 |
|
|
Saatlıda xəstəxanaya aparılarkən yolda qəzaya düşən təcili tibbi yardım avtomobilində ağır xəsarətlər alan 36 yaşlı Rahibə Nuruşova bir gün sonra həmin xəsarətlərdən həyatını itirib.
Mərhum ölümündən bir qədər əvvəl baş verənləri danışıb və yaxınları da həmin anı videoya çəkiblər.
Həkimlərdən dərdinə dərman tapa bilməyən Rahibə Nuruşova beş gün əvvəl dünyasını dəyişib.
Məlumata görə, anidən vəziyyəti pisləşən qadını ailə üzvləri təcili tibbi yardım xidməti çağıraraq xəstəxanaya yola salıblar. Amma vəfat edən qadın videoda bildirir ki, həkimlər təcili tibbi yardım maşınına mindirəndən sonra ona qarşı laqeyd münasibət göstəriblər.
Problem bununla da yekunlaşmayıb. Çünki, qadın təcili tibbi yardım avtomobilində olan zaman yol-nəqliyyat hadisəsi baş verib. Saatlı rayonunun, Əhmədbəyli kəndi ərazisində baş verən bu hadisə qadının ölümünə səbəb olub.
Qəzadan bir gün sonra vəfat edən 36 yaşlı Rahibə Nuruşovanın qayınatası gəlininin ölümündə, nəvəsi 13 yaşlı Aysunun və digər gəlini Əfsanə Nuruşovanın xəsarət almasında günahkar kimi təcili tibbi yardım həkimi Cavid Ələkbərovu görür. Zərərçəkmişlər iddia edirlər ki, təcili yardım maşını yaxın məsafəni qoyub, əlavə 25 kilometr yol qət edib.
Şirvan xəstəxanası isə qadının vəziyyətinin ağır olduğunu nəzərə alaraq, onu Bakıya göndərib.
Bakıda isə bildirilib ki, qadının bel fəqərəsi və boyun sümüyü sındığı üçün ölümünə qısa bir vaxt qalıb. Elə həkimlərin dediyi kimi, iki-üç saatdan sonra qadın dünyasını dəyişib.
Qəza baş verən zaman təcili tibbi yardım maşınında anasının yanında olan 13 yaşlı Aysun Nuruşova da hadisə barədə danışıb.
Məsələ ilə bağlı Tibbi Ərazi Bölmələrini İdarəetmə Birliyindən (TƏBİB) bildirilib ki, iyulun 9-da epileptik tutma səbəbi ilə təcili tibbi yardım stansiyasına çağırış daxil olub:
“Təhvil alarkən xəstə müayinə olunub və təcili tibbi yardım şöbəsinə təxliyə olunmasına qərar verilib. Xəstə yaxınlarının briqadanı yönləndirdiyi qrunt örtüklü yol xəstənin mövcud vəziyyətinə görə əlverişli olmadığı üçün təxliyə zaman asfalt örtüklü digər marşrut yolu seçilib. Təəssüf ki, təxliyə zamanı yol-nəqliyyat hadisəsi baş verib. Qəza nəticəsində xəstənin baş-boyun nahiyəsi zədələnib və Respublika Neyrocərrahiyyə Xəstəxanasına göndərilib. Xəstə doqquz iyul, 20:45-də xəstəxanaya müştərək travmalarla qəbul olunub, bütün zəruri müayinələrdən keçirilib. Başda sadə səthi travma, boyunun beş fəqərəsinin yerdəyişmiş kompession sınığı və çoxsaylı döş qəfəsinin sümüklərinin sınığı diaqnozu qoyulub, stasionara müalicəyə cəlb olunub. Buna baxmayaraq, xəstə yaxınları yazılı iltizamnamə əsasında xəstəni tibb müəssisəsindən aparıblar. Xəstə evdə vəfat edib. Hadisədə günahkarın müəyyən olunması üçün hazırda hüquq-mühafizə orqanları tərəfindən araşdırma aparılır”.
