Qanunla deputatların bizneslə məşğul olmasının qadağan edilməsinə baxmayaraq, hələ də bəziləri iş fəaliyyətini davam etdirir. Hətta onların bir qismi ölkədə qurduqları biznes imperiyasını xaricdə də genişləndirməklə məşğuldurlar.

”Yeni Gundem”in məlumatına görə, belə deputatlardan birinin də 9 saylı Binəqədi ikinci seçki dairəsinin deputatı, Milli Onkologiya Mərkəzinin (MOM) direktor müavini, deputat Kəmaləddin Qafarovun olduğu iddia edilir.

Deputatın rəhbərliyi altında Milli Onkologiya Mərkəzində formalaşan bazar qiymətlərini diqqətinizə çatdırırıq:

1. Onkoloji xəstəlik şübhəsi yarananda ilk müraciət etdikdə müayinə üçün 500 manata yaxın pul verməli olurlar.

2. Kimyaterapiya keçmək üçün müayinə sənədlərini müalicə edəcək həkimə çatdırılması insanların özlərinə qadağandır. Həmin müayinə kağızlarını bir korpusdan başqasına aparmaq üçün əməkdaşlara 20 manat verilməlidir.

3. Kimyaterapiya 300 manatdır. Bundan əvvəl də bəzi müayinələri keçmək üçün 60 manatdan 100 manata qədər də pul ödənməlidir. Xərçəng xəstələri hər 21 gündən bir kimyaterapiya qəbul etməlidirlər və hər dəfə də eyni pulları verməlidirlər.

4. Bəzi xəstələrin şüa da qəbul etməsi qaçılmazdır. Onun da 28 seansı 1000 manatdır.
5. Qan analizi, UZİ, kardeoqrammanın qiyməti 20 manat olaraq müəyyənləşib.

“Yeni Gundem”in məlumatın görə, “Lal deputat” kimi tanınan Kəmaləddin Qafarov nadir hallarda danışır, amma danışanda da “gül vurur”. O komitə iclaslarının birində deyib ki, “Azərbaycanda bəzi dərmanların qiymətləri Türkiyədən ucuzdur”. Kəmaləddin Qafarovun bu mövzunu dilə gətirməsi və belə bir iddia irəli sürməsi maraqlı olduğu qədər də gülüş doğurur. Təkcə ona görə yox ki, deputatın iddiası doğru deyil, həm də bu iddianı irəli sürən Kəmaləddin Qafarov ölkədə dərmanların qiymətinin baha olmasının əsas baiskarlarından biridir və belə bir şəxsin “Azərbaycanda dərmanlar ucuzdur” deməsi yumşaq desək vətəndaşları dolamaqdır. Onun parlament tribunasından öz biznesini legitimləşdirmək məqsədi daşıdığı aydın görünür.

Kəmaləddin Qafarovun əsas gəlir mənbəyi məhz dərman satışındandır.

Bununla bağlı “Yeni Gundem” olaraq media üzərindən apardığımız araşdırmalarda ilginc məlumatlar yer alır.

Deputat Kamələddin Qafarovun biznes siyahısı:

“AzəriMed” MMC şirkəti Kəmaləddin Qafarovun ən böyük dərman firmasıdır.Şirkət həm də tibbi ləvazimatların və avadanlıqların satışını həyata keçirir.

– “AzəriMed MNK” MMC

– “Mega Pharmacy” MMC,

– “Cardinal Health” şirkəti

– “Ruslan AZ” MMC

– “Zəfəran” apteklər şəbəkəsi

– “Zəfəran Hospital”

– “Kanon” MMC apteklər şəbəkəsi

– “Shafran” MMC

– “Avestafarm” MMC

– “Naturalist” firması

– “Versal Palace” MMC

– “VERSAL PALACE” MTK-sı Bakı şəhərində, Ağ Şəhərdə binalar tikir, bahalı mənzillər satır.

Deputatın əczaçılıq biznesi ölkə sərhədlərinin hüdudlarını aşıb:

Gürcüstanda fəaliyyət göstərən, Tbilisi, İsani-Samqor rayonu, Qorqasali küçəsi 41 ünvanında hüquqi qeydiyyatda olan “Helios Pharma” LTD-nin də K.Qafarova məxsus olduğu deyilir. Şirkət Tamara Qamzaşvili adlı gürcü qadın tərəfindən idarə olunur. Eləcə də yunan Kiprində fəaliyyət göstərən “SALİDONT LTD”-nin də deputatın biznes imperiyasına bağlı olduğuna dair məlumatlar yayılıb.

