Bildiyimiz kimi, hər il Yeni il ərəfəsində Azərbaycanın paytaxtı Bakı da daxil olmaqla dünyanın əksər şəhərlərinin mərkəzi meydanlarında ölkələrin “əsas yolka”ları quraşdırılır.
Yeniavaz.com xəbər verir ki, bu il Azərbaycanın “əsas yolka”sı paytaxt Bakıda “Kukla Teatrı”nın arxasındakı ərazidə quraşdırılıb.
Açıqlanan rəsmi məlumatlarda yolkanın hündürlüyünün 35 metr olduğu bildirilir.
Məlumat üçün bildirək ki, Rusiyanın məşhur “Turstat” agentliyi MDB ölkələrində qurulan yolkaların hündürlüyünü açıqlayıb. Azərbaycanın “əsas yolka”sı hündürlüyünə görə MDB ölkələri arasında ilk 4-lüyə daxil olub.
Onu da bildirək ki, MDB ölkələri arasında yalnız Rusiyanın paytaxtında qurulan yolka təbii ağacdandır.
MDB ölkələrinin paytaxtlarında qurulan Yeni il yolkalarının hündürlüyünü təqdim edirik:
- Aşqabad (Türkmənistan) - 44 metr
- İrəvan (Ermənistan) - 37 metr
- Daşkənd (Özbəkistan) - 35 metr
- Bakı (Azərbaycan) - 35 metr
- Bişkek (Qırğızıstan) - 32 metr
- Minsk (Belarus) - 30 metr
- Düşənbə (Tacikistan) - 30 metr
- Moskva (Rusiya) - 25 metr
- Astana (Qazaxıstan) - 25 metr

Azərbaycan xalqı öz dövlət televiziyası olan AzTV-nin təqdimatında 2024-cü ilə yenə xalq artisti, milyoner Zeynəb Xanlarova ilə girdi. Deyilənə görə, bu ənənə 50 ildir ki, davam edir. Biz yaşda olanların nəvələrinin hazırda gördüyü mənzərəni zamanında bizim babalarımız görüb. Sosial şəbəkələrdə paylaşılan statuslardan aydın olur ki, artıq xalqımız bu mənzərədən bezdiyini açıq ifadə edir. Çünki həm gözlər eyni mənzərəni görməkdən “mazol” olub, həm də Zeynəb o Zeynəb deyil…
Mən bunun səbəbini Azərbaycanda hakim olan bir maraqlı tendensiya ilə izah edərdim. Bunun adına “siyahıya düşmək” deyə bilərik. Ölkənin bir çox sahələrində belədir. Sən müxtəlif sahələrdə tərtib edilən siyahılardan hansınasa düşdünsə, iş belə də- “yağ” kimi gedəcək. Məsələn, zamanında radikal müxalif mövqedə olan, sonra əqidəsini 360 dərəcə dəyişərək, mövcud hakimiyyəti dəstəkləmək yolunu tutan eyni talehli bir neçə siyasətçi və ya jurnalistin həyatını, yaşam tərzini analiz etdikdə, onlara bəslənən tam fərqli münasibətin şahidi olursan.
Digərlərindən heç nəyi ilə fərqlənməyən, müstəsna qabiliyyəti olmayan belələrindən hansılarasa yüksək qayğı bəslənir, qəzetlərinə, QHT-lərinə pul ayrılır, özlərinə fəxri adlar, mandat verilir, övladları vəzifəyə qoyulur, ancaq digərlərinə isə elə radikal müxalifətdə olduğu zamandakı münasibət bəslənir.
Bir misal çəkim. Zamanında jurnalistika ilə məşğul olan bir nəfərlə əməkdaşlıq edən şirkət, əlamətdar günlərdə bu adama hədiyyələr göndərirmiş. Bu şəxs uzun müddətdir jurnalistikadan aralanıb, tam fərqli sahədə çalışır, ancaq yenə də həmin şirkət ona hədiyyələri göndərir. Özü gülə-gülə deyirdi: “ Qoy hara kimi gedirsə, getsin da, niyə üstünü açıram?” Zeynəb Xanlarova efirdən könüllü imtina etməyənə kimi, bu adam da məlum şirkətdən hədiyyələrini alacaq. Çünki adı zamanında “siyahıya” düşüb, vəssəlam.
Dövlət qurumlarının da “siyahıları” 10 illiklər keçsə belə, dəyişməkdə maraqlı deyillər. Çalışdığımız jurnalistika sahəsində elə adamlar var ki, nə yazır- nə pozur, heç bir fəallığı yoxdur, adını çəksəniz jurnalist olduğunu heç öz cameəmiz də bilməyəcək, amma: jurnalistlər binasından ev alır, fəxri ad verilir, QHT-si var, işlədiyi yerdən aldığı maaşdan əlavə, bəlli xətdən güya sosial şəbəkələrdə göstərdiyi “fəallığa” görə aylıq paket belə alır.
Buna görə də, Zeynəb Xanlarovaya qəzəblənməyin. Allah ona uzun ömür versin, ancaq bilin ki, onu düşdüyü “siyahıdan” çıxarmaq bizim gücümüzdə deyil. Görək, hara kimi gedir?..
Məhəmmədəli Qəribli
AZİNFORUM.AZ

