 |
|
|
Sosial şəbəkədə tanınmış həkim-psixiatr Abdulla Şıxlinskinin Azərbaycan Sahibkarlar Konfederasiyasının sədri, “şapka Mamed” kimi tanınan Məmməd Qurban oğlu Musayevin “Türk-Amerikan” klinikasını alması, onu qanunsuz olaraq işdən çıxarması və killerlərlə hədələnməsi haqda müraciəti yayılıb.
Tanınmış həkim-psixiatr Abdulla Şıxlinski müraciətində qeyd edir ki, “şapka Mamed” uzun illər Azərbaycanda fəaliyyət göstərən, keyfiyyətli tibbi xidməti ilə tanınan “Türk-Amerikan” klinikasını alıb: “Bundan sonra klinikanın direktoru işdən çıxarıldı, klinikanı tamamilə dağıtmağa başladı.
Klinikaya öz qızını direktor təyin etmiş, işçilərin bir çoxunu, şəxsən mənim özümü qeyri-qanuni olaraq işdən azad etdi. Mən həmin klinikada həkim-psixiatr vəzifəsində işləyirdim. Özü qanunsuz əməllərlə məşğul olan, əvvəllər haqqında bir-neçə dəfə cinayət işi qaldırılmış “şapka Mamed” adı ilə məşhur olan bu adam işçilərdən qanun tələb etməyə başladı. Mənim həkimlik sertifikatımın vaxtının keçdiyini bəhanə edərək, məni işdən azad etdi. Halbuki mən həmin klinikaya işə götürüləndə də, mənim Azərbaycan sertifikatımın vaxtı keçmişdi, lakin mən həmin klinikaya işə girəndə Rusiya Federasiyasında aldığım sertifikatları təqdim etmişdim. Yeri gəlmişkən, qeyd edim ki, mən psixiatriya üzrə Rusiyada fundamental hazırlıq keçmiş həkim-psixiatram, 15 ilə qədər müddətdə Rusiyada məcburi müalicə həyata keçirilən psixiatrik xəstəxanalarda ağır xəstələrlə işləmişəm, hazırda Azərbaycanda heç kimə lazım deyiləm. Lakin Azərbaycan Respublikası Səhiyyə Nazirliyində rüşvətsiz sertifikat almaq mümkün deyil, bunu Məmmədin qızı, ixtisasca həkim olan, hazırda klinikaya rəhbərlik edən Xuraman da deyir. Mən işdən çıxmaq üçün ərizə yazmaq istəmirdim, lakin klinikanın mühasibi və kadr işləri üzrə əməkdaşı Seyrə mənə bildirdi ki, məni onsuz da fiziki olaraq klinikaya buraxmayacaqlar və mən ərizə yazmaqdan imtina etsəm, bu “şapka Məmmədin xoşuna gəlməyəcək, Məmməd adi adam deyil, ətrafında killerlər dəstəsi saxlayır, səni də məhv edər”.
Bu hədə-qorxulardan və klinikada yaranmış vəziyyətdən belə aydın olurdu ki, orada işləmək mümkün olmayacaq.
Məmməd və Xuraman həkimlərin maaş kartlarını özlərində saxlayıb, həmin kartlarla nə dələduzluqlar etdikləri məlum deyil. İşçinin maaş kartı özündə olmalıdır. Bunlar isə kartları alıb özlərində saxlayırdılar. Klinikada həkimlərin qəbulu üçün otaq çatmadığı bir vaxtda Xuraman böyük bir otağı təmir etdirib, özünə əyləncə otağı düzəltdirib. Mənim işdən çıxarkən qanunla almalı olduğum çıxarış vəsaitini mənə verməyiblər. Bəs bu pulu mənə kim verməlidir?”
Həkim şikayətində yazır ki, klinikaya sığorta ilə gələn xəstələrə xidmət göstərilmir: “Pulsuz, xeyirsiz xəstələrdir” deyib başdansovdu yanaşılır. Klinikada həkim-terapevtin otağı axşam 20.00-dan sonra intim əlaqələr üçün görüş otağı kimi istifadə olunur. Mən Xuramandan çıxarış vəsaiti tələb etdikdə, o, mənim ağzımı yummaq üçün yalandan mənə söz verdi ki, mənə sertifikat almaqda kömək göstərəcək, başqa klinikaya işə düzəldəcək, lakin mən kifayət qədər həyat təcrübəsi olan bir insan kimi bu sözlərin hamısının yalan olduğunu bilirdim.”Mən Səhiyyə Nazirliyinə 7000 man pul verib, sənə sertifikat alacağam, pulsuz mümkün deyil”-bu Xuramanın sözləridir. Bir qədər sonra mənə işçilərin birisi vasitəsilə çatdırdı ki, “sertifikat üçün Səhiyyə Nazirliyi 17 min manat pul istəyir, mən onu verə bilməyəcəm, çox baha oldu”-bu Xuramanın sözləridir”.
Psixiatr: “Deyirsən qızın narkomandır, inanmır”
Abdulla Şıxlinski
Həkim şikayətində qeyd edir ki, Azərbaycanda Səhiyyə Nazirliyi bütün səhiyyə sistemini tam nəzarətsiz buraxıb: “Özəl klinikalar indi də bankirlər tərəfindən alınıb-satılır, səhyyə sistemində rüşvət tüğyan edir, həkim sertifikatları pulla satılır. Həkimlərin və xəstələrin taleyini heç kəs fikirləşmir. Səhiyyə “Şapka Mamed” kimi insanların ümidinə qalıb.
Yazıda adı hallanan hər kəsi dinləməyə, mövqeyini yayımlamağa hazırıq.
Sosial şəbəkələrdə 1 saylı Xırdalan tam orta məktəbində çəkilən görüntülər müzakirələrə səbəb olub. Belə ki, 4-cü siniflərin buraxılış tədbirində valideynlərin Yaqut Ağamalıyeva adlı müəllimə qızıl zinət əşyası vermələri ilə bağlı görüntülər yayılıb. İddia edilib ki, valideynlər hədiyyəni müəllimin tələbi ilə alıblar. Müəllimənin hədiyyəyə etiraz etməməsi və rahat şəkildə qəbul etməsi sosial media istifadəçiləri tərəfindən etirazla qarşılanıb.
Metbuat.az məsələ ilə bağlı sözügedən məktəblə əlaqə saxlayıb. Məktəbdən bildirildi ki, həmin müəllimin 35 illik pedaqoji fəaliyyəti var və bu, valideynlər tərəfindən planlaşdırılan addımdır:
“Valideynlər qrupunda məsələni araşdırmışıq. Müəllimin heç bir xəbəri olmadan hədiyyə alıblar. O müəllimə imanlı xanımdır. Bu, məktəbimizə qarşı atılmış bir böhtandır. Bu xəbərdən sonra valideynlər bizimlə əlaqə saxlayaraq bildirdilər ki, bu yalan məlumatdır və hədiyyə valideynlər tərəfindən təşkil olunub. Hədiyyə müəllimə təqdim olunana qədər onun bundan xəbəri olmayıb”.
Məsələ ilə bağlı sosial şəbəkələrdə yayılan həmin görüntüləri təqdim edirik:
Zəruri qeyd: Təbrikdə 35 illik pedaqoji fəaliyyət barədə heç bir qeyd yoxdur. Cavabda qeyd edildiyi kimi imanlı müəllimə xanımın hədiyyəyə reaksiyasında gözlənilməzliklə bağlı bir hal müşahidə etmədik.
