Ardını oxu...
“Niyə soruşmursunuz ki, bu fəlakətə görə birbaşa məsuliyyət daşıyanlardan və onun müəlliflərindən biri olan bu nəzakətli adam, bütün şeyxlərin və kralların dostu, sizin ürəklərinizin prezidenti, elitar turist və müftəxor prezident nəylə məşğuldur? O, vəzifə xatirinə hər kəsi və hər şeyi sataraq, vəzifəni kişilikdən və vətəndən üstün tutdu. Budur əclaflığın bahalı kostyuma bürünmüş gerçək sifəti!”

Bu sözləri 44 günlük müharibə bitəndən bir müddət sonra Ermənistanın Vatikandakı sabiq səfiri, Serj Sarkisyanın kürəkəni Mikael Minasyan özünün sosial şəbəkə səhifəsində prezident Armen Sarkisyanı nəzərdə tutaraq yazmışdı. Lakin həmin vaxt prezident sabiq səfirin bu açıq təhqir və rişxəndinə heç bir cavab verməmişdi.

İndi isə həmin bu “elitar və müftəxor turist” az qala Ermənistanın yaxın siyasi gələcəyini həll etməkdədir. Söhbət Nikol Paşinyan hökumətinə qarşı qiyam qaldırmağa çalışan Baş Qərargah rəisi Onik Qasparyanın istefaya göndərilməsinə dair qərarın havadan asılı vəziyyətdə qalmasından gedir. Məlum olduğu kimi, Armen Sarkisyan Baş nazir Nikol Paşinyan tərəfindən təqdim olunan Baş Qərargah rəisi Onik Qasparyanın istefaya göndərilməsi qərarını imzalamayıb və onu geri qaytarıb. Ermənistan konstitusiyasına görə, Prezidentin qərarı dəyərləndirmək üçün 3 gün vaxtı olub. Əgər o, bu müraciətə heç bir cavab verməsəydi, qərar avtomatik qüvvəyə minəcəkdi. Geri qaytaracağı təqdirdə isə Baş nazir prezidentə təkrar müraciət edə bilər ki, bu da artıq baş verib. Bu dəfə prezident iki gün ərzində cavab verməlidir: ya qərarı imzalamalıdır, ya da sənəd Konstitusiya Məhkəməsinə getməlidir.

Sarkisyan Paşinyanın müraciətini geri çevirməmişdən öncə müxalif partiya liderlərilə görüş keçirib, daha sonra isə qiyamçı Onik Qasparyanın ayağına gedərək, Baş Qərargahda onunla görüşüb. Artıq həmin görüşlərə dair xəbər yayılanda, məlum idi ki, Sarkisyan Paşinyanın qərarını geri qaytaracaq.

Əslində, bir çox müşahidəçilərin də dediyi kimi, prezidentin qiyamçı generalın ayağına getməsi onun hansı “mənəvi keyfiyyətlərə” malik olmasının göstəricisidir. Onun bu qərarı imzalamaqdan boyun qaçırması və məsələyə Konstitusiya Məhkəməsində baxılmasına yol açması isə növbəti dəfə məsuliyyətdən yayınmaq, hətta siyasi fərarilik kimi qiymətləndirilir. Onu da qeyd edək ki, Armen Sarkisyanın məlum qərarı verməsindən bir saat öncə Rusiya müdafiə naziri Sergey Şoyqunun erməni həmkarı Vaqarşak Arutyunyanla telefon danışığı olub. Erməni mətbuatının yazdığına görə, Sarkisyanın qərarında bu telefon danışığının da böyük rolu olub. Ümumuiyyətlə, Ermənistanda Sarkisyan daha çox mövqesiz, iradəsiz siyasətçi kimi tanınır. O, xüsusilə də 44 günlük müharibə dövründəki fəaliyyətilə bağlı ciddi tənqidlərə məruz qalıb. Elə yuxarıda qeyd etdiyimiz Mikael Minasyan Ermənistan Prezidentinin hətta müharibə günlərində də xarici səfərlərdən vaz keçmədiyini, elitar, lyuks həyat yaşadığını bildirərək, acı məğlubiyyətə görə əslində ilk olaraq onun cəzalandırılmalı olduğunu yazımışdı.

