Ermənistan və Azərbaycan xarici işlər nazirlərinə bu görüş üçün təşəkkür edirəm. Mən son toqquşma zamanı həlak olanların doğmalarına və dostlarına səmimi başsağlığı verirəm.

APA-nın xəbərinə görə, bunu ABŞ dövlət katibi Entoni Blinken üçtərəfli görüşdən sonra bildirib.

Blinken daha sonra qeyd edib: “Hər iki liderlə, Azərbaycan Prezidenti İlham Əliyev və Ermənistan Baş naziri Nikol Paşinyanla telefon danışığımda onlar sülh üçün hazır olduqlarını bəyan ediblər.

Güclü, davamlı diplomatik çərçivədə işləmək hamı üçün ən yaxşı yoldur. Ermənistan və Azərbaycan arasında fikir ayrılıqlarının hərbi yolla həlli yoxdur, lakin fikir ayrılıqlarını diplomatiya yolu ilə həll edən davamlı sülhə aparan yol var”.

00:29

Nyu-Yorkda Ermənistan və Azərbaycanın xarici işlər nazirləri Ararat Mirzoyan və Ceyhun Bayramov, eləcə də ABŞ dövlət katibi Entoni Blinkenin iştirakı ilə üçtərəfli görüş başlayıb.

Bu barədə Ermənistan Xarici İşlər Nazirliyinin mətbuat katibi Vaan Hunanyan məlumat verib.

17:05

Azərbaycan xarici işlər naziri Ceyhun Bayramov, Ermənistan xarici işlər naziri Ararat Mirzoyan və ABŞ dövlət katibi Entoni Blinken arasında üçtərəfli görüş olacaq.

Bu barədə Ermənistan Xarici İşlər Nazirliyi məlumat yayıb.

Qeyd edilir ki, sentyabrın 19-da baş tutacaq görüş rəsmi Vaşinqtonun təşəbbüsü ilə ABŞ-ın Nyu-York şəhərində keçiriləcək.

Ermənistan-Azərbaycan sərhədindəki vəziyyət müzakirə edilib

Kollektiv Təhlükəsizlik Müqaviləsi Təşkilatının monitorinq qrupunun Ermənistandakı missiyası başa çatıb.

AYNA xəbər verir ki, KTMT-nin katibliyinə istinadla xəbər verir ki, təşkilatın Birləşmiş Qərargahının rəisi, general-polkovnik Anatoli Sidorov Ermənistanın Müdafiə naziri Suren Papikyanla görüşüb. Tərəflər Ermənistan-Azərbaycan sərhədindəki vəziyyəti müzakirə ediblər.

Görüşdən sonra monitorinq qrupu Moskvaya yola düşüb.

12-13 sentyabrda Azərbaycan-Ermənistan sərhədində baş verən genişmiqyaslı hərbi toqquşmaya hansı təşəbbüs “son qoydu”?

Yəni ABŞ, yoxsa Rusiya atəşin dayandırılmasına nail oldu? Suala cavab tapmaq üçün xronoloji ardıcıllığa ümumi pəncərədən baxmaq lazımdır.

Atəşkəslə bağlı hərbi-siyasi və iqtisadi müşküllər girdabında olan Ermənistan fərqli tezislər ortaya buraxır.

Hərçənd ki, Ermənistan-Azərbaycan hərbi eskalasiyası başlayanda Nikol Paşinyan telefonlardan asılı qalaraq Kollektiv Təhlükəsizlik Müqaviləsi Təşkilatına müraciət edib atəşin dayandırılmasına nail olmaq istəyirdi.

İrəvanın məqsədlər həlqəsi KTMT vasitəsilə zəncir formalaşdırmaq, onu regiona gətirmək hiylələri ilə zəngin idi.

Ermənistan vaxtı saydı, saydı, lakin KTMT qoşun göndərmək üçün əsas olmadığını dilə gətirdi.

Lakin KTMT-nin lider dövləti Rusiya döyüşlərin getdiyi zamanda atəşkəs üçün təşəbbüslərdə önə çıxmağı bacarmışdı.

Rusiyanın vasitəçiliyi ilə ilkin razılaşma əldə edildi, ancaq Ermənistan buna əməl etmədi və Azərbaycanın bərqərar olduğu mövqeləri intensiv artilleriya atəşinə məruz qoydu.

Hərbi əməliyyatın ikinci fazasında da Azərbaycan adekvat tədbirlər görərək Ermənistan silahlı bölmələrinin digər atəş nöqtələrini də susdurmağı bacardı.

Vəziyyətin olduqca kritik olduğunu görən Ermənistan hərbi-siyasi komandanlığı məcbur qalıb atəşkəsə riayət etməli oldu, KTMT-dən rədd cavabı aldıqdan sonra isə İrəvan ABŞ tərəfə yıxılmağa başladı.

ABŞ-ın edə biləcəyi hər hansı yardıma bel bağlayan Ermənistan müstəsna bicliklə atəşkəsin əldə olunmasında Vaşinqtonun xüsusi roluna diqqət çəkdi.