Daha ətraflı Baku TV-nin süjetində:
Onsuz da ölkə bazarına ikiqat qiymətlə daxil olan avtomobillər vətəndaşlara bir də "mühərrik rasxodu" yaradır. Əgər kimsə avtomobili alıb, öz adına keçirmək istəsə, bir də görür ki, həmin avtomobilin mühərrik nömrəsi texniki pasporta salınmayıb. Bu problemlə əsasən, qeydiyyat prosesi zamanı rastlaşan vətəndaşlar nə edəcəklərini bilmədikləri üçün çox vaxt hansısa dələduzların qurbanına çevrilə bilirlər.
Bəzən həmin vətəndaşlardan avtomobilin mühərrik nömrəsini qeydiyyatdan keçirmək üçün müəyyən məbləğ də tələb olunur. Məsələn, qardaşının adına olan avtomobili vətəndaş öz adına qeydiyyata salmaq istəyir, ancaq bu zaman fərqinə varır ki, mühərrikin nömrəsi avtomobilin texniki pasportuna qeyd edilməyib. Bəs qanunla vətəndaş avtomobilinin mühərrik nömrəsini qeydiyyata salmaq üçün hansısa rüsum, məbləğ ödəməlidirmi? Bu haqda qanunvericilik nə deyir?
Məsələ ilə əlaqədar Baş DYP İdarəsinin rəsmisi, polis polkovnik-leytenantı Mübariz Ağayevlə əlaqə saxladıq. DYP rəsmisi Bizimyol.info-ya məzuniyyətdə olduğunu bildirərək, sadəcə onu qeyd etdi ki, problemlə əlaqədar vətəndaş Qeydiyyat-İmtahan Məntəqəsinə müraciət etməli və mövcud vəziyyət araşdırılmalıdır.
TEREF.AZ bildirir ki, məzuniyyətdə olduğu üçün suallarımızı cavablaya bilməyən DYP rəsmisindən fərqli olaraq, avto-ekspert Elməddin Muradlı Bizimyol.info-nun vətəndaşları da yaxından maraqlandıran suallarına cavab verib. Ekspert bildirib ki, mühərrik nömrəsini qeydiyyata salmaq Dövlət Yol Polisininin vəzifə borcudur və bununla bağlı hər hansısa ödəniş, rüsum nəzərdə tutulmayıb:
"Öncəliklə, həmin avtomobillə bağlı ilkin qeydiyyat aparılıb. Bu avtomobilin ilkin qeydiyyatı zamanı əgər ona texniki pasport verilibsə, deməli, mühərrik olmaya-olmaya həmin qeydiyyat prosesi aparılıb - yol polisi həmin işi görüb. İndi o qurum həmin prosesdən imtina edirsə, bu, qanunsuz davranışdır. Bu məsələni aşkarlamaq və qaydaya salmaq yol polisinin işidir. Əgər bu aşkarlanıbsa, DYP vətəndaşın iştirakı ilə avtomobili yoxlamalıdır, həmin mühərriki sorğu şəklində araşdırmalıdır. Əgər həmin mühərrik oğurluq və ya qaçaq mal deyilsə, hər hansı bir cinayət aləti deyilsə, o şəkildə də qeydiyyata alınmalı, ya da üzərinə nömrə yazılmalıdır, hansı ki, həmin proses bir qədər uzun çəkə bilər. Yəni istənilən halda birinci qeydiyyat prosesini yol polisi aparıbsa, ikincidən imtina etməməlidir. Yox, əgər yol polisi həmin maşını qeydə alanda - birinci qeydiyyat prosesini aparanda - və yaxud bu maşın bir neçə dəfə alınıb-satılıbsa, təkrar qeydiyyat prosesləri aparılıbsa, maşının mühərriki üzərində olubsa, əvvəlki maşın sahibi mühərriki dəyişəndə avtomobili qeydiyyata aldırmayıbsa, onda məsuliyyət vətəndaşın üzərindədir. Hansı ki, həmin vətəndaş mühərriki dəyişəndə, təkrarən qeydiyyat prosesini aparmalı idi. Bəzən belə vətəndaşlar da olur ki, öz-özünə düşünür: "Maşındır, sürürəm, özümündür, qeydiyyata alınsa da, alınmasa da onsuz da məndədir, heç nə olmaz". O "heç nə olmaz" düşüncəsi axırda gəlir, belə bir problem yaradır".