Əslində, Sarkisyan Paşinyanın müraciətini geri çevirməklə, Baş nazirin qərarının qanuniliyini şübhə altına almış olur. Ancaq nədənsə o, Qasparyanın hökumətin istefasını tələb etməsini, özü də bunu sadəcə öz müavininin Baş nazir tərəfindən işdən qovulması ilə əsaslandırmasına heç bir irad bildirmir. Halbuki Qasparyanın tələbi heç bir qanuni əsasa söykənmir və doğrudan da hərbi çevrilişə cəhd anlamı daşıyır. Əvəzində, Paşinyanın açıq-aşkar siyasətə qarışmış və hakimiyyətə əl qoymağa çalışan Baş Qərargah rəisinin vəzifədən azad olunması tələbi daha məntiqli və qanunauyğun görünür. Lakin Ermənistan prezidenti, belə görünür ki, qanunlara, ölkəsinin konstitusion quruluşuna, strateji maraqlarına deyil, “küləyin hansı tərəfə əsməsinə” diqqət yetirir…

Onu da qeyd edək ki, Sarkisyanın ikinci dəfə də qərarı geri qaytaracağı və məsələyə Konstitusiya Məhkəməsində baxılacağı gözlənilir. Məsələnin Konstitusiya Məhkəməsinə getməsi isə o deməkdir ki, son qərarın Qasparyanın xeyrinə çıxması ehtimalı kifayət qədər yüksəkdir. Çünki Nikol Paşinyanın Konstitusiya Məhkəməsinin keçmiş hakimiyyət dövründən qalan hakimləri ilə ciddi ədavəti var. Hətta Paşinyan həmin hakimlərlə problemini həll etmək üçün Konstitusiya Məhkəməsilə bağlı müəyyən dəyişiklikləri nəzərdə tutan qanun layihəsini referenduma çıxarmaq istəyirdi. Lakin pandemiyanın araya düşməsi Paşinyanın niyyətinin gerçəkləşməsinə imkan vermədi.

Təbii ki, bu qərarın Konstitusiya Məhkəməsinə göndərilməsinə yol açan Prezident hakimlərin böyük ehtimalla Qasparyanın xeyrinə qərar çıxaracağını yaxşı bilir. Deməli, əgər məhkəmə Paşinyanın qərarını qanunsuz hesab etsə, qiyamçı general vəzifəsində qalacaq. Bu isə Paşinyan tərəfdarlarının etirazları, Konstitusiya Məhkəməsinə qarşı etiraz aksiyalarının başlanması, bir sözlə ölkədə siyasi gərginliyin daha da artması anlamına gəlir.

Onu da xatırladaq ki, müharibə bitdikdən sonra Sarkisyan 10 noyabr kapitulyasiya sazişindən xəbərsiz olduğunu, bu qərardan yalnız mətbuatda məlumat dərc ediləndən sonra xəbər tutduğunu bildirmişdi. Bunun özü də sözügedən şəxsin hansı siyasi çəkiyə malik olmasından xəbər verirdi. Lakin indi iş elə gətirib ki, yaxın dövrdə Ermənistanda siyasi proseslərin hansı məcrada cərəyan edəcəyi onun qərarlarından xeyli dərəcədə asılıdır.

Cəlal Məmmədov

“AzPolitika.info”
Ardını oxu...
Rusiya Silahlı Qüvvələrinin minaaxtaranları Suriyanın İdlib əyalətində terrorçuların səhra hospitalı yaratdıqları boş mağaranı məhv ediblər. Bildirilir ki, hospitalda hətta ən çətin cərrahi əməliyyatların aparılması üçün şərait olub.

APA “RİA Novosti”yə istinadən xəbər verir ki, bunu Rusiya Silahlı Qüvvələrinin Suriyadakı mühəndis qoşunlarının rəisi polkovnik Roman Bessmertnıy jurnalistlərə açıqlama deyib.

Onun sözlərinə görə, bu, rus hərbçilərinin Suriyada olduqları müddətdə gördükləri ən yaxşı təchiz edilmiş hospitallardan biridir.

“Bu mağarada müasir xəstəxana var idi. O, həm ambulator xəstələrin qəbulu üçün, həm də ağır əməliyyatlar üçün tam təchiz edilmişdi. Xəstəxananın avadanlığı şəxsi heyətin 100-dək üzvünün yerləşdirilməsinə imkan verirdi”, - polkovnik Bessmertnıy belə deyib.
Ardını oxu...
Türkiyə Yunanıstanı öz ərazisindən qaçqınların qovulmasını dayandırmağa çağırır.

APA xəbər verir ki, bu barədə Türkiyə Xarici İşlər Nazirliyinin yaydığı açıqlamada deyilir.

“Yunanistan hökumətini və qaçqınların qovulmasında iştirak edənləri beynəlxalq hüquqla tənzimlənən, AB qanunvericiliyində və miqrantlara dair 18 mart 2016-ci il tarixli müqavilədə göstərilmiş insan haqlarının pozulması kimi bu cür təcrübələrə son qoymağa çağırırıq”, - deyə sənəddə qeyd olunub.