Kəmaləddin Qafarov həm də Milli Onkologiya Mərkəzinin direktor müavini kimi dövlətin Mərkəzə ayırdığı pulların böyük əksəriyyətini özünə məxsus “AzəriMed” şirkətinə transfer edir, dərmanlar ordan alınır. Yəni Onkologiya Mərkəzində dəhşətli bahalığın arxasında da məhz Kəmaləddin Qafarov dayanır.

Onuda qeyd edək ki, biznesmen Kəmaləddin Qafarov nazir iddiasındadır.

Qarşı tərəfin mövqeyni dərc etməyə hazırıq.

Yenigundem.az

Bakı şəhəri, Sabunçu rayonu, Zabrat qəsəbəsi, ev-14 ünvanında fəaliyyət göstərən və hal-hazırda paytaxt ərazisində ən böyük alış-veriş mərkəzlərindən biri hesab olunan "Ayxan" marketin şübhəli fəaliyyəti, bu gün də tam əksəriyyəti düşündürməkdədir. Qeyd edək ki, 2022-ci ilin sentyabrında respublika ərazisində qida sahəsində fəaliyyət göstərən 46 ticarət müəssisəsi və 20 ictimai-iaşə müəssisəsində həyata keçirilən monitorinqlər zamanı, fəaliyyətində çoxsaylı qüsurlar aşkar olunan ticarət mərkəzlərindən biri də “Ayxan” market olur. Hər kəs bilir ki, təqribən 60 nəfərdən çox işçinin çalışdığı bu alış-veriş mərkəzində gün ərzində bəlkə də yüz min manat dəyərində alver işləri həyata keçirilir.

Son vaxtlar isə, “Ayxan” marketdən alınan bir çox məhsullar neçə-neçə insanların zəhərlənmələrinə səbəb olmaqdadır. Məsələn, bu ticarət mərkəzinə yaxın ərazidə yaşayan şəxslərdən biri gundemxeber.az-ın əməkdaşına bildirir ki, "Mən 2-3 gün bundan öncə “Ayxan” marketdən "yoğurt" və digər qida məhsulları aldım və aldıqlarımın hər biri xarab çıxdı. Hətta, azyaşlı övladlarımdan biri yediyi "yoğurt"dan da zəhərləndi. Həmin vaxt xarab məhsulları marketə qaytarıb iradımı bildirdikdə, market əməkdaşları mənə “məhsulların xarab çıxmasının bizə heç bir aidiyyəti yoxdur" deyə cavab verdilər. Aparılan araşdırmalar zamanı o da bəlli oldu ki, xarab çıxan məhsulları istehsal edən “Alper” şirkətidir. Düzdür, ərzaq məhsullarının xarab olmalarına bir çox amillər səbəb olsa da, faktdır ki, həmin məhsullar “Ayxan” marketdən alınır. Deməli, istənilən halda bütün məsuliyyət bu alış-veriş mərkəzinin üzərində qalır.
GundemXeber.az redaksiyası olaraq, “Ayxan” marketin səlahiyyətli şəxslərinin mövqeyini dinləyə bilərik.

Ötən ilin noyabrında “ANC group” Məhdud Məsuliyyətli Cəmiyyətinə məxsus “Rahat” marketin Bakı şəhəri, Suraxanı rayonu, Yeni Ramana 112 (BNAİE Maşınqayırma /Yod Zavodu) yaxınlığında yerləşən filialının piyadalar üçün nəzərdə tutulan səkini zəbt etdiyi barədə məlumat vermişdik. Azərbaycan Yerüstü Nəqliyyat Agentliyindən (AYNA) Pravda.az-a bildirilmişdi ki, həmin ərazidə parkinq təşkil edilməsi ilə bağlı AYNA-ya hər hansı bir müraciət daxil olmayıb. Qeyd olunmuşdu ki, piyada səkisinə aid sahədə parklanma yerinin təşkil olunması yolverilməzdir.

"Bu cür hallar piyadaların rahat, təhlükəsiz və maneəsiz hərəkət imkanlarını məhdudlaşdırır, hərəkət təhlükəsizliyi səviyyəsini minimuma endirir. Səki sahəsinin əvvəlki vəziyyətə qaytarılması ilə bağlı tərəfimizdən müvafiq dövlət qurumları ilə birgə zəruri tədbirlər görüləcək", - məlumatda bildirilmişdi.


