bacısı oğluna Rayon Mərkəzi Xəstəxanasında ikinci vəzifə verdirməsi başçısını hövsələdən çıxarıb. Bu da tərəflər arasında gərginliyə səbəb olub. Əslində isə Babaşov vəzifəsini itirəcəyi təşvişinə görə hirsini Alıyevi danlamaqla çıxıb. Onun oğlu Elşən Babaşov müharibədən əvvəl şəhərdə 10-LL-077 dövlət nömrəsi ilə fırlanırdı. Müharibədən sonra isə bu yaxınlarda özünə yeni “zerkalnı” və qiyməti 100-200 min manat olan 77-LL-077 nömrəsi alıb. 10-LL-077 nömrəsini bəyənmədi, çünki “zerkalnı” sayılmır, ona görə 77-LL-077 aldı ki, hamı baxıb “paxıllıq” etsin. Qarşı tərəfin mövqeyini dərc etməyə hazırıq. Yeni məlumatlar araşdırıb təqdim edəcəyik.
Dövlətin səhiyyə siyasəti TƏBİB üzərində qurulub. Necə ki sosial layihə ASAN Xidmətdir, ictimai nəqliyyat Baku bus sayılır, tibb sektoru da bu brendlə piar edilir. Lakin Vüqar Qurbanovun icraçı direktor təyin olunması bu layihəni batırmaqdadır. Tribunainfo.az xəbər verir ki, Vüqar Qurbanov “üstü bəzək, altı təzək” idarəetməsi yaradıb. Kənardan yaxşı görünsə də, mahiyyəti sabun köpüyüdür. Bu azmış kimi, Qurbanov yaxınlarını müxtəlif vəzifələrə yerləşdirib.
Bir müddət əvvəl deputat Qüdrət Həsənquliyev demişdi ki, TƏBİB yaradıldı, amma o da özünü doğrultmadı: “Bu sahədə ikili rəhbərlik mövcuddur. Niyə səhiyyədə olan şəxslər özlərində güc tapıb Cənab Prezidentə məruzə eləmirlər ki, bu bizim bacardığımız iş deyil. Bizə məsləhətlər lazımdır, xaricdən bu sahəni bilən güclü mütəxəssislərin dəvət olunmasına ehtiyac var. Yəni burada utanılası bir şey yoxdur. Xaricdən mütəxəssislər dəvət olunmalıdır və bu sahə qurulmaldır. Bu sahədə bizə kömək lazımdır. Hesab edirəm ki, hələ uzun illər bu cür davam edəcəyi təqdirdə nöqsanlar qalacaq. İslahatlar zamanı bəzən uğursuz qərarlar da olur. Hesab edirəm ki, uğursuz qərarlardan biri TƏBİB-in yaradılması olub”. Qarşı tərəfi dinləməyə hazırıq.
Yardımlı rayonunun Dağüzü kəndinin meşələrində kütləvi soyqırım aparılıb. Həmin meşə Yardımlı rayonunun Çayüzü meşəsinin 3 saylı ərazisi adlanır. Bu yaşıl terrordan Regional Meşə İdarəsinin və Lənkəran Regional Ekologiya İdarəsinin xəbərdar olsada bu qanunsuzluğun qarşısını almırlar. Çünki həmin meşədən külli miqdarda gəlir əldə edirlər. Ona görə də həmin meşədə yoxlama aparılmasına imkan vermirlər. Həmin meşədə əgər ərazi tam olaraq və doğru-düzgün yoxlama aparılarsa minlərlə qanunsuz kəsilmiş ağaclar aşkar olunacaq. Həmin meşədə çəkilmiş yaşıl soyqırımın faktlarını Sizə təqdim edirik. Xahiş edirik Yardımlı rayonunun yeganə təbii sərvəti olan meşələrini xilas olunmasına köməklik edəsiniz.
Yardimli ekofeallari
Teref. Xocanın bloqu
Səhifəmiz hamının üzünə açıqdır.
Zaman-zaman Milli Məclisdə təmsil olunan deputatlarn susqunluğu haqda yazılıb, deyilib. Deputat mandatının bəziləri üçün sadəcə biznesini qorumaq vasitəsi olması artıq sirr deyil. O da təsadüfi deyil ki, ölkənin müxtəlif sahələrində ən böyük iş adamlarının əksəriyyəti parlamentdə təmsil olunur. Onlardan biri də tikinti sahəsində hədsiz böyük paya malik olan deputat Ağalar Vəliyevdir.