Məşhur türkiyəli aktyor və aparıcı İlker Ayrık həyat yoldaşı ilə ferma qurub.

Tribunainfo.az Türkiyə mediasına istinadən xəbər verir ki, aktyor həyat yoldaşı Sanem Bağcı Ayrık ilə uzun müddətdir arzusunda olduqları fermalarında xidmət göstərirlər.

Vaxtının çoxunu fermada keçirən Ayrık “Hər şey yaxşı gedir. 11 itim, 2 eşşəyim, ev quşum və dovşanım var” deyib.

“Yılan Hikayesi”, “Tatlı Hayat”, “Yedi Numara”, “Geniş Aile” ve “Seksenler” kimi seriallarla yanaşı şou aparıcısı olan İlker Ayrık indi layihələrdə az iştirak edir və vaxtının çoxunu ailəsi ilə birlikdə fermada keçirir.

Belə ki, aktyor 7 hektarlıq ərazidə həm kənd təsərrüfatı, həm də restoran sektorunda xidmət göstərir. Fermada açıq havada kinoteatr və caz konsertləri də təşkil edilir.

Məşhur aktyor həyat yoldaşı ilə birlikdə fermasında toyuq, ördək və qaz da bəsləyir. Artıq bağlardan yığılan təzə məhsullar satılmaq üçün bazarda öz yerini tutub.

BDNF (beynin neyrotrofik faktoru) - beynin qidalanma faktoru. Bu möcüzəli molekul sinir proseslərini, neyroplastikliyi stimullaşdırır və yeni sinir hüceyrələrinin əmələ gəlməsinə kömək edir.BDNF çatışmazlığı depressiya, obsessiv-kompulsiv pozulmalardan tutmuş şizofreniyaya qədər bir çox psixi xəstəliklərin əsas səbəbidir. Beynimiz statik, donmuş bir sistem deyil. Bir neçə ilə zəka göstəricisi IQ həm arta, həm də azala bilər, yəni beynimizin fəaliyyəti insanın öz əlindədir.Orqanizmdəki hüceyrələr öz-özünə inkişaf etmir, onların molekulyar siqnallara, yəni hüceyrə reseptorlarına təsir edən, hüceyrələri müəyyən hərəkətlərə sövq edən xüsusi zülallara ehtiyacı var. BDNF-yə sinir hüceyrələrinin böyüməsini və yeni sinapsların əmələ gəlməsini, sinir əlaqələrini idarə edən genlər daxildir. BDNF xüsusilə hipokamp və korteksdə, yəni qavrama və yaddaşa cavabdeh olan bölgələrdə aktivdir. Həm heyvanlarda, həm də insanlarda fiziki məşqlərlə BDNF səviyyəsinin sürətli artdığı, BDNF artması ilə isə hipokampda böyümə və koqnitiv funksiyalarda yaxşılaşma müşahidə edilmişdir.Tədqiqatlar göstərir ki, BDNF səviyyəsinin artması qısa və uzunmüddətli yaddaşın yaxşılaşmasına səbəb olur. Fiziki və ruhi sağlamlığın yüksək səviyyələri BDNF-nin daha yüksək səviyyələri ilə əlaqələndirilir.Məlum olub ki,1. Şəkər və yüksək karbohidratlı qidalar…2. Azhərəkətli həyat tərzi, maraqsız və hobbisiz həyat …3. Yuxusuzluq ..4. Və ən əsası, stress BDNF istehsalını azaldır.Onun sintezinə təsir etməyin, istehsalını artırmağın sadə yolları var.Fiziki hərəkət, xüsusilə yüksək intensivlikli aktivlik (sprint, ağırlıq qaldırma, intervallı məşqlər, rəqs)Qidalanmada məhdudiyyətlər, xüsusən azkarbohidratlı qidalarZəngin mühit (yeni tanışlıqlar, səyahətlər, maraqlı hadisələr, maraqlı hobbi və yaradıcılıq) BDNF-i artırır.