Türkiyə Xarici İşlər Nazirliyi bildirir ki, “18 fevral tarixində Yunanıstan təhlükəsizlik qüvvələri COVID-19 testi bəhanəsi ilə qaçqın düşərgəsindən çıxarılan və aralarında qadın və uşaqların da olduğu 13 nəfərlik bir ailəni yenidən Türkiyəyə qovublar”.

“Qaçqınlar döyüldükdən, qiymətli əşyaları və pulları əllərindən alındıqdan sonra Türkiyə ərazisinə qovulublar. Son dörd ildə ölkəmizə 80 mindən çox qaçqın qovulub”, - XİN-in kommünikesində belə deyilir.
 
 
Ardını oxu...
Rusiya Federal Təhlükəsizlik Xidməti və İstintaq Komitəsi Kubanda uzun müddət aldadılmış payçılar hesabına Ermənistan hakimiyyətinə maliyyə ayırmaları edən iri tikinti şirkətlərinin sahibi Kazaryanın ailə klanının üzvlərini həbs edir.

Virtualaz.org bildirir ki, ilk qandal “SSK” şirkətlər qrupunun və onlarla digər inşaat və daşınmaz əmlak şirkətlərinin sahibi Karen Kazaryanın böyük qardaşı -"QİK" Şirkətlər Qrupunun sahibi Misak Kazaryanın qoluna vurulub. Misak Kazaryan ölkəni tərk etmək istəyərkən saxlanılıb. O, yarımçıq tikintilərdən səhmdarların vəsaitlərini çıxarmaqda ittiham olunur. M.Kazaryanın şirkətləri kiçik qardaşı Karen Kazaryanın maliyyə piramidasına daxildir.

Kazaryan ailəsinə məxsus şirkətlərin marketoloqları tikinti sahələrinin sürətlə artmasını onların biznes imperiyasının sabitliyinin təminatı kimi təqdim edirdilər. Ancaq bir əhəmiyyətli "əmma" var.

Artıq satılmış və yaxın gələcəkdə təhvil veriləcəyi vəd edilmiş bir milyon yarım kvadratmetrlik mənzildən toplanan vəsaitin 20 faizindən çoxu təyinatı üzrə istifadə olunmayıb. Təxminən bir o qədər məbləğ də yeni tikinti sahələri üçün torpaqların alınmasına sərf olunur. Bununla belə, Kazaryanın şirkətlərinin pay sahibləri qarşısında həndəsi silsilə ilə artan öhdəliklərini yerinə yetirmək üçün heç bir vəsaiti yoxdur.

Belə ki, Krasnodarda, Bereqovaya stansiyası 146, ev 1 ünvanındakı (23: 43: 208042: 37) ərazi (indi Krasnodar su parkının yerləşdiyi sahə) Kazaryana milyard rubldan da baha başa gəlib. Krasnodarın ən yaşıl rayonundakı bu 2,5 hektar ərazidə elit yaşayış kompleksinin tikilməsi planlaşdırılır. Kazaryan həmin ərazini biznes üzrə uzun illər tərəfdaşı olan Vitali Qriqoryanın adına rəsmiləşdirib.

Kazaryan eyni məqsədlər üçün əvvəllər "Krasnodarselmaş"zavodunun olduğu bütöv bir məhəlləni satın alıb (birinci vitse-qubernator Andrey Alekseyenkonun proteksiyası ilə). Onun kadastr nömrəsi 23:43:0403017, sahəsi isə 24,7 ha idi (!). Ədalət naminə qeyd edək ki, bu əməliyyatın məbləği 2 milyard rubldan çoxdur.

Nəzarətləri altında olan "Qamma" şirkəti vasitəsi ilə onlar Qolf-Klubun yerləşdiyi Natuxayevskaya (Anapa kurort şəhəri) kəndində də iri torpaq sahəsi alıblar.

Kazaryan artıq yazda Adıgeydə bütöv bir mikrorayon inşa ediləcəyinin anonsunu verib. Yablonovski kəndi ilə Şapsuqski su anbarı arasındakı 760 hektar ərazinin alınması üçün səhmdarların fondlarından daha 2 milyard rubl götürülüb.

Bizdə olan məlumata görə, hazırda Rusiya təhlükəsizlik orqanlarının əməkdaşları Kazaryan klanının vəsaitlərinin xaricə çıxarılmasının və Ermənistan nümayəndələri ilə maliyyə əməliyyatlarının qarşısını almaq üçün tədbirlər görür, həmçinin bu maliyyə piramidasını yaradanlara himayədarlıq edənləri üzə çıxarmağa çalışırlar.
Ardını oxu...
Paris məhkəməsi keçmiş Fransa prezidenti Nikola Sarkozi barədə qəbul etdiyi qərarı bazar ertəsi (1 mart – Report) elan edəcək.

