“Bank BTB”nin rəhbərliyində dəyişikliklər davam edir.

Bu dəfə bankın Müşahidə Şurasının üzvü İkram Hümbətov vəzifəsindən ayrılıb. Onun yerinə isə bankın audit komitəsinin üzvü Ramin Hüseynov təyin edilib.

Qeyd edək ki, ilin əvvəlində “Bank BTB”-nin İdarə Heyətinin sədr müavini Rauf Qurbanov bankdan ayrılmışdı. Paralel olaraq bir neçə departament rəhbəri və işçilərin də bankdan ayrıldığı haqqında məlumatlar var. Bankdakı mənbənin verdiyi məlumata görə, yüksək əməkhaqqı verməmək üçün artıq bir ildir ki, bankın İdarə Heyətinə sədr təyin edilmir.

İH sədrinin birinci müavini Eldəniz Hüseynov həm də sədr vəzifəsini icra edir.

İdarə Heyətinin keçmiş sədri Emil Rzayev ötən il mart ayında bankdan kənarlaşıb.

Xatırladaq ki, “Bank BTB” 2010-cu ildə yaradılıb. Onun nizamnamə kapitalı 71.5 mln. manatdır. Bankın səhmlərinin 75%-i Nigar İsmayıl qızı Mehdiyevaya, 19%-i Rza İsmayıl oğlu Sadiqə (Müşahidə Şurasının sədri), 6%-i isə Tükəzban Ağa qızı Mahmudovaya məxsusdur.

Beləliklə, artıq bir neçə nəfər “Bank BTB”-dən işdən ayrılıb, bu bankda “təhlükə zənglərinin çaldığını”n göstəricisidirmi?

İqtisadçı-ekspert Əkrəm Həsənov “Cebhe.info”-ya bildirib ki, ümumən “Bank BTB”dən bir neçə nəfərin işdən hansı səbəblə çıxmasının səbəbini bilmək olmur:

“Çünki ola bilər ki, daha yaxşı bir iş əldə edib. Banklarda zamanla belə proseslər olur. “Bank BTB”ni mən heç vaxt ciddi bank kimi qəbul etməmişəm. Həmin bankın heç vaxt güclü kadrları olmayıb.

İndi ola bilər ki, ya işçiləri digər işə qəbul edilib, yaxud maaş problemi yaşanıb. Hansısa vəzifənin yerinə namizədin olmaması onu göstərir ki, kadr özü gedib. Çünki adətən çıxaranda namizədi tapıb, sonra həmin həmin şəxsi vəzifədən azad edirlər”.

Ekspertin sözlərinə görə, əgər bir bank işçilərin əmək haqqını vermirsə, o, əslində bank deyil:

“Başqa şirkətlərdə zaman-zaman belə hallar ola bilər, amam bankın pulu hər zaman olmalıdır. Azərbaycanda yüksək maaş verməyən banklar ya çox böyük, ya da çox kiçik banklardır. Ən yüksək maaş ölkədə orta səviyyəli banklardadır. Kiçik bankların bir qayda olaraq imkanı yoxdur, hesab edirlər ki, burada elə də iş yoxdur, kadrları az, elə də yüksək səviyyəli olmurlar. Məsələn, “BTB”kimi banklar hesab edirlər ki, niyə yüksək maaş verməliyəm? Böyük bankların rəhbərləri yaxşı maaş alır, ancaq orta, kiçik səviyyəli işçilərə yüksək maaş vermirlər. Hesab edirlər ki, Allaha şükür edin ki, bizim kimi bankda çalışırsız. Həm də həmin bankların rəhbərləri ilin sonunda bonus alırlar. Bu mükafat da ilin sonunda bankın göstəricilərinə uyğun olur. Bank əgər yaxşı məbləğlə ili başa vurubsa, rəhbərlər həmin mükafatı alırlar. Ona görə də banklar daha çox maraqlıdır ki, orta səviyyəli və kiçik vəzifəlilərə yüksək maaş verməsinlər, ilin sonunda daha çox mənfəəət əldə etsinlər. Bu baxımdan yüksək maaş bir qayda olaraq orta səviyyəli banklarda olur. Onlar real özəl banklardır, inhisarçı deyillər, dövlətə bağlı deyillər. Ona görə də onlara yaxşı işçilər lazımdır ki, yaxşı xidmət göstərib müştəriləri cəlb etsinlər”.

