Yunanıstanın baş naziri Kiriakos Mitsotakis Türkiyə prezidenti Rəcəb Tayyib Ərdoğanla görüşməyə hazır olduğunu bəyan edib.

"Unikal" xəbər verir ki, eyni zamanda, Mitsotakis bu görüş üçün israretməyəcəyini bildirib.


Onun fikrincə, danışıqlar üçün potensial yer Praqa ola bilər.

Mitsotakis Salonikidə keçirdiyi mətbuat konfransında qeyd edib ki, Yunanıstan və Türkiyə arasında təkcə keçmişə deyil, həm də gələcəyə baxan dostluq münasibətlərinin qurulmasını istəyir.

Türkiyə Prezidenti Rəcəb Tayyib Ərdoğan Pakistanın Baş naziri Şahbaz Şəriflə telefon danışığı aparıb. Bu barədə "Report" "Haber Global"a istinadən xəbər verir.

Məlumata görə, telefon danışığında Pakistandakı sel fəlakəti ilə bağlı son vəziyyət və Türkiyənin yardımı müzakirə edilib.

Ərdoğan Pakistanın sel fəlakəti ilə mübarizəsini yaxından izlədiklərini və qardaşlıq əlaqələrinin tələb etdiyi kimi lazımi dəstəyi vermək üçün Türkiyənin səfərbər olduğunu bildirib.

Türkiyə xalqının pakistanlı qardaşlarının yanında olduğunu bildirən prezident Ərdoğan Pakistanına kömək üçün əllərindən gələni etməyə davam edəcəklərini bildirib.

Pakistanın Baş naziri Şərif Türkiyə dövlətinə və xalqına dəstəyə görə təşəkkür edib.

Kiyevdə səfərdə olan ABŞ Dövlət Katibi Entoni Blinken Ukrayna Prezidenti Vladimir Zelenski ilə görüşüb.

APA-nın CNN-ə istinadən xəbərinə görə, görüş zamanı Blinken Zelenskini ABŞ-ın sonuncu təhlükəsizlik yardım tranşı ilə bağlı məlumatlandırıb

“Prezident Bayden açıq şəkildə bildirib ki, biz Ukrayna xalqını lazım olduğu qədər dəstəkləyəcəyik. Mən bu mesajı hələ də suveren və müstəqil Ukraynanın paytaxtı olan, elə bu cür də qalacaq Kiyev şəhərində bir daha Prezident Zelenski və onun komandası üçün vurğuladım”, - deyə Blinken bildirib.

Truss rusların üzərindəki vintləri əvvəlki Baş nazirdən daha bərk sıxmağa başlayacaq

Böyük Britaniyanın xarici işlər naziri Liz Truss Böyük Britaniyanın yeni Baş naziri oldu. Bu, şübhəsiz ki, Kiyev üçün yaxşı xəbərdir. Axı o, Ukraynanın ən böyük dostu olacağına söz vermişdi.

Birincisi, Truss açılış nitqi zamanı bildirdi ki, Boris Consonun siyasətinin davamçısıdır. İkincisi, Truss hələ seçilməmişdən əvvəl Ukraynanı dəstəkləmək mövzusunu fəal şəkildə qaldırmışdı, çünki nazir kimi bir çox qərar və layihələrdə iştirak edib.

Ukrayna mövzusunun özü fikrimcə, ona mövqe tutmağa kömək etdi. Gördüyümə görə, onun qalib gəlməsinə və hakim Mühafizəkarlar Partiyasının yeni lideri olmasına bir çox cəhətdən kömək edən də məhz Ukrayna məsələsi olub. Bundan əlavə, Britaniyada nəhayət, Ukrayna ilə tərəfdaşlığa çox böyük ictimai dəstək var - bu, 84-85 faiz təşkil edir.

Liz Trussın qələbəsi Böyük Britaniyanın Boris Consonun strateji kursunu davam etdirəcəyi anlamına gəlir. Böyük Britaniya ilə Ukrayna arasında münasibətlərin yüksək səviyyəsi və keyfiyyəti qorunub saxlanılacaq.