Həyata keçirilən işlərdən məlumdur ki, bu cür halların qarşısı müraciət daxil olduqdan təxminən bir həftə sonra alınır. Amma bu iş isə "düyün"ə düşüb, iki aya yaxın müddət keçməsinə baxmayaraq, AYNA həmin parkinqlə bağlı heç bir tədbir görməyib. Hətta dekabrda verdiyimiz sorğuya şifahi olaraq cavab verilmişdi ki, mütləq tədbir görüləcək. Görünən budur ki, proses AYNA-nın marağında deyil. Görəsən, AYNA İdarə heyətinin sədri Anar Rzayev "Rahat"ın qarşısından niyə geri çəkilib? Ehtimallar üzərindən fikir bildirməkdən uzağıq. Amma...

Abşeron rayonu, Xırdalan şəhəri, Mehdi Hüseynzadə küçəsi, 25-ci məhəllə, ev 3, mənzil 36-da yaşayan Məsimov Mafik Nizaməddin oğlu, eləcə də Məmmədova Aygün Aslan qızı, Cabbarlı Cəlil Oktay oğlu, Balaqayeva Zülfiyyə isa qızı, Süleymanov Hikmət Elbrus oğlu və s. tərəfindən Hurriyyet.az saytının redaksiyasına şikayət məktubu daxil olub. Saytımız vasitəsilə Prezident İlham Əliyevə müraciət edən şikayətçilərin məktubunu olduğu kimi icra edirik:

“Cənab Prezident!

Məlumat üçün bildirək ki, “FAM-88” MMC tikinti şirkətinin rəhbərləri 2019-cu ildən başlayaraq Xırdalan şəhəri, Mehdi Hüseynzadə küçəsi, 25-ci məhəllədə yaşayış binası inşa etməyə başlamış, lakin tikintini yarımçıq saxlayaraq başa çatdırmamışlar. Tikinti şirkətinin rəhbərləri 28 mənzil və bir neçə obyekti - eyni mənzili və obyekti - müxtəlif tarixlərdə bir neçə vətəndaşa sataraq dələduzluq etməklə, külli miqdarda pul vəsaitini mənimsəmişlər. Lakin tikintini başa çatdırmadan yarımçıq saxlamışlar.

Aldadılmış vətəndaşlar arasında vətən müharibəsi qaziləri, şəhid ailələri, təqaüdçülər, yaşlı müəllimlər, birinci qrup əlillər və dövlət məmurları var. Məsələ ilə əlaqədar Fövqəladə Hallar Nazirliyinə, Şəhərsalma və Arxitektura İdarəsinə ayrı-ayrılıqda şikayətlərimizi bildirmişik. Bir ildən çox müddətdir ki, Azərbaycan Respublikası Baş Prokurorluğu yanında Korrupsiyaya qarşı Mübarizə Baş İdarəsində cinayət işi başlanmış, hər birimizin ərizələri, ifadələri alınmış, lakin bu müddət ərzində nə binanın tikintisinin başa çatdırılması, nə də bizə dəyən maddi zərərin ödənilməsi üçün təqsirkar şəxslər barəsində tədbir görülməmişdir. Korrupsiyaya qarşı Mübarizə Baş İdarəsində bizim suallarımıza məqsədyönlü şəkildə yayındırıcı cavablar verirlər.

Biz zərərçəkmiş vətəndaşlar illərlə işləyib dövlətin vergi və sosial ödənişlərini edib, minbir əzab-əziyyətlə yığdığımız vəsaiti öz həyat və mənzil şəraitimizi yaxşılaşdırmaq, gələcək arzularımızı həyata keçirmək üçün “FAM-88”MMC çirkətindən mənzil və obyekt almışıq. Lakin şirkətin rəhbərləri tərəfindən aldadılaraq, arzularımız və ümidlərimiz sarsıdılmışdır.

Cənab Prezident!

Ümüdimiz tək Sizə və Sizin dəmir yumruğunuzadır. Biz Sizə güvənirik və xahiş edirik ki, yuxarıda göstərilən hallarla əlaqədar “FAM-88” MMC tikinti şirkətinin Xırdalan şəhəri, M.Hüseynzadə küçəsi, 25-ci məhəllədə yerləşən binanın tikintisinin başa çatdırmasına və ya bizə dəyən maddi zərərlərin ödənilməsi üçün işin nəzarətdə saxlanılmasına göstəriş verəsiniz”.