İstismara verildiyi vaxtdan bir neçə dəfə satılaraq əl dəyişdirən avtomobillərin sahibləri maşınlarını qeydiyyata salmadığı üçün mühərrik də ilk gündəki kimi qeydiyyata düşür. Ancaq elə olur ki, həmin avtomobilin mühərriki bir neçə dəfə dəyişdirilmiş olur. Avto-ekspert bu problemlə bağlı onu bildirib ki, belə hadisələrin baş verməsi mümkündür:
"Avtomobillərin mühərrikləri bir ay içində, hətta üç, dörd, beş il əvvəl də dəyişdirilmiş ola bilər. Bunların hər biri ehtimal olaraq mümkündür. Sadəcə olaraq, o prosesi DYP araşdırıb, aydınlaşdırıb vətəndaşı yola salmalıdır. Məsələn, sizin avtomobilinizi oğurlayırlar, mühərrikin nömrəsini də silib, başqasına satırlar. Həmin o başqası da bəzən savadsızın biri olur, heç vaxt maraqlanmır ki, "Mən bu maşını alıramsa, bunun mühərrikinin mənşə sənədi olmalıdır, sənəd tələb edim". Deyir, "Bu maşını bazarda soruşmuşdum, iki min manata deyirdilər, ancaq qonşuluqda bir oğlan var, beş yüz manata satır. Qoy, elə gedib ondan alıb, min beş yüz manat da qabağa düşüm". Bax, bu ağılla, düşüncə ilə hərəkət edirlər, sonra da küçələrdə qalırlar. Onu da qeyd edim ki, avtomobilin mühərrikinin qeydiyyata salınması üçün hər hansısa bir rüsum nəzərdə tutulmur. Sadəcə olaraq vətəndaş maşını öz adına keçirirsə, deməli, təkrar qeydiyyat prosesi aparılır və ona uyğun rüsumlar ödənilir".
DİA.AZ: - "Binəqədi rayon məhkəməsinin mülki işlər üzrə zallarında iclasların videoyazısı aparılır, cinayət işləri üzrə zallarında isə qanuna zidd olaraq heç audioyazı da aparılmır". DİA.AZ bildirir ki, bu iddia ilə tanınmış hüquqşünas Əkrəm Həsənov çıxış edib.
Hüquqşünas daha sonra bildirir: "1 ilə yaxındır ki, bunu texniki problemin olduğu ilə izah edirlər. Necəsə olub ki, texniki problem məhz cinayət işlərinin aparıldığı zallarda yaranıb.
Texnika da yəqin bilir ki, ən böyük haqsızlıq və korrupsiya məhz cinayət işlərində olur, ona görə də onları yazmaqdan utanır…"
Məsələ ilə bağlı dia.az olaraq qarşı tərəfi də dinləməyə hazırıq...
Qubanın İkinci Nügədi kəndinin bəzi sakinləri mavi yanacaq problemi yaşayırlar.
Belə ki, sözügedən kənd mavi yanacaqla təmin olunsa da, 50-yə yaxın ev illərdir qaz üzünə həsrətdir.
“Odunla evi qızdıra bilmirik. Hansı dövrdə yaşayırıq ki, qazsız qalaq?”, - deyə kənd sakinləri qeyd ediblər.
Daha ətraflı Baku TV-nin süjetində:
“Müəllimlərin İşə Qəbulu (MİQ) imtahanından öncə sualların sosial şəbəkələrdə yayılması halı ilk dəfə deyil. Son 3 ildə keçirilən MİQ imtahanında, təəssüf ki, şəffaflıq qorunmur”.
Teref.Az bildirir ki, bu sözləri Yenisabah.az-a açıqlamasında təhsil üzrə ekspert Kamran Əsədov deyib.
K. Əsədov əlavə edib ki, keçən il bununla bağlı ciddi faktlar ortaya qoyub:
“Nazirlik də bunu etiraf etmişdi. Dedilər ki, bu əməli törədənlər cəzalandırılacaq, amma sonra heç nə olmadı, əksinə, hadisəni yenidən ört-basdır etdilər.
Təəssüf ki, bu günlərdə keçirilən test imtahanında da şəffaflıq gözlənilməyib. Bunun əsas səbəbi Elm və Təhsil Nazirliyinin imtahanlarla bağlı test bazasının, yəni test bunkerinin yoxluğu, habelə imtahanlara qısa müddət qalmış imtahan suallarını üçün cəlb olunan mütəxəssislərdir.