Bundan əlavə, Truss silah təchizatının gücləndirilməsi kontekstində çox şey vəd edib. Ona görə də biz sifarişlərimizin yüz faiz yerinə yetirildiyini görəcəyimizi proqnozlaşdıra bilərik. Yəni ki, Ukrayna nə tələb edəcəksə, Ukrayna Silahlı Qüvvələri üçün də onu təmin edəcəklər.

Başa düşmək lazımdır ki, britaniyalıların yardım kontekstində amerikalılarla rəqabət aparması kəmiyyət baxımından çətindir. Amma əslində trendi quran ingilislər olub. Unutmayaq ki, bizə ilk gəmi əleyhinə raketləri verən ingilislər oldu.

İlk haubitsaları ingilislər verdi. Sonradan amerikalılar və digər müttəfiqlər bu tendensiyanı davam etdirdilər0.

Böyük Britaniyanın təşəbbüskarlıq baxımından bir nömrəyə çevrilməsinin bir çox yolu var. Və məhz “trendsetter” obrazında Truss özünü sübut edə biləcək. Təşəbbüslərin məhz Britaniyadan gələcəyini gözləməyə əsas var. Ukraynaya əməkdaşlıq və yardım üçün yeni layihələrə məhz ingilislər başlayacaq.

Məsələn, hazırda Britaniyada Ukrayna hərbçilərinin təlimi proqramı həyata keçirilir. Ukraynanın bərpası üçün “Marşal planı” adlanan plan da var ki, bu planda ingilislər də aparıcı mövqe tuta bilərlər.

İndi əsas sual odur ki, Britaniya Xarici İşlər Nazirliyinin rəhbəri kimi Trussun varisi kim olacaq. Bununla belə, Britaniya siyasətçilərinin yaxşı ənənələri var: Baş nazir kürsüsündə oturarkən əvvəllər məşğul olduqları sahəyə təsir etmək imtiyazını özündə saxlayırlar. Ona görə də əminəm ki, Rusiya Federasiyasına qarşı sanksiyalar mütləq zəifləməyəcək.

Yəni ingilislərin Putinə təzyiqi əksinə, daha da artacaq. Truss sələfinin başladığı aktiv rusofobiyanı davam etdirəcək.

Siz başa düşməlisiniz: Truss bir dayaq qazanmalı və nəticəni nümayiş etdirməlidir. Xüsusilə, Consonun ən uğurlu olduğu sahələrdə və bu, xüsusən də Rusiya Federasiyası ilə qarşıdurmada. Bu o deməkdir ki, Truss rusların üzərindəki vintləri əvvəlki Baş nazirdən daha bərk sıxmağa başlayacaq.

Yeri gəlmişkən, yeni seçilmiş Baş nazir artıq “Londonqradın dağıdılması” layihəsinin təşəbbüskarı olub. Yəni artıq Londonda mövcud olan rus oliqarx sistemini məhv etməyə başlayıb. Ona görə də bu, Putinə və onun pul kisələrinə qarşı yeni sanksiyaların fonunda ola bilər. Və ən əsası, o, təcrübəsi baxımından, belə bir missiyaya qadirdir. Yenə də Liz Truss altı nazir postundan sonra çoxlu təcrübə ilə vəzifəyə gəlir.

Müəllif: Aleksandr Kraev - "Ukrayna Prizması" Xarici Siyasət Şurasının eksperti
Mənbə: UNİAN
Müəllif: Turan Abdulla
ayna.az

Azərbaycan və Türkiyə Avropa İttifaqının keçirəcəyi toplantıya dəvət ediləcək
Oktyabrın 6-7-də Avropa İttifaqına sədrlik edən Çexiyanın ev sahibliyi edəcəyi Avropa İttifaqı Liderlərinin Zirvə görüşündən əvvəl “Avropa Siyasi Birliyi” toplantısının keçirilməsi planlaşdırılır.

“Report” xəbər verir ki, bu barədə “Anadolu” agentliyinə Aİ-nin yüksək rütbəli rəsmisi məlumat verib.

Qeyd olunub ki, toplantıya Aİ-nin 27 üzvü ilə yanaşı, Türkiyə, Qərbi Balkan ölkələri Serbiya, Monteneqro, Albaniya, Şimali Makedoniya, Kosovo və Bosniya və Herseqovina, həmçinin Norveç, Lixtenşteyn, İsveçrə, İngiltərə, İslandiya, Ukrayna, Gürcüstan, Moldova, Azərbaycan və Ermənistan liderlər səviyyəsində dəvət olunacaq.

