 |
|
|
Məlum olduğu kimi, aprelin 9-da Bakı şəhərinin Nəsimi, Nərimanov, Sabunçu, Səbail, Xətai rayonlarında, Gəncə (I hissə), Lənkəran, Şəki şəhərlərində, Astara, Ağdam, Ağcabədi, Ağsu, Biləsuvar, Daşkəsən, Xızı, İmişli, Kürdəmir, Qusar, Saatlı, Şabran, Samux, Şəmkir, Siyəzən və Zərdab rayonlarında Dövlət İmtahan Mərkəzi tərəfindən ümumi (9 illik) orta təhsil səviyyəsi üzrə buraxılış imtahanları keçiriləcək.
Dövlət İmtahan Mərkəzindən verilən məlumata görə, buraxılış imtahanında iştirak edəcək şagirdlər https://eservices.dim.gov.az/sagirdbv/ linkindən istifadə etməklə özlərinin imtahana buraxılış vərəqəsini, təhsil müəssisələri isə bütün şagirdlərin imtahana buraxılış vərəqələrini çap edə bilərlər.
Şagirdlər iş nömrəsiniburadanöyrənə bilərlər.
Buraxılış vərəqəsini çap etmək üçün kompüterə Adobe Reader proqramı quraşdırılmalıdır və brauzerin “Pop-up blocked” sahəsindən qeyd işarəsi götürülməlidir. Şəxsiyyəti təsdiq edən sənədində şəkli olmayan şagirdlər buraxılış imtahanı üçün təhsil müəssisəsi tərəfindən verilməli olan arayışı DİM-in saytından yükləyə bilərlər.
Şagirdlər bitirdikləri məktəbin yerləşdiyi yerə uyğun rayonda (şəhərdə) imtahan verirlər. Məcburi köçkün rayonlarının məktəblərində təhsil alan şagirdlər bitirdikləri təhsil müəssisəsinin yerləşdiyi şəhər və rayonların imtahan gününə uyğun tarixdə imtahan verirlər.
Gəncədə yerləşən məktəblərin şagirdlərinin imtahanı 2 imtahan gününə bölünüb. Bu hal yuxarıda müvafiq olaraq, “hissə” adlandırılıb və hiperlink qoyulub. Linkin üzərinə basdıqda qeyd olunan tarixdə hansı məktəblərin şagirdlərinin imtahan verməsi haqqında məlumat açılır. Digər məktəblərin şagirdləri aprelin 16-da imtahan verəcəklər.
Tanınmış bloger Mehman Hüseynov “Poz, qazan” mərc oyunun bir kələk olduğunu ifşa edən material hazırlayıb. Tribunainfo.az xəbər verir ki, bloger “Azərlotereya” ASC-nin xalqın cibinə necə girməsini təsdiqləyən video süjet təqdim edib. O, əhalini bu qumara inanmamağa çağırıb. Həmin video materialı təqdim edirik:
Bakı Apelyasiya Məhkəməsində hakim İlqar Murquzovun sədrliyi ilə ləğv edilmiş Milli Təhlükəsizlik Nazirliyinin (MTN) İstintaq Baş İdarəsinin sabiq rəisi general-mayor Mövlam Şıxəliyev, 2-ci şöbənin rəisi Vüsal Ələkbərov, İbtidai İstintaq İdarəsinin rəis müavini Yasin Məmmədov və şöbə rəisinin müavini olmuş Sahib Ələkbərovun apellyasiya şikayəti üzrə proses davam edir.
Artıq proses yekunlaşmaq üzrədir. İş üzrə zərərçəkənlər yekun çıxışlar edirlər. Sonuncu prosesdə zərərçəkən Hüseyn Səfərov çıxış edib.