"Teymur Əmrah 1 aya yaxındır ki, Azərbaycan Dövlət Akademik Milli Dram teatrında vokal müəllimi kimi fəaliyyət göstərir".
Bu fikirləri musavat.com-a açıqlamasında Akademik Milli Dram Teatrının bədii rəhbəri Mehriban Ələkbərzadə deyib.

"65 yaş üzəri işçi var idi, həmin şəxs pensiyaya çıxdığına görə onun yerinə Teymur Əmrah təyin olundu. Hazırda konkret tamaşa ilə bağlı iş görür. Bizə aktyorlarla məşğul olan vokal savadlı adam lazım idi. Yeni tamaşaya da belə bir adam mütləq lazım idi. Bu da Teymur Əmrah oldu", - M.Ələkbərzadə bildirib.

Xəbər verdiyimiz kimi Azərbaycan Dövlət İrəvan Dram Teatrının aktyorları Anar Bulud və Fərid Vəliyev ərizə yazaraq işdən çıxıblar. Aktyorların teatrdan çıxmasına səbəb isə teatrın baş rejissoru, Əməkdar artist Sərvər Əliyevin işdən çıxarılması ilə bağlı imza toplanması olub. Moderator.az-a açıqlama verən aktyor Fərid Vəliyev bunları bildirib.
“Bildiyiniz kimi hadisələr, teatrımızın baş rejissoru Sərvər Əliyevlə və teatrımızın direktoru İftixar müəllim arasında başladı. Və münasibətlər getdikcə daha da pisləşdi. Ayın neçəsi olduğu yadımdan çıxıb, bizi işə çağırdılar. İşdə bildik ki, Sərvər Əliyevi teatrdan uzaqlaşdırmaq üçün imza toplanır. Mən qol çəkməkdən imtina etdim və dedim ki, bu məsələyə qarışa bilmərəm. Çünki, mən aktyoram. Mənim işim yaradıcılıq və səhnədir. Qol çəkmədim. Və bir daha bildirdim ki, bu işə nazirlik baxmalıdır. Çünki, baş rejissoru teatra təyin edən nazirlikdir. Bu məsələ onlara aiddir. Daha sonra yenə iclas oldu. İclasda deyildi ki, Sərvər müəllim prezidentə məktub yazıb. Və yenidən teatrda imza toplanmalı olduğunu dedilər. Mən yenə öz mövqeyimdə qaldım və qol çəkməyəcəyimi bildirdim. Bu zaman teatrımızın direktoru İftixar müəllim, dedi ki, “kim qol çəkməsə işdən azad olunacaq”. Elə o anda yenə də öz mövqeyimdə qaldığımı və məsələyə qarışmayacağımı bildirdim. Bu zaman İftixar müəllim dedi ki, işdən azadsan. Mən də otaqdan çıxıb evə gəldim. Sabahı gün yenə bizi teatra çağırdılar. Mən çağırılan vaxtdan biraz sonra getdim. Ona görə gec getdim ki, gedim sənətlərimi götürüm. İftixar müəllim gələndə ondan sənədlərimi istədim. Soruşdu ki, nə sənəd? Dedim ki, əmək kitabçası və s. Və bildirdim ki, dünən dediniz ki, imza çəkmədiyim üçün işdən azadam. Bu zaman İftixar müəllim dedi ki, mən elə söz deməmişəm. Bir daha soruşdum ki, axı müəllim dünən siz belə dediniz?! Yenə dedi ki, mən elə bir söz deməmişəm. Və məndə bu zaman öz istəyimlə işdən çıxmaq haqqında ərizə yazdım. Çünki, bu cür qalmaqalın bir parçası olmaq istəmirəm. Ona görə də ərizəmi yazdım. Son olaraq onu demək istəyirəm ki, kaş bu söhbətlərin heç biri olmazdı. Mən Sərvər müəllimi də, İftixar müəllimi də çox istəyirəm. Bir böyük kimi, bir sənət adamı kimi ikisinə də hörmətim var. Amma bu ərizə söhbəti məni bulandırdı” deyə aktyor bildirib.

Öz ərizəsi ilə işdən çıxan digər aktyor Anar Bulud isə bildirib ki, bu qalmaqallar teatrın yaradıcı mühitinə də təsir edib.