K. Əsədov iddia edib ki, baş verənlər ETN-in imtahan keçirmək üçün bazası, strukturu və mexanizmi yoxdur:
“Bu qurum sadəcə formal xarakterli imtahanlar keçirir. İmtahan suallaı yazanlar sualları satırlar. Sonra da deyirlər ki, baxın, bu sahədə yeganə və yaxud da səlahiyyətli şəxs, söz sahibiyik.
Əvvəllər belə bir fikir formalaşmışdı: bunker müəllimi. DİM bu faktları aradan qaldırdı, şəffaflığı təmin edə bildi. Amma bu sözləri Elm və Təhsil Nazirliyi ilə bağlı deyə bilmirik. Çünki nazirliyin keçirdiyi müxtəlif imtahanlarda istifadə edilmiş suallar əvvəldən kimlərinsə əlində olur.
Nazirlik rəsmiləri sualların məxfiliyini təmin edə bilmir. Bu, yaxşı hal deyil, əksinə, Elm və Təhsil Nazirliyinin keçirdiyi imtahanları şübhəyə almaq üçün əsas verə bilər.
Nazirlik yalnız özünün və yaxud da hansısa kursun, mərkəzin və ya repetitorun maraqlarına xidmət edir. Baş verənlər ciddi bir faktdır. Hətta sadaladığım nüanslar cinayət kimi qiymətləndirilə bilər. Yəni bu, onu göstərir ki, Elm və Təhsil Nazirliyinin Azərbaycanda hər hansı bir imtahanı keçirmə bacarığı, biliyi yoxdur”.
Ekspert onu da vurğulayıb ki, 30 ildən çoxdur Azərbaycanda bütün növ , hətta beynəlxalq imtahanları da keçirmək təcrübəsi DİM-də var:
“Adı da üstündədir, Dövlət İmtahan Mərkəzi. Onun keçirdiyi imtahanlarda istifadə olunmuş sualların hər hansı bir şəxsdə, eyni zamanda sosial şəbəkədə olmasını təsəvvür belə edə bilmərik. İllərin təcrübəsini nəzərə alsaq, birmənalı şəkildə bu imtahanlar DİM-ə verilməlidir. Çünki onların həm təcrübəsi var, həm də təhlükəsizliyi təmin edə bilirlər. Eləcə də mərkəzin bunker sistemi var. Hətta DİM zal nəzarətçisini peşəkarlar arasından seçir. Düşünürəm ki, təhlükəsizlik, peşəkar suallar və bütün amilləri nəzərə alaraq, mütləq şəkildə bütün növ imtahanlar DİM-ə həvalə olunmalıdır”.
3 uşaq atası olan Astara rayon sakini İbrahimov Bəylər Ramil oğlunun yoxsul və acınacaqlı şəraitini bir sıra məmurlar göz ardı ediblər. Heç bir yerdə çalışmayan, ünvanlı sosial yardım almayan, daxmada yaşayan çarəsiz vəziyyətdə qalan vətəndaş dəfələrlə etdiyi müraciətlərə baxmayaraq, ona kömək əli uzadan olmayıb. Beton üzərində yatan, yetkinlik yaşına çatmamış, məktəb şagirdləri olan övladlarını istədikləri kimi yaşada bilməyən atanın fəryadı sanki əsir düşmüş Azərbaycanlını xatırladır.
Bir övladını qaldığı evdə baş vermiş yanğın nəticəsində itirən ata, digər övladlarının təhsil alması üçün əlindən gələni edir, amma yaşadığı şərait ona imkan vermir ki, məqsədinə nail olsun. //gundelik-baku.com//
Restoranlarda servis haqqı məsələsi tez-tez müzakirələrə çevrilir. Xüsusilə menyuların əksəriyyətində xidməthaqqının qeyd edilməməsi, bəzən isə 10 faizdən çox olması müştərilərin narazılığına səbəb olur. Elə bu günlərdə sosial şəbəkələrdə yayılan foto da birmənalı qarşılanmayıb.
AzFakt.com xəbər verir ki, "Xəbər Ertəsi"nin vatsap nömrəsinə gələn müraciətlərdən də görünür ki, bəzi restoranlarda müştərilərdən hətta 20-25 faiz servis haqqı tutulur.