Culfa sakini tərəfindən Hurriyyet.az-ın redaksiyasına şikayət məktubu daxil olub. Şikayətçi iddia edir ki, tibb bacısı özünü həkim kimi təqdim edərk, onları aldadıb:
“Mənim oğlumun tükü tökülürdü. Naxçıvanda Leyla adlı tibb bacısı var, özünü həkim kimi tanıdır. Onun yanına getdik, oğluma baxıb dedi ki, gedin analiz verin. 20-30 manat xərc çəkib analiz verdik. Cavabını aparıb Leyla xanıma təqdim etdik. Baxıb dedi ki, narahat olmayın, müalicə edəcəm, xeyri olacaq.
Mən dedim ki, qızım, bunların irsində keçəllik var, xeyri olacaqsa müalicə et, olmayacaqsa qalsın. Dedi ki, yox, narahat olmayın, 100 faiz olmasa da, belə qalacaq, qalanı tökülməyəcək.
Razılaşdıq, bu başladı müalicəyə. Dedi ki, 1 iynə 75 manatdır, ümumilikdə bir neçə ay ərzində 13 iynə vurdu. Hər dəfə deyirdi ki, narahat olmayın, düzələcək. Əlavə olaraq dərman da yazdı ki, evdə bunları da istifadə edin. Həmin dərmanların da birini 20 manatdan aldıq. Daha sonra pul bibər, dəfnə yarpağı və bir neçə bitkidən də istifadə elədi, ilyarım gözlədik, oğlumun başında tük qalmadı, hamısı töküldü.
İndi zəng vurub deyirik ki, başında tük qalmayıb, hər dəfə bir bəhanə axtarır. Sonra da dedi ki, mənim arxam var, heç kim mənə heç nə edə bilməz. Dedim ki, gedib şikayət edəcəm, cavab verdi ki, istəyirsən, gəlim bir yerdə gedək. Səs yazıları da var. Məni borclu çıxarır, təhdid edir.
Məcbur qalıb, yeni təyin olunan nazirini qəbuluna getdik. Başımıza gələnləri danışdıq. Hüquqşünasa tapşırdı ki, məşğul olsun. Amma 1 ayda 10 dəfə zəng vurmuşam, heç bir nəticə yoxdur, gah deyirlər ki, baxılacaq, gah da hüquqşünas telefonu üzümə söndürür.
Mən sizin saytınız vasitəsilə lazımi orqanlara müraciət edirəm, xahiş edirəm ki, bu məsələni araşdırsınlar və ailəmin təhlükəsizliyini təmin etsinlər. Çünki Leyla xanım tərəfindən açıq-aşkar təhdid olunuram”.
Hurriyyet.az
Redaksiyadan: Qarşı tərəfin mövqeyini dərc etməyə hazırıq.
Havaların isinməsiylə yol kənarı, səki və küçələri zəbt edən kafe, restoranlar artıb. Hazırda nizami küçəsində hərəkət etməyə yer yoxdur.
Tribunainfo.az xəbər verir ki, restoran və kafelər daha çox müştəri cəlb etmək üçün yol kənarlarını, küçələri zəbt edirlər. Şəhər mərkəzində vəziyyət daha da acınacaqlıdır. Nizami küçəsində gəzinti üçün yer qalmayıb, restoranlar küçələri zəbt edib, açıq hava məkanları yaradıblar. Sakinlərin narahatlığı və şikayəti nəzərə alınmır. Nizami küçəsində gəzməyə yer qalmasa da, bu nə restoran sahiblərini, nə də icra hakimiyyətini narahat etmir.
Azərbaycan Dövlət İqtisad Universitetində (ADİU) cərəyan edən bəzi proseslər də öz intensivliyini artırıb. Mediada yer alan məlumatlara görə, rektor Ədalət Muradovun israrla tətbiq etdiyi yarıtmaz idarəçilik üsulları bu ali təhsil müəssisəsində bir müddət əvvəl yaranmış gərginliyi getdikcə daha da artırır. İlk növbədə əlbəttə ki, ADİU-da həyata keçirilən rüşvət yığımları tələbələrin və bəzi müəllimlərin ciddi narahatlığına və etirazlarına səbəb olan amil kimi çıxış edir. Universitetin daxilində olan mənbələr də verdiyi məlumatlarda təsdiq edirlər ki, Ədalət Muradovun ADİU-ya rektor təyin olunmasından sonra adıçəkilən təhsil müəssisəsi kifayət qədər geriləyib. İstər maddi-texniki baza, istər təhslin keyfiyyəti, tələbələrin dərsə davamiyyəti, istərsə də rüşvətxorluq iddiaları ilə bağlı müraciətlər isə, ötən müddət ərzində nəzərəçarpacaq dərəcədə artıb.
Rüşvət məzənnələri və bir qarşıdurmanın pərdəarxası.....
Son bir iki il ərzində ADİU-da rüşvətxorluq az qala rəsmiləşdi. Bununla bağlı saytımıza daxil olan məlumatda bildirilir ki, artıq tələbələr semestrdən semestrə artan rüşvət məzənnəsindən boğaza yığılıblar və hətta universitetdə baş verənlərlə bağlı ölkə rəhbərliyinə müraciət etmək barədə fikirlər də səsləndirilir. Əldə etdiyimiz məlumata görə,tədris ilində ADİU-da dövlət imtahanları üçün 5000 manat, kəsir imtahanına görə 500 manat, tələbə köçürmələri zamanı verilən fərq imtahanına görə 800 manat məbləğində “ödənişlər” müəyyən edilmişdi. Digər tərəfdən isə ADİU-ya işə qəbul məsələləri də artıq ciddi korrupsiya əməlləri ilə müşayiət olunmaqdadır. Qeyd etmək lazımdır ki, bu barədə məlumatlar ölkənin bir çox mətbu orqanlarında da yayımlanmaqdadır. Belə ki, yayımlanmış məlumatada universitetin keçmiş məzunlarından biri tərəfindən ADİU-ya işə qəbul olunmaq üçün müəllimlərdən birinə 4000 manat məbləğində rüşvət verildiyi iddiası irəli sürülmüşdü. Açıqlamalar görə rüşvətin alınması faktı Ədalət Muradovun rektor təyin olunmasından az sonra baş verib. Öz növbəsində pulu alan müəllim də şikayətçi ilə telefon danışıqları zamanı ona bildirib ki, bütün məbləği birbaşa rektora təhvil verib. Digər tərəfdən də Ədalət Muradovun ADİU-nun keçmiş rektoruna qarşı apardığı antitəbliğat kampaniyası da universitetdə mövcud gərginliyin artmasını stimullaşdırır. Bununla belə etiraf etmək lazımdır ki, müxtəlif instansiyalara Şəmsəddin Hacıyevə qarşı “kompramat” xarakterli məlumatların ötürülməsinə daha əvvəldən başlanmışdı və prosesdə ADİU-nun bəzi əməkdaşlarının da yaxından iştirakı olmuşdu.
Əldə etdiyimiz başqa bir məlumatda Ədalət Muradovun Şəmsəddin Hacıyevə qarşı apardığı kampaniyanın fərqli səbəbləri də diqqət mərkəzinə çəkilmişdi. Mənbə bildirmişdi ki, illər öncə İqtisad Universitetinin müəllim heyətinin mənzil şəraitinin yaxşılaşdırılması məqsədilə, məhz Şəmsəddin Hacıyevin təşəbbüsü əsasında “İqtisadçı-2005” MTK şirkəti təsis olunub. Məlumata görə bu şirkət hazırda kifayət qədər rentabelli bir müəssisəyə çevrilmişdir. Ədalət Muradovun Şəmsəddin Hacıyevə qarşı apardığı kampaniyanın daha bir məqsədi də məhz bu şirkət üzərində nəzarəti ələ keçirmək olub…
Prezident sərəncamına sayğısızlıq...