“Report”un məlumatına görə, 2007-2012-ci illərdə respublikanın rəhbəri olmuş siyasətçi korrupsiya və vəzifəsindən sui-istifadə də günahlandırılır.

Milli Maliyyə Prokurorluğu keçən ilin dekabrında Sarkoziyə telefon danışıqlarını gizli dinlənilməsi ittihamı ilə dörd il (iki il şərti - Red) həbs cəzası tələb edib. Prokurorluq keçmiş vəkil Tieri Erzoq və Konstitusiya Məhkəməsinin keçmiş hakimi Jilber Aziber üçün oxşar cəzanın verilməsi ilə çıxış edib.

İstintaqa görə, Sarkozi vəkili vasitəsi ilə Fransanın L'Oreal şirkəti tərəfindən seçki kampaniyasının qanunsuz maliyyələşdirilməsinə dair istintaqda mövcud olan məxfi məlumat müqabilində Aziberə Monako Knyazlığında vəzifə almasında kömək edəcəyinə dair söz verib.

İstintaq ələ keçirilmiş telefon danışıqlarının qeydlərinə istinad edib.
Ardını oxu...
Sosial şəbəkələrin erməni seqmentində yayılan növbəti xəbər düşmən ölkədə yenə də böyük xof yaradıb.

KONKRET.az xəbər verir ki, “Livenyus.am” teleqram kanalı guya Türkiyə xüsusi təyinatlarının 13 nəfərdən ibarət qrupunun Gürcüstan ərazisindən Ermənistana daxil olduğunu bildirib. İddia edilib ki, qrupa 3-cü səhra ordusunun əməliyyat şöbəsi, hərbi kəşfiyyat, planlaşdırma və kəşfiyyat koordinasiya şöbəsinin nümayəndələri daxildir. Guya türk komandoslar Ermənistanın Baş Qərargah rəisi və orduda xüsusi rol oynayan generalları zərərsizləşdirəcək.

Yayılan məlumatlarla bağlı artıq Ermənista Milli Təhlükəsizlik Şurası açıqlama verərək, sözügedən iddiaların yalan olduğunu deyib:

“Türkiyə xüsusi təyinatlarının Ermənistana gəlməsi ilə bağlı yayılan məlumatlar həqiqəti əks etdirmir. Bunu təkzib edərək həmvətənlərimizi dezinformasiyaya uymamağa, sayıq olmağa və yoxlanılmamış məlumatlardan uzaq durmağa səsləyirik”.
Ardını oxu...
Populyar “General de Europe” jurnalı Qarabağda döyüşən Fransa vətəndaşları və onların barəsində istintaqın başladılması ilə bağlı maraqlı yazı dərc edib.

"Report"un məlumatına görə, “Dağlıq Qarabağ: Fransa tərəfindən açılan ilkin istintaq” adlı məqalənin müəllifi Yaxın Şərq üzrə mütəxəssis, siyasi elmlər doktoru Sebastyan Bussua bildirir ki, ötən ilin sentyabrın 27-də Azərbaycan Dağlıq Qarabağ üzərində öz hüquqlarını bərpa etmək üçün hərbi əməliyatlara başlayıb.

Savaş Minsk Qrupu və beynəlxalq hüququn himayəsi altında otuz illik nəticəsiz danışıqlardan sonra qaçılmaz olub. Rəsmi Bakı beynəlxalq ictimaiyyəti hərbi əməliyyatların gedişi ilə bağlı daim məlumatlandırıb.

S.Bussua təəssüf hissi ilə qeyd edir ki, erməni işğalçı ordusunun müdafiəsinə kömək etmək üçün onlarla fransız müharibə ərazisinə yollanıb. Halbuki, onların bu hərəkəti tamamilə qanunsuzdur.

Ekspertin sözlərinə görə, Qarabağdakı separatçı rejimi müdafiə etmək və işğalçı orduya dəstək olmaq üçün yola çıxan fransızlar, əvvəlcə Ermənistan paytaxtında qəbul edilib, daha sonra isə müharibə əməliyyatlarının getdiyi ərazilərə çatdırılıb. Əslində isə erməni tərəfi onları geri qaytarmalı və döyüş bölgəsinə buraxmamalı idi. Çünki həmin şəxslərin əksəriyyəti erməni əsilli olsalar da, Fransa vətəndaşlarıdırlar. Lakin onlar bunun əksini ediblər.

Məqalədə bildirilir ki, bu yaxınlarda Azərbaycanın Fransadakı səfirliyi Dağlıq Qarabağ bölgəsində döyüşməyə gedən erməni əsilli Fransa vətəndaşlarının törətdikləri müharibə cinayətləri barədə istintaqın başlanmasına təkan vermək məqsədilə həmin şəxslər haqqında dəlilləri toplayıb Fransa Prokurorluğuna müraciət edib. Məhz Azərbaycanın səyi nəticəsində Fransaya qayıtdıqdan sonra potensial təhlükə mənbəyi olan vətəndaşlar barədə istintaq işləri başlanıb.