Onun rəhbərlik etdiyi (rəsmi formada olmasa da) “Kristal Abşeron” şirkəti ölkənin müxtəlif regionlarında, xüsusilə paytaxt Bakıda böyük layihələr icra etməklə yanaşı, dövlət səviyyəsində gerçəkləşdirilən irimiqyaslı proqramlarda da iştirak edir. Bunların sırasına qaçqın və məcburi köçkünlər, şəhid ailələri və qazilər üçün tikilən binaları, fərdi mənzilləri daxil etmək olar. Yəni haqqında danışdığımız adam ölkənin tikinti sahəsində hədsiz böyük paya sahib olan bir şirkətin sahibidir.
Bütün bunlara baxmayaraq, A.Vəliyevin adı hər zaman susqun deputatların siyahısında olub. “Susqun deputatlar” dedikdə , sayı sizə az gəlməsin, parlamentin, demək olar ki, yarısı bu kateqoriyaya aiddir.
Ağalar Vəliyev isə bunların içərisində xüsusilə seçilir. “Qəhrəmanımız” 2020-ci ilin fevralında özünü buraxan parlamentin yerinə keçirilən növbədənkənar seçkilərdə 7 saylı Goranboy-Ağdam- Tərtər seçki dairəsindən “seçilib”. Buna qədər isə o, parlamentdə 11 saylı Qaradağ Seçki Dairəsini təmsil edib. 2020-ci ilin fevral ayından bəri Milli Məclisin meclis.gov.az saytında yerləşdirilən stenoqramlarda A.Vəliyevin yalnız bir çıxışı var: 09.04.2020 – tarixində keçirilən iclasda o, 2019-cu il üzrə dövlət büdcəsinin icrasına dair çıxış edərək mövzu ilə bağlı uzun bir mədhiyyə səsləndirilib. Vəssalam!
Bu yerdə xatırlatmaq yerinə düşər ki, “Azərbaycan Respublikası Milli Məclisi deputatının statusu haqqında” qanunun 9-du maddəsinə görə, MM deputatının qanunvericilik təşəbbüsü hüququ var. Ən azı bu hüquqdan istifadə edən deputat müzakirələrdə iştirak edə, müəyyən çıxışlar edə bilər. Belə ki, həmin maddədə bildirilir ki, deputat qanunvericilik təşəbbüsü hüququnu aşağıdakı formalarda həyata keçirir:
yeni qanun və ya qərar layihəsinin qəbul olunmasını təklif edə bilər;
qüvvədə olan qanuna və ya qərara dəyişikliklər edilməsi haqqında layihə təklif edə bilər;
qüvvədə olan qanunun və ya qərarın ləğv edilməsi haqqında layihə təklif edə bilər;
Azərbaycan Respublikasının Milli Məclisində baxılan qanun və qərar layihələrinə dəyişikliklər edilməsi haqqında təkliflər irəli sürə bilər.
Göründüyü kimi, Milli Məclisdə təmsil olunan hər bir deputatın danışması, çıxış etməsi üçün xeyli səbəb və yaxşı şərait var. Eyni zamanda deputatlar seçicilərini narahat edən məsələlərlə bağlı parlamentdə məsələ qaldıra bilərlər. Lakin bunun üçün görünür həqiqətən də seçicilərin səsini təmsil etmək lazımdır. Hansı ki, biz bir neçə deputatın timsalında bunu görürük. “Bizim deputat” isə necə deyərlər, “az aşım, ağrımaz başım” prinsipi ilə susmağa, səsini çıxarıb gündəmə gəlməməyə üstünlük verir.
Ağalar Vəliyevin stenoqramlar siyahısında qarşımıza çıxan yeganə çıxışından bir parçanı təqdim edirik: “Hörmətli Sədr, hörmətli cənab Baş nazir, hörmətli deputatlar və hökümət üzvləri! Çağdaş tarixinin ən qüdrətli dövrünü yaşayan ölkəmiz üçün ötən 2019-cu il müasir həyatımızın bütün sahələrində qazanılan yüksək nailiyyətlərlə və uğurla gerçəkləşdirilən irimiqyaslı köklü islahatlarla əlamətdar olmuşdur. Müzakirəmizə təqdim olunan, zəngin strukturu, analitik informasiyaları və məzmunlu təhlilləri ilə seçilən Nazirlər Kabinetinin hesabatı, zənnimcə, yüksək peşəkarlıqla mükəmməl hazırlanmışdır...”
