Ali Məhkəmənin hakimi Vidadi Cəfərov Hakimlərin Seçki Komitəsinin sədri seçilib. Ali Məhkəmənin saytından görünür ki, o, 1968-ci ildə anadan olub. 2003-cü ildə, yəni 35 yaşında hüquqşünas olub. Yəqin ki, hüquqşünaslıq ikinci ali təhsilidir. 2004-cü ildən hüqüqşünas kimi çalışmağa başlayıb. 36 yaşınadək olan iş təcrübəsi naməlumdur. Artıq 2007-ci ildə nəinki hakim, birbaşa Sumqayıt Hərbi Məhkəməsinin sədr vəzifəsininin icraçısı təyin olunub. Halbuki, həmin anda hüqüqşünas kimi cəmi 3 illik stajı olub. Konstitusiyanın 126-cı maddəsinə görə isə yalnız hüquqşünas ixtisası üzrə 5 ildən artıq işləyən vətəndaş hakim ola bilər. Yəni hakim olmaq üçün Konstitusiya ilə tələb olunan staja malik olmayıb. Yəqin, bundan sonra stajı çatmayan hakimlərin sayı daha da çoxalacaq.

Görünən odur ki, məhkəmə-hüquq islahatları yeni mərhələyə, qanunun aliliyi deyil, inqilabi məqsədəuyğunluq dövrünə qədəm qoyub. Axırımız xeyir olsun!

P.S. Bu hakimi şəxsən tanımıram, onda heç vaxt işim olmayıb (dünənədək mövcudluğundan belə bixəbər idim). 2022-ci ilədək Sumqayıt məhkəmələrində çalışıb. Bircə onu bilirəm ki, ADA-da dərs deyir. Amma hansısa elmi əsəri rastıma düşməyib

Əkrəm Həsənov
Ekspert – DİA.AZ

Müəllimlərin işə qəbul imtahanından narazı qalan müəllimlər var.

Elm və Təhsil Nazirliyinin qarşısına toplanan azərbaycan dili, ədəbiyyat müəllimlərinin şikayətləri imtahanlardandır.

"Müəllimlər iddia edir ki, imtahan üçün tərtib edilən sualların böyük əksəriyyəti ya səhv, ya da mövzudan kənar olub."

Şikayətçi məllimlər bildirir ki, tələbləri imtahanın yenidən keçirilməsidir.

Müəllimlərin şikayəti ilə bağlı Elm və Təhsil Nazirliyindən bildirildi ki, bu gün Nazirliyin İnsan resursları şöbəsinin müdiri Eşqi Bağırov tərəfindən həmin namizədlər qəbul edilib və apellyasiya müraciəti etmə qaydası izah olunub və tövsiyə edilib.

Əlavə olaraq qeyd olunub ki, Azərbaycan dili və ədəbiyyat fənni üzrə imtahan 1 seans keçirilib və namizədlərə eyni məzmunda test tapşırıqları təqdim olunub.

Teref.Az Xəzər TV-yə istinadən mövzu ilə bağlı daha ətraflı videomaterialı təqdim edir:

Teref.az

Xəbər verdiyimiz kimi dövlətə 10792.41 AZN vergi borcu olan "VNM SERVİS" MMC “Dövlət satınalmaları haqqında” Qanunu "çeynəyərək" tenderlərə qatılıb və bu ay ərzində 3, ötən ay isə 21 tenderin (41 gündə 24 tender) qalibi olub.

32gun.az-ın məlumatına görə, hələ də borcunu tamamı ilə ödəyib bitirməyən şirkət daha iki tenderdə qalib seçilib.

Belə ki, adıçəkilən şirkət Ağcabədi Suvarma Sistemləri İdarəsinin "Yağlayıcı və sürtkü materiallarının alınması" ilə bağlı elan etdiyi tenderdə qalib olub və 25.627,36 AZN qazanıb.

Abşeron Suvarma Sistemləri İdarəsinin "Nəqliyyat vasıtələri üçün sürtkü yağlarının satınalınması" ilə bağlı elan etdiyi tenderdə də qalib olaraq tərəflər arasında 22.240,64 AZN-lik müqavilə imzalanıb.

Bir neçə gün öncə 10792.41 AZN vergi borcu olduğu üzə çıxan "VNM SERVİS" MMC-nin hazırki borcu 6244.41 AZN təşkil edir.

Qeyd edək ki, nizamanmə kapitalı 10 AZN olan şirkətin qanuni təmsilçi VÜQAR NAĞIYEV MƏHƏMMƏD OĞLUdur.

“Dövlət satınalmaları haqqında” Qanun vergi borcu olan şirkətlərin, şəxsin tenderdə iştirakını qadağan edir.

Lerik rayonunda yerləşən “Relax” İstirahət Mərkəzinin 1.2 hektar sahəsi boşaldıla bilər.

Bu sözləri Qaynarinfo-ya Ekologiya və Təbii Sərvətlər Nazirliyi yanında Meşələrin İnkişafı Xidmətinin rəsmisi Sadiq Salmanov deyib.

Xidmət rəsmisi vurğulayıb ki, istirahət mərkəzi üçün nəzərdə tutulan yerdən əlavə meşə fondu ərazisinə daxil olan 1.2 hektar sahə qeyri-qanuni olaraq zəbt edilib:

“Hazırda bu ərazilərdə obyektlər də tikilib. Regional Ekologiya İdarəsi tərəfindən sözügedən əraziyə baxış da keçirilib. Hazırda iş Şirvan İnzibati Məhkəməsində “Relax” İstirahət Mərkəzi tərəfindən zəbt edilən 1.2 hektar meşə fonduna aid torpaq sahənin boşaldılması tələb edirik. Sözügedən ərazidə mövcud olan tikilərin sökülməsini və ərazi tam boşaldılmasını istəyirik. Hər şey məhkəmənin qərarından aslıdır”.

Qeyd edək ki, “Relax” İstirahət Mərkəzi deputat İqbal Məmmədovun nəzarətindədir.

Naxçıvan şəhəri, Kəngərli rayonu, Qarabağlar kənd sakini Səfərova Ofelya Əkrəm qızı tərəfindən Hurriyyet.az saytının redaksiyasına şikayət məktubu daxil olub. Şikayətçi iddia edir ki, Kənd Bələdiyyəsinin sədri artesian quyusunu özü üçün istifadə edir:

"Mən, Səfərova Ofelya Əkrəm qızı, yazaraq sizdən xahiş edirəm ki, problemimi işıqlandırasınız.

Naxçıvanda şikayətə baxan yoxdur, Fuad Nəcəfli şikayətçiləri qəbul etmir. Mən su probleminə görə 3 dəfə onun qəbuluna getmişəm, lakin məni buraxmayıblar ki, qəbul etmir. Vasif Talıbovun vaxtında heç olmasa qorxu var idi, “qəbula gedirəm” deyən kimi bəzi məmurlar qorxurdular. İndi 1 aydır su propblemimi həll etmirlər.

Deməli, Qarabağlar kəndinin artezianını 30 ildir ki, Bələdiyyə sədri öz dədəsinin malı kimi istifadə edir. Kənd sakinləri isə illərdir bulaqdan istifadə edirdi. İndi bulaq tamamilə quruyub. Keçən il susuzluqdan əziyyət çəkdiyim üçün müraciət edib arteziandan gələn suyu bərpa etdirdim. Bərpa olunub xətt verilən kimi, səslərini çıxarmayan kənd sakinləri növbəyə yazıldılar. Keçən ili dava-dalaşla yola verdik getdi.

Bu il yenidən problem ortaya çıxdı. Belə ki, Bələdiyyə sədri Nurəddin Babayev 20 ildir kənddə eyni vəzifədə işləməsinə baxmayaraq, ziyanından başqa xeyrini görən olmayıb. Bələdiyyə sədri bir neçə artezianı zəbt edərək, özünün quşçuluq ferması üçün istifadə edir. Kənd sakinlərinə aid ərziləri də zəbt edib, əkin-biçinlə məşğul olur.

Ali Məclisə şikayətlərim nəticəsində Bələdiyyə sədrinin kürəkəni Amar Hüseynov öz çəkdirdiyim xəttdən mənə su çəkib. Çəksin, buna bir sözüm yoxdur, amma mən o xətti zülmlə çəkdirmişəm, öz yiyələndikləri artezian quyularından niyə götürmür ki? Qəsdən mənim xəttimdən çəkirlər ki, dava düşsün.

Bələdiyyə sədrinin müavini Mehman Hüseynov mənim su xəttimi vurub sındırıb, su yerə axır. Belə insafsızlıq olar? Polis gəlib məni hədələyir, mənə lazımsız sözlər deyilir. Bu nə dərəcədə ədalətlidir? Həmin vaxt orada sahə müvəkkili və bələdiyyə sədri də olub. 2 dəfə su xəttini öz hesabıma təmir etdirmişəm. Bunlar dövlətin hesabına qazılmış artezian quyularını ələ keçirib, bütün kənd sakinlərini susuz qoyublar.

Polis mənim şikayətimə baxmır, araşdırmır.

Şikayətlə çəkdirdiyim su zəif gəlir, ona belə göz qoyublar. Suyu gur olan artezianlar isə ancaq Bələdiyyə sədri üçün işləyir. Bunu yoxlamaq çətin deyil, sadəcə, arada rüşvət var deyə, orqanlar susur.

Harınlamış məmurların əlində qalmışıq, Naxçıvan sakinlərinin 80 faizi acınacaqlı vəziyyətdə yaşayır. Söz deyib səsini çıxardanı da şərləyib həbs edirlər. Bələdiyyə sədri mənim ata-anamı söyür haqsız yerə, kim verib bu səlahiyyəti o insanlara? Nə vaxt bitəcək Naxçıvandakı bu özbaşınalıq? 20 il Bələdiyyə sədri işləyən şəxsin əmlakı yoxlanılsın, sakinlər arasında söhbət aparılsın, görün bir o adamın faydalı əməli varmı?

Vallah, bezmişəm, tək qadınam. Nə olar ki, Fuad Nəcəfli şikayətləri qəbul edə, bütün bu özbaşınalıqlara son qoya. Kimin yanına gedirsın, deyirlər, “əlindən gələni et”. Bu nə deməkdir? Polis vətəndaşa belə söz niyə deməlidir?! Bunu ancaq harınlamış məmurlar deyər".

Redaksiyadan: Yazıda adları keçən şəxslərin mövqeyini dərc etməyə hazırıq.

“Əgər onlar bir az da belə davam etsələr, mən bu dezinformasiya təbliğatı ilə kimlərin məşğul olduğunu mətbuata açıqlayacam”

“Elm və Təhsil Nazirliyi müraciətlərə şablon cavablar verir...”

“Elm və Təhsil Nazirliyi bildirir ki, bəzi müəllimlər hansısa sözü yaza bilmir və ya çubuqlu bölməni edə bilmir. Əgər biz bütün həqiqətləri demək istəyiriksə, onda nazirlik bu tələbələrin hansı universitetləri bitirdiyini desin, onlar da bundan nəticə çıxarsınlar. Bu ali təhsil müəssisələrinin adları ictimaiyyətə açıqlanmalıdır. Bir tərəfdən tələbələr məzun olur, diplom verilir, digər tərəfdən isə onlar təkrar sertifikasiyaya cəlb edilirlər. Buna həm vaxt, həm enerji, həm də dövlətin vəsaiti gedir”.

“AzPolitika.info” xəbər verir ki, bunu Milli Məclisin deputatı Ceyhun Məmmədov mətbuata açıqlamasında bildirib.

Millət vəkilinin bu açıqlamasından sonra onun Təhsil nazirindən tanışı ilə bağlı xahiş etdiyi və rədd cavabı aldığı üçün Emin Əmrullayevi qərəzli şəkildə tənqid etdiyinə dair iddialar gündəmə gəlib.

Ceyhun Məmmədov “AzPolitika.info”-ya açıqlamasında yayılan iddiaların əsassız olduğunu bildirib: “O iddiaların heç bir əsası yoxdur. Əgər kimdəsə belə bir fakt varsa, həmin faktı təqdim etsin və biz bunu müzakirə edək. Mənim bu günə kimi Elm və Təhsil Nazirliyindən heç bir şəxsi xahişim olmayıb. Təəssüf ki, kimlərsə bizim tənqidlərimizdən nəticə çıxarmaq, mövcud problemləri həll etmək əvəzinə belə bir yola baş vurublar”.

Deputat təəssüf hissi ilə bildirib ki, əksər hallarda bir sıra nazirliklərdə, xüsusən də Elm və Təhsil Nazirliyində deputatların müraciətlərinə o qədər də normal yanaşılmır və reaksiya verilmir: “Biz bunu dəfələrlə görmüşük. Məsələn, Milli Məclisdə hansısa bir məsələ ilə bağlı ünvanlanan müraciətə Elm və Təhsil Nazirliyi şablon cavablar verir. Həmçinin, bu qurum tərəfindən seçicilərin, ayrı-ayrı şəxslərin müraciətinə də adekvat reaksiyalar verilmir”.

“Ümumiyyətlə, mənim iş fəaliyyətim boyu heç kimdən nəsə şəxsi xahişim olmayıb. Ona görə də bunlar ucuz təbliğatdır. Təəssüf ki, kimlərsə özlərini Elm və Təhsil Nazirliyinə yaxın göstərmək, yaltaqlanmaq üçün belə kobud səhvlərə yol verirlər. Bizim Elm və Təhsil Nazirliyi ilə əməkdaşlığımız var, onların tədbirlərində iştirak edirik. Məsələn, bir az bundan əvvəl mən MİQ imtahanında olmuşam”,- deputat əlavə edib.

Deputat son vaxtlar Elm və Təhsil Nazilriyi ilə bağlı tənqidi çıxışlarına da aydınlıq gətirib: “Bu açıqlamaların məğzi odur ki, müəllimlərə qarşı bu cür münasibət onları dismotivasiya edir. Mən əslində nazirliyə tövsiyə edirəm ki, siz bu qədər müəllimi özünüzdən küsdürməyin, tədrisə marağını azaltmayın. Dediyim kimi, bu sadəcə bir tövsiyədir. Sertifikasiya ilə bağlı dediklərimə gəlincə, mən bildirmişəm ki, universitetlərdə təhsilin səviyyəsini artırmalıyıq. Görünür, bu bəzi insanları narahat edir və onlar təzə metod tapıblar. Guya Etibar Əliyevin, Ceyhun Məmmədovun kimləsə bağlı şəxsi xahiş etdiyinə dair yalan iddialar yayıblar. Mənim bütün tənqidlərim obyektivdir. Heç kim deyə bilməz ki, mənim hər hansı qərəzli bir tənqidim olub”.

Deputat Elm və Təhsil Nazirliyinin bu məsələyə aydınlıq gətirməli olduğunu bildirib: “Əgər bunu Elm və Təhsil Nazirliyi edirsə, onlar bunu etməməlidirlər. Eyni zamanda, nazirliyin ictimaiyyətlə əlaqələr sektoru da bu məsələyə aydınlıq gətirməlidir. Təqdim etsinlər ki, Ceyhun Məmmədov hansı tarixdə, kimdən nə xahiş edib? Azərbaycan ictimaiyyəti, jurnalistləri, ziyalıları məni yaxşı tanıyır. Onlar mənim fəaliyyətimdən xəbərdardırlar. Ona görə də, belə adamlar bu yolla heç nəyə nail ola bilməyəcəklər. Mən təxminən bu adamların kim olduğunu da bilirəm. Əgər onlar bir az da belə davam etsələr, mən bu dezinformasiya təbliğatı ilə kimlərin məşğul olduğunu mətbuata açıqlayacam”.