 |
|
|
Pakistanın tanınmış siyasi xadimi və İslam Alimləri Cəmiyyəti Şurası Partiyasının sədri Mövlana Fazlur Rəhman yanvarın 7-də iki ölkə arasında gərginliyin azalmasına kömək məqsədi ilə Əfqanıstanın paytaxtı Kabilə səfər edib.
“Report” xəbər verir ki, məlumatı İRNA yayıb.
Bildirilib ki, onu Əfqanıstanın “Taliban” hökuməti dəvət edib.
Məlumata görə, səfər iki ölkə arasında yüksək səviyyəli təmasların olmadığı, ortaq sərhədlərdəki iğtişaşların və fikir ayrılıqlarının artdığı bir vaxtda reallaşıb. Onu bu səfərdə Pakistanın Əfqanıstandakı müvəqqəti səfiri Übeydullah Nazamani müşayiət edib.
Mövlana Fazlur Rəhman Qəndəharda “Taliban” lideri Molla Heybətullah Axundzadə ilə görüşüb. Keçirilən görüşlərdə Pakistanın “Təhrik-e-Taliban” qruplaşması ilə bağlı yaranan problemlər müzakirə olunub.