Əslində uzun çıxışdır, biz sadəcə girişini təqdim etdik: haqq etmədiyi kürsüdə oturan hər kəs belə bəlağətli danışar yəqin ki...
P.S. Ağalar Vəliyevin MM-in komitə iclaslarındakı fəaliyyəti ilə bağlı məlumatlı olmadığımız üçün yuxarıda yazılanların plenar iclaslara aid olduğunu xüsusi qeyd etməyi lazım bildik.
AFN.az
Və özünü xalqın qarşısında borcu saymayan deputat
Ölkənin ucqar dağlıq rayonu olan Lerikdən şikayətlər səngimir.
Sakinlər 7GÜN XƏBƏR-ə deyiblər ki, icra başçısı rayonu tamamilə maliyyə idarəsinin müdiri Hafiz İmanovun nəzarətinə verib.
Rayonu faktiki idarəedən klan İmanovlardır. Hətta vəziyyət o həddə çatıb ki, dövlətin və özəl sektorun gördüyü bütün işlərə İmanovlar əl qoyur.
Bu yaxınlarda Kiçik və Orta Biznesin İnkişafı Agentliyinin (KOBİA) strukturuna daxil olan KOB İnkişaf Mərkəzinin (KOBİM) Lerikdə açılan filialına da İmanovların adamı əl qoyub.
Sakinlərin dediyinə görə, KOB-un rəhbərliyinə Hafizin İmanovun qardaşının kürəkəni Rahil Nəsibəli oğlu Məmmədov gətirilib.
Leiklilər bunu icra başçısı Əkbər Abbasovun İmanovlara "Yeni il hədiyyəsi" kimi xarakterizə ediblər.
"Görəsən, rayonda nüfuzsuz İmanovlar bu təcrübəsiz və bacarıqsız icra başçısını bu gedişlə hara aparırlar? Bəs Lerikin bütün idarəetmə və nəzarətini İmanovlara etibar edən icra başçısı öz vəzifəsinin məsuliyyətini anlayırmı?", - deyə sakinlər sual edirlər.
Lerikdən gələn digər bir xəbər isə Milli Məclisin deputatı İqbal Məmmədovla bağlıdır.
Sakinlər deyirlər ki, uzun müddətdən sonra, nəhayət, deputatın ayağı Lerik rayonuna dəyib. Bildirilir ki, icra başçısı Əkbər Abbasov rayon ictimaiyyəti ilə görüşünə İqbal Məmmədov da qatılıb. Amma bu görüş İqbal Məmmədov üçün heç də ürəkaçan olmayıb. Çünki onun fəaliyyəti əhalinin etirazı ilə qarşılanıb.
Rayon sakini Əlfiağa adlı şəxs iclasda deputatı açıq tənqid edib.
O, İqbal Məmmədovu tərəfkeşlik və ayrı-seçkilikdə günahlandırıb. Sakin deyib ki, deputat rayonu da zonalara bölüb və öz zonasına daha çox diqqət ayırır.
"Rayonu zonalara bölüb şovinistlik edən qərəzli adamsan. İndiyə kimi ancaq öz kəndin, öz zonan və qohumların üçün işləyən bir şovinistsən. Biz səni bir deputat kimi tanımırıq", - deyə sakin deputatı sərt tənqid edib.
Lerik sakinləri deyirlər ki, onlar faktiki köməksiz qalıblar, nə icra başçısı işinin öhdəsindən gələ bilir, nə də deputat onların səsini eşidir. Bir sözlə, Lerik Allahın və İmanovların ümidinə buraxılan bir rayona çevrilib.
Mənbə:7gun.org
“Yaşadığı rayon məktəblərində boş müəllim yerinə ehtiyac varkən mənim oğlum nəyə görə rayondan 65-70 km uzaq məsafədəki Talış kəndində işləməlidir?!”
Goranboy rayon sakini, Vüqar Bayramov küçəsi, ev 43 sakini Nəbiyev Mehman Aslan oğlu tərəfindən “Hürriyyət”in redaksiyasına şikayət məktubu daxil olub. Saytımız vasitəsilə Prezident İlham Əliyevə, Baş prokuror Kamran Əliyevə, Daxili İşlər naziri Vilayət Eyvazova və Elm və Təhsil naziri Emin Əmrullayevə müraciət edən şikayətçinin məktubunu olduğu kimi dərc edirik:
“Cənab Prezident!