Azərbaycan Dövlət İqtisad Universitetinin rektoru Ədalət Muradov son zamanlar sensasiya sayıla biləcək şok addımlar atmaqdadır. Aşağıdakı yazıda rektorun adına bağlı sensasion faktları diqqətinizə çatdıracayıq. İlk olaraq onu bildirək ki, Azərbaycan Dövlət İqtisad Universitetinin rektoru Ədalət Muradovun rəhbəri olduğu universitetin adı ilə bağlı atdığı hüquqi addımlar isə artıq siyasi özbaşınalıq kimi də dəyərləndirilə bilər. Belə ki, rəsmi “Azərbaycan” qəzetinin 17 yanvar 2016-cı il tarixli sayında Azərbaycan Dövlət İqtisad Universitetinin rektoru, professor Ədalət Muradovun imzası ilə ““Thomson Reuters”ə çıxış universitetlərin dünya elminə inteqrasiyasını sürətləndirəcəkdir” başlıqlı məqaləsi dərc olunub… Məqalənin mahiyyəti bizim üçün maraqlı deyil və diqqəti çəkən, narahatlıq doğuran başqa məsələdir. Daha doğrusu, rektor Ədalət Muradovun Prezident İlham Əliyevin onu rector təyin etməsi haqqında imzaladığı 5 mart 2014-cü il tarixli sərəncamına görünməmiş hörmətsizliyidir. Budur, Prezidentin Sərəncamında deyilir:
“Ə.C. Muradovun Azərbaycan Dövlət İqtisad Universitetinin rektoru təyin edilməsi haqqında Azərbaycan Respublikası Prezidentinin Sərəncamı
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:
Ədalət Cəlal oğlu Muradov Azərbaycan Dövlət İqtisad Universitetinin rektoru təyin edilsin.
İlham Əliyev
Azərbaycan Respublikasının Prezidenti
Bakı şəhəri, 5 mart 2014-cü il”.
Bu da Ə.Muradovun məlum məqaləsinin vacib hissəsi: “… Yaxın dövr ərzində UNEC-də “Thomson Reuters”in elmi platformaları da daxil olmaqla, dünyanın əksər nüfuzlu elmi platformalarına elektron qaydada tam çıxış imkanlarına malik, eləcə də rəflərində ən müasir elmi və populyar nəşrlərin olduğu müasir bir kitabxananın açılışının edilməsi planlaşdırılır. Hesab edirik ki, belə bir kitabxananın istifadəyə verilməsi UNEC-də həm tədris prosesinin, həm də elmi fəaliyyətlərin informasiya təminatını köklü şəkildə yaxşılaşdıracaq və UNEC-i dünya səviyyəli universitet olma yolunda bir addım daha önə aparacaqdır.
Ədalət MURADOV, UNEC rektoru, iqtisad elmləri doktoru, professor
Elşən BAĞIRZADƏ, UNEC rektorunun müşaviri, iqtisad üzrə fəlsəfə doktoru”.
Göründüyü kimi, Prezident Sərəncamında vəzifəsi “Azərbaycan Dövlət İqtisad Universitetinin rektoru” göstərilsə də, professor Ədalət Muradov rəsmi dövlət qəzetində (həmçinin universitetdaxili əmrlərdə) vəzifəsini “Ədalət MURADOV, UNEC rektoru, iqtisad elmləri doktoru, professor” kimi göstərir.
Biz bu adın mənasını aydınlaşdırmağa çalışdıq. Məlum olur ki, rektor bunu 30-cu ildə bu təhsil ocağında hansısa bir ingilisin olması şərəfinə belə bir ad seçib və bunu beynəlxalq əmtəə nişanı kimi tanıtmaq və təbliğ etmək fikrindədir.
Əcaba, bu ingilisin şərəfi Azərbaycan Prezidentinin Sərəncamından, Azərbaycanın dövlət dilinin mahiyyətindən və nəhayət, milli maraqlarımızdan irəli və şərəflidirmi???
Rektorun adı MTN işində: Vidadi Zeynalovla əlaqələr…
Rektor Ədalət Muradovun adı hallanan digər bir qalmaqallı məsələ MTN işi ilə bağlı həbs olunmuş Vidadi Zeynalovla bağlıdır. Məlumat üçün bildirək ki, Vidadi Zeynalov 1995-ci ildə Bakı şəhər Maliyyə İdarəsində əvvəlcə şöbə rəisi vəzifəsində çalışıb, sonra isə Bakı Maliyyə İdarəsinin rəisi olub… Ta 2000-ci ilədək, yəni Azərbaycan Dövlət İqtisad Universitetinə işə qəbul olunanadək. O, 2000-2004-cü illərdə Azərbaycan Dövlət İqtisad Universitetinin inzibati – təsərrüfat işləri üzrə prorektor vəzifəsində çalışıb, 2004-cü ildən isə Rabitə və Yüksək Texnologiyalar Nazirliyinin Aparat rəhbəri vəzifəsinə təyin edilib… Bu təyinatda onun MTN-in Tədris Mərkəzinin rəisi vəzifəsində çalışmış qardaşı Vahid Zeynalovun böyük rolu olub… Sonradan məlum MTN işi ilə bağlı Vidadi Zeynalovun MTN-də Tədris Mərkəzinin rəhbəri olan qardaşı Vahid Zeynalov da işdən azad olunaraq, istintaqa cəlb olunub. Vidadi Zeynalovun Dövlət İqtisad Universitetinin indiki rektoru Ədalət Muradovla, prorektor, KİV-lərdə adı tez-tez hallandırılan Damət Bağırovla olduqca sıx əlaqələri olub. Bu yaxınlıq onunla təsdiqlənir ki, məsələn, Vidadi Zeynalovun oğlu Pərviz Zeynalov cavan və təcrübəsiz olsa da, universitet Həmkarlar Komitəsinin rəhbəri təyin olunub. Pərviz Zeynalov hazırda rektor Ədalət Muradovun və rektor Ədalət Muradovun xüsusi işlər üzrə prorektoru olan Əziz Əzizovun dəstəyi ilə tezliklə dissertasiya müdafiə edib. Ən maraqlısı budur ki, Vidadi Zeynalov 2004-cü ildə Rabitə Nazirliyinə təyinat alandan sonra da İqtisad Universitetində baş müəllim kimi uzun illər maaş alıb.
Ədalət Muradov Vidadi Zeynalovun qanunsuz maaş almasını istintaqdan niyə gizlədib?
MTN işi ilə bağlı Vidadi Zeynalov həbs olunandan sonra Azərbaycan Baş Prokurorluğunun Baş İstintaq İdarəsi bu qanunsuz maaş alma məsələsinə rəsmi aydınlıq gətirilməsi üçün Dövlət İqtisad Universitetinə rəsmi sorğu da göndərib. Bəs rektor Ədalət Muradov bu rəsmi sorğuya necə cavab verib? Məlumatlardan və real vəziyyətdən belə bəlli olur ki, Azərbaycan Dövlət İqtisad Universitetində MTN işi ilə bağlı həbs olunmuş Vidadi Zeynalovun müdafiəsi ilə bağlı rektor Ədalət Muradov səviyyəsində əməlli-başlı müdafiə sistemi qurulub… Sual yaranır: rektor Ədalət Muradov Vidadi Zeynalovun Rabitə Nazirliyində işləyə-işləyə həm də İqtisad Universitetindən məvacib alması kimi korrupsiya əməlini niyə bütün səyi ilə istintaqdan gizlətməyə çalışıb? Dövlət İqtisad Universitetində bilməyən yoxdur ki, Vidadi Zeynalovun doktorluq işi (?) həbsindən az əvvəl məhz rektor Ədalət Muradovun birbaşa rəhbərliyi ilə seminardan keçirilmişdir… Bu isə rektorun himayəsi olmadan mümkün olmayan bir məsələdir.