Qeyd edək ki, məsələ ilə bağlı “FAM-88” MMC tikinti şirkəti ilə əlaqə saxlamağa çalışsaq da, bu, mümkün olmadı.




Hurriyyet.az

"Kanal14"ün efirində Xocavənd rayon icra hakimiyyətinin başçısı Eyvaz Hüseynov fəaliyyətindən (daha doğrusu fəaliyyətsizliyindən) bəhs edən "serial" davam edir.

Artıq, iki aydan çoxdur ki, Xocavənd rayon sakinləri dərdlərini demək, çıxışlarında "jurnalistlər mənim dostumdur" deyən ölkə başçısına heçolmasa mətbuat vasitəsilə problemlərini bildirmək və çarə tapmaq ümidi ilə "Kanal14" YouTube kanalımıza axışırlar.

İstər kanalın canlı yayımında dərdini danışan, istərsə də şərh bölməsində fikirlərini bölüşən bütün Xocavənd sakinlərini birləşdirən bir ortaq səbəbkar var ki, bu da əkinə yararlı bütün torpaq sahələrini özünün və yaxınlarının, dostlarının adına rəsmiləşdirdiyi, rayon sakinlərini əkin və örüş sahələrinə möhtac qoyduğu deyilən 64 yaşlı Eyvaz Hüseynovdur. Qeyd edək ki, cəmi bir neçə ay sonra əyləşdiyi kürsünün 32 ili tamam olacaq.

32 il - el arasında "bir igidin ömrüdür" deyərlər. Bəs bu 32 illik "igid ömrü"ndə Eyvaz Hüseynovdan hesabat tələb edilmədimi ki, sən bu illər ərzində daşıdığın vəzifədə hansı yaxşı əmələ imza atmısan?

Şəhid ailələri "DogruXeber.az"a bildirir ki, "Qaradağlı kəndinin şəhidlərinin xatirəsini əbədiləşdirmək üçün, özümüzün cibimizin pulu ilə inşa etdirdiyimiz abidəni Eyvaz Hüseynov icra hakimiyyətinin balansına keçirib". Həmçinin, daha dözə bilməyib taa paytaxt Bakıya qədər gəlib, mətbuat konfransı keçirən 82 şəhidin ailəsi 30 ildən çoxdur təsərrüfat üçün lazım olan hər şeydən Eyvaz Hüseynov sayəsində məhrum olduqlarını dedilər.


Eyvaz Hüseynovun yenə də "tükü tərpənmədi"...

Maraqlıdır ki, bu qədər şikayət və narazılıqlara rəğmən bu adama heç "gözün üstə qaşın var" deyən də olmur.

Yuxarıda, vəzifə başında "igid ömrü" qədər əyləşdiyini qeyd etdiyimiz icra başçısı, belə çıxır ki, 32 ildir vətən üçün canını verən igidlərin ailələri və özlərindən kimsəyə bəlli olmayan səbəblərin qisasını alır. Hər halda bunu illərdir icra başçısından "qara qəpiklik" kömək görmədiklərini iddia edən Xocavənd rayon sakinləri - qazilər, müharibə veteranları və şəhid ailələri deyir, 14 ildir seçki komissiyasının üzvü olduğu üçün seçkidə iştirak etdiyi zaman özündən xəbərsiz işində azad edildiyini və onun yerinə Eyvaz Hüseynovun dostunun gənc qızı Əfsanə xanımın işə alındığını deyən Vəzifə Bayramova deyir, iki qəhrəman şəhidin bacısı Məhrubə Dadaşova deyir...

Yeri gəlmişkən, Xocavənd rayon Muğanlı kənd sakini Vəzifə xanım Bayramova bir neçə dəfə "Kanal14" ün efirində canlı yayımlanan "Kamalın zamanı" proqramında iştirak edərək, 20 ilə yaxın pedaqoji fəaliyyət göstərdiyi orta məktəbindəki işindən məhz Eyvaz Hüseynovun tapşırığı ilə azad olunduğunu, onun yerinə Eyvaz Hüseynovun dostunun qızı olan Əfsanə adlı gənc xanım təyin olunduğunu iddia edirdi. Hansı ki, həmin Əfsanə xanım indi Eyvaz Hüseynovun müavini vəzifəsində çalışır.