Bildirilir ki, müxbirlər vəziyyəti dəqiqləşdirmək üçün bəzi restoranlara müştəri kimi daxil olublar. Ancaq kadrlardan göründüyü kimi, menyularda servishaqqına dair heç nə yazılmayıb. İaşə obyenktlərinin əməkdaşları da sözügedən məlumatın menyuda qeyd edilmədiyini təsdiqlədilər və əlavə şərh vermək istəmədilər.
Mövzu ilə bağlı ətraflı videomaterialı təqdim edirik:
"Vətəndaşlar onlardan əlavə 25% xidmət haqqı alan restoranı məhkəməyə verə bilər”.
Bunu Qaynarinfo-ya açıqlamasında vəkil Əkrəm Həsənov restoranlarda vətəndaşlardan alınan əlavə xidmət haqqının hüququ əsaslarını izah edərkən deyib.
O bildirib ki, vətəndaşın verdiyi 25% xidmət haqqını restorandan geri almaq imkanı var:
"Müqavilə iki formada bağlanılır, sifahi və yazılı. Yazılı müqavilə aydındır, şərtlər göz önündə olur. Sifahi müqavilə fərqlidir. Müqavilə şifahi bağlanılırsa, qarşı tərəf, yəni bizə xidmət göstərən şəxs qiyməti əvvəldən bəyan etməlidir. Restorana gedəndə menyu verilir və orada qiymətlər göstərilir. Əgər orada xidmət haqqı da varsa, bu barədə əvvəldən məlumat verilməlidir. Hətta restoranda tutaq ki, hardasa bu barədə yazılıb, amma müştəri hardasa bunu görməyə, fikir verməyə bilər. Çünki heç kəs bunu gözləmir. Buna müqavilənin standart şərtləri deyillər. Əgər istehlakçıya sahibkar nəsə satırsa, xidmət göstərirsə və onun şərtlərində qeyri-adi gözlənilməz nəsə varsa, o istehlakçının maraqlarına ziddirsə və sahibkar öz hüquqlarından istifadə edirsə, həmin şəxs etibarsızdır. Əgər restoran yazırsa ki, xidmət haqqı 5%-dir, bu, gözlənləndir, amma 25% gözlənilməz şətdir”.
Əkrəm Həsənov vurğulayıb ki, belə bir şərt varsa da və müştəri onu görməyibsə bu halda da etibarsızdır.
Xəbər verdiyimiz kimi, bu gün Prezident İlham Əliyev 2023-cü ilin 6 ayının sosial-iqtisadi yekunlarına həsr olunmuş müşavirə keçirib.
Dövlət başçısı müşavirədə Gədəbəyin Söyüdülü kəndində baş verən hadisələrdən də danışıb.
Prezident çıxışında Ekologiya və Təbii Sərvətlər Nazirliyini sərt şəkildə tənqid edib, qurumun səhlənkarlığa yol verdiyini bildirib.
Prezidentin həmin məsələ ilə bağlı çıxışının videosunu təqdim edirik:
Bu gün Tovuz döyüşlərinin başlamasından üç il keçir.
2020-ci ilin iyulun 12-də günorta saatlarından başlayaraq Ermənistan silahlı qüvvələrinin bölmələri Tovuz rayonu istiqamətində atəşkəs rejimini kobud şəkildə pozublar.
Ermənilər mövqelərimizi ələ keçirmək məqsədilə hücuma keçməyə cəhd göstəriblər. Düşmən əvvəlcə yüngül atıcı silahlardan, 60, 82, 120 millimetrlik minaatanlar və daha iriçaplı digər ağır artilleriya qurğularından istifadə etməklə və sərhədboyu bir sıra yaşayış məntəqələrimizi - Ağdam, Dondar Quşçu, Əlibəyli, Vahidli, Yuxarı Öysüzlü, Aşağı Öysüzlü kəndlərini atəşə tutub.
Düşmənə qarşı cavab tədbirlərinin görülməsi ilə bağlı komandanlıq tərəfindən bu istiqamətdə yerləşən bölmələrə dərhal əmr verilib.