Prorektor Əziz Əzizov rüşvətlə işdən qovulmuş dosenti hansı yolla işə bərpa etdirib?
Rektor Ədalət Muradovun 28 noyabr 2014-cü ildə imzaladığı 155-\//\|3 saylı əmri də olmaqla bir neçə sənədin surətini təqdim ediblər. Bu sənədlər sırasında bir neçə əmr də var… Məlum olur ki, Dövlət İqtisad Universitetində Beynəlxalq Münasibətlər fakültəsi vardır və bu fakültədə bir müddət əvvəl görünməmimş bir qalmaqal olub. Belə ki, 4 il kəsiri olan bir neçə tələbə dövlət imtahanına buraxılmışdır. Bu məsələnin üstü açılanda rektor Ə.Muradov bərk qəzəblənib və məcbur olaraq əmr imzalayıb ki, bu fakültədə korrupsiya məsələsi vardır və s. Lakin sehirli çubuq həmin əmrin icrasını gedər-gəlməzə yola salıb.
***
Bundan başqa, əmrlərdən biri də Dövlət İqtisad Universitetinin MBA (magistratura) direktoru Rövşən Quliyevlə bağlıdır. Lakin yenə də rektor Ədalət Muradovun əmrini niyə sonradan «don vurub», bax bu çoxsaylı suallar doğurur. Həmçinin Dövlət İqtisad Universitetinin «İqtisadi nəzəriyyə-1» kafedrasının dosenti Aydın Bayram oğlu Məmmədovun universitetdə hamıya məlum əməli ilə bağlı rektor Ədalət Muradovun verdiyi əmrin sonrakı taleyi barədə maraqlı faktlar üzə çıxıb…
-Bəs bu qalmaqallı əmr necə yerinə yetirilib?
-Rektor Ədalət Muradovun həmin əmrində nələr etiraf olunur?
-Əmrin icrası kimə həvalə olunub və icrası hansı səviyyədə tamamlanıb?
Azərbaycan Dövlət İqtisad Universitetin bitib tükənməyən NARAZILIQLAR....
Xəbər verildiyi kimi, bu narazılıqların ən vacibi rektorun Türkiyənin bəlli universitetlərində təhsil almışlara «gənc kadrlar» adı altında üstünlük verməsi ilə digər müəllimlərə «keçmişin qalığı» kimi münasibət bəslənilməsini ortaya qoymaqdadır. Və çox təəssüflər olsun ki, bu nəzərlərin hər gün Domokl qılıncı kimi onların başının üstünü kəsdirməsi, əmək haqlarına, digər imtiyazlarına təsir etməsi fakt olaraq qaçılmazdır. Bu barədə fikirlərini bildirən müəllimlərin dərdini başa düşmək çətin deyil… Məcburuq bu ifadəni də işlədək, islahatçı rektorun nəzərlərində qocaman sayılan professor-müəllim heyəti hələ də bir suala cavab axtarır: axı necə oldu ki, 30-40 il müəllimlik fəaliyyəti ilə məşğul olan, onlarla, yüzlərlə elmi kadrlar hazırlayan müəllimlər dura-dura, rektor Ədalət Muradovun yaxın dostu, bir dəfə də olsun auditoriyaya daxil olaraq dərs deməmiş sabiq maliyyə naziri Əvəz Ələkbərov «Əməkdar müəllim» Fəxri adına layiq görüldü?
«Rektor bir tərəfdən ADİU-ni Türkiyə universitetlərində oxumuş gənc kadrların ixtiyarına verir, digər tərəfdən isə görünməmiş bir addım atır, sabiq maliyyə nazirini əvvəlcə ADİU-da kafedra müdiri təyin edir, ardınca isə onu «Əməkdar müəllim» etdirir? Bun ə öhdəlikdir görəsən? İstərdik ki, rektor Ədalət Muradov bu suala cavab versin. Xatırladırıq ki, Prezident İlham Əliyevin 2017-ci ilin iyulun 20-də imzaladığı sərəncamla ADİU-nun işə yeni təyin edilmiş kafedra müdiri, sabiq maliyyə naziri Əvəz Ələkbərova «Əməkdar müəllim» Fəxri adı verilib. Bu hadisə isə uzun müddətdir burada çalışan professorları qəzəbləndirmişdir və onların Prezident İlham Əliyevə ünvanladıqları müraciətlərində deyilirdi: «Cənab Prezident! Siz həmişə haqqın və ədalətin yanında olmusunuz. Amma Azərbaycan Dövlət İqtisad Universitetinin rektoru Ədalət Muradovun adı ilə əməli uyğun gəlmir. Belə ki, onun Təhsil Nazirliyinə göndərdiyi təqdimat əsasında ötən il tələm-tələsik kafedra müdiri təyin edilmiş sabiq maliyyə naziri Əvəz Ələkbərova «Əməkdar müəllim» Fəxri adı verildi. Təsəvvür edin ki, ADİU-da 1600-dən çox müəllim çalışır, onların böyük əksəriyyətinin 30, 40, hətta 50 il peşəkar müəllimlik stajı var. Amma onlar durra-dura universitetdə bircə saat belə dərs deməmiş Əvəz Ələkbərov birdən-birə «Azərbaycanın Əməkdar müəllimi» Fəxri adına layiq görülür. Ən maraqlıdır ki, sərəncamda protokol qaydalarına uyğun yazılıb ki, «…Ə.Ələkbərov Azərbaycanda təhsil sahəsində səmərəli fəaliyyətinə görə təltif edilib», -deyən müəllimlər əlavə edirlər: "Cənab Prezident! Biz Sizə Əvəz Ələkbərovun tərcümeyi-halını göndəririk. Orada onun bircə saat belə bu universitetdə dərs dediyi yazılmayıb. Bəs necə olur ki, o, rektor Ədalət Muradovun təqdimatı əsasında bu fəxri adı alır?».
Muradovun magistatura oyunu....
...Ölkəmizin ali təhsil müəssisələrində magistratura hazırlığı ilə bağlı bir müddət əvvəl apardığımız araşdırmalar maraqlı məqamları üzə çıxarıb
İlk növbədə “Azərbaycan Respublikasında çoxpilləli ali təhsil sistemində magistr hazırlığı (magistratura) haqqında” Əsasnamənin və Magistr hazırlığı (magistratura) haqqında Azərbaycan Nazirlər Kabinetinin 13 fevral 1997-ci il tarixli, 15 saylı qərarının icrası və şərtlərinə necə əməl olunmasını öyrənmişdir. Bunun üçün seçmə yolu ilə BDU, “Xəzər” Universiteti, Azərbaycan Dövlət İqtisad Universiteti və Azərbaycan Dövlət Pedaqoji Universiteti götürülmüşdür.
Olduqca kobud qanun pozuntusu aşkar edilən isə Dövlət İqtisad Universiteti olmuşdur.
Azərbaycan Dövlət İqtisad Universitetində “Azərbaycan Respublikasında çoxpilləli ali təhsil sistemində magistr hazırlığı haqqında” Əsasnamə necə pozulub?
