Azərbaycan Nazirlər Kabineti «Azkontrakt» müəmmasına aydınlıq gətirməlidir: Prezident Fərmanında qurumun ləğv olunduğu, Nazirlər Kabinetinin Qərarında isə ölkədə qaz satışı ilə məşğul olduğu bildirilir…

Gəlin əvvəlcə yaxın tarixə nəzər salaq: Dövlət Kontrakt Korporasiyası “Azərkontrakt” Açıq Səhmdar Cəmiyyəti Azərbaycan Respublikası Prezidentinin 1996-cı il 17 dekabr tarixli 519 nömrəli Fərmanı ilə səhmləri 100% dövlətə məxsis olmaqla, keçmiş Material Ehtiyatları Nazirliyinin və Ticarət Nazirliyinin əsasında yaradılmışdır. Bu məlumat hazırda da «Azkontrakt»ın rəsmi saytında yer alıb. Saytda olduqca maraqlı məluat var və bunu növbəti yazıda təqdim edəcəyik. Saytda «Rəhbərlik» qrafasında isə sədrin müavini kimi Güləddin Dadaşovun adı keçir. Bu barədə az sonra. Hələlik isə bir məqama diqqəti çəkək: Belə ki, Baş nazir A.Rasizadənin 05.07.1997-ci il, 131 saylı sərəncamında deyilir:

«"Azərkontrakt" Səhmdar Cərniyyətinin strukturuna daxil edilmiş müəssisə və obyektlərin siyahısı:
-"Azərmetal" topdansatış ticarəti birliyi və onun Bakı şəhəri, Moskva prospekti, 98 ünvanda yerləşən anbar təchizat şahəsi ("Azərkontrakt" Səhmdar Cəmiyyəti)
-«Azərmaşavadanlıq» idarəsi və onun Bakı şəhəri, Nobel prospekti, 36 və
M.Qaşqay küçəsi, 100 ünvanlarında yerləşən anbar tesərrüfatları («Azərkontrakt» Səhmdar Cəmiyyəti)
-«Yüngül və yeyinti sənayesi məhsullarının topdansatış birliyi», "Azəryüngülyeyintisənaye" və onun Bakı şəhəri, Nobel prospekti, 10 və Nizami küçəsi, 149 ünvanlarında yerləşən anbar təsərrüfatları(«Azərkontrakt» Səhmdar Cəmiyyəti)
-"Azkontrakt" Səhmdar Cəmiyyəti ("Azərkontrakt" Səhmdar Cəmiyyətinin Moskva şöbəsi)
-Texniki vasitələrin kirayə müəssisəsi-"Azərkirayə" («Azərkontrakt» Şəhmdar Cəmiyyəti)
-"Azərətsüd"- icarə müəssisəsi və onun Bakı şəhəri, Montin qəsəbəsi, Köndələn küçəsi-2 ünvanda yerləşən soyuducu bazası (keçmiş Ticarət Nazirliyi)
-«Baqqaliyyə malları üzrə respublika topdansatış ticarəti "Azərbaqqaliyyə" kontoru və onun Bakı şəhəri, Dərnəgül qəsəbəsi, 507-ci məhəllədə yerləşən anbar təsərrüfatı (keçmiş Ticarət Nazirliyi).
-«İstehsalat avtoekspedisiya» birliyi və onun Bakı şəhəri, Xırdalan qəsəbəsi, Şamaxı şossesi, 6 ünvanda yerləşən anbar təsərrüfatı (keçmiş Ticarət \Nazirliyi)
-"Azintreyd" xarici ticarət birliyi (keçmiş Ticarət Nazirliyi)
-Qax rayonunda yerləşən istirahət evi ("Azərkontrakt" Səhmdar Cəmiyyəti)
A.Hacıyev, Nazirlər Kabinetinin işlər müdiri».
İndi bu obyektlərin taleyinə Baş Prokurorluq və Dövlət Təhlükəsizlik Xidmətində, eləcə də İqtisadiyyat Nazirliyində və nazirliyin tabeliyində olan Əmlak Komitəsində aydınlıq gətirilməyə çalışır. Belə ki, «Azkontrakt» SC-nin tabeliyində olan «Azərmetal» Birliyinin Baş direktoru Şahin Abbasov ötən ay «Azkontrakt» SC-nin sədr müavini olan Güləddin Dadaşovun metalbazanın əmlakının və işçilərin külli miqdarda əmək haqlarının mənimsəməsi barədə Dövlət Təhlükəsizlik Xidmətinə (DTX) şikayət vermişdir. Həmin şikayət araşdırılması üçün Baş Prokurorluğa göndərilmişdir. Baş Prokurorluq da bəzi epizodlar üzrə araşdırma aparılması üçün şikayətə əlavə edilmiş həmin sənədlərin araşdırılıb Güləddin Dadaşovun barəsində qanuni ölçü götürülməsi üçün Əmək və Əhalinin Sosial Müdafiəsi Nazirliyinə göndərilib.