Ekspert qeyd edib ki, ancaq bu, “BTB” kimi bank üçün problemdir:

“Çünki orada kadr yetişdirilmir. Bank özü nə gücdədir
ki, kadr da yetişdirsin. O bank üçün problem ola bilər. Ancaq deyə bilmərik ki, bu bank mütləq bağlanacaq. Ümumilikdə isə kadrların işdən çıxması mənfi haldır”.

Sumqayıt Şəhər İcra Hakimiyyəti sabiq əmək və əhalinin sosial müdafiəsi naziri Füzuli Ələkbərovun rəhbərlik etdiyi “İmprotex Motors” Məhdud Məsuliyyətli Müəssisə (VÖEN – 1400064731) ilə satınalma müqaviləsi imzalayıb.

Yeniavaz.com xəbər verir ki, Sumqayıt Şəhər İcra Hakimiyyəti “İmprotex Motors” MMM-dən 133 min manata “BMW 520i” markalı minik avtomobili alacaq.
Məlumat üçün bildirək ki, hazırda ölkənin aparıcı elan saytlarında 2023-cü il istehsalı olan və cəmi 24 km yürüşü olan “BMW 520i” markalı minik avtomobili 115 min 600 manata satışa çıxarılıb.
Qeyd edək ki, bu müqavilə bir mənbədən satınalma metodu ilə bağlanılıb və satınalma proseduru dövlət satınalmalarının vahid internet portalında keçirilməyib. Bu səbəbdən də Sumqayıt Şəhər İcra Hakimiyyətinin sabiq nazirdən satın aldığı avtomobilin bazardakı qiymətdən 17,4 min manat baha olmasının səbəbi bilinmir.
Xatırladaq ki, “Dövlət satınalmaları haqqında” Qanunun 15.1 maddəsində göstərilir ki, məxfi məlumatlar istisana olmaqla bütün dövlət satınalmaları yalnız portal vasitəsilə həyata keçirilir.
Eyni zamanda Qanunun 49-cu maddəsində qeyd olunur ki, bir mənbədən satınalma metodu aşağıdakı hallarda tətbiq olunur:
- Satınalma predmeti yalnız hər hansı konkret təchizatçıda olduqda;
- Satınalma predmetinin əvəzedicisi və alternativi olmadıqda;
- Satınalma predmetinə təcili tələbat yarandıqda;
- Təbii fəlakətlər, texnoloji qəzalar, epidemiyalar baş verdikdə və fövqəladə xarakter daşıyan digər hallarda bilavasitə insanların həyat və sağlamlığına vurulan ziyanın qarşısının təcili alınması məqsədilə;
- Satınalma predmeti kəşfiyyat və əks-kəşfiyyat fəaliyyətini təmin edən tələbata aid olduqda.
Qanunun tələblərindən də göründüyü kimi, İcra Hakimiyyətinin “BMW 520i” markalı avtomobil alması məxfi məlumat hesab oluna bilməz. Bu səbəbdən də, satınalma prosesinin bu şəkildə keçirilməsi başa düşülən deyil. Üstəlik müqavilənin hansı səbəbdən bir mənbədən satınalma metodu ilə imzalandığı da aydın deyil.

Səudiyyə Ərəbistanı müəssisənin miqyası və maliyyələşdirilməsi ilə bağlı fərziyyələr fonunda investorları cəlb etmək məqsədilə öz meqa-layihəsi "Neom" üçün Çində tanıtım turları təşkil edib. Manset.az xəbər verir ki, bu barədə "Business Insider" yazıb. "Neom" rəsmiləri Çin şirkətlərinə futuristik şəhər haqqında məlumat vermək üçün Pekin, Şanxay və Honq Konqa səfər ediblər. Heç bir sövdələşmə elan edilməyib, lakin Honq Konq Texnologiya İnnovasiyalarının İnkişafı Assosiasiyasından tədbir iştirakçısı Leonard Çan sərginin "Neom"un müəyyənləşdirilməsinə kömək etdiyini deyib. Şəxsi qəbulda iddialı layihəyə reaksiyalar əsasən neytral olub. Qonaqlara "Neom"un layihələrinin, o cümlədən 170 km uzunluğunda "The Line" şəhər xəttinin, sənaye Oksaqonunun, Trodjena xizək kurortunun və Qırmızı dənizdəki elit Sindala adasının tikintisinin immersiv nümayişi təqdim olunub. Bununla belə, rəsmilər meqalayihənin miqyasının mümkün azaldılması ilə bağlı son xəbərləri şərh etməyiblər. Layihə həmçinin vəsait cəlb etmək üçün ilk dəfə olaraq 1,3 milyard dollara qədər istiqraz buraxmağı planlaşdırır. Meqapolisin ümumi dəyəri 500 milyard dollar qiymətləndirilir. Qeyd edək ki, Səudiyyə Ərəbistanı 2030-cu ilə qədər uzunluğu 170 km olan şəhər tikmək istəyir. Burda ilkin olaraq 1,7 milyon insanın yaşayacağı gözlənilir.