Bu açıqlama Ermənistan parlamentinin spikeri Alen Simonyandan gəldi, ancaq onun yalan danışdığı gün kimi aydındır.

Təbii ki, ABŞ atəş səslərinin dayandırılmasına çalışırdı, onun belə təşəbbüslərini gözardı etmək sadəlövhlük olardı. Amma ABŞ-ın bu məntiqi Azərbaycanın tələblərinə cavab vermirdi. Qısası, bu məsələdə Vaşinqton Moskvaya uduzdu.

ABŞ ümumiyyətlə Rusiya ilə rəqabətin pikə çatdığı zamanda Cənubi Qafqazda nüfuz itkisinə məruz qaldı və bu itkilərini Ermənistana siyasi investisiya qoymaqla kompensasiya etmək istəyir.

ABŞ Qərb sisteminin bir orqanı olan Avropa İttifaqının Azərbaycan-Ermənistan münasibətlərinin tənzimlənməsindəki təşəbbüslərini də zədələyir.

Avropa İttifaqı ABŞ-Rusiya rəqabətinin Cənubi Qafqazda kəskinləşməsində tarazlayıcı mövqe rolunda idi və Azərbaycan-Ermənistan münasibətlərinin sülhlə yekunlaşmasına töhfələr verirdi.

İttifaqın bu duruşu Rusiyanı o qədər də narahat etmirdi, lakin sərhəddəki toqquşmalar fonunda ABŞ-ın sərgilədiyi birtərəfli mövqe Avropa Birliyi üçün də başağrısıdır.

oxu.az

Ermənistanda səfərdə olan ABŞ Konqresinin Nümayəndələr Palatasının sədri Nensi Pelosinin rəhbərlik etdiyi nümayəndə heyəti ölkənin müdafiə naziri Suren Papikyanla görüşüb.

Axar.az xəbər verir ki, bu barədə erməni mediası məlumat yayıb.

Erməni nazir sərhəddə baş vermiş toqquşma ilə bağlı amerikalı rəsmiyə məlumat verib. Öz növbəsində N.Pelosi də hazırki situasiya ilə bağlı ABŞ-ın mövqeyini təqdim edib.

Həmçinin görüş zamanı iki ölkə arasında müdafiə sahəsində əməkdaşlığa dair bir sıra məsələlər də müzakirə olunub.

Sentyabrın 18-də ABŞ dövlət katibi Antoni Blinken Azərbaycan Respublikasının Prezidenti İlham Əliyevə zəng edib.

“Report” xəbər verir ki, bu barədə Azərbaycan Prezidentinin Mətbuat Xidməti məlumat yayıb.

Telefon söhbəti zamanı əldə olunmuş atəşkəs rejiminin möhkəmləndirilməsi, regionda davamlı sülhün və təhlükəsizliyin təmin olunması, Ermənistan-Azərbaycan münasibətlərinin normallaşdırılması, o cümlədən sülh müqaviləsi üzrə danışıqlar, nəqliyyat dəhlizlərinin açılması istiqamətində səylərin davam etdirilməsinin vacibliyi qeyd olunub.

"Biz Ukraynanın əhəmiyyətli hərbi və iqtisadi ehtiyaclarını ödəməklə ona dəstəyimizi artırmalıyıq”

“Müharibədən sonra sülh müqaviləsinin bağlanması lazım olacaq. Şərtlər arasında rusların Ukrayna ərazisindən çıxarılması, təcavüzkarın ölkənin bərpasına maliyyə töhfəsi, habelə hərbi cinayətlərə görə məsuliyyət daşıyanların cəzalandırılması var”.

AYNA xəbər verir ki, bu sözləri Fransa mediasına açıqlamasında Avropa İttifaqının xarici və təhlükəsizlik məsələləri üzrə ali nümayəndəsi Cozef Borel deyib.

Onun sözlərinə görə, müharibə uzun müddət davam edə bilər və Rusiya Prezidenti Vladimir Putin könüllü şəkildə təslim olmayacaq.

"Biz Ukraynanın əhəmiyyətli hərbi və iqtisadi ehtiyaclarını ödəməklə ona dəstəyimizi artırmalıyıq. Çünki heç bir illüziyaya qapılmamalıyıq. Putin könüllü şəkildə təslim olmayacaq", - diplomat bildirib.

Bununla yanaşı, Borrell hərbi münaqişənin dayandırılması üçün şərtləri yalnız Ukrayna və ukraynalıların müəyyən etməli olduğunu vurğulayıb: “Müharibə bitməzsə, ona son qoymaq ümidi döyüş meydanında doğulur”.

Xatırladaq ki, Borrell Rusiyanın genişmiqyaslı işğalına başlamazdan bir neçə ay əvvəl Avropa İttifaqının Ukrayna Silahlı Qüvvələrinin təliminə başlamaq fürsətinin bir il əvvəl əldən verməsindən təəssüfləndiyini bildirmişdi.