Deyib ki, müttəhimlər məhkəmə dövründə yalan danışıb, dövlətə, istintaq orqanına, məhkəmələrə, zərərçəkənlərə iftira, şər atıblar:
"Mövlam Şıxəliyev Hərbi Məhkəmədə də, burada da deyir ki, guya məni tanımır, mənimlə kabinetində dəfələrlə görüşməyib. Mən Qurana and içirəm ki, saxlandığım günün səhərisi Mövlam Şıxəliyev məni müstəntiq və Vüsal Ələkbərovla birgə qəbul edib. Məni məcbur edib 1 milyon sözünü aldılar. Gördülüər ki, 1 milyon söz verirəm, qaldırdılar 3 milyona. Bizi 2008-ci ilin oktyabrında saxlayıblar, Mövlam Şıxəliyev həmin ilin martında MTN İstintaq Baş İdarəsinə rəis təyin olunub. Ona görə də yalan danışır ki, guya mən saxlanılanda ümumiyyətlə rəis olmayıb. Guya məni ümumiyyətlə görməyib. Saxlanıldığım müddətdə 3 dəfə Mövlam Şıxəliyevlə görüşmüşəm. Bir dəfə saxlanılan günün səhəri, bir dəfə buraxılmağıma 10 gün qalmış Vüqar Əliyevin otağında, bir də buraxıldığım gün Vüsal Ələkbərov aparıb sənədlərimi təcridxanaya qol çəkdirib və gəlib deyib ki, Mövlam Şıxəliyev səni çağırır. Onun yanına getmişik. Dedi ki, 1 milyon 650 min çatıb, 350 mini nə vaxt gətirirsən? Hədə ilə danışırdı. Dedi ki, pulu verməsən, məsələ başqa cür olacaq. Bir yerdə bu haqda danışsan, bizdən incimə. 30 il əvvəl videokamera, mobil telefon yox idi, istintaq gedib gizli şəkildə törədilən cinayətlərin üstünü açmırdı? Bunlar deyirlər ki, telefon danışığı yoxdur, video yoxdur, belə şey də olmayıb. Boş-boş danışırlar. Vüsal Ələkbərovun otağında oturmuşdum, 3 nəfər ora gəldi. Böyük-böyük "klyok”lar götürüb getdilər ki, oğlun gəlib, pul gətirib.
Düşüblər aşağı, gedib 7-10 dəqiqə sonra pulu oğlumdan alıb gəldilər. Əllərindəki "klyok”lar boş idi. Oğlum pulu idman çantasında gətirmişdi. Gəlib kabinetdə çantanı açdı, sevindiyindən sifəti gülürdü. Öz otağından Mövlama zəng edib dedi ki, Hüseynin oğlu gəlib. O da yanına çağırdı. Vüsal Ələkbərov pulu aparıb onun kabinetinə qoyub qayıtmağı 2-3 dəqiqə çəkdi. Ailəm o pulu yığmaq üçün Naxçıvandakı evimi satıb, 3 uşağımın evləri banka girov qoyulmaqla kredit götürülüb. Məni həbsdən buraxandan sonra Vüsal gəlib qalan 350 mini istəyirdi. Dedim ki, 1 evim var, onun da üzərinə həbs qoymusuz. Dedi ki, məktub verim, get həbsdən çıxar, sat. Nətər oldu, elə bunların hamısı bir vaxta düşdü? Müstəntiq də Mamed Musayevin oğlu idi. Onu da Vüsal qoşdu yanıma, getdik Səbail məhkəməsinə. Hakim Rauf Hüseynov idi. Getməyimizlə 5 dəqiqəyə qərar verdi, evi həbsdən çıxardı. Mən də evi 300 minə satdım. Bu gün də evimin əşyalarını kirayədən-kirayəyə daşıyıram. Bunu Allah götürər? Vüsal da, Mövlam da bunları çox yaxşı bilirlər. Bu cinayətlərin başında Mövlam Şıxəliyev durur. Dövlətə, dövlətçiliyə xəyanət edib”.
Hüseyn Səfərov deyib ki, həbsdən azad ediləndən sonra da ondan əl çəkməyiblər:
"Vüsal zəng edib deyirdi ki, Mövlam Şıxəliyevin ad günüdür. Mən də məcbur olub iki ədəd "Vertu” telefon almışdım. Üstündən bir müddət keçəndən sonra dedi ki, Mövlam Şıxəliyev general rütbəsi alıb, hədiyyə gətir. Mən də 21 min dollara saat alıb aparıb otağında özünə verdim. Onun otağını "su yolu”na döndərmişdim. İndi də deyir ki, guya mən onun otağında olmamışam. Halbuki mən dəfələrlə orada olmuşam”.