Nəticədə ali təhsilli dil-ədəbiyyat müəllimi olan Vəzifə xanım 14 ildir işsiz qalıb.

Vəzifə xanımın iddiasına görə, Eyvaz Hüseynov onunla 14 ildir qərəz apardığı üçün xanımı işinə bərpa olmasına imkan vermir. Səbəb isə budur ki, illər əvvəl mətbuatda Eyvaz Hüseynovun qardaşlarından birinin dövlət çevrilişinə cəhddə iştirak etdiyi barəsində bəzi məlumatlar dərc edilib. Düzdür, xanımın sözlərinə görə Eyvaz Hüseynov yüksək məbləğlər sayəsində həmin məlumatların az qisminin silinməsinə nail ola bilib. Və icra başçısı həmin məlumatları mətbuata məhz Vəzifə Bayramovanın sızdırdığını düşündüyü üçün onu qərəzli şəkildə 14 ildir işsiz qoyub. Lakin, apardığımız araşdırmalar nəticəsində məlum oldu ki, sən demə məlumatlar Vəzifə xanım deyil, məhz Eyvaz Hüseynova yaxın olan bir şəxs tərəfindən mətbuata ötürülüb. Amma, nə yazıq ki, "qurunun oduna, yaş da alovlanıb".

Məhrubə xanım isə iddia edir ki, 1993-cü ildən bu günə qədər yaşlı atası ilə Mingəçevir şəhərində kanalizasiya xəttinin düz üstündə inşa edilmiş köhnə beton qarajda məskunlaşıblar. Onlar bu illər ərzində nə məcburi köçkün ailəsi kimi, nə də iki qəhrəman oğlunu şəhid verən ailə olaraq mənzillə təmin olunmayıblar, baxmayaraq ki, illərdir müraciət etmədikləri idarə qalmayıb.

Eynilə Cəbrayıl rayonundan olan şəhid Kərimov Elçin Ataş oğlunun ailəsi kimi. Hansı ki, onlar da 7 nəfərlik ailə üzvlərilə birlikdə 30 ildən çoxdur ki, köhnə yataqxananın bircə otağında sığınıblar. Nə icra başçısı Kamal Həsənov, nə də rayonu Milli məclisdə güya təmsil edən Ceyhun Məmmədov şəhid ailəsinin problemi ilə maraqlanmır, həlli üçün aidiyyatı qurumlara müraciət etməyi "özlərinə yaraşdırmırlar".

Həmçinin Beyləqan rayon Aşağı Çəmənli kənd sakini şəhid anası Kətan Həsənova da 30 ilə yaxındır mənzillə təmin olunmayıb, çünki Beyləqan rayon icra hakimiyyəti məsuliyyətsizlik göstərərək, ananın adını zamanında aidiyyatı üzrə Əmək və Əhalinin Sosial Müdafiəsi Nazirliyinə təqdim etməyib.

Əlqərəz...

Elə Eyvaz Hüseynov da Kamal Həsənov kimi rəhbərlik etdiyi, 32 ildir çörəyini yediyi, sayəsində özünə sərvətlər toplayıb, səltənət qurduğu rayonun sakinlərə - ona milyonlar qazandıran torpağın uğrunda canını qurban verən şahidlərin ailələrinə biganəlik nümayiş etdirir. Məhrubə xanım deyir, - "Eyvaz Hüseynov məni telefonda dinləyir, sonra deyir, "get evini al daa, mən sənə ev alanam?" Bu icra başçısına yaraşan sözdürmü? Deputatımızın adını isə siz sual verəndə sizdən eşitdim. Ümumiyyətlə bu adamı tanımıram".

Yeri gəlmişkən, onu da qeyd edək ki, təqribən iki il əvvəl Cəbrayıl rayonunun icra başçısı Kamal Həsənovun barəsində "DogruXeber.az" informasiya portalında məlumat dərc ediləndə, üzərimizə "hücum çəkən trol dəstəsi"nin üzvləri "Kamal Həsənov özü də müharibə veteranıdır. Xocavəndin icra başçısı Eyvaz Hüseynov ilə Kamal Həsənov yeganə başçıdırlar ki, Qarabağda döyüşüblər" deməklə, nəyəsə nail olmağa çalışırdılar. Eləcə də Xətai rayon icra hakimiyyətinin başçısı Rafiq Quliyevin də müharibə veteranı olduğu çeşid-çeşid dərc olunurdu.