İclasda müzakirə olunacaq əsas mövzular Rusiyanın Ukraynaya hücumu, enerji böhranı və iqtisadi vəziyyət olacaq.

Fransa prezidenti Emmanuel Makron tərəfindən təklif edilən “Avropa Siyasi Birliyi”nin ilk iclası oktyabrın 6-da günorta və axşam Praqada Aİ Sammiti çərçivəsində keçiriləcək. Növbəti gün Aİ liderləri sammit çərçivəsində görüşlər keçirəcək.

Oktyabrın 6-da “Avropa Siyasi Birliyi”nin iclası açılış sessiyası ilə başlayacaq və dəyirmi masa müzakirələri ilə davam edəcək.

Görüşlərdə təhlükəsizlik, sabitlik, enerji, iqlim, nəqliyyat və iqtisadiyyat kimi bir çox mövzu müzakirə olunacaq. Liderlərin ikitərəfli danışıqlar aparacağı günün sonunda şam yeməyi veriləcək.

“Avropa Siyasi Birliyi” ideyası iyun ayında keçirilən Avropa İttifaqı Liderlərinin Zirvə toplantısında Fransa prezidenti Emmanuel Makron tərəfindən gündəmə gətirilib. Aİ rəhbərliyi bu ideyanın liderlər tərəfindən qəbul edildiyini bildirib.

Görüşdə bir sıra məsələlər ətrafında fikir mübadiləsi aparılıb

Rusiyanın xarici işlər naziri Sergey Lavrov ermənistanlı həmkarı Ararat Mirzoyanla görüşüb. AYNA xəbər verir ki, bu haqda Ermənistan Xarici İşlər Nazirliyi məlumat yayıb.

Bildirilib ki, nazirlər regional məsələləri, eləcə də İrəvanla Bakı arasında münasibətlərin nizama salınmasını müzakirə edib.

Rusiya Xariic İşlər Nazirliyinin məlumatına görə, danışıqlar zamanı regionda nəqliyyat və iqtisadi kommunikasiyaların bərpası, Azərbaycan-Ermənistan sərhədinin delimitasiyası və Azərbaycanla Ermənistan arasında sülh müqaviləsinin parametrlərinin işlənib hazırlanması üzrə gələcək addımları müzakirə ediblər.
"Rusiya, Azərbaycan və Ermənistan liderlərinin 2020-ci il 9 noyabr, 11 yanvar və 26 noyabr 2021-ci il tarixli sazişlərinin hərtərəfli yerinə yetirilməsi üzrə öhdəlik təsdiqlənib. Bütün iqtisadi və nəqliyyat kommunikasiyalarının blokdan çıxarılması kontekstində gələcək addımlar müzakirə edilib. Azərbaycan-Ermənistan sərhədinin delimitasiyası və demarkasiyası, eləcə də Ermənistan və Azərbaycan arasında sülh müqaviləsinin parametrlərinin işlənib hazırlanması müzakirə edilib”, - deyə məlumatda qeyd olunur.

Müəllif: Ayna.az

Liz Trass Britaniya Mühafizəkarlar partiyasının lideri seçilib. Bu onun yeni Baş nazir seçilməsi deməkdir.

Hakimiyyətin rəsmi ötürülməsi prosesi çərşənbə axşamı günü Boris Consonun Dauinq Street iqaməthahında çıxışı ilə başlayacaq.

Daha sonra o, istefası barədə Kraliçaya məlumat verməlidir. Bundan sonra Kraliça II Yelizaveta Liz Trassa yeni hökuməti qurmağı həvalə edəcək.

Bununla da 47 yaşlı siyasətçi Böyük Britaniyanın sayca üçüncü qadın Baş naziri olacaq.

Partiyanın deputatları Boris Consonun yerinə keçmək istəyən namizədlərdən birini seçmək üçün beş dəfə səs veriblər, axıra qalanlar maliyyə naziri Rişi Sunak və xarici işlər naziri Liz Trassdir.

Sentyabrın 5-də elan olunan seçkilərin nəticələrinə görə, Liz Trass rəqibini məğlub edib. Trass səslərin 57 faizini qazanıb. Sunakı partiya üzvlərinin 43 faizi dəstəkləyib.

Liz Trass Baş nazir kimi çətin iqtisadi vəziyyətlə üzləşir. Belə ki, inflyasiya son 40 ilin zirvəsinə çatıb və enerji qiymətləri durmadan artmaqdadır.

Bazar ertəsi Liz Trass yaxın günlərdə enerji böhranı ilə bağlı təfərrüatlı plan təqdim edəcəyini vəd edib. Gözlənilir ki, bu, sahədə partiya proqramı cümə günü elan edilsin.

Bundan əvvəl BBC-yə açıqlamasında son iyirmi ildə özünün də daxil olduğu hökumətlərin iqtisadi böyüməyə nail ola bilmədiyini deyən Trassı maliyyə naziri Sunakdan fərqləndirən ən mühüm məqam vergiləri azaltmaq vədidir.

Trass bunun inflyasiyaya səbəb olmayacağını, boğulan iqtisadiyyata təzə nəfəs verəcəyini bildirir.

Trass-ın digər vədləri:

son bir ildə artırılan sosial sığorta haqlarının yenidən azaldılması;
2023-cü ildə 19 faizdən 25 faizə yüksəldilməsi nəzərdə tutulan korporativ vergi artımının ləğv edilməsi;
“Yaşıl” layihələrə xərclənəcək enerjinin qiymətinə əlavə edilmiş verginin dondurulması;
Pandemiya dövründəki vergi borclarının müddətinin uzadılması və və dövlət tərəfindən ödənilməsi;
Ölkənin müxtəlif yerlərində azad ticarət zonalarının yaradılması;
Müdafiə büdcəsi üçün nəzərdə tutulan məbləğin yarım bənd artırılaraq 2026-cı ildə ÜDM-in 2,5 faizinə, 2030-cu ildə isə 3 faizinə çatdırılması.
Valideynləri solçudurlar
47 yaşlı Liz Trass Britaniyanın ikinci qadın xarici işlər naziri olub. Parlamentə seçiləndən sonra hökumətdə daxili və xarici siyasətlə bağlı bir sıra mühüm vəzifələrdə çalışıb.

1975-ci ildə Oksfordda anadan olan Trass-ın atası riyaziyyat professoru, anası tibb bacısıdır. Hər ikisinin solçu olduğunu deyən nazir onların yolunu davam etdirməyib.

Qardaşı bir dəfə BBC radiosuna deyib ki, uşaq vaxtı Lizlə birlikdə “Monopoliya” oynamağı xoşlayıblar və uduzmağa nifrət edən Liz məğlub olmaqdansa yoxa çıxmağı üstün tutub.

Oksford Universitetində fəlsəfə, siyasət və iqtisadiyyat üzrə təhsil alan Trass tələbələr arasındakı siyasi fəaliyyətlərdə fəal iştirak edib; əvvəlcə Liberal Demokrat Partiyasına, sonra isə Mühafizəkarlar Partiyasına üzv olub.

Təhsilini bitirəndən sonra “Shell və Cable & Wireless” şirkətlərində mühasibatlıq departamentində çalışıb, amma hələ o vaxtdan siyasətlə məşğul olmaq istəyib.

Alovlu “pendir” nitqi
Liz Trass vaxtilə məktəb tamaşasında Marqaret Tetçeri canlandırıbmış.

O, siyasət meydanına 2001-ci ildə gəlib, amma 2001 və 2005-ci illərdə deputat seçilə bilməyib.

2006-cı ildə Londonun Qrinviç şəhər şurasının üzvü seçilib. 2008-ci ildən etibarən sağ mərkəzçi “Reform” mərkəzinin vitse-prezidenti vəzifəsini icra edib.

2010-cu ildə – David Cameronun rəhbərliyi dövründə Cənub-Qərbi Norfolk bölgəsindən deputat seçilib.