Hazırda Fransa sərhəd polisi Yerevandan gələn bütün sərnişinləri yoxlamadan keçirir və onları bölgədə qalma səbəbləri ilə əlaqədar sorğu-sual edir.
Ardını oxu...
Donald Tramp hələ də milyarder qalmaqda davam edir, lakin prezidentliyi zamanı onun maliyyə imperiyası xeyli sarsılıb.

Musavat.com xəbər verir ki, bu barədə Almaniyanın “Focus” jurnalında maraqlı yazı dərc olunub.

Yazıda keçmiş prezidentə qarşı maliyyə maxinasiyaları ilə bağlı açılan yeni işlərin onu təkcə bir çox əmlakdan deyil, hətta azadlığından məhrum edəcəyi iə bağlı iddialara yer verilib.

“Trampın eqosunu aşan tək şey onun ticarət qabiliyyəti, habelə hakimyyət və pul hərisliyidir”,-deyə müəllif Liza Rokar qeyd edib.

Hazırda Birləşmiş Ştatların sabiq dövlət başçısının sərvəti 2,5 milyard dollar məbləğində dəyərləndirilir ki, bu da onu varlı amerikalılar arasında “Forbes” reytinqinə görə 339-cu sıraya gətirir. Yeri gəlmişkən Donald Tramp ötən ilki sıralamayla müqayisədə 64 pillə geriləyib.

Liza Rokarın fikrincə, burada əsas səbəblərdən biri kimi koronavirus pandemiyasını göstərmək olar. Belə ki, ABŞ-da baş verən iqtisadi duğunluq Nyu York kimi meqapolisdə bir çox ofis və mənzillərin boşalmasına gətirib çıxarıb. Kirayə haqlarının dəyəri isə 19% azalıb. Bütün bunlar əmlak kralının vəziyyətinə ciddi təsir göstərib.

Elə onun Vaşinqton və Çikaqodakı daşınaz əmlaklarında da vəziyyət o qədər də ürəkaçan deyil. “Forbes” jurnalının hesablamalarına görə, onun Mayamidəki qolf-klubu öz dəyərini 80% itirib.

Bütün bunlarla yanaşı, Donald Trampın siyasi arenada işləri yaxşı getmir. Tərəfdarlarının bu ilin yanvar ayının 6-da ABŞ Konqresinin binasını basmasından sonra Nyu-York administrasiyası onunla bir biznesmen kimi münasibətlərinə son verdiyini açıqlayıb. Bundan başqa, Trampın plazalarında ofis icarəyə götürən şirkətlər də bununla bağlı sazişlərinə son verməyə başlayıb.

Bütün bunlar yetməzmiş kimi ABŞ prezidentinn başı vergi orqanları ilə bəlaya girib. Prokurorluq onu bəzi obyektlərni satmaq üçün xüsusi hiyləgərliklə onların qiymətini qanunsuz olaraq dəfələrlə qaldırmasından, az vergi ödəməkdən ötrü isə onların dəyərini kiçiltməsindən şübhələnir.

“Lakin Tramp həmişə müvəffəqiyyətsizlikdən qorxmayan və gələcəyə nikbinliklə baxan biznesmenlərdən sayılıb. O, vaxtilə “Playboy” jurnalına verdiyi müsahibədə özünü öyərək belə cümlələr sərf edib: “Bəzi adamlar ancaq varlı olmaq üçün yaranıb. Məsələn bəzilərinin piano çalmağa bəzilərinin isə qolf oynamağa istedadı var, mən isə pul qazanmaq sahəsində fitri qabiliyyətə malikəm”,-deyə yazıda qeyd olunub.
Ardını oxu...
Türkiyədə PKK terror təşkilatının 3 üzvü ələ keçirilib.

Axar.az xəbər verir ki, bu barədə məlumatı Türkiyə Milli Nazirliyi qeyd edib.

Məlumata görə, terrorçular qeyri-qanuni yolla Türkiyədən Yunanıstana qaçmağa çalışarkən yaxalanıb.
Ardını oxu...
Azərbaycan Respublikasının Moldovadakı səfiri Qüdsi Osmanovun Xocalı soyqırımına dair məqaləsi Moldovanın nüfuzlu “Tribuna.md” və “ava.md” xəbər saytlarında rus və rumın dillərində dərc edilib.

Məqaləni diqqətinizə təqdim edirik.

Ermənistanın keçmiş prezidenti Serj Sarkisyan: Xocalıda baş verənlərə görə təəssüflənmirəm!