Maraqlısı da budur ki, şəhid ailələrinin, qazilərin və veteranların narazılığı da bu 3 rayonda daha çoxdur.

Axı bu nəyin qisasıdır, cənab başçılar???

P.S: Xocavənd rayon sakinlərinin narazılıqları ilə bağlı qarşı tərəf olaraq İcra Hakimiyyətinin də mövqeyini dinləmək məqsədilə dəfələrlə ictimai əlaqələr şöbəsinə zəng etsək də dəstəyi qaldıran olmadı. Belə olan halda məcburiyyət qarşısında Eyvaz Hüseynovun mobil telefonuna zəng etdik, lakin o, da işçiləri kimi telefona cavab vermədi ki, vermədi...

Redaksiyamız hər kəsin söz haqqını tanıyır.

DogruXeber.az

Mikayıl Cabbarovun rəhbərlik etdiyi İqtisadiyyat Nazirliyi yanında Əmlak Məsələləri Dövlət Xidmətində daxili qarşıdurma pik həddə çatıb. Buna səbəb Xidmət rəisinin müavini Elçin Yusubovun öz rəisi Mətin Eynullayevi devirmək cəhdidir. Bununla bağlı cumhuriyyet.az-a verilən məlumata görə tutduğu postun imkanlarından istifadə edərək özünə oliqarxlardan ibarət çoxsaylı dost qazanan Elçin Yusubov hesab edir ki, artıq Əmlak Məsələləri Dövlət Xidmətində birinci adam olmağın vaxtıdır və buna onun ağlı da, əlaqələri də imkan verir. Mətin Eynullayevin Elçin Yusubova yetərincə səlahiyyət tanımasına baxmayaraq, rəis müavini bununla kifayətlənmək niyyətində deyil. Xidmət daxilində bir çox aparıcı mütəxəssisi və şöbə müdirini öz tərəfinə çəkməyə nail olan Elçin Yusubov, Mətin Eynullayevi həm siyasi, həm də pxixoloji baxımdan təkləməyə çalışır. Rəis müavininin bu məsələdə ən çox güvəndiyi şəxslər isə Torpaqların dövlət idarəetməsinin təşkili və geodeziya şöbəsinin müdir müavini, şöbə müdiri vəzifəsini icra edən Eldəniz Qafarov və Dövlət əmlakının icarəyə verilməsi və dövlət ehtiyacları şöbəsinin müdiri vəzifəsini icra edən Taleh Bəşirovdur. Nə qədər inanılmaz görünsə də, Elçin Yusubov nisbətən “aşağı eşalon”dan olan bir çox şəxsi də öz tərəfinə çəkməyi, onların Mətin Eynullayevə qarşı səflərdə yer almasını vacib bilib.
Rəis müavini öz məqsədinə çatmaq üçün Mətin Eynullayevin “kabinet məmuru” obrazını yaratmağa da xüsusi səy göstərir. Prezident İlham Əliyevin məmurları aktiv olmağa, xalqla bilavasitə təmas qurmağa, xalqın “ayağına getməyə” səsləməsi fonunda Mətin Eynullayevin klassik məmur obrazının yaradılması Xidmət rəisini ali siyasi hakimiyyət qarşısıdna gözdən salmağa hesablanıb. Xidmət rəisinin müavini Elçin Mustafa oğlu Yusubovun ətrafında formalaşdırdığı komandanın əməlləri dəhşət yaradır. Elçin Yusubovun komandasının ən ciddi fiqurlarında biri də “Dövlət əmlakının icarəyə verilməsi və dövlət ehtiyacları şöbəsi”nin müdiri vəzifəsini icra edən Taleh Arif oğlu Bəşirovdur. Elçin Yusubovun himayəsi ilə Taleh Bəşirov da milyonçuya çevrilib. Mənbənin cumhuriyyet.az-a bildirdiyinə görə Taleh Bəşirovun dövlət torpaqlarını məmurlara peşkəş etməsi qarşılığında aldığı Range Rover zamanla özü nəhəngliyində problemə çevrilməkdədir. Şöbə müdiri lovğalıq edərək ona tam məxfi ortamda təqdim edilən avtomobillə bağlı yaxın çevrəsinə açıq məlumat verməsi onunla yanaşı, ona həmin avtomobili hədiyyə edən şəxsi də çətin vəziyyətə salıb. Belə ki, Taleh Bəşirova məlum avtomobil general rütbəli məmurlardan birinin qardaşı tərəfindən bağışlanılıb ki, həmin şəxs adının bu məsələdə hallanmasını istəmir. Bu isə o deməkir ki, Taleh Bəşirov fərqinə varmadan özü ilə yanaşı, kölgədəkli milyoneri də çətin vəziyyətə salıb. Taleh Bəşirova avtomobil bağışlayan şəxsin kimliyi bəlli olarsa, o zaman həmin şəxs bu suallara cavab verməli olacaq: Taleh Bəşirova avtomobili niyə, şöbə müdirinin hansı xidmətlərinə görə bağışlayıb? Bu “ürəyiaçıqlığın” Taleh Bəşirovun onun adına keçirdiyi torpaq sahələri ilə nə kimi əlaqəsi var?
Maraqlıdır ki, Mətin Eynullayev Elçin Yusubovun “qiyam hazırlığından” xəbərdar olsa da, müavininə qarşı sərt addımlar atmaqdan çəkinir. Bunun isə əsas səbəblərindən biri Elçin Yusubovun hazırda hakimiyyətin yuxarı eşalonunda təmsil oluna bir çox şəxslərlə yaxın dostluq münasibətinə malik olmasıdır. Lakin bununla yanaşı, Mətin Eynullayev də Elçin Yusubov və onun komandasına qarşı bəzi “profilaktik” tədbirlər həyata keçirilməkdədir. Bunlardan biri Elçin Yusubova xüsusi yaxınlığı ilə seçilən Eldəniz Qafarov və Taleh Bəşirovun şöbə müdiri vəzifəsində birdəfəlik təsdiq edilməməsidir. Hər iki məmur şöbə müdiri vəzifəsini xeyli müddətdir ki, müvəqqəti icra edir ki, bu da Xidmət rəisinin onlara etimad göstərməməsinə dəlalət edir. Bir sözlə, yaxında Əmlak Məsələləri Dövlət Xidmətində daxili mübarizənin daha da şiddətlənəcəyi ehtimalı böyükdür. Bu mübarizədə qalib gələn hər kəs şəriksiz olaraq “hər şeyə” sahib olacağı kimi, məğlub olan tərəf bugünə qədər sahib olduğu hər şeylə vidalaşmalı olacaq.
Mənbə: cumhuriyyet.az