İrandan Azərbaycan bazarına gətirilən kartofun digər xarici ölkələrlə müqayisədə bazar payı artıb.

Kartof bazarındakı qiymətlərdə isə kəskin artım gözlənilmir.

Qeyd edək ki Azərbaycanda kənd təsərrüfatının ən gəlirli sahələrindən sayılan kartofçuluğa maraq həmişə yüksək olub. Hazırda kartof Azərbaycanın əksər rayonlarında, o cümlədən Gəncə-Qazax, Aran, Şəki-Zaqatala, Quba-Xaçmaz və digər ərazilərdə əkilir.

Bildirilir ki, ölkəmizdə bu sahədə ixtisaslaşan bölgələr, irili-xırdalı təsərrüfatlar daxili bazarda məhsul bolluğuna mühüm töhfələr verməklə yanaşı, bir çox hallarda Azərbaycan kartofunun şöhrətini xarici ölkələrdə tanıda biliblər. Təsadüfi deyil ki, son illər ölkəmizdən ixrac olunan meyvə-tərəvəz məhsullarının sırasında kartofun da öz payı var.

Bəs Azərbaycan özünü niyə kartofla təmin edə bilmir?

Mövzu ilə bağlı fikirlərini “Cebhe.info”-ya açıqlayan iqtisadçı-ekspert Akif Nəsirli bildirib ki, Azərbaycan özünü kartofla təmin edə bilər:

“Lakin mövsümi amillərlə bağlı olaraq bu mühüm ərzaq məhslunun idxalında dəyişiklilklər baş verir. Belə ki, noyabr-dekabr aylarında baş verən kartofla təminatında azalma adətən, aprel-may aylarınadək davam edir. Bu səbəbdən də daxili bazarda kartofla bağlı müəyyən qıtlıq müşahidə olur. Nəticədə kartofun ölkəyə idxalındə müəyyən qədər artım baş verir. Bildirim ki, Rusiya və digər ölkələrə yazda kartof ixrac edirik. Payız fəslində isə bir hissəsini Rusiyadan, İrandan və Belarusiyadan idxal edirik.

Ekspert vurğulayıb ki, daxili bazarı kartofla təmin etmək üçün müəyyən üsullardan istifadə edilməlidir:

“Belə ki, kartof ixracına müəyyən qədər kvota sistemi tətbiq edilə bilər. O zaman kartofun daxili bazarda payı və qiymətlərdə isə ucuzlaşması baş verər. Bu üsullar yalnız kartofa deyil, digər məhsulların ixracına da tətbiq edilərsə, o zaman daxili bazarda meyvə və tərəvəzlərin qiymətində müəyyən qədər ucuzlaşma müşahidə olunar”.

Ekspert qeyd edib ki, kartof istehsalı dövlət tərəfindən dəstəklənməlidir:

“Hər il qış aylarından başlayaraq yaza qədər daxili bazarda kartof tükətmiş olur. Bu səbəbdən də ölkə daxilində növbəti mövsümə qədər kartofun ixracına müəyyən kvota qoyulmalıdır ki, daxili bazarda kartofu saxlamaq mümkün olsun”.

Aprelin 24-25-də Parisdə Türkmən Enerji İnvestisiya Forumu (TEIF 2024) keçiriləcək. Bu tədbir Türkmənistanın enerji sektoruna xarici investisiyaların cəlb edilməsi məqsədi ilə keçirilir. Aşqabad xarici investorlara quruda ən böyük qaz yatağı olan “Qalkınış”ın işlənməsini təklif edir. Son bir il ərzində Türkmənistan hakimiyyəti türkmən qazının Azərbaycan və Türkiyə vasitəsilə Avropa bazarlarına çıxması ideyasını israrla təbliğ edir.