Bu il 26 fevral tarixində Xocalı faciəsinin iyirmi doqquzuncu ildönümüdür. Bu, erməni silahlı qüvvələri tərəfindən azərbaycanlılara qarşı törədilən elə soyqırım idi ki, tarixdə belə qətliamlara az rast gəlinər. Xocalı soyqırımı iyirminci əsrin ən dəhşətli faciələri - Xatın və Hirosima ilə müqayisə edilə bilər.

Hər şey belə başladı. Ermənilər qədim Azərbaycan şəhəri olan Xocalını blokadaya aldılar. Şəhərdə bölgədəki yeganə hava limanı olduğu üçün strateji əhəmiyyətə malik idi. Bir ay davam edən hücumlar 25 fevral 1992-ci ildə daha da şiddətləndi. 1992-ci ilin 26 fevral gecəsində o dövrdə Xankəndində yerləşmiş keçmiş SSRİ-nin 366-cı motoatıcı alayının dəstəyi ilə erməni cinayətkar silahlı birləşmələri yeddi minədək insanın yaşadığı Xocalıya üç istiqamətdən hücum etdilər. 1992-ci il fevralın 25-dən 26-a keçən gecə cinayətkar erməni qoşunlarının vəhşilikləri nəticəsində 613 nəfər öldürüldü, 487 nəfər şikəst edildi, 1275 mülki şəxs - qocalar, uşaqlar, qadınlar əsir götürüldü, dözülməz işgəncələrə məruz qaldı, 150 nəfərin taleyi isə hələ də məlum deyil. Öldürülən 613 nəfərdən 106 nəfəri qadın, 63 nəfəri uşaq, 70 nəfəri qoca idi. Xocalı faciəsində 8 ailə tamamilə məhv edildi, 24 uşaq hər iki valideynini, 130 uşaq isə valideynlərindən birini itirdi.

Bir neçə gün sonra faciə yerinə gələn beynəlxalq jurnalistlərin, şahidlərin hekayələrini oxuduqda, necə deyərlər, “insanın tükləri biz-biz olur.” Onlar gördüklərini belə təsvir edirlər: qalaqlanmış cəsədlər, o cümlədən xüsusi amansızlıqla və qəddarlıqla qətlə yetirilən körpələr. Görünür ki, bir çoxu diri-diri yandırılmış, başları kəsilmiş, dəriləri soyulmuş, körpələrin gözlərinin çıxarılmış, hamilə qadınların qarınları yarılmışdı.

Rusiyalı televiziya müxbiri Yuri Romanov mülki şəxslərin öldürüldüyü yerə gəlişini belə xatırlamışdı: "Dəyirmi pəncərədən (vertolyotdan) baxıram və sözün əsl mənasında dəhşətli mənzərədən inanılmaz dərəcədə diksinirəm. Gün düşməyən yerlərində hələ də bozarmış qarın olduğu dağın ətəyində, saralmış otların üstündə cansız insalar uzanıb. Və yaxın üfüqə qədər uzanan bu nəhəng ərazi qadınların, qocaların, südəmər körpələrdən tutmuş yeniyetmələrə qədər bütün yaşlardan olan oğlan və qızların meyitləri ilə doludur…Gözləri çıxarılmış iki cəsəd - nənə və balaca bir qız. Mavi gödəkçəli kiçik bir qızın yanında boz saçlı başıyalın nənəsi üzü aşağı uzanıb. Nədənsə hər ikisinin ayaqları tikanlı məftillərlə bağlıdır və nənəsinin isə əlləri də bağlıdır. Hər ikisi də başından vurulub. Təxminən dörd yaşında olan kiçik qız son hərəkətində əllərini öldürülən nənəsinə uzadıb."

Londonun “The Times” qəzetinin jurnalisti Anatol Lieven qırğın yerində gördüklərini belə izah edib: "İki qrup – görünür, iki ailə yan-yana uzanmışdı - qadınların əlləri uşaqları gizlətməyə çalışırdı. Bəziləri, həmçinin balaca bir qız, başlarından dəhşətli yaralanmışdı: əslində yalnız üzləri qalmışdı. Sağ qalanlar ermənilərin yerdə uzananları belə atəşə tutduqlarını deyirdi".

“The New York Times” qəzetinin yazdığına görə, “Reuters”-in fotoqrafı Frederika Langen Ağdam yaxınlığında azərbaycanlıların cəsədləri ilə dolu iki yük maşını görüb. Bu maşınlardan birində 35 cəsəd sayıb. İkincisi də eyni idi. Onun sözlərinə görə, hamısı kişilər idi, bəzilərinin başları kəsilmiş ya da yandırılmışdılar.