Yazıb Sizə bildirirəm ki, mən Nəbiyev Mehman Aslan oğlu 1959-cu ildə Goranboy rayonunda anadan olmuşam. Əslən Goranboyluyam. Hal-hazırda Goranboy rayonunda yaşayıram. Polis təqaüdçüsüyəm, mühaaribə veteranıyam. 1998-ci ildə YAP həqiqi üzvüyəm. Ailəliyəm. Həyat yoldaşım tibb bacısı işləyir. Hal-hazırda iki oğul övladımız var. Kiçik oğlum Kamran N saylı hərbi hissədə xidməti borcunu bitirib təxris olunduqdan sonra öz istək və arzusu ilə yenidən müddətdən artıq xidmətini davam etdirdi. Əfsuslar olsun ki, bir neçə ildən sonra hərbi xidməti zamanı sağlamlığını itirdi. Azərbaycan Respublikasının Müdafiə Nazirliyi tərəfindən II qrup əlillik dərəcəsi ilə təqaüdə çıxdı. Hal-hazırda Goranboy rayonu Mənzil Komunal İdarəsində bağban vəzifəsində işləyir. Ailəlidir.
Böyük oğlum Mehmanlı Arzu Sərhəd Qoşunlarında hərbi xidmət borcunu yüksək səviyyədə və layiqincə bitirib ordu sıralarından təxris olunduqdan sonra Azərbaycan Dövlət Pedaqoji Universitetinə Tarix fakultəsinə qəbul olmuş və oxuyub bitirmişdir. Bu il yenidən müəllim işləmək üçün imtahan verərək 75 bal toplamış və yaşadığı Goranboy rayonundan 65-70 km aralıda yerləşən Tərtər rayon Talış kəndində tarix müəllimi vəzifəsinə təyin olunmuş, hal-hazırda Talış kənd məktəbində Tarix müəllimi vəzifəsində işləyir. Tərtər rayonunda kirə ev tutub yaşayır.
Cənab Prezident!
Yazmaqda məqsədim odur ki, hal-hazırda Goranboy rayonunun mərkəzində yerləşən 1 nömrəli və 2 nömrəli böyük həcmdə olan orta məktəbdə bu il hər iki məktəbdə tarix müəllimi təqaüdə çıxdı və Goranboy rayon kəndlərindən keçən il və bu il təqaüdə çıxanlar oldu. Əfsuslar olsun ki, Təhsil şöbəsi müdiri ilə məktəb direktorları boş iş yerlərini gizlədərək əlbir olub, xalqdan və dövlətdən gizlədərək boş iş yerlərini hərraca çıxarıb satırlar. İkinci tura çıxarıb müqavilə yolu ilə öz yaxın qohum-tanışlarını yenidən müqavilə bağlayaraq işlə təmin edirlər. Mənim oğlum isə nəyə görə 75 bal toplayaraq yaşadığı rayon məktəblərində boş müəllim yerinə ehtiyac varkən yaşadığı rayondan 65-70 km uzaq məsafədə Talış kəndində işləməlidir?! 1-ci turda bal toplaya bilməyən 2-ci turda müqavilə yolu ilə işə qəbul olunur. Savadsız müəllimlər gələcək gənc nəsilə oğlan və qızlara hansı bir savad verib öyrədəcəklər. Valideynlər nəyə görə orta məktəb uşaqlarını təqaüdə çıxmıəş yaşlı savadlı müəllimlər evlərində uşaq hazırlayırlar. Hər fənn üzrə 50 manatdan. Çünki, savadlı gənc müəllimlər yoxdur. Olan da rayon mərkəzlərindən uzaqlaşdırılır.
Dəfələrlə imtahanlar başlamamışdan əvvəl Goranboy rayonu Təhsil şöbəsi müdiri və məktəb direktoru ilə görüşdüm. Mənə söz verdilər ki, vakansiyanı boş yer verəcəyik, oğlun yaxşı hazırlaşsın, yüksək bal toplasın, narahat olma. Əfsuslar olsun ki, məni aldatdılar.
Cənab Prezident!
1988-1994-cü ilə kimi torpaqlarımızın ərazi bütövlüyü uğrunda gedən döyüşlərdə iştirak etmişəm. yaxın iş yoldaşlarım, dostlarım, tələbə yoldaşlarım gözümün önündə vətən uğrunda şəhid oldular. Hətta Azərbaycan ordusu yanmamışdır. Bəzi üzdən iraq ev oğruları, heyvan oğruları, narkomanlar könüllü batalyona xalq cəbhəsi əli ilə əllərinə silah alıb oğurluq edirlər. Hansı ki, keçmiş Şaumyan kənd rayonunda yaşayan ermənilərə, qonşu olan Goranboy rayon yaxın kəndlərdən sakinlər evlərini qoyub qaçmışlar. Goranboy rayon Polisləri bəzi üzdən iraq özlərini vətənpərvər göstərən əli silahlı ev, heyvan oğrularına və əli silahlı ermənilərlə mübarizə aparırdıq.