“Fəridin dediyi kimi, mən də öz ərizəmi yazıb, işdən ayrılmışam. Səbəb də eynidir, baş rejissor Sərvər Əliyevlə bağlıdır. Bu hadisələr getdikcə böyüdüyü üçün teatrdan çıxdım. Mən aktyoram, qalmaqalda nə işim var? Teatrda yaradıcı mühitdən söhbət belə gedə bilməz. Çünki özünüz də görürsünüz ki, bu qədər qalmaqal var, hansı yaradıcı mühitdən danışa bilərəm?! Bu hadisələr məni çox üzür. Kaş belə olmazdı. Belə bir yerdə qalıb işləmək, mənim psixologiyama təsir edir. Nə vaxt hadisələr öz axarına düşərsə, əvvəlki durumda olarsa, o vaxt da teatra qayıdaram” deyə aktyor bildirib.

Teatrın baş rejissoru Sərvər Əliyev isə saytımıza açıqlamasında hələ işdən çıxmadığını bildirib.

“Fəridlə Anar mənim əleyhimə toplanılan imzadan imtina etdikləri üçün direktor deyib ki, işdən azadsınız. Səbəb isə odur ki, direktorun dediyini etməlisən. Təəssüf ki, o hər zaman rejissorların işinə qarışır. Bunu ondan soruşmaq lazımdır ki, məndən nə istəyir?! Mən Səmərqənd şəhərində onun pyesini tamaşaya hazırlamışdım. Dəvət etdim, gəldi Səmərqəndə, tamaşanın məşqimə baxdı və bəyəndi. Amma “kütləvi səhnəni artırmaq lazımdır” dedi, mən isə onun bu təklifini rədd etdim. Çünki mən artıq 60 gün idi ki, məşq edirdim. Azərbaycan əsəri, ora əlavə paltar, saqqal, bığ lazım olacaqdı, yəni mümkün deyildi. O gündən mənimlə konfliktə başladı. Təəssüf ki, kollektivi mənim əleyhimə qaldırıb. Onlar da haqqımda şər böhtan yazıb Mədəniyyət Nazirinə müraciət ediblər. Bu işlərin arxasında direktor durur. 3 gün öncə yenə kollektivi toplayıb, hamını bir nəfər kimi mənim əleyhimə imza toplamağa məcbur edib. İki gənc aktyor bundan imtina edəndə direktor onlara ərizə yazıb, işdən getməklərini tələb edib. Məsələ ilə bağlı Mədəniyyət Nazirinə, Nazirliyin Maliyyə və İqtisadiyyat, Daxili nəzarət və Audit şöbəsinə müraciət etmişəm. Araşdırma gedir” deyə rejissor bildirib.

Heydər Əliyev Fondunun vitse-prezidenti Leyla Əliyevanın təşəbbüsü ilə dekabrın 28-də SƏNƏT Uşaq Musiqi və İncəsənət Mərkəzində pianoçu Ruslan Ağababayevin “Ürəkdən-ürəyə” adlı konserti keçirilib.

AZƏRTAC xəbər verir ki, Heydər Əliyev Fondunun vitse-prezidenti Leyla Əliyeva konsertdə iştirak edib.

ABŞ-da tanınmış pianoçu və bəstəkar olan Ruslan Ağababayev konsertdə müxtəlif kompozisiyalarını səsləndirib. Əməkdar artistlər Sevda Ələkbərzadə, Ceyla Seyidova, Eyyub Əliyev konsertin qonaq ifaçıları olublar.

Ruslan Ağababayev Bakıda anadan olub, Bakı Musiqi Akademiyasının məzunudur. 1997-ci ildə o, ABŞ-a gedərək təhsilini orada davam etdirib, caz və kompozisiya üzrə Ron Karter, Bryus Bars, Devid Loub və Devid Del Tredicdən dərs alıb.
Tədbir çərçivəsində gənc rəssamların sərgisi də təşkil olunub.

Sərgidə DOST İnklüziv İnkişaf və Yaradıcılıq Mərkəzinin, Azərbaycan Dövlət Rəssamlıq Akademiyasının üzvləri, Əzim Əzimzadə adına Azərbaycan Dövlət Rəssamlıq Məktəbinin tələbələri və uşaq evinin sakinlərinin əsərləri nümayiş olunub. Eyni zamanda, vətənpərvərlik mövzusu ilə yanaşı, müxtəlif janrlarda çəkilmiş 17 rəsm əsəri və əl işləri təqdim edilib.

Rəssamların əsərlərində Qarabağ, Azərbaycanın göz oxşayan abidələri boyalarla özünəməxsus formada izləyicilərə çatdırılıb.