Kəlbəcər rayonu, Oruclu kənd sakini, hal-hazırda Yevlax şəhərində yaşayan Alxanov Mərifət Əyib oğlu tərəfindən “Hürriyyət” qəzetinin redaksiyasına şikayət məktubu daxil olub. Hərbçi olduğunu bildirən şikayətçi deyir ki, briqada komandiri onu haqsız yerə işdən çıxarıb.
“Mən, Alxanov Mərifət Əyib oğlu, yazaraq diqqətinizə çatdırıram ki, 2004-cü ildən hərbçi kimi işləmişəm. 3 hərbi hissədə qusursuz xidmət etmişəm. 44 günlük müharibədə, Talış kənd, Suqovuşan və Laçın, Qaragöl istiqamətində döyüşlərdə iştirak etmişəm.
Lakin briqada komandirimiz Səxavət Baxşalıyev medallarımızın üstünü yazmayıb. Özü polkovnik-leytenantdır. Şəhid olanların və özünün yaxın adamlarının medallarının üstünü yazıb, sağ qalanların medallarını isə yazmayıb.
Mən öz haqqımı tələb edirəm, döyüşmüşəm, zərbə almışam, sağ qolum və sağ ayağımda sinir qolumu yığıb, açılmır. Laçında olanda ailə vəziyyətimlə əlaqəli report verdim, qəbul etmədilər. Dedilər ki, sənə köməklik edəcəyik, amma bizim adımız olmasın. Gələcəyin əsgəri olacaq oğlum möhkəm xəstə idi. İllərdir Tibb Universitetində müalicə götürür. 2 il olar ki, məni işimdən haqsızlıqla uzaqlaşdırdılar, adını da “uyğunsuzluq” qoydular.
Heç bir yerdə iş tapa bilmirəm, aldığım 80 manat heç nəyə bəs etmir. “Məşğulluğ”a yazılmışam, lakin oradan da heç bir xəbər yoxdur. Qaynar xəttə zəng vurmaqdan yorulmuşam, suallarıma cavab verə bilməyib, telefonu üzümə adboy verirlər”. //“Hürriyyət”//
Səhifəmiz bütün maraqlı tərəflərin rəyləri üçün açıqdır...
Ankara Milli Kitabxanasında 5-ci Türk dünyası yazarlar qurultayının açılış mərasimi keçirilib.
APA xəbər verir ki, qurultayda müxtəlif ölkələrdən 100-ə yaxın elm xadimi, şair və yazıçı iştirak edir.
“İLESAM”ın rəhbəri, yazıçı-şair Mehmet Nuri Parmaksız qonaqları salamlayaraq məmnunluq ifadə edib. Türk dünyası yazarlar qurultayının tarixindən bəhs edən M.N.Parmaksız qurultayın məqsəd və gələcək planlarından bəhs edib. Proqram haqqında qısa məlumat verən yazıçı qarşıya qoyulan məsələlərin əhəmiyyətini diqqətə çatdırıb. M.N.Parmaksız ortaq türk dilinin yaradılması məsələsinin zəruriliyini vurğulayaraq artıq işə başlamağın və müzakirələrin reallaşdırılmasının vacibliyini qeyd edib.
Azərbaycan Yazıçılar Birliyinin (AYB) sədri Xalq yazıçısı Anar çıxış edərək AYB adından bütün qurultay iştirakçılarını salamlayıb. Bundan əvvəlki dörd Türk dünyası yazarlar qurultayının iştirakçısı olmuş Xalq yazıçısı əvvəlki qurultayları xatırlayıb, ötən illərin ədəbi əlaqələrini yada salıb. Ənənələrin davam etdirilməsinin uğurlu addım olduğunu vurğulayan Anar müəllim 44 günlük haqq savaşımızda qazanılan parlaq qələbədən bəhs edib, Zəfər günü ərəfəsində belə bir qurultayın keçirilməsinin sevincini bölüşüb və fəxarət hissi ilə qeyd etdiyi bu fikirlər alqışlarla qarşılanıb: “Mən xoşbəxtəm ki, zəfər çalmış Azərbaycanı təmsil edirəm”.
“TÜRKSOY”un sədr müavini Sayit Yusuf ortaq türk dilinin yaradılması, ortaq türk ədəbiyyatı, mədəniyyəti anlayışının təbliği baxımından bu günə qədər görülən işlər barədə məlumat verib. S.Yusuf qurultayın fəaliyyətində hər kəsə uğurlar arzu edib.
Açılış mərasiminin ardınca seksiyalar öz işinə başlayıb.
Qeyd edək ki, “Türk dünyasında ortaq dil, əlifba”, “Türk dünyasında təhsil, mədəniyyət, incəsənət və ədəbiyyatda birlik, bərabərlik düşüncəsi”, “Türk dünyasında müəllif hüquqları problemləri və pirat kitabçılıqla mübarizədə görülməli olan işlər və çıxış yolları”, “Türk dünyasında ortaq kitabxana, oxu mədəniyyəti, ortaq dildə nəşrlər və tərcümə məsələləri”, “Türk dünyası ortaq ədəbiyyatı, müqayisəli ədəbiyyat, ədəbi növlər, ədəbiyyat universitetləri ilə qurumların iş birliyi” mövzularında təşkil olunacaq seksiyalara müxtəlif elm adamları, yazıçı və şairlər cəlb olunub.
