 |
|
|
Bakı şəhər sakini Sultanov Rizvan Səməd oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi bildirir ki, Əmək və Əhalinin Sosial Müdafiəsi Nazirliyi haqsız yerə onun əlillik pensiyasını kəsib:
“Mən, Sultanov Rizvan Səməd oğlu, yazaraq xahiş edirəm ki, problemimi işıqlandırasınız.
Qeyd edim ki, 4 ildir ayağımda ciddi problemlərin olmasına baxmayaraq, mənə əlillik dərəcəsi vermirlər. İmtina səbəbi olaraq bildirilir ki, əlillik meyarları təsdiq olunmamışdır.
Bu, müharibənin fəsadıdır, açıq-aydın görünür. Xəstəxanadan çıxıram, reabilitasiya mərkəzlərinə gedirəm. İş qüvvəm yoxdur. Çörək pulu qazanıb, ailəmə baxa bilmirəm.
Hazırda iş İnzibati Məhkəmədədir. Mən, haqqım olan əlilliyimi tələb edirəm. Xəstəxanada yatdığım müddətdə bütün həkimlər deyirlər ki, sənə əlillik düşür. Lakin nazirlik imtina verir. Dizdən aşağı ayağım qatlanmır, sağ ayağımı ancaq əsanın köməyi ilə hərəkət etdirirəm. Mənim əlilliyimi hərbi komissiyanın üzvü Şücaət Əliyev kəsmişdir. 16 il pensiya almışam, sonradan kəsiblər.
Hakimin ədalətli qərarını gözləyirəm. Ayağımda inkişaf yaxşı getmir. Ayağımın sümüyü əriyib, tamamilə yox olub. Bu səbəbdən də ayaq üstə dura bilmirəm".
Məsələ ilə bağlı Dövlət Tibbi Sosial Ekspertiza və Reabilitasiya Agentliyinə İctimaiyyətlə əlaqələr şöbəsi ilə əlaqə saxladıq. Qurumdan bildirdilər ki, Bakı şəhər sakini 1978-ci il təvəllüdlü Sultanov Rizvan Səməd oğlu əlilliyinin qiymətləndirilməsi ilə bağlı tibb müəssisəsi tərəfindən rəsmiləşdirilən forma-88 göndərişləri əsasında 03.07.2021, 05.03.2022 və 16.12.2024-cü il tarixlərdə Dövlət Tibbi-Sosial Ekspertiza və Reabilitasiya Agentliyində əyani müayinə edilib:
"Agentliyin həkim-ekspertlərinin hər bir müayinəsi zamanı vətəndaşın hazırki sağlamlıq vəziyyətinin əlillik təyinatına əsas vermədiyi müəyyən edilib.
Bu səbəbdən də Azərbaycan Respublikası Nazirlər Kabinetinin 13 may 2022-ci il tarixli 187 nömrəli Qərarı ilə təsdiq edilmiş “Əlilliyin müəyyən olunması meyarları”na müvafiq olaraq Diaqnoz əlillik əlaməti təyin etmir barədə qərar qəbul edilib".