Türkmənistanın Xəzərin dibi ilə Transxəzər qaz kəməri çəkmək ideyası 2007-ci ildən müzakirə olunur. Onun vasitəsilə Türkmənistan qazı Azərbaycan ərazisindən keçməklə Avropa İttifaqı ölkələrinə gedə bilərdi. Müxtəlif hesablamalara görə, layihə 2-5 milyard dollara başa gələcək. Lakin indiyədək bu layihəyə ciddi maraq olmayıb. Hələ 2023-cü ilin iyulunda Azərbaycan Prezidenti İlham Əliyev bildirmişdi ki, layihənin kim tərəfindən maliyyələşdiriləcəyi məlum olana qədər həyata keçirilməsi qeyri-real görünəcək.

“Siz çox yaxşı bilirsiniz ki, Avropa bankları indi mədən yanacaq layihələrini maliyyələşdirməyi dayandırıb. Ona görə də bunun üçün xeyli vəsait cəlb etmək çətin olacaq”, - deyə Azərbaycan lideri vurğulamışdı.

Bununla belə, Türkmənistan hakimiyyəti ümidini itirmir. Martın əvvəlində eks-prezident Qurbanqulu Berdıməhəmmədov Antalya Diplomatik Forumunda iştirak etmək üçün Türkiyəyə səfər edib və bu səfər zamanı Türkiyə Prezidenti Rəcəb Tayyib Ərdoğanla türkmən qazının Türkiyəyə mümkün tədarükü perspektivlərini müzakirə edib. Görüşün yekununda tərəflər təbii qaz sahəsində əməkdaşlığın inkişafına dair Protokol və neft və təbii qaz sahələrində əməkdaşlığa dair Niyyət Bəyannaməsi imzalayıblar.

Sənədləri imzaladıqdan sonra Berdıməhəmmədov bildirib ki, Türkmənistandan qaz Türkiyə və Avropaya iki yolla - ya Xəzər dənizi və Azərbaycan, ya da İranın boru kəməri infrastrukturu vasitəsilə gedə bilər.

Bundan əlavə, Türkmənistanın xarici işlər naziri Rəşid Meredov Avropaya bir neçə səfər edib və orada bu məsələni müzakirə edib.

Mövzu ilə bağlı AYNA-ya danışan “Caspian Barrel” Neft Araşdırmaları Mərkəzinin rəhbəri İlham Şaban deyib ki, Türkmənistan təbii qaz ehtiyatlarına görə dünyada dördüncü yeri tutsa da, bu ölkə beynəlxalq bazarlardan uzaqda yerləşir və buna görəd də problemlər yaranır: “Əminəm ki, yaxın 50 ildə Türkmənistan Çin istisna olmaqla, beynəlxalq bazarlara çıxış tapa bilməyəcək. 2023-cü ilin noyabrında türkmən qazının İraqa nəqli ilə bağlı intensiv danışıqlar gedirdi. İki sənəd imzalansa da, onları kommersiya əməliyyatına çevirmək mümkün olmayıb”.

“Ötən il Azərbaycan Türkmənistandan 1,5 milyard kubmetr qaz alıb, lakin bu, məhdud həcmdir. Türkmənistan qazı İran vasitəsilə Azərbaycana nəql olunur. İranın qaz nəqli infrastrukturu isə Azərbaycana 2 milyard kubmetrdən çox olmayan qaz nəql etməyə imkan verir. Bu vəziyyətin yaxın gələcəkdə dəyişəcəyini gözləmək real deyil”, - deyə ekspert bildirib.

Onun sözlərinə görə, Türkmənistan qazının Azərbaycan vasitəsilə Avropaya böyük həcmdə nəqlindən danışılarsa, onda Xəzər dənizinin dibi ilə qaz kəmərinin çəkilməsi mümkündür: “Söhbət 10 milyard kubmetr qaz nəqlindən gedir. Ancaq indiki şəraitdə və ortamüddətli perspektivdə bu, böyük riskdir. Bir il yarım əvvəl biz Baltik dənizində Rusiyadan Almaniyaya gedən boru kəmərlərində müəmmalı partlayışın şahidi olduq. İndi təsəvvür edin ki, Xəzərin dibi ilə qaz kəməri çəkilib və o, eyni risklə üzləşib. Rusiyanın şimalında və İranın cənubunda yerləşdiyi üçün bu risk yüksəkdir. Hər iki ölkə Qərbin sanksiyalarına məruz qalır və hər iki ölkə də təbii qaz hasil edir. Düşünmürəm ki, Rusiya və İran türkmən qazının elə burunlarının ucunda Avropaya necə nəql edilməsinə sakitcə baxacaqlar”.