Tamara İbrahimova: «Güləddin Dadaşov qanunsuz olaraq istirahət günü idarəmizə adamlarını göndərib, bazanın darvazasını qıfılladıb, idarənin qapınısını açaraq maliyyə sənədlərimizi darmadağın ediblər…»

«Təzadlar»a telefon açan «Azərmetal» Topdansatış-Ticarət Birliyi Baş direktorunun köməkçisi Tamara İbrahimova dəhşətli faktları açıqladı:

-Uzun illərdir fəaliyyəti olmayan «Azkontrakt»ın sədr müavini kimi elan edən Güləddin Dadaşovdan DTX-yə və Baş Prokurorluğa şikayət verdiyimizə görə, o, istirahət günlərində idarəmizə adamlarını göndərib, bazanın darvazasını qıfılladıb, idarənin qapınısını açaraq maliyyə sənədlərimizi darmadağın ediblər… Buna nə ad verək? Artıq aidiyyəti dövlət qurumlarına şikayət vermiş, «Azkontrakt»ın birləşdirildiyi Azərbaycan Respublikasının Dövlət Ehtiyatları Agentliyinin İdarə Heyətinin sədri S.Sadıqova kollektiv adından müraciət yazmışıq. Çoxsaylı işçilər adından imzalanmış şikayətdə qeyd etmişik ki, axı «Azərmetal» Topdansatış-Ticarət Birliyi ləğv edilməyib, «Azkontrakt» SC kimi, bizim də əmlaklar, sadəcə, Dövlət Ehtiyatları Agentliyinə birləşdirilib. Biz kollektiv olaraq Agentliyin sədri cənab S.Sadıqovla görüşüb ona müfəssəl məlumat vermək istəyirik ki, Güləddin Dadaşov «Azkontrakt»ı və birliyimizı nə hala salıb… Dəfələrlə rəhbərliyə ("Azkontrakt" ASC) telefonla və üzbəüz müraciət etməyimə baxmayaraq, onlar tərəfindən, şəxsən özünü müavin kimi qələmə verən Güləddin Dadaşov (hansı ki, onun vəzifəsi prezident tərəfindən təsdiqlənməyib) kobudcasına "get kimə istəyirsən şikayət et" demişdir. Mən bir Azərbaycan vətəndaşı kimi sizə müraciət edib bildirmək istəyirəm ki, birliyə rəhbərlik etmiş "Azkontrakt" ASC rəhbərliyinin çox zəif və vecsiz olması üzündən uzun illərdir ki, əmək haqqı ala bilmirik. Amma Güləddin Dadaşov Cəmiyyətin bir idarəsini iki yerə bölüb qanunsuz olaraq (8 noyabr prospektində) qaynına ikinci bir idarə yaradıb ki, gələcəkdə özəlləşmə olanda ona daha çox pay düşə bilsin. Bu özbaşınalıq idi. Belə çıxırdı ki, bu vəziyyət rəhbərliyi qane edirmiş. Təşkilatlarla heç bir kontrakt bağlamayan, lakin uzun müddət ancaq bütün dövlət qanunlarımızı pozmaqla məşğul olan, yəni təkcə bizim birliyimizin 12,75 hektar sahəsini satmaqla məşğul olan çox hörmətli mərhum sədrimiz Miri Qəmbərov və onun «müavini» Dadaşov Güləddin cənabları, sanki böyük bir işçi kollektivinin qəsdinə durmuşlar. Prezidentin 1996-cı ildə qəbul etdiyi 607 saylı Fərmanının 2-ci bəndi tamamilə yerinə yetirilməmişdir. Həmin bənddə deyilir: "2. "Azərkontrakt" ASC-yə Azərbaycan Respublikasının dövlət ehtiyaclarının və strateji əhəmiyyətli istehsal və tikinti proqramlarının maddi-texniki təminatı, bu sahədə dövlətlərarası təsərrüfat əlaqələrinin təşkili, birbaşa münasibətlərin inkişafında mülkiyyət formasından asılı olmayaraq respublikanın müəssisə və təşkilatlarına köməklik edilməsi tövsiyə edilsin".