Cənab Prezident!
Bir neçə il əvvəl Goranboy rayon təhsil şöbəsi müdiri və 2 məktəb direktoru, təhsil şöbəsinin bir neçə əməkdaşı rüşvət üsdündə həbs olundular. Uzun illər həbsdə yatdılar. Hal-hazırda Goranboy rayonu təhsil şöbəsi müdiri ilə məktəb direktorları, bəzi yüksək vəzifəli məmurlar yenə də haqsızlıqdan rüşvətdən əl çəkmirlər harınlamış məmurlar.
Cənab Prezident!
Sizin dəmir yumruğunuzu görmək istəyirlər. Mən polis təqaüdçüsünün min bir əziyyətimlə Bakıda dörd (4) il kirayə ev tutub uşaq oxutması nə deməkdir! Mən müharibə zamanı aldığım ağır travmadan sonra nevroz xəstəsiyəm. Həyat yoldaşım isə həyacan və stresdən, qorxudan şəkər xəstəsidir. İkinci oğlum isə hərbi xidməti zamanı sağlamlığını itirən II qrup əlildir.
Mən, Goranboy təhsilindən və 1 saylı məktəb direktorundan şikayətçiyəm. Vakand yerləri hərraca qoyub satırlar, mənim oğlum 75 bal toplayıb amma Goranboyda ona iş vermirlər. Tərtərin Talış kəndində müəllim işləyir. Yoxlanış olsa görünər ki, müqaviləynən öz qohumlarını işlədirlər.
Sizdən ailəmiz adından xahiş edirik ki, oğlum Mehmanlı Arzu Goranboy rayon məktəbində işlə təmin olunmasına köməklik edəsiniz.
Cənab Prezident!
Sizə ailəmiz adından uzun ömür can sağlığı arzulayırıq”.
Hurriyyet.az
Redaksiyadan: Qarşı tərəfin mövqeyini dərc etməyə hazırıq.
TehsilMedia.az xəbər verir ki, Turantv.az saytın elektron poçt ünvanına ADPU-nun Cəlilabad filalı haqqında şok effekti verən məlumat daxil olmuşdur. Sözügedən həmin məlumatı sizlərə təqdim edirik:
“Son vaxtlar ADPU Cəlilabad filialında baş verən qanunsuzluqlardan tez-tez söhbət düşür. Əslində, filialın direktoru Xudayar Sultanlının sultanlığı kimi tanınan ADPU Cəlilabad filialı dövlət orqanlarının nəzarətindən çıxmış və şəxsi məqsədlərə xidmət edən bir müəssisəyə çevrilmişdir. Bunun başlıca səbəbi filialın rəhbər kadrlarının uzun müddət vəzifə kreslolarında oturması ilə bağlıdır. Filial direktor Xudayar Sultanlının, dekan Mənzilə Rəhimovanın və keçmiş direktor müavini, indisə şöbə müdiri işləyən Eyvaz Məmmədovun şəxsi mülkiyyəti sayılır. Bəs görəsən, filialda nə baş verir? ADPU-nun rektoru Cəfər Cəfərov Cəlilabad filialında baş verən qanunsuzluqlara niyə göz yumur?
Mənbə bildirir ki, Cəlilabad rayonunda yerləşən və Azərbaycan Dövlət Pedaqoji Universitetinin Cəlilabad Filialının dekanı Mənzilə Rəhimovaya məxsus “Paradoks” tədris və inkişaf mərkəzi işçiləri (əslində ADPU Cəlilabad Filialının tələbələrini) əmək müqaviləsi (konraktı) bağlamadan işə cəlb edir, tələbələri dərslərindən ayıraraq, onlara məşğələ və təlimlər keçirilməsi ilə məşğul olur. Mənzilə Rəhimova dekan işlədiyi Filialın tələbələrini icbari şəkildə “Paradoks” şirkətinə pul köçürməyə məcbur edir. Narazılıq edən tələbələri ADPU Cəlilabad Filialından qovulacağı ilə hədələyir.