“Azərbaycan öz boru kəmərlərini yaradanda Rusiya və İranın bu cür təzyiqlərindən yayına bildi. Sırf nəzəri cəhətdən Transxəzər qaz kəmərinin tikintisi bir neçə il çəkəcək və bu vaxta qədər Türkmənistan daimi qaz alıcıları tapmalı və onlarla uzunmüddətli müqavilələr imzalamalıdır. Amma fakt budur ki, 2040-cı ildən sonra Avropa enerji istehlakını kəskin şəkildə azaldacaq, çünki Avropa Yaşıl Sövdələşməsinə (European Green Deal) əsasən, Avropa İttifaqı ölkələri 2050-ci ilə qədər karbon neytral olmalıdır, yəni Avropa iqtisadiyyatı yaşıl enerjiyə keçəcək. Türkmənistanın böyük təbii qaz ehtiyatlarına malik olmasına baxmayaraq, vaxt itirib. Şəxsən mən inanmıram ki, yaxın illərdə Türkmənistan böyük həcmdə qazını Çindən başqa hansısa ölkəyə ixrac edə bilsin. Türkmənistan vaxt itirdi və imkanlarını əldən verdi”, - deyə Şaban fikrini yekunlaşdırıb.

Bu ilin yanvar-fevral ayları ərzində Azərbaycan Rusiyadan ümumi dəyəri 1 milyon 95,1 min dollar olan 2 min 476,7 ton qarabaşaq (“qreçka”) idxal edib.
Yeniavaz.com-un açıqlanan rəsmi məlumatlara istinadən apardığı hesablama göstərir ki, Rusiyadan idxal olunan 1 kiloqram qarabaşağın orta gömrük dəyəri 44 sent (75 qəpik) olub.
Məlumat üçün bildirək ki, bu ilin mart ayında ölkənin pərakəndə satış məntəqələrində idxal olunan qarabaşağın orta satış qiyməti 2,95 manat olub. Açıqlanan rəsmi məlumatlardan da göründüyü kimi, idxal olunan qarabaşaq market və dükanlarda gömrük dəyərindən 4 dəfə baha satılıb.
Onu da qeyd edək ki, Azərbaycana qarabaşaq yalnız Rusiyadan idxal edilib.

“Hazırda yumurtanın maya dəyəri istehsalçıya 14-15 qəpiyə başa gəlir. Bazardakı qiymət isə demək olar ki, maya dəyərindən aşağıdır. İstehsalçılar bu fərqi Rusiya bazarına yumurta göndərməklə kompensasiya edirlər. Bu vəziyyət isə iyun ayının sonuna qədər davam edəcək”
Bunu Bakupost.az -a açıqlamasında Azad İstehlakçılar Birliyinin sədri Eyyub Hüseynov deyib.
Ekspert bu tarixdən sonra yumurtanın qiymətinin qalxacağını bildirib:

“İyun ayından sonra yenidən qiymət sabitləşəcək. Bunun da ciddi səbəblərindən biri kənd toyuqlarının yumurtaya düşməsinin başlamasıdır. Eləcə də indi kənd yerlərində cücə mövsümüdür və kəndlilər o yumurtalarla cücə də çıxarırlar. Düşünürəm ki, hökumət müvafiq tədbirlər görməlidir ki, yumurtalıq toyuq saxlayan fabriklər bu müddət ərzində iflasa uğramasın”.
Qeyd edək ki, iri ticarət şəbəkələrində yumurtanın qiyməti düşüb. Əvvəllər 16-17 qəpiyə satılan yumurta bir neçə gündür ki, 10-12 qəpiyə təklif olunur. Bununla da orta hesabla yumurtanın qiyməti 40-45 faiz azalıb.

Azərbaycanda beş ulduzlu hotellərdə xidmət qiymətləri durmadan artır.

Xezerxeber.az-ın məlumatına görə, Dövlət Turizm Agentliyinin hesabatına əsasən, bu ilin yanvar-aprel ayları üçün Azərbaycanın şəhər və rayonlarındakı beş ulduzlu hotellərdə bir gecə qalmaq üçün orta qiymət 225 manat təşkil edib. Bu da ötən ilin eyni dövrü ilə müqayisədə 21,6% çoxdur.

Turizm üzrə ekspertlər bildiriblər ki, qiymətlərin mütəmadi artmasının bir sıra səbəbləri var.

Turizm üzrə ekspert Rəhman Quliyev bildirib ki, əvvəlki illərlə müqayisədə indi bəzi hotellərin xidmətlərində dəyişikliklər və əlavələr edilib.
Daha ətraflı süjetdə: