 |
|
|
İran Ermənistanı və Rusiyanı silahlandırmağa davam edir.
Bu barədə məlumatı “World News Portal” Teleqram kanalı paylaşıb.
Bildirilib ki, Ermənistan Rusiya və İran arasında hərbi əməkdaşlıq üçün logistik baza rolunu oynayır:
“İran Rusiyaya silah və “Şahid-136/131” kamikadze pilotsuz uçan aparatlarını müxtəlif üsullarla tədarük edir, bu yollardan biri də Ermənistan ərazisindən keçir”.
Qeyd edək ki, bu, rəsmi Tehranın İrəvana verdiyi ilk dəstək deyil. Bundan öncə də İranın Ermənistana silah tədarükü etdiyinə dair xəbərlər və görüntülər yayılıb.
Görünür, Tehran rejimi Ermənistana həm hərbi, həm də logistik dəstək verərək, düşmən ölkəni gücləndirməyə çalışır.
DİA.AZ-ın məlumatına görə, mövzu ilə bağlı Cebhe.info-ya açıqlama verən politoloq Natiq Miri bildirib ki, 44 günlük Vətən müharibəsindən sonra Azərbaycanın qələbəsi beynəlxalq səviyyədə təsbit olundu:
“Nə qədər qısqanclıq olsa da, bu reallıqları xristian və Qərb dünyası qəbul etmək məcburiyyətindədirlər. Buna rəğmən, özünü müsəlman adlandıran qonşu İran hələ də gerçəyi qəbul etmir.
Çünki bu gerçəyi qəbul edən dövlətlər regionda sülhün tərəfdarı və təşəbbüskarı kimi çıxış edirlər. Bu konteksdə, Rusiya, ABŞ və Avropa İttifaqının vasitəçiliyi ilə platformalar təşkil olunub.
Bütün bunların məqsədi odur ki, iki dövlət arasındakı münaqişə həll olmadan və sülh müqaviləsi imzalanmadan bu ölkələrə silah verilməsin. Bu, doğru olan və beynəlxalq hüquqa uyğun davranışdır”.
Politoloq vurğulayıb ki, İranın Ermənistana silah satması bizi ermənilər düşmənimiz olduğu üçün qıcıqlandırmır:
“Söhbət ondan gedir ki, sülh əldə olda olunmadan və potensial müharibə təhlükəsi mövcud olduğu bir vəziyyətdə heç bir ölkə işğalçı dövləti silahlandıra bilməz. Yəni bu məsələdə konkret qərəz var.
Bu məsələdə Hindistan istisna dövlət deyil. İran da hərbi cəhətdən ciddi şəkildə Ermənistana yardım edir. Tehran Ermənistanı hərbi cəhətdən gücləndirməklə, Azərbaycana qarşı dirənməsini artırırlar. Bu isə o deməkdir ki, regionda Azəbaycan və Ermənistan arasındakı münaqişənin tamamilə həll olunmasında qonşu İran maraqlı deyil. Məsələ bundan ibarətdir”.