“Azərbaycanla sülh müqaviləsi bir neçə gün ərzində imzalana bilər”.
Ermənistan mediasının məlumatına görə, bunu jurnalistlərə Ermənistan parlamentinin spikeri Alen Simonyan deyib.
“Demişdim ki, bu sülh müqaviləsi on və ya beş gün ərzində imzalana bilər. Biz öz təkliflərimizi göndərmişik, bu, artıq altıncı mübadilədir. Əgər Azərbaycan heç nəyi dəyişməsə, yeni təkliflər irəli sürməsə․․․ bunu bir neçə gün ərzində etmək olar”, - deyə Simonyan bildirib.
Spiker müəyyən müddətdən sonra, ola bilsin ki, ermənilərin Azərbaycanda yaşamağa gələcəyini, azərbaycanlıların bir qisminin isə Ermənistana gedib ticarətlə məşğul olacağını istisna etməyib.
“Ermənilər və gürcülərlə olduğu kimi. Bəli, biz sülhə doğru irəliləyirik, başqa cür ola bilməz. Münaqişədə olduğumuz və bunun həlli mümkün olmayan məsələ olduğu barədə iddialar mənim üçün qəbuledilməzdir. Tarix çoxlu hallar bilir: İngiltərə və Fransa 116 il müharibə edib, bir-birlərini qırıblar. Bu gün İngiltərə və Fransa ən yaxın müttəfiqlərdir”, - deyə Simonyan bildirib.
Onun sözlərinə görə, belə bir nəticə bu gün və ya sabah olmaya bilər, ancaq Ermənistan və Azərbaycan eyni regiondadırlar və bütün problemləri həll etməlidirlər.

Mövzu ilə bağlı "Sherg.az"a danışan Demokratiya və İnsan Hüquqları Komitəsinin sədri, hüquq müdafiəçisi Çingiz Qənizadə bildirib ki, sülh müqaviləsinin yaxın 10-15 gün ərzində imzalanacağı ilə bağlı Ermənistan parlamentinin spikeri Alen Simonyan noyabrın sonlarında açıqlama vermişdi:
"Bu bəyanat isə Azərbaycanın Qazax rayonu istiqamətində Ermənistan və Azərbaycan baş nazirlərinin müavinləri səviyyəsində delimitasiyası komissiyasının iclası keçirilən günlərə təsadüf etdi. Sülh sazişi təbii ki, imzalanmalıdır. Amma Simonyanın bu yeni ifadəsi çərçivəsində onların bizim təkliflərə nə reaksiya verdiyini bilmirik. Çünki müzakirələr predmenti mətbuat üçün o qədər də açıq deyil. Sülh sazişi Ermənistanın istəkləri ilə deyil, məhz Azərbaycanın təklifləri ilə mümkündür. Azərbaycanın irəli sürdüyü beş müddəa beynəlxalq hüquq normalarının prinsipləri ilə tam üst-üstə düşür və bütün dünyada qəbul edilmiş formadır. Ona görə də Ermənistan sülh müqaviləsi istəyirsə, Azərbaycanın təkliflərinə normal yanaşmalıdır".

Ç.Qənizadə vurğulayıb ki, gələcəkdə sülh sazişi qəbul edildikdən və kommunikasiyalar açıldıqdan sonra müəyyən əlaqəlar qurula bilər, amma buna zaman lazımdır:
"Çünki Ermənistan ictimaiyyətində türk və azərbaycanlılara qarşı çox mənfi beyni olan nəsil yetişib. Amma zaman hər şeyi getdikcə yumşaldır. Düzdür, Ermənistanın yüzilliklər ərzində Azərbaycan xalqının başına gətirdiyi cinayətləri unuda bilmərik. Ancaq Ermənistan bizdən asılı olmayaraq qonşumuzdur. Buna görə də qonşular ilə müəyyən əməkdaşlıqlar və münasibətlərin normal olması istiqamətində addımlar atılmalıdır. Dövlətlər bir-birilə uzun müddətli müharibə apardıqdan sonra bir ittifaqda birləşə bilir. Amma Ermənistanın 30 il torpaqlarımızı işğal altında saxlayaraq xarabalığa çevirməsi gələcəkdə onlarla eyni ittifaqda olmağımızı qeyri-mümkün edir. Sadəcə olaraq Ermənistan Azərbaycanın təkliflərinə müsbət cavab verəcəyi təqdirdə yaxın zamanda sülh imzalana bilər".