Xatırladaq ki, magist hazırlığı haqqında “Azərbaycan Respublikasında çoxpilləli ali təhsil sistemində magistr hazırlığı haqqında” Əsasnamə və müvafiq olaraq Nazirlər Kabinetinin uyğun qərarı vardır. Əsasnamənin 1.1. bəndində yazılır ki, “Çoxpilləli ali təhsil sistemində magistratura ali təhsilin ikinci pilləsi olub, müəyyən ixtisas üzrə sərbəst yaradıcılıq fəaliyyəti göstərə biləcək mütəxəssislərin hazırlanması məqsədini güdür”. Çox yaxşı. Və Əsasnamənin 2.2.-ci bəndində isə deyilir: “Magist hazırlığı yüksək ixtisaslı elmi-pedaqoji kadrları, müasir tədris və elmi-tədqiqat laboratoriyaları, tədris və fənn kabinələri, zəngin elmi kitabxanası, tədris-təcrübə və istehsalat sahələri, elmi-tədqiqat institutları olan ali təhsil müəssisələrində ali təhsil müəssisələrində ali təhsilin Azərbaycan Respublikası Nazirlər Kabineti tərəfindən təsdiq olunmuş təhsil istiqaməti və ixtisaslar üzrə açılır”.
Gəlirik mətləbə: Əsasnamənin 3.1.-ci maddəsində xüsusi olaraq qeyd olunur ki, “Magistratura təhsil pilləsində kadr hazırlığına iddiaçı olan təhsil müəssisəsində (oxu: ADİU.Red.) istiqamət üzrə tədris prosesini təmin edən elmi-pedaqoji kadrların ümumi sayının ən azı 50 faizi, ixtisas üzrə isə ən azı 5 nəfəri elmi dərəcəli olmalıdır”.
Bəs magistrlərə təyin edilmiş elmi rəhbərlər kimlər ola bilər?
Beləliklə, “Əsasnamə”də daha sonra oxuyuruq: “Magistrantların elmi rəhbərlərinin tədris prosesində iştirakı üçün: - müvafiq magistr təhsil proqramı üzrə dərsliklərin (dərs vəsaitlərinin) və ya elmi əsərlərin (araşdırmaların) müəllifi olması; həmin magistr təhsil proqramı üzrə ən azı bir əsas və ya ixtisas kursunu aparması zəruridir”.
Aşağıda Azərbaycan Dövlət İqtisad Universitetində magistrlərə təyin olunmuş elmi rəhbərlərin bu şərtlərə uyğunluğunu bir-bir araşdırdıq və təəssüf hissi doğuran mənzərə ilə rastlaşdıq.
ADİU-da magistrlər istehsalatdan ayrılmaqla təhsil alırlarmı?
Bu suala cavab vermək üçün Əsasnamənin 5-ci bəndinə diqqət edək. “Magistr proqramına qoyulan ümumi tələblər” bölümündə bu vacib elementlər sadalanır. Əsasnamənin 5.2.-ci maddəsində qoyulan əsas şərt isə belədir: “5.2. Magistraturada təhsil istehsalatdan ayrılmaqla həyata keçirilir...”.
Araşdırmamız sübut edir ki, məsələn, iqtisad elmləri doktoru, professor Kəlbiyev Yaşar Atakişi oğlu ADİU-da Magistratura Mərkəzinin rəhbəridir və özü isə 5 magistrə rəhbərlik edir. Öyrəndik ki, o, “Azərsu” ASC-də iş saatı 09-18:00-a qədər olan böyük bir idarənin rəisidir. Belə çıxır ki, onun elmi rəhbəri olduğu magistrlər axşam saat 18:00-da işdən çıxan rəisin, deməli, həm də elmi rəhbərin, mühazirələrini yalnız axşam saat 19:00-dan sonra dinləyə bilərlər. Belə çıxır ki, həmin mağistrlər bütün günü ya evdə oturub Yaşar Kəlbiyevin işdən çıxmasını gözləməlidirlər, ya da hardasa istehsalatda çalışıb axşam düşəndə də dərsə gəlməlidirlər. Elmi fəaliyyətə könül vermiş mağistrin isə istehsalatdan ayrılmadan mağistrliyinə isə “Əsasnamə”də qadağa qoyulub.Onu da xatırladaq ki.UNEC də magistrlər gecə dərsə gedirlər.
Rektor Ədalət Muradov Nazirlər Kabinetinin qərarını kobud surətdə pozduğunu rəsmi cavabı ilə etiraf edir...
Bəs ADİU-da magistrlərə elmi rəhbərlərin təyinatı “Əsasnamə”yə və Nazirlər Kabinetinin müvafiq qərarlarına necə uyğundur? Bu sual bir müddət əvvəl ADİU rəhbərliyinə göndərdiyimiz rəsmi sorğuda da ifadə olunmuşdur. Lakin verilən cavablar göndərilən rəsmi cavabı qətiyyən ifadə etmirdi deyə, biz əlavə araşdırmalara başlamışdıq. Ortaya isə görün nələr çıxmışdır. İlk növbədə gəlin magistrlərə elmi rəhbərliyə kimlərin təyin oluna bilməsinin qanuniliyini araşdıraq. Məsələn, “Əsasnamə”nin 5.3 bəndində konkret olaraq yazılır ki, “5.3. Magistraturada tələbənin təhsilinə elmi rəhbərlik həmin ali təhsil müəssisəsində işləyən, elmi dərəcəsi və yaxud elmi adı olan və bu Əsasnamənin 3.4. və 3.5. bəndlərinin tələblərinə cavab verən elmi rəhbər tərəfindən tələbənin fərdi planına müvafiq olaraq həyata keçirilir” (“Əsasnamə”də o da qeyd edilir ki, “Bir nəfərə beşdən çox tələbə-magistr rəhbərlik etməyə icazə verilmir”.
Rektor Ədalət Muradov magistr hazırlığı haqqında “Əsasnamə”ni və Nazirlər Kabinetinin müvafiq qərarını kobud surətdə pozub...
Beləliklə, Araşdırma Qrupumuz ADİU-da mağistraturada baş verən qanunsuzluqları aşkarlamaq üçün universitetin özünün rəsmi saytından götürülən və təhsil ekspertləri tərəfindən dəqiqləşdirilən (http://unec.edu.az/application/uploads/2017/07/Dissertasiya-movzulari-09.01.191.pdf) siyahını öyrəndi, təhlil etdi, həm də magistrlərə təhkim olunmuş müəllimlərin siyahısını ayrıca təftiş etdi. Ən dəhşətlisi budur ki, rektorluqda bu sahəyə nəzarət edən rəhbər işçilər “Əsasnamə”nin 5.3 bəndindəki şərtlərdən, sanki xəbərsizdirlər. Eləcə də Nazirlər Kabinetinin müvafiq qərarından.
