Yaponiyada son illərdə iki dəfə gecə saatlarında içki qəbulu hökumət məmurlarının məxfi məlumatlarını itirməsinə səbəb olub.

Bu barədə CNN məlumat yayıb.

Məsələn, fevralın 6-da ölkənin Maliyyə Nazirliyinin Gömrük və Tarif Bürosunun əməkdaşı 5 saatlıq işdən sonra Tokionun cənubundakı Yokohama şəhərində həmkarı ilə doqquz stəkan pivə içib. O, müəssisədən çıxıb evə gedəndə 187 nəfərin işi ilə bağlı məxfi məlumatların olduğu çantanın itdiyini aşkar edib. Həmçinin onun özü və həmkarları haqqında məlumatları olan şəxsi noutbuku da itib.

Nazirlik hadisəyə görə üzr istəyib və lazım gələrsə, sərt tədbirlər görəcəyini vəd edib. Sənədlərin və noutbukun qanunsuz istifadə edilməsinə dair hələlik heç bir sübut yoxdur.

Məlumata görə, 2022-ci ildə daha bir dövlət işçisi restoranda sərxoş olduqdan sonra küçədə yuxuya gedərək Amaqasaki şəhərinin yarım milyona yaxın sakininin şəxsi məlumatlarını özündə əks etdirən USB fləş yaddaşını itirib. Cihazda vergi rekvizitləri, vətəndaşların bank hesablarının adları və nömrələri, habelə dövlət ödənişləri haqqında məlumatlar olub.

CNN qeyd edir ki, Yaponiya uzun müddətdir ofis işçilərinin həddindən artıq içki içməsi ilə tanınır. 2021-ci ildə ölkənin Səhiyyə Nazirliyi bunu "ciddi sosial problem" kimi tanıyıb.

Kanal əlavə edir ki, içki Yaponiyanın yorucu iş mədəniyyətini əks etdirir, bu isə işçiləri ağır şəraitdə və maaş artımı olmadan işləməyə məcbur edir. Hakimiyyət orqanlarının təzyiqləri azaltmaq cəhdləri, məsələn, dövlət qulluqçuları üçün dörd günlük iş həftəsi tətbiq etmək cəhdləri indiyədək heç bir nəticə verməyib.