Beyləqanda sahibkara məxsus obyekti sökən əmlak xidmətinin əməkdaşı hündürlükdən yıxılaraq ayağını sındırıb...

Əmlak Məsələləri üzrə Dövlət Xidmətinin Beyləqan rayon Şöbəsinin əməkdaşları sahibkara məxsus obyektin tikintisini sökərkən hündürlükdən yıxılaraq xəsarət alıb. Hadisə şahidlərinin sözləri onun ayağının sındığı bildirilir.
Qeyd edək ki, Dövlət Əmək Xidməti (DƏX) hər hansı bir qanunsuz aparılan tikinti işlərinin dayandırılmasını tələb edə, zərurət yarandıqda sökülməsi və sair qanuna yuğun hərəkətlərin aparılması istiqamətində səlahiyyətli qurumlara rəsmi müraciət edə bilər.
Qanunsuz inşa olunan obyektlərin sökülməsi yalnız məhkəmənin qərarı əsasında həyata keçirilir. Xidmətin əməkdaşlarının özləri məhkəmə qərarı olmadan söküntü işlərini apara bilməz. Aparılması qadağan edilir. Bunun üçün aidiyyəti səlahiyyətli qurumlar var.
Sahibkar iddia edir ki, Əmlak Məsələləri üzrə Dövlət Xidmətinin Beyləqan rayon şöbəsinin bəzi əməkdaşları vəzifələrindən sui-istifadə etməklə, səlahiyyətlərinə aidiyyəti olmayan söküntü işlərinə də burunlarını soxurlar. Məhz onlar bir neçə gün öncə sahibkarın tikintisini özləri inşa olunan hörgünün üzərinə çıxaraq əlləri ilə sökməyə başlayıb. Bu zaman əməkdaşlardan biri hündürlükdən yıxılaraq qılçası sınıb.
Onu da qeyd edim ki, obyekti uçurulan sahibkar Əmlak Məsələləri üzrə Dövlət Xidmətinin Beyləqan rayon şöbəsinin əməkdaşlarının qanunsuz hərəkətlərinə hüquqi qiymət verilməsi üçün Beyləqan rayon prokurorluğuna ərizə ilə müraciət edib
Realmedia.az