Diqqəti çəkən odur ki, “Əsasnamə”də birmənalı olaraq yazılsa da ki, “Magistraturada tələbənin təhsilinə elmi rəhbərlik həmin ali təhsil müəssisəsində işləyən, elmi dərəcəsi və yaxud elmi adı olan və bu Əsasnamənin 3.4. və 3.5. bəndlərinin tələblərinə cavab verən elmi rəhbər tərəfindən tələbənin fərdi planına müvafiq olaraq həyata keçirilir”, yenə də rektorun tapşırığı və ya göstərişi ilə mağistrlərə elmi rəhbərlər universitetin professor və elmlər doktorları, dosentləri dura-dura, kənardan gətirilir. ADİU-da mağistrlərə təyin edilmiş sıravi, elmi adı olmayan və kənardan elmi rəhbər təyin edilmiş müəllimlərin (2 nəfər istisna olmaqla) siyahısını təqdim edir:
1. İ.e.d., prof. Kəlbiyev Yaşar Atakişi oğlu (“Azərsu”yun idarə rəisi)-5 magistr,
2. Növrəsli Tərlan Növrəs-3 mağistr, su üzrə fəlsəfə doktoru;
3. İ.e.n. Cəfərov Elxan Orxan- 2,
4. İ.e. n. Əhmədov Zaur Qalib- 5,
5. İ.ü.f.d. Səfərli Elmir Novruz-4,
6. İ.ü.f.d. Tanrıverdiyev Qalib Əvəz-2,
7. İ.e.n. Rəfiyev Aydın Ağaəli-2,
8. İ.ü.f.d. Bədəlov Elnur Şakir-4,
9. İ.ü.f.d. Babayev Tural Söhbət-5,
10. İ.ü.f.d. Paşacanov Anar Aydın-4 (o, əslində kimya üzrə fəlsəfə doktorudur, amma saytda yalandan i.ü.f.d. yazıblar),
11. H.ü.f.d. Abbasbəyli Mustafa Aslan-5,
12. İ.ü.f.d. Hüseynova Alidə Teymur-2,
13. İ.ü.f.d. Atakişiyev Ruslan Bahyəddin-4,
14. İ.ü.f.d. Əlizadə Namiq Zahid-3,
15. İ.ü.f.d. Sultanov Firudin Oktay-2,
16. İ.ü.f.d. Məmmədova Sevinc Rəfail-2,
17. İ.ü.f.d. Məmmədov Anar Rauf-4,
18. İ.ü.f.d. Quliyev Elsevər Nizami-3,
19. İ.ü.f.d. Muradlı Neman İmran-1(0,5 ştatda dərs deyir, ona elmi rəhbərlik olmaz, elmi dərəcəsi yoxdur),
20. İ.ü.f.d. Abbasov Ceyhun Abbas-3,
21. İ.ü.f.d. Muxtarov Şəhriyar Zahid-3,
22. İ.ü.f.d. Hacıyev Ceyhun Gülməmməd-1,
23. İ.ü.f.d. Mürsəlli Nicat Yusifəli-1,
24. İ.ü.f.d. Mikayılov Fərhad Qamboy-1,
25. İ.ü.f.d. Əhmədov Adil Aydın-3,
26. İ.ü.f.d. Məmmədov Aqil Arif-1,
27. İ.ü.f.d. Alıyev Xətai Şahin-4,
28. İ.ü.f.d. Əkbərov Şahin Şükür-2,
29. Riy.ü.f.d. Rzayeva Ülviyyə Şahin-1,
30. İ.ü.f.d. Bəşirov Xəqani Sərdarxan-4,
31. İ.ü.f.d. Muradov Rəşad Hüseyn-3,
32. İ.ü.f.d. Musayeva Fərqanə Qəzənfər-3,
33. İ.ü.f.d. Abdullayeva Rəsmiyyə Sabir-1,
34. İ.ü.f.d. Bağırzadə Murad Manaf-1,
35. İ.ü.f.d. Muradova Hicran Rafiq-3,
36. İ.ü.f.d. Talıbov Ceyhun Şahmar-4,
37. İ.ü.f.d. Sofiyeva Ofelya Sadıx-3,
38. İ.ü.f.d.Fərzəliyeva Süsən Vaqif-1,
39. İ.ü.f.d. Hüseynov Təhmasib Faiq-1,
40. İ.e.d. Səməndərov Seyfəddin Sabir-1,
41. İ.e. dok.pr. Novruzov Vahid Tapdıq-1,
42. İ.ü. f. d. Abbasov Ceyhun Abbas-1,
43. İ.ü.f.d. Eyvazov Aqil Afdandil-5.
Mağistrlərə elmi rəhbər özbaşınalığı ADİU-dan külli miqdarda dərs yükünün kənara daşınmasına səbəbdir...
Xatırladırıq ki, Azərbaycan Dövlət İqtisad Universitetində, əvvəla, bu ilki 77 mağistrlərə görə 4620 saat dərs yükü 24 elmi rəhbər arasında paylanıb. Təyin edilmiş bu elmi rəhbərlər, professor Y.Kəlbiyev və professor V.Novruzov istisna olmaqla, qalanları (22 nəfəri) qanunsuzdur, elmi dərəcəsi və elmi adları yoxdur, yaxud kənar şəxslərdir. Yəni, onlar professor və ya dosent deyillər.
Bundan başqa, “Əsasnamə”yə zidd olaraq əlavə 22 adi müəllimə 60 magistr verilib (3600 saat dərs yükü).
Həmçinin 15 baş müəllimə isə yenə də “Əsasnamə”yə zidd olaraq 47 mağistr verilib (2820 saat).
Beləliklə, ADİU-nun mağistratura şöbəsində 47+60+77=184 mağistr x 60 saat= 11040 saat!
Araşdırma Qrupumuz yuxarıdakı siyahını və universitetdən kənara daşınan dərs yükünü və ona müvafiq əmək haqqını ictimailəşdirir... Və çox istərdik ki, ADİU rektoru Ədalət Muradov, eləcə də universitetdə mağistraturaya rəhbərlik edənlər elmi rəhbər siyahısının “Azərbaycan Respublikasında çoxpilləli ali təhsil sistemində magistr hazırlığı (magistratura) haqqında” Əsasnamənin və Magistr hazırlığı (magistratura) haqqında Azərbaycan Nazirlər Kabinetinin 13 fevral 1997-ci il tarixli, 15 saylı qərarının şərtlərinə necə uyğun olduğunu müəyyənləşdirsinlər. Sonda isə elə özlərinə sual versinlər: “Əsasnamə”yə tam zidd olaraq ADİU-nun tanınmış iqtisadçı alimlərini maaşla, “Reytinq cədvəli” ilə imtahana çəkərək onlara çatası dərs saatlarının elmi dərəcəsi və elmi adları olmayan, kənar müəllimlərə, iş adamlarına... verilməsi nə dərəcədə ədalətlidir???
İnanırıq ki, bu sual cavablandırılması üçün çətin olmayacaq. Çünki hər şey ortadadır. Qanun və qaydalar da, gələcəyimizin alimləri olacaq mağistrlərə elmi rəhbərlik və onlara elmi münasibət də. Amma bütün suallara təbii ki, yuxarıda adlarını çəkdiyimiz rəsmi dövlət qurumları cavab verəcək.
MURADOV REKTOR OLMAQ TƏHLÜKƏSİ OLAN PROREKTORU NİYƏ UZAQLAŞDIRDI ?
İlk öncə prorektorun işdən azad olunma xeberini sizə təqdim edirəm.
Azərbaycan Dövlət İqtisad Universietinin tədris və təlim texnologiyaları üzrə prorektoru, iqtisadiyyat üzrə fəlsəfə doktoru, dosent Anar Rzayev azad edilib.
Bu barədə ADİU-nun rektoru Ədalət Muradov özünün feysbuk səhifəsində yazıb. "Universitetin tədris və təlim texnologiyaları üzrə prorektoru, iqtisadiyyat üzrə fəlsəfə doktoru, dosent Anar Rzayevi öz ərizəsinə əsasən tutduğu vəzifədən bu gün azad etdim.
Belə başa düşmək olar ki, Anar Rzayev başqa işə təyinat alıb. Amma hansı işə? Sosial şəbəkələrdə bu işdənçıxmanın universitetdaxili bəzi problemlərdən qaynaqlandığı bildirilir. Çünki bir müddət əvvəl Anar Rzayevin ADİU-nun rektoru olacağı barədə məlumatlar dolaşırdı..
