Sumqayıt şəhəri, Corat bağları massivində yaşayan Priyev Səyyah Ənvər oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, “Azəriqaz” şirkəti ona qarşı haqsızlıq edir:
“Mən, Priyev Səyyah Ənvər oğlu, yazaraq sizdən xahiş edirəm ki, problemimi işıqlandırasınız.
2017-ci ildə Saray qəsəbəsində həyat yoldaşım Piriyeva Xatirə Ramazan qızının adına torpaq sahəsi almışam. Həmin torpaq sahəsində 1 otaq tikib, smart tipli sayğac qoydurdum. Uzun müddət həmin evdə yaşamadıq. 2021-ci ildə sayğaca qaz yükləmək istədim, lakin yüklənmədi. Dərhal Abşeron Rayon Qaz İdarəsinə getdim. Oradan mənə bildirdilər ki, sayğac mexaniki sayğac ilə əvəz olunub. Mən isə dedim ki, xeyr, olunmayıb. Belə ki, bizim evdə yaşamamağımızdan istifadə edib, mənə aid olan sayğacı aparıb başqa ünvana qoyublar.
Məsələ ilə bağlı dəfələrlə 102 xidmətinə, qaz idarəsinə və bir çox qurumlara müraciət etmişəm. Lakin qurumlar səssizliklərini qorumaqla işlərinə davam edirlər.
Bir müddət sonra sahə rəsi Emil və nəzarətçi Həsən adlı şəxslər oğluma deyiblər ki, sayğacı tapmışıq, amma üzərində 5 min manat borc var. Oğlum onlara öz narazılığını bildirib.
Dekabr ayının 14-də mən “Azəriqaz”a yenidən müraciət etdim. Həmin ayın 25-də mənə bir xanım zəng vurdu, sual verdim ki, 5 min manat borca görə qaz niyə dayandırılmayıb? Xanım mənə dedi ki, ola bilər, abonent borcunu ödəyə bilməyib, əməkdaşlardan birinə 30-50 manat arası pul verib və bu səbəbdən də qaz kəsilməyib.
Hətta mənim ərizəmdən sonrada həmin sayğaca qazın verilməsi dayandırılmayıb. “Azəriqaz” əməkdaşı mənə sual verir ki, bəs bu qazı kim işlədir? Dəfələrlə hər şikayətimdə bildirmişəm ki, sayğac başqa ünvandadır, amma nə hikmətdirsə görmək istəmirlər.