Son günlər Azərbaycanın xarici ölkələrdəki diplomatik nümayəndəliklərinin binalarına qarşı bu ölkədəki erməni icmaları tərəfindən hücumlar törədilməsi ciddi narahatlıq doğurur.

Xarici İşlər Nazirliyindən verilən məlumata görə, özündə vandalizm və terror elementlərini ehtiva etməklə bu hücumlar diplomatlara, onların mülklərinə xəsarət yetirmək məqsədini güdür, beləliklə də cinayət məsuliyyəti doğuran əməllər kimi səciyyələndirilir.

“Radikal erməni qruplarının cinayətkar hərəkətlərini qətiyyətlə pisləyirik və müvafiq ölkələrdə bu cür təxribatların qarşısının alınmasına cavabdeh olan qurumların öz vəzifələrinə məsuliyyətlə yanaşmasını gözləyirik.

Azərbaycan tərəfi radikal erməni qüvvələrinin törətdiyi vandalizm aktlarının aidiyyatı dövlətlərin hüquq-mühafizə orqanları tərəfindən araşdırılmasını və bu cinayətləri törədənlərin hərəkətlərinə hüquqi qiymət verilməsini tələb edir.

Xatırladırıq ki, Diplomatik əlaqələr haqqında 1961-ci il Vyana Konvensiyasına uyğun olaraq, diplomatik nümayəndəliyi hər cür hücumlardan və zərər vurulmasından qorumaq və nümayəndəliyin sakitliyinin pozulmasının və ya şərəfinin təhqir olunmasının qarşısını almaq üçün lazımi tədbirlər görmək yerləşmə dövlətinin xüsusi vəzifəsidir”, - XİN-dən əlavə edilib.

Türkiyə Prezidenti Rəcəb Tayyib Ərdoğan ABŞ-a səfər edib.

Bu barədə TRT telekanalı məlumat yayıb.

O, Nyu-York şəhərində BMT Baş Assambleyasının iclasında iştirak edəcək.

Ərdoğan ABŞ Prezidenti Co Bayden daxil olmaq bir sıra görüşlər keçirəcək.

"Münasibətləri intensivləşdirmək və onların təftişini aparmaq lazımdır..."

Lukaşenko İran prezidentinə birlikdə müqavimətə çağırış edib...

Minsk və Tehran Günəş altında öz yerini tutmaq üçün birgə dayanmalıdır.

Bunu Belarus prezidenti Aleksandr Lukaşenko cümə günü İran prezidenti İbrahim Rəisi ilə Özbəkistanın Səmərqənd şəhərində Şanxay Əməkdaşlıq Təşkilatının sammiti çərçivəsində görüşü zamanı bəyan edib.

Moderator.az xəbər verir ki, bu barədə BELTA agentliyi məlumat yayıb.

Lukaşenko həmçinin qeyd edib ki, sammit çərçivəsi Belarusla İran arasındakı münasibətlərin inkişafı məsələlərinə dərindən nüfuz etməyə imkan vermir.

Lakin bu sammit ilkin olaraq görüşlər, gündəlik məsələlər, hansısa ciddi məsələlərdən danışmağa imkan yaradır.

"Bu, çox vacibdir, - Belarus prezidenti vurğulayıb. - Və buna imkan var".

Bu zaman Aleksandr Lukaşenko iki ölkə XİN-nin iki vektorunu qeyd edib: münasibətləri intensivləşdirmək və onların təftişini aparmaq.

Şanxay Əməkdaşlıq Təşkilatının (ŞƏT) əsası 2001-ci ildə qoyulub, hərbi blokla təhlükəsizlik üzrə açıq müntəzəm müşavirə arasında aralı mövqe tutub.

Təşkilatın ilkin vəzifələri kimi aşağıdakılar bəyan edilib:

- iştirakçı dövlətlərin geniş məkanında sabitliyin və təhlükəsizliyin möhkəmləndirilməsi;

- terrorçuluq, separatçılıq, ekstremizm, narkotrafiklə mübarizə;

- iqtisadi əməkdaşlıq, energetika tərəfdaşlığı, elmi və mədəni qarşılıqlı əlaqənin inkişaf etdirilməsi.

Təşkilata Hindistan, Qazaxıstan, Çin, Qırğızıstan, Rusiya, Tacikistan, Pakistan və Özbəkistan daxildir.

Müşahidəçi ölkələr Əfqanıstan, Belarus, İran və Monqolustandır.

Tərəfdaş ölkələr Azərbaycan, Ermənistan, Kamboca, Nepal, Türkiyə və Şri-Lankadır.

2021-ci ildə ŞƏT-in Düşənbə sammitində Misirə, Qətərə və Səudiyyə Ərəbistanına dialoq üzrə status verilməsi proseduru başlanılıb.

Bu il Belarus ŞƏT-ə tam hüquqlu üzv kimi qoşulması barədə sorğu verib.