 |
|
|
ABŞ-ın maliyyələşdirdiyi Azadlıq Radiosunun redaktoru ailə vəziyyəti ilə bağlı Rusiyaya səfər edərkən "xarici agent" kimi qeydiyyatdan keçmədiyinə görə ölkəyə girəndə saxlanılıb.
Reuters xəbər verir ki, Azadlıq Radiosunun Tatar-Başqırd Xidmətinin redaktoru, həm ABŞ, həm də Rusiya pasportlarına malik Alsu Kurmaşeva mayın 20-də ailəsi ilə bağlı təcili Rusiyaya gedib.
Kurmaşeva həmin səfərin sonunda Rusiyanı tərk etmək istəyərkən saxlanılıb və pasportları müsadirə olunub. O, ABŞ pasportunu Rusiya hakimiyyət orqanlarında qeydiyyatdan keçirmədiyi üçün cərimələnib.
Rusiya hakimiyyəti oktyabrın 18-də Praqada yaşayan Kurmaşevanın “xarici agent kimi qeydiyyatdan keçməməkdə” ittiham edildiyini açıqlayıb. Bu barədə AzadlıqRadiosu məlumat verib.
"Alsu çox hörmətli həmkar, sadiq həyat yoldaşı və iki uşaq anasıdır. O, ailəsinin yanına qayıtması üçün dərhal azad edilməlidir" - AzadlıqRadiosunun prezidenti vəzifəsini icra edən Cefri Qedmin deyib.
Rusiyanın “Tatar-İnform” xəbər agentliyi bildirib ki, Kurmaşeva Rusiyanın hərbi fəaliyyəti ilə bağlı məlumat toplayarkən “xarici agent” kimi qeydiyyatdan keçə bilməyib. Azadlığa çağırış edən AzadlıqRadiosunun məlumatına görə, o, beş ilə qədər həbs cəzası ala bilər.
Rusiya hökuməti onun həbsi ilə bağlı hələlik şərh verməyib.
Qərargahı Praqa və Vaşinqtonda olan Azad Avropa/Azadlıq Radiosu deyir ki, onun missiyası “azad mətbuatın təhdid edildiyi və dezinformasiyanın geniş yayıldığı ölkələrdə dəqiq, senzurasız xəbərlər və açıq müzakirələr təqdim etməklə demokratik dəyərləri təbliğ etmək”dir.
Jurnalistləri Müdafiə Komitəsi (CPJ) Kurmaşevanın həbsindən dərin narahat olduğunu bildirib.
CPJ-nin Avropa və Mərkəzi Asiya üzrə proqram koordinatoru Gülnoza Səid deyib: “CPJ amerikalı-rusiyalı jurnalist Alsu Kurmaşevanın saxta cinayət ittihamı ilə həbs olunmasından dərin narahatdır və Rusiya hakimiyyətini onu dərhal azad etməyə və ona qarşı bütün ittihamları ləğv etməyə çağırır. Jurnalistika cinayət deyil və Kurmaşevanın saxlanması Rusiyanın müstəqil xəbərləri boğmaqda qərarlı olduğuna bir daha sübutdur”.
Rusiya Ukraynaya qarşı müharibə başladandan bəri media üzərində nəzarəti gücləndirib, aparıcı müstəqil xəbər agentliklərini bağlamağa məcbur edib. Bir çox jurnalist və nəşrlər “xarici agent” adlandırılıb.
Müharibədən və “Wall Street Journal”-ın müxbiri Evan Gerşkoviçin mart ayında casusluq ittihamı ilə həbsindən sonra, demək olar ki, bütün ABŞ jurnalistləri Rusiyanı tərk edib. Dövlət Departamenti dəfələrlə ABŞ vətəndaşlarını Rusiyanı tərk etməyə çağırıb.
Abzas.org