Dövlət orqanlarının, hüquq-mühafizə təşkilatlarının, ADPU rəhbərliyinin Mənzilə Rəhimovanın bu qanunsuz biznes fəaliyyətindən xəbəri yoxdur. İyirmi ilə yaxın ADPU Cəlilabad filialında pedaqoji fakültənin dekanı işləyən Mənzilə Rəhimovanın heç bir elmi dərəcəsi yoxdur, elmə və tədrisə dair kitabları da nəşr olunmayıb. Onu bu vəzifəyə yaxın qohumu, elmi dərəcəsi olmadan uzun müddət ADPU Cəlilabad filialının direktor müavini işləmiş Eyvaz Məmmədov gətirmişdir. Aqronom təhsili olan Eyvaz Məmmədov bu vəzifədən azad edilsə də, filialın şöbələrindən birinə rəhbərlik edir.
Böyük yazıçı C.Məmmədquluzadənin məşhur əsərinin prototipi olan(Xudayar bəy) Filialın direktoru Xudayar Sultanlı da aqronom təhsillidir. Buna görə də tələbələri kolxoz briqadiri kimi idarə edir, dekan Mənzilə Rəhimovanın tələbələrin çiynində qurduğu biznes fəaliyyətinə bilərəkdən göz yumur.
Mənzilə xanımın rəhbərlik etdiyi “Paradoks” tədris və inkişaf mərkəzi, yəni şirkəti işçilərə verilən əmək haqqının məbləğini dövlətdən gizlədir, vergilərdən yayınır, qanunsuz olaraq əldə etdiyi gəlir haqqında vergi orqanlarını məlumatlandırmır. Nəticədə, “Paradoks” və onun rəhbəri Mənzilə Rəhimova AR Cinayət Məcəlləsinin 162-1 (əmək müqaviləsi kontraktı hüquqi qüvvəyə minmədən işçilərin hər hansı işlərin və xidmətlərin yerinə yetirilməsinə cəlb edilməsi) maddəsinin tələblərini pozur, cinayət törədir. Mənzilənin ikinci cinayəti isə dekan işlədiyi ADPU Cəlilabad filialında tələbələri öz gəliri məqsədilə dərslərdən yayındırması və vəzifə saxtakarlığı (AR CM-nin 313-cü maddəsi) törətməsi ilə bağlıdır.
ADPU Cəlilabad Filialının tələbələrinin narazılığını dinləyən yoxdur, Pedaqoji Universitet rəhbərliyinin bu işə biganə yanaşması isə baş verən cinayətə göz yummaq deməkdir. Pedaqoji fakültənin dekanı Mənzilə Rəhimovanın cinayət əməllərinə rəvac verən direktor Xudayar Sultanlı da əslində bu cinayət əməllərinin iştirakçısıdır.
Belə ki, Hədəf kurslarının buraxılış sınaq imtahanları Cəlilabad, Yardımlı, Masallı və Biləsuvar rayonlarının şagirdlərini əhatə edir və kifayət qədər maddi balans toplayır. Bu sınaq imtahanlarının ADPU Cəlilabad filialında keçirilməsinin isə həmin filiala bir qəpik xeyiri yoxdur, gəlirlər dekanın şəxsi büdcəsini möhkəmlədir. Bundan başqa, Mənzilə Rəhimovanın özəl şirkəti olan “Paradoks” TİM summativ sınaq imtahanlarını ADPU Cəlilabad filialının auditoriyalarından istifadə etməklə keçirir. ADPU Cəlilabad filialının direktoru Xudayar Sultanlının bu cür qanunsuz əməllərə şərait yaratması isə onun “Paradoks”un gəlirlərinə şərik olması ilə bağlıdır.
“Paradoks” təlim və inkişaf mərkəzinin gəlir və fəaliyyət sahələri:
1) Hədəf kurslarının 2,3,4,5,6,7,8,9,10 və 11-ci sinif şagirdləri üçün BLOK sınaq imtahanlarının ADPU Cəlilabad filialının auditoriyalarında ödənişli təşkili;
2) Summativ sınaq imtahanlarının keçirilməsi (ödənişli);
3) Kompüter dərsləri (bir aylıq ödəniş 25 manat olmaqla);
4) Ali məktəblərə hazırlıq dərsləri (repitisiya, ödənişli, bir fənn üçün aylıq ödəniş 30 manat olmaqla);
5) Rəsm dərsləri (ödənişli, dərsləri ADPU Cəlilabad filialının müəllimi Musa Əmiraslanov aparır);
6) Skripka dərsləri (ödənişli, müddəti 6 ay);
7) Əlyazma yazıların elektron variantının hazırlanması (bir səhifə üçün 0,70 manat olmaqla).