Hüseyn Səfərov Mövlam Şıxəliyevin cinayətləri barədə film çəkdirdiyini bildirib:
"Sovet dövrü olsaydı, bunlara birbaşa güllələnmə hökmü çıxarılardı. Bunlar prezidentin sözlərindən belə nəticə çıxarıb cinayətərini etiraf etmirlər. Məhkəmə gedən dövrdə Mövlam Şıxəliyev mən də daxil olmaqla bir neçə zərərçəkənin pulunu ödəməyə cəhd edib. Vəkili Arzu Cavadov vasitəsi ilə belə təklif edib. Deyib ki, pulunuzu Eldar Mahmudov verəcək. Məndə səs yazısı da var. Məhkəmədə Mövlam Şıxəliyevə yaxınlaşmışam, soruşmuşam ki, vəkilin deyir pulumuzu Eldar Mahmudov ödəyəcək. Bu düzdürmü? Mövlam da cavab verib ki, kişinin sözü bir olar. 2 dəfə Eldar Mahmudovunla görüşmək üçün onun bağına getmişəm. Yanımda zərərçəkən Əfsəl Həsənəliyev də olub. Eldar Mahmudov da xəbər göndərib ki, mənimlə tək görüşə bilər. Görüşmüşük, deyib ki, bu işlərdə onun əli yoxdur, bu işləri görən Mövlam Şıxəliyevdir”.
Hüseyn Səfərov çıxışının sonunda müttəhimlərə ittiam üzrə ən ağır cəzanın verilməsini, xüsusi müsadirə üçün istintaq zamanı üzərinə həbs qoyulan bütün əmlakların müsadirə edilməsini xahiş edib.
Hakim zərərçəkəni dayandıraraq iş üzrə konkret danışmasını istəyib.
Əfsəl Həsənəliyev qanunsuz həbs olunuduğunu deyib. Bildirib ki, əlində Gömrük Komitəsi sədrinin müavini Əsgər Abdullayevin məktubu var:
"Həmin məktubu o, Mövlam Şıxəliyevə yazıb. Yazır ki, mal gömrük nəzarəti altında tranzit olaraq Azərbaycan ərazisindən keçməklə İrana gedir. Bu məktub işin içində də var, sizə də təqdim edəcəyəm. Bunların bizim malı qaçaqmal kimi saxlamaları qanunsuz idi. Ona görə də gömrük nəzarəti altında Azərbaycan ərazisindən keçən malı zorla gömrükçülərin əlindən alıblar. İlk gündən də bizdən pul tələb ediblər”.
Bundan sonra proses aprelin 3-nə qədər təxirə salınıb. \\Qaynarinfo.Az
Bu gün ermənilərin azərbaycanlılara qarşı etnik təmizləmə siyasətinin növbəti genişmiqyaslı aktı – 31 mart soyqırımından 105 il keçir.
Bolşeviklərin xeyir-duası və dəstəyi ilə həyata keçirilən terrorlarda on minlərlə azərbaycanlı qətlə yetirilib.
1918-ci il martın 31-də Bakı şəhərində azərbaycanlıların kütləvi qırğınına başlanılıb. 3 aprel tarixinə qədər Bakı şəhərində və Bakı quberniyasının müxtəlif bölgələrində, eləcə də Qarabağ, Naxçıvan, Şamaxı, Quba, Xaçmaz, Lənkəran, Salyan, Zəngəzur və digər ərazilərdə Bakı Soveti qoşunlarının və daşnak erməni silahlı dəstələrinin azərbaycanlılara qarşı soyqırımı nəticəsində rəsmi mənbələrə əsasən on minlərlə soydaşımız məhz etnik və dini mənsubiyyətinə görə öldürülüb.
Yaşayış məntəqələri, tarixi abidələr, məscid və qəbiristanlıqlar viran edilib.
Dinc azərbaycanlıların qırğınında Bakı Sovetinin 6 min silahlı əsgəri, eyni zamanda “Daşnaksütyun” partiyasının 4 minlik silahlı dəstəsi iştirak edib.
Həmin dəhşətli günlərin şahidi olmuş alman A.Y.Kluqe 1925-ci ildə Bakı hadisələri barədə yazıb: “Ermənilər müsəlman (azərbaycanlı) məhəllələrinə soxularaq hər kəsi öldürür, qılıncla parçalayır, süngü ilə dəlmə-deşik edirlər. Qırğından bir neçə gün sonra bir çuxurdan çıxarılan 87 azərbaycanlının cəsədinin qulaqları və burunları kəsilib, qarınları yırtılıb, cinsiyyət orqanları doğranıb. Ermənilər uşaqlara acımadıqları kimi, yaşlılara da rəhm etməmişdilər”.
AXC yarandıqdan sonra 1918-ci ilin mart hadisələrinin araşdırılmasına xüsusi diqqət yetirilib. Nazirlər Şurası tərəfindən 1918-ci il iyulun 15-də bu faciənin tədqiqi məqsədi ilə Fövqəladə İstintaq Komissiyası yaradılıb.
Həmin Fövqəladə İstintaq Komissiyasının materiallarına əsasən, azərbaycanlılara qarşı soyqırımı törədən erməni quldurları Şamaxıda 8 minədək dinc sakini öldürüblər. Cavanşir qəzasının 28 kəndi, Cəbrayıl qəzasının 17 kəndi tamamilə əhalisi ilə birgə məhv edilib. Gümrü yaxınlığında əsasən qadınlardan, uşaqlardan və qocalardan ibarət 3 min nəfərlik azərbaycanlı köçü pusquya salınaraq, son nəfərinədək qətlə yetirilib.
Erməni silahlı dəstələri Naxçıvan qəzasının bir neçə kəndini yandırıb, Zəngəzur qəzasında 115 azərbaycanlı kəndi məhv edilib, 3257 kişi, 2276 qadın və 2196 uşaq öldürülüb.
Bütövlükdə Zəngəzur qəzası üzrə 10 068 azərbaycanlı öldürülüb və ya şikəst edilib, 50 000 azərbaycanlı isə qaçqın düşüb. İrəvan quberniyasının 199 kəndində yaşayan 135 min azərbaycanlı qətlə yetirilib, kəndlər isə yerlə bir edilib. Erməni silahlı dəstələri daha sonra Qarabağa yürüş edib, 1918-1920-ci illər arasında Qarabağın dağlıq hissəsində 150 kəndi dağıdıb və əhalisini məhv ediblər.
Britaniya briqada generalı R.Qortonun Londona göndərdiyi 1918-ci il 8 dekabr tarixli sənəddə 20 min, Fövqəladə İstintaq Komissiyasının sənədlərində 30 min, Milli Məclisin nəşr etdiyi kitabda isə 50 mindən çox müsəlmanın soyqırımına məruz qaldığı göstərilir. Yəqin ki, bu da son rəqəm deyil.
Paris Sülh konfransında Azərbaycan nümayəndə heyətinin rəhbəri Əlimərdan bəy Topçubaşov ABŞ Prezidenti Vudro Vilsona 1919-cu il 28 may tarixli müraciətində ona digər sənədlərlə yanaşı, Fövqəladə İstintaq Komissiyasının materiallarını da təqdim etmişdi. Bundan sonra obyektiv informasiya toplamaq üçün Cənubi Qafqaza ABŞ nümayəndə heyətinin göndərilməsi məqsədəuyğun sayılmışdı. Həmin ilin yayında Bakıya göndərilən general Harbord hadisələr barədə obyektiv məlumat toplamaq üçün müxtəlif şəxslərlə görüşmüşdü.
Ümumiyyətlə, Bakıda fəaliyyət göstərən rus və erməni təşkilatları Fövqəladə İstintaq Komissiyasının normal işinə maneələr törədir, təzyiq kampaniyaları təşkil edirdilər. Lakin bütün çətinliklərə baxmayaraq, komissiya qısa müddətdə çox böyük işlər görə bildi.
Bu hadisələrə onların bilavasitə təşkilatçısı olan Stepan Şaumyan özünəməxsus don geyindirməyə çalışırdı. 1918-ci il aprelin 13-də o, Moskvaya Xalq Komissarları Sovetinə yazdığı məktubda həmin ilin martında Bakıda ermənilərin azərbaycanlıların başına açdıqları müsibətlərə siyasi məna yükləmək üçün dəridən-qabıqdan çıxırdı.
Guya ki, bu hərəkətlər azərbaycanlılara qarşı ermənilərin milli ədavətindən yox, Sovet hakimiyyətinə sədaqətindən doğub. 1919-cu və 1920-ci illərdə martın 31-i Azərbaycan Xalq Cümhuriyyəti tərəfindən ümummilli matəm günü kimi qeyd edilib.
31 Mart soyqırımı faciəsinin araşdırılması və həqiqətlərin dünyaya yayılması işi ümummilli lider Heydər Əliyevin təşəbbüsü ilə başlanılıb.
1998-ci il martın 26-da Heydər Əliyevin imzaladığı və böyük tarixi əhəmiyyət daşıyan “Azərbaycanlıların soyqırımı haqqında” fərmanla 1918-ci il martın 31-i “Azərbaycanlıların soyqırımı günü” elan edilib. Bundan sonra həmin tarixin öyrənilməsi istiqamətində mühüm işlər görülüb, çoxlu əsərlər yazılıb və əcnəbi dillərə tərcümə olunub.
Son illər bu sahədə aparılmış araşdırmalar sayəsində çoxlu sayda yeni faktlar və sənədlər toplanılıb. Quba şəhərində tapılan kütləvi məzarlıq isə erməni vəhşiliyinin miqyası barədə təsəvvürləri aydınlaşdırıb.
Tovuzda 10 yaşlı Nərminin itkin düşməsi, 47 gün sonra kənddə yanmış meyitin tapılmasıyla bağlı cinayət işində üzə çıxan bir sıra yeni saxtakarlıqlardan danışım.
Məhkəməyə Ədliyyə Nazirliyinin Aysel adlı eksperti gəlib. Deyir ki, meyit yanan gün (6 yanvar) oradan götürülən paltarlar və başqa predmetlər yanvarın 17-dən fevralın 17-nə qədər məndə olub, onları tədqiq eləmişəm, rəy vermişəm. Rəydə də göstərib ki, hadisə yerindən tapılan bəzi paltarlarda İlkinin gödəkçəsinin lifi tapılıb.
Vəkillər Ayselə işin içində olan, Səhiyyə Nazirliyinin ekspertiza rəyini göstərdilər. O rəydə göstərilib ki, həmin paltar və predmetlər yanvarın 13-dən fevralın 21-nə qədər Səhiyyə Nazirliyinin ekspertlərində olub.
Yəni eyni paltarların, əşyaların faktiki eyni müddətdə müxtəlif yerlərdə olması mümkün deyil. Deməli, ya Aysel yalan danışır, ya da Səhiyyə Nazirliyinin ekspertləri…
O da məlum olub ki, Aysel hadisə yerindən tapılmayan, protokollarda olmayan parça, paltarlarla bağlı rəy verib. Məsələn, Ayselin əlinə necə gəlib çıxdığı bəlli olmayan bir cins şalvar qalığıyla bağlı rəy verib ki, bu, meyitin əynində olub, üstündən də İlkinin gödəkçəsinin lifi tapılıb.
Vəkillər də deyir ki, ay Aysel xanım, meyitin üstündə olubsa, bəs niyə müstəntiq onu hadisə yerində görməyib, oradan paltarları toplayanda bunu da protokollaşdırmayıb, orada tapılan hər şeyin fotosu çəkilib, arasında bu şalvarın şəkli yoxdur…
Aysel xanım deyir ki, mənə yanğın yerindən tapılan kisə gətirilib verilmişdi, onun içini açanda orada gördüm…
Vəkillər də deyir ki, Aysel xanım, həmin kisənin şəkli açıq şəkildə iş materialında var, orada cins şalvar-filan görünmür, olsaydı, müstəntiq də görərdi. İkincisi, ekspertiza mərkəzində Zemfira adlı ekspert də o kisəni açıb, bu haqda rəyi var, sizdən fərqli olaraq, onun içində cins parça-filan görməyib…
Aysel xanım o torbanın içindən hadisə yerində olmayan, başqalarının görmədiyi, üstündə qan ləkəsi olan qırmızı əski parçası da “tapıb”. Və rəy də verib ki, o parça ilə İlkin Süleymanovgilin evindən götürülən yorğan üzü eyni parçadandı…
Məsələ burasındadır ki, cinayət işində İlkin Süleymanovun Nərmini başından daşla vurduğu, qan axmasın deyə başına qırmızı parça bağladığı yazılıb…
Məhkəmədə sübutlara baxış keçiriləndə vəkillər etiraz etdi ki, maddi sübutlar saxlanılan torbaların ağzı möhürlü, bağlı olmalıydı. Bunlar isə açıqdır, sübutlara müdaxilə olunub, nələrinsə dəyişdirilmə ehtimalı var…
Süleymanovlar evlərindən götürülmüş yorğan üzünə baxanda göründü ki, onun bir hissəsi kəsilib. Və kəsilmiş hissə də üzərində qan ləkəsi olan, yanmış parçanın ölçüsünə uyğun gəlirdi…
Vəkillər iddia edir ki, Süleymanovların evlərindən yorğan üzü götürüləndən sonra onun bir hissəsi kəsilib və yandırılıb, saxta sübut düzəldilib. Onlar hesab edir ki, əgər doğrudan da əvvəldən belə bir əski parçası olsaydı, o zaman hadisə yerində olardı, oradan tapılıb, protokola da daxil edilərdi…
Yada salım ki, bundan öncə telefonla bağlı ekspert rəyində bənzər ziddiyyətlər ortaya çıxmışdı. Məsələn, ekspert rəy vermişdi ki, yanvarın 8-də səhər saat 10.30 radələrində İlkin Süleymanov telefonunda çılpaq qadın fotosuna baxıb.
İşin faktiki hallarından, məhkəmədə dindirilən çoxsaylı şahid ifadələrindən, hətta Nərminin öz valideynləri və digər qohumlarının dediklərindən məlum olur ki, İlkin yanvarın 6-da axşamdan artıq polis şöbəsində olub. Faktiki telefon artıq özündə yox, polislərdə olub. Ən asası, cinayət işinin materiallarında dindirmə protokolu var. Oradan görünür ki, həmin gün – yanvarın 8-də həmin saatda İlkin Süleymanov müstəntiqin yanında dindirmədə olub. Bu üzdən vəkillər də deyir ki, ya ekspert saxtakarlıq edib, ya da İlkin Süleymanov o çılpaq qadın şəklinə müstəntiqlə birlikdə baxıb – iki variantdan biridir…
Bir işdə nə qədər saxtakarlıq olar?!
Aytən Məmmədova
gununsesi.info
Yaşı 10 ildən çox olan minik avtomobillərinin Azərbaycan ərazisinə gətirilməsi ilə bağlı qərar qəbul edilib.
Nazirlər Kabinetinin 94 №-li Qərarına dair İzahına əsasən, istismar olunan minik avtomobillərinin Azərbaycan Respublikasının gömrük ərazisinə gətirilməsinin məhdudlaşdırılması haqqında Azərbaycan Respublikasının Nazirlər Kabinetinin 94 №-li qərarının əsas məqsədi insanların həyat və sağlamlığının, ətraf mühitin qorunması, avtonəqliyyat vasitələrindən atmosfer havasına atılan zərərli maddələrin miqdarının azaldılması və ekoloji vəziyyətin yaxşılaşdırılmasına dəstək olmaqdır. Qərara əsasən zavod buraxılış tarixinə görə yaşı 10 ildən çox olan minik avtomobillərinin Azərbaycan Respublikası ərazisinə gətirilməsi məhdudlaşdırılacaq.
Qeyd edək ki, Dövlət Statistika Komitəsinin məlumatlarına əsasən ölkədə 1,4 milyondan çox minik avtomobili mövcuddur. Bunun 1,3 milyondan çoxu şəxsi minik avtomobillərinin payına düşür.
Azərbaycanda minik avtomobillərinin yaş strukturu belədir:
2 ilə qədər olan minik avtomobilləri 2 faiz; 2 ildən 5 ilə qədər olan minik avtomobilləri 3 faiz; 5 ildən 10 ilə qədər olan minik avtomobilləri 11,9 faiz.
Beləliklə, yaşı 10 ildən artıq olan minik avtomobillərinin payı 80%-dən çoxdur.
TEREF.AZ-ın məlumatına görə, qərara müsbət yanaşdığını deyən yol-nəqliyyat məsələləri üzrə ekspert Fərhad Eyyubov "Sherg.az"a bildirib ki, müəyyən bir vaxtdan sonra bunu 5 ilə də sala bilərlər:
"Çünki ölkədə hazırda istismar müddətini tamamlamış çox sayda avtomobil var. Bu isə ekoloji cəhətdən havanı zəhərləndirir və atmosferə mənfi təsir göstərir. Həmçinin 30-40 il bundan öncə istehsal olunan nəqliyyat vasitələri yol hərəkətinin təhlükəsizliyinə böyük maneə təşkil edir. Ona görə de belə nəqliyyat vasitələrini nizamlamaq lazımdır.
Bunun birinci yolu isə ölkəyə gələn köhnə avtomobillərin axınını dayandırmaqdır. Hətta 5-6 il öncə Avro-4 standartına uyğun qərar qəbul edilmişdi. Biz bu standartın yalnız havanın ekoloji zəhərlənməsinə qarşı olduğunu başa düşürük.
Ancaq nəqliyyat vasitələri köhnəldikcə, onların müəyyən konstruktiv elementləri həm aktiv, həm passiv, həm də ekoloji təhlükəsizliyin elementləri, öz resurslarını itirmiş olur. Buna görə də ölkədəki nəqliyyat vasitələrini yeniləmək lazımdır. Mən hətta arzu edərdim ki, qərar 5 il öncə istehsal edilmiş avtomobillərə şamil edilsin. Yəni kimin imkanı varsa, maşınlarını yeniləməli, köhnələr isə istismardan çıxarılmalıdır. Ümumiyyətlə Nazirlər Kabinetinin yaxın zamanda çıxdaş məsələsinə baxılması barəsində də qərar verməsini təklif edərdim. Yol hərəkətinin təhlükəsizliyi barəsindəki proqramın müddətinə az qalıb. Yeni proqramda çıxdaş məsələsinin icra mexanizmi də işlənilsə yaxşı olardı".
Mart ayının 30-u gündüz saatlarından aprel ayının 1-i günün 2-ci yarısına qədər Xəzər Dəniz Akvatoriyasında Şimal-Qərb-Şimal küləyinin 18-23 m\s,arabir 25-28 m\s,acıq dənizdə arabir 30-35 m/s qədər güclənəcəyi gözlənilir. Dalganın hündürlüyünün 2-4 metr, sonrakı inkişafda 5.5-7.5 metr olacagı gözlənilir. Bununla əlaqədar “Azərbaycan Xəzər Dəniz Gəmiçiliyi” QSC (ASCO) Xəzərdə üzən gəmilərinə xəbərdarlıq göndərib.
“Azərbaycan Xəzər Dəniz Gəmiçiliyi” QSC-dən (ASCO) Manset.az-a verilən məlumata görə, ASCO gözlənilən küləkli hava şəraiti ilə əlaqədar Xəzərdə üzən bütün gəmilərinə xəbərdarlıq göndərib.
Xəbərdarlıqda bildirilib ki, gözlənilən hava şəraiti ilə əlaqədar gəmilərdə qabaqlayıcı təhlükəsizlik tədbirləri görülsün, gəmilərin qeyd edilən tarixdə təhlükəsiz sığınacaqlara getməsi təmin olunsun.
"Həmçinin, səfərə çıxacaq və dənizdə hərəkətdə olan gəmilər gözlənilən hava şəraitini nəzərə alaraq sığınacaqlara getmələrini qabaqcadan planlaşdırsınlar.
Bundan başqa, külək gözlənilən tarixlərdə limanlarda və lövbərlərdə dayanan gəmilərin kapitanları gəmilərin təhlükəsiz dayanmalarını təmin etsinlər", - məlumatda deyilir.
Dünən terror hücumuna məruz qalan millət vəkili Fazil Mustafa hadisə ilə bağlı ilk açıqlama verib.
O, "Haqqın.az" saytının rəhbəri Eynulla Fətullayev ilə əlaqə saxlayıb.
TEREF.AZ xəbər verir ki, F. Mustafa jurnalistə açıqlamasında bunları deyib:
"Evə qədər sürdüm. Maşını qaraja daxil etmək istəyəndə birdən nə olduğunu başa düşmədim. Pultun düyməsini sıxıb qaraja daxil olmağa hazırlaşırdım. Birdən maşının “podpres”i silkələndi. Çiynimdə dəhşətli ağrı hiss eləyirdim. Ağrılardan sonra bunun atəş zərbəsi olduğunu anladım, çünki atəş səslərini eşitdim. Qapını açıb düşdüm. Darvazaya tərəf bir neçə addım atanda artıq ikinci güllə mənə dəydi. Ayağımdan yaralandım. Evə gedərək tez qapını bağladım".
Millət vəkilinin sözlərinə görə, sonra qapını bağlayaraq Təcili yardım və hüquq mühafizə orqanlarına məlumat veriblər: "Təcili yardım maşınında özümü təhlükəsiz hiss edəcəyim xəstəxanaya aparılmağı xahiş etdim. Amma çox qan itirmişdim. Bədənim əsirdi. Daha heç nə xatırlamıram".
Danışıq zamanı F. Mustafanın həyat yoldaşı və oğlu da yanında imiş. Həyat yoldaşı əlavə edib ki, atışma qorxulu olub. Fazil Mustafa isə möcüzə baş verdiyini əlavə edir: “Özüm də başa düşmədim ki, necə sağ qaldım. Allah saxladı. Möcüzə oldu”.
Xatırladaq ki, dünən Zabrat qəsəbəsində yerləşən evinin qarşısında silahlı hücuma məruz qalan millət vəkilinə avtomat silahdan çoxsaylı atəş açılıb. F.Mustafa iki güllə yarası alıb. Çiyin nayihəsindən və ayağından yaralanan millət vəkilinə ilk olaraq Kliniki Tibbi Mərkəzdə (Semaşko) həkim müdaxiləsi edilib. Sonra isə deputatın təhlükəsizliyinin daha yaxşı təşkil olunması məqsədilə o, hüquq-mühafizə qurumlarından birinin hospitalına aparılıb.
Mustafa Fazil Qəzənfər oğluna qarşı törədilmiş terror aktı ilə bağlı cinayət işi başlanılıb.
28 mart 2023-cü il tarixdə saat 21:51-də Azərbaycan Respublikası Milli Məclisinin deputatı Mustafa Fazil Qəzənfər oğluna yaşadığı evin qarşısında - Bakı şəhəri, Sabunçu rayonu, Zabrat-1 qəsəbəsi, Babək küçəsi ev 2 “Z” ünvanında “Kalaşnikov” konstruksiyalı avtomat silahından atəş açılaraq terror aktı törədilmişdir.
Terror aktı nəticəsində Fazil Mustafa bədənin sağ çiyin qurşağını və sağ budun aşağı üçdə birini dəlib keçən güllə yarası almışdır. Ona zəruri tibbi xidmətlər göstərilir və vəziyyəti stabil olaraq qiymətləndirilir. Həyati təhlükəsi yoxdur.
Faktla bağlı Azərbaycan Respublikası Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə) və 228.2.1-ci (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) maddələri ilə cinayət işi başlanılmışdır. Terror aktını törətmiş şəxsin və cinayət hadisəsi ilə əlaqəsi olan digər şəxslərin müəyyən olunaraq cinayət məsuliyyətinə cəlb olunması istiqamətində kompleks təxirəsalınmaz əməliyyat-istintaq tədbirləri həyata keçirilir.
“Həkimlərin dediyinə görə, vəziyyəti qənaətbəxşdir və hər hansı həyati təhlükəsi yoxdur. Özünü yaxşı hiss edir”.
“Report” xəbər verir ki, bu sözləri Milli Məclisin (MM) sədr müavini Adil Əliyev Fazil Mustafaya qarşı silahlı hücuma münasibət bildirərkən deyib.
Onun sözlərinə görə, dövlətin aidiyyəti qurumları faktla bağlı araşdırmalara başlayıblar:
“Hesab edirəm ki, bu ağır terror hadisəsidir. Deputata qarşı bu cür hadisənin baş verməsi dövlət təhlükəsizliyi məsələsidir. Tam arxayın ola bilərsiniz ki, bu hadisə ilə bağlı dövlət tərəfindən ciddi tədbirlər həyata keçiriləcək”.
O qeyd edib ki, daxili nizamnaməyə əsasən millət vəkilləri mühafizəçilərlə təmin olunmurlar:
“Millət vəkilləri əgər istəyirlərsə, silahla təmin oluna bilərlər. Hesab edirəm ki, Azərbaycanda ciddi olaylar olmadığı üçün deputatlar silahdan istifadə üçün müraciət etməyiblər. Ölkəmizdə sabitlik tam bərqərar olunub və bu sabitliyi pozmaq istəyən qüvvələr bilməlidirlər ki, hadisələrin qarşısı qətiyyətlə alınır.
Hadisə yeni baş verib, istintaq qrupu yaradılıb, hadisə araşdırılır. Cinayətkarlar yaxalanmadan hər hansı bir iddia irəli sürmək yalnış fikir olardı. Yaxın zamanlarda aidiyyati qurumlar tərəfindən ictimaiyyətə açıqlanacaq. Əvvəlcədən kimin və ya hansı qüvvələrin törətdiyini demək yanlışdır”.