Rəhbərliyin çox zəif və işə vecsiz münasibəti nəticəsində bu müddəaların heç biri indiyə qədər öz əksini tapmamışdır. Birliyimizin 12.75 hektar torpaq sahəsi bütün irad və təkliflərə baxmayaraq ayrı-ayrı şəxs və təşkilatlara qeyri-qanuni şəkildə satılmışdır. Məsələn: Sumqayıt bazası 6.1 hektar, Sabunçu sexi 0.7 ha, Nizami TSTB - 2.0 ha, Abşeron TSTB - 1.14 ha və cəmi 11.41 hektar birlik işçilərinə böyük ziyan vurmuşlar. Sonuncu bu iki təşkilatın nə vaxt yarandığını biz heç bilməmişik. Nəticədə işçilər işdən ayrılmış və bu günə kimi uzun müddətdir işlədikləri birlikdən nə maaş, nə də özəl pay ala bilməyiblər. Belə ki, yerdə qalan 1.34 hektar ərazi anbar və təsərrüfatları ilə birlikdə artıq özəlləşdirmə haqqında Dövlət qanuna görə işçi kollektivinin payına düşdüyü halda, yenidən dövlət qanunlarına zidd olaraq, hansısa yollarla 0.5 hektar sahə anbar və tikililərlə birlikdə Azərbaycan Respublikası Dövlət Miqrasiya Xidmətinə verilmişdir. Bu zaman heç bir təhvil-təslim aktı olmamışdır. Hazırda "Azərmetal" Topdansatış Birliyinin işığı, suyu kəsilmiş, kommunal xidmətlər dayandırılmış, otaqlar dağınıq, qapılar sınıq vəziyyətə gətirilmişdir. Ümumiyyətlə, bizim şikayətlərimizə qulaq asan yoxdur. Anbar daxilinə gələn bütün dəmir yolları, dirəklər, qaldırıcı kranlar və bütün metal məmulatları müxtəlif yollarla satılıb və işçilər buna görə çörəksiz qalıb. 2014-cü ildən bəri maaş almayan insanlar necə yaşasın? Amma debitor pullarımız çoxdur. Məsələn, Sumqayıt SAM zavodu 11 min manat, Azneft İB-dən 182 min manat pulu "Azkontrakt ASC"-nin hesabına köçürmüşdür. Amma bu pulların hara xərcləndiyi bilinmir. Yenə də işçilər maaşsız qalmışlar. Magistral Neft Kəmərləri tərəfindən bizə olan 587 min manat pulun taleyi, bir neçə məhkəmə mərhələsindən sonra nəhayət, Ali Məhkəminin qərarı ilə bizim xeyrimizə həll olundu. O qədər pulun da hara xərcləndiyini heç kim bilmir. Mən Sizə Güləddin Dadaşovun daha bir qanunsuz əməlini sübut edən sənədləri təqdim edirəm, Baş Prokurorluğa və DTX-yə göndərmişik. Deməli, işçilərə əmək haqqı kimi nəzərdə tutulan 84 min manat pulun yalnız 34 min manatı paylanıb. Yerdə qalan 50 min manat pulun taleyi məlum deyil. Özü də G.Dadaşov bu pulu içşilərə iş yerində yox, "Azərkontrakt ASC"-də olan öz kabinetində qol çəkdirib verib. Sizə təqdim olunan cədvəldə G.Dadaşov mən T.İbrahimovaya 9226 manat 70 qəpik əmək haqqı yazsa da, ona cəmi 3.000 manata qədər pul verdi. Ona görə də, mən həmin əmək haqqı cədvəlinə qol çəkmədim. Bu gün də bildirirəm ki, G.Dadaşovun nəinki yol verdiyi əməllər, hətta onun müavin kimi fəaliyyəti də qanunsuzdur…

(Davamı var)

«Təzadlar»ın Araşdırma Qrupu

(Güləddin Dadaşovun dağıtdırdığı və məhv etdirdiyi deyilən maliyyə və bank sənədləri)