Xəbər verdiyimiz kimi, "Pilot Residence" MTK-ya məxsus Səbail rayonu, Rostoropoviç küçəsində yerləşən yaşayış binasının birinci mərtəbəsində pilləkən bağlanaraq, yerində obyekt tikilib. Burada yaşayan sakinlərin yeganə ümid yeri lifdir. Lift işləməsə, mənzillərə qalxmaq-düşmək mümkün olmayacaq. Bu barədə ATV kanalı sujet hazırlayıb.

Bu problemlə bağlı ötən ilin avqust ayında "Xəzər Xəbər"də sujet yayımlamışdı.

Qaynarinfo-nun məlumatına görə, ötən il sözügedən binada yaşayan sakinlərin həm lift, həm də pilləkən vasitəsi ilə evlərinə giriş-çıxış məhdudlaşdırılmışdı. Sakinlərin haqlı narazılığından sonra sözügedən məsələnin birtərəfli həll edildiyi məlum olub. Həmin binada sakinlər ötən il qonşu binanın blokundan keçməklə mənzillərinə daxil ola bilirmiş.

Sujetdə qeyd edilir ki, yaşayış binasının blokunun qarşında obyekt tikilib. Lift və pilləkənlər həmin obyektin içərisində qalıb. Bloka giriş hörülərək bağlanıb, sakinlərin liftdən istifadəsi məhdudlaşdırılıb.

Sakinlər bildiriblər ki, binanın 4-cü blokundan istifadə etməklə və 5-ci blokun ikinci mərtəbəsinə keçməklə, öz evlərinə qalxa biliblər. Bəzi sakinlər həmin obyektin tikintisi səbəbindən "Pilot Residence" MTK-ya pul ödəyib, aldıqları qarajlardan da istifadə edə bilmirlər. Qarajlar supermarketə anbar kimi icarəyə verilib.

Həmin sujetdə şirkətin nümayəndəsi bildirir ki, obyektin tikilməsi üçün müvafiq qurumlardan icazə alınıb. Bir-iki qurumun da razılığı alınandan sonra binanın həyəti sözügedən obyektlə əhatə olunub, tikiləcək və onun üzəri sakinlərə həyət kimi istifadəyə veriləcək.

Ötən ilki sujetdə Dövlət Şəhərsalma və Arxitektura Komitəsindən bildirilib ki, məsələ ilə bağlı araşdırma aparıldıqdan sonra ictimaiyyətə məlumat veriləcək.

Amma dünən ATV telekanalının hazırladığı sujetdə məlum olur ki, məsələ nə araşdırılıb, nədəki sakinlərə kömək edilib. Əksinə, binanın blokunun pilləkəni tam sökülüb, yerində obyekt tikilib.

Ötən ilki sujetdə olduğu kimi, dünənki sujetdə də "Pilot Residence" MTK-nın eyni nümayəndəsi sakinlərin haqlı narazılığını əsassız sayıb. Deyib ki, əvvəldən müvafiq qurumlar tərəfindən sakinlərə verilən sənəddə binanın girişi nəzərdə tutulmayıb. Ötənilki sujetdən fərqli olaraq, hazırda binanın həyətində obyekt tikintisi başa çatdırılıb.

Maraqlıdır ki, problem 1 ildən artıqdır ki, ictimailəşdirilib, amma hələ də həll olunmayıb. Dövlət Şəhərsalma və Arxitektura Komitəsi, Fövqəladə Hallar Nazirliyi bu müddət ərzində nəyi və necə araşdırıblar? Bu "araşdırma" hansı formada davam edib ki, nəticəsində binanın layihəsində köklü dəyişiklik edilib, tikinti aparılıb və şəhərin mərkəzində belə bir acınacaqlı vəziyyət yaranıb?

Görünən odur ki, "Pilot Residence" MTK-nın qanunsuz tikililərinə ya müvafiq qurumlar göz yumur, ya da ki, problemi həll etmək iqtidarında deyillər.