 |
|
|
Azərbaycanın müstəqilliyindən 32 ilə qədər vaxt keçsə də, Bakının mərkəzindən Qusarın, Astaranın ucqar dağ kəndlərinə qədər məktəbsiz qalan uşaqlar var.
Məktəbsiz qalan şagirdlərin böyük əksəriyyəti digər kəndlərdəki məktəblərə gedirlər və bu da onlara əlavə əziyyət olmaqla yanaşı, əlavə xərc də deməkdir. Məsələ ilə bağlı kiçik araşdırma aparanda məlum olur ki, ölkə təhsilində nə mobil məktəb, nə də ehtiyacı olan şagirdlərin günlük nəqliyyatla təmin olunma təcrübəsi yoxdur.
Qaradağın Qızıldaş qəsəbəsinin Şonqar yaşayış massivi də məktəbsizdir. Qəsəbənin icra nümayəndəsi Hüseyn Axundov deyir ki, məktəb tikintisilə bağlı istək olsa da, hələlik konkret addımlar atılmayıb:
“20 il əvvələ qədər ibtidai siniflər üçün məktəb olub, ancaq sonradan standartlara uyğun olmadığı üçün o da ləğv edilib. Buradan 260 uşaq məktəbli Qızıldaş qəsəbəsindəki məktəbə gedir. Şonqarda məktəb tikintisilə bağlı icra hakimiyyəti bir neçə dəfə aidiyyatı qurumlara müraciət edib, gəlib baxış keçirib gediblər. Elm və Təhsil Nazirliyinin tikinti şöbəsi var idi, ordan gəlib dedilər ki, bununla bağlı vəsait ayrılmalıdır. Valideynlər də dəfələrlə bizə məktəblə bağlı müraciət edirlər, biz də istəyərik olsun, ancaq müəyyən meyarlar var və nazirlik özü araşdırıb, qərar verməlidir”.
Ağsunun Zərqəva kəndində də məktəb yoxdur. Kəndin icra nümayəndəsi İlham İsmayılovun sözlərindən aydın olur ki, bu kənddən digər kəndlərə məktəbə gedən uşaqlar üçün günlük avtomobil təşkil olunmur:
“Məktəb ümumiyyətlə olmayıb. Oradakı məktəbli uşaqlar qonşu kəndlərə gedirlər. Məktəbin tikilməsilə bağlı da heç nə demirlər. Kəndin əhalisi də azalıb. Artıq camaatın böyük hissəsi qonşu kəndlərdə və ya Bakıda yaşayır”, - deyə o, əlavə edib.
Məktəbi olmayan bir kənd də Astaranın Unuz kəndidir. Bu kəndə də orta məktəbin tikintisi və ya məktəb olmadığına görə qonşu kəndlərə gedən uşaqların avtobusla daşınması üçün heç bir iş görülməyib:
“Kənddə əvvəlcədən məktəb olmayıb. Burada azsaylı ailələr qalırdı, onlardan da məktəbli uşağı olanlar qonşu kəndə köçüb, orada yaşayırlar”, – deyə kəndin icra nümayəndəsi Ağamalı Əliyev deyir.
Qusar rayonunun Sudur kənd inzibati-ərazi vahidi tərkibindəki yaşayış məntəqəsi Yerği Kekdə də məktəb yoxdur. Sudur kəndinin icra nümayəndəsi İkram Əsədov deyir ki, burada məktəbin tikilməsi də gözlənilmir:
“Əvvəllər Quturğan və Əlix kəndində məktəb var idi, Yerği Kekdə yaşayan məktəbli uşaqlar da ora gedirdi. Sonra bu iki kənddəki məktəblər də bağlandı və indi uşaqlar qonşu kəndlərdəki məktəblərə gedirlər. Bəziləri Qusarın mərkəzindəki məktəblərə gedir. Bu kəndlərdə yeni məktəblərin tikilməsilə bağlı da heç nə demirlər. Yerği Kekdə əhali də çox deyil”, – deyə o, bildirib.
Astaranın Pəlikəş inzibati ərazi vahidində olan Diqo kəndində də məktəb yoxdur. Ancaq kəndin icra nümayəndəsi Xaqani Xalıqov deyir ki, yeni məktəb tikintisi planda var:
“Diqo kəndində 50 nəfərə qədər məktəbli uşaq var. Bu vaxta qədər onlar Sım və Pəlikəş kənd orta məktəblərinə gediblər. Kənddə məktəbin tikilib başa çatdırılması nəzərdə tutulsa da, həmin məktəb hələlik ancaq ibtidai sinifləri əhatə edəcək”, – deyə o, əlavə edib.
Ancaq bu 32 illik müddətdə sırf təhsil infrastrukturunun təkmilləşdirilməsi, yeni məktəblərin tikilməsi üçün milyonlarla vəsait ayrılıb. Ölkə başçısı İlham Əliyevin 2013-cü il prezident seçkilərindən cəmi 15 gün sonra imzaladığı sərəncamla təsdiq olunan “Azərbaycan Respublikasında təhsilin inkişafı üzrə Dövlət Strategiyası”nda da, ondan 2 il əvvəl imzaladığı “Gələcəyə Baxış” İnkişaf Konsepsiyasında da təhsillə bağlı “Məktəblərin tikintisi və əsaslı təmiri sahəsində həyata keçirilən işlər davam etdiriləcək” deyilirdi.
Abzas Media məsələ ilə bağlı Elm və Təhsil Nazirliyinə sorğu ilə müraciət etsə də, suallarımız cavablandırılmayıb. //Abzas Media//