“Известия” qəzetinin müxbiri Vadim Belıx bunları deyib: “Vaxtaşırı, əsirlikdə olanlarla dəyişdirilən qurbanların cəsədləri Ağdama gətirilirdi. Ancaq kabusda belə görünməyəcək dəhşət idi: gözlər oyulmuş, qulaqlar kəsilmiş, baş dəriləri soyulmuş, başlar kəsilmiş... Vəhşiliyin həddi yox idi."

Vertolyot pilotu mayor Leonid Kravts deyirdi: “26 fevralda yaralıları Xankəndidən çıxarıb Əsgəran qapılarından keçməklə geri qayıdırdım. Yerdəki bəzi parlaq ləkələr diqqətimi çəkdi. Enməyə başladım, sonra uçuş mexanikim qışqırdı: "Bax, orada qadınlar və uşaqlar var." Bəli, mən özüm də yamac boyunca səpələnmiş iki yüzə yaxın şəhid gördüm. Sonra cəsədləri götürmək üçün uçduq. Yerli polis kapitanı da yanımızda idi. Orada dörd yaşlı oğlunun kəllə sümüyünü görüb dəli oldu. Qadınların, uşaqların və yaşlı insanların hər yerdə kəsilmiş cəsədlərini görürdüm."

Şahidlər var ki, ermənilər hətta ölüləri də alçaldırdılar. Buna görə jurnalist Çingiz Mustafayev “Известия” qəzetinə bildirirdi ki, 28 fevralda ilk səfərində qətliam yerində çox sayda öldürülmüş insanlar var idi və 2 martda çoxlu sayda cəsəd xarab olmuşdu. Bundan əlavə, qırğından xilas olmağı bacaran 2213 nəfər rəsmi ifadələr verərək, erməni quldurlarının hamını: qadınları, uşaqları və qocaları yaxın məsafədən vurduqlarını deyirdilər.

Bu dəhşətli faciənin baş verməsi və birinci Qarabağ müharibəsində ən şiddətli faciə olmasını soyqırımı törədənlərin Xocalı hadisəsindən sonra müxtəlif illərdə mətbuatda verdikləri açıqlamalar da sübut edir.

Məsələn, Ermənistanın keçmiş prezidenti Serj Sarkisyan mətbuata verdiyi açıqlamada Xocalıdan əvvəl azərbaycanlıların ermənilərin mülki şəxslərə hücum etməyəcəyini düşündüklərini söylədi: “Bu stereotipi qıra bildik. Xocalıda baş verənlərə görə təəssüflənmirəm. Minlərlə insan ölsə belə, belə bir qırğın lazım idi". Xatırladaq ki, Serj Sarkisyan həmin dövrdə Xocalıya hücum edən Dağlıq Qarabağın separatçı erməni özünümüdafiə qüvvələri Komitəsinin rəhbəri idi və azərbaycanlılara qarşı soyqırımı həyata keçirən cinayətkarlardan biri idi.

Erməni yazıçı-jurnalist David Xerdiyanın “Xaç uğrunda” kitabında da yazır ki, 2 martda “Qaflan” adlı erməni qruplaşması cəsədləri yandırdı: “Qruplaşma azərbaycanlıların cəsədlərini yığıb Xocalıdan bir kilometr aralıda ayrı-ayrı hissələrdə yandırdı. Son yük maşınında baş və qol zədəsi olan 10 yaşlı bir qız gördüm. Yavaş-yavaş nəfəs alırdı. Soyuğa, aclığa və ağır yaralanmasına baxmayaraq, hələ də sağ idi. Ancaq Tiqranyan adlı əsgər onun qulaqlarından tutaraq mazut tökülmüş meyitlərin içinə atdı. Sonra onları yandırdılar. Alovdan kömək istəyənlərin ah-nalə və fəryad səsləri eşidilirdi".

David Herdiyan daha sonralar bildirib: “Soyuq bir səhər Daşbulaq yaxınlığındakı bataqlığı keçmək üçün ölülərdən bir körpü tikməli idik. 9-11 yaşlı bir qızın sinəsinə ayağımı qoyub getdim. Ayaqlarım və şalvarım qan içində idi”. Qondarma “dağlıq qarabağ respublikasının” qondarma təhlükəsizlik şurasının keçmiş rəhbəri Vitali Balasanyan da müsahibəsində azərbaycanlıları etnik zəmində qətlə yetirdiyini dəfələrlə etiraf edib. Qeyd etmək lazımdır ki, ermənilər onu milli qəhrəman hesab edirlər. Digər bir “milli qəhrəman” Zori Balayan 1996-cı ildə nəşr etdirdiyi kitabında Xocalıda azərbaycanlıların ermənilər tərəfindən soyqırıma məruz qaldığını etiraf edib. "Xaçaturla mən ələ keçirilmiş evlərdən birinə girəndə əsgərlərimiz 13 yaşlı bir türkü pəncərəyə mismarladı. Uşağın qışqırmasının qarşısını almaq üçün Xaçatur anasının kəsilmiş döşünü ağzına saldı. Sonra atasının uşaqlarımıza etdiyini bu 13 yaşlı türkə etdim. Qarnının, başının və sinəsinin dərisini soydum. Saata baxdım, 7 dəqiqədən sonra uşaq qan itirərək öldü. İlk peşəm üzrə həkim olduğum üçün humanist idim. Bu uşaqla etdiyimə görə özümü xoşbəxt hesab etmirdim. Ancaq xalqımın ən azı 1% qisasını aldığım üçün ruhumu sevinc bürüdü. Sonra Xaçatur öldürülən uşağın cəsədini parçaladı və onunla eyni kökdən olan köpəklərə atdı. Axşam eyni şeyi daha 3 türk uşağı ilə etdik."