“Paradoks” TİM kursların və təlimlərin iştirakçılarına diplomlar və sertifikatlar verir ki, bu sənədlərin qanuni hüququ yoxdur. Belə sənədlər vermək üçün müvafiq dövlət orqanlarından rəsmi razılıq alınmalıdır. Diplomlar və sertifikatlar ADPU Cəlilabad filialının dekanı, “Paradoks” TİM-in rəhbəri Mənzilə Rəhimova tərəfindən imzalanır və möhürlənir.
İnanırıq ki, bu məsələlər ictimailəşəndən sonra ADPU Cəlilabad filialında pedaqoji fakültənin dekanı Mənzilə Rəhimovanın qanunsuz biznes fəaliyyəti ilə bağlı bu biabırçı cinayət əməllərinə son qoyulacaq və bu barədə ciddi tədbirlər görüləcək.
Redaksiya olaraq qarşı tərəfin də mövqeyini dərc etməyə hazırıq.
turantv.az
Binəqədi rayonu Süleyman Sani Axundov küçəsindəki (“Dərnəgül” metro stansiyası yaxınlığı) yaşıllıq sahəsində tikinti işlərinə başlanılıb.
AzFakt.com-un məlumatına görə, bununla bağlı sosial şəbəkələrdə fotolar paylaşılıb.
Qeyd edək ki, həmin yaşıllıq ərazinin bir müddət əvvəl metal torla hasarlandığı, ağacların bir qisminin məhv kəsildiyi deyilir.
Bildirilir ki, bu yaşıllıq sahəsi adı çəkilən küçədə tikinti obyektləri olmayan son ərazi idi.
Asif Lətifov: “Xırdalan şəhərində məhkəmə qərarlarına məhəl qoyulmur”
Abşeron rayonu, Xırdalan şəhəri, 27-ci məhəllə, bina 2B, mənzil 40-da yaşayan, ehtiyatda olan zabit Lətifov Asif Aydın oğlu tərəfindən “Hürriyyət” qəzetinin redaksiyasına şikayət məktubu daxil olub. Qəzetimiz vasitəsilə Prezident İlham Əliyevə, Ədliyyə naziri Fikrət Məmmədova, Prezidentin Təhlükəsizlik Xidmətinin rəisi Bəylər Əyyubova və Baş Prokuror yanında Korrupsiyaya qarşı Mübarizə Baş İdarəsinə müraciət edən şikayətçinin məktubunu olduğu kimi dərc edirik:
“Hörmətli Prezident!
Mən 17 il Prezidentin Təhlükəsizlik Xidmətinin “Beta” dəstəsində zabit rütbəsində xidmət etmişəm. Yaşadığım Xırdalan şəhərində mənim və ailə üzvlərimin hüquqları Abşeron Rayon İcra Hakimiyyəti tərəfindən kobud surətdə pozulur. Abşeron Rayon Məhkəməsinin və Ali Məhkəmənin qərarının qüvvəyə minməsi əsasında yaşadığım mənzilin arxasındakı - mətbəx pəncərəmin qarşısını tutan qanunsuz tikili 31.10.2023-cü ildə Abşeron rayon İcra və probasiya şöbəsinin əməkdaşları tərəfindən sökülüb və akt tərtib edilib. Buna baxmayaraq 20.12.2023-cü ildə həmən yerdə növbəti tikinti işlərinin aparılmasına start verilib.
Məhkəmə qərarını İcra Hakimiyyətinin Hüquq şöbəsinin müdiri Rəşad Qubadova, Baş memar və ordakı diğər məsul şəxslərə göstərsəm də, məhəl qoyan yoxdur. Bizi adam yerinə qoymurlar, çevrə boyu qaçmağa və gözləməyə məcbur edirlər. Bu, artıq sözün bitdiyi yerdir. Məgər məhkəmə qərarından da yüksək qərar var?
Cənab Prezident!
Sizdən xahiş edirəm, keçmiş xidmətlərimi nəzərə alaraq mənə köməklik göstərəsiniz, tapdanmış hüquqlarımı bərpa edib, tikinti işlərinin aparılmamasına göstəriş verəsiniz.