Görülən tədbirlər nəticəsində düşmən hücumunun qarşısı alınıb, onun müdafiəsinin ön xəttindəki atəş nöqtələri, müdafiəsinin dərinliyində yerləşən ehtiyatlar, dayaq məntəqələri, artilleriya qurğuları, müxtəlif təyinatlı hərbi obyektlər, döyüş texnikaları və yüzədək canlı qüvvəsi məhv edilib.
Azərbaycan Müdafiə Nazirliyi bildirir ki, Ermənistanın hərbi-siyasi rəhbərliyi 2016-cı ilin aprel döyüşlərində olduğu kimi, bu dəfə də hərbi məlumatların yayılmasına tətbiq edilən qadağanı əsas gətirərək döyüş itkilərini ictimaiyyətdən gizlədib.
Əldə olunan məlumata görə, düşmənin itkiləri arasında Suriya və Yaxın Şərqin müxtəlif ölkələrindən erməni əsilli döyüşçülər də olub. Bu kateqoriyadan olan şəxslər Ermənistanda rəsmi qeydiyyata alınmadıqları üçün erməni hərbi rəhbərliyinə bu itkiləri gizlətmək daha asan olur.
İyulun 12-dən başlayan aktiv döyüş əməliyyatları iyulun 17-i axşam saatlarınadək davam edib. Bu müddət ərzində Ermənistan silahlı qüvvələri bölmələrinin mövqelərimizi ələ keçirmək cəhdlərinin qarşısı qətiyyətlə alınıb və hər hansı ərazi itkisinə yol verilməyib.
Bu əməliyyat istiqaməti eyni zamanda həm də iki ölkə arasında dövlət sərhədi olduğundan Azərbaycan Ordusunun gördüyü cavab tədbirləri sadəcə düşmənin tətbiq etdiyi silah növlərinə uyğun, onun atəş nöqtələrinin susdurulması və onun irəliləməsinin qarşısının alınmasına yönəlib.
Təbii ki, döyüşlərdə bölmələrimizin qarşısında düşmən mövqelərini ələ keçirmək və ya hansısa istiqamətdə irəliləmək kimi məqsəd yox idi.
Döyüşlərdə düşmən hücumunun qarşısını alarkən Azərbaycan Ordusunun 12 hərbi qulluqçusu – general-mayor Polad Həşimov, polkovnik İlqar Mirzəyev, mayor Namiq Əhmədov, mayor Anar Novruzov, baş leytenant Rəşad Mahmudov, gizir İlqar Zeynallı, gizir Yaşar Babayev, MAXE əsgər Elçin Mustafazadə, MAXE çavuş Vüqar Sadıqov, MAXE əsgər Nazim İsmayılov, baş əsgər Elşad Məmmədov, əsgər Xəyyam Daşdəmirov şəhid olub. Döyüşlər zamanı yaralananlar da olub.
Ermənistan ordusundakı vəziyyətdən fərqli olaraq qürurverici haldır ki, şəhid olan general və zabitlərimiz tabeliklərində olan əsgərlərlə bir sırada, ön xətdə düşmənlə döyüş zamanı həlak olublar.
Qeyd edək ki, döyüşlər zamanı yaşayış məntəqələri, qeyri-hərbi obyektlərin intensiv atəşə tutulması nəticəsində mülki əhaliyə, dövlət əmlakına, fərdi mülklərə, eləcə də infrastruktur obyektlərinə ziyan dəyib.
Artilleriya atəşi nəticəsində iyulun 14-də Tovuz rayonunun Ağdam kənd sakini, 1944-cü il təvəllüdlü Əziz Əzizov həlak olub.
Tovuz döyüşləri Azərbaycanda Ermənistanın işğalına qarşı dövlətin strateji qətiyyətini və xalqın müqavimət ruhunu gücləndirdi.
Tovuzdakı şiddətli döyüşlər zamanı Azərbaycanda könüllü şəkildə orduya yazılmaq prosesi başladı. Bu döyüşlərdə məğlub olan Ermənistan Azərbaycana qarşı təxribatlarını genişləndirdi. Tovuz döyüşləri həm də həmin ilin sentyabrında başlayan Vətən müharibəsi üçün qığılcım rolunu oynadı. Azərbaycan ermənilərin davamlı təxribatlarına cavab olaraq sentyabrın 27-də güclü əks-hücum əməliyyatlarına başladı və 44 gün ərzində işğalda olan ərazilərini azad etdi.