Bəli Ədalət Muradov özünü çox ağıllı hesab edir.Amma o başa düşmür ki,elin gözü tərəzidir. Hər kəs hər şeyi görür və anlayır. O qədər qanunsuzluq edirsən ki,işləyənlərə də təhlükə kimi yanaşırsan.Onların uğurunu özünə maneə kimi görürsən.Bunun bir adı var.NARSİSTLİK....
Hər zaman özünü rüşvət və korrupsiyadan uzaq biri kimi cəmiyyətə sırıyan rektor düşünürmü ki,günlərin birində onunla bağlı çox ciddi araşdırmalar olacaq ?
Onunla bağlı geniş mühakimələr aparılacaq ?
Kəsr-imtahan biznesindən yeyilən milyonların izinə düşəcəklər.Gerçəklər,olunan maxinasiyalar bir-bir üstü açılacaq.
Büdcədən yeyilən milyonların,şişirdilmiş mühasibatlıq çeklərinin bir-bir dalına düşüləcək.Tender adı altında yeyilən milyonların izinə əlbətdəki düşüləcək.Sizin canınız bir dənə ədalətlə aparılmış hesablama palatasının audit yoxlamasındadır.
Yoldaş Ədalət Muradov!
Bilirsiniz ki,əbədi heç nə yoxdur.
Həyat da vəzifədə....
Gün gələcək açdığınız bazarı bağlayacaqlar və sizləri mühakimə edəcəklər.O gün heç də uzaqda deyil.///yenisozcu.com
Xatırladaq ki, bu günlərdə “Zaqatala Rayon Mərkəzi Xəstəxanasında rüşvət tuğyan edir” başlıqlı məqalə dərc etmişdik. Redaksiyamıza daxil olan məlumatlara görə ötən ilin avqustunda Tibbi Ərazi Bölmələrini İdarəetmə Birliyinin (TƏBİB) İdarə Heyəti sədrinin vəzifəsini icra edən Vüqar Qurbanovun əmri ilə Zaqatala Rayon Mərkəzi Xəstəxanasına direktor təyin edilmiş Tamara Nurəliyeva oranı bazara çevirib. Belə ki, o, kadrlar şöbəsinin müdiri Gülnarə adlı qadınla əlbir olub xəstəxananı rüşvət ocağına döndəriblər. Mənbəmiz bildirirdi ki, Gülnarə xanım hətta qohumlarından belə rüşvət alıbdır ki, güya onları xəstəxanada işlə təmin edəcəkdir. Bu iki korrupsioner Zaqatalanın Car və Kebeloba kənd sakinlərindən üç nəfəri də bu yolla aldadaraq külli miqdarda pullarını mənimsəmişlər. Məlumatda bildirilirdi ki, xəstəxananın Emin adlı “şillə vuran”ı da var. Eyni zamanda iddia edilirdi ki, Tamara Nurəliyeva rüşvət aldığı otaqlarda video kameranı qoydurmayıb, amma bəzi insanları şantaj etmək üçün digər otaqlara həmin kameraları quraşdırıb. T.Nurəliyeva bəzi çirkli işlərini məhz Emin adlı şəxsin əliylə həyata keçirir. Emin haqqında bəzi xoşagəlməz, etikadan uzaq faktlar da mövcuddur. Bir faktı da nəzərinizə çatdırmaq istəyirik ki, Tamara Nurəliyevanın həyat yoldaşı da bu rüşvət bazarında birbaşa əsas fiqurlardan biridir. Rüşvəti alıb, kimi işə düzəltmək, kimi işdə saxlamaq lazımdır, onun rəyi ilə həyata keçirilir.
Qeyd edək ki, bu xəstəxanada anoloji problemlər illərdir ki, var. Deməli rəhbər dəyişikliyinin bir müsbət təsiri olmamışdır. Xatırladaq ki, təxminən iki il bundan əvvəl də KİV-də Zaqatala rayon Mərkəzi Xəstəxanasından narazı olan N.Əliyeva adlı rayon sakininə istinadən məlumatlar getmişdi. Həmin şəxs bacısının Zaqatala rayon Mərkəzi Xəstəxanasında tibb bacısı işlədiyini, bacısının və digər tanışlarının xəstəxanaya pul verərək işə düzəldiklərini iddia edirdi. N.Əliyevanın özü də xəstəxanada problemlə qarşılaşıbmış. Onun iddiasına görə, xəstəxananın şəhər poliklinikasının müdiri Məmmədrəsul Teyyubov pul almadan sənədə möhür vurmurmuş: “Anamın pensiya işi ilə bağlı xəstəxanaya müraciət etmişdik. Həkim M.Teyyubov anamın sənədinə möhür vurmadı. Axırda araya tanışları salandan, 100 manat da pul verəndən sonra baxmağa razılıq verdi”.
Daha bir rayon sakini Qurban Ramazanov da iki il bundan əvvəl xəstəxanadan şikayətçi olubdur. O danışırmış ki, bir neçə gün öncə uşağının qolu sındığı üçün xəstəxanaya aparıb. Lakin gecə növbəsində olan rentgenoloq yerində olmadığından onu evindən gətirmək məcburiyyətində qalıb: ” Uşağın qolu sınıb, ağrıdan dayana bilmir, həkim yoxdur. Axır, gedib həkimi özüm evindən gətirmişəm. Xəstəxana işçiləri də elə davrandı ki, elə bil belə də olmalıdır – xəstə həkimi özü gətirməlidir”. Q. Ramazanovun dediyinə görə, bunlardan sonra hələ həkimə əlavə pul da verib: “Həm köməkçisinə, həm də həkimin özünə əlavə pul vermişəm, hələ deyirlər ki, azdır”. Şikayətçinin sözlərinə görə, həkimlərin savadında problem yoxdur, sadəcə müdiriyyət rüşvətə bulaşıb və onları işləməyə qoymur: “Həkimlər də deyir ki, işə pul verib girmişəm, o pulu yığıb gedəcəm”.
Zaqatala rayon Mərkəzi Xəstəxanasından bu qədər şikayətin olması birinci dəfə deyil. İllərdir ki, Kütləvi İnformasiya Vasitələrində (KİV) rayon sakinlərinin xəstəxanadan şikayətləri paylaşılır. Şikayətlər daha çox xəstələrə düzgün diaqnozun qoyulmaması, həkim səhlənkarlığı, rüşvətxorluq və buna bənzər digər məsələlərlə bağlı olur. Sakinlər hər dəfə eyni problemləri səsləndirirlər. Bəs bu problemlər niyə hələ də həll olunmur? Görəsən əlaqədar qurumlar nə zaman lazımi tədbirlər görəcəkdir?!
Qarşı tərəfin mövqeyini dinləməyə və dərc etməyə hazırıq. //Aktualxeber//
Abşeron rayon Masazır qəsəbə Bələdiyyəsinin sədri Azər Quliyevdən şikayət var.
AzFakt.com saytına vətəndaş Əkbərov Fuad Mehtixan oğlu tərəfindən edilən şikayətdə bildirilir ki, Masazır qəsəbə bələdiyyəsinin sədri Azər Quliyev ondan 10 min manat pul alıb və onu aldadaraq külli-miqdarda ziyana salıb.
Şikayətçi Fuad Abbasov qeyd edir ki, 20 gün öncə yaxın adamının tanışına məxsus Masazır qəsəbəsində yerləşən torpaq sahəsini almaq üçün bələdiyyə sədri Azər Quliyevə müraciət etdim. Müraciətimdən sonra Azər Quliyev bələdiyyə işçiləri ilə həmin torpaq sahəsinə baxış keçirdilər və ərazinin həqiqətən də satan şəxsə məxsus olduğunu təyin etdilər. Bundan sonra Fuad Əkbərov şahidlər vasitəsilə torpaq sahəsini satan şəxsə 20 (iyirmi) min manat, bələdiyyə sədri Azər Quliyevə isə 10 (on) min manat pul verdiyini bildirir. Fuad Əkbərov Azər Quliyevə 10 min manatı torpaq sahəsinin sənədləşdirilməsi, rüsumu və digər məsələlər üçün verdiyini deyir.
Şikayətçi bildirir ki, Azər Quliyevə 10 (min) manatı verdikdən sonra ərazinin kadastr və yerquruluşu planınında onun adı yazılıb, sənəd bələdiyyə sədri tərəfindən möhürlənib və Dövlət Əmlak Xidmətinə göndərilib.
Fuad Əkbərov bildirir ki, 8 gün öncə tanımadığı bir şəxs əraziyə gələrək, torpağın ona məxsus olduğunu iddia edərək orada qanunsuz tikinti işlərinə başlayıb. Həmin şəxsin əlində torpağın və tikintiyə aid heç bir rəsmi sənədin olmamasına baxmayaraq, Abşeron rayon icra hakimiyyətinin himayəsi altında tikintini davam etdirir.
Şikayətçi qeyd edir ki, bələdiyyə sədri Azər Quliyev və qəsəbə icra nümayəndəsi torpağı tikən şəxsin Milli Məclisin deputatlarından birinin qohumu olduğu üçün məsələyə müdaxilə edə bilməyəcəklərini bildiriblər. Bələdiyyə sədri hətta Millət vəkilinin icra başçısı Abdin Fərzəliyevə zəng edərək məsələyə göz yumması üçün xahiş ediyini deyir.
Fuad Əkbərov qeyd edir ki, məhz Azər Quliyevin onu aldatması nəticəsində 30 (otuz) min manat ziyana düşüb. Vətəndaş Masazır qəsəbə bələdiyyəsinin sədrinin bu əməli ilə bağlı Baş Prokrorluğa və Abşeron Abşeron rayon prokurorluğuna şikayət edəcəyini bildirir…
Göyçay rayon sakini, Vətən müharibəsi qazisi Axundov Araz Azər oğlu tərəfindən Hurriyyet.az saytına şikayət məktubu daxil olub. Müharibə iştirakçısının saytımız vasitəsilə Prezident İlham Əliyevə müraciətini olduğu kimi dərc edirik:
“Cənab Prezident!
Mən, Göyçay rayon sakini Axundov Araz Azər oğlu, Vətən müharibəsi qazisiyəm. 21 sentyabr 2020-ci il tarixdə hərbi xidmətə getmişəm. Suqovuşan, Tülküdərəsi və Ağdam istiqamətində gedən döyüşlərdə olduqca fəal iştirak etmişəm. Döyüş gedən vaxtı Tülküdərəsində ağır yaralanaraq təcili hospitala yerləşdirilmişəm.
Müdafiə Nazirliyinin Mərkəzi Hərbi Hospitalında müalicə olunduqdan sonra yenidən müharibə bölgəsinə qayıtmışam. Məhz ona görə də komandirlərim tərəfindən xidməti-xasiyyətnamə ilə təltif olunmuşam. Həmçinin, Azərbaycan Respublikasının Prezidentinin Sərəncamı ilə "Vətən müharibəsi iştirakçısı", "Cəsur döyüşçü", "Suqovuşanın azad olunmasına görə" medallarla təltif edilmişəm.
Bildirmək istəyirəm ki, hərbi xidmətdən təxris olunduğum vaxtdan müalicələrə bağlı yaşayıram. Elə ona görə də köməklik göstərilməsi üçün Göyçay Rayon İcra Hakimiyyəti başçısı Natiq Ağayevin qəbuluna getdim. Onun tapşırığına əsasən, mənə bir neçə dəfə müəyyən məbləğlərdə maddi yardım olundu. Daha sonra Göyçay Rayon İcra Hakimiyyəti Vətən Müharibəsi İştirakçıları və Şəhid Ailələri ilə İşin Təşkili Şöbəsinin müdiri Hikmət Süleymanovun yanına getdim. Ona "Mən pul istəməyə gəlməmişəm. Sadəcə səndən xahişim budur ki, Göyçay Rayon Mərkəzi Xəstəxanasının direktoru Yaşar Əhmədova deyin ki, mənim çatışmayan dərmanlarımı dövlət hesabına təmin etsin", - dedim. O isə "Yaşar kimdir ki, mən ona ağız açım? Get Yaşarın kabinetinin qarşısında intihar elə, bəlkə sənə köməklik göstərdi. Belə də ki, 54 nəfər qazi intihar edib, guya sən ölsən dünya boş qalacaqmı?" - dedi. Onun bu cür münasibətinə öz iradımı bildirdiyim zaman o, məni təhdid etməyə başladı. "Məni əsəbləşdirmə! Sən kimsən axı? İstəyirsənsə, gedək Bəndin başında təkbətək söhbətimizi həll edək" - deyərək qışqır-bağır saldı.
Ola bilər ki, bu yazılı və video müraciətimdən sonra Hikmət Süleymanov həqiqəti boynundan atamağa çalışacaq. Ancaq mənim dəfələrlə rayon icra hakimiyyətinə getməyim, həmçinin müşahidə kameralarında səs yazısı ilə birlikdə hər şey mövcuddur. Harada görünüb ki, dövlət məmuru vətəndaşı, özü də qazini Bəndin başında təkbətək söhbətə (razborkaya) çağırsın?! Mən müharibəyə getməmişdən öncə tamamilə sağlam idim. Mən təxris olunandan bir müddət sonra atam da vəfat etdi.
Vətəni müdafiə etmək borcumdur. Hikmət Süleymanov kimi vəzifəli şəxslərin də borcu odur ki, xalqına layiqli xidmət etsin. Çünki, "Xalqın bir nömrəli xidmətçisi mənəm" - deyən Prezident bütün məmurlara tapşırıq verir ki, "Gedin xalqa xidmət edin, hörmət edin, milləti incitməyin!". Hikmət Süleymanov kimi məmurlar isə ölkə başçısının dediklərinin tam əksinə gedərək, vətəndaşlarda dövlətə qarşı nifrət yaratmağa çalışır. Bu adam nə qanunlara riayət edir, nə də dövlətdən qorxur. O, hətta ölkə başçısı və Birinci vitse-prezident haqqında belə danışmaqdan çəkinmir. Deyirəm ki, "Prezident Administrasiyasının qarşısına gedəcəm, Mehriban xanımın qəbuluna girəcəm". Deyir ki, "Sən bu dövlətə torpaqlar alınana qədər lazım idin. Mehriban xanım sənə köməklik göstərsəydi, əlillik dərəcəsi almağına yardım edərdi".
Cənab Prezident!
Sizdən Vətən müharibəsi qazisi və Azərbaycan Respublikasının vətəndaşı olaraq çox xahiş edirəm, özbaşınalıqlar edən Hikmət Süleymanov barəsində ciddi tədbir görülməsi və müalicələrimin təşkil edilməsi üçün tapşırıq verəsiniz. Sizə çox minnətdarlığımı bildirirəm”.
Redaksiyadan: Yazıda adları qeyd olunan şəxslərin mövqeyini dərc etməyə hazırıq.