Elə həmin dövrdə Britaniyanı beynəlxalq səviyyədə gücləndirmək üçün dövlətin iqtisadiyyata müdaxiləsini minimuma endirməyə çağıran şəxslərlə – “Britannia Unchained” kitabının müəllifləriylə bir araya gəlib və Mühafizəkarlar Partiyasında azad bazarın qatı müdafiəçilərindən biri kimi tanınıb.

2012-ci ildə təhsil nazirinin müavini olaraq mühafizəkarlarla liberal demokratların birlikdə qurduğu koalisiya hökumətində təmsil olunub. Təhsil islahatları məsələsində Liberal Demokratlar Partiyasının lideri Nick Clegg-lə qarşı-qarşıya gəlib.

2014-cü ildə ətraf mühit, ərzaq və kənd təsərrüfatı naziri vəzifəsinə təyin edilib.

2015-ci ildəki partiya konfransında Britaniyanın pendir idxalı haqqında uzun və alovlu çıxışına görə bir müddət məsxərəyə qoyulub, amma yüksəlişi davam edib.

2016-cı ildə keçirilmiş referendumda Avropa İttifaqında qalmağa səs verib.

“Sun” qəzeti üçün yazdığı məqalədə “Brexit”-in “üçlü faciə” olacağını, Aİ ilə ticarətdə bürokratiyanı və direktivləri artıracağını qeyd edib. Amma sonradan “Brexit”-in hər şeyi yenidən formalaşdırmaq fürsəti yaratdığını deyərək fikrini dəyişib.

2016-cı ildə – Tereza May hökumətində ədliyyə naziri vəzifəsinə gətirilib. Bir il sonra hökumətin iqtisadi proqramının “ürəyi” olan quruma – Xəzinədarlığa baş katib təyin edilib.

2019-cu ildə – Boris Conson hökumətində beynəlxalq ticarət naziri, sonra isə xarici işlər naziri olub.

Ukraynaya hücumdan bir neçə həftə əvvəl Rusiyanın xarici işlər naziri Sergey Lavrov və Liz Truss-ın birgə mətbuat konfransında soyuq külək əsmişdi
Rusiya Ukraynaya hücum edəndə buna qarşı ən sərt mövqe tutanlardan biri Trass olub. O, Rusiya qoşunlarının Ukrayna ərazisindən çıxarılmalı olduğunu vurğulayıb. Ukraynada döyüşə biləcək britaniyalıları dəstəkləyən açıqlamalarına görə tənqid edilib.

Xarici işlər naziri postunda Aİ və Britaniya arasındakı mübahisəli Şimali İrlandiya Protokolu məsələsini bu qurumla “Brexit”-dən sonra əldə edilmiş razılaşmanın bəzi müddəalarını pozaraq həll etməyə çalışıb, Aİ buna görə Trassı sərt şəkildə tənqid edib.
pressklub

“İlin sonuna qədər Ukrayna Avropa İttifaqına üzv olmaq üçün namizəd ölkə statusunun təqdimatı zamanı qarşıya qoyulan 7 şərtin hamısını yerinə yetirmək əzmindədir. Bu ilin sonunda - gələn ilin əvvəlində rəsmi Kiyev Aİ-yə üzvlüklə bağlı danışıqlara başlamağa hazır olacaq”.

Manset.az “RBK-Ukrayna”ya istinadən xəbər verir ki, bunu Ukraynanın Baş naziri Denis Şmıqal Ukrayna-Aİ Assosiasiya Şurasının yekunlarına dair brifinqdə deyib.

“Biz Aİ-yə üzvlüklə bağlı danışıqlar proseduruna başlamağa hazırıq. Təbii ki, biz həm də bütün sahələr - iqtisadi, nəqliyyat, rəqəmsal və s. üzrə vizasız rejimə daxil olmaq üçün həmin iddialı planları yerinə yetiririk”, - D.Şmıqal bildirib.

Onun sözlərinə görə, Ukrayna cəmiyyətinin və hökumətinin məqsədi qısa müddətdə Aİ-yə tam inteqrasiya və üzv olmaqdır.

Hökumət başçısı onu da əlavə edib ki, Aİ ilə Assosiasiya Sazişi hazırda, demək olar, 65% yerinə yetirilib və Ukrayna onun icrasını mümkün qədər tez başa çatdırmaq niyyətindədir.