Görəsən, Abşeron rayon Mənzil İstismar idarələri və icra nümayəndələrinin işlərinə nəzarət edən bir qurum var, ya yox? Dəfələrlə şikayət etsək də, arxa eyvanımın 6 metrliyində, 3 metr enində və uzununda dəmir çərçivə vurulub. 2 saylı “JEK”dən bildirirlər ki, bunu orada balış çırpmaq üçün 16-cı mənzilin sahibi düzəltdirib. Gülməli deyilmi?! Məgər, balış çırpmağa 3 metr eni və 3 metr uzununda dəmir “reşotka”lı çərçivə lazımdır? Və bu, gərək mənim eyvanımın qabağına vurulsun, sementlə də bərkidilsin? Bəs, İcra Hakimiyyəti bu özbaşınalığı görmür? Dəfələrlə məlumat vermişəm, amma heç bir nəticə yoxdur. Mənim avtomobil qarajımı qəsdən sökdürüb, diğər qarajları nəyinsə qarşılığında saxlatdıran məmurlara nə ad vermək olar?! İcra Hakimiyyəti görmür ki, məhkəmə qərarı ilə sökülmüş obyektin torpaq qatına kimi sökülmüş sahəsinə sementlə “setka” çəkililb?! Bunları görməmək mümkün deyil, axı. Deməli, Xırdalan şəhərində məhkəmə qərarlarına məhəl qoyulmur. DİN-in 102 xidmətinə zəng vurub bu hadisəni danışmışam, onlardan da xəbər yoxdur.
Göndərdiyim şəkillərin hər biri 23.12.2023-cü ildə çəkilib, yəni yenidir. “Şanxay evləri”ni tikib, sənədsiz-sübütsuz satıblar. İnsan həyatı üçün təhlükəli olan bu sənədsiz evləri kirayəyə verirlər. Hansısa bu evin birində partlayış olsa, hər kəs zərər görəcək. Bəs, bu evlərin tikilməsində kimlər və niyə maraqlıdır? 2 saylı “JEK”-in rəhbərliyi yolu qanunsuz şəkildə bağlayıb. Zibilliklər təmizlənmir, amma gündə bir qadını binalara göndərirlər, təmizlik üçün pul yığılır. “JEK”, İcra hakimiyyəti və Xırdalan şəhərinin başı memarı bunlara məhəl qoymur, sanki eşitmirlər.
Qanunsuz tikililərdə dəfələrlə partlayışlar olub. Bir neçə il bundan qabaq 27-ci məhlə, 1B saylı binanın qarşısındakı qanunsuz tikilidə partlayış baş vermiş, nəticədə insan tələfatı olmuşdu. Gərək bu hal təkrar ola?!
Hansı problemdən yazım, artıq bilmirəm. Bir sözlə, Xırdalanda məhkəmə qərarları işləmir və qanunlar rəhbər tutulmur. Binanın qabağına dəmir çərçivə vurublar, elə bil türmədə yaşayırsan. Keçmiş başçı Zakir Fərəcovun vaxtında belə qanunsuzluqlar yox dərəcəsində idi. Şəkillərə baxın, görün necə biabırçı görüntü var.
Xırdalan şəhəri, 4 saylı Mənzil İstismar sahəsinin rəisi Vəli adlı şəxsin bizim əraziyə dəxli yoxdur. Amma o da qanunsuz əməllər törədir. “JEK” rəhbərlikləri “bizim heç kəsdən qorxumuz yoxdur” deyirlər və bunu öz əməlləri ilə də sübut edirlər. Bu şəxslər məhkəmə qərarlarını tanımırlar.
Mənzil İstismar Sahəsi qanunsuzluğu icra nümayəndəsinin üstünə atır, baş memar Elvin Quliyev qərarın İcra Hakimiyyəti tərəfindən verildiyini deyir. Görün nə qədər özbaşınalıqdır ki, dünən 2 saylı Mənzil İstismar Sahəsinin əməkdaşı ilə söhbət zamanl dedi ki, “savadım olmasa da, müdirimiz Şəmsi müəllimə məhkəmə qərarı olan yerə sement tökmək istəmədiyimi, qanundan qorxduğumu bildirdim, o isə məni həmin işi görməyə məcbur etdi. Bunu etməsydim, çox güman ki, işdən çıxaracaqdı”.
Hörmətli redaksiya!
Xirdalan şəhərində vəziyyət həqiqətən də acınacaqlıdır. Sizdən xahiç edirəm ki, mənim problemimi işıqlandırın, inşallah, bu özbaşınalığa son qoyular”.
Məsələ ilə bağlı adları çəkilən qurumlarla əlaqə saxlaya bilmədik, zənglərimiz cavabsız qaldı”.
Jalə FAMİLQIZI
Redaksiyadan: Yazıda adları qeyd olunan qurumların və şəxslərin mövqeyini dərc etməyə hazırıq.