Ermənistanın digər keçmiş prezidenti Robert Köçəryan ermənilər və azərbaycanlıların genetik uyğunsuzluğu olduğunu deyib ki, bu da öz-özlüyündə Nasizmin təzahürüdür. Baxın, bütün bu şəxslər Ermənistanda hörmətli insanlar sayılırlar. Yalançı vətənpərvərlikləri ilə beyinləri dolduraraq öz rəhbərlikləri altında fəaliyyət göstərən sadə erməniləri cinayətkar, qatil etdilər.

Ermənilərin Xocalıda soyqırım törətdikləri barədə daha bir fakt var. Qondarma dqr-in səlahiyyətliləri şəhər sakinlərini səsgücləndirici vasitə ilə hücumla əlaqədar xəbərdar etdiklərini və evakuasiya dəhlizinin hazırlandığını bildiriblər. Lakin sağ qalanların heç biri bunu təsdiqləməyib. Eyni məlumatların əks olunduğu broşürlərin bir neçə gün ərzində şəhərdəki vertolyotdan atıldığını da deyiblər, amma heç kim onları da görməyib. Üstəlik, faciədən sonra beynəlxalq mütəxəssislər tərəfindən aparılan araşdırmalar vərəqələrlə bağlı heç bir izə rast gəlməyib.

Bütün bunlar, həm də hücumun qəsdən gizlədilərək əhali üçün birdən-birə törədilməsi məqsədi daşıdığını göstərir.

Rəsmi Bakı bəyan edib ki, Xocalıdakı hadisələr 1949-cu il Cenevrə Konvensiyasının, BMT-nin Soyqırımı Cinayətinin qarşısının alınması və cəzalandırılması haqqında Konvensiyasının, Mülki və Siyasi Hüquqlara dair Beynəlxalq Paktın, Birləşmiş Millətlər Təşkilatının İşgəncələrə və digər qəddar, qeyri-insani və ləyaqəti alçaldan rəftar və cəza növlərinə qarşı Konvensiyası və Uşaq Hüquqları Konvensiyasının ciddi şəkildə pozulmasıdır.

Azərbaycanlılara qarşı törədilən Xocalı soyqırımının dünyada tanınmasında 2008-ci ildən bəri həyata keçirilən "Xocalıya Ədalət" beynəlxalq kampaniyasının da rolunu vurğulamaq lazımdır. Heydər Əliyev Fondunun vitse-prezidenti Leyla Əliyevanın başlatdığı bu beynəlxalq kampaniyanın uğurlu icrası nəticəsində dünyanın bir çox ölkəsi qısa müddətdə Xocalıdakı hadisələri soyqırımı kimi tanıdı, digərləri bu hadisələri pislədi və Azərbaycanla həmrəy olduqlarını bildirdilər, bu mövzuda müxtəlif qərarlar qəbul edildi.

Beləliklə, Pakistan və Sudan Xocalıdakı hadisələri birmənalı olaraq pislədi, Meksika, Kolumbiya, Çex Respublikası, İordaniya, Peru, İtaliya və digər ölkələrin parlamentləri qətliamı pisləyən qərarlar qəbul etdi. Buraya ABŞ-ın 20-dən çox ştatı da daxildir.

Hazırda, kampaniya uğurla davam etdirilir və hər il soyqırımın daha geniş kütləyə tanıdılması istiqamətində müsbət nəticələr əldə edilir. Bu illər ərzində Azərbaycan xalqı beynəlxalq təşkilatlardan və məhkəmələrdən 29 il əvvəl Xocalıda azərbaycanlılara qarşı soyqırımı törətmiş bütün erməni cinayətkarlarının müəyyənləşdirilməsini və insanlıq əleyhinə törətdikləri cinayətlərə görə məsuliyyətə cəlb olunmalarını istəyir və eyni zamanda tələb edir.

Dünyapress TV

Xəbər lenti