"Ermənistan xarici işlər naziri Ararat Mirzoyanın və onun köməkçilərinin üzləri ermənilərin BMT Təhlükəsizlik Şurasına müraciətinin tam iflasa uğramasının göstəricisidir. Çünki müzakirə iştirakçılarının heç biri Azərbaycanı pisləmədi, ölkəmizə qarşı tələblər irəli sürmədi, sadəcə, Ermənistan-Azərbaycan danışıqlarının davam etdirilməsi, həm Laçın, həm də Ağdam yolunun humanitar məqsədlə maneəsiz işləməsi çağırışları ilə kifayətləndilər".
DİA.AZ bildirir ki, bunu Reyting.az-a Milli Məclisin deputatı, politoloq Rasim Musabəyov dünən Ermənistanın təşəbbüsü ilə BMT Təhlükəsiz Şurasında keçirilən müzakirəni şərh edərkən deyib.
R. Musabəyov bildirib ki, BMT Təhlükəsizlik Şurasının üzvlərindən heç biri erməni tərəfinin təbliğ etdiyi saxta “blokada” və “soyqırım” sözünü dilə gətirməyib.
R. Musabəyov əlavə edib ki, iclas iştirakılarından heç biri Azərbaycan tərəfinin Laçında qurduğu keçid məntəqəsinin legitimliyinə şübhə etmirdi: “Hətta heç bir iştirakçı Qarabağ ermənilərinin yaşadığı ərazidə hər hansı faktiki administrasiyanın adını çəkmədi, “yerli əhali” kimi onları Bakı ilə dialoqa çağırdılar. Nəticədə hər şey Ermənistanın müraciətinin ictimai müzakirəsi ilə məhdudlaşdı. Nəinki səsverməyə çıxarıldı, heç qətnamə də çıxarılmadı, hətta iclas sədrinin bəyanatı belə olmadı”.
Musabəyov sonda deyib ki, sanki baş nazir Paşinyan və onun xarici işlər naziri Mirzoyan BMT Təhlükəsizlik Şurasında çıxış edərək həmvətənlərinə nümayiş etdirmək istəyirdilər ki, onlar əllərindən gələni etdilər, amma dünya tarixdə olduğu kimi, daha ermənilərə qarşı “ədalətsiz”dir.